ᐱᖓᓱᑦ ᒪᓕᒐᑦ ᐊᓂᒍᖅᑎᑕᐅᔪᑦ, ᐱᖓᓱᑦ ᒪᓕᒐᓕᐅᖅᑏᑦ ᑕᐃᒫᖅᑐᑦ ᐅᑯᐊ ᑕᓪᓕᒪᒋᔭᖓᓂᒃ ᒪᓕᒐᓕᐅᖅᑏᑦ ᐱᐊᓂᒃᑎᓪᓗᒋᑦ

ᐃᒥᐊᓗᒃᒥ ᑖᒃᓰᔭᖅᑎᑦᑎᓂᖅᒧᑦ ᒪᓕᒐᖅ ᐊᑐᕈᓐᓃᖅᑎᑕᐅᔪᖅ, ᐊᒻᒪ ᓇᖕᒥᓂᖃᕐᓂᕐᒧᑦ ᓄᓇᒥ ᑖᒃᓰᔭᕈᑎᒃᓴᖅ ᐊᓂᒍᖅᑎᑕᐅᓪᓗᓂ ᓈᒻᒪᒋᔭᐅᙱᒃᑲᓗᐊᖅᑎᓪᓗᒍ

ᑭᒡᒐᖅᑐᐃᓚᐅᖅᖢᓂ ᑕᓯᐅᔭᕐᔪᐊᕐᒥ ᐊᕐᕌᒍᑦ ᖁᓕᑦ ᐅᖓᑖᓂᒃ ᐊᒻᒪᓗ ᒪᓕᒐᓕᕆᕕᒡᔪᐊᕐᒥ ᐅᖃᖅᑎᐅᓚᐅᖅᖢᓂ ᒫᓇᐅᓵᖅᑐᖅ, ᐋᓚᓐ ᕋᒻᐴᑦ ᑐᓴᖅᑎᑦᑎᓕᓚᐅᕐᑐᖅ ᓂᕈᐊᒐᒃᓴᐅᔾᔮᔪᓐᓃᕐᓂᖓᓂᒃ ᑭᖑᓪᓕᕐᒥᒃ ᓂᕈᐊᕕᒡᔪᐊᕐᓇᐅᓕᕐᐸᑦ. (ᐊᔾᔨᓕᐅᕆᔨ ᒥᓚᓂ ᐅᕆᑦᓵᑦ)

By ᒥᓚᓂ ᐅᕆᑦᓵᑦ

For an English version of this story, see 3 bills pass, 3 MLAS say goodbye as 5th legislature wraps up

ᐊᕐᕌᒍᓂᒃ ᑎᓴᒪᓂᒃ ᑭᒡᒐᖅᑐᖅᑕᖏᑦᑕ ᐃᓱᒫᓘᑎᖏᓐᓂᒃ ᓴᖅᑭᑎᑦᑎᑲᑕᓚᐅᖅᖢᑎᒃ, ᒥᓂᔅᑕᓂᒃ ᖃᐅᔨᓇᓱᑲᑕᒃᐸᒃᖢᑎᒃ ᐊᒻᒪᓗ ᒪᓕᒐᓕᐅᑲᑕᒃᖢᑎᒃ, ᓄᓇᕗᒥᑦ ᑕᓪᓕᒪᒋᔭᖓᓂ ᑲᑎᒪᔨᕐᔪᐊᑦ ᑭᖑᓪᓕᖅᐹᒥ ᑲᑎᓚᐅᕐᑐᑦ ᓯᑎᐱᕆ 16-ᒥᒃ.

ᒪᓕᒐᓕᐅᕐᑎᐅᕋᑖᖅᑐᑦ ᐊᓂᒍᖅᑎᑦᑎᓚᐅᖅᑐᑦ ᐃᓚᖏᓐᓂᒃ ᒪᓕᒐᕐᓂᒃ, ᐊᑐᕈᓐᓃᖅᑎᑦᑎᓪᓗᑎᒃ ᐃᓚᖏᓐᓂᒃ, ᐊᒻᒪᓗ ᐊᑐᓂ ᐅᑎᒃᑲᓐᓂᕐᓂᐊᕆᐊᒃᓴ ᐋᒃᑲᓘᓐᓃᑦ ᐅᖃᓪᓚᒃᖢᑎᒃ ᑭᖑᓪᓕᕐᒥᒃ ᓂᕈᐊᕐᓇᐅᓛᖅᑐᒥᓐ ᐅᒃᑑᐱᕆ 25-ᖑᓕᖅᐸᑦ.

ᓯᕗᓕᐅᕐᑎ ᔫ ᓴᕕᑲᑖᖅ ᐅᖃᓚᐅᕐᑐᖅ ᓂᕈᐊᒐᒃᓴᐅᒃᑲᓐᓂᕐᓂᐊᕐᓂᕋᖅᖢᓂ ᐊᕐᕕᐊᑦ ᓂᒋᐊᓂᒃ ᑭᒡᒐᖅᑐᐃᓗᓂ.

“ᒥᓂᔅᑕᐅᖃᑎᒃᑲ ᐅᕙᖓᓗ ᐱᓕᕆᐊᕆᓚᐅᖅᑕᑦᑎᓐᓂᒃ 2018-ᒥᑦ ᐱᒃᑯᓕᓯᒪᕗᒍᑦ, ᐊᒃᓱᕈᕈᓘᔭᕐᓇᖅᑐᓂᒃ ᐊᖅᑯᓵᖅᓯᕙᒃᑲᓗᐊᖅᖢᑕ,” ᓴᕕᑲᑖᖅ ᐅᖃᖅᑐᖅ, ᐅᖃᖅᖢᓂ ᓄᓇᕗᑦ ᖁᑦᑎᓛᒥᒃ ᐊᑭᑭᓛᒥᒃ ᐃᖅᑲᓇᐃᔭᖅᑎᓂᒃ ᐊᑭᓕᖅᓱᐃᔾᔪᑎᖃᕐᓂᖏᓐᓂᒃ $16 ᐃᑲᕐᕋᒧᑦ, ᐊᒻᒪᓗ ᓄᓇᕗᒥᑦ ᐃᓱᒪᒃᑯᑦ ᐋᓐᓂᐊᖃᖅᑕᐃᓕᓂᕐᒧᑦ ᒪᓕᒐᖅᒥᒃ ᐊᒻᒪᓗ ᓄᑖᓂᒃ ᐋᓐᓂᐊᕕᖕᓂ ᒪᑐᐃᖅᑐᖃᕐᓂᐊᓕᖅᖢᓂ ᓴᓂᑭᓗᐊᕐᒥᑦ ᐊᒻᒪ ᑭᙵᓂᑦ.

ᓴᕕᑲᑖᖅ ᐅᖃᐅᓯᖃᓚᐅᕐᒥᔪᖅ ᐊᓯᖏᓐᓂᒃ ᐱᓕᕆᐊᕆᔭᐅᓂᑯᓂᒃ ᐃᓚᖃᖅᖢᓂ 240-ᓂᒃ ᐃᓄᖕᓂ ᐃᖅᑲᓇᐃᔭᖅᑎᑖᕐᓯᒪᓕᕐᓂᖏᓐᓂᒃ ᓄᓇᕗᒥᑦ ᒐᕙᒪᒃᑯᑦ, ᐊᒻᒪᓗ 200 ᑐᖏᑦᑎᐊᖓᓂ ᐃᒡᓗᒃᓴᓂᒃ ᓴᓇᓂᐊᕐᓂᖏᓐᓂᒃ ᑕᒪᑐᒪᓂ ᐊᕐᕌᒍᒥᒃ ᐊᒻᒪᓗ ᓄᑖᕐᒥᒃ ‘ᐋᖅᑭᒋᐊᕐᕕᒃᒥᒃ’ ᐃᑲᔪᖅᑕᐅᕕᐅᓪᓗᓂ ᒪᒥᓴᕐᕕᒃᓴᖅ.

ᓴᕕᑲᑖᖅ ᐃᓚᒋᔭᐅᔪᖅ 17-ᓂᒃ ᒪᓕᒐᓕᐅᖅᑎᓂᒃ ᓂᕈᐊᒐᒃᓴᐅᒃᑲᓐᓂᕐᓂᐊᓂᕋᖅᑐᓂᒃ ᑕᒪᓐᓇᓗ ᐱᒋᐊᕐᓂᐊᖅᖢᓂ ᓇᒡᒐᔾᔭᐅᒥᑦ — ᑕᕝᕙᓂᑦᑕᐅᖅ ᐅᓪᓗᕐᒥᒃ ᒐᕙᒪᑐᖃᒃᑯᑦ ᓂᕈᐊᖅᑎᑦᑎᓂᐊᖅᖢᑎᒃ.

ᐋᓚᓐ ᕌᒻᐳᑦ, ᑕᓯᐅᔭᕐᔪᐊᕐᒥᒃ ᑭᒡᒐᖅᑐᐃᔪᖅ ᐊᕐᕌᒎᓕᖅᑐᓂᒃ 13-ᓂᒃ ᑐᓴᖅᑎᑦᑎᓚᐅᕐᑐᖅ ᓂᕈᐊᒐᒃᓴᐅᔾᔮᙱᓐᓂᖓᓂᒃ. “ᐅᓇ ᐅᓪᓗᖅ ᐃᒃᐱᖕᓇᓂᖃᕈᓘᔭᓚᐅᕐᑐᖅ ᐅᕙᓐᓄᑦ,” ᑎᑎᕋᖅᓯᒪᓚᐅᕐᑐᖅ ᖃᕋᓴᐅᔭᒃᑯᑦ ᐅᖃᓪᓚᓚᐅᖅᖢᓂ ᐃᓚᐅᔾᔮᔪᓐᓃᕐᓂᖓᓂᒃ.

“ᐱᑕᖃᕆᐊᖃᓕᕐᒪᓐ ᓄᑖᓂ ᐃᓱᒪᓕᐅᕆᔪᓐᓇᖅᑐᒥᒃ ᐊᒻᒪᓗ ᐱᓕᕆᐊᖃᕈᓐᓇᑦᑎᐊᖅᑐᒥᒃ ᓴᓂᑭᓗᐊᕐᒥᐅᓄᑦ.”

ᕌᒻᐳᑦ ᐅᖃᖅᑎᒋᔭᐅᓚᐅᕐᑐᖅ ᒪᓕᒐᓕᕆᕕᒡᔪᐊᕐᒥᓐ ᑭᖑᓪᓕᖅᐹᒥ ᓂᕈᐊᖅᑕᐅᑎᓪᓗᒍ.

ᐸᐅᓗᓯ ᕿᔪᒃᑖᖅ, ᒪᓕᒐᓕᐅᖅᑎ ᐅᖅᑯᕐᒥᐅᓄᑦ, ᐅᖃᓚᐅᕐᒥᔪᖅ ᓂᕈᐊᒐᒃᓴᐅᔾᔮᔪᓐᓃᕐᓂᕋᖅᖢᓂ.

ᐃᓕᓴᐱ ᓯᐅᑎᐊᐱᒃ, ᐃᓄᓕᕆᔨᒃᑯᓐᓄᑦ ᒥᓂᔅᑕᖓ, ᐅᖃᓚᐅᕐᒥᔪᖅ ᓂᕈᐊᒐᒃᓴᐅᔾᔮᔪᓐᓃᕐᓂᕋᖅᖢᓂ ᓯᑎᐱᕆ 9-ᖑᑎᓪᓗᒍ ᐱᔾᔪᑎᖃᖅᖢᓂ ᐃᓚᖏᓐᓅᖓᔪᓂᒃ ᐃᒻᒥᓄᓪᓗ.

ᐹᑦ ᐊᕐᓇᑲᒃ, ᒪᓕᒐᓕᐅᖅᑎᐅᓚᐅᕐᑐᖅ ᐃᖃᓗᐃᑦ-ᓂᐊᖁᙴᒧᑦ, ᓄᖅᑲᓚᐅᕐᓯᒪᔪᖅ ᐋᒐᓯᒥ ᓂᕈᐊᒐᒃᓴᐅᓕᕐᓂᖓᓄᑦ ᒐᕙᒪᑐᖃᒃᑯᑦ ᓂᕈᐊᒐᒃᓴᓕᕆᓕᖅᑎᓪᓗᒋᑦ ᐅᑯᓄᖓ ᓕᐳᕈᒃᑯᓐᓄᑦ.

ᐹᓪ ᖁᐊᓴ, ᐅᖃᖅᑎᐅᓚᐅᕐᓯᒪᔪᖅ ᒪᓕᒐᓕᕆᕕᒡᔪᐊᕐᒥᑦ ᐊᒻᒪᓗ ᒪᓕᒐᓕᐅᖅᑎᐅᓪᓗᓂ ᐊᒡᒍᒧᑦ, ᓄᖅᑲᓚᐅᕐᓯᒪᖕᒥᔪᖅ ᐅᖃᖅᖢᓂ ᐊᓯᖓᓂ ᐃᓇᖏᖅᑕᐅᓯᒪᔭᕆᐊᖃᓕᕐᓂᖓᓂᒃ.

ᓯᑎᐱᕆ 16-ᒥ ᑭᖑᓪᓕᖅᐹᒥᑦ ᑲᑎᒪᑎᓪᓗᒋᑦ ᑲᑎᒪᔨᐅᔪᑦ ᐊᓂᒍᐃᑎᑦᑎᔪᓐᓇᓚᐅᕐᓯᒪᖕᒪᑕ ᐱᖓᓱᓂᒃ ᐅᑯᓇᙵᑦ   7-ᓂᒃ ᒪᓕᒐᒃᓴᓂᒃ ᐱᓕᕆᐊᕆᔭᐅᔪᓂᒃ.

ᐱᖓᓱᑦ ᒪᓕᒐᐃᑦ ᐊᓂᒍᖅᑎᑕᐅᔪᑦ, ᑎᓴᒪ ᐊᑐᕈᓐᓃᖅᑎᑕᐅᓪᓗᑎᒃ

ᒪᓕᒐᖅ 55, ᒪᓕᒐᖅ ᐋᖅᑭᒋᐊᖅᑎᑦᑎᔾᔪᑎᒃᓴᖅ ᓇᖕᒥᓂᕆᔭᐅᔪᓂᒃ ᖃᐅᔨᓴᕈᑎᓂᒃ ᐊᒻᒪᓗ ᑖᒃᓰᔭᐃᓂᕐᒧᑦ ᒪᓕᒐᖅᒥ, ᐊᓂᒍᖅᑎᑕᐅᓪᓗᓂ, ᓈᒻᒪᒋᔭᐅᓯᒪᙱᒃᑲᓗᐊᖅᑎᓪᓗᒍ ᓄᓇᕗᑦ ᑐᙵᕕᒃᑯᓐᓄᑦ ᐊᒻᒪᓗ ᐊᓯᖏᓐᓄᑦ ᐃᓄᐃᑦ ᑲᑐᔾᔨᖃᑎᒌᓄᑦ.

ᐋᖅᑭᒋᐊᕈᑎᒃᓴᐃᑦ ᐊᓯᔾᔨᕈᑎᐅᔪᑦ ᖃᓄᖅ ᒐᕙᒪᒃᑯᑦ ᑲᑎᖅᓱᐃᖃᑦᑕᕆᐊᖃᕐᓂᖏᓐᓂᒃ ᑖᒃᓰᔭᕈᑎᓂᒃ ᒪᑯᓇᙵᑦ ᐅᔭᕋᒃᓯᐅᖅᕕᒃᓂᒃ ᐊᐅᓚᑕᐅᕙᒃᑐᓂᒃ ᓄᓇᕗᒥᑦ. ᐅᑯᐊ ᓄᓇᕗᑦ ᑐᙵᕕᒃᑯᓐᓂᒃ ᐊᒻᒪᓗ ᐊᓯᖏᑦ ᐊᕕᒃᑐᖅᓯᒪᓂᒃᑯᑦ ᐃᓄᐃᑦ ᑲᑐᔾᔨᖃᑎᒌᖏᑦ ᑖᔅᓱᒥᖓ ᒪᓕᒐᕐᒥᒃ ᐱᓕᕆᐊᖃᕐᓂᐊᖅᑐᑦ ᐃᖅᑲᖅᑐᐃᕕᒃᑎᒍᑦ, ᐅᖃᖅᓯᒪᓚᐅᕐᑐᖅ ᑐᓴᒐᒃᓴᓕᐅᕈᑎᐅᔪᑦ.

ᐅᑯᐊ ᒪᓕᒐᖅ 77, ᐃᓚᒋᔭᐅᒃᑲᓐᓂᕆᐊᖃᕐᓂᕐᒧᑦ, ᐊᒻᒪᓗ ᒪᓕᒐᖅ 75, ᐋᖅᑭᒋᐊᕈᑎᒃᓴᖅ ᐱᕋᔭᒃᓯᒪᔪᓄᑦ ᖃᓄᐃᓕᐅᕈᑎᒃᓴᓄᑦ ᒪᓕᒐᖅᒥᒃ, ᐊᓂᒍᖅᑎᑕᐅᓚᐅᕐᒥᔪᑦ, ᒪᓕᒐᕆᔭᐅᕌᓂᒃᑑᒐᓗᐊᑦ ᑭᓯᐊᓂ ᐋᖅᑭᒋᐊᖅᑕᐅᕌᕐᔪᒋᐊᖃᓚᐅᕐᒪᑕ.

ᐅᓇ ᑐᒃᓯᕋᕈᑎᐅᔪᖅ ᐃᒥᐊᓗᒃᒥ ᑖᒃᓰᔭᕈᑎᖃᖅᑎᑦᑎᓂᕐᒥᒃ ᒪᓕᒐᖅ, ᒪᓕᒐᖅ 56 — ᑖᓐᓇᓗ ᐱᒋᐊᖅᑎᑦᑎᔾᔪᑎᐅᓂᐊᓚᐅᕐᑐᖅ ᐃᒥᐊᓗᒃᒥ ᑖᒃᓰᔭᕈᑎᓂᒃ ᓄᓇᕗᒥᒃ ᐅᕝᕙᓘᓐᓃᑦ ᓄᓇᕗᒧᑦ ᑎᑭᑎᑕᐅᔪᓂᒃ ᐱᔪᓐᓇᐅᑎᑎᒍᑦ — ᐊᓂᒍᖅᑎᑕᐅᓚᐅᙱᑦᑐᖅ.

ᓄᓇᕗᑦ ᒫᓐᓇ ᐊᕕᒃᑐᖅᓯᒪᓂᒃᑯᑦ ᑖᒃᓰᔭᐃᑎᑦᑎᕙᙱᑦᑐᑐᐊᖅ ᐃᒥᐊᓗᒃᒧᑦ ᒪᐅᓇ ᕼST ᐅᕝᕙᓘᓐᓃᑦ PST-ᑎᒍᑦ.

ᔮᓐ ᒪᐃᓐ, ᐃᒃᓯᕙᐅᑕᕆᔭᐅᔪᖅ ᑲᑎᒪᔨᕋᓛᓄᑦ ᒪᓕᒐᓕᕆᓂᕐᒧᑦ ᐊᒻᒪ ᐊᓯᖏᓐᓄᑦ, ᐅᖃᓚᐅᕐᓯᒪᔪᖅ ᐃᓱᒫᓘᑎᒋᔭᐅᓛᖑᖑᓂᖓᓂᒃ ᑖᔅᓱᒧᖓ ᒪᓕᒐᖅᒧᑦ ᒪᑯᐊ ᐊᑭᓕᐅᑎᐅᖃᑦᑕᕋᔭᖅᑐᑦ ᐱᓕᕆᕝᕕᐅᔪᒧᑦ ᓂᕈᐊᕆᔭᐅᓇᔭᖅᖢᑎᒃ ᐊᒻᒪᓗ ᑮᓇᐅᔭᓕᕆᔨᒃᑯᓐᓄᑦ ᒥᓂᔅᑕᒧᑦ ᐊᒻᒪ ᐊᖏᖅᑕᐅᓇᔭᕆᐊᖃᕋᔭᙱᖢᑎᒃ ᒪᓕᒐᓕᐅᖅᑎᓄᑦ ᐅᑯᑎᑐᓇᖅ ᑮᓇᐅᔭᓕᐅᕆᔭᐅᕙᓪᓕᐊᔪᓄᑦ ᐊᒻᒪ ᐃᓐᑲᒻ ᑖᔅᓯᓄᑦ ᐊᑭᓕᐅᑎᒃᓴᐅᑎᑕᐅᔪᓄᑦ.

ᑲᑎᒪᔨᕋᓛᑦ ᑖᔅᓱᒥᖓ ᒪᓕᒐᕐᒥᒃ ᓈᒻᒪᒃᓴᙱᒃᑲᓗᐊᖅᑎᓪᓗᒋᑦ, ᒪᐃᓐ ᐅᖃᓚᐅᕐᑐᖅ ᖃᐅᔨᒪᓂᖏᓐᓂᒃ ᒪᑯᐊ ᑲᑐᔾᔨᖃᑎᒌᑦ ᐅᑯᑎᑐᓇᖅ ᓄᓇᕐᔪᐊᖅᒥᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑲᑐᔾᔨᖃᑎᒌᑎᑐᑦ ᐅᖃᕐᓯᒪᖕᒪᑕ ᑖᒃᓰᔭᖅᑎᑦᑎᕙᖕᓂᖅ ᐃᒥᐊᓗᖃᑦᑕᕐᓂᕐᒥᒃ ᐊᑐᙱᓐᓂᕐᓴᐅᔾᔪᑎᐅᕙᖕᓂᖓᓂᒃ.

ᒪᐃᓐ ᐅᖃᓚᐅᕐᑐᖅ ᑖᒃᑯᐊ ᑲᑎᒪᔨᕋᓛᑦ ᑭᖑᓪᓕᕐᓂᒃ ᒐᕙᒪᐅᓂᐊᖅᑐᓂᒃ ᓴᖅᑭᑎᑦᑎᒃᑲᓐᓂᕐᓂᐊᖁᔨᓪᓗᑎᒃ ᑕᐃᒪᐃᑦᑐᒥᒃ ᑖᒃᓰᔭᕈᑎᐅᔪᓐᓇᖅᑐᓂᒃ.

ᒪᓕᒐᖅ 52, ᓄᓇᕗᒥᑦ ᐅᕐᓱᐊᓗᓕᕆᓂᕐᒧᑦ ᑲᒥᓴᓐᒧᑦ ᒪᓕᒐᖅ, ᐊᓂᒍᖅᑎᑕᐅᓚᐅᙱᒻᒥᔪᖅ, ᑖᓐᓇᓕ ᐋᖅᑭᒃᓯᔾᔪᑎᐅᓇᔭᓚᐅᕐᑐᖅ ᓄᑖᕐᒥᒃ ᓄᓇᕗᒥᑦ ᐅᕐᓱᐊᓗᓕᕆᓂᕐᒧᑦ ᑲᒥᓴᓐᒥᒃ ᐊᐅᓚᑦᑎᔨᐅᓗᑎᒃ ᐅᕐᓱᐊᓗᒃᒥᑦ ᓂᐅᕕᖃᑦᑕᕐᓂᕐᒥᒃ ᓄᓇᕗᒧᑦ.

ᑖᓐᓇ ᓄᑖᖅ ᐱᓕᕆᕝᕕᒃᓴᐅᓇᔭᓚᐅᕐᑐᖅ ᐃᓇᖏᕐᓯᔾᔪᑎᒋᔭᐅᓇᔭᓚᐅᕐᑐᖅ ᐅᕐᓱᐊᓗᓕᕆᔨᒃᑯᓐᓂᒃ ᐅᑯᓇᓂ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᓐᓂᒃ — ᑖᔅᓱᒪᓕ ᒪᓕᒐᓕᐅᖅᑎ ᐋᑕᒪ ᐋᕆᐊᒃ ᓚᐃᑦᕼᐊᐅᔅ ᐃᒪᓐᓇ ᐅᖃᐅᓯᕆᔭᖓ “ᓇᓗᓈᕿᕈᓘᔭᖅᑐᖅ” ᒫᔅᓯᐅᓚᐅᕐᑐᒥ ᒪᓕᒐᓕᐅᖅᑎᑦ ᓴᖅᑭᔮᙱᓗᐊᕐᓂᕋᐃᑎᓪᓗᒋᑦ.

ᒪᐃᓐ ᐅᖃᓚᐅᕐᑐᕐᓕ ᒪᓕᒐᖅ 52 ᐊᓂᒍᓚᐅᙱᓐᓂᕋᖅᖢᓂᐅᒃ ᓇᓗᓇᐃᔭᖅᓯᒪᙱᓗᐊᓚᐅᕐᒪᑦ ᖃᓄᖅ ᑖᒃᑯᐊ ᓄᑖᑦ ᐱᓕᕆᕝᕕᐅᔪᑦ ᐊᐅᓚᑕᐅᓇᔭᕆᐊᒃᓴᖓᓐᓂᒃ, ᖃᓄᕐᓗ ᒪᓕᒐᓕᐅᖅᑎᐅᔪᑦ ᑲᒪᒋᔭᖃᕈᓐᓇᕋᔭᕐᓂᖏᓐᓂᒃ ᐊᒻᒪᓗ ᖃᓄᖅ ᑖᒃᑯᐊ ᐊᕙᑎᒋᔭᒧᑦ ᓈᒻᒪᙱᓕᐅᕈᑎᓂᒃ ᑲᒪᒋᔭᖃᕋᔭᕐᓂᖏᓐᓂᒃ.

ᒪᕐᕉᒃᑕᐅᖅ ᐊᓂᒍᖅᑎᑕᐅᓚᐅᙱᒻᒥᔫᒃ ᒪᓕᒑᒃ ᐃᒪᐃᓕᖓᔫᒃ ᐊᓯᙳᖅᑎᑦᑎᔪᒪᔾᔪᑎᓂ ᐃᑲᔫᑎᒃᓴᓕᕆᕙᓪᓕᐊᓂᕐᒧᑦ ᒪᓕᒐᖅᒥᒃ — ᐊᒃᑐᐃᓇᔭᕐᒪᑦ ᐅᕐᓱᐊᓘᑉ ᐊᑭᖏᓐᓂᒃ — ᐊᒻᒪᓗ ᐅᑭᐅᕐᑕᖅᑐᕐᒥᑦ ᐃᖅᑲᓇᐃᔭᖅᑏᑦ ᐃᑲᔫᑎᒃᓴᖏᑦ ᐊᒻᒪ ᐱᔨᑦᑎᕋᐅᑎᓄᑦ ᐃᑦᑐᖅᓯᐅᑎᑖᕈᑎᒃᓴᓄᑦ ᒪᓕᒐᖅᒥᒃ.

ᓂᕈᐊᒐᒃᓴᓕᐅᕐᓂᖅ ᐱᒋᐊᖅᐳᖅ

ᑕᓪᓕᒪᒋᔭᐅᔪᑦ ᒪᓕᒐᓕᕆᔨᐅᔪᑦ ᓄᖅᑲᑦᑎᐊᒻᒪᕆᓚᐅᕐᑐᑦ ᓈᑦᑏᖑᔭᒥᑦ, ᐊᒻᒪᓗ ᓂᕈᐊᒐᒃᓴᓕᐅᕐᓂᕐᒧᑦ ᑎᑎᖃᑦ ᓴᖅᑭᑕᐅᓪᓗᑎᒃ ᓇᒐᔾᔭᐅᒥᒃ, ᐱᒋᐊᖅᑎᑦᑎᔾᔪᑎᒻᒪᕆᐅᓪᓗᓂ ᓄᓇᕗᑦ ᒐᕙᒪᒃᑯᓐᓄᑦ ᓂᕈᐊᒐᒃᓴᐅᔪᒪᔪᓄᑦ ᑕᕝᕙᓂᓗ ᓄᓇᕗᒻᒥᐅᑦ ᓂᕈᐊᕆᐊᖅᑐᓚᐅᕐᒥᔪᑦ ᒐᕙᒪᑐᖃᒃᑯᑦ ᓂᕈᐊᖅᑎᑦᑎᑎᓪᓗᒋᑦ.

ᓄᓇᕗᒥᐅᑕ ᒪᓕᒐᓕᕆᔨᐅᓂᕐᒧᑦ ᓂᕈᐊᒐᒃᓴᐅᔪᒪᔪᑦ ᓇᓗᓇᐃᕐᓯᔭᕆᐊᖃᖅᑐᑦ ᓂᕈᐊᒐᒃᓴᐅᓂᖏᓐᓂᒃ ᓯᑎᐱᕆ 20 ᐊᒻᒪ 24 ᐊᑯᓐᓂᖓᓂᒃ.

ᑭᓇᑐᐃᓐᓇᖅ ᓂᕈᐊᒐᒃᓴᐅᔪᓐᓇᖅᑐᖅ ᑭᒡᒐᖅᑐᐃᔨᐅᓂᕐᒧᑦ ᓇᓕᐊᓐᓄᑦ 22-ᓄᑦ ᑭᒡᒐᖅᑐᐃᔨᐅᕝᕕᒋᔭᐅᔪᓂᒃ ᓄᓇᕗᒥᑦ, ᓇᓂ ᓄᓇᖃᕋᓗᐊᕐᐸᑦ ᓄᓇᕗᒥᑦ ᓄᓇᖃᑐᐊᕈᑎᒃ.

ᓂᕈᐊᕐᓇᐅᓚᖅᑐᖅ ᐅᒃᑑᐱᕆ 25-ᒥ.

Share This Story

(0) Comments

Join the Conversation

Your email address will not be published. Required fields are marked *

*