ᐱᖓᓱᑦ ᒪᓕᒐᓕᕆᓂᕐᒥᑦ ᐱᓇᓱᐊᒐᖃᖅᑐᑦ ᐱᓂᐊᕐᓂᕋᒻᒪᕆᒃᐳᑦ ᓄᓇᕗᒥᑦ ᑏᓱᓪ ᐅᕐᓱᐊᓗᖕᒥᑦ ᐊᑐᓗᐊᖃᑦᑕᕐᓂᖏᑦ ᓄᖃᖅᑎᑕᐅᓂᐊᕐᓂᕋᖅᖢᒍ 2030 ᑎᑭᓚᐅᕐᑎᓪᓗᒍ
“ᐅᓇ ᐱᓕᕆᔪᒪᕐᔪᐊᕐᓂᐊᓗᒃ”
ᐃᓕᓐᓂᐊᕐᑎᐅᔪᑦ ᐱᓱᒃᐳᑦ ᑎᓴᒪᑦ ᑎᕆᖁᓂᑦ ᐃᖃᓗᖕᓂᑦ ᓯᑎᐱᕆ 27-ᐅᑎᓪᓗᒍ ᐃᓚᐅᓪᓗᑎᒃ ᓄᓇᕐᔪᐊᒥᑦ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᐊᓯᔾᔨᕐᓯᖁᔨᓂᕐᒧᑦ. ᐱᖓᓱᑦ ᒪᓕᒐᓕᕆᔨᒧᑦ ᓂᕈᐊᒐᒃᓴᐅᔪᑦ ᒐᕙᒪᑐᖃᒃᑯᓐᓄᑦ ᐅᖃᓚᐅᕐᑐᑦ ᓄᖅᑲᖅᑎᑦᑎᓂᐊᕈᒪᓪᓗᑎᒃ ᓄᓇᕗᒥᑦ ᑏᓱᓪ ᐅᕐᓱᐊᓗᖕᒥᒃ ᐊᑐᓗᐊᖃᑦᑕᕐᓂᖏᓐᓂᒃ ᖃᐅᒻᒪᖁᑎᖃᕐᓂᒃᑯᑦ 2030 ᑎᑭᓚᐅᕐᑎᓪᓗᒍ. (ᐊᔾᔨᓕᐅᕆᔨ ᑕᔅᑎᓐ ᐸᑖᕐ)
For an English version of this story, see Three parties vow to end Nunavut’s diesel dependence by 2030
ᑕᒪᑐᒪᓂ ᒐᕙᒪᑐᖃᒃᑯᓐᓄᑦ ᓂᕈᐊᕐᓇᒥᓐ, ᐱᖓᓱᑦ ᒪᓕᒐᓕᕆᓂᕐᒥ ᐱᓇᓱᐊᒐᖃᖅᑐᑦ ᐅᖃᓚᐅᕐᑐᑦ ᓄᓇᕗᑦ ᐊᑐᖃᑦᑕᕐᓂᖏᓐ ᑏᓱᓪ ᐅᕐᓱᐊᓗᖕᒥᓐ ᖃᐅᒻᒪᖁᑎᓄᑦ ᓄᖃᖅᑎᑕᐅᓂᐊᕐᓂᕋᖅᖢᒍ 2030 ᑎᑭᓚᐅᕐᑎᓪᓗᒍ.
ᒫᓐᓇ ᑕᒪᕐᒥᒃ 25 ᓄᓇᓖᑦ ᓄᓇᕗᒥᑦ ᖃᐅᒻᒪᖁᑎᖃᕐᒪᑕ ᑏᓱᒧᑦ ᐅᕐᓱᐊᓗᖃᖅᑐᓂᒃ ᐊᐅᓚᐅᓯᕆᕝᕕᖕᓂᒃ ᐊᐅᓚᑕᐅᔪᓂᒃ ᖁᓪᓕᖅ ᐆᒻᒪᖁᑎᓕᕆᔨᒃᑯᑦ ᑯᐊᐳᕇᓴᒃᑯᓐᓂᑦ, ᖃᐅᒻᒪᖁᑎᓕᕆᔨᑐᐊᑦ ᑲᓇᑕᒥ ᐋᕿᒋᐊᕐᓯᒪᔪᓂᒃ ᖃᐅᒻᒪᖁᑎᖃᕈᑎᒃᓴᓂᒃ ᐱᖃᙱᑦᑐᑐᐊᑦ ᓄᓇᖏᓐᓂᒃ.
ᐊᓯᙳᖅᑎᑦᑎᓂᖅ ᑖᔅᓱᒥᖓ ᐊᖏᔪᐊᓘᓇᔭᖅᑐᖅ ᐊᒻᒪ ᑮᓇᐅᔭᖅᑐᓗᓂ ᐱᓕᕆᐊᒃᓴᖅ.
“ᐅᓇ ᐱᓕᕆᔪᒪᕐᔪᐊᕐᓂᐊᓗᒃ,” ᐅᖃᖅᑐᖅ ᒫᑕ ᓕᓂᐅ, ᐅᑭᐅᕐᑕᖅᑐᕐᒧᑦ ᐊᑐᒃᑲᓐᓂᕈᓐᓇᑐᓂᒃ ᐆᒻᒪᖁᑎᓕᕆᓂᒃᑯᑦ ᐱᓕᕆᔨᒻᒪᕆᒃ ᐅᑯᓄᖓ ᓄᓇᕐᔪᐊᒥᓐ ᐆᒪᔪᓕᕆᔨᕐᔪᐊᓄᑦ (World Wildlife Fund).
“ᐊᔪᕐᓇᙱᑦᑐᒃᓴᐅᔪᖅ, ᐊᔪᙱᐊᕐᔪᑐᐃᓐᓇᕐᓗᓂ.”
ᐅᑯᐊ ᒍᕇᓐ ᐹᑎᒃᑯᑦ ᓂᕈᐊᕐᑕᐅᔾᔪᑎᒋᓇᓱᒃᑕᖓ ᐱᓂᐊᕐᓂᕋᖅᖢᑎᒃ “ᐊᑐᓕᖅᑎᑦᑎᓗᑎᒃ ᐊᑐᒃᑲᓐᓂᕈᓐᓇᑐᓕᕆᓂᒃᑯᑦ ᖃᐅᒻᒪᖁᑎᖃᖅᑎᑦᑎᓂᕐᒥᒃ. 2030 ᑎᑭᑉᐸᑦ, ᑕᒪᐃᓐᓂ ᑲᓇᑕᐅᑉ ᖃᐅᒻᒪᖁᑎᖃᕈᑎᖏᑦ ᐊᑐᒃᑲᓐᓂᕈᓐᓇᖅᑐᓕᕆᓂᒃᑰᕐᓂᐊᕐᒪᑕ. ᐅᓇ ᐃᓚᖃᖅᑎᑦᑎᔪᖅ ᓄᓇᓕᕋᓛᓂᒃ ᐅᑭᐅᕐᑕᖅᑐᕐᒥ ᓄᓇᓕᖕᓂ ᒪᑯᓂᖓ ᑏᓱᒥᑦ ᐅᕐᓱᐊᓗᖕᒥ ᖃᐅᒻᒪᖁᑎᓄᑦ ᐊᑐᕈᓐᓃᖅᑎᑕᐅᓗᑎᒃ.”
ᓕᐳᕈ ᐹᑎᒃᑯᓪᓕ ᐅᖃᓚᐅᕐᑐᑦ “ᓯᕗᒧᑦ ᐱᒋᐊᕐᓂᐊᕐᓂᕋᖅᖢᑎᒃ ᑮᓇᐅᔭᑎᒍᑦ ᑕᒪᒃᑯᐊ ᐃᓄᐃᑦ ᓄᓇᓕᖏᑦ ᑏᓱᓪ ᐅᕐᓱᐊᓗᖕᒥ ᐊᑐᕈᓐᓃᕐᑎᑕᐅᓗᑎᒃ ᑭᓯᐊᓂᓕ ᖃᐅᒻᒪᖁᑎᖃᓕᕐᓗᑎᒃ ᐊᑐᕐᓗᑎᒃ ᓴᓗᒪᔪᒥᓐ, ᐊᑐᒃᑲᓐᓂᕈᓐᓇᖅᑐᒥᑦ ᐆᒻᒪᖁᑎᖃᕈᑎᒃᓴᒥᓐ—ᒪᑐᑎᑐᓇᖅ ᐃᒪᕐᒧᑦ, ᐊᓄᕆᒧᑦ ᐊᒻᒪᓗ ᓯᕿᓂᕐᒧᑦ ᐆᒻᒪᖁᑎᖃᕈᑎᓄᑦ—ᑎᑭᓚᐅᕐᑎᓪᓗᒍ 2030.”
ᐅᑯᐊᓕ ᓂᐅ ᑎᒧᑯᕌᑎᒃ ᐹᑎᑯ (NDP) ᐅᖃᓚᐅᕐᑐᑦ “ᑐᕌᒐᖃᕐᓂᐊᕐᓗᑎᒃ ᑲᓇᑕᒥ ᐆᒻᒪᖁᑎᖃᕈᓐᓇᕐᓯᑎᓪᓗᒋᑦ ᐳᔪᕐᓗᖕᓂᙶᕐᓯᒪᙱᑦᑐᓂᒃ ᐆᒻᒪᖁᑎᓄᑦ ᑎᑭᓚᐅᕐᑎᓪᓗᒍ 2030… ᐅᓇ ᐳᔪᕐᓗᖕᓂ ᐊᑐᙱᓐᓂᖅ ᖃᐅᒻᒪᖁᑎᖃᕐᓂᒃᑯ ᐃᓱᒪᒋᔭᖃᕐᓂᕐᒨᖓᓗᓂ ᓄᓇᓕᖕᓂᒃ ᐊᒻᒪ ᐃᖅᑲᓇᐃᔮᒃᓴᓂᒃ ᓴᖅᑭᑎᑦᑎᒍᑎᐅᓗᓂ ᐱᓇᐅᓇᔭᖅᑐᖅ. ᐃᑲᔪᕋᔭᖅᑐᒍᑦ ᐱᓇᓱᒍᑎᒃᓴᓂᒃ ᒪᑯᓄᖓ ᓄᓇᓕᖕᓂ ᓇᖕᒥᓂᕆᔭᐅᓂᒃᑯᑦ ᐊᒻᒪ ᐊᐅᓚᑕᐅᓗᓂ ᓴᓗᒪᔪᒥ ᐆᒻᒪᖁᑎᖃᕈᑎᓄᑦ ᐱᓕᕆᐊᓂᒃ ᐃᖅᑲᓇᐃᔮᖃᕈᓐᓇᖁᓪᓗᒋ ᓄᓇᖃᖅᑐᑦ ᐊᒻᒪ ᐊᔪᙱᓐᓂᖃᖅᑐᑦ, ᐊᒻᒪᓗ ᐱᓕᕆᖃᑎᖃᕐᓗᑎᒃ ᓄᓇᖃᖅᑳᖅᑐᓂᒃ ᐊᒻᒪ ᐅᑭᐅᕐᑕᖅᑐᕐᒥ ᓄᓇᓕᖕᓂ ᐊᑐᖅᑕᐅᔪᓐᓃᖅᑎᒐᓱᖕᓂᕐᒥᑦ ᑏᓱᓪ ᐅᕐᓱᐊᓗᖕᒥᓐ.”
ᐅᑯᑎᒎᓇᕐᓕ ᐊᕙᑎᓕᕆᔨᒃᑯᑦ ᐊᒻᒪ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᑲᓇᑕᒥ ᐅᓂᒃᑳᓕᐊᖏᑦ ᓴᖅᑭᑕᐅᓚᐅᕐᑐᑦ ᑕᒪᓐᓇ ᐊᕐᕌᒍ ᐱᒋᐊᕐᓯᒪᓕᖅᑎᓪᓗᒍ, ᓯᓚ ᐳᔪᖅᑖᖅᐸᓪᓕᐊᓂᖓᒍᑦ ᓄᓇᕗᑦ 1 ᐳᓴᓐᑎᐅᑉ ᑐᖔᓃᑦᑐ ᑕᒪᑐᒧᖓ ᐊᒃᑐᐃᓯᒪᓂᖓ.
2017-ᒥ, ᓄᓇᕗᑦ ᓴᖅᑭᑎᑦᑎᓂᖃᓚᐅᕐᑐᖅ ᐃᒪᓐᓇ 0.6 ᒥᒐᑕᓐᔅ (megatonnes) ᐳᔪᕐᒥᒑᖅᐸᓪᓕᐊᔪᓂᒃ (carbon dioxide), ᐃᒪᓐᓇᐅᓪᓗᐊᖅᑐᒥᑦ ᓲᕐᓗ 18,000-ᓂ ᓄᓇᓯᐅᑎᓂᙶᖅᑐᓂᒃ ᐃᓄᖃᐅᕈᓐᓇᖅᑐᓂᒃ. ᑕᕝᕙᓂᑦᑕᐃᓐᓇ ᐊᕐᕌᒍᒥ, ᐋᐴᑕ, ᑖᓐᓇ ᑲᓇᑕᒥ ᐳᔪᓐᓂᖔᕈᔾᔨᓂᖅᐹᖑᓂᕋᖅᑕᐅᓯᒪᔪᖅ, ᒫᓂ ᓴᖅᑭᑎᑦᑎᓂᖃᓚᐅᕐᑐᑦ 84 ᒥᓕᓐᐊᓂᙶᖅᑐᓂᒃ ᓄᓇᓯᐅᑎᓂᒃ ᐃᓄᖃᐅᕈᓐᓇᖅᑐᓂᒃ.
ᑕᐃᒪᐃᓕᖓᒐᓗᐊᖅᑎᓪᓗᒍ, ᓄᓇᕗᑦ ᑕᑯᓯᒪᔪᖅ ᐳᔪᕐᓗᐃᑦ ᓄᓇᓯᐅᑎᓂᙶᖅᓯᒪᔪᑦ ᐱᑕᖃᕐᓂᕐᓴᐅᓯᒪᓂᖓᓂᒃ 30 ᐳᓴᓐᑎᒥ 2005-ᒥ ᐱᒋᐊᖅᖢᓂ, ᐊᖏᓂᖅᐹᒥᑦ ᐱᕚᓪᓕᕐᓯᒪᔪᖅ ᑲᓇᑕᒥ ᐊᒻᒪ ᐋᐴᑕᒥᑦ ᒪᕐᕈᐃᕐᓯᒪᒻᒪᕆᑲᓴᖅᖢᓂ, ᑖᓐᓇᓗ ᐊᐃᑉᐸᕆᔭᐅᓪᓗᓂ ᖁᕝᕙᖅᐹᓪᓕᕐᓂᐅᔪᒥᑦ ᑕᒪᐅᓇᑦᑕᐃᓐᓇᖅ.
ᐆᒻᒪᖅᑯᑎᓕᕆᓂᕐᒥᒃ ᐊᓯᔾᔨᕐᓯᒐᓗᐊᕈᑎ ᐅᑯᐊ ᐱᖓᓱᑦ ᒪᓕᒐᓕᕆᔨᕐᔪᐊᙳᕋᓱᒃᑐᑦ ᒥᒃᖠᕚᓪᓕᖅᑎᑦᑎᓇᓱᖕᓂᕐᒥ ᐱᐅᔪᓐᓃᕈᑕᐅᕙᓪᓕᐊᔪᓂᒃ, ᑕᒪᑐᒧᖓ ᐊᒃᑐᐃᒍᑎᐅᓇᔭᖅᑐᖅ ᑲᓇᑕᐅᑉ ᐳᔪᕐᓗᖕᓂᙶᓅᕈᑎᖏᓐᓂ ᒥᑭᑦᑐᑯᓘᓇᔭᖅᑐᖅ ᓱᓕ.
ᓄᓇᓖᑦ ᑕᒪᑐᖓ ᑭᓱᑖᕈᑎᖃᖑᓚᒻᑐᑦᔭ.
ᓄᓇᕗᒻᒥᐅᑦ ᐊᑭᓕᕐᓱᐃᕙᒃᑐᑦ ᐊᖏᓛᒥᑦ ᖃᐅᒻᒪᖁᑎᓄᑦ ᐊᓯᓕᒫᖏᓐᓃᑦᑐᓂᒡᓕ ᑲᓇᑕᒥ, ᐊᒻᒪᓗ ᑮᓇᐅᔭᖃᖅᑎᑕᐅᓂᖅ ᐆᒻᒪᖁᑎᓕᕆᓂᕐᒧᑦ ᑕᒪᑐᒥᖓ ᐊᑦᑎᒃᓯᕚᓪᓕᕈᑎᐅᓇᔭᖅᖢᓂ.
ᑭᓯᐊᓂᓕ, ᖃᓄᐃᓕᐅᕐᓂᐊᕐᓂᖅ ᐊᑐᒃᑲᓐᓂᕈᓐᓇᖅᑐᓕᕆᓂᒃᑯᑦ ᐆᒻᒪᖁᑎᓕᕆᓂᕐᒧᑦ ᐱᓕᕆᐊᒃᓴᓂ ᓲᕐᓗ ᓇᓕᒧᒌᙱᔾᔪᑎᐅᑐᐃᓐᓇᕆᐊᖃᖅᑐᖅ ᐊᑭᓕᐅᑎᒃᓴᓄᑦ ᒫᓐᓇ ᐊᑐᖅᑐᓄᑦ ᐊᑭᓕᐅᑎᐅᓇᔭᖅᑐᓄᑦ ᐆᒻᒪᖁᑎᓕᕆᓂᕐᒧᑦ.
ᑕᖅᑭᐅᓚᐅᕐᑐᒥᓐ, ᓄᓇᕐᔪᐊᕐᒥᑦ ᐆᒪᔪᓕᕆᔨᕐᔪᐊᒃᑯᑦ ᐅᓂᒃᑳᓂ ᓴᖅᑭᑎᑦᑎᓚᐅᕐᑐᑦ ᐅᖃᐅᓯᖃᖅᑐᓂᒃ ᖃᓄᖅ ᐆᒻᒪᖁᑎᓕᕆᓂᖅ ᐊᑐᕈᓐᓇᑦᑎᐊᖅᑐᖅ ᐆᒻᒪᖅᑯᑎᖃᖅᑎᑦᑎᔪᓐᓇᕋᔭᕐᓂᖓᓂᒃ ᑕᒪᐃᓐᓂ ᐊᑐᓂ 25-ᓂ ᓄᓇᓕᖕᓂ ᓄᓇᕗᒥᑦ.
ᖃᐅᔨᓚᐅᕐᒪᑕ ᐊᑭᒃᖠᕚᓪᓕᕐᓯᒪᓂᒃᑯᑦ 8 ᐳᓴᓐᑎᒥᑦ—ᐱᔾᔪᑎᖃᓗᐊᖅᖢᓂ ᐅᓗᕆᐊᓇᑐᐃᓐᓇᕆᐊᖃᕐᓂᖓ ᐱᓕᕆᓂᐅᔪᖅ ᐅᕝᕙᓘᓐᓃᑦ ᐊᓯᖏᑦ ᑮᓇᐅᔭᖅᑖᕋᓲᑎᐅᓇᔭᖅᑐᑦ—ᖃᒪᓂᑦᑐᐊᖅ, ᓴᓪᓕᖅ, ᐃᖃᓗᐃᑦ ᐊᒻᒪ ᑲᖏᖅᖠᓂᖅ ᑮᓇᐅᔭᓂᒃ ᐊᑐᙱᓐᓂᕐᓴᐅᓕᕋᔭᖅᑐᑦ ᓅᖔᕈᑎᒃ 20 ᐳᓴᓐᑎᒥ ᐊᑐᒃᑲᓐᓂᕈᓐᓇᖅᑐᒥ ᐆᒻᒪᖁᑎᓕᕆᓂᕐᒥᒃ, ᐃᓚᖃᕐᓗᓂ ᐊᑭᓕᑲᐅᑎᒋᔾᔪᑎᒃᓴᓂᒃ ᒫᓂ ᐊᕐᕌᒍᓄᑦ 15-ᓄᑦ.
ᖃᐅᔨᓴᕈᑎᐅᔪᖅ ᓇᓗᓇᐃᕐᓯᒍᑎᐅᓚᐅᕐᒥᔪᖅ 16 ᐊᓯᖏᑦ ᓄᓇᓕᐅᔪᑦ 4 ᐳᓴᓐᑎᒥ ᐊᑭᒃᖠᒋᐊᕈᑎᖃᖅᑐᑦ—ᒫᓂᐸᓗᒃ ᖁᓪᓕᖅ ᐆᒻᒪᖁᑎᓕᕆᔨᒃᑯᑦ ᑯᐊᕆᓴᓐ ᐊᑐᖅᑐᐊᕈᑎᒋᔪᓐᓇᕋᔭᖅᑕᖏᓐᓂᒃ—ᐊᒻᒪᓗ ᒫᓂᐸᓗᒃ $2 ᒥᓕᐊᓐᑖᓚᓂ ᐃᑲᔫᑎᒃᓴᐅᔪᓐᓇᖅᑐᓂᒃ ᐊᒻᒪ 20 ᐳᓴᓐᑎᒥ ᐊᑐᕈᑎᒃᓴᓄᑦ ᓅᑕᐅᔾᔪᑎᐅᔪᓐᓇᕋᔭᖅᖢᓂ.
ᑭᓯᐊᓂᓕ ᐅᓂᒃᑳᑦ ᐅᖃᐅᓯᖃᑐᐃᓐᓇᖅᑐᖅ ᖃᓄᖅ ᐊᔪᙱᓐᓇᔭᕆᐊᒃᓴᖏᓐᓂᒃ ᑕᒪᒃᑯᐊ ᐱᓕᕆᐊᒃᓴᑦ, ᐃᓱᒪᓕᐅᕆᓯᒪᑐᐃᓐᓇᖅᖢᑎᒃ ᓅᑎᑦᑎᓂᕐᒥᒃ ᐊᑐᒃᑲᓐᓂᕈᓐᓇᖅᑐᒥᑦ ᐆᒻᒪᖁᑎᖃᕈᓐᓴᕐᓂᕐᒥᑦ ᐊᑭᑭᓐᓂᕐᓴᐅᓇᔭᕆᐊᒃᓴᖓᓂᒃ ᒫᓐᓇ ᐆᒻᒪᖁᑎᒋᔭᐅᔫᑉ ᐊᑭᖏᓐᓂᒃ.
ᑭᓯᐊᓂᓕ ᓅᑎᑦᑎᓂᖅ ᓄᓇᓕᖕᓂᑦ ᐊᔪᙱᓐᓇᔭᖅᑐᓄᑦ ᐊᑐᒃᑲᓐᓂᕈᓐᓇᖅᑐᓕᕆᓂᒃᑯᑦ ᐆᒻᒪᖁᑎᓂ ᐊᒃᓱᐊᓗᒃ ᐱᓕᕆᓂᐅᓇᔭᖅᑐᖅ.
“ᐅᖃᓪᓚᖃᑎᖃᑲᑕᒋᐊᖃᕐᓇᕋᔭᕐᒪᓐ, ᐊᒻᒪᓗ ᐱᒋᐊᕆᐊᖃᕋᔭᖅᖢᑎᒃ ᐊᕐᕌᒍ ᑎᑭᐅᑎᓇᓱᖕᓂᐊᕈᑎᒃ ᐆᒻᒪᖁᑎᓕᕆᓂᒃᑯᑦ ᑎᑭᐅᑎᔪᒪᔭᖏᓐᓂᒃ ᑕᒪᐃᓐᓂ ᓄᓇᓕᖕᓂᑦ,” ᐅᖃᖅᑐᖅ ᓕᓂᐅ.
“ᓄᓇᓕᖕᓄᑦ ᐅᐸᒍᑎᔭᕆᐊᖃᕋᔭᖅᑐᑦ, ᐱᓕᕆᖃᑎᒋᓗᒋ ᖃᓄᐃᓕᐅᕈᒪᔭᖏᓐᓂᒃ, ᐊᒻᒪ ᖃᓄᖅ ᓄᓇᓖᑦ ᑕᐅᑐᙳᐊᕐᓯᒪᔭᕆᐊᒃᓴᖏᓐᓂᒃ ᐆᒻᒪᖁᑎᓕᕆᓂᕐᒥ, ᖃᐅᔨᓇᓱᒡᓗᑎᒃ ᑭᓱᓂ ᓯᕗᓪᓕᐅᔾᔨᒐᔭᕆᐊᒃᓴᖏᓐᓂᒃ ᐊᒻᒪ ᓄᓇᓖᑦ ᓈᓛᓂᑦ ᐱᒻᒪᕆᐅᒋᔭᐅᔭᕆᐊᒃᓴᖏᓐᓂᒃ ᐊᐅᓪᓚᕐᕕᐅᕙᒃᑐᑦ ᐊᒻᒪ ᐆᒪᔪᕋᓱᖕᓂᕐᒧᑦ.”
ᐅᓇ ᐃᓚᖃᕐᓯᒪᙱᑦᑐᖅ ᒪᑯᓂᖓ ᐋᕿᒃᓱᐃᕙᓪᓕᐊᒍᑎᐅᓇᔭᖅᑐᓂᒃ ᑲᑎᕐᓱᒐᕐᓂᒃ ᐱᖁᑎᒃᓴᓂᒃ ᓯᕿᓂᕐᒧᑦ ᐆᒻᒪᖁᑎᐅᓇᔭᖅᑐᓂᒃ ᐊᓄᕆᒧᓪᓘᓐᓃᑦ, ᑕᒪᓐᓇᓗ ᐱᓕᕆᓂᐅᓇᔭᖅᖢᓂ ᐊᕐᕌᒎᖕᓂᒃ ᒪᕐᕉᖕᓂ ᑲᑎᖅᓱᐃᑦᑎᐊᕋᓱᒡᓗᓂ, ᐅᕝᕙᓘᓐᓃᑦ ᐱᓕᕆᐊᒃᓴᓂ ᐅᑯᓄᖓ ᖁᓪᓕᖅ ᐆᒻᒪᖁᑎᓕᕆᔨᒃᑯᑦ ᑯᐊᐳᕇᓴᒃᑯᓐᓂ ᑕᒪᒃᑯᐊ ᐊᑐᒃᑲᓐᓂᕈᓐᓇᖅᑐᒧᑦ ᐆᒻᒪᖁᑎᐅᓂᐊᕐᑐᑦ ᐊᑦᑕᑕᕈᓐᓇᑦᑎᐊᕋᔭᕆᐊᒃᓴᖏᓐᓂᒃ ᐱᓕᕆᔾᔪᑎᖏᓐᓄᑦ.
ᓄᓇᓕᓕᒫᓂᒃ 100 ᐳᓴᓐᑎᒥ ᓅᑎᑦᑎᓂᖅ ᐊᑐᒃᑲᓐᓂᕈᓐᓇᖅᑐᓕᕆᓂᒃᑯᑦ ᐆᒻᒪᖁᑎᓕᕆᓂᕐᒥᒃ, ᑖᒃᑯᐊ ᐱᖓᓱᑦ ᒪᓕᒐᓕᕆᔨᕐᔪᐊᙳᕋᓱᒃᑐᑦ ᐊᑐᕆᒪᔭᖏᓐᓂᒃ, ᐱᓕᕆᑯᑖᒍᑎᑐᐃᓐᓇᐅᓇᔭᙱᑦᑐᖅ ᑭᓯᐊᓂᑦᑕᐅᖅ ᑮᓇᐅᔭᑲᓪᓚᖕᓂ ᐊᑐᕈᑎᐅᓇᔭᖅᖢᓂ.
ᐅᑯᐊᓕ ᓂᐅ ᑎᒧᑯᕌᑎᒃ ᐹᑎᑯᑦ (NDP) ᐊᒻᒪ ᓕᐳᕈᑯ (Liberal) ᑐᓴᖅᑎᑦᑎᓚᐅᙱᖢᑎᒃ ᓱᓕ ᖃᓄᑎᒋ ᑮᓇᐅᔭᑎᒍᑦ ᑐᓂᓯᓇᔭᕐᓂᖏᓐᓂᒃ ᓅᑎᑦᑎᓂᕐᒧ, ᐅᑯᐊᓕ ᒍᕇᓐ ᐹᑎᑯᑦ (Green Party) ᐅᖃᓚᐅᕐᑐᑦ ᐱᓇᓱᐊᕈᓯᐅᓚᐅᕐᑐᒥᓐ.
ᐃᓚᒋᔭᐅᓪᓗᓂ ᓂᕈᐊᒐᒃᓴᐅᓂᕐᒧᑦ ᖃᓄᐃᓕᐅᕈᑎᖏᓐᓄᑦ ᐊᑭᓕᐅᑎᒃᓴᓄᑦ ᐅᓂᒃᑳᓂᒃ, ᒍᕇᓐ ᐹᑎᑯ ᐅᖃᓚᐅᕐᑐᑦ $150 ᒥᓕᐊᓐᑖᓚᓂ ᑐᓂᓯᓂᐊᕐᓂᕋᖅᖢᑎᒃ ᐊᕐᕌᒍᑦ ᑕᓪᓕᒪᑦ ᐃᓗᐊᓂᒃ ᓅᑎᑦᑎᓂᕐᒨᖓᔪᓂᒃ ᑕᒪᐃᓐᓄᓕᒫᖅ ᓄᓇᓕᕋᓛᓄᑦ ᐊᒻᒪ ᐅᑭᐅᕐᑕᖅᑐᕐᒥᓐ ᓄᓇᓕᖕᓄᑦ—ᓄᓇᕗᒦᑦᑐᑐᐊᓅᙱᑦᑐᖅ—ᑏᓱᓪ ᐅᕐᓱᐊᓗᖕᒥ ᐊᑐᕈᓐᓃᕐᑎᑦᑎᒐᓱᒡᓗᑎ.
ᓈᒻᒪᙱᒻᒪᑦ ᑭᓯᐊᓂ.
ᓕᓂᐅ ᓇᓗᓇᐃᕐᓯᒋᐊᓚᐅᕐᑐᖅ ᒪᑯᐊ ᓄᓇᓕᒃᑎᑐᑦ ᓲᕐᓗ ᐃᒃᐱᐊᕐᔪᒃᑐ ᓅᑎᑦᑎᓂᐊᕈᑎᒃ ᐊᒃᓱᓪᓘᓐᓃᑦ 60 ᐳᓴᓐᑎᖓᓂᒃ ᐆᒪᖅᑯᑎᓕᕆᔾᔪᑎᖓᑕ, ᐊᐅᓚᑦᑎᓂᕐᒧᑦ ᐊᑐᖃᑦᑕᕆᐊᖃᕋᔭᖅᑐᑦ ᒫᓂ $27.8 ᒥᓕᐊᓐᑖᓚᓂ.
ᐅᑯᑎᒎᓇᕐᓕ ᑕᕝᕙᓂᑦᑕᐃᓐᓇᖅ ᐅᓂᒃᑳᓂᒃ, ᐊᓯᖏᓐᓄᑦ ᓄᓇᓕᖕᓄᑦ ᐅᓇ 60 ᐳᓴᓐᑎᒥ ᐊᑐᕋᓱᖕᓂᐊᕐᓂ ᐊᑐᒃᑲᓐᓂᕈᓐᓇᖅᑐᒥ ᐆᒻᒪᖁᑎᓕᕆᓂᕐᒧᑦ, ᐊᑐᖃᑦᑕᕆᐊᖃᕋᔭᖅᑐᑦ ᖁᑦᑎᖕᓂᕐᓴᒥᑦ.
ᐃᖃᓗᖕᓂᓪᓕ, ᐃᓱᒪᒋᔭᐅᔪᖅ ᐊᑭᖃᕋᔭᕐᓂᖓᓂᒃ ᒫᓂ $148 ᒥᓕᐊᓐᑖᓚᓂ.
ᑕᐃᒪᓐᓇᓕ ᓇᓗᓇᙱᒃᑲᓗᐊᖅᖢᓂ ᒥᑭᓐᓂᕐᓴᐅᓂᖓᓂᒃ ᐆᒪᙵᑦ $250-500-ᒥᓕᐊᓐᑖᓚᑐᕋᔭᓚᐅᕐᑐᒥ ᐆᒻᒪᖅᑯᑎᓕᕆᓂᐅᓂᕐᒧᑦ ᐃᓱᒪᒋᔭᐅᓚᐅᕐᓯᒪᔪᒥ ᓄᓇᓕᐸᐅᔭᓂ, ᑖᓐᓇ ᐊᑐᕋᔭᕐᒪᑦ ᐊᑕᐅᓯᕐᒧᑦ ᓄᓇᓕᖕᓄᑦ ᐅᑯᐊ ᒍᕇᓐ ᐹᑎᑯᒃ ᐃᑲᔫᑎᒋᔪᒪᔭᖓ.
ᓖᓂᐅ ᓂᕆᐅᓗᐊᙱᑦᑐ ᒐᕙᒪᑐᖃᒃᑯᑦ ᑕᒪᐃᓐᓂ ᐊᑭᓖᓇᔭᕆᐊᒃᓴᖏᓐᓂᒃ ᑖᒃᑯᓂᖓ ᐱᓕᕆᐊᒃᓴᓂᒃ, ᑭᓯᐊᓂᓕ ᐅᖃᓚᐅᕐᒥᔪᑦ ᐱᓕᕆᐊᑎᒋᔭᐅᓇᔭᖅᑐᓂᒃ ᐊᒻᒪᓗ ᖃᓄᖅ ᐱᓕᕆᐊᖑᓇᔭᕆᐊᒃᓴᖏᓐᓂᒃ ᐊᒻᒪ ᐱᔭᕆᑐᓇᔭᕐᒥᖕᒪᑦ ᐅᑯᓂᐅᓗᓂᓗ.
ᐅᓇ 2030 ᐃᓱᖃᕐᕕᒃᓴᕆᔭᐅᔪᖅ ᑕᐅᑐᒃᖢᒍ, ᐱᕕᖃᓗᐊᕐᓇᔾᔮᙱᑦᑐᖅ.
“ᓯᕿᓂᕐᒧᓪᓕ ᐆᒻᒪᖁᑎᖃᕋᓱᖕᓂᕐᒧᑦ, ᐃᓱᒪᔪᖓ ᐊᕐᕌᒍᓂ ᒪᕐᕉᖕᓂ ᑕᓪᓕᒪᓄᑦ ᐱᓕᕆᐊᖑᓇᔭᕆᐊᒃᓴᖓᓂᒃ. ᐊᓄᕆᒧᓪᓕ ᐆᒻᒪᖁᑎᖃᕋᓱᖕᓂᕐᒧᑦ, ᐃᓱᒪᓇᕐᑐᕐᓕ ᐊᕐᕌᒍᓂ ᑕᓪᓕᒪᓂᒃ 7-ᓄᑦ ᐱᓕᕆᐊᖑᓇᔭᕆᐊᒃᓴᖓᓂ,” ᐅᖃᖅᑐᖅ ᓕᓂᐅ ᐊᐱᕆᔭᐅᑎᓪᓗᖑ ᖃᓄᑎᒋ ᐆᒻᒪᖅᑯᑎᓕᕆᓂᕐᒥᒃ ᐱᓕᕆᐊᖃᕋᔭᕐᓂᖏᓐᓂᒃ.
ᑕᒪᒃᑯᐊ ᐃᓱᓕᕝᕕᒃᓴᐅᑎᑕᐅᔪᑦ ᑕᐅᑐᒃᖢᒋ ᐊᕕᒃᑐᖅᖢᒋᓪᓗ 25-ᓄ ᓄᓇᓕᖕᓄᑦ ᐊᒻᒪ ᐊᑕᐅᑦᑎᒃᑯᐸᓗᒃ ᐱᓕᕆᐊᖑᓂᐊᕈᑎᒃ ᓄᓇᓕᖕᓂ ᐅᖓᓯᒌᒃᑑᑎᓂᒃ ᐊᒻᒪᓗ ᓄᓇ ᐊᑐᐃᓐᓇᐅᖏᓐᓇᖅᐸᙱᖢᓂ, ᓕᓂᐅ ᐃᓱᒪᔪᖅ ᖃᓄᖅ ᐱᐊᓂᒃᑕᐅᓇᔭᕆᐊᒃᓴᖓᓂᒃ.
ᑕᒪᒃᑯᐊ ᖃᓄᐃᓕᐅᕈᑎᒃᓴᐅᓇᔭᒻᒪᕆᒃᑐ ᑕᐅᑐᒃᖢᒋᑦ, ᐅᖃᖅᑐᕐᓕ ᑕᒪᓐᓇ ᐊᔪᙱᑦᑐᓐᓇᕐᓂᖓᓂᒃ.
“ᐃᓱᒪᔪᖓᓕ ᑕᒪᒃᑯᐊ ᑎᑭᐅᑎᕝᕕᐅᓯᒪᔪᒪᔪᓄᑦ, ᑕᒪᓐᓇ ᐊᓯᙳᕈᑎᒻᒪᕆᐅᓂᐊᕆᐊᒃᓴᖓᓂᒃ. 100 ᐳᓴᓐᑎᒥᓪᓘᓐᓃᑦ ᑎᑭᐅᑎᙱᒃᑲᓗᐊᕈᑦᑕ, ᑕᐃᒪᓕ ᐱᔪᒪᓂᖅᑕᖃᑦᑎᐊᖅᐳᖅ.”
ᖃᐅᔨᒪᒋᑦᑎ: ᐅᓇ ᐅᖃᓕᒫᒐᒃᓴᖅ ᐅᖃᐅᓯᖃᖅᑐᖅ ᒐᕙᒪᑐᖃᒃᑯᓐᓄᑦ ᓂᕈᐊᒐᒃᓴᐅᔾᔪᑎᖏᓐᓂᒃ ᐅᑯᐊ ᒍᕇᓐ ᐹᑎ, ᓕᐳᕈᓪ ᐹᑎ ᐊᒻᒪᓗ ᓂᐅ ᑎᒧᑯᕌᑎᒃᐸᑎᑯᑦ (NDP). ᐅᓇ ᐅᖃᓕᒫᒐᒃᓴᖅ ᐋᖅᑭᒃᓱᖅᑕᐅᑎᓪᓗᒍ, ᑲᓐᓲᕕᑎᕝ ᐹᑎᒃᑯᑦ ᓱᓕ ᑐᓴᖅᑎᑦᑎᓯᒪᓚᐅᙱᒻᒪᑕ ᑭᓱᒧᑦ ᓂᕈᐊᒐᒃᓴᐅᓂᖏᓐᓂᒃ, ᑕᐃᒪᓕ ᐅᕙᓂ ᐅᓂᒃᑳᒥᑦ ᐃᓚᐅᑎᑕᐅᙱᓚᑦ.
(0) Comments