ᒥᑦᑎᒪᑕᓕᖕᒥ ᐱᖖᒍᐊᕐᕕᓕᕆᔨᖏᑦ ᑐᓂᐅᖅᑲᐃᕙᓪᓕᐊᕗᖅ ᑕᒪᒃᑯᓂᖓ ᐴᖅᓯᒪᔪᓂᒃ ᓱᕈᓯᕐᓄᑦ ᐊᖏᕐᕋᖅᓯᒪᓗᑎᒃ ᐊᓂᑦᑕᐃᓕᒪᔭᕆᐊᖃᖅᑎᑕᐅᔪᓂᑦ ᐱᔾᔪᑎᒋᓪᓗᒍ ᓄᕙᒡᔪᐊᕐᓇᖅ-19. ᐊᑐᓂ ᐴᖅᑕᐅᓯᒪᔪᑦ ᐃᓗᓕᖃᖅᐳᑦ ᒪᑐᒥ (ᐅᒃᑯᐊᕐᒥ) ᐹᔅᑭᑦᐹᖅ ᐴᕐᕕᖓᒥᓂᒃ ᓂᕕᖖᒐᖅᑕᐅᓯᒪᔪᒃᓴᒥᒃ, ᐃᒥᒐᕐᓂᒃ, ᒥᑭᑦᑑᑎᓂᒃ ᕼᐋᑭᕈᑎᓂᒃ ᐊᒻᒪᓗ ᐊᓯᖏᓂᒃ ᐱᓕᕆᐊᒃᓴᐅᔪᓂᒃ ᓱᕈᓯᕐᓄᑦ ᐱᖖᒍᐊᕈᑎᒃᓴᖏᓂᒃ ᐊᓂᑦᑕᐃᓕᒪᔭᕆᐊᖃᕐᓂᕐᒥᓐᓂ. (ᐊᔾᔨᓕᐅᖅᑕᐅᔪᑦ ᑎᕇᓯ ᑕᓗᐃᒡ)
ᐱᖖᒍᐊᒐᒃᓴᐃᑦ ᐊᒻᒪᓗ ᑕᒧᐊᔭᒃᓴᐃᑦ ᐱᑕᖃᖅᑎᑕᐅᓂᖏᓂᑦ ᓱᕈᓰᑦ ᐊᓂᒍᐃᒋᐊᕈᑎᖃᕈᓐᓇᓕᖅᑎᑕᐅᕗᑦ ᓄᕙᒡᔪᐊᕐᓇᖅ-19-ᒥᑦ ᐊᓂᑦᑕᐃᓕᒪᑎᓪᓗᒋᑦ
ᕼᐋᒻᓚᒃᑯᑦ ᐱᖖᒍᐊᕐᓂᓕᕆᔨᖏᑦ ᑐᓂᐅᖅᑲᐃᕙᓪᓕᐊᕗᑦ ᑖᒃᑯᓂᖓ ᐴᖅᑕᐅᓯᒪᔪᓂᒃ, ᑮᓇᐅᔭᑎᒍᑦ ᐊᑐᓂ ᐊᑭᖃᕋᔭᖅᑐᓂᒃ $100
ᕼᐋᒻᓚᖓᑦ ᒥᑦᑎᒪᑕᓕᖕᒥ ᓱᕈᓯᕐᓄᑦ ᐊᓂᑦᑕᐃᓕᒪᔭᕆᐊᖃᖅᑐᓄᑦ ᐱᔾᔪᑎᒋᓪᓗᒍ ᓄᕙᒡᔪᐊᕐᓇᖅ-19 ᑐᓂᕐᕈᓯᐊᖅᑖᕐᑎᑦᓯᕗᑦ ᐴᖅᑕᐅᓯᒪᔪᓂᒃ ᐃᓗᓕᖃᖅᓱᑎᒃ ᐱᖖᒍᐊᕈᑎᒃᓴᓂᒃ ᐊᒻᒪᓗ ᑕᒧᐊᔭᒃᓴᓂᒃ ᓱᓪᓗᐊᖖᒋᓗᐊᓕᖅᓯᒪᖁᓇᒋᑦ.
ᐊᕙᑎᐅᔪᓂᒃ (20) ᐴᖅᑕᐅᓯᒪᔪᑦ ᑐᓂᐅᖅᑲᕐᑕᐅᓯᒪᓕᓚᐅᖅᐳᑦ ᐱᓇᓱᐊᕈᓯᐅᓚᐅᖅᑐᒥ. ᐊᑐᓂ ᐴᖅᑕᐅᓯᒪᔪᑦ ᑮᓇᐅᔭᑎᒍᑦ ᐊᑭᖃᕋᔭᖅᓱᑎᒃ $100-ᓂᒃ ᐃᓗᓕᖃᖅᑐᓂᒃ ᒪᑐᒥ (ᐅᒃᑯᐊᕐᒥ) ᐹᔅᑭᑦᐹᖅ ᐴᕐᕕᖓᒥᓂᒃ ᓂᕕᖖᒐᖅᑕᐅᓯᒪᔪᒃᓴᒥᒃ, ᒥᑭᑦᑑᑎᓂᒃ ᕼᐋᑭᕈᑎᓂᒃ, ᑕᒧᐊᔭᒃᓴᓂᒃ, ᐊᒥᐊᒐᒃᓴᖁᑎᓂᒃ, ᐅᖃᐅᓯᕐᒧᑦ ᓇᓚᐅᑦᓵᕈᑎᓂᒃ, ᓱᓇᖖᒍᐊᓕᐅᕈᑎᒃᓴᓂᒃ, ᐱᖖᒍᐊᕈᑎᓂᒃ ᐊᒻᒪᓗ ᐊᓯᖏᓂᒃ, ᐅᖃᖅᓱᓂ ᕼᐋᒻᓚᒃᑯᓐᓂ ᐱᖖᒍᐊᕐᓂᓕᕆᔨᒃᑯᑦ ᐃᓱᒪᑕᖓᑦ, ᑎᕇᓯ ᑕᓗᐃᒡ.
ᒥᑦᑎᒪᑕᓕᒃ — ᓄᓇᖅᑲᑎᒌᖑᔪᑦ ᓄᓇᓕᐅᔪᒥ 60 ᐳᕐᓴᓐᑎᖏᑦ ᐃᓄᒋᐊᖕᓂᖏᓐᓂᑦ ᑐᒡᓕᕆᔭᖓᓂᒃ ᐋᓐᓂᐊᖃᓕᖅᑕᐃᓕᒪᔾᔪᑎᓂᒃ ᑲᐱᔭᐅᓯᒪᓕᖅᑐᑦ — 19-ᖑᔪᓂᒃ ᓇᓗᓇᐃᖅᑕᐅᓯᒪᔪᖃᓕᓚᐅᖅᓱᑎᒃ ᓄᕙᒡᔪᐊᕐᓇᖅ-19-ᒥᒃ ᐋᓐᓂᐊᖃᓕᖅᓯᒪᔪᖃᕐᑐᑦ ᐊᒻᒪᓗ 13-ᖑᔪᑦ ᐊᓂᒍᐃᓯᒪᓕᓚᐅᓱᑎᒃ ᐋᓐᓂᐊᕐᓇᒥᒃ ᕕᑉᕈᐊᕆ 10-ᖑᑎᓪᓗᒍ. ᐃᓕᓐᓂᐊᕐᕖᑦ ᒪᑐᐃᖅᑕᐅᓯᒪᓕᖅᐳᑦ 100 ᐳᕐᓴᓐᑎᒥᒃ.
ᑕᓗᐃᒡ ᐅᖃᓚᐅᕐᐳᖅ ᐱᓕᕆᐊᖑᔪᖅ ᑖᓐᓇ ᐱᒋᐊᖅᑎᑕᐅᓚᐅᖅᓯᒪᔪᖅ ᐱᖓᓲᓕᖅᑐᑦ ᐱᓇᓱᐊᕈᓯᕐᓂ ᑕᐃᒪ ᓄᓇᓕᐅᔪᒥ ᐋᓐᓂᐊᕐᕕᖕᒥ ᐃᖅᑲᓇᐃᔭᖅᑎᐅᔪᐃᑦ ᕼᐋᒻᓚᒃᑯᓐᓄᑦ ᐃᑲᔪᖅᑕᐅᔪᒪᓪᓗᑎᒃ ᐊᐱᕆᓚᐅᖅᓯᒪᓂᖏᑕ, ᐃᓱᒫᓗᒍᑎᖃᕐᓂᕐᒥᓐᓄᑦ ᓱᕈᓯᕐᓂᒃ ᐊᓂᑦᑕᐃᓕᒪᔭᕆᐊᖃᖅᑎᑕᐅᔪᑦ ᐱᖃᑎᐊᓗᖕᒥᓐᓂᒃ ᑕᑯᔭᖅᑐᐃᖃᑦᑕᕐᓂᖏᑦ ᐱᔾᔪᑎᒋᓪᓗᒋᑦ.
“ᐊᔪᕐᓇᕆᔭᐅᓛᖑᕙᒻᒪᑦ, ᐃᒪᓐᓇ ᓱᕈᓰᑦ ᐊᖏᕐᕋᖅᓯᒪᔭᕆᐊᖃᖅᑎᑕᐅᕙᓐᓂᕈᑎᒃ ᐊᓂᑦᑕᐃᓕᓗᑎᒃ, ᓱᓪᓗᐊᖖᒋᓗᐊᓕᕐᓂᐅᓴᕙᖕᒪᑕ, ᓯᓚᒥ ᐱᖃᑎᐊᓗᖕᒥᓐᓂᒃ ᐱᖖᒍᐊᖃᑎᖃᓕᖅᐸᒃᓱᑎᒃ, ᑕᐃᒪᓕ ᑕᒪᒃᑯᐊ ᐱᔾᔪᑎᒋᓪᓗᑎᒍ ᑕᐃᒪᓐᓇᐃᑉᐸᓐᓂᖏᑦ ᑭᒡᓕᖃᓕᖅᑎᓐᓇᓱᐊᕋᑦᑎᒍ,” ᑕᓗᐃᒡ ᐅᖃᖅᓱᓂ.
“ᐃᓱᒪᕗᖓ ᑖᒃᑯᐊ ᐴᖅᑕᐅᓯᒪᓪᓗᑎᒃ ᑐᓂᐅᖅᑲᕐᑕᐅᔪᑦ ᐃᑲᔪᕐᓂᖃᒻᒪᕆᒐᓱᒋᓪᓗᒋᑦ. ᐅᔾᔨᕈᓱᓕᕋᑦᑕ ᒥᑦᑎᒪᑕᓕᖕᒥ ᓄᕙᒡᔪᐊᕐᓇᒥᒃ ᐋᓐᓂᐊᖃᓕᖅᐸᒃᑐᑦ ᐊᒥᓲᔪᖕᓃᖅᐸᓪᓕᐊᓯᒪᓕᕐᓂᖏᑕ ᐊᒻᒪᓗ ᖁᕕᐊᓇᖅᑑᓪᓗᑎᒃ ᐱᖖᒍᐊᕈᑎᒃᓴᐅᔪᑦ ᓱᕈᓯᕐᓄᑦ ᐃᑲᔪᕈᑎᐅᖁᓪᓗᒋᑦ ᐊᓂᒍᐃᓯᒪᓇᓱᐊᖅᑎᓪᓗᒋᑦ ᐊᖏᕐᕋᖅᓯᒪᓗᑎᒃ ᐊᓂᑦᑕᐃᓕᒪᔭᕆᐊᖃᕐᓂᕐᒥᓐᓄᑦ.”
ᓄᓇᕗᒻᒥ ᐃᓱᒪᑕᐅᓪᓗᓂ ᐋᓐᓂᐊᖃᕐᓇᖖᒋᑦᑐᓕᕆᔨ, ᓘᑦᑖᖅ ᒪᐃᑯᓪ ᐹᑐᕐᓴᓐ, ᐅᖃᓚᐅᕐᐳᖅ ᐊᒃᓱᕈᕐᓇᒻᒪᕆᒃᐸᒻᒪᑦ ᐃᓄᖕᓄᑦ ᐊᓂᑦᑕᐃᓕᔭᕆᐊᖃᖅᑎᑕᐅᔪᓄᑦ, ᑕᐃᒪᓐᓇᑦᑕᐅᖅ ᓱᕈᓰᑦ ᐊᒃᓱᕈᓕᖅᓯᒪᕙᖕᒥᒻᒪᑕ.
“ᖃᓄᑐᐃᓐᓇᖅ ᐱᓕᕆᓂᖃᕐᕕᐅᔪᓐᓇᕐᒪᑦ ᒥᑭᒡᓕᒋᐊᖅᑎᑕᐅᓯᒪᓕᖁᓪᓗᒍ ᓱᓪᓗᐊᖖᒋᓗᐊᓕᕐᓂᐅᕙᒃᑐᑦ ᓱᕈᓯᕐᓄᑦ ᐊᒻᒪᓗ ᐊᒃᓱᕈᓕᖅᓯᒪᓂᐅᕙᒃᑐᓄᑦ ᐃᓄᖕᓄᑦ ᑕᒪᐃᓐᓄᑦ ᐃᑲᔪᕈᑎᐅᓯᒪᓕᕐᓂᐊᕐᒪᑦ ᐊᓂᑦᑕᐃᓕᒪᔭᕆᐊᖃᕐᓂᖏᓐᓄᑦ ᐊᒻᒪᓗ ᒥᑭᒡᓕᒋᐊᖅᑎᑕᐅᓯᒪᓕᖁᓪᓗᒋᑦ ᐋᓐᓂᐊᖃᓕᖅᐸᓪᓕᐊᔪᑦ,” ᐹᑐᕐᓴᓐ ᐅᖃᖅᓱᓂ.
ᐅᖃᖅᓱᓂ ᓱᕈᓰᑦ ᐊᖏᔪᒥᒃ ᐱᓕᕆᓂᐅᔪᒧᑦ ᑐᕌᕐᕕᐅᓯᒪᓂᖏᑦ ᐃᑲᔪᕈᑎᐅᓯᒪᒻᒪᑕ.
“ᐃᓱᒪᕗᖓ ᓄᓇᓕᐅᔪᑉ ᖁᑦᑎᖕᓂᖓᓂᑦ ᐃᑲᔪᖅᑕᐅᓯᒪᓕᕈᓐᓇᕐᓂᐅᔪᑦ ᐊᑐᕐᓂᖃᒻᒪᕆᒃᐸᒐᓱᒋᓪᓗᒋᑦ ᐊᓂᒍᐃᓇᓱᐊᖅᑎᓪᓗᒋᑦ ᑕᐃᒪᓐᓇᐃᑐᒃᑰᕐᓂᐅᔪᓂᑦ,” ᐹᑐᕐᓴᓐ ᐅᖃᖅᓱᓂ. “ᐃᓕᑕᕆᔭᖅᐳᑦ ᑕᐃᒫᒃ ᐱᓕᕆᓂᖃᓕᖅᓯᒪᔪᑦ.”
ᓄᓇᓕᐅᔪᒥ ᐋᓐᓂᐊᕐᕕᒃ ᓇᓗᓇᐃᖅᓯᓚᐅᖅᐳᑦ ᑭᒃᑯᑦ ᓇᓕᖏᑦ ᐃᓄᐃᑦ ᐊᓂᑦᑕᐃᓕᒪᑎᑕᐅᓂᖏᑕ. ᑕᐃᒪᓗ, ᐅᓪᓗᒃ ᒪᕐᕉᒃ ᐊᓂᒍᖅᓯᒪᓕᑐᐊᕌᖓᑕ, ᕼᐋᒻᓚᒃᑯᓐᓂ ᐃᖅᑲᓇᐃᔭᖅᑏᑦ ᑐᓴᖅᑎᑕᐅᒃᑲᓐᓂᖅᐸᒃᑐᑦ ᒫᓐᓇᒧᑦ ᑎᑭᑎᑕᐅᓯᒪᓪᓗᑎᒃ ᐊᑎᖏᓂᒃ ᑎᑎᕋᖅᑕᐅᓯᒪᔪᓂᒃ ᑭᒃᑯᑦ ᐊᓂᑦᑕᐃᓕᑎᑕᐅᓯᒪᓂᖏᓐᓄᑦ ᐊᒻᒪᓗ ᖃᔅᓯᓂᒃ ᓱᕈᓯᕐᓂᒃ ᐃᒡᓗᒥᐅᑕᖃᕐᓂᖏᓐᓄᑦ, ᑕᐃᒪᓕ ᐊᒃᔭᖅᓯᓯᒪᓕᖅᐸᒃᓱᑎᒃ ᐴᖅᑕᐅᓯᒪᓪᓗᑎᒃ ᐱᖖᒍᐊᕈᑎᒃᓴᖏᓂᒃ.
ᑮᓇᐅᔭᖁᑎᒃᓴᖃᖅᑎᑕᐅᓚᐅᖅᑐᑦ ᓄᓇᒻᒥ ᒐᕙᒪᖓᑕ ᓄᕙᒡᔪᐊᕐᓇᖅ-19ᒧᑦ ᐃᑲᔪᕈᒃᓴᐅᓪᓗᑎᒃ ᑮᓇᐅᔭᖁᑎᒃᓴᕆᔭᖏᓂᑦ ᓄᓇᓕᐅᔪᓄᑦ.
ᑕᓗᐃᒡ ᐅᖃᓚᐅᕐᐳᖅ ᓴᕆᒪᒋᒐᒥᒋᑦ ᐱᖖᒍᐊᕐᓂᓕᕆᔨᒃᑯᖏᑦ ᕼᐋᒻᓚᒃᑯᓐᓂ ᐱᓕᕆᓂᖃᕐᓯᒪᓂᖏᓐᓄᑦ ᑕᒪᒃᑯᓂᖓ.
(0) Comments