ᐱᖤᙱᓴᖅᑐᑦ ᑎᕆᒐᓂᐊᕐᔪᐃᑦ ᐱᑕᖃᓗᐊᓕᕐᓄᑦ ᐅᓄᕐᓯᕚᓪᓕᕐᓂᖏᓐᓄᑦ, ᐅᖃᖅᑐᖅ ᐆᒪᔪᕐᓂᐊᖅᑎᒃᑯᑦ ᐊᖓᔪᖅᑳᖓ
ᓄᓇᕗᒥᑦ ᒐᕙᒪᒃᑯ 6-ᓂ ᐱᖤᖏᓴᖅᑐᓂᒃ ᑎᕆᒐᓂᐊᕐᔪᒃᓂ ᖃᐅᔨᓯᒪᓕᕐᑐᑦ ᓄᕕᐱᕆᒥ
ᑕᑯᖃᑦᑕᖅᑐᑦ ᐱᖤᙱᓴᖅᑐᓂᒃ ᑎᕆᒐᓂᐊᕐᔪᖕᓂ ᑕᑯᓂᕋᖃᑦᑕᖅᑐᑦ ᐅᓄᕐᓯᕙᓪᓕᐊᔪᑦ
ᑕᒪᓐᓇᓗ ᑎᕆᒐᓂᐊᕐᔪᐃᑦ ᐅᓄᕐᓂᕐᓵᓘᓂᖏᓐᓄᑦ ᐅᑭᐅᖑᔪᖅ, ᐅᖃᖅᑐᖅ ᔮᓇᑕᓐ ᐱᓐ,
ᓄᓇᕗᒥᑦ ᒐᕙᒪᒃᑯᓐᓄᑦ ᐆᒪᔪᕐᓂᐊᖅᑎ ᕿᑭᖅᑖᓘᑉ ᓂᒋᐊᓄᑦ. “ᑎᕆᒐᓂᐊᕐᔪᐃᑦ
ᐱᑕᖃᕐᔫᒥᓕᖃᑦᑕᕐᒪᑕ ᐱᖤᙱᓴᓕᖅᐸᒃᑲᓗᐊᖅᖢᑎᒃ ᑕᒪᓐᓇᓗ ᐱᖤᙱᓴᕐᓂᖅ
ᑲᓇᑕᐅᑉ ᐅᑭᐅᕐᑕᖅᑐᖓᓂ ᐱᑕᖃᑦᑕᐃᓐᓇᖅᖢᓂ, ᑕᒪᓐᓇᓗ ᐅᔾᔨᕆᓯᒪᔭᕆᐊᖃᖅᖢᑎᒍᑦ,”
ᐅᖃᖅᑐᖅ. (ᐊᔾᔨᙳᐊᖁᑎᒋᔭᐅᔪᖅ)
For an English version of this story, see Rabid fox prevalence due to population boom, says wildlife manager
ᑕᑯᑲᑕᒃᑐᑦ ᑎᕆᒐᓂᐊᕐᔪᖕᓂ ᐱᖤᙱᓴᖅᑐᓂᒃ ᐅᓄᕐᓯᕚᓪᓕᕐᓂᖏᑦ ᓄᓇᕗᒥᑦ ᐱᔾᔪᑎᖃᓗᐊᖅᑐᖅ ᐅᓄᕐᓯᕚᓪᓕᕐᓂᖏᓐᓂᒃ ᑎᕆᒐᓂᐊᕐᔪᐃ, ᐊᕙᑎᓕᕆᔨᒃᑯᑦ ᐅᖃᓚᐅᕐᑐᑦ.
ᔮᓇᑕᓐ ᐱᓐ ᓄᓇᕗᒥᑦ ᒐᕙᒪᒃᑯᓐᓄᑦ ᐆᒪᔪᕐᓂᐊᖅᑎᓄᑦ ᐊᐅᓚᑦᑎᔨᐅᖕᒪᑦ ᕿᑭᖅᑖᓘᑉ ᓂᒋᐊᓄᑦ. ᐅᖃᓚᐅᕐᑐᖅ ᑎᕆᒐᓂᐊᕐᔪᐃᑦ ᐃᓚᖏᓐᓂᒃ ᐊᕐᕌᒍᓂᒃ ᐅᓄᕐᓂᕐᓴᐅᕙᒃᖢᑎᒃ ᐊᒻᒪ ᐃᓚᖏᓐᓂᒃ ᐅᓄᙱᓐᓂᕐᓴᐅᕙᒃᖢᑎᒃ ᐊᒻᒪᓗ ᐅᓄᓗᐊᓕᕌᖓᑕ ᐱᖤᙱᓴᕐᓂᕐᒥᒃ ᐊᐃᑦᑐᖃᑦᑕᐅᑎᓴᕋᐃᓐᓂᕐᓴᐅᖕᒪᑕ.
“ᐅᔾᔨᕆᓯᒪᒐᑦᑕ ᐅᓄᕐᓯᕚᓪᓕᕐᓂᖏᓐᓂᒃ ᐃᓚᖏᓐᓂᒃ ᐅᐸᒃᓯᒪᕙᒃᑕᖏᓐᓂᒃ — ᐃᖃᓗᖕᓂ ᑕᑯᑲᑕᒃᑐᑦ ᐅᓄᕐᓯᕚᓪᓕᕐᓯᒪᖕᒥᖕᒪᑕ,” ᐱᓐ ᐅᖃᖅᑐᖅ.
“ᑎᕆᒐᓂᐊᕐᔪᐃᑦ ᐱᖤᙱᓴᕐᓇᒥᒃ ᐋᓐᓂᐊᖃᕋᔪᒃᖢᑎᒃ ᐊᒻᒪᓗ ᐅᓄᕐᓯᕚᓪᓕᖅᓯᒪᓪᓗᑎᒃ ᑎᕆᒐᓂᐊᕐᔪᐃᑦ ᑕᐃᒪᓕ ᑕᑯᑲᑕᖕᓂᕐᓴᐅᓂᐊᕐᑐᒍᑦ ᑎᕆᒐᓂᐊᕐᔪᖕᓂᒃ ᐱᖤᙱᓴᖅᑐᓂᒃ,” ᐅᖃᖅᑐᖅ.
ᑎᕆᒐᓂᐊᕐᔪᐃᑦ ᐅᓄᕐᓂᕐᓴᐅᓕᖃᑦᑕᖅᑐᑦ ᓄᓇᕗᒥᑦ ᓂᕆᔭᒃᓴᖃᕐᓂᕐᓴᐅᓕᕌᖓᑕ. ᐆᒪᔪᓕᕆᔨ ᐊᒻᒪ ᖃᐅᔨᓴᖅᑎ ᑖᒥᓂᒃ ᕗᑑ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐅᖃᓚᐅᕐᑐᖅ ᐋᒐᓯᐅᑎᓪᓗᒍ 2021-ᒥ ᐊᕕᙵᐃ ᐅᓄᒻᒪᕆᓚᐅᕐᓂᕋᖅᖢᓂᒋᑦ. ᐊᕕᙵᐃᑦ ᐅᑭᐅᕐᑕᖅᑐᕐᒥ ᐅᓄᓛᖑᖕᒪᑕ ᓂᕐᔪᑎᓂᒃ, ᐊᒻᒪᓗ ᐅᓄᕈᕐᓯᕚᓕᕐᓯᒪᖃᑦᑕᕐᓂᖏᑦ ᐊᒻᒪ ᐅᓄᕈᓐᓃᖅᐹᓪᓕᖅᓯᒪᖃᑦᑕᕐᓂᖏᑦ ᐊᒃᑐᐃᓂᖃᒻᒪᕆᒃᖢᑎᒃ ᑖᒃᑯᓂᖓ ᓂᕆᖃᑦᑕᖅᑐᓂᒃ ᐃᓚᒋᔭᐅᓪᓗᑎᒃ ᑎᕆᒐᓂᐊᕐᔪᐃᑦ.
ᐱᓐ ᐅᖃᓚᐅᕐᑐᖅ ᐃᓱᒪᓂᕋᖅᖢᓂ ᑎᕆᒐᓂᐊᕐᔪᐃᑦ ᐅᓄᕈᓐᓃᖅᐹᓪᓕᓛᕐᓂᖏᓐᓂᒃ — “ᑕᐃᒪᓐᓇ ᐃᓕᖅᑯᓯᖃᑐᐃᓐᓇᕐᒪᑕ ᓄᓇᒥᐅᑕᐃᑦ.”
ᔭᓄᐊᕆ 7 ᐱᒋᐊᖅᖢᓂ ᓄᓇᕗᒥᑦ ᒐᕙᒪᒃᑯᑦ 6-ᓂᒃ ᑎᕆᒐᓂᐊᕐᔪᖕᓂᒃ ᓇᓗᓇᐃᕐᓯᓚᐅᕐᑐᑦ ᐱᖤᙱᓴᖅᑐᕕᓂᕐᓂᒃ — ᐱᖓᓱᑦ ᐃᖃᓗᖕᓂ, ᒪᕐᕉᒃ ᐃᒡᓗᓕᒃᒥ ᐊᒻᒪ ᐊᑕᐅᓯᖅ ᐃᒃᐱᐊᕐᔪᒃᒥ. ᐊᓯᒃᑲᓐᓂᖏᓐᓂᒃ ᑖᒃᑯᓇᓂ ᓄᓇᓕᖕᓂ ᑕᑯᖃᑦᑕᕐᓯᒪᔪᑦ ᐊᒻᒪᓗ ᓴᓂᑭᓗᐊᕐᒥ.
ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᔨᑦ ᑭᒃᑯᓕᒫᓂᒃ ᐅᔾᔨᕈᓱᖁᔭᐅᓚᐅᕐᓯᒪᔪᑦ ᐱᖤᙱᔭᖅᑐᓂᒃ ᐃᖃᓗᖕᓂ ᐊᒻᒪ ᐸᖕᓂᕐᑑᒥ ᐅᒃᑑᐱᕆ 22 ᐊᒻᒪ ᓄᕕᐱᕆ 1 ᐊᑯᓐᓂᖓᓂ.
ᑎᓯᐱᕆᒥ ᐃᒡᓗᓕᒃᒥ ᐊᕐᓇᒥ ᑎᕆᒐᓂᐊᕐᔪᒃᒧᑦ ᑮᔭᐅᔪᖃᓚᐅᕐᓯᒪᔪᖅ. ᐋᓐᓂᐊᕕᓕᐊᑲᐅᑎᒋᓪᓗᓂ ᐊᒻᒪ ᒫᓐᓇ ᖃᓄᐃᙱᖢᓂ.
ᓄᕕᐱᕆᐅᓚᐅᕐᓯᒪᔪᒥᒃ ᐱᖓᓱᑦ ᕿᒻᒥᕆᔭᐅᔪᑦ ᖃᐅᔨᓴᖅᑕᐅᔪᕕᓃᑦ ᐱᖤᙱᓴᕐᓇᖃᓚᐅᖅᓯᒪᔪᑦ ᑎᕆᒐᓂᐊᕐᔪᖕᓄᑦ ᑮᔭᐅᓚᐅᖅᖢᑎᒃ.
ᐱᓐ ᐅᖃᓚᐅᕐᑐᖅ ᐱᒻᒪᕆᐊᓘᓂᖓᓂ ᐆᒪᔪᓂᒃ ᑕᑯᔪᖃᕌᖓ ᑐᓴᖅᑎᑦᑎᕙᒡᓗᑎᒃ ᑐᓴᐅᒪᔾᔪᑎᓕᕆᓂᒃᑯᑐᐃᓐᓇᐅᙱᑦᑐᖅ ᐅᑯᓂᖓᓗ ᐆᒪᔪᕐᓂᐊᖅᑎᓂᒃ ᐱᓕᕆᐊᖃᓕᕈᓐᓇᕐᓂᐊᕐᒪᑕ.
“ᑐᓴᐅᒪᔾᔪᑎᓕᕆᓂᖅ ᐃᓄᖕᓂ ᖃᐅᔨᒪᑎᑦᑎᔾᔪᑎᑦᑎᐊᕙᐅᖕᒪ ᑎᕆᒐᓂᐊᕐᔪᒃᓂ ᑕᑯᔪᕕᓂᕐᓂ, ᑭᓯᐊᓂᓕ ᑭᓇᑐᐃᓐᓇᖅ ᐆᒪᔪᕐᓂᐊᖅᑎᒃᑯᓐᓄ ᑕᑯᔪᕕᓂᖅ ᐅᖃᖃᑦᑕᖁᓪᓗᑎᒍ ᑕᒪᑐᒥᖓ ᑲᒪᒋᔭᖃᕈᓐᓇᕐᓂᐊᕋᑦᑕ,” ᐅᖃᖅᑐᖅ.
ᐃᓄᖕᓂ ᖃᐅᔨᒪᖁᔨᓚᐅᕐᒥᔪᖅ ᑮᔭᐅᔪᕕᓃᑦ ᐅᕝᕙᓘᓐᓃᑦ ᕿᒻᒥᖏᓐᓂ ᑮᔭᐅᔪᖃᕐᓂᖅᐸᑦ ᐋᓐᓂᐊᕕᖕᒧᑦ ᑲᒪᒋᔭᐅᔭᕆᐊᖃᓪᓚᕆᖕᓂᖏᓐᓂᒃ.
“ᖃᐅᔨᒪᖁᔨᒐᑦᑕ ᑎᕆᒐᓂᐊᕐᔪᒃᑐᑦ ᐅᔾᔨᕈᓱᑦᑎᐊᖁᓪᓗᑎᒍ. ᐊᔪᕐᓇᙱᑉᐸᓪᓗ ᐱᖤᙱᓴᖅᑕᐃᓕᓂᕐᒧᑦ ᑲᐱᔭᐅᓗᑎᒃ,” ᐱᓐ ᐅᖃᒃᑲᓐᓂᖅᑐᖅ. “ᐅᔾᔨᕈᓱᑦᑎᐊᖃᑦᑕᕐᓗᓯ ᐆᒪᔪᓂᒃ ᐱᓕᕆᐊᖃᕐᓗᓯ, ᐆᒪᒐᓗᐊᖅᐸᑦ ᑐᖁᖓᒐᓗᐊᖅᐸᓪᓘᓐᓃᑦ ᐊᒻᒪᓗ ᐊᑐᖁᔭᑦᑎᓐᓂᒃ ᐊᑐᕐᓗᓯ. ᐱᓕᕆᐊᖃᕋᑦᑕ ᐃᓕᔅᓯᓐᓂ ᐱᓕᕆᖃᑎᖃᕐᐸᒡᓗᑕ.”
ᐱᖤᙱᓴᖅᑐᑦ ᓂᕐᔪᑏᑦ ᐃᓕᖅᑯᓯᕆᙱᑕᖏᓐᓂᒃ ᐊᑐᓕᔭᑦᑐᑦ, ᐅᕐᕈᔮᑲᑕᒡᓗᑎᒃ, ᓄᕚᕿᓗᑎᒃ, ᑐᐱᓯᒪᖅᑰᔨᓗᑎᒃ ᐅᕝᕙᓘᓐᓃᑦ ᓂᓪᓕᐊᕈᓘᔭᕐᓗᑎᒃ.
ᓂᕐᔪᑏ ᐃᓕᖅᑯᓯᕆᙱᑕᖏᓐᓂ ᐊᑐᕐᑐᐃ ᐅᐸᒃᑕᐅᔭᕆᐊᖃᙱᑦᑐᑦ ᐊᒻᒪᓗ ᐅᖃᐅᓯᐅᓗᑎᒃ ᐊᕙᑎᓕᕆᓂᕐᒧᑦ ᐋᓐᓂᐊᖃᕐᓇᙱᑦᑐᓕᕆᔨᒧᑦ ᐅᕙᓂ 867-645-6660 ᐅᕝᕙᓘᓐᓃᑦ ᐆᒪᔪᕐᓂᐊᖅᑎᒧᑦ ᐅᕙᓂ 867-975-7780.
(0) Comments