ᓄᓇᕕᒃᒥ ᐃᓄᐃᑦ ᓂᕈᐊᕐᐳᑦ ᐲᑕ ᐋᑕᒥᒥᒃ ᒪᑭᕕᒃᑯᓐᓄᑦ ᐊᖓᔪᖅᑳᖑᓂᐊᕐᓗᓂ ᕕᕝᕗᐊᕆ 4-ᒥᑦ, ᓂᕈᐊᖅᑕᐅᓪᓗᓂ 66.7 ᐳᓴᓐᑎᓄᑦ ᓂᕈᐊᖅᑐᓂᒃ. (ᐊᔾᔨᙳᐊᖁᑎᒋᔭᐅᔪᖅ)

ᐲᑕ ᐋᑕᒥ ᐅᑎᕐᐳᖅ ᒪᑭᕕᒃᑯᓐᓄᑦ ᐊᖓᔪᖅᑳᖑᓂᕐᒧᑦ

ᐋᑕᒥ ᓵᓚᒃᓴᖅᑐᑦ 67 ᐳᓴᓐᑎᓂᒃ ᓂᕈᐊᕐᑕᐅᓪᓗᓂ, ᓵᓚᖃᖅᖢᓂ ᓂᕈᐊᖅᑕᐅᒃᑲᓐᓂᕋᓱᒃᑐᒥᑦ ᓵᓕ ᕗᐊᑦ

By ᓄᓇᑦᓯᐊᕐᒥ ᐱᕙᓪᓕᐊᔪᑦ

For an English version of this story, see Pita Aatami returns to Makivik presidency

ᓄᓇᕕᒻᒥᐅᑦ ᓂᕈᐊᓚᐅᕐᒪᑦ ᐅᑎᕐᑎᑦᑎᓪᓗᑎᒃ ᒪᑭᕕᒃ ᑯᐊᐳᕇᓴᓐᑯᓐᓄᑦ ᐊᑯᓂᐊᓗᒃ ᓯᕗᓕᐅᕐᑎᐅᓯᒪᔪᒥᒃ ᐅᕗᖓ ᑲᑐᔾᔨᖃᑎᒌᑦ ᖁᑦᑎᖕᓂᖅᐹᖓᓂᒃ ᐃᖅᑲᓇᐃᔮᒧᑦ.

ᕕᕝᕗᐊᕆ 4-ᒥ, ᓄᓇᕕᒻᒥᐅᑕᑦ ᐃᓄᐃᑦ ᓂᕈᐊᓚᐅᕐᒪᑕ ᐲᑕ ᐋᑕᒥᒥᒃ ᒪᑭᕕᒃᑯᓐᓄᑦ ᐊᖓᔪᖅᑳᖑᓂᐊᓕᕐᓗᓂ ᓂᕈᐊᖅᑕᐅᓪᓗᓂ 66.7 ᐳᓴᓐᑎᓄᑦ ᓂᕈᐊᖅᑐᓂᒃ, ᐅᑯᑎᒎᓇᖅ ᓇᓗᓇᐃᖅᑕᐅᓪᓚᕆᒃᓯᒪᙱᑦᑐᓂᒃ ᓴᖅᑭᑕᐅᓯᒪᔪᓂᒃ ᒪᑭᕕᒃᑯᑦ ᖃᕋᓴᐅᔭᒃᑯᓴᑦ ᓴᖅᑭᔮᒐᖓᒍᑦ. ᐋᑕᒥ ᓂᕈᐊᕐᑕᐅᓚᐅᕐᑐᖅ 2,356-ᓄᑦ ᐅᑯᓇᙵᑦ 3,532 ᓂᕈᐊᕐᑐᓂᒃ, ᐅᓇ ᐅᖃᕐᓯᒪᔪᖅ ᓂᕈᐊᕐᓂᕐᒧᑦ ᓴᖅᑭᔮᖅᑎᑕᐅᔪᖅ.

ᐊᖓᔪᖅᑳᖑᓚᐅᕐᑐᖅ ᓂᕈᐊᖅᑕᐅᒃᑲᓐᓂᕋᓱᒃᑐᖅ ᓵᓕ ᕗᐊᑦ ᓂᕈᐊᖅᑕᐅᓚᐅᕐᑐᖅ 25 ᐳᓴᓐᑎᖏᓐᓄᑦ ᓂᕈᐊᖅᑐᓂᒃ, ᐅᕝᕙᓘᓐᓃᑦ 898-ᓄᑦ, ᐊᒻᒪ ᐅᓇ ᓄᐊ ᑲᐃᓐ ᐱᖓᔪᒋᔭᐅᓪᓗᓂ 7 ᐳᓴᓐᑎᒥ ᓂᕈᐊᖅᑕᐅᓪᓗᓂ ᐅᕝᕙᓘᓐᓃᑦ    258-ᓄᑦ. 20-ᓂ ᓂᕈᐊᕈᑎᐅᔪᓂᒃ ᐊᑐᕈᓐᓃᖅᑎᑦᑎᓯᒪᓚᐅᕐᑐᑦ.

ᐋᑕᒥ, 60, ᐃᖅᑲᓇᐃᔮᖓᓂ ᐊᖓᔪᖅᑳᖑᓂᕐᒧᑦ ᐊᒻᒪ ᐊᐅᓚᑦᑎᔨᐅᓂᕐᒧᑦ ᓄᖅᑲᓚᐅᕐᓯᒪᔪᖅ ᐅᑯᓄᖓ ᐃᓄᐃᑦ ᖃᖓᑕᓲᖓᓄᑦ (Air Inuit) — ᐱᖁᑎᒋᔭᐅᖃᑕᐅᔪᖅ ᒪᑭᕕᒃᑯᓐᓄᑦ — ᐊᕐᕌᓂ ᐊᖓᔪᖅᑳᖑᓂᕐᒧᑦ ᓂᕈᐊᒐᒃᓴᐅᔪᒪᓪᓗᓂ.

ᐋᑕᒥᐅᑉ ᖃᓄᐃᓕᐅᖃᑦᑕᕐᓯᒪᔭᖏᑦ ᓄᓇᕕᒃᑯᑦ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᐱᒋᐊᕐᓯᒪᕗᖅ ᐊᕐᕌᒍᑦ 30 ᐅᖓᑖᓂ ᐱᓕᕆᓯᒪᓪᓗᓂ, ᓯᕗᓪᓕᖅᐹᒥ ᒪᑭᕕᒃᑯᓐᓄᑦ ᑲᑎᒪᔨᐅᓂᕐᒧᑦ ᓂᕈᐊᖅᑕᐅᓚᐅᕐᓯᒪᔪᖅ 1987-ᒥ.

ᑖᒃᑯᓄᖓ ᑲᑐᔾᔨᖃᑎᒌᓄᑦ ᑮᓇᐅᔭᓕᕆᔨᐅᓚᕐᓯᒪᓪᓗᓂ 1993-ᒥ 1998-ᒧ, ᐊᒻᒪ ᓂᕈᐊᒐᒃᓴᐅᓚᐅᕐᓯᒪᓪᓗᓂ ᑕᕝᕙᓂᑦᑕᐃᓐᓇᖅ ᐊᖓᔪᖅᑳᖑᓂᕐᒧᑦ. ᐋᑕᒥ ᒪᑭᕕᒃᑯᓐᓄᑦ ᐊᖓᔪᖅᑳᖑᓚᐅᕐᓯᒪᒧᖅ 1998-ᒥ 2012-ᒧ. ᔭᓄᐊᕆᒥ ᐋᑕᒥ ᓂᕈᐊᒐᒃᓴᐅᓚᐅᕐᓯᒪᔪᑦ ᐱᔾᔪᑎᖃᖅᖢᓂ ᑲᑎᑎᑦᑎᒃᑲᓐᓂᕐᓂᕐᒧᑦ ᐊᒻᒪ ᑮᓇᐅᔭᖃᖅᑎᑦᑎᒃᑲᓐᓂᕐᓂᕐᒥᒃ ᓄᓇᕕᒃᒥᑦ.

“ᐃᓱᒪᒐᒪ ᐃᓄᐃᑦ ᕿᒪᒃᑕᐅᓯᒪᓂᖏᓐᓂᒃ,” ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᑕᖅᑭᐅᓚᐅᕐᑐᒥ.

ᐋᑕᒥ ᐅᖃᓚᐅᕐᑐᖅ ᐃᓱᒪᓂᕋᖅᖢᓂ ᐃᓅᓱᒃᑐᓄᑦ ᑭᒡᒐᖅᑐᐃᔨᒥᒃ ᐃᓚᐅᑎᑦᑎᔪᒪᓪᓗᓂ ᒪᑭᕕᒃᑯᑦ ᐊᐅᓚᑦᑎᔨᒃᑯᓐᓄᑦ ᑲᑎᒪᔨᓄᑦ.

ᐋᑕᒥ ᐅᖃᓚᐅᕐᒥᔪᖅ ᒥᑦᑕᕐᕕᓕᕆᓂᕐᒥᒃ ᐊᖏᒡᓕᒋᐊᖅᑎᑦᑎᔪᒪᓂᕋᖅᖢᓂ ᓄᓇᕕᓕᒫᒥᒃ, ᐊᒻᒪᓗ ᓂᕆᐅᖕᓂᕋᖅᖢᓂ ᐊᖏᒡᓕᒋᐊᖅᑎᑦᑎᓂᕐᒥᒃ ᒪᑭᕕᒃᑯᑦ ᐱᖁᑎᒃᑲᓐᓂᖏᓐᓂᒃ ᐊᒻᒪ ᐱᓕᕆᖃᑎᖃᕋᓱᖕᓂᕐᒥᒃ ᐱᔨᑦᑎᕋᕐᓂᕐᓴᐅᔪᒪᓂᕐᒧᑦ ᓄᓇᕕᒻᒥᐅᓂᒃ.

ᑭᓯᐊᓂᓕ ᓄᓇᕕᒻᒥᐅᑦ ᐳᐃᒍᕐᓯᒪᙱᑦᑐᑦ ᐅᕝᕙᓘᓐᓃᑦ ᖁᔭᓈᕐᓯᑐᐃᓐᓇᙱᑦᑐᑦ ᐋᑕᒥᐅᑉ ᐃᓱᒪᓕᐊᕕᓂᖓᓂᒃ  2008-ᖑᑎᓪᓗᒍ, ᑕᐃᔅᓱᒪᓂᓕ ᑕᒪᐃᓐᓂ ᐱᓕᕆᐊᖃᓚᐅᕐᓯᒪᖕᒪᑦ ᒪᑭᕕᒃᑯᓐᓄᑦ ᐊᖓᔪᖅᑳᖑᓪᓗᓂ ᐊᒻᒪ ᐃᒃᓯᕙᐅᑕᕆᔭᐅᓪᓗᓂ ᕘᔅᑦ ᐃᐅᑯᑦ ᑲᑎᒪᔨᖏᓐᓄᑦ, ᐃᒪᓐᓇ ᐊᑭᓖᓂᐊᕐᓗᑎᒃ $1.5 ᒥᓕᐊᓐᑖᓚᓂ ᐃᑲᔪᕈᑎᒃᓴᓄᑦ ᑲᑎᒪᔨᓄᑦ, ᐃᓚᖃᖅᖢᓂ $600,000 ᐃᒻᒥᓄ.

ᐋᑕᒥ ᐊᕐᕌᒍᓂ ᐱᖓᓱᓂᒃ ᐊᖓᔪᖅᑳᖑᓂᐊᕐᑐᖅ.

41 ᐳᓴᓐᑎᑐᐃᓐᓇᐃᑦ ᓄᓇᕕᒃᒥᑦ 8,626-ᓂ ᓂᕈᐊᕈᓐᓇᖅᑐᓂᒃ ᓂᕈᐊᓚᐅᕐᑐᑦ. ᒪᓐᑐᕆᐊᒥ ᓂᕈᐊᕐᕕᐊᕙᒃᑐᖅ ᒪᑐᓯᒪᓚᐅᕐᒪᑦ ᓄᕙᒡᔪᐊᕐᓇᖅ-19 ᐱᔾᔪᑎᐅᓪᓗᓂ, ᑭᓯᐊᓂᓕ ᓄᓇᕕᒃᒥᐅᑕ ᓂᕈᐊᕈᓐᓇᖅᑎᑕᐅᓚᐅᕐᑐᑦ ᓂᕈᐊᖅᑎᑕᐅᓗᑎᒃ.

Share This Story

(0) Comments