ᐸᐅᒃᑑᑎᒃᑯᑦ ᑐᙵᓱᒃᑎᑦᑎᔪᑦ ᑲᓇᑕᒥ ᐸᕐᓇᐅᑎᒋᔭᐅᔪᒥᒃ ᒪᑯᓄᖓ ᓄᓇᖃᖅᑳᖅᑐᓂᒃ ᐊᕐᓇᓂᒃ ᐋᓐᓂᖅᓱᐃᕆᖃᑦᑕᕐᓂᖅᒨᖓᔪᓄᑦ

‘ᐸᕐᓇᐅᑎ ᐊᑐᓕᖅᑎᑕᐅᓂᖓ ᐱᒻᒪᕆᐊᓗᒃ ᑭᓲᓂᖅᒧᑦ ᑐᕌᖓᓗᐊᖅᑐᓄᑦ ᐋᓐᓂᖅᓱᐃᕆᕙᖕᓂᖅᒧᑦ,’ ᐅᖃᖅᑐᖅ ᐊᖓᔪᖅᑳᖅ ᕇᐱᑲ ᑲᓪᓗ

ᒐᕙᒪᑐᖃᒃᑯᑦ ᐊᒻᒪᓗ ᓄᓇᖃᖅᑳᖅᑐᓄᑦ ᑲᑐᔾᔨᖃᑎᒌᖑᔪᑦ ᐃᓚᐅᔪᑦ ᑕᓚᕖᓴᓐᑯᑦ ᑐᓴᒐᒃᓴᓕᐅᖅᑎᓪᓗᒋᑦ ᔫᓂ 3-ᖑᑎᓪᓗᒍ ᐸᕐᓇᐅᑎᓂᒃ ᐱᒋᐊᖅᑎᑕᐅᖁᔨᑎᓪᓗᒍ ᐱᔾᔪᑎᖃᖅᑐᓂᒃ ᐊᔾᔨᒌᙱᑎᑦᑎᖃᑦᑕᕐᓂᖅᒥᒃ ᐊᒻᒪᓗ ᐋᓐᓂᖅᓱᐃᕆᕙᖕᓂᖅᒥᒃ ᒪᑯᓂᖓ ᓄᓇᖃᖅᑳᖅᑐᑦ ᐊᕐᓇᓂᒃ ᐊᒻᒪ ᓂᕕᐊᕐᓵᓂ ᑲᓇᑕᒥᐅᑕᓂᒃ. (ᐊᔾᔨᙳᐊᖅ CIRNAC)

By ᓴᐃᕋ ᕌᔾᔪᔅ

For an English version of this story, see Pauktuutit welcomes national plan on violence against Indigenous women

ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ ᑐᙵᓱᒃᑎᑦᑎᔪᑦ ᒐᕙᒪᑐᖃᒃᑯᑦ ᐸᕐᓇᐅᑎᖏᓐᓂᒃ ᐱᓕᕆᐊᖃᕐᓂᐊᕐᓂᖏᓐᓂᒃ ᒪᑐᒥᖓ ᓄᓇᖃᖅᑳᖅᑐᑦ ᐊᕐᓇᐃᑦ ᐊᒻᒪ ᓂᕕᐊᖅᓵᑦ ᓵᙵᐃᓐᓇᐅᔭᖅᑕᖏᓐᓂᒃ ᒪᑯᓂᖓ ᐋᓐᓂᖅᓱᖅᑕᐅᖃᑦᑕᓗᐊᕐᓂᖏᓐᓄᑦ ᐊᒻᒪᓗ ᐃᓅᖃᑎᒌᙱᓐᓂᖅᒧᑦ ᐊᔾᔨᐅᙱᑎᑕᐅᕙᖕᓂᖏᓐᓄᑦ ᑲᓇᑕᓕᒫᒥᑦ.

“ᑖᓐᓇ ᖁᕕᐊᒋᑐᐃᓐᓇᖅᑕᕋ,” ᐅᖃᖅᑐᖅ ᕇᐱᑲ ᑲᓪᓗ, ᐊᖓᔪᖅᑳᖅ ᐃᓄᐃᑦ ᐊᕐᓇᐃᑦ ᑲᓇᑕᒥ ᑲᑐᔾᔨᖃᑎᒌᓄᑦ. “ᓲᖃᐃᒻᒪ ᐃᓗᐃᑦ ᐱᓕᕆᔨᒋᔭᕗᑦ ᐊᒃᓱᕈᒻᒪᕆᓚᐅᕐᒪᑕ ᖃᓄᐃᑦᑐᓂᒃ ᐱᑕᖃᕆᐊᖃᕐᓂᖓᓂᒃ ᐃᓄᐃᑦ ᓄᓇᓕᖏᓐᓂᒃ.”

ᒐᕙᒪᑐᖃᒃᑯᑦ, ᐱᓕᕆᖃᑎᖃᖅᖢᑎᒃ ᓄᓇᖃᖅᑳᖅᑐᓄᑦ ᓯᕗᓕᐅᖅᑎᓂᒃ, ᔫᓂ 3-ᖑᑎᓪᓗᒍ ᑐᓴᖅᑎᑦᑎᓚᐅᖅᓯᒪᖕᒪᑕ ᐸᕐᓇᐅᑎᒃᓴᖏᓐᓂᒃ.

ᐅᖃᐅᓯᖃᖅᑐᖅ ᕿᓚᒥᕈᓗᒃ ᐊᒻᒪ ᐊᑯᓂᐅᓂᐊᖅᑐᒥᓪᓗ ᖃᓄᐃᓕᐅᕈᑎᒃᓴᓂᒃ ᓯᕗᓪᓕᐅᑎᔭᕆᐊᓕᖕᓂ ᐋᓐᓂᖅᓱᐃᕆᕙᖕᓂᖅᒥᒃ ᓄᖅᑲᖅᑎᑦᑎᓇᓱᖕᓂᖅᒧᑦ ᓄᓇᖃᖅᑳᖅᑐᑦ ᐊᕐᓇᖏᓐᓂᒃ, ᐃᓚᖃᕐᓗᓂ ᑭᒃᑯᓕᒫᓂᒃ ᖃᐅᔨᕚᓪᓕᖅᑎᑦᑎᓂᖅᒧᑦ ᐱᓕᕆᐊᖃᕐᓂᖅᒥᒃ, ᐃᓱᒪᒃᑯᑦ ᐋᓐᓂᐊᖃᕐᓇᙱᑦᑐᓕᕆᓂᖅᒧᑦ ᐱᔨᑦᑎᕋᐅᑎᓕᕆᓂᖅᒥᒃ ᐊᒻᒪᓗ ᐱᕐᕈᓗᐊᕿᓗᐊᖅᑐᓂᒃ ᑲᒪᒋᔭᖃᓕᕈᓐᓇᕐᓂᖅᒥᒃ ᐊᔪᕈᓐᓃᖅᓴᕈᑎᒃᓴᓂᒃ ᐱᔨᑦᑎᕋᐅᑎᓕᕆᔨᐅᔪᓄᑦ, ᐊᒻᒪᓗ ᐅᓗᕆᐊᓇᙱᑦᑐᓂᒃ ᕿᒫᕝᕕᒃᓴᓕᐅᕐᓗᑎᒃ ᐊᒻᒪᓗ ᐃᒡᓗᖃᕐᕕᐅᔪᓐᓇᖅᑐᓂᒃ ᐊᒻᒪᓗ ᑲᒪᔨᐅᔪᓐᓇᖅᑐᓂᒃ ᑎᒥᐅᓂᐊᖅᑐᓂᒃ ᑭᒡᒐᖅᑐᐃᔨᐅᓗᑎᒃ ᖃᓄᐃᑦᑐᓐᓃᖅᓯᒪᔪᓂᒃ ᐊᒻᒪᓗ ᐃᓚᖏᓐᓂᒃ.

ᐅᓇ ᑲᓇᑕᒥ ᐸᕐᓇᐅᓯᐊᒃᓴᖅ ᐋᖅᑭᒃᑕᐅᓕᕐᓂᑯᑦ ᒪᑯᓇᙵᑦ 231-ᓂᒃ ᖃᓄᐃᓕᐅᕈᑎᐅᖁᔭᐅᔪᓂᒃ ᒪᓕᒐᓕᕆᓂᒃᑯᑦ ᐅᕙᓂ ᑎᑎᕋᖅᑕᐅᓯᒪᔪᓂᒃ ᑭᖑᓪᓕᖅᐹᓂᒃ ᐅᓂᒃᑳᓕᐊᖑᓯᒪᔪᓂᒃ ᐆᒧᖓ ᑲᓇᑕᒥ ᖃᐅᔨᓇᓱᖕᓂᖅ ᐊᓯᐅᓯᒪᔪᓂᒃ ᐊᒻᒪ ᐃᓄᐊᖅᑕᐅᓯᒪᔪᓂᒃ ᓄᓇᖃᖅᑳᖅᑐᓂᒃ ᐊᕐᓇᓂᒃ ᐊᒻᒪ ᓂᕕᐊᖅᓵᓂᒃ, ᑖᓐᓇᓗ ᓴᖅᑭᑕᐅᓚᐅᖅᓯᒪᓪᓗᓂ 2019-ᒥᓐ, ᐱᐊᓂᒍᑎᒋᔭᐅᓪᓗᓂ ᐃᒪᓐᓇ ᐅᓄᓗᐊᖅᑐᐊᓗᐃᑦ ᐋᓐᓂᖅᓱᐃᕆᕙᖕᓂᐅᔪᑦ ᓄᓇᖃᖅᑳᖅᑐᑦ ᐊᕐᓇᓂᒃ ᐊᒻᒪ ᓂᕕᐊᖅᓵᓂᒃ ᑲᓇᑕᒥᑦ ᐃᒪᓐᓇ ᐅᖃᐅᓯᐅᔪᓐᓇᖅᓯᓯᒪᕙᓵᑦᖢᓂ ᐃᓅᔪᓐᓃᖅᑎᑦᑎᕙᓪᓕᐊᓂᑐᐃᓐᓇᖅᑎᑐᑦ.

ᑖᓐᓇ ᐸᕐᓇᐅᑎ ᓴᖅᑭᓚᐅᖅᑐᖅ ᑖᒃᑯᐊ ᐅᓂᒃᑳᓕᐊᕕᓃᑦ ᐊᕐᕌᒎᖕᓂ ᒪᕐᕉᖕᓂᖅ ᓴᖅᑭᔮᓕᖅᑎᓪᓗᒍ.

“ᖃᐅᔨᔾᔪᑎᒋᔭᐅᔪᑦ ᓈᒻᒪᒋᔭᕗᑦ, ᐊᒻᒪᓗ ᖃᓄᐃᓕᐅᖅᑕᐅᓯᒪᓂᖏᑦ ᑐᖁᕋᐃᕙᓪᓕᐊᓂᖅᒨᖓᐸᓗᒃᖢᓂ,” ᑲᓇᑕᒥ ᐊᖓᔪᖅᑳᖅᔪᐊᖅ ᔭᔅᑎᓐ ᑐᕉᑑ ᐅᖃᓚᐅᖅᑐᖅ ᑐᓴᒐᒃᓴᓂᒃ ᐅᖃᐅᓯᖃᖅᑎᓪᓗᒋᑦ ᔫᓂ 3-ᒥᓐ.

“ᐅᓇ ᓱᓕᔪᓂᒃ ᐃᓗᓕᖃᕐᒪᓐ ᑲᓇᑕᒥᐅᑕᑦ ᐃᔨᖅᓯᒪᔪᓐᓇᐃᓪᓕᔭᖓᓂᒃ.”

ᑲᓇᑕᒥ ᐊᖓᔪᖅᑳᖅᔪᐊᖅ ᐅᖃᒻᒪᕆᓚᐅᖅᑐᖅ ᑕᒪᒃᑯᐊ ᐊᑐᖁᔭᐅᓯᒪᔪᑦ ᐱᓪᓚᕆᙳᖅᑎᑕᐅᓂᐊᕐᓂᕋᖅᖢᓂᒋᑦ, ᓄᓇᖃᖅᑳᖅᑐᓄᑦ ᐊᐅᓚᑕᐅᓂᒃᑯᑦ ᐱᓕᕆᐊᖑᓗᑎᒃ, ᐊᑐᕐᓗᑎᒃ ᐋᑐᕚᒥ $2.2 ᐱᓕᐊᓐ ᑖᓚᓂᒃ ᐃᑲᔪᕈᑎᒃᓴᖏᓐᓂᒃ — ᐃᑲᔫᑎᒃᓴᖅ 2021-ᒧᑦ ᐊᐅᓚᔾᔪᑎᒃᓴᓂᒃ ᐅᖃᐅᓯᐅᓯᒪᓂᑯᓂᒃ.

ᒐᕙᒪᒃᑯᓐ ᐅᓂᒃᑳᓂᒃ ᑐᓴᖅᑎᑦᑎᓚᐅᖅᑐᑦ ᐱᓕᕆᖃᑎᖃᕐᓂᒃᑯᑦ ᑲᓇᑕᒥ ᖃᓄᐃᓕᐅᕈᑎᒃᓴᓄᑦ ᐸᕐᓇᐅᑎᓕᐅᖅᓂᖅᒥᒃ ᐱᓕᕆᖃᑎᒌᒃᑐᓂᒃ, ᑖᒃᑯᐊᓗ ᓄᓇᖃᖅᑳᖅᑐᑦ ᓯᕗᓕᐅᖅᑎᒐᓚᒋᓪᓗᓂᒋᑦ.

ᑖᒃᑯᐊᑦᑕᐅᖅ ᑎᑎᕋᖅᓯᒪᔪᑦ ᐋᖅᑭᒃᓯᓯᒪᓚᐅᖅᒥᔪᑦ ᐸᕐᓇᐅᑎᓂᒃ ᐋᖅᑭᒃᓱᐃᔾᔪᑎᒃᓴᓂᒃ ᐱᓕᕆᔨᐅᓂᐊᖅᑐᓄᑦ ᐱᐊᓂᒃᑕᐅᓯᒪᙱᑦᑐᓂᒃ ᖃᐅᔨᓴᕐᓂᐊᖅᑐᓂᒃ, ᐊᒻᒪᓗ ᐃᓚᒋᔭᐅᓗᓂ ᒪᓕᒐᓕᕆᓂᒃᑯᑦ ᑲᑎᒪᔨᕋᓛᖑᓂᐊᖅᑐᓂᒃ ᒪᓕᒐᖅᓂᒃ ᕿᒥᕐᕈᐊᖃᑦᑕᕐᓂᐊᖅᑐᓂᒃ.

ᐸᕐᓇᐅᑎ ᐅᖃᖅᓯᒪᖕᒥᔪᖅ ᐱᐅᓯᕚᓪᓕᖅᑎᑦᑎᔪᒪᓪᓗᑎᒃ ᖃᐅᔨᓴᕐᓂᖅᒥᒃ ᐊᒻᒪᓗ ᑲᑎᖅᓱᐃᕙᓪᓕᐊᓂᖅᒥᒃ ᒪᑯᓄᖓ ᑐᕌᖓᓗᐊᖅᑐᓂᒃ ᐊᓯᐅᓯᒪᔪᓂᒃ ᐊᒻᒪ ᐃᓄᐊᖅᑕᐅᓯᒪᔪᓂᒃ ᓄᓇᖃᖅᑳᖅᑐᑦ ᐊᕐᓇᓂᒃ ᐊᒻᒪᓗ ᐋᖅᑭᒃᓱᐃᕙᓪᓕᐊᓂᖅᒥᒃ ᑲᒥᓯᓇᒧᑦ ᑐᒡᓕᕆᔭᐅᓇᔭᖅᑐᒥᒃ ᑲᒪᒋᔭᖃᕋᔭᕐᓗᓂ ᓄᓇᖃᖅᑳᖅᑐᓂᒃ ᐱᕋᔭᒃᓯᒪᔪᓕᕆᓂᖅᒥᒃ.

ᑭᓯᐊᓂᓕ ᖃᓄᐃᓕᐅᕈᑎᒃᓴᓄᑦ ᐸᕐᓇᐅᑎ ᐅᖃᖅᓯᒪᙱᑦᑐᖅ ᑭᓇ ᑲᒪᒋᔭᖃᕋᔭᕐᒪᖔᑦ ᐊᑐᓕᖅᑎᑕᐅᓂᖓᓄᑦ, ᐅᕝᕙᓘᓐᓃᑦ ᑮᓇᐅᔭᖅᑎᒍᑦ ᓇᓗᓇᐃᖅᓯᕕᐅᙱᖢᑎᒃ ᖃᓄᐃᓕᐅᕈᑎᐅᔪᒪᔪᓄᑦ.

ᐅᓂᒃᑳᓕᐊᖑᔪᑦ ᐅᖃᖅᓯᒪᔫᒐᓗᐊᑦ ᒐᕙᒪᒃᑯᑦ ᑕᒪᑐᒥᖓ ᖃᓄᐃᓕᐅᖅᐸᓪᓕᐊᓂᕐᒥᒃ ᖃᐅᔨᓇᓱᖃᑦᑕᕐᓂᐊᕐᓂᕋᖅᖢᑎᒃ ᐱᒋᐊᕐᓗᑎᒃ 2022-ᒥᓐ.

ᐸᐅᒃᑑᑎᒃᑯᑦ ᐊᒻᒪᓗ ᐃᓄᐃᑦ ᑕᐱᕇᑦ ᑲᓇᑕᒥ, ᐊᓯᖏᑦᑎᑐᑦ ᓄᓇᖃᖅᑳᖅᑐᑦ ᑲᑐᔾᔨᖃᑎᒌᑐᑎᑐᑦ, ᑐᓴᒐᒃᓕᐅᖃᑕᐅᓚᐅᖅᑐᑦ ᓇᖕᒥᓂᖅ ᐅᓂᒃᑳᖏᓐᓂᒃ ᔫᓂ 3-ᒥᑦ ᖃᐅᔨᓇᓱᖕᓂᖅᒧᑦ ᒪᓕᒐᓕᕆᓂᖅᒥᒃ ᐱᓕᕆᓂᐅᔪᒪᔪᒧᑦ.

ᐃᓄᖕᓄᑦ ᑐᕌᖓᔪᖅ ᐸᕐᓇᐅᑎ ᐃᒪᐃᖁᔨᓯᒪᔪᖅ:

  • ᑐᐊᕕᕐᓇᖅᑐᒧᑦ ᕿᒫᕝᕕᒃᑕᖃᒃᑲᓐᓂᕐᓗᓂ ᐊᒻᒪᓗ ᐃᒡᓗᒋᔭᐅᓚᐅᑲᒍᓐᓇᖅᑐᓂᒃ ᐃᓄᖕᓄᑦ ᐊᕐᓇᓄᑦ ᐊᒻᒪ ᓂᕕᐊᕐᓵᓄᑦ ᐃᓄᐃᑦ ᓄᓇᖓᓂᒃ ᐊᒻᒪᓗ ᐃᓄᒋᐊᓃᑦᑐᓂᒃ ᐃᓄᒃᑕᖃᐅᖅᑐᓂᒃ
  • ᐅᓄᖅᓯᕚᓪᓕᖅᑎᑦᑎᓗᑎᒃ ᐃᓄᖕᓄᑦ ᐃᒡᓗᒃᓴᓂᒃ ᐅᑭᐅᕐᑕᖅᑐᓕᒫᒥᑦ
  • ᒐᕙᒪᑐᖃᒃᑯᑦ ᐃᑲᔪᕐᓗᑎᒃ ᑐᓴᐅᒪᔾᔪᑎᓕᕆᓂᖅᒧᑦ ᐱᖁᑎᐅᔭᕆᐊᓕᖕᓂᒃ ᓱᒃᑲᓂᖅᓴᒥᒃ ᐊᑦᑕᑕᕈᓐᓇᐅᑎᖃᕈᓐᓇᕐᓗᑎᒃ ᐃᓄᐃᑦ ᓄᓇᓕᖏᓐᓂᒃ
  • ᖁᐊᖅᓵᕐᓇᖅᑐᓂᒃ ᖃᐅᔨᒪᓂᒃᑯᑦ ᐱᔨᑦᑎᕋᐅᑎᑦ ᐊᒻᒪ ᐃᑲᔪᕈᑎᒃᓴᑦ
  • ᐃᑲᔪᕈᑎᖃᕐᓗᑎᒃ ᐃᓄᖕᓂ ᐃᓕᓴᐃᔨᒃᓴᓄᑦ ᐊᒻᒪ ᐊᔪᕈᓐᓃᖅᓴᕈᑎᒃᓴᓄᑦ
  • ᐋᖅᑭᒃᓯᓗᑎᒃ ᑮᓇᐅᔭᓕᐅᕐᓂᖅᒧᑦ ᒪᓕᒃᑕᐅᖃᑦᑕᕋᔭᖅᑐᓂᒃ ᐱᓕᕆᖃᑎᖃᕐᓂᒃᑯᑦ ᐃᓄᖕᓂᒃ
  • ᐃᓄᖕᓄᑦ-ᑐᕌᖓᔪᓂᒃ ᐃᓱᒪᓕᕆᓂᖅᒧᑦ ᐋᓐᓂᐊᖃᕐᓇᙱᑦᑐᓕᕆᓂᖅᒧᑦ ᐱᔨᑦᑎᕋᐅᑎᑦ
  • ᐃᓕᓐᓂᐊᖅᑎᑕᐅᕙᒡᓗᑎᒃ ᐊᒻᒪ ᐃᒃᐱᒍᓱᒍᓐᓇᑦᑎᐊᕐᓂᖅᒥᒃ ᐊᔪᕈᓐᓃᖅᓴᖅᑎᑕᐅᓗᑎᒃ ᐃᓅᙱᑦᑐᑦ ᐸᓖᓯᒃᑯᑦ, ᓗᐊᐃᔭᐃᑦ ᐊᒻᒪᓗ ᐱᕋᔭᒃᓯᒪᔪᓕᕆᔨᒃᑯᑦ

ᑖᒃᑯᓄᖓᓕ ᐊᑐᓂ ᐅᖃᐅᓯᐅᔪᓄᑦ, ᐸᐅᒃᑑᑎᒃᑯᑦ ᐊᒻᒪᓗ ᐃᓄᐃᑦ ᑕᐱᕇᑦ ᑲᓇᑕᒥ ᐸᕐᓇᐅᑎᖏᑦ ᐋᖅᑭᒃᓯᓯᒪᓂᖃᖅᑐᖅ ᑲᒪᒋᔭᐅᔭᕆᐊᖃᕋᔭᖅᑐᓂᒃ ᐳᕌᕕᓐᓯᑎᒍᑦ ᒐᕙᒪᐅᔪᓄᑦ ᐅᕝᕙᓘᓐᓃᑦ ᑎᐅᕆᑑᕆᓄᑦ ᒐᕙᒪᐅᔪᓄᑦ ᐊᒻᒪᓗ ᖃᓄᖅ ᐱᓕᕆᖃᑎᖃᕈᓐᓇᕋᔭᕐᓂᖏᓐᓂᒃ ᐃᓄᐃᒃ ᓄᓇᑖᕈᑎᖏᑦᑎᒍᑦ ᑲᑐᔾᔨᖃᑎᒌᓂᒃ ᐊᑐᓕᖅᑎᑦᑕᐅᑎᑦᑎᓂᖓᓄᑦ.

“ᑕᒪᒃᑯᐊ ᓯᕗᓪᓕᐅᑎᔭᕆᐊᖃᕐᓂᐅᔪᑦ ᐊᑯᓂᐊᓗᒃ ᐱᓕᕆᐊᕆᓯᒪᓕᕋᑦᑎᒍᑦ ᐊᒻᒪᓗ ᓴᖅᑭᑎᖃᑦᑕᐃᓐᓇᕐᓂᐊᖅᖢᑎᒍᑦ,” ᑲᓪᓗ ᐅᖃᖅᑐᖅ. “ᑕᒪᒃᑯᓂᖓ ᐱᓇᓱᐃᓐᓇᕐᓂᐊᕋᑦᑕ.”

“ᐋᓐᓂᖅᓱᐃᕆᕙᖕᓂᖅ ᐃᓄᖕᓂ ᐊᕐᓇᓂᒃ ᐊᒻᒪ ᓂᕕᐊᖅᓵᓂᒃ ᓄᖅᑲᔾᔮᙱᑦᑐᖅ ᑭᓯᐊᓂ ᒪᒥᓴᖅᐸᓪᓕᐊᓕᕈᑦᑕ; ᐊᕐᓇᑐᐊᖑᙱᑦᑐᑦ, ᐊᖑᑏᓪᓗ,” ᐅᖃᒃᑲᓐᓂᖅᑐᖅ.

“ᐊᑐᓕᖅᑎᑕᐅᓂᖓ ᑖᔅᓱᒪ ᐸᕐᓇᐅᑎᐅᑉ ᐱᒻᒪᕆᐅᔪᖅ ᓄᖅᑲᖅᑎᑦᑎᓇᓱᖕᓂᐊᕐᓗᓂ ᑭᓲᓂᕐᒧᑦ ᐋᓐᓂᖅᓱᐃᕆᕙᖕᓂᖅᒥᓐ.”

ᐅᓇ ᖃᓄᐃᓕᐅᕐᓂᐅᔪᖅ ᐅᔾᔨᕐᓇᓗᐊᒃᑲᓐᓂᓚᐅᖅᑐᖅ ᖃᖓᑦᑎᐊᓵᖅ ᓇᓂᓯᔪᖃᓚᐅᖅᓯᒪᑎᓪᓗᒍ ᓄᓇᖃᖅᑳᖅᑐᓂᒃ ᓱᕈᓯᕐᓂᖅ ᑐᖁᖓᔪᓂᒃ ᐊᑕᐅᓯᕐᒦᑦᑐᓂᒃ ᐃᓗᕕᐊᓗᖕᒥ ᐅᕙᓂ ᐃᓕᓐᓂᐊᕆᐊᕐᕕᐅᖃᑦᑕᓚᐅᖅᓯᒪᔪᒥᒃ ᑳᒻᓘᑉᔅ, ᐳᕆᑎᔅ ᑲᓚᒻᐱᐊᒥ.

ᐅᓇ ᑭᖑᕚᕆᖕᓂᒃᑰᖓᔪᖅ ᖁᕕᐊᓇᙱᓗᐊᖅᑐᐊᓗᒃ ᐊᒻᒪᓗ ᐊᓯᐅᔨᓂᐅᔪᖅ ᐃᓕᖅᑯᓯᖅᒥᒃ ᒪᑯᓇᙵᑦ ᐃᓕᓐᓂᐊᕆᐊᖅᕕᐅᕙᓚᐅᖅᓯᒪᔪᓂ ᖃᐅᔨᔭᐅᒻᒪᕆᓕᓚᐅᖅᐳᖅ ᔫᓂ 3-ᒥ ᐅᓪᓗᕆᐊᓇᓗᐊᖅᑐᐊᓘᔭᕆᐊᒃᓴᖓᓂᒃ ᓄᓇᖃᖅᑳᖅᑐᓄᑦ ᐊᕐᓇᓄᑦ.

“ᑕᒪᑐᒪᓂ ᐱᓇᓱᐊᕈᓯᖅ ᐅᖁᒪᐃᓐᓇᖅᑐᖅᓯᐅᕐᓇᓗᐊᕐᒪᓐ, ᖃᐅᔨᔭᐅᑎᑕᐅᒻᒪᕆᒃᑎᓪᓗᑕ ᓄᓇᖃᖅᑳᖅᑐᑦ ᑐᖁᑎᑕᐅᕙᓪᓕᐊᓂᖏᓐᓂᒃ ᓱᓕ ᑕᒫᓂ ᑲᓇᑕᒥ,” ᐅᖃᖅᑐᖅ ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᖓ ᓇᐃᑕᓐ ᐅᐱᐊᑦ, ᐅᖃᓪᓚᒃᑎᓪᓗᒍ ᑐᓴᒐᒃᓴᓕᐅᕐᓇᒥᓐ.

“ᐅᓇ ᐊᑐᖅᑕᐅᕙᐃᓐᓇᐅᔭᖅᑐᐊᓗᒃ ᐊᔾᔨᒌᒃᑎᑦᑎᕙᙱᓐᓂᖅ ᐅᓗᕆᐊᓇᖅᑐᐊᓘᓂᖓ ᐊᒻᒪᓗ ᐋᓐᓂᖅᓱᐃᕆᔾᔪᑎᐅᓕᖅᐸᒃᖢᓂ ᓄᓇᖃᖅᑳᖅᑐᓄᑦ ᐊᕐᓇᓂᒃ ᐊᒻᒪᓗ ᓄᓇᖃᖅᑳᖅᑐᓕᒫᓂᒃ ᓄᖅᑲᕆᐊᖃᒻᒪᕆᓕᕐᒪᓐ. ᐅᑕᕿᒃᑲᓐᓂᕆᐊᖃᙱᓐᓇᑦᑕ ᖃᓄᐃᓕᐅᖅᐸᓪᓕᐊᓂᑦᑎᒍᑦ.”

Share This Story

(0) Comments