ᐸᐅᙳᖅᓯᒪᔪᓄᑦ ᑖᒃᓰᔭᕈᑎ ᐅᖅᓱᐊᓗᒃᒧᑦ ᖁᕝᕙᖅᐹᓪᓕᖅᐳᖅ ᓄᓇᕗᓕᒫᒥᑦ

ᒑᓴᓖᒧᑦ ᐊᑭᓕᐅᑎᐅᕙᒃᑐᖅ ᑎᑭᑉᐳᖅ $1.09 ᓖᑕᒧᑦ ᐱᒋᐊᖅᖢᓂ ᐄᐳᕈᓪ 1

ᓄᓇᕗᒻᒥᐅᑦᑕ ᐃᖅᑯᒻᒪᓚᐅᕐᑐᑦ ᒪᑯᐊ ᐅᖅᓱᐊᓗᐃᑦ ᑏᓱᓪ ᐊᒻᒪ ᒑᓴᓖᓐᓂ ᐊᑭᖏᑦ ᖁᕝᕙᕆᐊᖅᑕᐅᓯᒪᓪᓗᑎᒃ 2¢ᒧᑦ ᑎᑭᓯᒪᙱᐊᖅᔪᒃᖢᓂ ᐅᓇ ᐱᔾᔪᑎᒋᔭᐅᓪᓗᓂ ᒐᕙᒪᑐᖃᒃᑯᑦ ᑳᐸᓐᒧᑦ ᑖᒃᓰᔭᕈᑎᖏ ᖁᕝᕙᕆᐊᖅᑕᐅᓂᖏᓐᓄᑦ. (ᐊᔾᔨᓕᐅᕆᔨ ᒥᓚᓂ ᐅᕆᑦᓵᑦ)

By ᒥᓚᓂ ᐅᕆᑦᓵᑦ

For an English version of this story, see Carbon tax on fuel goes up across Nunavut

ᑏᓱᓪ ᐊᒻᒪ ᒑᓴᓖᓐ ᐊᑭᖏᑦ ᖁᕝᕙᕆᐊᓚᐅᖅᑐᑦ ᓄᓇᕗᒥᑦ ᐄᐳᕈᓪ 1-ᒥᑦ, ᐅᓇ ᒐᕙᒪᑐᖃᒃᑯᑦ ᑳᐸᓐ (ᐳᔪᖅᓗᒃ) ᑖᒃᓯᒧᑦ ᐊᑭᓕᐅᑎᒃᓴᖁᑎᖓ ᖁᕝᕙᕆᐊᖅᑕᐅᑎᓪᓗᒍ.

ᐊᑭᓕᐅᑎᒃᓴᑦ ᖁᕝᕙᖅᐹᓪᓕᖅᐳᑦ 2¢ᒧᑦ ᑎᑭᓯᒪᙱᐊᖅᔪᒃᖢᒍ, ᐊᑭᖃᓕᖅᖢᓂ ᒑᓴᓖᓐ $1.09-ᒥᒃ ᓖᑕᒧᑦ, ᓄᓇᓯᐅᑎᓄᑦ ᑏᓲ $1.19 ᓖᑕᒧᑦ ᐊᒻᒪᓗ ᐃᒐᓯᐅᑎ ᑏᓱᓪ $1.05 ᓖᑕᒧᑦ, ᐃᓚᖃᖅᖢᑎᒃ ᑖᒃᓰᔭᕈᑎᓂᒃ, ᑕᒪᓐᓇᓕ ᑕᐃᒪᐃᓐᓂᕋᖅᑕᐅᓚᐅᖅᑐᖅ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᓄᑦ.

ᐅᑯᐊ ᐊᑭᒋᔭᐅᓕᕐᑐᑦ ᐊᔾᔨᒌᒃᑐᑦ ᓄᓇᕗᓕᒫᒥᑦ ᐃᖃᓗᐃᑦ ᐃᓚᐅᙱᓪᖢᓂ ᑖᒃᑯᐊ ᐅᖅᓱᐊᓗᓕᕆᔨᐅᔪᑦ ᐋᖅᑭᒃᓯᖃᑦᑕᕐᒪᑕᓕ ᐊᑭᒃᓴᖏᓐᓂᒃ.

ᐊᑭᖓ ᐊᓯᙳᕈᑎᖃᓗᐊᖅᑐᖅ ᐅᓇ ᑳᐸᓐ ᑖᒃᓯᒧᑦ ᐊᑭᓕᐅᑎᒃᓴᖅ ᐊᖏᒡᓕᒋᐊᖅᑕᐅᓂᖓᓄᑦ ᐅᖅᓱᐊᓗᖕᓄᑦ ᓂᐅᕕᐊᓄᑦ ᓄᓇᕗᒥᑦ, ᐃᓱᒪᒋᔭᐅᓪᓗᓂ ᐅᓇ ᓄᓇᕗᒥᑦ ᑳᐸᓐᒧᑦ ᐅᑎᖅᑎᑦᑎᒍᑎ, ᑖᓐᓇᓕ ᐊᑭᓕᐅᑎᒋᔭᐅᔪᓄᑦ ᐋᖅᑭᒍᑎᐅᓯᒪᓇᓱᒃᑐᖅ.

ᖃᖓᑕᓲᖅᓯᐅᑏᑦ ᐊᒻᒪ ᑏᓱᓪ ᖃᐅᒻᒪᖅᑯᑎᖃᕈᑎᐅᔪᑦ ᑳᐸᓐ ᑖᒃᓯᒧ ᐊᑭᓖᖅᓱᐃᒍᑎᐅᙱᑦᑐᕐᓕ, ᑖᓐᓇ ᑐᓴᒐᒃᓴᐅᑎᑕᐅᔪᖅ ᐅᖃᖅᓯᒪᓪᓗᓂ.

ᒫᔅᓯ ᐱᒋᐊᓕᓵᖅᑎᓪᓗᒍ, ᐱᖁᔭᖅ ᐊᓂᒍᖅᑎᑕᐅᔪᖅ ᒪᓕᒐᓕᕆᔨᖅᔪᐊᓄᑦ ᐅᑯᐊ ᐅᖅᓱᐊᓗᓕᕆᔨᒃᑯᑦ (PPD) ᐊᑭᓕᒃᓴᖅᑖᒃᑲᓐᓂᕈᓐᓇᖅᓗᑎᒃ ᐊᒻᒪᓗ ᑮᓇᐅᔭᓕᐅᕈᑎᖃᕐᓗᑎᒃ ᐅᖅᓱᐊᓘᑉ ᐊᑭᖓ ᓱᖁᓯᓗᐊᖁᓇᒍ ᓄᓇᕗᒥᑦ. ᑭᓯᐊᓂᓕ ᒫᔅᓯ 31-ᒥ ᑐᓴᒐᒃᓴᓕᐊᕆᔭᐅᔪᖅ ᐊᔾᔨᒋᓗᐊᓚᐅᙱᒻᒪᒍ ᐅᖅᓱᐊᓗᓕᕆᔨᒃᑯᑦ ᐊᑭᒋᑎᑕᖓᓄᑦ ᐋᖅᑭᒋᐊᕈᑎᖏᓐᓂᒃ ᑖᓐᓇ ᐊᓯᙳᕈᑎᐅᔪᖅ ᑐᙵᕕᖃᕐᓂᖓᓄᑦ ᒐᕙᒪᒃᑐᖃᒃᑯᑦ ᑳᐸᓐᒧᑦ ᑖᒃᓰᔭᕈᑎᖏᓐᓄᑦ.

ᐅᖅᓱᐊᓗᓕᕆᔨᒃᑯᑦ ᐊᐅᓚᑦᑎᕙᒃᑐᑦ ᐊᑭᒋᔭᐅᔪᓂᒃ ᒑᓴᓖᓐᒧᑦ ᐊᒻᒪ ᐃᒐᓯᐅᑎᒥ ᒪᓕᒃᓯᒪᓪᓗᑎᒃ ᖃᓄᐃᔾᔪᑎᐅᕙᓪᓕᐊᔪᓂᒃ ᐃᓚᖃᖅᖢᓂ ᖃᔅᓯᓂᒃ ᐊᑭᓖᓯᒪᓂᕐᒥᒃ ᐊᖏᔪᒥ, ᖃᓄᑎᒋ ᓂᐅᕕᓚᐅᕐᒪᖔᑕ ᐊᒻᒪᓗ ᖃᓄᑎᒋ ᐃᓄᐃᑦ ᑕᒪᒃᑯᓂᖓ ᐊᑐᖃᑦᑕᕐᒪᖔᑦᑕ ᐊᕐᕌᒍᒥᒃ.

ᐊᐱᕆᔭᐅᒐᒥ ᓄᓇᕗᒻᒥᐅᑕᑦ ᓂᕆᐅᒋᐊᖃᕆᐊᖃᕐᒪᖔ ᐊᑭᖓᓂᒃ ᐋᖅᑭᒋᐊᕈᑎᐅᓇᔭᖅᑐᓂᒃ ᖃᓂᑦᑐᒃᑯᑦ, ᑕᒪᓐᓇᓗ ᐊᕐᕌᒍ ᓄᑖᖅ ᐱᒋᐊᓕᓵᖅᑎᓪᓗᒍ ᑕᐃᒪᐃᑉᐸᒃᖢᓂ, ᒪᔅᑖᕙ ᐃᐅᕆᒃ, ᐅᖃᖅᑎᒋᔭᐅᔪᖅ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᓄᑦ, ᐅᖃᓚᐅᖅᑐᖅ ᖃᕋᓴᐅᔭᒃᑯᑦ ᑎᑎᕋᖅᖢᓂ, “ᐊᑭᖓᓄᑦ ᐋᖅᑭᒋᐊᕈᑎᒃᓴᒥ ᐱᑕᖃᓕᕐᓂᖅᐸᑦ ᑕᐃᒪᓕ ᑐᓴᐅᒪᔭᐅᔾᔪᑎᒋᔭᐅᓛᕐᒥᔪᖅ.”

ᐊᕐᕌᓂᓕ ᐅᖅᓱᐊᓗᒃ ᐊᒻᒪ ᑏᓱᓪ ᐊᑭᖏ ᐊᑭᒃᖠᕚᓪᓕᓚᐅᖅᓯᒪᖕᒪᑕ 4¢ ᓖᒪᑕᒧᑦ.

Share This Story

(0) Comments

Join the Conversation

Your email address will not be published. Required fields are marked *

*