ᐸᓖᓯᑦ ᐅᖃᕐᑐᑦ ᐊᖑᑎ ᑎᓴᒪᓕᖓᓂᒃ (ATV) ᐋᓐᓂᕐᓯᔾᔪᑎᖃᓚᐅᕐᓂᖓᓂᒃ ᐊᕐᕕᐊᓂ
‘ᐊᒃᓱᕈᕐᓇᖅᑐᐊᓗᒃ ᐊᒻᒪ ᐅᐊᑲᓪᓚᓗᐊᕌᓘᓚᐅᕐᑐᖅ’ ᑎᒍᓯᑐᐃᓐᓇᕐᓂᐅᓚᐅᕐᑐᖅ, ᐋᓐᓂᕐᓱᐃᓂᕐᒧᑦ ᐸᓯᔭᒃᓴᙳᖅᑎᑦᑎᔪᑦ 23-ᓂ ᐊᕐᕌᒍᓕᖕᒥ ᐊᖑᑎᒥᒃ
ᐸᓖᓯᒃᑯᑦ ᐊᕐᕕᐊᓂ ᖃᐅᔨᑎᑕᐅᒐᒥᒃ ᐋᖓᔮᖅᑐᖅ ᐊᖑᑎ ᐊᖁᑲᑕᖕᓂᖓᓂᒃ ᑎᓴᒪᓕᒃᒥ ᖃᐅᔨᒋᐊᓕᓚᐅᕐᑐᑦ. ᖃᐅᔨᓇᓱᒃᑲᓐᓂᓕᕋᒥᒃ ᖃᐅᔨᓕᓚᐅᕐᑐᑦ 18-ᓂ ᐊᕐᕌᒍᓕᖕᒥ ᐊᕐᓇᒥ ᑎᒍᔭᐅᑐᐃᓐᓇᖅᑐᒥᒃ ᐊᒻᒪᓗ 50-ᓂ ᐊᕐᕌᒍᓕᒃ ᐊᖑᑎ ᐋᓐᓂᖅᓱᖅᑕᐅᓂᖓᓂᒃ. (ᐊᔾᔨᙳᐊᖁᑎᒋᔭᐅᔪᖅ)
For English version, see RCMP says man used ATV as a weapon in Arviat
ᐸᓖᓯᒃᑯᑦ ᐊᕐᕕᐊᓂᒃ ᐸᓯᔭᒃᓴᙳᖅᑎᑦᑎᓚᐅᕐᑐᑦ 23-ᓂ ᐊᕐᕌᒍᓕᖕᒥ ᐊᖑᑎᒥ ᐃᓄᖕᒥ ᑎᒍᓯᑐᐃᓐᓇᕐᓂᖓᓄᑦ, ᐱᖓᓱᓂᓪᓗ ᐸᓯᔭᐅᔾᔪᑎᒃᑲᓐᓂᕐᓂᒃ ᐋᓐᓂᕐᓱᐃᓂᕐᒧᑦ ᐱᒡᒍᑎᖃᖅᖢᓂ ᐊᒻᒪᓗ ᐊᓯᖏᓐᓂ ᐸᓯᔭᒃᓴᐅᔾᔪᑎᓄᑦ, ᐸᓖᓯᑦ ᐅᖃᖅᖢᑎᒃ ᐅᓇ ‘ᐊᒃᓱᕈᕐᓇᖅᑐᐊᓗᒃ ᐊᒻᒪ ᐅᐊᑲᓪᓚᓗᐊᕌᓗᒃ’ ᐸᓖᓯᓄᑦ ᐊᒻᒪ ᓄᓇᓕᖕᓄᑦ.
ᐅᓇ ᑕᐃᒪᐃᓕᕆᐊᓚᐅᕐᓯᒪᔪᖅ ᓯᑎᐱᕆ 19-ᒥ ᐸᓖᓯᒃᑯᑦ ᖃᐅᔨᒋᐊᖅᑎᓪᓗᒋᑦ ᐅᖃᐅᔾᔭᐅᓚᐅᖅᑎᒧᓪᓗᒋᑦ ᐊᖑᑎ ᐋᖓᔮᖅᖢᓂ ᐊᖁᑲᑕᖕᓂᖓᓂᒃ.
ᑕᒪᑐᒥᖓ ᖃᐅᔨᒋᐊᒃᑲᓐᓂᓕᕋᒥᒃ ᐸᓖᓯᒃᑯᑦ ᖃᐅᔨᓕᓚᐅᕐᑐᑦ 18-ᓂ ᐊᕐᕌᒍᓕᒃ ᐊᕐᓇᖅ ᐋᓐᓂᓚᐅᕐᓂᖓᓂ ᑎᓴᒪᓕᖓᓂᒃ ᐊᒻᒪᓗ ᑎᒍᑐᐃᓐᓇᖅᖢᓂᐅᒃ ᐱᔪᒪᙱᑎᓪᓗᒍ ᐊᒻᒪᓗ ᐋᓐᓂᕐᓯᕆᓚᐅᕐᓂᖓᓂᒃ 50-ᓂ ᐊᕐᕌᒍᓕᖕᒥ ᐊᖑᑎᒥᒃ.
“ᑖᓐᓇ ᐊᖑᑎ ᐊᖁᑲᑕᐃᓐᓇᓚᐅᕐᑐᖅ ᓄᓇᓕᖕᓂ ᐃᓄᖕᓂ ᐅᓗᕆᐊᓇᖅᑐᒦᑎᑦᑎᓪᓗᓂ ᐊᒻᒪ ᐸᓖᓯᓂᒃ ᐊᒻᒪᓗ ᖃᓄᐃᑎᑦᑎᓂᐊᕐᓂᕋᐃᑲᑕᒃᖢᓂ.” ᐸᓖᓯᒃᑯᑦ ᐅᖃᐅᓯᓕᐅᕐᓯᖃᓚᐅᕐᑐᑦ ᐅᒃᑑᐱᕆ 4-ᒥ ᑐᓴᒐᒃᓴᑎᒍᑦ.
ᐊᖑᑎ 23-ᓂ ᐊᕐᕌᒍᓕᒃ ᐃᒻᒥᓂᒃ ᐸᓖᓯᓄᐊᓕᓚᐅᕐᓯᒪᔪᖅ ᐅᓐᓄᙳᖅᑎᓪᓗᒍ. ᑎᒍᔭᐅᓪᓗᓂ ᐊᒻᒪ ᐸᓯᔭᒃᓴᐅᑎᑕᐅᓪᓗᓂ ᐱᖓᓱᓂᒃ ᐋᓐᓂᕐᓱᐃᓂᕐᒥᒃ ᐱᒡᒍᑎᖃᖅᖢᓂ. ᐸᓖᓯᑦ ᑎᑎᕋᓚᐅᕐᑐᑦ ᑎᓴᒪᓕᒃ ᐱᒡᒍᑎᒋᔭᐅᓂᕋᖅᖢᒍ. ᐸᓯᔭᒃᓴᐅᑎᑕᐅᒃᑲᓐᓂᓚᐅᕐᑐᖅ ᐋᓐᓂᕐᓱᐃᕆᓂᕐᒧᑦ, ᐱᖓᓱᓂᒃ ᐅᓗᕆᐊᕐᓵᕈᑎᖃᕐᓂᖓᓂᒃ ᐊᒻᒪ ᑎᒍᓯᓂᕐᒥ ᐊᕐᓇᒥ ᐱᔪᒪᙱᑦᑐᒥᒃ ᐊᒻᒪᓗ ᐅᓗᕆᐊᓇᖅᑐᒥ ᐊᐅᓚᑦᑎᓂᖓᓂᒃ ᓄᓇᓯᐅᑎᒥᒃ.
ᓯᑎᐱᕆ 20-ᒥ ᑖᔅᓱᒧᖓ ᐃᖅᑲᖅᑐᐃᕕᒃᑯᑦ ᐱᓕᕆᐊᖃᓕᖅᑎᓪᓗᒋᑦ ᑖᓐᓇ ᐊᖑᑎ ᐊᓂᑎᑕᐅᓕᓚᐅᕐᑐᖅ ᐅᓄᕈᓘᔭᕐᑐᓂᒃ ᒪᓕᖁᔭᐅᔪᓂᒃ ᐅᖃᐅᔾᔭᐅᓪᓗᓂ ᐊᒻᒪ ᐊᖏᕐᕋᖓᓂᒃ ᐊᓂᑦᑕᐃᓕᔭᕆᐊᖃᓕᖅᖢᓂ.
ᐊᕐᕕᐊᓂᒃ ᐸᓖᓯᒃᑯᑦ ᐊᖓᔪᖅᑳᖓ ᔨᕝᑲ ᐊᐃᕙᓅᕙ ᖁᔭᓕᓚᐅᕐᑐᖅ ᓄᓇᓕᖕᓂᒃ ᐃᑲᔪᖅᑕᐅᓂᖏᓐᓂᒃ ᑖᔅᓱᒥᖓ ᓇᓂᓯᔪᓐᓇᕐᓂᖏᓐᓂᒃ.
Hᐋᓐᑕ =ATV