ᐸᓖᓯᒃᑯᑦ ᐃᖃᓗᖕᓂ ᑲᔪᓯᓂᐊᕐᑐᑦ ᑎᒥᖏᑦᑎᒍᑦ ᐊᔾᔨᓕᐅᕈᑎᖃᖃᑦᑕᕐᓗᑎᒃ, ᐊᖓᔪᖅᑳᖅ ᐅᖃᕐᑐᖅ

ᓄᓇᕗᒧᑦ ᐊᖓᔪᖅᑳᖃᕐᕕᒃ ᐃᓚᒋᔭᐅᓂᐊᕐᑐᖅ ᐊᔾᔨᓕᐅᕈᑎᓂᒃ ᐊᑐᖃᑦᑕᖅᑐᓂᒃ ᑖᒃᑯᐊ ᖃᐅᔨᓴᕈᑎᐅᓚᐅᖅᖢᑎᒃ ᐊᕐᕌᓂᓂ

ᐸᓖᓯᒃᑯᑦ ᐃᖃᓗᖕᓂ ᐊᑐᑲᑕᖕᓂᐊᕐᑐᑦ ᐊᔾᔨᓕᐅᕈᑎᓂᒃ ᐱᓇᓱᐊᕈᓯᖕᓂᒃ 8-ᓂ ᐅᑭᐊᒃᓵᖑᓂᐊᕐᑐᖅ ᑖᒃᑯᐊ ᐸᓖᓯᒃᑯᑦ ᑖᔅᓱᒥᖓ ᐱᒋᐊᕈᑎᐅᓯᒧᓪᓗᑎᒃ ᑲᓇᑕᒥᐅᑕᓄᑦ ᐸᓖᓯᓄᑦ ᐅᖃᓚᐅᕐᑐᖅ ᐊᖓᔪᖅᑳᖅ ᓲᐳᐃᓐᑕᓐᑕᓐ ᐊᒫᓐᑕ ᔫᓐᔅ. (ᐊᔾᔨᙳᐊᖁᑎᒋᔭᐅᔪᖅ ᑕᔅᑎ ᐸᑕᕐ)

By ᑰᕆ ᓚᐅᕌᒃ

ᐸᓖᓯᒃᑯᑦ ᐃᖃᓗᖕᓂ ᐊᑐᖃᑦᑕᕐᓂᐊᓕᕐᒥᔪᑦ ᐊᔾᔨᓕᐅᕈᑎᓂᒃ ᐅᑭᐊᒃᓵᖅ ᑖᒃᑯᐊ ᐸᓖᓯᒃᑯᑦ ᖃᐅᔨᓴᓚᐅᕐᑎᓪᓗᒋ ᐊᓯᖏᓐᓄᑦ ᐱᓕᕆᐊᖑᙱᑎᓪᓗᒋᑦ ᐸᓖᓯᓄᑦ ᑲᓇᑕᒥ, ᐅᖃᓚᐅᕐᑐᖅ ᐊᖓᔪᖅᑳᖅ ᐊᒫᓐᑕ ᔫᓐᔅ, ᐊᖓᔪᖅᑳᕆᔭᐅᔪᖅ ᐸᓖᓯᓄᑦ ᓄᓇᕗᒥᑦ.

“ᐱᔾᔪᑎᒋᔭᐅᓚᐅᕐᑐᕐᓗ ᐊᑐᖃᑦᑕᕈᑎᐅᔪᖅ ᓇᓗᓇᐃᕐᓯᓇᓱᒃᖢᑎᒃ ᐱᓕᕆᐊᖃᖅᑎᑕᐅᔪᑦ ᐸᓖᓯᓄᑦ ᐱᔭᐅᔪᒪᔪᓂᒃ ᐋᖅᑭᒃᓯᓯᒪᔪᓐᓇᕆᐊᒃᓴᖏᓐᓂᒃ,” ᔫᓐᔅ ᐅᖃᓚᐅᕐᑐᖅ ᐃᖃᓗᐃᑦ ᓄᓇᓕᐸᐅᔭᓄᑦ ᑲᑎᒪᔨᓄᑦ ᐄᐳᕈ   26-ᒥ.

ᐃᖃᓗᐃᑦ ᐱᖓᔪᒋᔭᐅᓂᐊᕐᑐᖅ ᓄᓇᓕᖕᓂ ᒫᓂ 300-ᖏᓐᓂ ᐊᔾᔨᓕᐅᕈᑎᓂ ᖃᐅᔨᓴᕐᕕᐅᓂᐊᕐᑐᓂᒃ ᐱᓇᓱᐊᕈᓯᕐᓂ 8-ᓂ ᐅᑭᐊᒃᓵᖅ, ᐅᖃᒃᑲᓐᓂᕐᑐᖅ. ᐊᓯᖏᓪᓕ ᓄᓇᓖᑦ ᓄᕙ ᓯᑰᓯᐊᒦᑦᑐᖅ ᐊᒻᒪᓗ ᐋᐴᑕᒥ, ᑭᓯᐊᓂᓕ ᔫᓐᔅ ᓇᓂᐅᓂᐊᕐᒪᖔᑕ ᑲᑎᒪᔨᓄᑦ ᐅᖃᓪᓚᒃᑎᓪᓗᒍ.

ᒐᕙᒪᑐᖃᒃᑯ ᓂᐅᕕᐊᓂᒐᓱᒃᐸᓪᓕᐊᓯᔪᑦ ᐊᔾᔨᓕᐅᕈᑎᓂᒃ ᓴᓇᔨᐅᔪᓂᒃ.

ᓄᓇᕗᒥᑦ ᐊᖓᔪᖅᑳᖃᕐᕕᒃ ᐃᓂᒋᔭᐅᓚᐅᕐᒪᑦ ᑕᖅᑭᓂᒃ 6-ᓂ ᖃᐅᔨᓴᕈᑎᐅᓪᓗᓂ ᓄᕕᐱᕆ 2020-ᒥ ᒪᐃ 2021-ᒧ. ᑕᐃᔅᓱᒪᓂᓕ 53 ᐸᓖᓯ ᐊᔾᔨᓕᐅᕈᑎᓂ ᐊᑐᖃᑦᑕᓚᐅᕐᑐᑦ ᐊᒻᒪᓗ ᐊᔪᕈᓐᓃᕐᓴᖅᑎᑕᐅᓪᓗᓂ ᖃᓄᖅ ᐊᑐᕆᐊᖃᕐᓂᖏᓐᓂᒃ, ᐅᖃᕐᑐᖅ.

ᐃᓚᖏᑦ ᖃᓗᓈᓂᙶᕐᓯᒪᓚᐅᕐᑐᑦ ᐃᖃᓗᖕᓄ ᐃᖅᑲᓇᐃᔭᕆᐊᕐᓯᒪᓪᓗᑎᒃ ᑕᕝᕙᓂᓗ ᐸᓖᓯᑕᖃᖃᑦᑕᖅᖢᓂ 28-ᓂ. ᑖᒃᑯᐊᓕ ᐃᓇᖏᕐᓯᖃᑦᑕᓚᐅᕐᒪᑕ ᑕᐃᒪᓕ ᐊᔪᕈᓐᓃᕐᓴᕆᐊᖃᓚᐅᕐᒥᔪᑦ ᐊᔾᔨᓕᐅᕈᑎᓂ ᐊᑐᕈᓐᓇᕐᓯᓂᕐᒥᒃ.

ᐱᓕᕆᐊᖃᕐᑎᓪᓗᒋ ᐸᓖᓯᒃᑯᑦ 3,600-ᖏᓐᓂ ᐊᔾᔨᓕᐅᕆᓯᒪᓚᐅᕐᑐᑦ ᐅᖄᓚᕝᕕᐅᓯᒪᓪᓗᑎᒃ 5,400-ᓂ. ᑲᑎᖢᑎᒡᓗ ᐃᑲᕐᕋᓂ 525-ᓂ ᐊᔾᔨᓕᐅᕆᓯᒪᓚᐅᕐᑐᑦ, ᑖᒃᑯᓇᙵᓪᓗ 6 ᐳᓴᓐᑎᖓᓂ ᐃᖅᑲᓇᐃᕕᒃᑯᑦ ᐊᑐᕐᓯᒪᓪᓗᑎᒃ, ᔫᓐᔅ ᐅᖃᓚᐅᕐᑐᖅ ᑲᑎᒪᔨᓄᑦ.

ᑐᕌᒐᕆᔭᐅᓚᐅᕐᑐᕐᓕ ᐱᓕᕆᐊᒧᑦ ᓇᓗᓇᐃᕐᓯᓇᓱᒃᖢᑎᒃ ᐱᐅᓂᕐᐹᒥ ᐊᔾᔨᓕᐅᕈᑎᑦ ᐊᑐᖅᑕᐅᔾᔪᑎᒋᓂᐊᖅᑕᖏᓐᓂ ᐸᓖᓯᓄᑦ, ᐃᓄᖕᓂᓪᓗ ᐅᖃᖃᑎᖃᕐᐸᒡᓗᑎᒃ ᐊᔾᔨᓕᐅᕈᑎᑦ ᖃᓄᖅ ᐃᓱᒪᒋᔭᐅᖕᒪᖔᑕ, ᐊᒻᒪᓗ ᐸᓖᓯᓂ ᑐᓴᕈᒪᒋᓪᓗᑎᒃ ᐊᑐᖃᑦᑕᓚᐅᕐᑐᓂᒃ.

“ᐅᓄᕐᓂᕐᓴᐃᑦ ᐸᓖᓯᒃᑯᑦ ᐃᑲᔪᕐᑐᐃᓚᐅᕐᑐᑦ ᐸᓖᓯᓕᒫᑦ ᐊᔾᔨᓕᐅᕈᑎᖃᖅᑎᑕᐅᕙᒡᓗᑎᒃ,” ᔫᓐᔅ ᐅᖃᕐᑐᖅ.

ᑖᔅᓱᒥᖓ ᐱᓕᕆᐊᖃᓚᐅᕐᖢᑎᒃ, ᐸᓖᓯᒃᑯᑦ ᐊᒻᒪ ᒐᕙᒪᑐᖃᒃᑯᑦ ᐃᓱᒪᓕᐅᕆᓕᓚᐅᕐᑐᑦ ᑖᒃᑯᓂᖓ ᐊᔾᔨᓕᐅᕈᑎᓂᒃ ᐸᓖᓯᓄᑦ ᑲᓇᑕᒥ ᐊᑐᖅᑕᐅᖃᑦᑕᖁᔨᓪᓗᑎᒃ.

ᒪᐃᔭ ᑭᐊᓂ ᐱᐊᓪ ᑲᑎᒪᔨᓂ ᐃᖅᑲᐃᑎᑦᑎᓚᐅᕐᑐᖅ ᒪᓕᒐᓕᕆᓂᕐᒥᒃ ᐱᓕᕆᐊᖃᖅᑐᓂᒃ ᐃᓚᐅᓚᐅᕐᓂᖓᓂᒃ ᐸᓖᓯᓂᒃ ᐊᔾᔨᓕᐅᕈᑎᖃᖃᑦᑕᖁᔨᔪᓂᒃ. ᖁᔭᓕᓚᐅᕐᑐᖅ ᒐᕙᒪᑐᖃᒃᑯᓐᓂ ᓂᕈᐊᓚᐅᕐᓂᖏᓐᓂᒃ ᐃᖃᓗᖕᓂ ᑖᔅᓱᒥᖓ ᖃᐅᔨᓴᕋᓱᓕᕐᑎᓪᓗᒋᑦ.

“ᖃᐅᔨᒪᔪᖓᓕ ᓄᓇᓖᑦ ᑖᒃᑯᓂᖓ ᓈᒻᒪᒃᓴᓚᐅᕐᓂᖏᓐᓂᒃ,” ᐱᐊᓪ ᐅᖃᕐᑐᖅ.

ᔫᓐᔅ ᐅᖃᒃᑲᓐᓂᓚᐅᕐᑐᖅ ᑲᑎᒪᔨᓄᑦ ᖃᐅᔨᔾᔪᑎᐅᔪᑦ ᖃᐅᔨᓴᕐᓂᕐᒧᑦ ᐱᓕᕆᐊᒧᑦ ᑖᓐᓇᓗ 70-ᓂ ᑭᐅᓯᓂᑯᓂᒃ “ᑕᒪᕐᒥᒃ ᓈᒻᒪᒃᓴᓚᐅᖅᖢᑎᒃ.”

ᐅᓄᕐᓂᕐᓴᐃᑦ ᐊᖏᓚᐅᕐᑐᑦ ᐊᔾᔨᓕᐅᕈᑎᖃᕐᓗᑎᒃ ᐃᓄᐃᑦ ᑖᒃᑯᓂᖓ ᐅᒃᐱᕈᓱᒍᓐᓇᕐᓂᕐᓴᐅᓇᔭᕐᓂᖏᓐᓂᒃ ᐊᒻᒪᓗ ᐊᑦᑕᓇᖅᑐᒦᙱᓐᓂᕐᓴᐅᓕᕐᓗᑎᒃ. ᑭᐅᔪᓂᒃ ᓲᕐᓗ ᐱᖓᓱᓂᒃ ᐊᑕᐅᓯᖅ ᐊᖏᓚᐅᕐᑐᖅ ᐸᓖᓯᒃᑯᑦ ᐱᑲᑦᑕᓗᙱᓐᓂᕐᓴᐅᖃᑦᑕᕋᔭᕐᓂᖏᓐᓂᒃ ᐅᖄᓚᔪᖃᕌᖓᑦ.

ᔫᓐᔅ ᐅᖃᓚᐅᕐᑐᖅ ᐃᓄᐃᑦ ᖃᐅᔨᓴᕐᓂᕐᒧᑦ ᑭᐅᑲᑕᙱᓗᐊᓚᐅᕐᓂᖏᓐᓂᒃ, ᐅᖃᖅᖢᓂ ᐃᓱᒫᓘᑎᖃᕐᒪᑕᖃᐃ ᑭᐅᔾᔪᑎᖏᑦ ᑲᑎᑕᐅᓂᐊᕆᐊᒃᓴᖏᓐᓂᒃ ᐸᓖᓯᓄᑦ.

ᓯᕗᓂᑦᑎᓐᓂᓪᓕ, ᐸᓖᓯᒃᑯᑦ ᐃᓱᒪᓇᓱᓛᕐᑐᑦ “ᐊᓯᐊᒍᑦ ᖃᓄᐃᓕᐅᕈᑎᒃᓴᓂᒃ” ᑲᑎᑦᑎᓇᓱᒡᓗᑎᒃ ᑭᐅᔭᐅᔾᔪᑎᓂᒃ ᓲᕐᓗ ᐸᓖᓯᒃᑯᓐᓂᐅᙱᑦᑐ ᐱᓕᕆᑎᑦᑎᓗᑎᒃ ᖃᐅᔨᓴᖅᑎᑕᐅᓂᐊᖅᑐᓂᒃ.

Share This Story

(0) Comments