ᐸᓖᓯᒃᑯᑦ ᐊᒻᒪ ᐃᓄᐃᑦ ᐊᕐᓇᐃᑦ ᑲᑐᔾᔨᖃᑎᒌᖏᑦ ᐊᑎᓕᐅᕐᐳᑦ ᐱᓕᕆᓂᕐᒧᑦ ᐊᖏᕈᑎᓂᒃ
“ᐱᓕᕆᖃᑎᒌᖕᓂᒃᑯᑦ ᐃᓱᒪᔪᒍᑦ ᐅᒃᐱᕈᓱᖃᑎᒌᖕᓂᖅ ᐊᒻᒪ ᐱᓕᕆᖃᑎᒌᒋᐊᖃᕐᓂᖅ ᓴᙱᒃᑎᑉᐹᓕᖁᓪᓗᑎᒍᑦ,” ᐅᖃᖅᑐᖅ ᐸᓖᓯᓄᑦ ᐊᖓᔪᖅᑳᖅ ᑭᒻ ᑕᑉᓕᓐ
ᐸᓖᓯᒃᑯᑦ ᐊᒻᒪ ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ ᐊᑎᓕᐅᓚᐅᕐᑐᑦ ᐱᓕᕆᓂᕐᒧᑦ ᐊᖏᕈᑎᓂᒃ ᐱᓂᐊᕐᓂᕋᕐᓯᒪᔪᓂᒃ ᐋᓐᓂᕐᓱᐃᕆᕙᖕᓂᕐᒥᒃ ᐱᑕᖃᕈᓐᓃᖅᐹᓪᓕᖅᑎᑦᑎᓇᓱᖕᓂᕐᒥᒃ ᒪᑯᓂᖓ ᐊᕐᓇᓂᒃ ᐊᒻᒪ ᓱᕈᓯᕐᓂ ᐃᓄᖕᓂ. (ᐊᔾᔨᙳᐊᖁᑎᒋᔭᐅᔪᖅ)
For an English version of this story, see RCMP and Inuit women’s organization sign working agreement
ᐱᑖᕆᐊᖃᕐᓂᖅ ᐃᓚᒌᓂᒃ ᐱᑦᑎᐊᕐᐸᙱᓐᓂᕐᒧᑦ ᑐᑭᒧᐊᖅᑎᑦᑎᔨᒥ ᓄᓇᕗᒥᑦ ᐊᒻᒪᓗ ᐋᖅᑭᒃᓱᐃᕙᓪᓕᐊᓂᖅ ᐃᓕᖅᑯᓯᒃᑯᑦ ᐊᑐᕈᓐᓇᕐᑐᓂᒃ ᐊᔪᕈᓐᓃᕐᓴᐅᑎᒃᓴᓂ ᐃᓚᒋᔭᐅᓚᐅᕐᑐᖅ ᐸᓖᓯᒃᑯᑦ ᐊᒻᒪᓗ ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ ᐊᖏᖃᑎᒌᒍᑎᖏᓐᓂᒃ ᐱᓕᕆᖃᑎᒌᖕᓂᒃᑯᑦ ᐱᓂᐊᕐᓂᕋᖅᑎᓪᓗᒋᑦ ᐱᐅᓯᕚᓪᓕᖅᑎᑦᑎᓂᕐᒥ ᐅᓗᕆᐊᓇᙱᑦᑐᒦᑎᑦᑎᓂᕐᒥᒃ ᐊᕐᓇᓂᒃ ᐊᒻᒪ ᓱᕈᓯᕐᓂ ᐃᓄᖕᓂ ᐃᓄᐃᑦ ᓄᓇᖓᓂ ᔭᓄᐊᕆ ᐃᓱᓕᓕᕐᑎᓪᓗᒍ.
ᐊᕐᕌᓂᐅᓚᐅᕐᓯᒪᔪᖅ, ᐸᐅᒃᑑᑎᒃᑯᑦ ᐅᓂᒃᑳᓕᐊᓂᒃ ᓴᖅᑭᑎᑦᑎᓚᐅᕐᓯᒪᖕᒪᑕ, ᐅᖃᐅᓯᖃᖅᖢᑎᒃ ᐱᔪᒪᓯᒪᔪᓂᒃ “ᐊᑐᖅᑕᐅᔪᓐᓇᕐᑐᒥᒃ ᐊᓯᐊᒎᕆᐊᖃᓕᕐᓂᕐᒥᒃ” ᐸᓖᓯᓕᕆᓂᒃᑯᑦ ᒪᐅᓇ ᐋᓐᓂᕐᓱᐃᕆᖃᑦᑕᓗᐊᕐᓂᖅ ᐃᓄᖕᓂ ᐊᕐᓇᓂ ᐱᓕᕆᐊᖑᓕᕐᓗᓂ, ᑖᒃᑯᐊᓗᑦ ᓈᒻᒪᙱᓗᐊᕐᑐᐊᓗᒃᑯᑦ ᐋᓐᓂᖅᓱᑕᐅᓗᐊᖅᐸᒃᖢᑎᒃ ᑲᓇᑕᒥ.
ᐅᓇ ‘ᐱᓇᓱᐊᖃᑎᒌᓐᓂᖅ ᐊᖏᕈᑎ”. ᐊᑎᓕᐅᕐᑕᐅᓚᕐᑐᖅ ᐱᓇᓱᐊᕈᓯᐅᓚᐅᕐᑐᒥ, ᐱᓂᐊᕐᓂᕋᕐᓯᒪᔪᖅ ᐅᑯᐊ ᑲᓇᑕᒥ ᐃᓄᐃᑦ ᐊᕐᓇᐃᑦ ᑲᑐᔾᔨᖃᑎᒌᖏᑦ, ᐸᓖᓯᒃᑯᑦ ᐊᖓᔪᖅᑳᖃᕐᕕᖏᑦ ᐊᒻᒪ ᐸᓖᓯᑦ ᐃᓄᐃᑦ ᓄᓇᖏᓐᓃᑦᑐᑦ ᐱᓕᕆᖃᑎᒌᖕᓂᐊᕐᓗᑎᒃ ᐅᑯᓇᓃ ᐅᓂᒃᑳᓂᒃ 15-ᓂ ᐃᓱᒪᓕᐊᕆᔭᐅᓯᒪᔪᓂᒃ ᐸᐅᒃᑑᑎᒃᑯᓐᓄᑦ.
ᐱᓇᓱᖃᑎᒌᓐᓂᖅ ᑐᑭᖃᖅᑐᖅ “ᐱᓕᕆᖃᑎᒌᒡᓗᑎᒃ ᐱᓇᓱᐊᕐᑕᐅᔪᓂᒃ”.
“ᐱᓕᕆᖃᑎᒌᖕᓂᑰᔪᒍᑦ ᖃᖓᒃᑲᓐᓂᖅ, ᑭᓯᐊᓂᓕ ᐅᓇ ᐱᓪᓚᕆᐅᓕᖅᑎᑦᑎᓯᒪᔪᖅ ᐱᓂᐊᕐᓂᕋᕐᓯᒪᔪᓂᒃ ᓯᕗᓪᓕᐅᑎᔭᕆᐊᖃᕆᔭᐅᔪᓂᒃ ᑕᒪᐃᓐᓄᑦ,” ᐅᖃᖅᑐᖅ ᐊᖓᔪᖅᑳᖅ ᑭᒻᒪ ᑕᑉᓕᓐ ᐸᓖᓯᒃᑯᓐᓄᑦ ᓄᓇᖃᖅᑳᖅᑐᓂᒃ ᐸᓖᓯᓕᕆᓂᕐᒧᑦ ᐱᔨᑦᑎᕋᐅᑎᓄᑦ.
ᐅᕙᓂ 2020-ᒥᑦ ᐅᓂᒃᑳᓂᒃ, Addressing Gendered Violence against Inuit Women (ᐱᓕᕆᐊᖃᕐᓂᖅ ᖃᓄᐃᑦᑑᓂᒃᑯᑦ ᐋᓐᓂᕐᓯᕆᖃᑦᑕᓗᐊᕐᓂᐊᓗᒃ ᐊᕐᓇᓂᒃ ᐃᓄᖕᓂ) ᖃᐅᔨᒍᑎᐅᓚᐅᕐᑐᖅ ᐊᕐᓇᖅ ᐅᓗᕆᐊᓇᖅᑐᒦᓐᓂᕐᓴᐅᓂᖓᓂᒃ ᖁᓄᔪᕐᓂᐊᖅᑕᐅᓂᒃᑯᑦ ᓄᓇᕗᒥᑦ 12-ᖏᕐᓱᖅᓯᒪᔪᒥ ᖁᑦᑎᖕᓂᕐᓴᒥ ᑲᓇᑕᓕᒫᖅ ᑕᐅᑐᒃᖢᒍ.
ᐊᕐᓇᐃᑦ ᓄᓇᕗᒥᑦ ᐋᓐᓂᕐᓱᖅᑕᐅᓂᒃᑯᑦ ᐱᑦᑎᐊᖅᑕᐅᖏᓐᓂᕆᕙᒃᑕᖏᑦ ᖁᕝᕙᓯᖕᓂᕐᓴᖅ 13-ᖏᕐᓱᖅᖢᓂ ᐊᕐᓇᓂ ᑲᑎᖢᑎᒃ ᑲᓇᑕᒦᑦᑐᓂᒃ, ᐸᒃᑑᑎᒃᑯᑦ ᐊᖓᔪᖅᑳᖓ ᕇᐱᑲ ᑲᓪᓗ ᐅᖃᓚᐅᕐᑐᖅ ᑐᓴᒐᒃᓴᓕᐅᕐᓂᒃᑯᑦ.
ᑲᓪᓗ ᐅᖃᓚᐅᕐᒥᔪᖅ ᐊᕐᓇᐃᑦ ᐱᑦᑎᐊᖅᑕᐅᕙᙱᑦᑐᑦ ᓈᒻᒪᙱᓕᐅᕈᑎᖃᒃᑲᓐᓂᖃᑦᑕᕐᒪᑕ ᒪᓕᒐᓕᕆᓂᒃᑯᑦ ᑕᒪᓐᓇ ᐱᓕᕆᐊᖑᓇᓱᒃᑎᓪᓗᒍ, ᐊᒻᒪᓗ ᐅᓂᒃᑳᑦ ᐅᖃᕐᓯᒪᓪᓗᑎᒃ ᐃᓄᐃᑦ ᐊᕐᓇᐃᑦ ᐊᔾᔨᐅᙱᑎᑕᐅᓂᕐᒥᒃ ᓵᖓᓕᖃᑦᑕᕐᒥᖕᒪᑕ ᐸᓖᓯᒃᑯᓐᓂᒃ ᐅᒃᐱᕈᓱᙱᓐᓂᕐᑕᖃᕐᓂᒃᑯᑦ ᐊᒻᒪᓗ ᐸᓖᓯᓄᑦ ᐅᖃᓗᒍᒪᔪᓐᓃᖅᐸᒃᖢᑎᒃ ᐃᑲᔪᖅᑕᐅᔪᒪᓪᓗᑎ.
ᑖᑉᓚᓐ ᐅᖃᓚᐅᕐᑐᖅ, “ᐅᓇ ᐅᒃᐱᕈᓱᒍᓐᓇᕐᓂᖅ ᓱᕋᒃᑕᐅᓯᒪᖕᒪᑦ, ᐊᒻᒪᓘᓐᓃᑦ ᐊᒃᑐᐃᒍᑎᐅᓯᒪᖕᒪᑦ, ᐊᕐᕌᒍᒐᓴᒻᒪᕆᐊᓘᓕᕐᑐᓂᒃ ᐊᒻᒪᓗ ᐊᓯᙳᔾᔮᙱᖢᓂ ᐅᓄᑐᐃᓐᓇᕐᒥᒃ.
“ᐱᓕᕆᖃᑎᖃᖢᑕ ᐃᓱᒪᔪᒍᑦ ᑕᒪᒃᑯᐊ ᐅᒃᐱᕈᓱᒍᓐᓇᕐᓃᑦ ᐊᒻᒪ ᐱᓕᕆᖃᑎᒌᒍᓐᓇᕐᓂᖅ ᓴᙱᒃᑎᕚᓪᓕᕈᓐᓇᕐᓗᓂ.”
ᐃᓚᖓᓪᓕ ᓯᕗᓪᓕᐅᑎᑕᐅᖃᑕᐅᓯᒪᔪᖅ ᐊᖏᕈᑎᓂᒃ ᐱᓕᕆᔾᔪᑎᒃᓴᓄᑦ ᐸᕐᓇᐅᑎᓂᒃ ᐅᓇ ᐅᖃᖃᑎᖃᖃᑦᑕᕐᓂᖅ ᓄᓇᖃᖅᑳᖅᑐᑦ ᓄᓇᓕᖏᓐᓂᒃ, ᐅᖃᖅᑐᖅ.
ᐅᖃᐅᓯᖃᓚᐅᕐᒥᔪᖅ ᐃᖃᓗᖕᓂ ᐸᓖᓯᒃᑯᑦ ᑎᒥᖏᑦᑎᒍᑦ ᐊᔾᔨᓕᐅᕈᑎᓂᒃ ᐊᑐᖃᑦᑕᕐᓂᖏᓐᓂᒃ ᓇᓗᓇᐃᒃᑯᑎᒋᓪᓗᓂᐅᒃ. ᑐᓴᒐᒃᓴᓕᐊᖑᔪᑦ ᐅᖃᕐᓯᒪᓚᐅᕐᑐᖅ ᐸᓖᓯᒃᑯᑦ ᐅᖃᖃᑎᖃᖃᑦᑕᕐᓂᐊᕐᓂᖏᓐᓂᒃ ᐊᕐᓇᓂ ᐃᓄᖕᓂ ᑖᔅᓱᒧᖓ ᐱᓕᕆᐊᒧᑦ.
ᐊᓯᒃᑲᓐᓂᖓ ᓯᕗᓪᓕᐅᑎᑕᐅᓯᒪᔪᖅ ᐋᖅᑭᒃᓱᐃᓗᑎᒃ ᐅᔾᔨᕈᓱᓕᖅᑎᑦᑎᓂᕐᒥᒃ ᐃᓕᖅᑯᓯᕆᔭᐅᔪᓂᒃ ᐊᔪᕈᓐᓃᕐᓴᖅᑎᑦᑎᓂᒃᑯᑦ ᑕᒪᐃᓐᓂᒃ ᐸᓖᓯᒃᑯᑦ ᐃᖅᑲᓇᐃᔭᖅᑎᖏᓐᓂᒃ, ᒪᑯᐊᑐᐊᙳᖏᑦᑐᑦ ᐸᓖᓯᒃ, ᐅᖃᖅᑐᖅ ᑕᑉᓕᓐ.
“ᑐᑭᓯᓯᒪᓂᖅ ᐃᓱᒪᒋᔭᐅᔪᓂᒃ ᓄᓇᖃᖅᑳᖅᑐᓄᑦ ᓯᕗᓪᓕᖅᐹᖑᔪᑦ ᐊᓯᙳᖅᑎᑦᑎᓇᓱᖕᓂᐊᕐᓗᓂ ᖃᓄᐃᓕᐅᕈᓯᕐᓂᒃ ᐊᒻᒪ ᐃᓱᒪᒋᔭᐅᕙᒃᑐᓂᒃ ᐃᓚᖏᓐᓄᑦ ᐸᓖᓯᒋᔭᑦᑎᓐᓄᑦ.”
“ᑕᒪᑦᑕ ᐃᑲᔪᖅᑕᐅᔪᓐᓇᕋᑦᑕ ᐃᓕᓐᓂᐊᒃᑲᓐᓂᕐᓂᒃᑯᑦ ᐊᒻᒪ ᐅᔾᔨᕈᓱᖕᓂᕐᓴᐅᓂᒃᑯᑦ ᐃᓄᖕᓂ ᓄᓇᓕᖕᓃᑦᑐᓂᒃ ᐸᓖᓯᐅᕝᕕᒋᔭᑦᑎᓐᓂ.” ᐅᖃᖅᑐᖅ.
ᐅᖓᑖᓃᑦᑐᑦ 6,000 ᐃᖅᑲᓇᐃᔭᖅᑐᑦ ᐃᓕᖅᑯᓯᓕᕆᓂᒃᑯᑦ ᐅᔾᔨᕈᓱᓕᕐᓂᕐᒥᒃ ᐊᒻᒪᓗ ᐃᓱᒪᒋᔭᖃᑦᑎᐊᕐᓂᕐᒧᑦ ᐃᓕᓐᓂᐊᕈᑎᒃᓴᓂᒃ ᐱᑕᖃᖅᑎᑦᑎᓕᕐᑐᑦ ᑕᒪᐃᓐᓄᑦ ᐃᖅᑲᓇᐃᔭᖅᑐᓄᑦ ᐊᑐᕆᐊᖃᖅᑕᖏᓐᓂᒃ, ᐅᖃᖅᑐᖅ ᑖᑉᓕᓐ.
ᐅᖃᓚᐅᕐᑐᖅ ᒫᓐᓇ ᕿᓚᒻᒥᐅᓗᐊᕐᒪᑦ ᓱᓕ ᐃᓕᓐᓂᐊᕈᑎᓄᑦ ᖃᓄᐃᑉᐹᓪᓕᕈᑎᓂᒃ ᓇᓗᓇᐃᕐᓯᔭᕆᐊᒃᓴᖅ, ᑭᓯᐊᓂᓕ ᐃᓕᓐᓂᐊᕈᑎᒃᓴᒃᑲᓐᓂᕐᓂᒃ ᐋᖅᑭᒃᓱᐃᓂᐊᕐᑐᑦ ᐊᖏᕈᑎᑎᒎᖓᔪᓂᒃ ᐅᑯᓄᖓ ᐸᐅᒃᑑᑎᒃᑯᓐᓂᒃ.
ᐅᓇ 2020-ᒧᑦ ᐅᓂᒃᑳᖅ 15-ᓂ ᐃᓱᒪᓕᐅᕆᓯᒪᔪᖅ ᐊᓯᙳᖅᑎᑦᑎᖁᔨᓯᒪᔪᓂᒃ ᖃᓄᖅ ᐸᓖᓯᓕᕆᓂᖅ ᐱᓕᕆᐊᖑᕙᖕᓂᖓᒍᑦ ᐃᓄᐃᑦ ᓄᓇᓕᖏᓐᓂᒃ, ᐃᓚᖃᖅᖢᓂ ᐊᕐᓇᒥ ᐸᓖᓯᒥ ᐱᑕᖃᖅᐸᒡᓗᓂ ᐊᐱᖅᓱᑲᑕᓕᕌᖓᑕ ᖃᓄᐃᒍᑎᐅᓂᑯᓂᒃ, ᐃᓕᖅᑯᓯᓕᕆᓂᒃᑯᑦ ᑐᑭᓯᐅᒪᓂᖃᕐᓗᑎᒃ ᐊᒻᒪᓗ ᖃᓄᐃᓕᒍᑎᕕᓂᕐᓂᒃ ᖃᐅᔨᒪᓂᖃᕐᓗᑎᒃ ᐸᓖᓯᐅᓂᕐᒧᑦ ᐱᓕᕆᐊᖃᓕᕌᖓᑕ, ᐊᒻᒪᓗ ᐊᔪᕈᓐᓃᕐᓴᖅᑎᑕᐅᓯᒪᓗᑎᒃ ᐋᓐᓂᕐᓱᐃᕆᖃᑦᑕᓗᐊᕐᓂᕐᒧᑦ ᐱᔾᔪᑎᐅᓗᐊᕐᐸᒃᑐᓂᒃ.
45 ᐃᓄᐃᑦ ᐊᕐᓇᐃᑦ ᐊᒻᒪ 40 ᐱᔨᑦᑎᕋᐅᑎᓕᕆᔨᐅᔪᑦ ᑎᓴᒪᓂᒃ ᐃᓄᐃᑦ ᓄᓇᖏᓐᓂᒃ ᐊᕕᒃᑐᕐᓯᒪᓂᒃᑯᑦ ᑲᓇᑕᒥ ᐊᐱᖅᓱᖅᑕᐅᓚᐅᕐᓯᒪᔪᑦ ᐅᓂᒃᑳᓕᐅᖅᐸᓪᓕᐊᓕᕐᑎᓪᓗᒋᑦ, ᐊᒻᒪᓗ ᖃᐅᔨᒍᑎᐅᓪᓗᓂ ᐃᓅᖃᑎᒌᙱᓐᓂᖅ ᐊᑐᖅᑕᐅᔭᐃᓐᓇᐅᔭᕐᓂᖓᓂᒃ ᐸᓖᓯᓕᕆᓂᒃᑯᑦ ᐅᑯᑎᒎᓇᖅ ᐸᓖᓯᒃᑯᑦ ᐃᓄᖕᓂ ᐱᓕᕆᐊᖃᖅᑎᓪᓗᒋᑦ.
(0) Comments