ᐸᓖᓯᒃᑯᑦ ᒪᓕᖃᑦᑕᙱᑦᑐᑦ ᑐᑭᒧᐊᕈᑎᓂᒃ ᐊᓐᓄᕋᐃᔭᖅᑎᑦᑎᓪᓗᑎᒃ ᖃᐅᔨᓴᓕᕌᖓᑕ: ᐅᓂᒃᑳᑦ

ᐃᖃᓗᖕᓂ ᐃᓚᒋᔭᐅᔪᑦ ᐅᖃᓚᐅᕐᑐᑦ ᑎᒍᔭᐅᓯᒪᔪᓂᒃ ᐊᓐᓄᕌᖏᓐᓂᒃ ᐲᔭᐃᑲᑕᖕᓂᖅ ᐅᓗᕆᐊᓇᙱᑦᑐᒦᒐᓱᖕᓂᕐᒧᑦ ᐅᕝᕙᓘᓐᓃᑦ ᑖᒃᑯᐊ ᐃᒻᒥᓂᒃ ᖃᓄᐃᓕᖁᓇᒋ ᐃᓱᒪᒋᔭᐅᓚᐅᙱᓐᓂᖓᓂᒃ ᐊᓐᓄᕋᐃᔭᐃᕐᓯᓂᕐᒥᒃ ᕿᓂᕐᓂᕐᒨᖓᓂᖓᓂᒃ ᐊᒻᒪᓗ ᑕᐃᒪᐃᓐᓂᖓᓄᑦ ᑎᑎᕋᐅᓯᐅᕙᙱᖢᑎᒃ

ᓄᑖᑦ ᐸᓖᓯᒃᑯᑦ ᖃᓄᐃᓕᐅᕈᓯᕆᕙᒃᑕᖏᓐᓄᑦ ᐅᓂᒃᑳᑦ ᖃᐅᔨᒍᑎᐅᕗ ᐸᓖᓰᑦ ᐃᖃᓗᖕᓂᑦ ᒪᓖᓐᓇᐅᔭᖃᑦᑕᙱᓐᓂᖏᓐᓂᒃ ᐸᓖᓯᒃᑯᑦ ᐊᑐᐊᒐᖏᓐᓂᒃ ᖃᐅᔨᓴᓕᕌᖓᒥᒃ ᑎᒍᔭᐅᓯᒪᔪᓂᒃ ᐅᕝᕙᓘᓐᓃᑦ ᐊᓐᓄᕋᐃᔭᖅᑎᑦᑎᓪᓗᑎᒃ ᖃᐅᔨᓴᓕᕌᖓᑕ ᓄᓇᕗᒥᑦ ᑎᒍᔭᐅᔪᓂᒃ. (ᐊᔾᔨᙳᐊᖁᑎᒋᔭᐅᔪᖅ)

By ᓴᐃᕋ ᕌᔾᔪᔅ

For an English version of this story, see Nunavut RCMP neither documenting, nor following guidelines around strip searches: report

ᓄᑖᑦ ᐸᓖᓯᒃᑯᑦ ᖃᓄᐃᓕᐅᕈᓯᕆᕙᒃᑕᖏᓐᓄᑦ ᐅᓂᒃᑳᑦ ᖃᐅᔨᒍᑎᐅᕗᖅ ᐸᓖᓯᑦ ᐃᖃᓗᖕᓂ ᒪᓖᓐᓇᐅᔭᖃᑦᑕᙱᓐᓂᖏᓐᓂᒃ ᐸᓖᓯᒃᑯᑦ ᐊᑐᐊᒐᖏᓐᓂᒃ ᖃᐅᔨᓴᓕᕌᖓᒥᒃ ᑎᒍᔭᐅᓯᒪᔪᓂᒃ ᐅᕝᕙᓘᓐᓃᑦ ᐊᓐᓄᕋᐃᔭᖅᑎᑦᑎᓪᓗᑎᒃ ᖃᐅᔨᓴᓕᕌᖓᑕ ᓄᓇᕗᒥᑦ ᑎᒍᔭᐅᔪᓂᒃ.

ᐅᒃᑑᐱᕆ 1-ᖑᑎᓪᓗᒍ ᐅᑯᐊ ᐃᒻᒥᒃᑰᖓᔪᑦ ᕿᒥᕐᕈᐊᕈᑎᑦ ᐊᒻᒪ ᕿᐱᓘᑎᓄᑦ ᑲᒥᓴᓐᑯᑦ ᐸᓖᓯᒃᑯᓐᓄ ᐅᓂᒃᑳᓂᒃ ᓴᖅᑭᑦᑎᓚᐅᕐᑐᑦ ᑕᐃᔭᐅᔪᒥᑦ ᐱᓕᕆᓂᒃᑯᑦ ᕿᒥᕐᕈᐊᕐᓂᖅ ᐸᓖᓯᒃᑯᑦ ᐊᑐᐊᒐᖏᓐᓂᒃ ᐊᒻᒪ ᖃᓄᐃᓕᐅᕈᓯᖏᓐᓂᒃ ᐱᔾᔪᑎᒋᓪᓗᒍ ᐊᓐᓄᕋᐃᔭᖅᑎᑦᑎᓪᓗᑎᒃ ᕿᓂᖃᑦᑕᕐᓂᖏᓐᓂᒃ. ᐅᓇ ᖃᓄᐃᓕᐅᕈᑎᓂᒃ ᖃᐅᔨᓴᕈᑎᐅᔪᖅ ᐸᓖᓯᒃᑯᑦ ᖃᓄᐃᓕᐅᕈᓯᖏᓐᓂᒃ 7-ᓂᒃ ᐊᔾᔨᒌᙱᑦᑐᓂᒃ ᓄᓇᓕᖕᓂ ᑲᓇᑕᒦᑦᑐᓂᒃ ᐸᓖᓯᒃᑯᑦ ᓴᓇᕝᕕᖏᓐᓂᒃ ᖃᐅᔨᓴᕐᓂᕐᒨᖓᔪᑦ ᐅᑯᐊ ᐃᓚᐅᓪᓗᑎᒃ V ᐸᓖᓯᒃᑯᑦ ᓄᓇᕗᒥᑦ.

ᑲᓇᑕᓕᒫᒥᑦ ᐅᑯᐊ ᐱᓕᕆᑎᑕᐅᓯᒪᔪᑦ ᑲᒥᓴᓐᑯᑦ ᖃᐅᔨᓕᓚᐅᕐᑐᑦ ᐸᓖᓯᒃᑯᑦ ᑲᓇᑕᒥ ᓇᖕᒥᓂᕆᔭᐅᔪᓂᒃ ᕿᓂᖃᑦᑕᕐᓂᕐᒧᑦ ᐊᑐᐊᒐᖓ ᑐᑭᓯᓇᑦᑎᐊᙱᓐᓂᖓᓂᒃ. ᐅᓂᒃᑳᑦ ᐅᖃᕐᓯᒪᓚᐅᕐᑐᑦ ᓈᒻᒪᒃᑐᓂᒃ ᑎᑎᖃᑕᖃᙱᓐᓂᖓᓂᒃ ᕿᓂᖃᑦᑕᑎᓪᓗᒋᑦ ᐊᓐᓄᕋᐃᔭᖅᑎᑦᑎᓂᒃᑯᑦ, ᑲᒪᔨᖃᑦᑕᐊᖃᑦᑕᙱᓐᓂᖏᓐᓂᒃ ᐅᓐᓄᒃᑯᑦ ᐸᓖᓯᑦ ᐊᒻᒪᓗ ᐊᔪᕈᓐᓃᕐᓴᕐᓯᒪᙱᓗᐊᕐᓂᖏᓐᓂᒃ, ᐊᒻᒪᑦᑕᐅᖅ ᒪᑐᒥᖓ ᓈᒻᒪᙱᓕᐅᕈᑎᐅᖏᓐᓇᐅᔭᖅᑐᒥ ᑎᒍᔭᐅᓯᒪᔪᑦ ᐊᓐᓄᕌᖏᑦᑕ ᐊᑖᒍᑦ ᐊᓐᓄᕌᖏᑦ ᐲᖅᑎᑕᐅᕙᖕᓂᖏᓐᓂᒃ.

ᐅᓂᒃᑳᑦ ᐅᖃᕐᓯᒪᓚᐅᕐᑐᑦ ᑕᒪᒃᑯᐊ ᓈᒻᒪᙱᓕᐅᕈᑎᑦ “ᓇᓗᓇᓚᐅᙱᑦᑐᑦ” ᐃᖃᓗᐃᑦ ᐸᓖᓯᒃᑯᑦ ᐱᓕᕆᕝᕕᖓᓂᒃ.

“ᐸᓖᓯᑦ ᖃᐅᔨᒪᙱᑦᑐᑦ ᖃᐅᔨᒪᔭᕆᐊᖃᖅᑕᖏᓐᓂᒃ ᐊᓐᓄᕋᐃᔭᖅᑎᑦᑎᓂᒃᑯᑦ ᕿᓂᖃᑦᑕᕐᓂᕐᒧᑦ ᐊᑐᐊᒐᓂᒃ ᐊᒻᒪᓗ ᑲᒪᔨᖏᓐᓄᑦ ᑲᒪᒋᔭᐅᙱᓗᐊᖅᖢᑎᒃ,” ᐅᓂᒃᑳᑦ ᐅᖃᖅᓯᒪᔪᑦ.

ᑖᓐᓇ ᕿᒥᕐᕈᐊᕈᑎᐅᔪᖅ ᐃᖃᓗᖕᓂ ᐸᓖᓯᒃᑯᓐᓂ ᑐᕌᖓᒐᓗᐊᖅᑎᓪᓗᒍ, ᑲᒥᓴᓐᑯᑦ ᐅᖃᕐᓯᒪᓚᐅᕐᑐᑦ ᖃᓄᐃᓕᐅᕈᓯᐅᔪᖅ ᐊᔾᔨᑐᐃᓐᓇᕆᖅᑰᔨᓂᖓᓂᒃ ᓄᓇᕗᒥᑦ ᐱᓕᕆᕝᕕᖕᓂᓕᒫᖅ.

“ᐸᓖᓯᒃᑯᑦ ᑎᑎᕋᖅᐸᓪᓕᐊᖃᑦᑕᙱᒻᒪᑕ ᐅᕝᕙᓘᓐᓃᑦ ᓇᓗᓇᐃᑦᑎᐊᕐᓯᒪᕙᙱᖢᑎᒃ ᐱᔾᔪᑎᓪᓚᕆᖏᓐᓂᒃ ᐊᓐᓄᕋᐃᔭᐃᑎᑦᑎᓪᓗᑎᒃ ᕿᓂᓕᕌᖓᑕ, ᐊᒻᒪᓗ ᑲᒪᔨᑕᖃᖅᑰᔨᙱᖢᓂ ᕿᒥᕐᕈᐊᖅᑎᐅᓇᔭᖅᑐᓂᒃ ᐸᓖᓯᒃᑯᑦ ᐊᓐᓄᕋᐃᔭᐃᑎᑦᑎᓪᓗᑎᒃ ᕿᓂᖃᑦᑕᕐᓂᕐᒧᑦ ᐊᑐᐊᒐᓂᒃ,” ᐅᖃᕐᓯᒪᔪᑦ ᐅᓂᒃᑳᑦ.

ᑭᖑᓪᓕᕐᐹᖅ ᕿᒥᕐᕈᐊᕈᑎᐅᓂᑯ ᐅᕙᙶᕐᓯᒪᔪᖅ ᐃᖅᑲᖅᑐᐃᕕᒡᔪᐊᒃᑯᑦ ᑲᓇᑕᒥ 2001-ᒥᑦ ᐃᓱᒪᓕᐅᕆᑎᓪᓗᒋᒃ, ᐆᒥᖓ R v. Golden, ᐃᒪᓐᓇ ᓇᓗᓇᐃᕐᓯᓯᒪᓪᓗᓂ ᐊᓐᓄᕋᐃᔭᖅᑎᑕᐅᓪᓗᓂ ᕿᓂᕐᕕᐅᓂᕐᒥ “ᐃᖢᐊᙱᑦᑐᐊᓘᖕᒪᓐ ᐊᒻᒪᓗ ᑭᓲᒍᓐᓃᖅᑎᑦᑎᓯᒪᓂᐅᓪᓗᓂ,” ᑭᓯᐊᓂᓕ ᓇᓗᓇᐃᕐᓯᒪᕙᒃᖢᓂ ᐃᓚᖏᓐᓄᑦ ᖃᓄᐃᓕᐅᕐᓂᕐᓄᑦ. ᐊᖅᑲᖅᑐᐃᔨᒃᑯᑦ ᐱᖁᔨᒻᒪᕆᓚᐅᕐᑐᑦ ᑐᑭᓯᓇᖅᑐᓂᒃ ᐊᑐᐊᒐᖃᖁᔨᓪᓗᑎᒃ, ᐊᔪᕈᓐᓃᕐᓴᖅᑎᑦᑎᕙᒡᓗᑎᒃ ᐊᒻᒪᓗ ᑲᒪᔨᖃᑦᑎᐊᕐᓂᕐᓴᐅᓗᑎᒃ ᐸᓖᓯᑦ.

ᓲᕐᓗ ᐃᒪᓐᓇ, ᐃᖅᑲᖅᑐᐃᕕᐅᔪᑦ ᐋᖅᑭᒃᓯᓚᐅᕐᒪᑕ ᒪᑯᐊ ᐸᓖᓯᒃᑯᑦ ᐊᑐᖅᐸᒃᑕᖓ ᐲᕐᓯᓂᕐᒥᒃ ᐅᕝᕙᓘᓐᓃᑦ ᐲᕐᓯᖁᔨᓗᑎᒃ ᑎᒍᔭᐅᓯᒪᔪᑦ ᐊᓐᓄᕌᖏᑦᑕ ᐊᑖᒍᑦ ᐊᑐᖅᐸᒃᑕᖏᓐᓂᒃ, ᒪᑯᑎᑐᓇᖅ ᐃᕕᐊᖏᓕᓴᖅᑎᑐᑦ, ᐅᖃᐅᓯᐅᓯᒪᔪᖅ ᐊᓐᓄᕋᐃᔭᖅᓯᒪᔪᒥ ᕿᓂᕐᓵᓂᕆᕐᓂᒃ ᐊᒻᒪᓗ, ᑕᐃᒪᐃᓕᐅᕋᑦᑕᐃᓐᓇᐅᔭᕈᑎᒃ ᑕᐃᒪᓕ ᑕᒪᓐᓇ ᓈᒻᒪᙱᓗᐊᖅᑐᐊᓗᒃ ᐊᒻᒪᓗ ᓱᕋᐃᓯᒪᓪᓗᓂ ᑎᒍᔭᐅᓯᒪᔫᕐ ᐱᔪᓐᓇᐅᑎᖏᓐᓂᒃ ᒪᓕᒐᕐᔪᐊᑎᒍᑦ.

ᑖᒃᑯᐊ ᑲᒥᓴᓐᑯᑦ ᕿᒥᕐᕈᐊᕐᑎᓪᓗᒋᑦ 162-ᓂᒃ ᖃᓄᐃᓕᐅᕈᑎᕕᓂᕐᓄᑦ ᐅᓂᒃᑳᓂᒃ ᐃᖃᓗᖕᓂᑦ ᐸᓖᓯᒃᑯᓐᓂᒃ, 158 ᐅᖃᕐᓯᒪᓚᐅᕐᑐᑦ ᐲᕐᓯᔭᕆᐊᖃᕐᓂᕐᒥᒃ ᑎᒍᔭᐅᓯᒪᔫᑉ ᐃᕕᐊᖏᓕᓴᖓᓂᒃ ᐅᕝᕙᓘᓐᓃᑦ ᖃᕐᓕᕋᓛᖏᓐᓂᒃ, ᑭᓯᐊᓂᓕ 3 ᐳᓴᓐᑎᑐᐃᓐᓇ ᑎᑎᖃᖃᕐᕕᖏᓐᓂᒃ ᓇᓗᓇᐃᕐᓯᓯᒪᓪᓚᕆᓚᐅᕐᓯᒪᔪᑦ ᕿᓂᖅᑐᐃᓂᕐᒥᒃ.

ᐅᑯᑎᒎᓇᕐᓕ ᐊᐱᖅᓱᖅᑕᐅᔪᓂᒃ ᐃᖃᓗᖕᓂ ᐸᓖᓯᓂᒃ, ᑭᓇᑐᐃᓐᓇᖅ ᑎᒍᔭᐅᔪᖅ ᐲᕐᓯᔪᒪᙱᒃᑯᓂ ᐊᓐᓄᕌᖏᓐᓂᒃ ᑖᒃᑯᐊ ᐸᓖᓯᒃᑯᑦ ᕿᔾᔭᖅᑐᐃᔪᓐᓇᕐᓯᒪᓪᓗᑎᒃ ᐲᕐᓯᓇᓱᒡᓗᑎᒃ. ᐱᔾᔪᑎᐅᓂᕋᖅᑕᐅᓚᐅᕐᑐᕐᓕ ᑎᒍᔭᐅᔫᑉ ᐃᕕᐊᖏᓕᓴᖓᓂᒃ ᐲᕐᓯᓂᕐᒥᒃ ᑕᒪᒃᑯᐊ ᑎᒍᔭᐅᔪᑦ ᐃᖕᒥᖕᓂᒃ ᕿᒥᒐᓱᖁᓇᒋᑦ, ᐸᓖᓯᑦ ᐅᖃᓚᐅᕐᑐᑦ.

ᐸᓖᓯᒃᑯᑦ ᐅᖃᓚᐅᕐᑐᑦ ᑎᒍᔭᐅᔪᒥᒃ ᐊᓐᓄᕋᐃᔭᐃᓂᖅ ᖃᓄᐃᑦᑕᐅᑦᑕᐃᓕᓂᕐᒧᑦ ᐅᕝᕙᓘᓐᓃᑦ ᐃᖕᒥᖕᓂᒃ ᖃᓄᐃᓕᖁᓇᒋ ᐃᓱᒪᒋᔭᐅᓚᐅᙱᓐᓂᖓᓂᒃ ᐊᓐᓄᕋᐃᔭᐃᑎᑦᑎᓂᕐᒥᒃ ᕿᓂᕐᕕᐅᓂᐊᕐᓂᕐᒧᑦ, ᐊᒻᒪᓗ ᑕᐃᒪᐃᓐᓂᖓᓄᑦ ᑕᒪᒃᑯᐊ ᑎᑎᕋᐅᓯᐅᕙᙱᖢᑎᒃ.

ᐃᖃᓗᖕᓂ ᐸᓖᓯᒃᑯᑦ ᐅᖃᓚᐅᕐᒥᔪᑦ ᑕᒪᒃᑯᐊ ᐊᓐᓄᕋᐃᔭᖁᔭᐅᔪᑦ ᕿᓂᕐᕕᐅᓂᐊᕐᒪᑕ ᐋᖓᔮᖅᓯᒪᕙᒃᖢᑎᒃ.

ᐅᓂᒃᑳᑦ ᒪᕐᕈᐃᓪᓗᐊᓂᒃ ᓄᓇᕗᒧᑦ ᑐᕌᖓᔪᓂᒃ ᐃᓱᒪᓕᐅᕆᔾᔪᑎᖃᓚᐅᕐᑐᖅ. ᐊᑕᐅᓯᖅ ᑕᒪᒃᑯᐊ ᐸᓖᓯᒃᑯᑦ “ᐊᐅᓚᑦᑎᓂᒃᑯᑦ ᑐᑭᒧᐊᕈᑎᖃᕐᓗᑎᒃ” ᐊᒻᒪᓗ ᖁᐊᕐᓵᕐᓇᖅᑐᓕᕆᓂᕐᒥᒃ ᐊᔪᕈᓐᓃᕐᓴᖅᑎᑦᑎᕙᒡᓗᑎᒃ ᐸᓖᓯᓂᒃ ᖃᓄᖅ ᑕᒪᒃᑯᓂᖓ ᑎᒍᔭᐅᔪᓂᒃ ᑲᒪᒋᔭᖃᕈᓐᓇᕐᓂᕐᒥᒃ, ᑕᒪᓐᓇ ᐃᓱᒪᓕᕆᓂᕐᒨᖓᓂᖓ ᐊᒻᒪ ᐃᒻᒥᓂᒃ ᐋᓐᓂᕈᒪᑐᐃᓐᓇᕆᐊᖃᕐᓂᒨᖓᓂᖓᓂᒃ.

ᑲᒥᓴᓐᑯ ᖃᐅᔨᓚᐅᕐᒥᔪᑦ ᐊᓐᓄᕋᐃᔭᐃᑎᑦᑎᓪᓗᑎᒃ ᕿᓂᕐᓴᖃᑦᑕᕐᓂᖏᓐᓂᒃ ᐃᖃᓗᐃᑦ ᐸᓖᓯᖏᑦ ᑎᒍᔭᐅᓯᒪᕝᕕᖕᓂᒃ, ᐊᒻᒪᓗ ᐊᔾᔨᓕᐅᖅᑕᐅᕙᒃᓗᑎᒃ ᐊᐅᓚᔪᒥᑦ. ᐸᓖᓯᒃᑯ ᐅᖃᓚᐅᕐᑐᑦ ᓂᐱᓕᐅᕆᖃᑦᑕᕐᓂᖏᓐᓂᒃ ᐊᓐᓄᕋᐃᔭᖅᑎᑕᖏᓐᓂᒃ ᕿᓂᕐᓂᐊᕈᑎᒃ ᐃᖕᒥᖕᓂᒃ ᓴᐳᑎᓯᒪᓇᓱᒃᖢᑎᒃ ᐸᓯᔭᒃᓴᐅᓇᔭᕆᐊᒃᓴᖅ ᓱᓕᙱᑦᑐᓄᑦ.

ᑭᓯᐊᓂᓕ ᐅᓂᒃᑳᑦ ᖃᐅᔨᒍᑎᐅᓚᐅᕐᑐᖅ ᐊᑐᖅᑕᐅᕙᖕᓂᐅᔪᖅ ᓂᐱᓕᐅᕆᓂᖅ ᐊᓐᓄᕋᐃᔭᕐᓯᒪᔪᓂᒃ ᕿᓂᕐᓴᖅᑎᓪᓗᒋ ᓱᕋᐅᓯᒪᓇᔭᕐᓂᖓᓂᒃ ᑎᒍᔭᐅᓯᒪᔫᑉ ᐱᔪᓐᓇᐅᑎᖏᓐᓂᒃ ᒪᐅᓇ ᐊᓐᓄᕋᐃᔭᕆᐊᖃᕐᓂᒃᑯᑦ.

ᑲᓯᓴᓐᑯᑦ ᐃᓱᒪᓕᐅᕆᓚᐅᕐᑐᑦ ᐸᓖᓯᒃᑯᑦ ᑐᑭᓯᓇᕐᓂᕐᓴᓂᒃ ᑐᑭᓕᐅᕈᑎᖃᕐᓗᑎᒃ ᑕᕐᕆᔭᐅᓯᐅᕐᓂᐊᕈᑎᒃ, ᑕᒪᒃᑯᐊ ᐸᓖᓯᒃᑯᑦ ᓱᕋᐅᓯᒪᖁᓇᒋᑦ ᐃᓅᑉ ᐱᔪᓐᓇᐅᑎᖓᓂᒃ ᕿᓂᕐᓴᕐᕕᐅᔫᑉ.

Share This Story

(0) Comments

Join the Conversation

Your email address will not be published. Required fields are marked *

*