ᐸᓚᐅᒑᑦ ᐊᒻᒪ ᐸᐅᕐᖓᐃᑦ ᐊᒻᒪᓗ ᐲᓐᔅ, ᐅᐊᖃᐃ

ᐅᕐᓱᒃᓴᖅ ᑯᕆᔅᑯᑦ ᖃᓛᕐᑐᖅ ᐆᓇᕐᑐᒥᒃ ᐆᑦᑎᓯᒥ ᐃᒐᒦᑦᑐᒥ ᐅᓇ ᐃᓐᓇᖅ ᔨᐱ ᓄᓴᓴᒃ ᐊᖏᔪᕈᓗᖕᒥ ᐸᓚᐅᒑᒥ ᐃᖑᓚᕐᓯᑎᓪᓗᒍ ᐆᑦᑎᓯᒧᑦ ᐆᑦᑎᓂᐊᕐᑕᖓᓂᒃ.

ᖃᐅᔨᔪᒪᕖ ᖃᓄᖅ ᓴᓇᖃᑦᑕᕐᒪᖔᑦ ᒪᒪᓗᐊᒃᑲᓐᓂᖅᑐᒥ ᐸᓚᐅᒑᕐᒦ?

ᐊᑐᒃᑲᓐᓂᕐᐸᒡᓗᒍ ᑯᕆᔅᑯ ᐅᕐᓱᒃᓴᖅ ᐆᑦᑎᓯᒦᑦᑐᖅ ᐸᓚᐅᒐᓕᐅᑲᑕᒃᑎᓪᓗᑎ.

“ᐅᓇ ᒪᒪᕈᑎᖓ,” ᓄᓴᓴᒃ ᐃᓱᔾᔪᒃᖢᓂ ᐅᖃᕐᑐᖅ.

ᑕᒪᒃᑯᓂᖓ ᐃᑲᔪᕈᑎᐅᕙᒃᑐᓂᒃ ᖃᐅᔨᑎᑦᑎᑲᑕᓚᐅᕐᑐᖅ ᐅᕙᓂ ᐸᓚᐅᒑᑦ ᐊᒻᒪ ᐃᓚᐅᖃᑕᐅᓂᕐᒥᒃ ᐱᓕᕆᐊᖃᖅᑎᓪᓗᒍᒃ ᐋᑐᕚᒥ ᐅᓇᓗ ᓴᓇᐅᒐᓕᕆᓂᕐᒥ ᐃᒻᒪᓕᓴᕐᓂ ᐱᓕᕆᐊᖃᕐᑐᖅ, ᒥᒃᓱᖅᑎᐅᓪᓗᓂᓗ ᐊᒻᒪ ᑲᒪᔨᐅᓪᓗᓂ ᐊᐅᒐᑦᓈᖅ ᐃᐊᑯᔅ ᐋᖅᑭᒃᓱᖅᑕᖓᓂ ᐅᕘᓇ ᑳᐊᑕᓐ ᓯᓚᑦᑐᖅᓴᕐᕕᐊᓘᑉ ᑎᑎᕋᐅᒐᖃᕐᕕᖓᓂᒃ.

ᑖᒃᑯᐊ ᐱᓕᕆᖃᑎᒌᒃᑐᑦ ᐅᐸᒍᑎᔪᓂᒃ ᐸᓚᐅᒑᓕᐅᕐᑎᑦᑎᓚᐅᕐᑐᑦ ᐊᒻᒪᓗ ᓂᕆᖃᑎᒌᒃᖢᑎᒃ ᐅᕙᓂ ᑳᐊᑕᓐ ᑐᒥᓂᐊᓐ-ᓵᒧᔅ ᐅᐸᒡᕕᒃᒥ ᔫᓂ 29ᒥ ᐋᑐᕚᒥ.

ᐸᓚᐅᒑᖅ ᓂᕆᔭᐅᖃᑦᑕᐃᓐᓇᕐᒪᑦ ᓄᓇᖃᖅᑳᖅᑐᑦ ᓄᓇᓕᖏᓐᓂᒃ, ᐅᖃᕐᑐᖅ ᑖᓂᐅᓪ ᐳᕆᓐᑕᑉ, ᐋᖅᑭᒃᓱᐃᖃᑕᐅᔪᖅ ᖃᓄᐃᓕᐅᕐᓇᒥᒃ, ᐊᒻᒪᓗ ᓴᓇᔭᐅᕙᒃᖢᓂ ᐃᓚᒌᓄᑦ ᐊᒻᒪ ᐳᓛᖅᑐᓄᑦ ᓂᕆᔭᐅᓂᐊᕐᓗᓂ.

ᓄᓴᓴᒃ, ᐅᕙᙶᓚᐅᕐᓯᒪᔪᖅ ᓇᐃᓐ ᓄᓇᑦᓯᐊᕗᑦᒥ, ᐅᐸᒍᑎᔪᓂᒃ ᓴᓇᕙᓪᓕᐊᔭᖓᓂᒃ ᖃᐅᔨᑎᑦᑎᕙᓪᓕᐊᓚᐅᑐᖅ ᐆᒥᖓ ᑭᓇᐅᖅᑐᒃ, ᓄᓇᕕᒃᒥ ᓴᓇᔭᐅᕙᒃᑐᖅ ᐸᓚᐅᒑᖅ ᐆᑕᐅᓪᓗᓂ ᓵᒡᓕᓯᒪᓪᓗᓂ ᐃᒐᐅᑉ ᖄᖓᓂ.

ᐅᓇ ᐸᓚᐅᒑᓕᐊᖓ ᒪᑯᓂᖓ ᐊᑐᕆᐊᖃᓚᐅᕐᑐᖅ ᒪᕐᕉᒃ ᐃᕐᖑᓰᒃ ᐸᓚᐅᒑᖅ ᓴᓇᓯᒪᙱᑦᑐᖅ, ᐊᓘᑎᕐᔪᐊᖅ ᐃᓚᒃᓴᐅᑎ (baking powder) ᐊᒻᒪ ᐊᓘᑎᕋᓛᑉ ᓇᑉᐸᖓᓂ ᑕᕆᐅᕐᒥ ᑎᐱᖃᕈᑎᒋᓂᐊᖅᑕᖓᓂᒃ, ᐊᒻᒪᓗ 1/3 ᐃᕐᖑᓯᖅ ᑯᕆᔅᑯᓪ ᐅᕐᓱᒃᓴᖅ, ᐊᒻᒪᓗ ᐃᕐᖑᓯᐅᑉ ᓇᑉᐸᖓᑕ ᓇᑉᐸᖓᑕ ᐃᒻᒧᒃ ᐊᒻᒪᓗ ᐃᕐᖑᓯᖅ ᐊᑕᐅᓯ ᐃᒪᖅ.

ᐊᓘᑎᕐᔪᐊᕐᒥ ᓱᑲᕐᒥ ᐃᓚᔪᓐᓇᕐᒥᔪᖅ ᓰᕐᓇᖁᒍᔅᓯᐅᒃ, ᓄᓴᓴᒃ ᐅᖃᕐᑐᖅ.

“ᐊᑐᓂ ᑎᓴᒪᓂ ᐊᕕᒃᑐᕐᓯᒪᔪᓃᑦᑐᓂᒃ ᐃᓄᐃᑦ ᓄᓇᖓᓂᒃ ᓇᖕᒥᓂᖅ ᐸᓚᐅᒑᓕᐅᕈᓯᖃᕐᒪᑕ,” ᐅᖃᕐᑐᖅ.

ᐃᓚᖏ ᓄᓇᓖᑦ ᐅᕐᓱᒃᓴᒥ ᐆᑎᖃᑦᑕᕐᒪᑕ ᒥᑭᑦᑑᑎᐅᓪᓗᑎ ᐸᓚᐅᒑ, ᐊᓯᖏᓪᓗ ᐃᒐᐅᑉ ᖄᖓᓂ ᐆᑦᑎᕙᒃᖢᑎᒃ ᐆᑦᑎᓯᒧ. ᐊᒻᒪ ᐸᓚᐅᒑᓕᐊᕆᔭᐅᓛᖑᕙᒃᑐᖅ ᐸᓚᐅᒑᖅ ᐊᒃᖢᓈᑐ ᐋᖅᑭᒃᓯᒪᓪᓗᓂ ᐊᕕᒃᑐᕆᐊᒃᓴᖅ ᐊᔪᕐᓇᙱᓐᓂᕐᓴᐅᓂᐊᕐᒪ ᐃᓄᒋᐊᑦ ᓂᕆᑎᓪᓗᒋᑦ, ᓄᓴᓴᒃ ᐅᖃᓚᐅᕐᑐᖅ.

ᐸᓚᐅᒑᖅ ᓂᕆᔭᐅᔪᓐᓇᕐᒪᑦ ᓰᕐᓇᕐᓗᓂ ᓰᕐᓇᙱᓪᓗᓂᓘᓐᓃᑦ. ᐅᐸᒍᑎᒍᑦ ᐸᓚᐅᒑᖅᑐᖅᑕᖏᓐᓂ ᓂᕈᐊᕈᓐᓇᓚᐅᕐᑐᑦ ᒪᑯᓂᖓ ᐃᖃᓗᖕᓂ, ᑯᕇᒻ ᓰᒡ, ᓯᓕ ᐃᓚᖃᖅᖢᓂ ᓰᓯ ᐊᒻᒪ ᑐᖑᔪᕈᔪᒃᑐᓂᒃ ᐊᓂᐊᓐᔅᓂ, ᑯᐊᓐ ᐊᒻᒪ ᐲᓐᔅ ᐃᓚᒃᓴᕐᒥ ᐊᒻᒪᓗ ᓰᕐᓇᖅᑐᒥ ᒪᑯᓂᖓ ᓯᑐᕌᐱᐅᕆᔅ ᓴᓇᓯᒪᔪᓂᒃ ᕗᐃᑉ ᑯᕇᒻᖃᖅᖢᓂ.

ᓄᓴᓴᒃ ᐸᓚᐅᒑᓂ ᐅᕐᓱᒃᓴᒥ ᖃᓛᖅᑎᓯᒪᔪᒥ ᓴᓇᓯᒪᔪᐃᑦ ᐸᐅᕐᖓᖃᖅᖢᑎᒃ ᒪᒪᕆᓛᖏᑦ.

“ᑎᐱᖃᕐᓂᕐᓴᐅᕙᒃᒪᑦ,” ᐅᖃᕐᑐᖅ ᖁᖓᖢᓂ.

ᐅᐸᒍᑎᖃᑕᐅᓚᐅᕐᑐᖅ ᔫᓕ ᕼᐋᑦᓴᓐ ᐸᓚᐅᒑᖅᑐᕐᓯᒪᔪᖅ ᓄᓇᕗᒧᐊᕌᖓᑦ, ᑭᓯᐊᓂᓕ ᓴᓇᓚᐅᕐᓯᒪᙱᑦᑐᖅ. “ᖁᕕᐊᓇᑦᑎᐊᖅᑐᖅ ᑕᐅᑐᒃᖢᓂ ᓴᓇᔭᐅᑎᓪᓗᒍ,” ᐅᖃᕐᑐᖅ. “ᓴᓇᓇᓱᓛᓕᕋᒪ ᐊᖏᕐᕋᓐᓂ.”

ᕗᕋᑐᕆᒃ ᒋᓄᐊᓪ ᓴᓇᔭᕆᐅᓚᐅᕐᒥᔪᖅ ᐸᓚᐅᒑᕐᒥ ᑕᕝᕙᓂ, ᐅᖃᕐᖢᓂ “ᓴᙱᔪᐊᓘᓂᖓᓂᒃ” ᑭᓯᐊᓂᓕ ᖁᕕᐊᓇᕐᓂᕋᓚᐅᕐᑕᖓ ᓴᓇᓪᓗᒍ.

“ᐃᕐᓂᓐᓄᑦ ᓴᓇᓇᓱᓛᓕᕋᒪ,” ᐅᖃᕐᑐᖅ.