ᐸᓯᔭᒃᓴᐅᔾᔪᑎᖃᙱᓐᓂᕋᐃᔪᑦ ᑲᖏᖅᑐᒑᐱᒃᒥ ᐸᓖᓯᒃᑯᑦ ᖁᑭᖅᓴᓚᐅᖅᓯᒪᓂᖏᓐᓄᑦ, ᐋᑐᕚᒥ ᐸᓖᓯᑦ ᐅᖃᖅᑐᑦ

ᖃᐅᔨᓴᕐᓂᐅᔪᖅ ᐊᕐᕌᓂ ᒪᐃᔭᐅᑉ ᐃᕐᓂᖓ ᐸᓖᓯᓄ ᖁᑭᖅᑕᐅᓪᓗᓂ ᐃᓅᔪᓐᓃᓚᐅᖅᓯᒪᓂᖓᓂᒃ ᐱᐊᓂᒃᑕᐅᕗᖅ

ᐋᑐᕚᒥ ᐸᓖᓯᒃᑯᑦ ᖃᐅᔨᓴᓚᐅᖅᑐᑦ ᐆᒥᖓ ᐸᓖᓯ ᖁᑭᖅᓯᓪᓗᓂ ᑐᖂᑦᑎᓚᐅᖅᓯᒪᓂᖓᓂᒃ ᑲᖏᖅᑐᒑᐱᖕᒥᐅᑕᒥᒃ ᒪᐃ 2020-ᒥᑦ ᐅᖃᓚᐅᖅᑐᑦ ᐸᓖᓯᒃᑯᓐᓂᒃ ᐱᓕᕆᔪᕕᓂᕐᓂᒃ ᐸᓯᔭᒃᓴᐅᙱᓐᓂᕋᐃᓪᓗᑎᒃ. (ᐊᔾᔨᓕᐅᕆᔨ ᑕᔅᑎᓐ ᐸᑖᕐ)

By ᑕᔅᑎᓐ ᐸᑖᕐ

For an English version of this story, see No grounds for charges in Clyde River RCMP shooting, Ottawa police say

ᐋᑐᕚᒥ ᐸᓖᓯᒃᑯᑦ ᖃᐅᔨᓵᓂᒃᑐᑦ ᐅᖃᖅᖢᑎᒃ ᐸᓯᔭᒃᓴᐅᑎᑦᑎᔾᔪᑎᒃᓴᖃᙱᓐᓂᖏᓐᓂᒃ ᑭᓇᑐᐃᓐᓇᖅᒥᒃ ᐆᒧᖓ ᐸᓖᓯᒃᑯᑦ ᖁᑭᖅᓯᓪᓗᑎᒃ ᑐᖂᑦᑎᓚᐅᖅᓯᒪᑎᓪᓗᒋᑦ ᑲᖏᖅᑐᒑᐱᒃᒥᐅᑕᒥᑦ ᐊᖑᑎᒥᒃ ᐊᕐᕌᓂ.

ᒪᐃ 5-ᒥᑦ, ᐸᓖᓯᒃᑯᑦ ᓈᒻᒪᙱᓕᐅᕈᑎᖃᖅᑐᓄᑦ ᐅᐸᒍᑎᓚᐅᖅᓯᒪᖕᒪᑕ ᑕᐃᒪᐃᓐᓂᖓᓄᓪᓗ ᐸᓖᓯᒥᒃ ᖁᑭᖅᓯᔪᖃᖅᖢᓂ ᐄᐳᕋᕼᐊᒻ ᓈᑕᓇᐃᒥ, ᑲᖏᖅᑐᒑᐱᒃᒥᑦ ᒪᐃᔭᐅᕐ ᔨᐅᕆ ᓈᑕᓇᐃ ᐃᕐᓂᖓᓂᒃ.

ᑭᖑᓂᐊᒍᑦ ᑕᐃᒪᐃᓕᐅᓚᐅᖅᑎᓪᓗᒋᑦ, ᓄᓇᕗᒥᑦ ᐸᓖᓯᒃᑯᑦ ᖃᐅᔨᓴᖅᑕᐅᖁᔨᓚᐅᖅᓯᒪᔪᑦ ᐊᓯᐊᒎᖓᔪᓄᑦ ᖃᐅᔨᓴᖅᑎᓄᑦ ᑖᔅᓱᒥᖓ ᖃᓄᐃᓕᒍᑎᐅᓵᖅᑐᒥᓐ.

“ᐱᑕᖃᙱᒻᒪᑦ ᐱᒻᒪᕆᖕᓂ ᐸᓯᔭᒃᓴᐅᒍᑎᐅᓇᔭᖅᑐᓂᒃ ᓇᓕᐊᒃ ᐸᓖᓯ ᓈᒻᒪᙱᓕᐅᕈᑎᖃᕐᓂᖓᓄᑦ ᐃᓅᔪᓃᖅᑐᒧᑦ ᐊᒃᑐᐊᔪᓂᒃ,” ᐅᖃᖅᑐᖅ ᐋᑐᕚᒥᑦ ᐸᓖᓯᒃᑯᑦ ᖃᐅᔨᓴᖅᑎᖏᑦᑕ ᑐᓴᒐᒃᓴᓕᐊᕆᓂᑯᖓ ᐄᐳᕈᓪ 9-ᖑᑎᓪᓗᒍ.

ᐋᑐᕚᒥ ᐸᓖᓯᒃᑯᑦ ᖃᐅᔨᓴᖅᑎᖏᑦ, ᐊᖏᖃᑎᒌᒍᑎᖃᕐᒪᑕ ᓄᓇᕗᒥᑦ ᒐᕙᒪᒃᑯᓐᓂᒃ ᐊᒻᒪᓗ ᓄᓇᕗᒥᑦ ᐸᓖᓯᒃᑯᓐᓂᒃ, ᑎᑭᖁᔭᐅᓚᐅᖅᓯᒪᖕᒪᑕ ᖃᐅᔨᓴᖁᔭᐅᓪᓗᑎᒃ.

ᐃᓚᒋᔭᐅᓪᓗᓂ ᖃᐅᔨᓴᕐᓂᖅᒧᑦ, ᐋᑐᕚᒥ ᐸᓖᓯᒃᑯᑦ ᖃᐅᔨᓴᖅᑎᖏᑦ ᑲᖏᖅᑐᒑᕕᖕᒧᙵᐅᓚᐅᖅᓯᒪᔪᑦ ᐊᒻᒪ ᐊᐱᖅᓱᖅᖢᑎᒃ ᖁᓕᓂᒃ ᐃᓄᖕᓂᒃ ᐊᒻᒪ ᐱᖓᓱᓂᒃ ᐸᓖᓯᓂᒃ ᑕᐅᑐᖕᓂᑯᓂᒃ.

ᖃᐅᔨᓴᓕᓵᕈᑎᖏᑦ ᐱᐊᓂᒃᑕᐅᓚᐅᖅᓯᒪᔪᑦ ᔫᓂᐅᑎᓪᓗᒍ.

ᓄᓇᕗᒥᑦ ᒐᕙᒪᒃᑯᑦ ᐊᒻᒪᓗ ᐸᓖᓯᒃᑯᑦ V ᓴᓇᕝᕕᖕᒦᑦᑐᑦ ᖃᐅᔨᑎᑕᐅᓚᐅᖅᑐᑦ ᖃᐅᔨᓴᖅᑕᐅᓂᖅᒧᑦ ᖃᐅᔨᔾᔪᑎᐅᔪᓂᒃ, ᐅᖃᓚᐅᖅᑐᑦ ᐋᑐᕚᒥ ᐸᓖᓯᒃᑯᑦ ᐱᔨᑦᑎᕋᐅᑎᓕᕆᔨᖏᑦ.

ᐃᒪᐃᕌᓪᓚᓚᐅᖅᖢᑎᒃ “ᐱᓕᕆᐊᒃᓴᖏᓐᓂᒃ ᐱᓕᕆᐊᖃᖅᖢᑎᒃ ᐊᒃᑐᐊᔪᓂᒃ ᐱᕋᔭᒃᑐᓕᕆᓂᖅᒥᒃ ᖃᐅᔨᓴᕐᓂᖅᒧᑦ ᐆᒧᖓ ᑎᒍᓯᓂᕕᓂᕐᒥᒃ,” ᐅᑯᐊ ᐋᑐᕚᒥᑦ ᐸᓖᓯᒃᑯᑦ ᐱᔨᑦᑎᕋᐅᑎᓕᕆᔨᖏᑦ ᐅᖃᓚᐅᖅᑐᑦ ᑕᒪᑐᒧᖓ ᐅᖃᐅᓯᖃᒃᑲᓐᓂᔾᔮᔪᓐᓃᕐᓂᕋᖅᖢᑎᒃ.

ᐅᓇ ᖁᑭᖅᓴᕐᓂᖅ ᐃᓚᒋᔭᐅᔪᖅ 6-ᖑᔪᓂᒃ ᖃᐅᔨᓴᖅᑕᐅᕙᓪᓕᐊᔪᓂᒃ ᓄᓇᕗᑦ ᓯᓚᑖᓂᒃ ᖃᐅᔨᓴᖅᑎᓂᒃ 2020-ᒥᑦ.

ᖃᓄᐃᓕᐅᕈᓘᔭᕐᓇᖅᑐᖃᓚᐅᖅᑎᓪᓗᒍ ᐅᓄᕈᓘᔭᖅᑐᓂᒃ ᐸᓖᓯᒃᑯᑦ ᐃᓚᐅᓪᓗᑎᒃ ᐊᕐᕌᓂ, ᒪᓕᒐᖅ 53, ᒪᓕᒐᖅ ᐋᖅᑭᒋᐊᖅᑎᑦᑎᔾᔪᑎ ᐸᓖᓯᒃᑯᓐᓂᒃ ᐊᖏᖃᑎᒌᒍᑎᓄᑦ ᒪᓕᒐᖅᒥᒃ, ᓴᖅᑭᑕᐅᓚᐅᖅᓯᒪᖕᒪᑦ ᓄᓇᕗᒥᑦ ᒪᓕᒐᓕᕆᔨᖅᔪᐊᑦ ᑲᑎᒪᑎᓪᓗᒋᑦ ᐅᑭᐊᒃᓵᖅ.

ᑖᓐᓇ ᒪᓕᒐᖅ ᐃᓚᒋᐊᖅᑎᑦᑎᔾᔪᑎᐅᓇᔭᖅᑐᖅ ᑕᒪᒃᑯᐊ ᐃᒻᒥᒃᑰᖓᔪᑦ ᖃᐅᔨᓴᖅᑏᑦ ᐸᓖᓯᑦ ᐃᓚᐅᑎᓪᓗᒋᑦ ᖃᓄᐃᓕᐅᕈᑎᓄᑦ ᐃᓄᖕᓂᒃ ᐋᓐᓂᖅᑐᖃᖅᑎᓪᓗᒍ ᐅᕝᕙᓘᓐᓃᑦ ᐃᓅᔪᓐᓃᖅᑐᖃᖅᑎᓪᓗᒍ ᓄᓇᕗᒥᑦ.

ᐅᖃᐅᓯᖃᖅᖢᑎᒃ “ᑭᖑᕙᖅᓯᒪᔪᑦ ᐃᓱᒫᓘᑎᒃᓴᑦ” ᒪᓕᒐᓕᕆᔨᒃᑯᓐᓂᒃ, ᒪᓕᒐᓕᐅᖅᑎᑦ ᓂᕈᐊᓚᐅᖅᑐᑦ ᐅᖓᕙᕆᐊᖅᑕᐅᔪᒪᓪᓗᓂ ᒪᓕᒐᖅᒥᒃ ᕿᒥᕐᕈᐊᖅᓂᐅᔪᖅ ᐅᓪᓗᒃᑲᓐᓂᕐᓂᒃ 120-ᓂᒃ ᐅᕙᓂ ᖃᖓᑦᑎᐊᓵᖅ ᐅᑭᐅᖅ ᑲᑎᒪᓂᕆᓚᐅᖅᑕᖓᓂᒃ ᒪᓕᒐᓕᕆᕕᒡᔪᐊᒥᑦ.

Share This Story

(0) Comments

Join the Conversation

Your email address will not be published. Required fields are marked *

*