ᐸᖕᒥᐅᓗᐊᖃᑦᑕᕐᓂᖅ ᐊᓄᓪᓚᒃᓰᕖᑦ ᑐᕌᖅᑎᑦᑎᖃᑦᑕᖅᐳᖅ ‘ᓈᒻᒪᙱᕐᔪᐊᖅᑐᒥ’ ᖃᓄᐃᓕᖓᓂᐅᔪᓂ ᑭᙵᕐᓂ ᐊᓄᓪᓚᒃᓰᕕᖓᓂ: ᐅᓂᒃᑳᓕᐊᒥ

For English version, see Overcrowded cells led to ‘grossly inadequate’ conditions at Kinngait jail: report

ᓄᑖᖑᔪᒥ ᑲᓇᑕᒥ ᐸᓖᓯᒃᑯᑦ ᓇᐅᑦᑎᖅᓱᖅᑎᐅᔪᒥ ᐅᓂᒃᑳᓕᐊᖑᔪᒥ ᐅᖃᖅᐳᖅ ᑭᙵᕐᓂ ᐸᓖᓯᒃᑯᑦ ᑐᓂᓯᓚᐅᕐᓂᖏᓐᓂ “ᓈᒻᒪᙱᕐᔪᐊᖅᑐᒥ” ᐱᔨᑦᑎᕋᕐᓂᐅᔪᒥ ᑎᒍᓯᓂᕐᓗᒡᔪᐊᕐᓂᐅᔪᒥ ᐊᕐᕌᒍᑦ ᐱᖓᓱᓂ ᐊᓂᒍᖅᓯᒪᓕᖅᑐᓂ ᑐᕌᖅᑎᑦᑎᓚᐅᖅᑐᒥ ᐊᓄᓪᓚᒃᓯᖅᑐᒥ ᐅᑕᖅᑭᔪᒥ ᐃᑲᕐᕋᓂ 16−ᓂ ᐱᓂᕐᒧᑦ ᐋᓐᓂᐊᕕᖕᒥ ᖃᐅᔨᓴᖅᑕᐅᓂᐅᔪᒧᑦ.

ᑕᕐᕆᔭᓕᐊᖑᔪᒥ ᔫᓂ 1, 2020−ᒥ, ᖃᓄᐃᓐᐅᓂᔪᒥ ᑕᑯᒃᓴᐅᑎᑦᑎᔪᒥᒃ ᐊᖑᒻᒥ ᐅᕐᕈᑎᑕᐅᔪᒥ ᐹᖑᔪᒥ ᑲᓇᑕᒥ ᐸᓖᓯᒃᑯᑦ ᓄᓇᓯᐅᑎᖓᓐᓄᑦ ᑎᒍᔭᐅᓇᓱᐊᖅᑎᓪᓗᒍ.

ᐋᑐᕚᒥ ᐸᓖᓯᒃᑯᑦ ᐃᓱᓕᑦᑎᓚᐅᖅᐳᑦ ᑎᓯᐱᕆ 2020−ᒥ ᑎᒍᔭᐅᓂᐅᔪᖅ ᒪᓕᒐᕐᓂ ᒪᓕᑦᑎᐊᕐᓂᖃᓚᐅᖅᐳᖅ. ᑭᓯᐊᓂ ᑲᓇᑕᒥ ᐸᓖᓯᒃᑯᑦ ᐃᓄᑐᐃᓐᓇᕐᓄᑦ ᕿᒥᕐᕈᔭᐅᓂᐅᔪᖅ ᐊᒻᒪ ᐅᖃᐱᓗᖕᓂᐅᔪᓄᑦ ᑭᓪᓕᓯᓂᐊᖅᑏᑦ ᐅᖃᐅᓯᖃᓚᐅᖅᐳᑦ ᓇᖕᒥᓂᖅ ᖃᐅᔨᓴᕐᓂᕆᓂᐊᖅᑕᖓᓂ ᐋᒍᔅᑎ 2020−ᒥ.

ᐊᕐᕌᒍᑦ ᐱᖓᓱᑦ ᐊᓂᒍᖅᑎᓪᓗᒍ, ᑕᐃᓐᓇ ᐅᓂᒃᑳᓕᐊᖅ ᓇᓂᓯᓂᖃᖅᐳᖅ 22-ᓂ-ᐅᑭᐅᓕᒃ ᐊᖑᓐ, ᓇᓗᓇᐃᖅᑕᐅᑐᐃᓐᓇᕐᓂᖓᓂ A.B.−ᒥ, ᐋᓐᓂᐊᕕᓕᐊᕈᔾᔭᐅᓚᐅᙱᓚᖅ ᐃᑲᕐᕗᑦ 16−ᓄᑦ.

ᐊᖑᑎ ᐋᓐᓂᖅᓯᕆᓚᐅᖅᑐᒥ ᐊᓄᓪᓚᒃᓯᖅᑎᓪᓗᒍ, ᓇᓗᓇᐃᖅᑕᐅᓯᒪᔪᖅ J.J.−ᒥ, ᐸᐸᒧᑦ−ᑎᖕᒥᑳᕐᕕᐅᓚᐅᖅᐳᖅ ᓯᕗᓂᐊᓂ ᐸᓖᓯᒃᑯᓐᓄᑦ ᐊᓄᓪᓚᒃᓰᕕᖕᒧᐊᖅᑕᐅᓚᐅᖅᑎᓐᓇᒍ. ᐊᓄᓪᓚᒃᓰᕕᐅᑉ ᐅᐊᓴᕐᕕᖓ ᐃᒪᖃᓚᐅᙱᒻᒪᑦ, ᑕᐃᒫᒃ ᐊᖑᑦ ᐊᑐᓚᐅᖅᐳᖅ ᖁᕐᕕᐅᑉ ᐃᒪᖓᓐᓂ ᐃᔨᒥᓂᒃ ᐃᕐᕈᖅᑐᐃᓂᕐᒧᑦ.

ᐅᑯᐊ ᐃᓚᐃᓐᓇᖏᑦ 36−ᖑᔪᓂ ᐅᓂᒃᑳᓕᐅᖅᑕᐅᔪᒥ ᓇᓂᔭᐅᓂᖏᓐᓂ ᖃᓄᐃᓐᓂᐅᔪᒧᑦ, ᐃᓚᖃᖅᑐᒥ ᐃᑲᔪᕈᑎᒃᓴᖃᙱᓗᐊᕐᓂᖏᓐᓄᑦ ᐸᓖᒥᒃᑯᓐᓂ ᐱᔾᔪᑕᐅᓚᐅᖅᐳᖅ “ᑕᒪᒃᑭᓂ ᐃᓱᒪᒋᔭᐅᓂᐅᔪᓂ” ᖃᓄᐃᓕᐅᓚᐅᕐᓂᖓᓂ ᐊᖑᒻᒧᑦ ᑕᐃᑲᓂ ᐅᓐᓄᖓᓂ, ᓴᖅᑭᑎᑦᑎᓪᓗᓂ ᐃᓱᒫᓘᑕᐅᔪᓂ “ᐱᑕᖃᑐᐃᓐᓇᕆᐊᖃᕐᓂᖓᓂ ᐱᓕᕆᔾᔪᓯᐅᔪᓂ ᐊᔾᔨᒌᙱᑎᑦᑎᓂᐅᔪᒥ.”

ᑕᓪᓕᒪᓂ ᑭᙵᕐᓂ ᑲᓇᑕᒥ ᐸᓖᓯᒃᑯᓐᓂ ᐱᓚᐅᖅᐳᑦ 37−ᓂ ᐅᖃᓗᖕᓂᐅᔪᓂ ᔫᓂ 1, 2020−ᒥ.

ᐸᓖᓯᒃᑯᑦ ᑎᓴᒪᓂ ᐊᓄᓪᓚᒃᓰᕕᖃᖅᐳᑦ, ᑭᓯᐊᓂ 15−ᓂ ᐃᓄᖕᓂ ᑎᒍᔭᐅᔪᖃᓚᐅᖅᐳᖅ. ᐅᓇ ᑐᕌᖅᑎᑦᑎᓚᐅᖅᐳᖅ ᖃᔅᓯᒐᓚᖕᓂ ᐃᓄᖕᓂ ᐃᓕᔭᐅᓂᖏᓐᓂ ᐊᑕᐅᓯᕐᒥ ᐊᓄᓪᓚᒃᓰᕕᐅᔪᒥ, ᐊᓯᖏᑦ ᑎᒍᔭᐅᓯᒪᓪᓗᑎᒃ ᐊᐱᖅᓱᕐᕕᐅᔪᒥ ᐃᒡᓗᕈᓯᕐᒥ ᐊᒻᒪ ᐊᑕᐅᓯᖅ ᐃᓕᔭᐅᓪᓗᓂ ᑲᓇᑕᒥ ᐸᓖᓯᒃᑯᑦ ᓄᓇᓯᐅᑎᖓᑕ ᐃᓗᐊᓂ ᑐᓄᐊᓄᑦ.

ᐱᔭᒃᓴᖃᓗᐊᖅᑐᓂ ᐃᖅᑲᓇᐃᔭᖅᑎᓂ, ᐊᓄᓪᓚᒃᓰᕕᑭᒃᓴᓗᐊᕐᓂᖏᓐᓂ, ᐱᓕᕆᔾᔪᑎᓂ ᐊᒻᒪ ᐱᓕᒻᒪᒃᓴᓂᑭᓗᐊᖅᑐᓂ ᐸᓖᓯᒃᑯᓐᓄᑦ ᓇᐅᑦᑎᖅᓱᖅᑎᐅᔪᓂ ᑕᒪᒃᑭᑦ ᐃᑲᔪᕐᓂᖃᓚᐅᖅᐳᖅ A.B.−ᒥ ᐃᓕᔭᐅᓂᖓᓂ ᐅᓄᕆᐊᓇᖅᑐᒥ ᖃᓄᐃᓕᖓᓂᐅᔪᒧᑦ ᐱᑎᑦᑎᓚᐅᖅᑐᒥ ᐋᓐᓂᖅᓯᖅᑕᐅᓂᖓᓂ ᐊᒻᒪ ᐃᑲᔪᕐᓂᖃᓚᐅᖅᐳᖅ ᑐᓂᓯᙱᓐᓂᕐᒥ ᐱᓪᓚᕆᐅᔪᓂ ᑐᓴᖅᑕᐅᔪᒃᓴᓂ ᐋᓐᓂᐊᕕᓕᐊᕆᐊᖃᕐᓂᖓᓂ, ᐅᓂᒃᑳᓕᐊᖅ ᐃᓱᓕᑦᑎᓚᐅᖅᐳᖅ.

“ᐃᓚᖏᓐᓂ ᐱᓕᕆᑦᑎᐊᙱᓐᓂᖃᓚᐅᖅᑎᓪᓗᒍ ᐃᒻᒥᒃᑰᖅᑐᓂ ᑲᓇᑕᒥ ᐸᓖᓯᒃᑯᑦ ᐃᓚᒋᔭᐅᔪᓄᑦ, ᐊᒻᒪᓗᑦᑕᐅᖅ ᐃᓚᖏᓐᓂ ᐃᓚᑰᓂᐅᔪᓂ ᐱᓕᒻᒪᒃᓴᐃᓂᕐᒥ, ᑲᒪᒋᔭᖃᕐᓂᕐᒥ, ᐊᒻᒪ ᒪᓕᑦᑎᐊᕐᓂᖏᓐᓂ ᐊᑐᐊᒐᐅᔪᓄᑦ, ᑭᓪᓕᓯᓂᐊᖅᑏᑦ ᑕᑯᓚᐅᖅᐳᑦ, ᑕᒪᒃᑭᒐᓚᖕᒥ, ᑲᓇᑕᒥ ᐸᓖᓯᒃᑯᑦ ᐃᓚᒋᔭᐅᔪᑦ ᐊᒃᓱᕈᕐᓂᖃᕐᔪᐊᓚᐅᖅᐳᑦ ᐊᐅᓚᑦᑎᓇᓱᐊᕐᓂᖏᓐᓂ ᐊᔪᕐᓇᑲᓴᑦᑎᐊᖅᑐᒥ ᐱᓕᕆᐊᒃᓴᐅᔪᓄᑦ ᐃᓗᐊᓂ ᐊᓄᓪᓚᒃᓯᖅᑐᓄᑦ ᓴᖅᑭᑎᑦᑎᓚᐅᖅᑐᒥ ᐊᑦᑕᓇᖅᑐᓂ ᖃᓄᐃᓕᖓᓂᐅᔪᓄᑦ,” ᐅᓂᒃᑳᓕᐊᖅ ᐅᖃᖅᓯᒪᕗᖅ.

ᑭᓪᓕᓯᓂᐊᖅᑎᒃᑯᑦ ᐊᑐᐃᓐᓇᖃᖅᑎᑦᑎᓚᐅᖅᐳᑦ 20−ᓂ ᐊᑐᓕᖁᔭᐅᓇᔭᖅᑐᓂ ᐅᓂᒃᑳᓕᐊᖓᓂ.

“ᖁᒃᓴᓪᓚᕐᔪᐊᙱᓚᒍᑦ ᐃᓚᖏᓐᓂ ᓇᓂᔭᐅᓂᐅᔪᓂ,” ᐅᖃᓚᐅᖅᐳᖅ ᓄᓇᕗᒻᒥ ᑲᓇᑕᒥ ᐸᓖᓯᒃᑯᑦ ᐊᖓᔪᖅᑳᕐᔪᐊᖓ ᐋᓐᑐᕉ ᐸᓛᑲᑕᐅᕐ, ᐅᖃᖃᑎᖃᖅᖢᓂ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ ᐋᒍᔅᑎ 10−ᒥ.

ᑭᓪᓕᓯᓂᐊᖅᑎᒃᑯᑦ ᓴᖅᑭᑎᑦᑎᓚᐅᖅᐳᑦ ᕿᓚᒻᒥᐅᔪᒥ ᐅᓂᒃᑳᓕᐊᖑᔪᒥ ᐊᕐᕌᓂᐅᓚᐅᖅᑐᒥ, ᑕᐃᒫᒃ ᑲᓇᑕᒥ ᐸᓖᓯᒃᑯᑦ “ᖃᐅᔨᒪᕙᒌᐸᓗᓚᐅᖅᐳᑦ ᑭᓱᓂ ᑎᑭᑉᐸᓪᓕᐊᓂᐊᖅᑐᓂ” ᐊᒻᒪ ᐱᒋᐊᓕᓚᐅᖅᐳᑦ ᐊᑐᓕᖅᑎᑦᑎᓂᕐᒥ ᑕᒪᒃᑭᒐᓚᖕᓂ ᐊᑐᓕᖁᔭᐅᓂᐅᔪᓂ, ᐸᓛᑲᑕᐅᕐ ᐅᖃᓚᐅᖅᐳᖅ.

ᑕᒪᓐᓇ ᐃᓚᖃᖅᐳᖅ ᓄᑖᖑᔪᒥ ᐸᓖᓯᒃᑯᑦ ᐃᒡᓗᖁᑎᖓᓐᓂ ᐃᓚᖃᕐᓂᐊᖅᑐᒥ 8-ᓂ ᐊᓄᓪᓚᒃᓰᕕᖃᖅᑐᒥ, ᒪᕐᕈᐃᓪᓗᐊᖅᑐᒥ ᒫᓐᓇᐅᔪᒥ ᐃᒡᓗᕐᔪᐊᑦ ᐱᔪᓐᓇᕐᓂᕆᔭᖓᓂ. ᐱᓕᕆᐊᒃᓴᐅᔪᖅ ᑎᑎᕋᐅᔭᖅᑕᐅᓂᖓᓂ ᐱᓕᕆᓂᖓᓃᑉᐳᖅ ᐊᒻᒪ ᓄᓇᓕᖕᓂ ᐅᖃᖃᑎᖃᕐᓂᐅᔪᓂ ᐱᓕᕆᐊᖑᓂᐊᖅᐳᖅ ᑕᒪᑐᒪᓂ ᐅᑭᐅᖑᔪᒥ, ᐸᓛᑲᑕᐅᕐ ᐅᖃᓚᐅᖅᐳᖅ.

ᐸᓖᓯᖏᑦ ᒫᓐᓇᐅᔪᒥ ᐱᔪᓐᓇᖅᑎᑦᑎᓯᒪᕗᑦ ᓴᖅᑭᑎᑕᐅᓂᐅᔪᒥ 7−ᖑᔪᓂ ᐸᓖᓯᖃᕐᓂᖏᓐᓂ, ᖁᕝᕙᕆᐊᖅᑐᒥ ᑕᓪᓕᒪᓂ 2020−ᒥ.

ᐸᓛᑲᑕᐅᕐ ᐅᖃᓚᐅᖅᐳᖅ ᐊᓯᖏᓐᓂ “ᐃᓚᑰᓂᐅᔪᓂ” ᐸᓖᓯᒃᑯᑦ ᑕᐃᔅᓱᒪᓂ ᐅᓐᓄᖓᓂ ᐋᖅᑭᒃᑕᐅᓯᒪᓕᖅᐳᑦ. ᐸᓖᓯᒃᑯᑦ ᒫᓐᓇ ᐃᕐᕈᖅᑐᐃᕝᕕᖕᒥ ᐊᑐᐃᓐᓇᖃᓕᖅᐳᖅ ᐊᒻᒪ ᑯᕕᔪᓐᓇᖅᑐᒥ ᐃᒪᕐᒥ ᐊᓄᓪᓚᒃᓰᕕᖕᒥ ᓯᕗᓂᐊᓂ ᓱᕋᖅᓯᒪᔪᒥ ᐊᐅᓴᕐᕕᖃᓚᐅᖅᑐᒥ, ᐅᖃᓚᐅᖅᐳᖅ.

“ᐅᑭᐅᖅᑕᖅᑐᖅ ᐸᓖᓯᓕᕆᓂᕐᒥ ᓇᓗᓇᒐᓚᒃᐳᖅ, ᐊᑐᐃᓐᓇᖃᙱᓐᓇᑦᑕ ᐱᓕᕆᐊᖃᓪᓚᕆᒃᑐᓂ ᐃᖅᑲᓇᐃᔮᓂ ᐃᓄᖃᖅᑕᖃᓗᐊᙱᒻᒪᑦ ᑕᐃᒪᓐᓇᑎᒍᑦ ᐱᔪᓐᓇᕐᓂᖅᓴᐅᑎᓪᓗᒋᑦ ᖃᓪᓗᓈᑦ ᓄᓇᖓᓐᓂ ᐅᕝᕙᓘᓐᓃᑦ ᐱᓕᕆᔾᔪᑕᐅᔪᓂ ᐋᖅᑭᒃᓯᓂᕐᒥ ᑭᓱᑐᐃᓐᓇᕐᓂ,” ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᐸᓖᓯᐅᔪᑦ ᐃᒻᒥᓂᒃ ᓴᓗᒻᒪᖅᓴᐃᕙᒃᐳᑦ ᐊᒻᒪ ᐋᖅᑭᒃᓱᐃᓪᓗᑎᒃ ᓱᕋᒃᓯᒪᔪᓂ ᐸᓖᓯᒃᑯᑦ ᐃᒡᓗᖁᑎᖓᓐᓂ.

ᐸᓛᑲᑕᐅᕐ ᐅᖃᓚᐅᖅᐳᖅ ᑲᓇᑕᒥ ᐸᓖᓯᒃᑯᑦ ᐊᑐᓕᖅᑎᑦᑎᓯᒪᒋᕗᑦ ᓄᑖᖑᔪᒥ ᐱᓕᒻᒪᒃᓴᐃᓂᐅᔪᒥ ᐸᓖᓯᐅᔪᓄᑦ ᖃᓄᖅ ᑲᒪᒋᔭᖃᕐᓂᕐᒥ ᐊᓄᓪᓚᒃᓯᖅᑐᓂ ᐸᐸᒧᑦ−ᑎᖕᒥᑳᖅᑕᐅᓯᒪᔪᓄᑦ, “ᐱᓗᐊᖅᑐᒥ ᐸᓖᓯᕗᑦ ᐃᓚᐅᖃᑕᐅᓚᐅᖅᑐᓂ ᖃᓄᐃᓐᓂᐅᔪᒥ ᑕᐃ[ᓱᒪᓂ ᔫᓂ 2020−ᒥ.”

“ᑐᓂᔭᐅᓯᒪᕗᒍᑦ ᐊᐅᓚᑦᑎᓂᕐᒧᑦ ᒪᓕᒋᐊᓕᖕᓂ ᐊᒻᒪ ᓄᑖᙳᕆᐊᖅᑎᑦᑎᓯᒪᕗᒍᑦ ᐊᑐᐊᒐᕐᒥ ᐱᔾᔪᑎᖃᖅᑐᒥ ᖃᐅᔨᓴᖅᐸᖕᓂᕐᒥ ᐊᓄᓪᓚᒃᓯᖅᑐᓄᑦ,” ᐅᖃᓚᐅᖅᐳᖅ, ᐃᓚᖃᖅᑐᒥ ᐱᒻᒪᕆᐅᓂᐅᔪᒥ ᑲᒪᒋᔭᖃᕐᓂᕐᒥ ᐊᓄᓪᓚᒃᓯᖅᑐᓂ ᐸᐸᒧᑦ ᑎᖕᒥᑳᕐᕕᐅᓯᒪᔪᓄᑦ.

ᐸᓛᑲᑕᐅᕐ ᐅᖃᓚᐅᖅᐳᖅ ᓄᓇᕗᒻᒥ ᑲᓇᑕᒥ ᐸᓖᓯᒃᑯᑦ ᕿᓂᕆᕗᑦ ᐃᓐᓄᒃᓯᓂᕐᒥ ᐃᓂᒃᓴᐅᔪᓂ ᓄᓇᖃᖅᑳᖅᓯᒪᔪᓄᑦ ᐸᓖᓯᖃᕐᓂᕐᒥ ᐱᓕᕆᐊᖑᔪᒥ ᑎᑭᑉᐸᓪᓕᐊᔪᓂ ᐊᕐᕌᒎᔪᓂ.

“ᐃᓱᒪᕗᖓ ᕿᒥᕐᕈᔭᕆᐊᖃᕐᓂᑦᑎᓐᓂ ᐊᔾᔨᒌᙱᑦᑐᓂ ᐱᓕᕆᓂᐅᔪᓂ ᐅᐸᒃᑐᕐᓂᕐᒥ ᓄᓇᓕᖕᓂ ᐊᒻᒪ ᐱᕋᔭᙳᖅᑎᑦᑎᔭᕆᐊᖃᙱᓚᒍᑦ ᐊᔪᖅᓯᓯᒪᔪᓄᑦ ᐊᑐᖅᑕᐅᓗᐊᖃᑦᑕᕐᓂᖏᓐᓂ, ᐱᕋᔭᙳᖅᑎᑦᑎᔭᕆᐊᖃᙱᓚᒍᑦ ᐃᓱᒪᒧᑦ ᐋᓐᓂᐊᖃᕐᓇᕐᓂᕐᒥ ᐊᑲᐅᙱᓕᐅᕈᑕᐅᔪᓂ. ᑭᒃᑯᓕᒫᑦ ᐊᓐᓄᓪᓚᒃᓯᕆᐊᖃᙱᓚᑦ,” ᐸᓛᑲᑕᐅᕐ ᐅᖃᓚᐅᖅᐳᖅ.

“ᐃᓱᒪᕗᖓ ᕿᒥᕐᕈᔭᕆᐊᖃᕐᓂᑦᑎᓐᓂ ᐊᓯᐊᒎᖅᑐᓂ ᐱᓕᕆᓂᐅᔪᓂ ᐱᓕᕆᖃᑎᖃᕐᓂᕐᒥ ᓄᓇᓕᖕᓂ ᐊᒻᒪ ᐊᓯᖏᓐᓂ ᐱᔨᑦᑎᕋᕐᓂᐅᔪᓂ ᑐᓂᓯᔨᐅᔪᓂ ᓇᓂᓯᓂᕐᒧᑦ ᐊᓯᖏᓐᓂ ᐱᓕᕆᓂᐅᔪᓂ ᐃᑲᔪᕐᓂᕐᒧᑦ ᓄᓇᓕᐅᔪᓂ ᐱᔪᓐᓃᖅᐸᓪᓕᐊᓂᖏᓐᓂ ᐊᑯᓂᐅᔪᒥ.”