ᐹᕕᓐᓛᓐᑯᑦ ᐊᖏᔪᒻᒪᕆᐊᓗᒃ ᓄᓇᓯᐅᑎᑯᑖᓅᖓᓂᐊᖅᑐᓂᒃ ᐅᓯᔪᖅ ᐃᓱᒫᓘᑎᒋᔭᐅᓕᕐᐳᖅ ᒥᑦᑎᒪᑕᓕᖕᒥᐅᓂᒃ
“ᐹᕕᓐᓛᓐᑯᖃᐃ ᐃᓱᒪᖕᒪᑕ ᖃᐅᔨᙱᑎᓪᓗᑕ ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏ ᒐᕙᒪᒃᑯᓐᓘᓐᓃᑦ ᓯᕗᓂᐊᒍᑦ ᐊᖏᖅᑕᐅᓂᐊᕆᐊᒃᓴᖓᓂ ᐱᓕᕆᐊᒃᓴᖅ?”
ᐅᓯᑲᖅᑕᖅᑎᐅᔪᖅ ᐅᒥᐊᕐᔪᐊᖅ ᐱᒡᓕᕝᑦ ᐳᕋᓐᔅ (Biglift Barentsz) ᑭᓴᕐᓯᒪᔪᖅ ᐳᕇᒧ ᕼᐄᕙᓐᒥ, ᔪᒪᓂ ᐊᕐᕌᓂ ᐊᐅᔭᐅᑎᓪᓗᒍ. ᐅᓯᖃᕐᕕᐊᓂ ᑕᑯᔪᓐᓇᖅᑐᓯ ᒪᕐᕉᖕᓂ ᓴᓇᑐᐃᓐᓇᕆᐊᓕᖕᓂ ᐃᒡᓗᒃᓴᓂᒃ, 33 ᐊᒻᒪ 34 ᒦᑕᔅ ᖁᑦᑎᖕᓂᖃᖅᖢᑎᒃ, ᐅᑯᐊ ᐹᕕᓐᓛᓐ ᓴᕕᕋᔭᒃᓴᒧᑦ ᐅᔭᕋᒃᓯᐅᕐᕕᒃᑯᑦ ᐱᓂᑯᖓᑦ ᐅᑯᓇᙵᑦ ᑕᐃᓴᓐᑯᕋᑉ ᐊᒻᒪ ᐅᓯᔭᐅᓪᓗᓂ ᓄᓘᔮᖕᓄᑦ ᐅᔭᕋᒃᓯᐅᕐᕕᒃᒧᑦ ᐊᐅᔭᖅ. ᒪᕐᕉᒃ ᒥᑭᓐᓂᕐᓵᒃ ᐃᒡᓘᒃ ᐅᓯᔭᐅᒋᕘᒃ ᓯᕗᓂᕐᐸᓯᐊᓂᒃ. ᐅᑯᐊ ᐊᑐᖅᑕᐅᓂᐊᕐᑐᑦ ᑖᒃᑯᐊ ᓄᓇᓯᐅᑎᑯᑖᒧᑦ ᐊᖅᑯᑎᒥ ᐊᖏᒡᓕᒋᐊᖅᑎᑦᑎᓂᕐᒧᑦ, ᑖᓐᓇᓕ ᓱᓕ ᐊᖏᖅᑕᐅᓯᒪᙱᑦᑐᖅ ᐱᖁᔭᓕᕆᔾᔨᓂᒃ. (ᐊᔾᔨᙳᐊᖅ ᐅᑯᓇᙵᑦ ᑕᐃᓴᓐᑯᕋᑉ)
For an English version of this story, see Baffinland’s massive railway-based sealift raises concerns in Pond Inlet
ᐃᓱᒫᓗᑎᖃᖅᑐᓪᓕ ᐆᒥᖓ, ᐹᕕᓐᓛᓐᑯᑦ ᓄᓇᓯᐅᑎᑯᑖᒥ ᐊᖏᒡᓕᒋᐊᖅᑎᑦᑎᔪᒪᓂᖏᓐᓄᑦ ᐆᒥᖓ ᐱᓕᕆᓂᖅ 2-ᒥ ᐸᕐᓇᐅᑎᓂ, ᑕᒪᒃᑯᓄᖓᓗ ᐱᔪᓐᓇᖅᑎᑦᑎᔨᐅᔪᓂᒃ ᓱᓕ ᐊᖏᖅᑕᐅᓚᐅᙱᑎᓪᓗᒋᑦ, ᐹᕕᓐᓛᓐᑯᑦ ᒪᕐᕉᖕᓂ ᐊᖏᔪᐊᓘᖕᓂ ᖁᓕᓂᒃ ᓇᑎᓕᖕᓂᑦ ᐃᒡᓗᒃᓴᓂ ᐋᖅᑭᒃᓱᑐᐃᓐᓇᕆᐊᓖᖕᓂ ᑎᑭᑎᑦᑎᓚᐅᕐᒪᑕ ᐳᕇᒧᕼᐃᕙᓐ, ᔪᒪᓂᒥ, ᑖᒃᑯᐊ ᑲᒻᐸᓂᐅᔪᑦ ᑐᓚᒃᑕᕐᕕᖓᓄᑦ ᓄᓘᔮᑦ ᕿᙳᐊᓄᑦ ᕿᑭᖅᑖᓘᑉ ᐅᐊᖕᓇᖅᐸᓯᐊᓂ ᐊᐅᔭᐅᓚᐅᕐᑐᖅ.
ᑎᑭᑎᑦᑎᓚᐅᕐᒥᔪᑦ ᒪᕐᕉᖕᓂ ᒥᑭᓐᓂᕐᓵᖏᓂ ᐃᒡᓗᒃᓴᓂ ᓴᓇᑐᐃᓐᓇᕆᐊᓕᖕᓂ ᐊᒻᒪᓗ ᐊᖏᔪᐊᓗᖕᓂ ᓄᓇᓯᐅᑎᑯᑖᒧᑦ ᐊᑐᖅᑕᐅᓇᔭᖅᑐᑦ ᓴᓇᓕᕈᑎᒃ, ᒪᑯᑎᑐᓇᖅ ᐊᖅᑯᑎᒃᓴᖏᓐᓂᒃ ᐊᒻᒪ ᓄᓇᒧᑦ ᐸᐅᒃᑐᕈᑎᒃᓴᓂᒃ ᓴᕕᕋᔭᖕᓂ.
ᐹᕕᓐᓛᓐᑯᑦ, ᓄᕕᐱᕆ 2018-ᒥᑦ ᐅᖃᕐᓯᒪᓕᓚᐅᕐᓯᒪᖕᒪᑕ ᐱᔪᓐᓇᐅᑎᓕᕆᔨᐅᔪᓄᑦ ᐊᒻᒪ ᐱᓕᕆᖃᑎᖏᓄᑦ ᐅᕙᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄ ᑎᑭᑎᑦᑎᓛᕐᓂᖏᓐᓂᒃ, ᒪᑯᑎᒎᓇᖅ ᑎᑎᕋᖅᓯᒪᔭᖏᑦᑎᒍ ᐅᑯᑎᒎᓇᖅ ᑭᒃᑯᓕᒫᓄᑦ ᐊᑎᓕᐅᕐᕕᐅᔪᑎᒍᑦ ᐅᑯᓄᖓ ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᓄᑦ ᐊᒻᒪᓗ ᓄᓇᕗᒥᑦ ᐃᒪᓕᕆᔨᒃᑯᑦ ᑲᑎᒪᔨᓄᑦ.
ᑭᓯᐊᓂᓕ ᐃᓄᐃᑦ ᒥᑦᑎᒪᑕᓕᒃᒥᑦ ᑕᒪᑐᒥᖓ ᖃᐅᔨᓕᑕᐃᓐᓇᖅᑐᑦ.
“ᖃᐅᔨᓕᑕᐃᓐᓇᓚᐅᕐᑐᒍ ᐱᓇᓱᐊᕈᓯᖅᑲᐃ ᐱᖓᓲᓕᕐᑐᑦ ᑎᓴᒪᓪᓗᑭᐊᖅ. ᑕᑯᖃᑦᑕᕋᑦᑕ ᐱᖁᑎᓂ ᐅᓯᔪᓂ ᒥᑦᑎᒪᑕᓕᐅᑉ ᖃᓂᒋᔭᖓᒎᖅᑐᓂᒃ,” ᔮᓱᐊ ᐋᕆᐊᒃ, ᐊᐅᓚᑦᑎᔨ ᒥᑦᑎᒪᑕᓕᒃᒥᑦ ᐊᖑᓇᓱᒃᑎᓕᕆᔨᓄᑦ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.
“ᐃᓱᒪᖃᑦᑕᓚᐅᕐᑐᒍᑦ ᖃᓄᐃᒻᒪ ᐊᒻᒪ ᑭᒃᑰᖕᒪᖔᑕ ᐊᒻᒪ ᖃᓄᐊᓗ ᑕᐃᒪᐃᓕᐅᕆᐊᒃᓴᖏᓐᓂᒃ. ᑐᑭᓯᒋᐊᖅᑎᑕᐅᓚᐅᙱᑦᑎᐊᕋᑦᑕ ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓂᒃ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓂᒃ ᑭᒃᑯᑐᐃᓐᓇᕐᓂᓪᓘᓐᓃ. ᑕᒪᓐᓇ ᓂᕆᐅᒋᓚᐅᙱᑦᑎᐊᖅᑕᕗᑦ,” ᐋᕆᐊᒃ ᐅᖃᖅᑐᖅ.
“ᑐᓴᖅᑎᑕᐅᓚᐅᙱᓐᓇᑦᑕ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓂᒃ ᐅᕝᕙᓘᓐᓃᑦ ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓂ. ᖃᐅᔨᒪᙱᑦᑐᖓ. ᐃᓄᐃᑦ ᑲᑐᔾᔨᖃᑎᒌᖏᑦᑎᒍᑦ ᓈᒻᒪᙱᓕᐅᕈᑎᖃᕋᑦᑕ. ᐅᕙᑦᑎᓐᓂ ᑐᓴᐅᒪᑎᑦᑎᑲᑕᙱᒻᒪᑕ,” ᐅᑲᖅᑐᖅ.
ᐅᓇ ᐅᒥᐊᕐᔪᐊᖅ ᐱᒡᓕᕝᑦ ᐳᕋᓐᔅ ᑎᑭᓕᕐᑎᓪᓗᒍ ᐹᕕᓐᓛᓐ ᑐᓚᒡᕕᐊᓄᑦ ᐅᕙᓂ ᓄᓘᔮᑦ ᕿᙳᐊᓄ ᐋᒐᓯᐅᕋᑖᓚᐅᕐᑐᒥ ᐅᓯᓪᓗᑎᒃ ᐋᖅᑭᒃᓱᑐᐃᓐᓇᕆᐊᓕᖕᓂ ᐃᒡᓗᒃᓴᓂ ᐊᑐᖅᑕᐅᓂᐊᖅᑐᓂᒃ ᓄᓇᓯᐅᑎᑯᑖᒥ ᐊᖏᒡᓕᒋᐊᖅᑎᑦᑎᓂᕐᒧ. ᐃᓄᐃᑦ ᒥᑦᑎᒪᑕᓕᒥ ᑕᑯᒐᒥᒃ ᐅᒥᐊᕐᔪᐊᒥ ᓄᓇᖓᑦᑕ ᖃᓂᒋᔭᖓᒎᕐᑐᒥ ᑐᓴᕆᐅᓚᕐᑐᑦ ᐅᓯᑲᖅᑕᕐᓂᐊᖅᑐᒥ. ᒪᕐᕈᒃᑲᓐᓃᒃ ᐅᒥᐊᕐᔪᐊᒃ ᐅᓯᓪᓗᑎᒃ ᓄᓇᓯᐅᑎᑯᑖᒧᑦ ᐊᖅᑯᑎᒃᓴᒧᑦ ᐃᓚᒃᓴᓂ ᑭᖑᓂᑦᑎᐊᖓᓂ ᑎᑭᓚᐅᕐᒥᔫ ᐊᒻᒪᓗ ᐅᓄᒃᑲᓐᓂᕐᑐᓂᒃ ᐅᒥᐊᕐᔪᐊᒃᑰᖅᑐᒃᓴᓂ ᓂᕆᐅᒃᑐᑦ 2020 ᐊᐅᔭᖓᓂ.
ᓄᓇᕗᒥᑦ ᐊᕙᑎᓕᕆᔨᒃᑯᑦ ᐅᒥᐊᕐᔪᐊᒃᑰᖅᑐᒃᓴᒥ ᖃᐅᔨᒪᓚᐅᕐᑐᑦ ᐅᑭᐅᖅ
ᓇᓕᐊᑐᐃᓐᓇᖅ ᓄᓇᕗᒥᑦ ᐱᔪᓐᓇᐅᑎᓕᕆᔨ ᐊᒻᒪ ᓇᓕᐊᑐᐃᓐᓇᖅ ᒐᕙᒪᑐᖃᒃᑯᑦ ᒥᓂᔅᑕᖓ ᐊᖏᓚᐅᙱᑦᑐᑦ ᐹᕕᓐᓛᓐ ᐊᖏᒡᓕᒋᐊᖅᑎᑦᑎᓂᕐᒧᑦ ᐸᕐᓇᐅᑎᖏᓐᓂᒃ, ᐃᒪᐃᓕᖓᓕᕈᑎᓐᓇᔭᖅᖢᓂ 110 ᑭᓛᒥᑕᓂ ᑕᑭᓂᓕᖕᒥ ᓄᓇᓯᐅᑎᑯᑖᒧᑦ ᐊᖅᑯᑎᓕᐅᕐᓗᑎᒃ ᓄᓘᔮᑦ ᕿᙳᐊᓂᑦ ᓄᓘᔮᖕᓄᑦ, ᓴᕕᕋᔭᒃᓴᒥᑦ ᓴᖅᑭᑎᑦᑎᒃᑲᓐᓂᓕᕐᓗᑎᒃ 12 ᒥᓕᐊᓐ ᑕᓐᔅᑲᓐᓂᕐᓂᒃ ᐊᕐᕌᒍᒥ, ᐊᒻᒪᓗ ᐃᖏᕐᕋᕙᒡᓗᑎᒃ ᒪᐅᖓ 200-ᖏᕐᓱᕐᓗᑎᒃ ᐊᕐᕌᒍᒥ ᐅᓯᑲᖅᑕᕐᐸᒡᓗᑎᒃ ᓴᕕᕋᔭᒃᓴᓂᒃ.
ᐅᓇ ᐱᓕᕆᐊᒃᓴᖅ ᐋᖏᖅᑕᐅᕌᓂᒻᒪᕆᒍᓐᓇᙱᑦᑐᖅ ᒐᕙᒪᑐᖃᒃᑯᓐᓄᑦ ᑭᓯᐊᓂ ᑭᖑᓪᓕᖅᐹᒥᑦ ᑭᒃᑯᓕᒫᓂ ᑐᓴᖅᑎᑦᑎᓂᖃᓚᐅᖅᑎᓪᓗᒋᑦ ᐅᑯᐊ ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐋᖅᑭᒃᓯᓯᒪᓕᖅᑕᖓᓂ ᓄᕕᐱᕆ 2-ᒥ ᐃᖃᓗᖕᓂ ᐊᒻᒪ ᐱᐊᓂᒍᑎᖃᕐᓗᑎᒃ ᓄᕕᐱᕆ 8 ᐊᒻᒪ 9-ᒥ ᒥᑦᑎᒪᑕᓕᒃᒥᑦ.
ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ, ᐅᖃᐅᓯᒃᓴᓂ ᖃᐅᔨᓇᓱᓚᐅᙱᑦᑐᑦ ᑕᒪᑐᒥᖓ ᑎᒍᒥᐊᖅᑎᓄᑦ,
ᐅᖃᓚᐅᕐᑐᑦ ᐅᒥᐊᕐᔪᐊᒃᑯᑦ ᑎᑭᑎᑦᑎᓛᕐᓂᖏᓐᓂᒃ ᓄᓇᓯᐅᑎᑯᑖᒧᑦ ᐊᑐᖅᑕᐅᓂᐊᖅᑐᓂᒃ ᑎᑎᖃᑎᒍᑦ ᐹᕕᓐᓛᓐᒧᑦ ᐊᐅᓪᓚᖅᑎᑕᐅᓂᑯᓂᒃ ᔪᓚᐃ 25-ᖑᓚᐅᕐᑐᒥᑦ.
ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏ ᐅᖃᐅᔾᔨᓚᐅᕐᑐᑦ ᑲᒻᐸᓂᐅᔪᓂ ᐅᓇ ᐱᓕᕆᓂᖅ 2 ᐊᖏᖅᑕᐅᙱᑉᐸᑦ, ᐹᕕᓐᓛᓐᑯᑦ ᑲᒪᒋᔭᖃᕆᐊᖃᕋᔭᕐᓂᖏᓐᓂᒃ ᐱᖁᑎᑦ ᐊᐅᓪᓚᖅᑎᑕᐅᓂᖏᓐᓂᒃ, ᐊᑭᖃᓪᓗᐊᖅᑐᒃᓴᐅᔪᑦ ᐊᒥᓱᓂᒃ ᒥᓕᐊᓐ ᑖᓚᓂᒃ, ᑕᕝᕙᙵᑦ ᐅᔭᕋᒃᓴᖅᓯᐅᕐᕕᒃᒥᑦ.
ᐅᖃᓚᐅᕐᒥᔪᑦ ᐅᒥᐊᕐᔪᐊᒃᑯᑦ ᑎᑭᑎᑦᑎᓂᖏᑦ ᐊᒃᑐᐃᒍᑎᖃᔾᔮᙱᓐᓂᖏᓐᓂᒃ ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐃᓱᒪᓕᐅᕆᑎᓪᓗᒋᑦ ᑖᔅᓱᒥᖓ.
ᖃᕋᓴᐅᔭᒃᑯᑦ ᑎᑎᕋᖅᑕᐅᔪᕕᓂᕐᓂ ᐅᒃᑑᐱᕆ 17-ᒥ, ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᐊᐅᓚᑦᑎᔨ ᑐᑭᒧᐊᖅᑎᑦᑎᔨ, ᐅᕋᐃᐊᓐ ᐱᐅᕆ, ᓇᓗᓇᐃᕐᓯᓚᐅᕐᑐᖅ ᒪᓕᒐᖅᑎᒍᑦ ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐊᖏᕈᓐᓇᕐᓂᖏᓐᓂᒃ ᐊᖏᕈᓐᓇᙱᓐᓂᖏᓐᓂᒡᓘᓐᓃᑦ ᐅᒥᐊᕐᔪᐊᓄᑦ ᖃᓄᐃᓕᐅᕈᑎᐅᔪᓂᒃ.
“ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐃᒪᐃᓕᑐᐃᓐᓇᕈᓐᓇᓕᓚᐅᕐᒪᑕ ᑕᒪᒃᑯᐊ ᖃᓄᐃᓕᐅᕈᑎᐅᔪᑦ ᐃᓚᐅᑎᑕᐅᓂᐊᕐᓗᑎᒃ ᖃᐅᔨᓴᖅᐸᓪᓕᐊᓂᐅᔪᓄᑦ ᐊᒻᒪᓗ ᑕᒪᐃᓐᓂ ᐱᖁᑎᑦ ᓴᓇᓂᐊᕐᓂᕐᒧᑦ ᓅᑕᐅᔭᕆᐊᖃᕋᔭᕐᓂᖏᓐᓂᒃ ᑖᓐᓇ ᑐᒃᓯᕋᐅᑎᐅᔪᖅ ᐊᖏᖅᑕᐅᙱᒃᑯᓂ ᑲᑎᒪᔩᑦ ᖃᐅᔨᓵᓪᓚᓚᐅᕐᑎᓪᓗᒋᑦ,” ᐱᐅᕆ ᑎᑎᕋᓚᐅᕐᑐᖅ.
ᐃᓚᖓᑦ ᐃᒡᓗᒃᓴᖅ, ᐅᖃᐅᓯᐅᓯᒪᔪᖅ “ᓱᕋᒃᑎᕆᓂᕐᒧᑦ ᐃᒡᓗᒃᓴᖅ,” 33-ᒦᑕᓂᒃ ᖁᑦᑎᖕᓂᖃᖅᑐᖅ, 23.5 ᒦᑕᓂᒃ ᓯᓕᖕᓂᖃᖅᖢᓂ ᐊᒻᒪ ᐅᖁᒪᐃᓐᓂᖃᖅᖢᓂ 1,470 ᑕᓐᔅᓂᒃ. ᐊᓯᒃᑲᓐᓂᖓᓕ, ᐅᖃᐅᓯᐅᓯᒪᔪᖅ “ᓱᕈᐃᔭᕐᕕᒃ ᐃᒡᓗ,” 34 ᒦᑕᓂᒃ ᖁᑦᑎᖕᓂᖃᖅᖢᓂ.
ᑕᐃᒪᓕ ᐊᑐᓂ ᐃᒡᓘᒃ, ᐃᓚᒋᔭᐅᔪᑦ ᓴᓇᕙᒌᕐᓯᒪᔪᓂᒃ ᓱᕋᒃᑎᕆᕝᕕᒃᒥᑦ ᐊᒻᒪ ᓱᕈᐃᔭᕐᕕᒃᒥᑦ, ᓇᓕᒧᖃᓪᓗᐊᖅᑑᒃ ᖁᓕᓂᒃ ᓇᑎᓕᖕᒥ ᐃᒡᓗᕐᔪᐊᒥᑦ—ᐃᒻᒪᖄᓪᓘᓐᓃᑦ ᖁᑦᑎᖕᓂᕐᓴᐅᓪᓗᑎᒃ ᐃᒡᓗᓕᐊᖑᓯᒪᔪᓂᒃ ᐅᑭᐅᕐᑕᖅᑑᑉ ᑲᓇᖕᓇᖓᓂᒃ.
ᑭᓯᐊᓂᓕ ᐹᕕᓐᓛᓐ ᐊᖏᖅᑕᐅᓯᒪᙱᑦᑐᑦ ᓱᓕ ᑖᒃᑯᓂᖓ ᐊᑐᕈᓐᓇᕐᓯᓂᖏᓐᓂᒃ.
“ᐹᕕᓐᓛᓐ ᑕᒪᒃᑯᓂᖓ ᐱᖁᑎᓂᒃ ᓇᓗᓇᐃᕐᓯᓂᐊᕐᑐᑦ ‘ᐱᓕᕆᓂᖅ 2-ᒧᑦ ᑭᓯᐊᓂ—ᐊᑐᙱᓪᓗᒋᑦ’ ᑭᓯᐊᓂ ᐅᓇ ᐱᓕᕆᓂᖅ 2-ᒥ ᑐᒃᓯᕋᐅᑎᓂᒃ ᐃᓱᒪᒃᓴᖅᓯᐅᕈᑎᖃᕐᓂᖅ ᐃᓱᓕᑕᐅᑦᑎᐊᖅᐸᑦ,” ᑲᒻᐸᓂᒃᑯᑦ ᑎᑎᕋᓚᐅᕐᓯᒪᔪᑦ ᔪᓚᐃ 19-ᒥ ᐅᓂᒃᑳᓕᐊᖏᑦᑎᒍᑦ ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ.
ᐱᖁᑎᒃᓴᑦ ᐃᓂᖃᖅᑎᑕᐅᔪᑦ ᐃᓄᐃᑦ ᓇᖕᒥᓂᖅ ᓄᓇᖓᓂᒃ
ᑲᑐᔾᔨᓪᓗᑎᒃ ᑐᓐᓂᖁᑎᕕᓂᖏᓐᓂᒃ ᐱᔪᓐᓇᐅᑎᑖᖅᑎᑦᑎᔨᓄᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪ ᐹᕕᓐᓛ ᑎᑎᕋᓚᐅᕐᓯᒪᔪᑦ ᐱᖁᑏᑦ ᐃᓂᖃᖅᑎᑕᐅᓂᐊᕐᓂᖏᓐᓂᒃ ᐃᓄᐃᑦ ᓇᖕᒥᓂᖅ ᓄᓇᖓᓂᒃ, ᒪᓕᒃᖢᑎᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᑮᓇᐅᔭᓕᐅᕋᓱᖕᓂᕐᒧᑦ ᐊᑐᖅᑐᐊᕈᑎᓄᑦ ᐊᖏᕈᑎᖏᓐᓂᒃ ᑲᒻᐸᓂᒃᑯᓐᓄᑦ.
ᐋᕆᐊᒃᒧᓪᓕ ᐊᓯᖏᓐᓄᓪᓗ, ᖃᓄᐃᓕᐅᕐᓂᖅ ᓲᕐᓗ ᐃᓱᒪᓇᖅᑐᖅ ᐹᕕᓐᓛᓐᑯᑦ ᐊᖏᖅᑕᐅᓯᒪᕇᕆᐊᒃᓴᖏᓐᓂᒃ ᐱᓕᕆᐊᒃᓴᒧᑦ.
“ᒥᑦᑎᒪᑕᓕᒃᒥᐅᑕᑦ ᖁᕕᐊᓱᙱᒻᒪᑕ. ᐹᕕᓐᓛᓐ “ᐹᕕᓐᓛᓐᑯᖃᐃ ᐃᓱᒪᖕᒪᑕ ᖃᐅᔨᙱᑎᓪᓗᑕ ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏ ᒐᕙᒪᒃᑯᓐᓘᓐᓃᑦ ᓯᕗᓂᐊᒍᑦ ᐊᖏᖅᑕᐅᓂᐊᕆᐊᒃᓴᖓᓂ ᐱᓕᕆᐊᒃᓴᖅ? ᖃᐅᔨᒪᙱᑦᑐᖓ,” ᐅᖃᖅᑐᖅ.
ᕈᕌᖕᒃ ᑎᐊᔅᑐ, ᐱᓕᕆᔾᔪᑎᓕᕆᓂᕐᒧᑦ ᖃᐅᔨᒪᔨᒋᔭᐅᔪᖅ ᒥᑦᑎᒪᑕᓕᒃᒥᑦ ᕼᐋᒻᒪᓚᒃᑯᓐᓂ, ᐊᖏᖅᑕᐅᓚᐅᕐᒪᑦ ᒥᑦᑎᒪᑕᓕᐅᑉ ᒪᐃᔭᖓᓄᑦ, ᔫᓱᐊ ᓴᑦᓴᒃᒧᑦ, ᐅᖃᓪᓚᒍᓐᓇᖅᑎᑕᐅᓪᓗᓂ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᑭᒡᒐᖅᑐᐃᓪᓗᓂ ᕼᐋᒻᒪᓚᒃᑯᓐᓂ.
“ᐹᕕᓐᓛᓐ ᐱᓕᕆᓯᒪᖕᒪᑕ ᐃᓱᒪᒋᔭᖃᖅᖢᑎ ᐊᖏᖅᑕᐅᓂᐊᕆᐊᒃᓴᖏᓐᓂᒃ ᐱᓕᕆᓂᖅ 2-ᒥ,” ᑎᐊᔅᑐ ᐅᖃᓚᐅᕐᑐᖅ ᖃᕋᓴᐅᔭᒃᑯᑦ ᑎᑎᖃᑎᒍᑦ.
“ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐱᔪᓐᓇᕐᓂᖃᓚᐅᕈᑎᒡᓘᓐᓃᑦ ᑕᒪᑐᒧᖓ, ᑭᖑᓪᓕᕐᐹᕐᓕ ᐊᒃᑐᐃᒍᑎᐅᓇᔭᕐᑐ ᐃᓱᒪᑎᑦᑎᓂᕐᒥ ᐊᒃᓱᕈᖅᑎᑦᑎᒃᑲᓐᓂᕈᑎᐅᓇᓱᖕᓂᖓ ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᒪᐅᓇ ᑲᒪᒋᔭᖃᖅᑎᐅᓂᒃᑯᑦ ᐊᒻᒪ ᐊᖏᕆᐊᖃᓕᕐᓗᑎᒃ ᑐᒃᓯᕋᐅᑎᓂᒃ. ᑕᒪᓐᓇᓕ ᐃᓱᒫᓗᖕᓇᖅᑐᖅ,” ᑎᐊᔅᑐ ᐅᖃᓚᐅᕐᑐᖅ ᕼᐋᒻᒪᓚᒃᑯᓐᓂᑦ ᑭᒡᒐᖅᑐᐃᓪᓗᓂ.
“ᖃᓄᐃᓕᐅᕈᑎᐅᔪᑦ ᓴᓂᐊᒍᓪᓕ, ᕼᐋᒻᒪᓚᒃᑯᑦ ᐃᓱᒪᓕᕐᒪᑕ ᑕᐃᒪᐃᓕᐅᕆᐊᖃᓚᐅᙱᓐᓂᖏᓐᓂᒃ. ᐅᓇᓕ ᑕᐃᒪᐃᓕᐅᕈᑎᐅᓯᒪᔪᖅ ᑮᓇᐅᔭᓕᕆᓂᒃᑯᑦ ᐊᒻᒪ ᐃᓱᒪᓂᖏᓐᓂ ᐹᕕᓐᓛᓐᑯᑦ ᐊᖏᖅᑕᐅᓂᐊᕆᐊᒃᓴᖏᓐᓂᒃ ᐱᓕᕆᓂᖅ 2-ᒥ,” ᑎᑎᕋᕐᒥᔪᖅ.
ᐅᓇ ᖃᖓᑕᔪᒥ ᐊᔾᔨᓕᐅᕐᓯᒪᔪᖅ ᐱᒡᓕᕝᑦ ᐳᕋᓐᔅ. ᐊᐅᔭᐅᕋᑖᕐᑐᖅ ᐅᒥᐊᕐᔪᐊᖅ ᐅᓯᓚᐅᕐᑐᖅ ᐋᖅᑭᒃᓱᑐᐃᓐᓇᕆᐊᓕᖕᓂ ᐃᒡᓗᒃᓴᓂ ᓄᓘᔮᑦ ᕿᙳᐊᓄᑦ ᐊᑐᖅᑕᐅᓂᐊᖅᑐᓂᒃ ᐹᕕᓐᓛᓐ ᓄᓇᓯᐅᑎᑯᑖᒧᑦ ᐊᖏᒡᓕᒋᐊᖅᑎᑦᑎᓂᕐᒧᑦ.
“ᐃᓱᒫᓘᑎᒋᓗᐊᕐᑕᕗᓪᓕ ᓂᕐᔪᑏᑦ, ᐃᒪᕐᒥᐅᑕ ᓂᕐᔪᑏᑦ ᐊᒻᒪ ᐅᐸᒃᓯᒪᕙᒃᑕᖏᑦ. ᐊᒃᑐᖅᑕᐅᓛᖑᓯᒪᓇᔭᕋᑦᑕ ᓄᓇᑦᑎᓐᓂ. ᑕᒪᓐᓇ ᐃᓱᒫᓘᑎᕗᑦ. ᑮᓇᐅᔭᐃᑦ ᐅᑎᖅᑎᑦᑎᔾᔮᙱᒻᒪᑕ ᓂᕐᔪᑎᓂᒃ,” ᔮᓱᐊ ᐋᕆᐊᒃ ᐅᖃᓚᐅᕐᑐᖅ ᑭᒡᒐᖅᑐᐃᓪᓗᓂ ᐊᖑᓇᓱᒃᑎᓕᕆᔨᓂᒃ, ᐅᖃᖅᖢᓂ ᐅᖃᐅᓯᐅᖃᑦᑕᐃᓐᓇᕐᓯᒪᔪᒥ ᒥᑦᑎᒪᑕᓕᖕᒥ ᐊᕐᕌᒍᒐᓴᐅᓕᖅᑐᓂᒃ ᐱᔾᔪᑎᒋᓪᓗᒍ ᐃᒪᒃᑯᑦ ᐃᖏᕐᕋᖃᑦᑕᖅᑐᓕᕆᓂᖅ ᐅᑯᓄᖓ ᐹᕕᓐᓛᓐ ᐸᕐᓇᐅᑎᖏᓐᓂᒃ.
ᒪᑯᓄᖓᓕ ᒐᕙᒪᓕᕆᓂᒃᑰᙱᑦᑐᓄᑦ ᑲᑐᔾᔨᖃᑎᒌᓄᑦ ᐆᑐᓇᖅ ᑕᕆᐅᕐᔪᐊᓕᕆᔨᒃᑯᑦ ᐅᑭᐅᕐᑕᖅᑐᒥ (Oceans North), ᐅᖃᕈᓐᓇᕐᕕᖃᕈᒪᓯᒪᔪᑦ ᑲᑎᒪᑎᑦᑎᓂᐅᓂᐊᕐᑐᒥᑦ ᐹᕕᓐᓛᓐ ᐊᖏᒡᓕᒋᐊᖅᑎᑦᑎᓂᕐᒧᑦ ᐸᕐᓇᐅᑎᖏᓐᓂᒃ, ᐅᖃᓚᐅᕐᑐᑦ ᐃᑲᔪᖅᑐᐃᓂᕋᐃᓪᓗᑎᒃ “ᑲᒪᒋᔭᖃᑦᑎᐊᕐᓂᒃᑯᑦ ᐱᕙᓪᓕᐊᓂᕐᒥᑦ” ᐅᕙᓂ ᓄᓘᔮᖕᓂ ᐅᔭᕋᒃᓯᐅᕐᕕᒃᒥᑦ.
ᑭᓯᐊᓂᓕ ᐅᖃᓚᐅᕐᒥᔪᑦ ᐹᕕᓐᓛᓐᑯᑦ ᐊᐅᓪᓚᖅᑎᑦᑎᖃᑦᑕᕐᓂᖏ ᐊᖏᓗᐊᕐᑐᒥᑦ ᓱᒃᑲᔪᒃᑯ ᐃᓱᒪᒋᔭᖄᓂᒃᕐᓯᒪᙱᖢᑎᒃ ᐊᕙᑎᒋᔭᒧᑦ ᐊᒃᑐᐃᒍᑎᐅᓇᔭᖅᑐᓂᒃ, ᐊᒻᒪ ᓈᒻᒪᒃᓴᖅᓯᒪᙱᖢᑎᒃ ᐹᕕᓐᓛᓐᑯᑦ ᐃᓱᒪᓕᐊᖓᓂᑦ ᐊᖏᔫᑎᓂᒃ ᓴᕕᕋᔭᒃᓴᓂᒃ ᐊᐅᓪᓚᖅᑎᑦᑎᖃᑦᑕᕈᒪᓂᖏᓐᓂᒃ ᓄᓘᔮᑦ ᕿᙳᐊᓂᑦ ᐅᕙᙵᐅᙶᙱᑦᑐᖅ ᐃᒃᐱᑭᑦᑐᖅᔪᐊᕐᒥᑦ ᓂᒋᐊᓃᑦᑐᒥ, ᑖᓐᓇᓗ ᑕᐃᒪᐃᑦᑐᓐᓇᖅᑎᑕᐅᓕᕐᓂᑰᓪᓗᑎᒃ 2012-ᒥᑦ.
“ᑲᒪᓇᙱᓚᕐᓕ ᓄᓇᖃᖅᑐᑦ ᓈᒻᒪᒃᓴᙱᓐᓂᖏᓐᓂᒃ ᐊᖏᔪᐊᓗᖕᓂ ᑎᑭᑎᑦᑎᑲᑕᒃᑐᓂᒃ ᓄᓇᓯᐅᑎᑯᑖᒧᑦ ᐃᓚᒃᓴᓂᒃ ᓄᓘᔮᑦ ᕿᙳᐊᓄᑦ ᓯᕗᓂᐊᒍᑦ ᐱᖁᔭᓕᕆᓂᒃᑯᑦ ᐊᖏᖅᑕᐅᓚᐅᖅᑎᓐᓴᒍ ᐅᓇ ᐊᖏᒡᓕᒋᐊᖅᑎᑦᑎᓂᖅ,” ᐅᖃᖅᑐᖅ ᑯᕆᔅ ᑎᐱᑭ, ᐊᖓᔪᖅᑳᑉ ᑐᒡᓕᖓ ᐊᑐᐊᒐᓕᕆᓂᕐᒧᑦ ᐊᒻᒪ ᒪᓕᒐᓕᕆᓂᒃᑯᑦ ᐱᓕᕆᔨᐅᓪᓗᓂ ᑕᕆᐅᕐᔪᐊᓕᕆᔨᒃᑯᑦ ᐅᑭᐅᕐᑕᖅᑐᒧᑦ.
ᓴᓇᓯᒪᕙᒌᖅᑐᑦ ᐱᓕᕆᔾᔪᑎᒃᓴᑦ ᐱᔭᐅᓂᑯ ᑕᐃᓴᓐᑯᕋᑉᒥᑦ
ᐅᑯᐊ ᐱᖁᑎᑦ ᑎᑭᑎᑕᐅᑲᑕᒃᑐᑦ ᓄᓘᔮᑦ ᕿᙳᐊᓄᑦ ᐃᓚᒋᔭᐅᔪᑦ ᓴᓇᓯᒪᕙᒌᖅᑐᓂᒃ ᓄᓇᓯᐅᑎᑯᑖᓄᑦ ᐃᓚᒃᓴᐅᓇᔭᖅᑐᓂᒃ ᐅᑯᐊ ᐹᕕᓐᓛᓐᑯᑦ ᐱᑖᕆᓂᑯᖏᑦ ᑕᐃᓴᓐᑯᕋᑉ ᐊᔾᔨᒌᙱᑦᑐᓄᑦ ᐱᑖᕐᕕᐅᕙᒃᑐᒥ ᔪᒪᓂᒥ.
ᒪᕐᕉᒃ ᐊᖏᔪᐊᓘᒃ ᐃᒡᓘᒃ, ᓯᕗᓪᓕᐅᓪᓗᑎᒃ ᑎᑭᓐᓂᑰᒃ, ᐋᖅᑭᒃᓱᖅᑕᐅᓚᐅᕐᓯᒪᔪᑦ ᐳᕆᒧᕼᐊᐃᕙᓐᒥ, ᑖᓐᓇᓕ ᐱᖓᔪᖓᑦ ᓴᓇᓯᒪᔪᖅ, ᓄᓇᓯᐅᑎᑯᑖᓄᑦ ᐅᓯᓕᖅᓱᐃᕝᕕᐅᓂᐊᖅᖢᓂ, ᐋᖅᑭᒃᓱᖅᑕᐅᓂᑯ ᓯᑎᐊᑦᑎᓐ, ᐴᓚᓐᒥ, ᑕᐃᓴᑯᕋᑉᑯᑦ ᑐᓴᒐᒃᓴᓕᐊᑎᒍᑦ ᐅᖃᓚᐅᕐᑐᑦ.
ᐹᕕᓐᓛᓐᑯᑦ ᐊᒻᒪ ᑎᑭᑎᑦᑎᓚᐅᕐᒥᔪᑦ ᐅᒥᐊᕐᔪᐊᒧᑦ ᐅᓯᓕᕐᓱᐃᒍᑎᒥᓐ, ᕿᓗᐊᕈᑎ ᐃᖏᕐᕋᕙᓪᓕᐊᒍᑎᒥᑦ ᐊᒻᒪ ᐊᒥᓱᕈᓘᔭᕐᓂᒃ ᐱᖁᑎᓂᒃ ᐊᑐᖅᑕᐅᓂᐊᖅᑐᓂᒃ ᓄᓇᓯᐅᑎᑯᑖᒧᑦ ᐃᖏᕐᕋᔾᔪᑎᒃᓴᓄᑦ.
ᐱᖁᑎᓂᒃ ᓇᓗᓇᐃᔭᕐᓯᒪᔪᑦ ᐹᕕᓐᓛᓐᑯ ᑐᓂᓂᑯᖏᓐᓂᒃ ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᐊᒻᒪ ᓄᓇᕗᒥᑦ ᐃᒪᓕᕆᔨᒃᑯᑦ ᑲᑎᒪᔨᖏᓐᓄᑦ ᐃᓚᖃᓚᐅᕐᑐᑦ ᓄᓇᓯᐅᑎᑯᑖᒧᑦ ᐊᒃᑕᑕᖃᑦᑕᐅᑎᒍᑎᒃᓴᓂᒃ ᐊᒻᒪ ᐊᖅᑯᑎᓕᐊᕆᔭᒃᓴᓂᒃ, ᐊᒻᒪᓗ ᐸᐅᒃᑑᑎᒃᓴᓂᒃ ᓴᕕᕋᔭᖕᓂ ᐊᒻᒪ ᐊᑦᑕᑕᐅᑎᒍᑎᓂᒃ.
ᑕᐃᓴᓐᑯᕋᑉᑯᑦ ᓯᕗᓪᓕᖅᐹᖅ ᐊᐅᓪᓚᖅᑎᓚᐅᕐᑕᖓᑦ ᐹᕕᓐᓛᓐᑯᓐᓄ, ᐅᒥᐊᕐᔪᐊᖅ ᑕᐃᔭᐅᔪᖅ BigLift Barentsz, ᐅᖁᒪᐃᓐᓂᖃᓚᐅᕐᑐᖅ 5,500 ᑕᓐᔅᓂᒃ ᐱᖁᑎᓂᒃ, ᐊᒻᒪ ᐊᐅᓪᓚᖅᖢᓂ ᐳᕆᒧᕼᐊᐃᕙᓐᒥᑦ ᐋᒐᓯ ᐱᒋᐊᓕᓵᖅᑎᓪᓗᒍ.
ᒪᕐᕈᒃᑲᓐᓃᒃ ᐅᓯᑲᖅᑕᕈᑏᒃ ᐅᒥᐊᕐᔪᐊᒃ ᐅᓯᓚᐅᕐᒥᔪᑦ ᐱᖁᑎᒃᓴᒃᑲᓐᓂᕐᓂᒃ ᐊᐅᔭᐅᕋᑖᖅᑐᖅ, ᐊᒻᒪ ᐊᒥᓱᒃᑲᓐᓂᕐᓂᒃ ᑎᑭᑦᑐᖃᕐᓂᐊᖅᖢᓂ 2020 ᐊᐅᔭᖓᓂᒃ, ᑕᐃᓴᑯᕋᑉ ᐅᖃᓚᐅᕐᑐᑦ.
ᐱᓕᕆᖃᑎᒌᖕᓂᒃᑯᑦ ᐊᖏᕈᑎᑎᒍᑦ ᐅᑯᓄᖓ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ, ᐹᕕᓐᓛᓐ ᐊᖏᓚᐅᕐᑐᑦ ᐃᓕᓯᒃᑲᓐᓂᕐᓂᐊᕐᓂᕋᖅᖢᑎᒃ 18 ᒥᓕᐊᓐᑖᓚᓂ ᐅᑎᖅᑎᐅᕋᐃᓂᕐᒧᑦ ᐊᑐᖅᑐᒃᓴᐅᓇᔭᖅᑐᓂ ᓴᓗᒻᒪᕐᓴᐃᓕᕈᑎᒃ ᓄᓘᔮᖕᓂ ᐅᔭᕋᒃᓯᐅᕐᕕᒃᒥᑦ ᑖᓐᓇ ᐱᓕᕆᓂᐅᔪᖅ ᓄᖅᑲᕐᓂᕈᓂ, ᐃᒪᓕᕆᔨᒃᑯᑦ ᑲᑎᒪᔨᖏᑦᑕ ᑎᑎᖃᖁᑎᖏᑦ ᐅᖃᕐᓯᒪᓚᐅᕐᑐᑦ.
ᖃᑉᓗᓈᑎᑑᖓᔪᒥᒃ ᐊᑎᕐᒥᒃ ᐊᑐᖅᑕᕐᒪᑕ ᐅᔭᕋᒃᑕᕆᐊᑦ. ᐃᓄᐃᑦ ᓄᓇᖓᓐᓃᑎᓗᒋᑦ ᐃᓄᐃᑦ ᐊᑎᖏᓂᒃ ᐊᑐᖅᑕᖅᐸᑕ ᐱᐅᓂᖅᓴᐅᓇᔭᖏᓚᖅ?
ᐆᒃᑑᑎᒋᓗᒍ ᖃᒪᓂ’ᑐᐊᕐᒥ ᐅᔭᕋᒃᑕᕆᐊᑦ ᖃᑉᓗᓈᑎᑐᑦ ᐊᑎᖃᕐᒪᑦ ᒥᑐᐸᐃᖕᒃ ᑭᓯᐊᓂ ᐃᓄᒃᑎᑐᑦ ᐅᖃᐅᓯᐅᔭᕋᖓᒥ ᐊᐳᖅᑎᓐᓈᖅᑐᒥᒃ ᑕᐃᔭᐅᕙᒃᑐᖅ.
ᓲᕐᓗᑉᑕᐅᖅ ᐹᕕᓐᓛᓐᑯᑦ ᐃᓄᐃᑦ ᓄᓇᖓᓃᓐᒪᑕ ᐃᓄᒃᑎᑐᑦ ᐊᑎᖃᖅᑐᒃᓴᐅᒐᓗᐊᕆᕗᖅ. ᐃᓄᒃᑎᑐᑦ ᑕᐃᒎᓯᐊ ᐊᑐᖅᑕᐅᑦᑕᕐᓗᓂ.