ᐹᕕᓐᓛᓐᑯ ᑲᑎᒪᑎᑦᑎᔾᔪᑎᖓᑦ ᓄᖃᑳᓪᓚᒃᐳᖅ, ᑲᑎᖃᑎᒌᖕᓂᕐᓴᖅ ᒥᑦᑎᒪᑕᓕᖕᒥᑦ ᓄᖃᖅᑎᑕᐅᓪᓗᓂ

ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦᑕ ᑲᑎᒪᔾᔪᑎᖓᑦ ᐹᕕᓐᓛᓐ ᓴᕕᕋᔭᒃᓴᒥᑦ ᐅᔭᕋᒃᓯᐅᕐᕕᐅᑉ ᑐᒃᓯᕋᐅᑎᖓᓂ ᐊᖏᒡᓕᒋᐊᖅᑎᑦᑎᔪᒪᓂᕐᒥᒃ ᓄᓘᔮᖕᓂ ᐅᔭᕋᒃᓯᐅᕐᕕᒃᒥᑦ ᓄᖃᑳᓪᓚᓚᐅᕐᒪᑦ, ᐅᓪᓘᖕᓂ ᒪᕐᕉᖕᓂ ᑲᑎᒪᓂᐅᒃᑲᓐᓂᐊᖅᑐᑦ ᒥᑦᑎᒪᑕᓕᖕᒥᑦ ᓄᖃᖅᑎᑕᐅᓪᓗᑎᒃ.

ᐱᖓᑦᓯᖅ, ᓄᕕᐱᕆ 6-ᒥᑦ, ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓᑦ ᐊᓗᑭ ᑰᑦᑎᖅ ᐱᖁᔨᕗᖔᓕᐅᕈᑎᓕᐅᓚᐅᕐᑐᖅ ᒫᓐᓇᑲᐅᑎᒋ ᓄᖃᖅᑎᑦᑎᖁᔨᓪᓗᓂ ᐆᒥᖓ ᑭᖑᓪᓕᖅᐹᒥᑦ ᑭᒃᑯᓕᒫᓂᑦ ᑲᑎᒪᓂᕐᒥᒃ ᐊᒻᒪᓗ ᑕᒪᓐᓇ ᑲᑎᒪᓂᖅ ᑲᔪᓯᓂᐊᕐᓗᓂ ᑕᕿᓂᒃ 8-ᓂ ᐊᕐᕌᒍᒧᑦ.

ᓂᐱᑭᑦᑐᓂᒃ ᐅᖃᓪᓚᒃᑐᓂ ᑐᓴᕈᓘᔭᕐᓇᓚᐅᕐᑐᖅ ᐅᖃᕈᒪᒋᐊᖅᑐᕐᓯᒪᔪᑦ ᐱᓕᕆᖃᑎᖏᓐᓄᑦ ᕿᕕᐊᑐᐃᓐᓇᖅᖢᑎᒃ. ᐃᓚᒋᔭᐅᔪᑦ ᕿᕕᐊᖄᑎᒋᓪᓗᑎᒃ ᐹᕕᓐᓛᓐᑯᑦ ᑖᔅᓱᒥᖓ ᖃᓄᐃᓕᓂᐊᕆᐊᒃᓴᖏᓐᓂᒃ ᖃᓄᐃᒍᑎᐅᔪᒧᑦ.

ᐹᕕᓐᓛᓐᑯᑦ ᐱᓕᕆᔨᒻᒪᕆᖏᑦ ᑮᓇᖏᒍᑦ ᓄᖃᑦᑎᐊᓚᐅᕐᑐᑦ, ᐃᓛᓐᓂ ᑕᓕᖏᓐᓂᒃ ᐊᐅᓚᔾᔭᒃᑎᑦᑎᕙᒃᖢᑎᒃ ᐊᒻᒪ ᑭᐳᒧᑦ ᓵᙵᑐᐃᓐᓇᖅᖢᑎᒃ ᑖᓐᓇ ᑰᑦᑎᖅ ᐱᖁᔨᕘᖔᕈᑎᒥᓂᒃ ᐅᖃᓕᖅᑎᓪᓗᒍ.

“ᐃᓱᒫᓘᑎᖃᕋᑦᑕ ᐅᓇ ᑭᒃᑯᓕᒫᓂᒃ ᑲᑎᒪᑎᑦᑎᓂᖅ ᐱᐊᓂᒃᑕᐅᓇᔭᕆᐊᒃᓴᖓᓂᒃ ᖃᓄᐃᓕᐅᕈᑎᒃᓴᑦ ᐱᐊᓂᒃᑕᐅᓯᒪᙱᑎᓪᓗᒋᑦ. ᐃᓄᐃᑦ ᑐᓴᕐᕕᐅᔭᕆᐊᖃᕐᒪᑕ ᐊᒻᒪ ᐅᖃᓪᓚᖃᑎᒌᖕᓂᖃᑦᑎᐊᕐᓗᑎᒃ. ᑭᓇᑐᐃᓐᓇᖅ ᐅᕙᓃᑦᑐᖅ ᑐᑭᓯᔪᒪᔪᖅ ᑕᒪᐃᓐᓂᑦ ᓴᕿᑕᐅᔪᓂᒃ ᐊᒻᒪᓗ ᖃᓄᖅ ᐊᒃᑐᐃᓇᔭᕆᐊᒃᓴᖏᓐᓂᒃ ᓄᓇᕗᑦ ᑐᙵᕕᒃᑯᓐᓂᒃ ᐊᒻᒪ ᑲᑐᔾᔨᖃᑎᒌᓂᒃ,” ᑰᑦᑎᖅ ᐅᖃᖅᑐᖅ ᑖᓐᓇ ᑲᑎᒪᕕᒃ ᑕᑖᑦᑎᐊᖅᑎᓪᓗᒍ ᐅᖃᐅᓯᖃᕈᒪᒋᐊᖅᑐᖅᑐᓂᒃ ᐊᒻᒪ ᐃᓄᖕᓂᒃ.

“ᐃᓄᐃᑦ ᐃᓚᐅᔭᕆᐊᖃᕐᒪᑕ ᐱᓕᕆᕙᓪᓕᐊᓂᕐᒥᑦ. ᐊᒃᑐᐃᓂᖃᕐᒪᑦ ᑕᒪᐃᓐᓄᓕᒫᖅ ᐃᓄᐃᑦ ᐃᓅᓯᖏᓐᓄᑦ,” ᐅᖃᖅᑐᖅ

ᐱᖁᔨᕗᖔᕈᑎ ᓴᕿᑕᐅᓕᓚᐅᕐᑐᖅ ᐅᓪᓗᖅ ᑕᓪᓕᒪᒋᓕᖅᑕᖓᓂᒃ ᑲᑎᒪᑎᑦᑎᓂᕐᒥ ᐃᖃᓗᖕᓂᑦ, ᐃᑲᕐᕋᒥ ᐱᐊᓂᓕᒑᓕᖅᑎᓪᓗᒍ.

ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᒃᑯᑦ ᓯᕗᓪᓕᖅ ᑲᑎᒪᔾᔪᑎᒃᓴᕕᓂᖏᑦ ᐋᕿᒃᓯᒪᓚᐅᕐᑐᑦ ᑲᔪᓯᓂᐊᕐᓗᑎᒃ ᑲᑎᒪᑎᑦᑎᓂᕐᒥᒃ ᒥᑦᑎᒪᑕᓕᖕᒥᑦ ᓄᓇᓖᑦ ᐃᓚᐅᔪᓐᓇᕐᓂᐊᕐᒪᑕ ᓄᕕᐱᕆ 8 ᐊᒻᒪ 9-ᒥᑦ.

ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᓈᒻᒪᒃᓴᓚᐅᕐᑐᑦ ᓄᓇᕗᑦ ᑐᙵᕕᒃᑯ ᐱᖁᔨᕗᖔᕈᑎᖓᓂ, ᑖᓐᓇ ᑲᑎᒪᓂᖅ ᓄᖃᖅᑎᑕᐅᓪᓗᓂ ᐊᒻᒪ ᒥᑦᑎᑕᒪᓕᖕᒥᑦ ᑲᑎᖃᑎᒌᖕᓂᐅᓂᐊᖅᑐᖅ ᓄᖃᖅᑎᑕᐅᒋᓪᓗᓂ.

ᐱᓇᓱᐊᕈᓯᓕᒫᖅ, ᐹᕕᓐᓛᓐᑯᑦ ᑭᒡᒐᖅᑐᐃᔨᖏᑦ ᐅᖃᕈᓐᓇᕐᕕᖃᕈᒪᓯᒪᔪᓄᑦ ᐅᖃᕆᐊᖅᑐᐃᓐᓇᖃᑦᑕᓚᐅᕐᑐ ᐸᕐᓇᒃᓯᒪᓂᖏᓐᓂᒃ ᓴᓇᓂᕐᒥᒃ ᓄᓇᓯᐅᑎᑯᑖᑉ ᐊᖅᑯᑎᖓᓂᒃ ᐅᐊᖕᓇᕐᒧᙵᐅᔪᒥᒃ ᓄᓘᔮᖕᓂᒃ ᒪᐅᖓ ᓄᓗᔮᑦ ᕿᙳᐊᓂᑦ ᑐᓚᒃᑕᕐᕕᐊᓄᑦ.

ᐅᓇ ᓄᓇᓯᐅᑎᑯᑖᒧᑦ ᐊᖅᑯᑎ ᐊᒻᒪᓗ ᐊᓯᖏᑦ ᐃᓚᒃᓴᐃᑦ ᑐᓚᒃᑕᕐᕕᒃᒥᑦ, ᐊᔪᕐᓇᙱᔾᔪᑎᐅᓂᕐᓴᐅᓇᔭᖅᑐᖅ ᑖᒃᑯᐊ ᑲᒻᐸᓂᐅᔪᑦ ᓴᕿᑎᑦᑎᕙᓪᓕᐊᓂᖏᓐᓂᒃ ᐊᖏᓂᕐᓴᒥᑦ ᒫᓐᓇ 6 ᒥᓕᐊᓐ ᑕᓐᔅᓂ ᓴᕕᕋᔭᒃᓴᓂᒃ ᐊᕐᕌᒍᒥᑦ ᓴᖅᑭᑎᑦᑎᕙᒃᖢᑎᒃ ᒪᐅᖓ 12 ᒥᓕᐊᓐ ᑕᓐᔅᓄᑦ.

ᑭᓯᐊᓂᓕ ᐅᔾᔨᕐᓇᓗᐊᖅᑐᖅ ᐱᓇᓱᐊᕈᓯᕐᒥᑦ ᐅᑯᐊ ᐹᕕᓐᓛᓐᑯᑦ ᑐᒃᓯᕋᐅᑎᖓ ᐋᕿᒋᐊᖅᓯᔪᒪᓂᕐᒥᒃ ᐱᓕᕆᐊᖓᓄᑦ ᐱᔪᓐᓇᐅᑎᓂᒃ ᐆᒥᖓ ᐲᕐᓯᓗᑎᒃ ᓴᕿᑎᑦᑎᖃᑦᑕᖅᑕᖏᑦ ᐃᓱᖃᓕᖅᑎᑕᐅᓂᖓᓂᒃ ᐊᒻᒪ ᐃᒪᓐᓇᖔ ᐋᕿᒃᓯᓗᑎ ᐃᓱᖃᓕᕐᓯᒪᔪᒥᑦ ᐊᐅᓪᓚᖅᑎᑦᑎᔪᓐᓇᐃᓪᓕᓂᕐᒧᑦ, 20-ᖏᕐᓱᕐᓗᓂ ᓄᓇᓯᐅᑎᑯᑖᒃ ᐅᑎᖅᑕᕐᐸᒡᓗᓂ ᐊᒻᒪ 176-ᒥ ᐅᒥᐊᕐᔪᐊᒃᑰᖅᑐᒃᓴᓂᒃ ᐊᕐᕌᒍᒧᑦ.

ᐱᖁᔨᕗᖔᕈᑎ ᑲᑎᒪᓂᕐᒥᑦ ᓄᖃᖅᑎᑦᑎᓂᖅ ᐃᑲᔪᖅᑐᖅᑕᐅᓚᐅᕐᑐᖅ ᑕᒪᐃᓐᓄᑦ ᐅᖃᕈᓐᓇᕐᕕᖃᕈᒪᓯᒪᔪᓂᒃ, ᐊᒥᓱᑦ ᐃᓱᒫᓘᑎᖃᕐᓂᖏᓐᓂᒃ ᓇᓗᓈᕿᒍᑎᐅᔪᓂᒃ ᐱᓕᕆᐊᒧᑦ.

ᐲ. ᔭᐃ. ᐊᕿᐊᕈᒃ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ ᐊᖓᔪᖅᑳᖅ, ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐅᒃᐱᕆᔭᖃᕐᓂᖓᓂᒃ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔩᑦ ᐱᓕᕆᕙᓪᓕᐊᒍᓯᖏᓐᓂᒃ ᑕᒪᒃᑯᐊ “ᐃᓄᐃᑦ ᐱᕕᖃᕈᓐᓇᕐᓗᑎᒃ ᐊᐱᖅᓱᕈᓐᓇᕐᓂᕐᒥᒃ ᑖᒃᑯᓄᖓ ᐱᒻᒪᕆᒋᔭᐅᔪᓂᒃ” ᐊᒻᒪ “ᐱᕕᖃᕈᑎᐅᓪᓗᓂ ᓄᓇᖃᖅᑐᓂᒃ ᐅᖃᕈᓐᓇᕐᓗᑎᒃ ᐃᓱᒫᓘᑎᖏᓐᓂᒃ ᐱᑕᖃᐃᓐᓇᖅᑐᓂᒃ.”

ᐊᕿᐊᕈᒃ ᐅᖃᓚᐅᕐᒥᔪᖅ ᐱᖁᔨᕘᖔᕈᑎ ᓂᕆᐅᒋᔭᐅᓚᐅᙱᓐᓂᖓᓂᒃ, ᑭᓯᐊᓂᓕ ᐋᕿᒃᓯᒪᑦᑎᐊᓚᐅᕐᑐᖅ ᑭᖑᓪᓕᖅᐹᒥ ᐅᓪᓗᕐᒥᑦ ᑲᑎᒪᓂᕐᒥᑦ.

ᐹᕕᓐᓛᓐᑯᑦ ᐃᖅᑲᓇᐃᔭᖅᑎᖏ ᑕᐅᑐᒃᐳᑦ ᑰᑦᑎᖅ ᐱᒋᐊᕈᑎᒥᑦ ᐱᒋᐊᖅᑎᑦᑎᑎᓪᓗᒍ ᓄᖃᖅᑎᑦᑎᔪᒪᓂᕐᒧᑦ. (ᐊᔾᔨᓕᐅᕆᔨ ᐃᐊᒪ ᑖᓐᑐ)

“ᐃᒪᓐᓇᐅᓇᓱᒋᔭᕋᓕ ᐊᒥᓲᓗᐊᕐᒪᑕ ᐊᐱᖅᑯᑎᒃᓴᑦ ᓱᓕ ᐋᕿᒃᓯᒍᑎᐅᓯᒪᙱᑦᑐᑦ. ᑕᐅᑐᒃᑕᒃᑯᓪᓕ, ᐃᓱᒪᓕᐅᕆᓂᐊᕈᕕᑦ ᓯᕗᓂᒃᓴᕐᓂᒃ, ᑕᐃᒪᓕ ᑐᓴᐅᒪᑦᑎᐊᕆᐊᖃᖅᐳᑎᑦ ᐃᓱᒪᓕᐅᕆᑦᑎᐊᕐᓂᐊᕐᓗᑎᒃ. ᐱᑕᖃᙱᓗᐊᖃᐅᖕᒪᑦ ᐅᕙᓂ.”

ᑭᒡᒐᖅᑐᐃᔨᐅᔪᑦ ᕿᑭᖅᑖᓘ ᐅᐊᖕᓇᖓᓂ ᓄᓇᓕᖕᓂ ᐊᖏᖅᑐᐃᓐᓇᐅᓚᐅᕐᒥᔪᑦ ᐱᖁᔨᕗᖔᕈᑎᒥᒃ.

“ᑐᓴᒃᑲᓐᓂᕈᑎᐅᔭᕆᐊᖃᕐᒪᑦ ᐊᒻᒪ ᖃᐅᔨᓴᕐᓂᖅᑕᖃᕆᐊᖃᖅᖢᓂ,” ᐅᖃᖅᑐᖅ ᐊᒫᓐᑕ ᕼᐋᓐᓴᓐ ᒪᐃᓐ, ᖃᔨᓴᖅᑎᒋᔭᐅᔪᖅ ᒥᑦᑎᒪᑕᓕᒃᒥᑦ ᐊᖑᓇᓱᒃᑐᓕᕆᔨᓄᑦ. ᐅᖃᓚᐅᕐᑐᖅ ᐱᓕᕆᐊᒃᓴᖅ “ᐱᒻᒪᕆᐊᓗᖕᓂᒃ ᐊᒃᑐᐃᒍᑎᖃᑐᐃᓐᓇᕆᐊᖃᕐᒪᑦ ᐅᕙᒍᑦ ᐱᒻᒪᕆᐅᒋᔭᑦᑎᓐᓂᒃ ᐊᒻᒪ ᐃᓅᓂᑦᑎᓐᓄ ᐊᒻᒪ ᓄᓇᕐᔪᐊᕐᒦᖃᑕᐅᓂᑦᑎᓐᓄᑦ.”

ᐃᓚᖏᑦ ᐃᓚᐅᔪᑦ ᑭᐳᒥᑦ ᐅᖃᓚᐅᕐᑐᑦ ᓈᒻᒪᒃᓴᙱᓐᓂᕋᙱᖢᑎᒃ ᓄᓘᔮᖕᓂᑦ ᐱᓕᕆᐊᒥ, ᐊᒻᒪᓗ ᑲᔪᓯᖁᔨᑐᐃᓐᓇᖅᖢᑎᒃ ᐹᕕᓐᓛᓐ ᐱᓕᕆᐊᖃᕐᓂᖓᓂᒃ ᓄᓇᕗᒥᑦ, ᑭᓯᐊᓂᓕ ᐊᐱᖁᑎᒃᓴᖃᐅᓗᐊᓚᐅᕐᒪᑕ ᐃᓱᒫᓘᑎᖃᐅᕐᖢᑎᒡᓗ ᐊᖏᒡᓕᒋᐊᖅᑕᐅᔪᒪᔪᒥᑦ.

“ᑐᓴᖅᑕᕗᑦ ᓲᕐᓗ ᐃᒻᒥᕐᓱᕐᓯᒪᓗᐊᕐᒪᑦ ᐊᒻᒪ ᓈᒻᒪᙱᖢᓂ,” ᐅᖃᖅᑐᖅ ᐲᑕ ᐃᕙᓗ, ᕼᐋᒻᒪᓚᒃᑯᓐᓂᑦ ᐃᒡᓗᓕᖕᒥᑦ ᑭᒡᒐᖅᑐᐃᔪᖅ. “ᑕᒪᕐᒥᓕᒫᖅ ᑐᓴᒐᒃᓴᐅᑎᑕᐅᔪᖅ ᑐᑭᓕᐅᖅᑕᐅᔭᕆᐊᖃᕐᒪᑕ. ᑭᓱᓕᒫᑦ ᓴᕿᔮᑦᑎᐊᕆᐊᖃᕐᒪᑕ.”

ᓄᓇᕗᑦ ᒐᕙᒪᒃᑯᑦ ᐊᖏᖃᑎᖃᓚᐅᕐᒥᔪᑦ ᐱᖁᔨᕗᖔᕈᑎᒥᒃ, ᑕᒪᑐᒧᖓ ᐅᖃᐅᓯᖃᖅᖢᑎᒃ ᐃᒪᓐᓇ ᐊᖏᖃᑎᒌᙱᓐᓂᖅᑕᖃᓗᐊᕐᒪᑦ ᐅᖃᕈᓐᓇᕐᕕᖃᕈᒪᓯᒪᔪᓂᒃ ᐊᒻᒪ ᐱᖃᖅᑎᐅᔪ ᑕᒪᓐᓇᓗ ᓄᖃᕈᑎᑐᐃᓐᓇᐅᓪᓗᓂ.

ᑲᓇᑕᐅᑉ ᒐᕙᒪᖓ ᐊᒻᒪ ᐃᑲᔪᖅᑐᐃᓚᐅᕐᒥᔪᖅ ᐱᖁᔨᕗᖔᕈᑎᒥᒃ, ᑭᓯᐊᓂᓕ ᐅᖃᖅᖢᑎᒃ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐃᓱᒪᓕᐅᕆᔪᓐᓇᕐᓂᖏᓐᓂᒃ ᖃᓄᑎᒋ ᐊᑯᓂᐅᑎᒋᔪᖅ ᑕᒪᓐᓇ ᓄᖃᖓᒍᑎᐅᓂᐊᕆᐊᒃᓴᖓᓄᑦ.

ᒪᓕᒐᓕᕆᓂᒃᑯᑦ ᐱᓕᕆᔨᖏᑦᑎᒍᑦ, ᐹᕕᓐᓛᓐ ᐅᖃᓚᐅᕐᑐᑦ ᓈᒻᒪᒃᓴᙱᓐᓂᕋᖅᖢᑎᒃ ᐱᖁᔨᕗᖔᕈᑎᒥ ᓄᖃᖅᑎᑦᑎᓂᕐᒧ ᑕᕿᓄᑦ 8-ᓄ ᐊᒻᒪᓗ ᓈᒻᒪᒃᓴᙱᖢᑎᒃ ᑖᔅᓱᒥᖓ ᐱᖁᔨᕗᖔᕈᑎᒥ ᑐᓴᖅᑎᑕᐅᓚᐅᙱᓐᓂᖏᓐᓂᒃ.

“ᑕᒪᕐᒥ ᑕᕝᕗᙵᐅᔪᑦ ᑐᓴᖅᑎᑦᑎᓂᕐᒧ ᑲᑎᒪᓂᕐᒥ ᑲᔪᓯᑐᐃᓐᓇᕆᐊᖃᕐᓯᒪᓚᐅᕐᑐᑦ ᓄᕕᐱᕆ 2-ᒥ ᐱᒋᐊᕐᓗᑎᒃ,” ᐅᖃᖅᑐᖅ ᐳᕌᑦ ᐋᒻᔅᑐᕌᓐ, ᒪᓕᒐᓕᕆᔨᒋᔭᐅᔪᖅ ᐹᕕᓐᓛᓐᒧᑦ.

“ᓇᓕᐊᑐᐃᓐᓇᖅ ᐅᖃᓚᐅᙱᑦᑐᖅ ᐸᕐᓇᒃᓯᒪᙱᓐᓂᕐᒥ ᐱᒋᐊᕐᓂᐊᕐᓗᑎᒃ ᑕᕝᕙᓂ ᐅᓪᓗᕐᒥᑦ. ᖃᓄᑐᐃᓐᓇ ᓇᓕᐊᒃ ᐅᖃᐅᓯᐅᔪᖅ ᓄᖅᑲᖅᐹᓪᓕᕈᑎᒃᓴᐅᓚᐅᙱᑦᑐᖅ ᑖᒃᑯᓄᖓ ᑕᕝᕕᙵᖅᑎᓪᓗᒋᑦ.”

ᒦᒐᓐ ᓗᐊᑦ-ᕼᐅᐊᐃᐅᓪ, ᐊᖓᔪᖅᑳᒧᑦ ᑐᒡᓕᕆᔭᐅᔪᖅ ᐊᑐᒃᑲᓐᓂᕈᓐᓇᖅᑐᓕᕆᓂᕐᒧᑦ ᐅᑯᓄᖓ ᐹᕕᓐᓛᓐᒧᑦ, ᐅᖃᓚᐅᕐᑐᖅ ᑭᖑᕙᕆᐊᖅᑎᑕᐅᓂᖓ ᐊᒃᑐᐃᒍᑎᐅᓇᔭᕐᓂᖓᓂᒃ “ᒫᓐᓇᑲᐅᑎᒋ ᓈᒻᒪᙱᓕᐅᕈᑎᓂᒃ” ᐱᓕᕆᐊᒧᑦ.

“ᑭᓯᐊᓂᓕ ᖃᓄᐃᓕᐅᕋᓱᕈᓘᔭᕐᓂᐊᖅᑐᒍᑦ ᐱᑕᖃᖅᑎᑦᑏᓐᓇᕐᓂᕐᒥᒃ ᐊᒻᒪ ᓴᐳᔾᔨᓯᒪᓂᕐᒥᒃ 3,000-ᓂᒃ ᑲᓇᑕᒥᐅᑕᓂᒃ ᐃᖅᑲᓇᐃᔮᖃᖅᑎᑦᑎᓂᕐᒧᑦ, 476 ᐃᓅᓪᓗᑎᒃ. ᖃᐅᔨᒪᔭᕆᐊᖃᕋᑦᑕ ᐃᓄᐃᑦ ᐅᕙᑦᑎᓐᓂᒃ ᐱᓕᕆᖃᑎᖃᕐᓂᐊᕐᓂᖏᓐᓂᒃ. ᐱᕕᖃᕆᐊᖃᕋᑦᑕ ᖃᓄᑎᒋ ᓈᒻᒪᙱᓕᐅᕈᑎᐅᓇᔭᖅᑐᓂᒃ ᐱᓕᕆᐊᒧᑦ,” ᓗᐊᑦ-ᕼᐅᐊᐃᐅᓪ ᐅᖃᖅᑐᖅ.

ᐅᑯᐊ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐅᖃᕐᓯᒪᒐᓗᐊᖅᖢᑎᒃ ᐃᑲᔪᕈᓐᓇᙱᓐᓂᖏᓐᓂᒃ ᐱᓕᕆᓂᖅ 2-ᒥᑦ, ᐊᕿᐊᕈᒃ ᐅᖃᓚᐅᕐᑐᖅ ᐱᓕᕆᐊᖃᐃᓐᓇᕐᓂᐊᖅᖢᑎᒃ ᐃᓄᖕᓂᒃ ᑐᓴᐅᒪᑎᑦᑎᓂᕐᒥᒃ ᐱᓕᕆᐊᒥᒃ ᐊᒻᒪᓗ ᐱᓕᕆᐊᖑᔪᖅ ᑮᓇᐅᔭᓕᐅᕈᑎᐅᔪᓐᓇᕐᓂᖓ ᐃᓱᖃᔾᔮᖏᖢᓂ.

“ᓈᒻᒪᒃᓴᙱᖏᑦᑐᒍ ᓄᓘᔮᖕᓂᑦ. ᐱᓕᕆᖃᑎᒋᒐᑦᑎᒍᑦ. ᓇᖕᒥᓂᕆᒐᑦᑎᒍᑦ ᐃᓄᐃᑦ ᓄᓇᖓ ᓴᓇᕝᕕᒋᔭᖓᑦ. ᐃᑲᔪᖅᑐᐃᕙᒃᑲᑦᑕ ᐃᓄᐃᑦ ᐃᖅᑲᓇᐃᔭᖅᑎᑕᐅᓂᖏᓐᓂᒃ,” ᐅᖃᖅᑐᖅ.

“ᑮᓇᐅᔭᑲᓪᓚᕈᓘᔭᕐᓂᒃ ᐊᑐᕐᓯᒪᒐᑦᑕ ᐊᒻᒪ ᐱᓕᕆᐊᖃᕐᓂᕐᒥᒃ ᑖᓐᓇ ᐱᓕᕆᐊᒃᓴᖅ ᑮᓇᐅᔭᓕᐅᕈᑎᐅᔪᓐᓇᖁᓪᓗᒍ ᐊᑯᓂᕈᓗᒃ. ᑕᐃᒪᓕ ᑕᒪᓐᓇ ᐃᓱᒪᒋᓪᓗᒍ, ᓇᓕᒧᒃᓯᐅᑎᔪᓐᓇᖅᑐᓕᒃ ᓇᓂᓯᔭᕆᐊᖃᖅᐳᒍ. ᑭᓯᐊᓂᓕ ᒫᓐᓇ ᐱᑕᖃᙱᑦᑐᖅ.”

ᐊᕿᐊᕈᒃ ᐅᖃᓚᐅᕐᒥᔪᖅ ᓄᓇᓖᑦ ᓇᓗᕈᔪᖕᓂᖏᑦ ᓄᓇᓯᐅᑎᑯᑖᑉ ᐊᒃᑐᐃᒍᑎᒋᓇᔭᖅᑕᖓᓂᒃ ᑐᒃᑐᓂᑦᑕ ᑖᔅᓱᒧᖓ ᐱᒻᒪᕆᐅᕗᖅ.

“ᐃᓅᓪᓗᖓ, ᑕᒪᒃᑯᐊ ᐊᒃᑐᐃᓯᒪᑦᑎᐊᕐᒪᑕ ᐃᓕᖁᓯᑦᑎᒍᑦ ᐱᔪᓐᓇᐅᑎᑦᑎᓐᓄᑦ. ᑕᒪᓐᓇᓗ ᓴᕿᔮᑦᑎᐊᓚᐅᖅᖢᓂ ᐃᓐᓇᑐᖃᕐᓄᑦ ᑕᕝᕙᓃᑎᓪᓗᒋᑦ ᐃᖕᒥᖕᓂᑐᐊᖅ ᐃᓱᒪᙱᓐᓂᖏᓐᓂᒃ, ᑕᒪᓐᓇ ᓯᕗᓂᒃᓴᑦᑎᓐᓅᖓᖕᒥᖕᒪᑦ. ᑕᒪᓐᓇᓗ ᐃᒃᐱᒋᓗᐊᖅᑕᕋ. ᐃᓱᒪᓕᐊᕆᔭᒃᑲ ᒫᓐᓇ ᒫᓐᓇᒨᑐᐃᓐᓇᙱᒻᒪᑦ, ᑭᓯᐊᓂᓕ ᑭᖑᓪᓕᐅᓂᐊᖅᑐᓄᑦ. ᕿᒪᐃᕝᕕᒋᕙᒃᑲ ᑐᙵᕕᑦᑎᐊᕆᖕᓂᕐᓴᒥ ᐅᕙᓐᓂᐊᓚᐅᕐᑐᒥᓪᓖ? ᑖᓐᓇᓕ ᑐᙵᕕᐅᓗᐊᖅᑐᖅ ᐃᓱᒪᓕᐅᕆᓂᒃᑯᑦ, ᖃᓄᖅ ᐃᓕᖁᓯᖃᕋᓗᐊᕈᕕᑦ,” ᐅᖃᖅᑐᖅ.

ᐱᖁᔨᓂᒃᑯᓪᓕ, ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐱᕕᖃᖅᑎᑦᑎᓚᐅᕐᑐᑦ ᐅᖃᕈᓐᓇᕐᕕᖃᕈᒪᓯᒪᔪᓂᒃ ᑎᑎᖃᑎᒍ ᑎᑎᕋᕈᓐᓇᕐᓗᑎᒃ ᓄᕕᐱᕆ 15 ᑎᑭᒐᓱᖕᓂᖓᓂᒃ. ᑕᐃᑲᙵᓪᓕ, ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᑎᑎᕋᕐᓯᒪᔪᓂ ᑐᓂᓯᓂᐊᖅᑐᑦ ᐱᖁᔨᕗᖔᕈᑎᒧᑦ ᐊᒻᒪᓗ ᖃᓄᖅ ᐊᑯᓂᐅᑎᒋᔪᖅ ᐅᑕᕿᒋᐊᖃᕐᓂᖏᓐᓂᒃ.