ᐹᕕᓐᓛᓐ ᓱᕋᒃᑎᖅᑎᑦᑕᐃᓕᒪᑎᑦᑎᕙᒃᑐᖅ, ᐅᖃᕐᓯᒪᔪᖅ ᐊᖏᒡᓕᒋᐊᕐᓂᕐᒧᑦ ᐸᕐᓇᐅᑎ
ᓴᕕᕋᔭᒃᓴᒥᑦ ᐅᔭᕋᒃᓯᐅᖅᑎ ᐱᔪᒪᓯᒪᔪᖅ ᐅᓄᕐᑐᐃᕐᓗᑎᒃ ᓄᓇᓕᖕᓄᑦ ᐳᓛᖃᑦᑕᕈᒪᓪᓗᑎᒃ ᐊᕐᕌᒍ ᐱᒋᐊᓵᕐᓯᒪᓂᖓᓂᒃ
ᐹᕕᓐᓛᓐ ᓴᕕᕋᔭᒃᓴᒥᑦ ᐅᔭᕋᒃᓯᐅᕐᕕᒃ ᑯᐊᐳᕇᓴᓐᑯᑦ ᑐᓚᒃᑕᕐᕕᖓᑦ ᓄᓘᔮᑦ ᕿᙳᐊᓂ. ᑖᒃᑯᐊ ᑲᒻᐸᓂᐅᔪᑦ ᓄᑖᙳᕆᐊᕐᓯᒪᔪᓂᒃ ᑐᓂᓯᓵᕐᓂᑰᓪᓗᑎᒃ ᑎᑎᖃᓂᒃ ᑐᑭᓯᒋᐊᖅᑎᑦᑎᓇᓱᒃᑐᓂᒃ ᐊᐱᖅᑯᑎᐅᓚᐅᕐᑐᓂᒃ ᑭᒃᑯᓕᒫᓂᒃ ᑲᑎᒪᑎᑦᑎᑎᓪᓗᒋ ᓄᕕᐱᕆᒥᑦ. (ᐊᔾᔨᙳᐊᖁᑎᒋᔭᐅᔪᖅ)
For an English version of this story, see Baffinland performs damage control, clarifies expansion plan
ᖃᖓᑦᑎᐊᓵᖅ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐱᔪᒪᓯᒪᓂᖏᓐᓄᑦ, ᐹᕕᓐᓚᓐ ᓴᕕᕋᔭᒃᓴᒥᑦ ᐅᔭᕋᒃᓯᐅᕐᕕᒃ ᑯᐊᐳᕇᓴᓐ ᑐᓂᓯᓚᐅᕐᑐᖅ 110-ᓂᒃ ᒪᒃᐱᒐᓕᖕᓂᑦ ᓄᑖᙳᕆᐊᕐᓯᒪᔪᓂᒃ ᐅᓂᒃᑳᓂᒃ ᐱᓇᓱᐊᒐᖃᖅᖢᑎᒃ ᐊᖏᒡᓕᒋᐊᖅᑎᑦᑎᓂᕐᒧᑦ ᐸᕐᓇᐅᑎᖏᓐᓂᒃ ᒪᑯᓄᖓ ᐊᐱᖅᑯᑎᐅᓚᐅᕐᓯᒪᔪᓄᑦ ᓄᕕᐱᕆᒥ ᑭᒃᑯᓕᒫᓂᒃ ᑲᑎᒪᓂᕐᒥ.
“ᐅᑯᓇᓂ ᐃᓚᒋᔭᐅᔪᑦ ᑎᑎᖃᑦ ᑐᑭᓯᒍᑎᒃᓴᖃᖅᑐᑦ ᐆᒧᖓ ᐱᓕᕆᓂᖅ 2-ᒥᑦ ᑐᒃᓯᕋᐅᑎᓂᒃ ᐊᒻᒪᓗ ᖃᓄᐃᓕᖓᓕᕐᓂᖏᓐᓂᒃ ᓈᒻᒪᙱᓕᐅᕈᑎᐅᓚᐅᕐᑐᑦ ᐅᑯᑎᒎᓇᖅ ᑲᒻᐸᓂᐅᔪᓂᒃ ᐊᒻᒪ ᐅᖃᕈᓐᓇᕐᕕᖃᕈᒪᓯᒪᔪᓂᒃ ᒫᓐᓇᒧᑦ ᑎᑭᐅᑎᓯᒪᔪᓂᒃ,” ᑲᒻᐸᓂᐅᔪᑦ ᐅᖃᓚᐅᕐᑐᑦ ᑎᑎᖃᑎᒍ ᑲᑎᒪᔨᓄᑦ ᐱᓇᓱᐊᕈᓯᐅᓚᐅᕐᑑᑉ ᐱᒋᐊᕐᓂᖓᓂᒃ ᔭᓄᐊᕆ 7-ᐅᑎᓪᓗᒍ.
ᑕᒪᐅᓇᑦᑕᐃᓐᓇᖅ, ᐱᔪᒪᓯᒪᓚᐅᕐᒥᔪᑦ ᑲᑎᒪᖃᑎᖃᕈᒪᓪᓗᑎᒃ ᖁᑦᑎᒃᑐᕐᒥ ᓄᓇᓕᖕᓂᑦ ᑭᒡᒐᖅᑐᐃᔨᓂᒃ, ᑖᓐᓇᓗ ᐃᒡᓗᓕᖕᒦᓐᓂᐊᓚᐅᕐᖢᓂ ᔭᓄᐊᕆ 13-ᒥᑦ ᔭᓄᐊᕆ 16-ᒧᑦ.
ᑭᖑᓂᐊᒍᓪᓕ, ᑲᒻᐸᓂᐅᔪᑦ ᓄᓇᓕᖕᓂ ᑲᑎᒪᖃᑎᖃᕈᒪᔪᑦ ᐅᑯᓇᓂ ᑲᖏᖅᑐᒑᐱ, ᒥᑦᑎᒪᑕᓕᒃ, ᐃᒡᓗᓕᒃ, ᓴᓂᕋᔭᒃ ᐊᒻᒪ ᐃᒃᐱᐊᕐᔪᒃᒧᑦ, ᐃᓚᖃᕐᓗᑎᒃ ᑲᑎᒪᓗᑎᒃ ᐊᔪᕈᓐᓃᕐᓴᖅᑎᑦᑎᖃᑦᑕᕐᓂᕐᒥ ᑭᒡᒐᖅᑐᐃᔨᓂᒃ ᓄᓇᓕᓕᒫᓂᒃ.
ᐱᓕᕆᐊᖃᕈᒪᔪᑦ ᓄᓇᓕᖕᓂ ᑲᑎᖃᑲᑕᖕᓂᕐᒥᓐ ᒫᓂ ᔭᓄᐊᕆ 19-ᓗ ᕕᕝᕗᐊᕆ 21-ᓗ ᐊᑯᓐᓂᖓᓂᒃ.
“ᐹᕕᓐᓛᓐᑯ ᓱᓕ ᐱᓇᓱᐊᒐᖃᒻᒪᕆᒃᑐᑦ ᐋᖅᑭᒃᓱᐃᔪᓐᓇᕐᓗᑎ ᐱᕙᓪᓕᐊᒍᑎᐅᔪᓐᓇᖅᑐᒃᑯᑦ ᐱᓕᕆᖃᑎᖃᕈᓐᓇᕐᓯᓗᑎᒃ ᓄᓇᓕᖕᓂᑦ ᐊᒻᒪᓗ ᐅᒃᐱᕈᓱᒃᖢᑕ ᐃᑲᔪᕈᔅᓯ ᑕᒪᓐᓇ ᑕᐃᒪᑦᑐᓐᓇᕋᔭᖅᑐᖅ,” ᒦᒐᓐ ᓗᐊᑦ-ᕼᐅᐊᐃᐅᓪ, ᐹᕕᓐᓛᓐᑯᑦ ᐊᖓᔪᖅᑳᖓᑦᑕ ᑐᒡᓕᖓ ᐊᑐᒃᑲᓐᓂᕈᓐᓇᑐᓕᕆᓂᒃᑯᑦ ᐱᕙᓪᓕᐊᔪᓕᕆᓂᕐᒧᑦ, ᐅᖃᓚᐅᕐᑐᖅ ᑎᑎᕋᖅᖢᓂ ᒪᐃᔭᓄᑦ ᑕᓪᓕᒪᓂ ᓄᓇᓕᖕᓄᑦ ᐊᒃᑐᖅᑕᐅᓯᒪᔪᓂᒃ ᑎᓯᐱᕆᐅᓚᐅᕐᑐᒥᓐ.
ᑭᓯᐊᓂᓕ ᑖᓐᓇᑐᐊᙳᙱᑦᑐᖅ. ᑲᑎᒪᓂᒃᓴᐅᑉ ᓯᕗᓂᐊᒍᑦ ᑲᑎᒪᕕᒡᔪᐊᕐᓇᐅᓂᐊᖅᑐᒥ ᐃᖃᓗᖕᓂ ᑲᑎᒪᓚᐅᕐᑎᓪᓗᒋ ᐅᑯᐊ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦᑕ ᐋᖅᑭᒃᓯᒪᔭᖓᓂ ᒫᑦᓯ 25-ᒧ, ᐹᕕᓐᓛᓐᑯ ᓄᓇᓕᖕᓄ ᐳᓛᒃᑲᑕᒃᑲᓐᓂᕈᒪᔪᑦ.
ᑕᒪᓐᓇ ᐱᓕᕆᓂᓪᓚᕆᐅᒐᔭᖅᑐᖅ ᒫᑦᓯ 25-ᓗ ᐊᒻᒪ ᐱᒋᐊᒃᑲᓐᓂᕈᑎᒃᓴᐅᒃ ᑭᒃᑯᓕᒫᓂᒃ ᑲᑎᒪᑎᑦᑎᓂᕐᒥ ᓄᖅᑲᖅᑎᑕᐅᑳᓪᓚᓚᐅᕐᓯᒪᔪᒥᒃ ᓄᕕᐱᕆ 6-ᖑᓚᐅᕐᓯᒪᔪᒥᓐ.
ᑕᒪᐅᓇᑦᑕᐃᓐᓇᖅ, ᐹᕕᓐᓛᓐᑯᑦ ᓄᑖᙳᕆᐊᕐᓯᒪᔭᖏᑦ ᑐᓴᒐᒃᓴᖁᑎᖏ ᐋᖅᑭᒃᓯᒍᑎᐅᓇᓱᒃᑐᑦ ᓈᒻᒪᙱᓕᐅᕈᑎᐅᓯᒪᔪᓂᒃ ᐊᒻᒪᓗ ᑐᑭᓯᒋᐊᖅᑎᑦᑎᒍᑎᐅᓇᓱᒃᖢᑎᒃ ᐊᐱᖅᑯᑎᐅᓯᒪᔪᓄᑦ ᓄᓇᓯᐅᑎᑯᑖᒧᑦ ᐊᖅᑯᑎᓕᐊᖑᔪᒪᔪᒥ, ᐃᒪᒃᑯᑦ ᐊᐅᓪᓚᖅᑎᑦᑎᕙᖕᓂᕐᒥᒃ, ᐊᒻᒪ ᓴᕕᕋᔭᒃᓴᓂ ᓴᖅᑭᑎᑦᑎᕙᓪᓕᐊᓂᕐᒧ ᐸᕐᓇᐅᑎᓂᒃ.
ᐅᓇ ᐃᓚᖃᖅᑐᖅ ᓇᓗᓇᐃᕐᓯᒐᓱᖕᓂᕐᒥ ᖃᓄᑎᒋ ᓴᕕᕋᔭᒃᓴᒥ ᐅᔭᕋᒃᓯᐅᕋᔭᕐᓂᖏᓐᓂᒃ, ᐊᒻᒪᓗ ᓇᑭᙶᕋᔭᕐᓂᖓᓂᒃ ᐱᓕᕆᐊᖏᓐᓂᒃ:
- ᐃᖏᕐᕋᑎᑦᑎᓂᕐᒥ ᓄᓇᓯᐅᑎᑯᑖᒃᑯᑦ ᑕᑭᓂᖃᓪᓗᐊᕐᓗᓂ 110 ᑭᓛᒥᑕᓂ “ᐅᐊᖕᓇᖓᓂ ᓄᓇᓯᐅᑎᑯᑖᒧᑦ ᐊᖅᑯᑎᒃᑯᑦ,” ᓄᓘᔮᖕᓂᑦ ᓄᓘᔮᑦ ᕿᙳᐊᓄᑦ: 12 ᒥᓕᐊᓐ ᑕᓐᔅ ᐊᕐᕌᒍᒧᑦ, ᖁᕝᕙᖅᐹᓪᓕᕐᓗᓂ ᐅᕙᙵᑦ 4.2 ᒥᓕᐊᓐ ᑕᓐᔅ ᐊᕐᕌᒍᒥ.
ᐅᓇᐅᖕᒪᑦ ᐅᐊᖕᓇᒧᑦ ᓄᓇᓯᐅᑎᑯᑖᑉ ᐊᖅᑯᑎᖓ, ᑖᓐᓇᓗ ᐃᓚᖓᒍᑦ ᒫᓐᓇ ᐊᖅᑯᑎᒋᔭᐅᔫᑉ ᓴᓂᐊᒎᖓᓇᔭᖅᖢᓂ, ᒫᓃᓐᓇᔭᖅᑐᖅ ᐱᓕᕆᓂᖅ 2-ᒥ ᐊᖏᒡᓕᒋᐊᖅᑎᑦᑎᔪᒪᓂᕐᒧᑦ ᑐᒃᓯᕋᐅᑎᒋᔭᐅᔪᒥᑦ.
- ᐊᐅᓪᓚᖅᑎᑦᑎᖃᑦᑕᕐᓂᕐᒥᒡᓕ ᓄᓇᓯᐅᑎᑯᑖᒃᑯᑦ ᓯᕗᓂᒃᓴᑦᑎᓐᓂ ᐅᕘᓇ “ᓂᒋᕐᒥᑦ ᓄᓇᓯᐅᑎᑯᑖᒧᑦ,” ᓄᓘᔮᖕᓂᑦ ᑐᓚᒃᑕᕐᕕᖕᒧᑦ ᐃᒃᐱᑭᑦᑐᕐᔪᐊᕐᒥ: 18 ᒥᓕᐊᓐ ᑕᓐᔅ ᐊᕐᕌᒍᒥ.
ᐅᓇ ᐸᕐᓇᐅᑎᑐᖃᐅᓚᐅᕐᓯᒪᔪᖅ ᑕᐃᒪᐃᓚᐅᕐᓯᒪᔪᖅ ᐹᕕᓐᓛᓐᑯᑦ ᒐᕙᒪᑐᖃᒃᑯᓐᓂᑦ ᐊᖏᖅᑕᐅᓂᑰᓪᓗᓂ 2012-ᒧᑦ—ᐃᒪᐃᓕᐅᖔᕋᓱᓚᐅᖅᑎᓐᓇᒋ ᓴᖅᑭᑎᑦᑎᕙᓪᓕᐊᓕᕐᓗᑎᒃ ᐊᑐᕐᓗᑎᒃ ᓄᓇᓯᐅᑎᓄᑦ ᐊᖅᑯᑎᒥ ᓄᓘᔮᑦ ᕿᙳᐊᓄᙵᐅᔪᒥᒃ.
- ᑲᑎᓪᓗᑎᒃ ᓴᕕᕋᔭᒃᓴᒥᑦ ᓴᖅᑭᑎᑦᑎᕙᓪᓕᐊᓂᖅ, ᐅᓇ ᐱᓕᕆᓂᖅ 2 ᐊᖏᖅᑕᐅᔪᓂ: 30 ᒥᓕᐊᓐ ᑕᓐᔅ ᐊᕐᕌᒍᒧᑦ.
ᐹᕕᓐᓛᓐ ᓇᓗᓇᐃᕐᓯᒃᑲᓐᓂᖅᐳᑦ ᓄᓇᓯᐅᑎᑯᑖᒧᑦ ᐊᖅᑯᑎᐅᓂᐊᖅᑐᒧᑦ ᐸᕐᓇᐅᑎᓂᒃ
ᐆᒧᖓᓕ ᓄᓇᓯᐅᑎᑯᑖᑉ ᐊᖅᑯᑎᖓᓄᑦ, ᐹᕕᓐᓛᓐᑯ ᓇᓗᓇᐃᕐᓯᓕᓚᐅᕐᑐᑦ ᓂᕈᐊᕆᓂᕐᓴᖓᓂᒃ ᐊᖅᑯᑎᒃᓴᒧᑦ, ᑖᒃᑯᐊᓗ ᑲᒻᐸᓂᐅᔪᖅ ᓴᖅᑭᑎᑦᑎᓚᐅᕐᖢᑎᒃ ᐅᖃᕈᓐᓇᕐᕕᖃᕈᒪᓯᒪᔪᓂ ᓄᕕᐱᕆᐅᓚᐅᕐᓯᒪᔪᒥᑦ ᑭᒃᑯᓕᒫᓂ ᑲᑎᒪᑎᑦᑎᓂᕐᒥᓐ.
ᓇᓗᓇᐃᖅᑕᐅᓯᒪᔪᖅ ᓄᓇᙳᐊᓂᒃ ᐃᒪᓐᓇ “ᐊᖅᑯᑎ 3.” ᒪᕐᕈᒃᑲᓐᓂᕐᑎᑐᑦ ᑐᒃᓯᕋᐅᑎᐅᓯᒪᔪᓂ ᐊᖅᑯᑎᐅᔪᒥᒋᔭᐅᔪᓂᒃ, ᑖᓐᓇᑦᑕᐅᖅ ᒪᓕᒃᓯᒪᓗᐊᕐᑐᖅ ᒫᓐᓇ ᓄᓇᓯᐅᑎᓄᑦ ᐊᖅᑯᑎᒥᓐ.
ᑭᓯᐊᓂᓕ ᐃᓚᖓᒍᑦ ᑕᐃᔭᐅᔪᖅ “ᑭᓛᒥᑕ 67 ᖁᑎᖕᓂᖅ,” ᓴᖑᖓᓂᖃᕐᒪᑦ ᓂᖏᒧᙵᐅᔪᒥ ᐊᒻᒪᓗ ᐅᖓᓯᓈᕐᓯᒪᔪᒃᑯᑦ ᐅᑎᕐᕕᖃᖅᖢᑎ ᓴᓂᑦᑎᐊᑯᓗᐊᓂᒃ ᓄᓇᓯᐅᑎᓄᑦ ᐊᖅᑯᑎᐅᑉ.
ᐅᓇ ᓴᖑᖓᓂᐅᔪᖅ ᖁᑎᖕᓂᖃᓗᐊᖅᑐᒃᑰᖅᑕᐃᓕᓂᕐᒨᖓᔪᖅ ᑕᒪᒃᑯᓄᖓ ᓄᓇᓯᐅᑎᑯᑖᓄᑦ ᒪᔪᖅᑕᐅᔪᓐᓇᕋᔭᙱᑦᑐᓂᒃ.
ᑭᐱᑦᑕᕐᓯᒪᔪᖅ ᑐᖑᔪᕈᔪᒃᑐᒥ ᑕᕐᓴᓕᒃ ᓴᕿᔮᖅᑎᑦᑎᓯᒪᔪᖅ ᐹᕕᓐᓛᓐᑯᑦ ᓂᕈᐊᕆᓂᕐᓴᕆᔭᖓᓂ ᓄᓇᓯᐅᑎᑯᑖᒧᑦ ᐊᖅᑯᑎᒃᓴᒧᑦ ᓄᓘᔮᓪᓗ ᐊᒻᒪ ᓄᓘᔮᑦ ᕿᙳᐊᑕ ᐊᑯᓐᓂᖓᒍᑦ. ᐊᖅᑯᑎᐅᓂᐊᖅᑐᖅ ᒪᓕᒐᔭᖅᑐᖅ ᐅᖃᓪᓚᖃᑎᖃᓚᐅᕐᑎᓪᓗᒋᑦ ᒥᑦᑎᒪᑕᓕᖕᒥᐅᓂᒃ. (ᐹᕕᓐᓛᓐ ᐊᔾᔨᙳᐊᖁᑎᖓ)
ᒪᑯᓄᖓᓕ ᐊᖅᑯᑎ ᐊᓯᐊᒎᖓᒋᐊᖃᕐᓂᖏᓐᓄᑦ, ᑲᒻᐸᓂᐅᔪᑦ ᐅᖃᕐᓯᒪᔪᑦ ᓄᓇᓕᖕᓂ ᑲᑎᒪᖃᑎᖃᑲᑕᖕᓂᐊᕐᓂᕋᖅᖢᑎᒃ ᓇᓗᓇᐃᕐᓯᓇᓱᒡᓗᑎᒃ ᐊᖅᑯᑎᐅᖁᔭᐅᔪᒥᓐ.
ᑲᒻᐸᓂᐅᔪᑦ ᒪᒥᐊᓚᐅᕐᒥᔪᑦ ᖃᓪᓗᓈᑐᑦ-ᐃᓄᒃᑎᑐᑦ ᑐᑭᓕᐅᕆᔭᐅᓯᒪᔪᒥ ᑕᒻᒪᕐᓯᒪᓂᑯᒥ, ᐅᓇ ᖃᓪᓗᓈᑐᑦ ᐅᖃᐅᓯᖅ “deviation” ᑐᑭᓕᐅᕆᔭᐅᓯᒪᓚᐅᕐᒪ ᐃᓄᒃᑎᑐᑦ ᐃᒪᓐᓇ ᑕᒪᓐᓇ ᐱᕙᓪᓕᐊᓂᐅᔪᖅ ᐊᖅᑯᑎ ᐅᖓᕙᕆᐊᖅᑕᐅᓂᖓᓂᒃ ᐅᕝᕙᓘᓐᓃᑦ ᓄᖃᖅᑎᑕᐅᑲᐃᓐᓇᕐᓂᖓᓂᒃ.
ᐹᕕᓐᓛᓐᑯ ᐅᖃᓚᐅᕐᒥᔪᑦ ᓄᓇᓯᐅᑎᑯᑖᑉ ᓴᓂᑦᑎᐊᖏ ᐅᐊᖕᓇᖓᓄ ᓄᓇᓯᐅᑎᑯᑖ ᐊᖅᑯᑎᖓ “ᓯᕕᖓᑳᓪᓚᒃᑐᖃᔾᔮᖏᓐᓂᕋᖅᖢᒋᑦ” ᐆᑐᓇᐅᙱᑦᑐ ᓯᕗᓂᒃᓴᒥᑦ ᓂᒋᕐᒧ ᓂᓇᓯᐅᑎᑯᑖᑉ ᐊᖅᑯᑎᖓᑎᑐ, ᐊᔪᕐᓇᙱᓐᓂᕐᓴᐅᓂᐊᕐᒪ ᑐᒃᑐᓄᑦ ᐃᑳᕆᐊᒃᓴᖅ.
ᑲᒻᐸᓂᐅᔪᑦ ᐸᕐᓇᐅᓯᐅᕈᒪᔪᑦ ᒫᓂ 30-ᓂᑦ ᐊᖅᑰᓵᕐᕕᐅᔪᓐᓇᕋᔭᖅᑐᓂᒃ ᐊᒻᒪ ᑎᓴᒪᓂᒃ ᓱᓪᓗᓕᖕᓂ ᐃᓄᐃᑦ ᐊᒻᒪ ᑐᒃᑐᐃᑦ ᐃᑳᕐᕕᒋᔪᓐᓇᕋᔭᖅᑕᖏᓐᓂᒃ ᓄᓇᓯᐅᑎᑯᑖᑉ ᐊᖅᑯᑎᐊᒍ ᐃᒡᓗᐊᓅᕋᓱᒡᓗᑎᒃ.
ᑭᓯᐊᓂᓗ ᑖᒃᑯᐊ ᐸᕐᓇᐅᑎᑦ ᐱᒻᒪᕆᐅᓕᕐᓯᒪᙱᑦᑐᑦ.
“ᑭᖑᓪᓕᖅᐹᖓᓂᒃ ᖃᔅᓯᐅᓂᐊᕆᐊᒃᓴᖏᑦ ᐊᒻᒪ ᓇᓃᓐᓇᔭᕆᐊᒃᓴᖏᑦ ᐃᑳᕐᕕᒃᓴᐃ ᐃᓱᒪᒋᔭᐅᔪᖅ ᐃᓄᖕᓄᑦ ᑕᒪᑐᒥᖓ ᑐᓴᐅᒪᑎᑕᐅᓗᑎᒃ ᓴᓇᕙᓪᓕᐊᓂᖏᓐᓂᒃ ᓄᓇᓯᐅᑎᑯᑖᒧᑦ,” ᐹᕕᓐᓛᓐ ᐅᖃᓚᐅᕐᑐᑦ.
ᐊᐅᓪᓚᖅᑎᑦᑎᕙᓪᓕᐊᓂᕐᒧᑦ ᐊᖅᑯᑎ, ᐊᐅᓪᓚᖅᑎᑦᑎᕝᕕᒃᓴᖅ ᓇᓗᓇᐃᖅᑕᐅᔪᖅ
ᐊᓯᐊᒍᑦᑕᐅᕐ ᓄᑖᙳᕆᐊᕐᓯᒪᔪᓂᒃ, ᐹᕕᓐᓛᓐ ᓇᓗᓇᐃᕐᓯᓯᒪᓚᐅᕐᑐᖅ ᐃᒪᒃᑯᑦ ᐊᐅᓪᓚᖅᑎᑦᑎᕙᖕᓂᕐᒧᑦ ᐸᕐᓇᐅᑎᓂᒃ.
ᑲᒻᐸᓂᐅᔪᑦ ᐅᖃᓚᐅᕐᑐ ᐊᑐᖃᑦᑕᔾᔮᙱᓐᓂᖏᓐᓂᒃ ᓱᓪᓗᐊᓗᒃᑯᑦ ᐅᐊᓕᓂᕐᒥᑦ ᕿᑭᖅᑖᓗᖕᒧᑦ ᑕᕆᐅᒃᑯᑦ ᐊᖅᑯᑎᒥ ᐅᕝᕙᓘᓐᓃᑦ ᐅᕘᓇ Navy Board Inlet ᒫᓃᑦᑐᖅ Bylot Island.
ᐊᐅᓪᓚᖅᑎᑦᑎᕙᓪᓕᐊᖃᑦᑕᕋᔭᖅᑐᑦ ᐱᓕᕆᓂᖅ 2 ᐊᖏᒡᓕᒋᐊᕈᑎᒧ ᐅᕘᓇ ᓄᓘᔮᑦ ᕿᙳᐊᒍ ᐊᒻᒪ ᑕᓯᐅᔭᒃᑯᑦ—ᐊᑐᖅᑕᐅᕙᒃᑐᒃᑯᑦ ᒫᓐᓇ ᑲᒻᐸᓂᐅᔪᓄᑦ.
ᖃᓄᖕᓕ ᐅᒥᐊᕐᔪᐊᒃᑰᓇᓂᖓ ᐊᑯᓂᐅᑎᒋᓂᖓᓄᑦ, ᐹᕕᓐᓛᓐᑯᑦ ᑐᒃᓯᕋᐅᓯᐅᕐᓯᒪᔪᑦ ᐱᒋᐊᕐᓗᑎᒃ ᔪᓚᐃᑦ ᑎᑭᓪᓗᒍ ᓄᕕᐱᕆ 15 ᐊᕐᕌᒍᑕᒫᓐ.
ᑭᓯᐊᓂᓕ ᑕᒪᓐᓇ ᑎᑎᕋᕐᓯᒪᓪᓚᕆᙱᑦᑐᖅ ᐊᒻᒪ ᐹᕕᓐᓛᓐ ᐱᔪᒪᓯᒪᔪᑦ ᐅᒥᐊᕐᔪᐊᒃᑰᖅᑎᑦᑎᔪᓐᓇᕐᓂᖅ ᐅᑯᓂᖓ ᒪᓕᒃᑎᑕᐅᓇᔭᕐᓗᑎᒃ:
- ᒥᑦᑎᒪᑕᓕᒃᒥ ᐊᖑᓇᓱᒃᑐᓕᕆᔨᒃᑯᑦ ᑎᑎᖃᑎᒍᑦ ᓇᓗᓇᐃᕐᐸᒡᓗᑎᒃ ᓯᓈᖓ ᐊᑐᖅᑕᐅᔪᓐᓇᐃᓪᓕᓂᖓᓂᒃ ᓄᓇᓕᖕᒥᐅᓂᒃ.
- ᓄᓇᒧ ᓯᑯᓯᒪᔪᑦ ᓯᑯᐃᑦ ᓱᕋᒃᑎᖅᑕᐅᖃᑦᑕᕆᐊᖃᕋᔭᖅᑐᑦ ᑲᖏᖅᖢᒃᑰᓕᕌᖓᑕ.
- ᐅᒥᐊᕐᔪᐊᑦ ᐊᖏᖅᑕᐅᖃᑦᑕᕆᐊᖃᖅᑐᑦ ᐅᑯᓇᙵᑦ NORDREG (ᒐᕙᒪᑐᖃᒃᑯᑦ ᐱᓕᕆᕝᕕᖓ) ᖃᐅᔨᓴᖅᑕᐅᔪᓐᓇᖁᓪᓗᒍ ᓯᑯᖃᖅᐸᓪᓕᐊᓕᕌᖓᑦ.
- ᓯᑯᓂᒃ ᓱᕋᒃᑎᕆᖃᑦᑕᕋᔭᙱᑦᑐᑦ ᓇᑦᑎᐊᕕᓂᖃᕐᓇᐅᑎᓪᓗᒍ. ᐃᖏᕐᕋᖃᑦᑕᕐᓂᕐᒧᑦ ᐊᑐᖁᔭᐅᙱᑦᑐᓂᒃ ᐱᑕᖃᖅᑎᑦᑎᓇᔭᖅᑐᑦ ᐊᐅᔭᒃᑯᑦ ᕿᓚᓗᒐᐃᑦ ᒪᐅᓈᑲᑕᖕᓂᖏᓐᓂᒃ ᑕᓯᐅᔭᒃᑯᑦ ᐊᒻᒪ ᓄᓘᔮᑦ ᕿᙳᐊᒍᑦ.
“ᐹᕕᓐᓛ ᐸᕐᓇᒃᓯᒪᖕᒥᔪᑦ ᐊᔪᕈᓐᓃᕐᓴᖅᑎᑦᑎᒃᑲᓐᓂᖃᑦᑕᕈᒪᓪᓗᑎᒃ ᓄᓇᓕᖕᓂ ᑭᒡᒐᖅᑐᐃᔨᓂᒃ ᐋᖅᑭᒃᓱᐃᕌᓂᒐᓱᒃᑎᓪᓗᒋ ᐅᒥᐊᕐᔪᐊᒃᑰᓇᖅ ᑎᑭᑉᐸᓪᓕᐊᓂᖓᓄᑦ ᐊᒻᒪᓗ ᐅᓂᒃᑳᓕᐅᖃᑦᑕᕋᔭᖅᖢᑎᒃ ᑲᑎᒪᔾᔪᑎᕕᓂᕐᓂᒃ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄ ᐊᑐᐃᓐᓇᐅᓕᕌᖓᑕ,” ᑲᒻᐸᓂ ᐅᖃᓚᐅᕐᑐᖅ.
ᐊᓯᒃᑲᓐᓂᖓᑦᑕᐅᖅ ᐅᒥᐊᕐᔪᐊᒃᑰᖅᑎᑦᑎᕙᖕᓂᕐᒧᑦ ᓈᖕᒥᙱᓕᐅᕈᑎᐅᓚᐅᕐᑐᖅ ᐅᓇ ᑐᑭᓯᔭᐅᓯᒪᙱᓐᖓᓄᑦ, ᑲᒻᐸᓂ ᓇᓗᐃᕐᓯᓚᐅᕐᑐᑦ ᐃᒪᓐᓇ 176-ᖏᕐᓱᕐᓗᑎᒃ “ᐃᖏᕐᕋᖃᑦᑕᕐᓂᐊᕐᓂᖏᓐᓂᒃ” ᐊᕐᕌᒍᒥ, ᐃᒪᓐᓇ ᐅᖃᐅᓯᐅᓯᒪᓪᓗᓂ ᐃᖏᕐᕋᓂᐅᔪᑦ ᐃᓯᖅᐸᓪᓕᐊᔪᑦ ᐊᒻᒪ ᐊᐅᓪᓚᖅᐸᓪᓕᐊᓂᐅᔪᑦ ᓄᓘᔮᑦ ᕿᙳᐊᓂ.
“ᐃᖏᕐᕋᓂᖅ ᐃᓱᒪᒋᔭᐅᔪᖅ ᐊᑕᐅᓯᕐᒧᖓᐅᓂᐅᓪᓗᓂ ᐅᕗᖓ ᐅᕙᙵᓪᓘᓐᓃᑦ ᑐᓚᒃᑕᕐᕕᐊᓂ ᖃᓄᐃᑦᑐᑐᐃᓐᓇᕐᓄᑦ ᐅᒥᐊᕐᔪᐊᓄᑦ. ᐃᖏᕐᕋᓂᖅ ᐃᒪᐃᓕᖓᔪᖅ ᒪᕐᕈᐃᕐᓗᑎᒃ ᐃᖏᕐᕋᓗᑎᒃ ᐅᕘᓇ ᐅᑭᐅᕐᑕᖅᑐᕐᒥ ᐃᖏᕐᕋᕝᕕᒃᑯᑦ,” ᑲᒻᐸᓂᐅᔪᑦ ᐅᖃᓚᐅᕐᑐᑦ.
ᐊᒻᒪᓗ ᐹᕕᓐᓛᓐᑯ ᐱᓂᐊᕐᓂᕋᓚᐅᕐᑐᑦ “ᖄᖏᕐᓯᓚᐅᕐᓯᒪᙱᓪᓗᑎᒃ” 176-ᓂ ᐃᖏᕐᕋᓂᐅᔪᓂᒃ ᐊᕐᕌᒍᒥ.
ᑭᓯᐊᓂᓕ ᓄᖃᕐᕕᖃᕋᓗᐊᕐᑎᓪᓗᒍ, ᑲᒻᐸᓂᐅᔪᑦ ᐱᔪᓐᓇᕐᓂᖃᕈᒪᔪᑦ ᐊᕐᒍᒥ ᓴᕕᕋᔭᒃᓴᓂᒃ ᓴᖅᑭᑉᐸᓪᓕᐊᔭᖏᓐᓂᒃ ᐊᔾᔨᒌᙱᑎᑦᑎᖃᑦᑕᕈᒪᔪᑦ, ᒪᓕᒃᐸᒡᓗᑎᒃ ᐱᓕᕆᔪᓐᓇᕐᓂᐅᔪᖅ ᐊᒻᒪ ᓂᐅᕕᖅᑕᐅᔪᒪᓂᖏᑦᑎᒍᑦ.
“ᓇᓗᓇᐃᒃᑲᓐᓂᕐᓗᒍ, ᐅᓇ ᑐᑭᖃᖅᑐᖅ ᖃᖓᑐᐃᓐᓇᖅ ᐊᕐᕌᒍᒥ 11 ᒪᑐᕆᒃ ᑕᓐᔅ ᐊᐅᓪᓚᖅᑎᑕᐅᔪᕐᓇᖅᐸᑕ, ᐊᕐᕌᒍᖑᖅᐸᓪᓗ ᐊᐅᓪᓚᖅᑎᑦᑎᔪᓐᓇᕐᓗᑎᒃ 13 ᒪᑐᕆᒃ ᑕᓐᔅᓂᒃ, ᑕᐃᒪᓕ ᑕᐃᒪᐃᑦᑐᓐᓇᕈᑎᒃ ᒪᓕᒃᓯᒪᓂᒃᑯᑦ 176-ᓂ ᓴᕕᕋᔭᒃᓴᓂ ᐅᓯᑲᖅᑕᖅᑐᑦ ᐃᖏᕐᕋᓗᑎᒃ ᐊᐅᔭᐅᓂᖓᓂᒃ ᑕᐃᒪᓕ ᖁᓖᕐᓱᕐᓗᑎᒃ ᓄᓇᓯᐅᑎᑯᑕᒃ ᐅᓯᖃᑦᑕᕋᔭᖅᑐᑦ ᐅᓪᓗᖅ ᐊᑕᐅᓯᕐᒥᑦ,” ᐹᕕᓐᓛᓐᑯᑦ ᐅᖃᓚᐅᕐᑐᑦ.
(0) Comments