ᐹᕕᓐᓛᓐ ᓴᕿᑎᑦᑎᕙᓪᓕᐊᓂᕐᒧᑦ ᓴᓇᔨᖏᑦ ᑲᑐᔾᔨᖃᑎᒌᓄᑦ ᐃᓚᒋᔭᐅᓕᕐᐳᑦ, ᐊᑎᓕᐅᖅᑐᑦ ᐊᖏᖃᑎᒌᒍᑎᒥᒃ

800 ᐅᖓᑖᓃᑦᑐᑦ ᐅᖁᒪᐃᑦᑐᓂᒃ ᓄᓇᓯᐅᑎᓂᒃ ᐊᖁᑏᑦ, ᐅᓯᑲᖅᑕᐅᑎᓂᒃ ᐊᖁᑎᑦ, ᐊᔪᕈᓐᓃᕐᓯᒪᓂᕐᒧᑦ ᓴᓇᔩᑦ ᐊᒻᒪ ᐊᓯᖏᑦ ᓴᓇᔨᐅᔪᑦ ᓄᓘᔮᖕᓂ ᓴᕕᕋᔭᒃᓴᒥ ᐅᔭᕋᒃᓯᐅᕐᕕᖕᒥᑦ ᑭᒡᒐᖅᑐᖅᑕᐅᓯᕗᑦ ᑲᑐᔾᔨᖃᑎᒌᓄᑦ—ᐊᒻᒪᓗ ᐊᖏᖃᑎᒌᒍᑎᒥᒃ ᓯᕗᓕᖅᐹᒥᑦ ᐋᕿᒃᓯᓪᓗᑎᒃ ᐅᑯᐊᓗᑦ ᐹᕕᓐᓛᓐ ᓴᕕᕋᔭᒃᓴᒧᑦ ᐅᔭᕋᒃᓯᐅᕐᕕᒃᒥᑦ.

ᐱᓕᕆᕙᓪᓕᐊᓂᖅᑕᖃᓚᐅᕐᑎᓪᓗᒍ ᐅᑯᓇᙵᑦ ᓘᑯᓪ 793 (ᑲᑐᔾᔨᖃᑎᒌᑦ 793) ᐅᑯᓇᙶᖅᑐᓂᒃ ᑲᑐᔾᔨᖃᑎᒌᖕᒪᕆᖕᓂᒃ ᐱᓕᕆᔾᔪᑎᓂᒃ ᐱᓕᕆᔨᓄᑦ (International Union of Operating Engineers) ᐱᓕᕆᐊᕆᔭᐅᓕᕐᓂᑯ ᒪᐃ 2017-ᒥ, ᑲᑐᔾᔨᖃᑎᒌᑦ ᓇᓗᓇᐃᖅᑕᐅᒻᒪᕆᓚᐅᕐᐳᑦ ᑲᓇᑕᒥ ᓴᓇᕝᕕᐅᔪᓄᑦ ᐊᒃᑐᐊᔪᓂᒃ ᑲᑎᒪᔨᓄᑦ (Canadian Industrial Relations Board) 2018-ᒥᑦ.

ᐊᒻᒪᓗ ᐅᖃᓪᓚᖃᑎᖃᑲᑖᓪᓚᓚᐅᕐᑎᓪᓗᒋ ᐱᒋᐊᕐᓂᑯᓂᒃ ᓄᕕᐱᕆ 2018-ᒥᑦ, IUOE ᓘᑯᓪ 793-ᒧ ᐃᓚᒋᔭᐅᔪᑦ ᐊᖏᖃᑎᒌᓵᓚᐅᕐᑐᑦ ᓯᕗᓪᓕᖅᐹᒥᑦ ᑮᓇᐅᔭᓕᐅᕐᓂᕐᒧᑦ-ᐃᑲᔫᑎᒃᓴᓄᑦ ᐊᖏᖃᑎᒌᒍᑎᓂᒃ, ᑖᓐᓇᓗ ᐊᑐᓕᕆᐊᕐᓂᐊᖅᖢᓂ ᒪᐃ 1-ᒥ.

“79.3 ᐳᓴᓐᑎᐅᔪᑦ ᑖᔅᓱᒥᖓ ᓂᕈᐊᓚᐅᕐᒪᑕ, ᑕᒪᓐᓇᓗ ᐅᐊᑲᓪᓚᕈᓘᓪᓗᓂ,” ᑳᑐᕆᓐ ᐲᑦ, ᑐᓴᐅᒪᔾᔪᑎᓕᕆᓂᕐᒧᑦ ᑭᒡᒐᖅᑐᐃᔨ ᐅᑯᓄᖓ IUOE ᓘᑯᓪ 793 ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᐲᑦ ᐅᖃᓚᐅᕐᒥᔪᖅ ᐋᔩᖃᑎᒌᖕᓂᐅᔪᑦ ᓈᒻᒪᙱᓕᐅᕈᑎᖃᓚᐅᙱᒻᒪᑕ ᐊᒻᒪᓗ ᐊᖏᖃᑎᒌᖕᓂᐅᓪᓗᓂ ᐃᒪᓐᓇ “ᑕᒪᐃᓐᓄᑦ ᐱᖁᑎᑖᕐᓂᕐᒧ ᐱᓕᕆᖃᑎᒌᖕᓂᕐᒧᑦ ᐊᖏᕈᑎ.”

“ᑐᑭᖃᓗᐊᕐᑐᕐᓕ ᐃᒪᓐᓇ, ᑕᒪᐃᓐᓄᑦ ᐱᖁᑎᑖᕐᓂᕐᒧᑦ ᐱᓕᕆᖃᑎᒌᕐᓂᕐᒥᑦ ᐊᖏᕈᑎᖃᕐᓗᓂ, ᒪᕐᕈᖕᓂ ᐊᔾᔨᒌᙱᑦᑐᓂᒃ ᐃᓱᒪᖃᖅᑐᓂᒃ ᐋᔩᖃᑎᒌᒍᒪᓗᑎᒡᓗ. ᐹᕕᓐᓛᓐ ᐊᖏᓚᐅᕐᒪᑕ ᐋᔩᖃᑎᒋᒍᒪᒐᑦᑎᒍ. ᐱᓕᕆᖃᑎᒋᓚᐅᕐᑕᕗᑦ ᑖᔅᓱᒥᖓ ᐊᖏᕈᑎᒥ. ᖃᐅᔨᓇᓱᓚᐅᕐᑐᒍᑦ ᖃᓄᖅ ᑕᒪᐃᓐᓂ ᐊᖏᖃᑎᒌᙱᑦᑐᑦ ᓵᓚᒃᓴᕈᓐᓇᕐᑐᐃᓐᓇᐅᓗᑎᒃ,” ᐲᑦ ᐅᖃᖅᑐᖅ.

“ᐃᖅᑲᓇᐃᔭᖅᑎᒋᔭᐅᔪᑦ ᑭᒡᒐᖅᑐᖅᑕᐅᓗᑎᒃ ᑭᒡᒐᖅᑐᖅᑕᐅᔭᕆᐊᖃᕐᓂᖏᑦᑎᒍᑦ, ᐊᒻᒪᓗ ᐅᔭᕋᒃᓯᐅᕐᕕᐅᑉ ᐱᔭᕆᐊᖃᖅᑕᖏᑦ ᐃᓱᒪᒋᔭᐅᖕᒥᓗᑎᒃ,” ᐅᖃᖅᑐᖅ.

ᐊᒻᒪᓗ ᐊᖏᕈᑎ ᐃᓗᓕᖃᖅᖢᑎᒃ ᐊᑭᓕᖅᑕᐅᔾᔪᑎᒃᓴᓄᑦ ᓇᓗᓇᐃᒃᑯᑎᓂᒃ, ᐃᓚᖃᖅᖢᓂ ᐊᑭᑦᑐᕆᐅᕈᑎᒃᓴᓂᒃ ᑖᒃᑯᐊᓗ ᐱᒋᐊᕐᓂᐊᖅᖢᑎᒃ ᒪᐃ 1-ᒥ, ᐲᑦ ᐅᖃᖅᑐᖅ..

ᑮᓇᐅᔭᓕᐊᒃᓴᑦ ᒥᒃᖠᒋᐊᖅᑕᐅᓂᖏᓐᓄᑦ ᐃᖅᑲᓇᐃᔭᖅᑏᑦ ᕿᒪᒃᑕᐅᔪᑦ

ᒪᑯᓄᖓᓕ ᒫᓐᓇᓚᐅᑲᒃ 19 ᐳᓴᓐᑎᒥ ᐊᑭᒃᖠᒋᐊᕈᑏᑦ ᐅᑯᐊ ᐹᕕᓐᓛᓐ ᐋᕿᓚᐅᕐᑕᖓᑦ ᑕᒪᐃᓐᓄ ᓄᓘᔮᖕᓂᑦ ᐃᖅᑲᓇᐃᔭᖅᑎᓄᑦ ᓯᑎᐱᕆ 2015-ᖑᑎᓪᓗᒍ, ᓄᑖᖅ ᐊᖏᖃᑎᒌᒍᑎ ᑕᐃᒪᐃᑎᑦᑎᒃᑲᓐᓂᔾᔮᙱᑦᑐᖅ, ᐲᑦ ᐅᖃᕐᒥᔪᖅ.

“ᑕᒪᕐᒥᓕᒫᖅ ᐊᑭᓕᐅᑎᒃᓴᑦ ᐊᑭᓕᖅᑕᐅᔾᔪᑎᓪᓗ ᐊᖏᒡᓕᒋᐊᕈᑎᒃᓴᐅᔪᑦ ᐊᖏᕈᑎᓂᒃ ᑕᐃᒪᐃᓕᖓᑎᑕᐅᓂᐊᕐᑐᑦ ᐊᖏᕈᑎ ᐊᑑᑎᖃᕐᓂᖓᓂᒃ,” ᐲᑦ ᐅᖃᓚᐅᕐᑐᖅ ᖃᕋᓴᐅᔭᒃᑯᑦ ᑎᑎᖃᑎᒍᑦ.

ᐹᕕᓐᓛᓐ 2015-ᒥ ᐊᑭᓕᖅᑕᐅᔾᔪᑎᓂᒃ ᓇᑲᑎᕆᓚᐅᕐᓯᒪᖕᒪᑕ ᐊᔪᕐᓴᑲᑕᕈᔪᒃᑎᓪᓗᒋᑦ. ᑕᐃᔅᓱᒪᓂ, ᓴᕕᕋᔭᒃᓴᐃᑦ ᐊᑭᑭᓛᖑᑲᑕᒃᖢᑎᒃ ᐊᒻᒪᓗ ᓴᕿᑎᑦᑎᓂᕐᒥ ᑭᖑᕙᕐᓯᒪᓪᓗᑎ ᑕᒪᓐᓇ ᐊᒃᓱᕈᕈᑎᐅᓕᓚᐅᕐᓯᒪᔪᖅ.

2017-ᒥ, ᑲᒻᐸᓂᐅᔪᑦ ᐊᑭᒃᖠᒋᐊᕈᑎᒥᖕᓂᒃ ᐅᑎᖅᑎᑦᑎᓚᐅᕐᓯᒪᔪᑦ 10 ᐳᓴᓐᑎᒥᑦ ᐊᑭᑦᑐᕆᐊᖅᑎᑦᑎᑎᓪᓗᒋᑦ ᐃᖅᑲᓇᐃᖏᔭᖅᑎᖏᓐᓂᒃ ᓄᓘᔮᖕᓂᑦ.

ᑭᓯᐊᓂᓕ ᑖᒃᑯᐊ ᐃᖅᑲᓇᐃᔭᖅᑎᐅᔪᑦ ᑮᓇᐅᔭᓕᐅᙱᓐᓂᕐᓴᐅᓚᐅᕐᑐᑦ 2015-ᖑᓚᐅᕐᑐᒥ.

ᐅᓇᓕ, ᑭᓯᐊᓂ, ᐊᕐᕌᒎᒃ ᒪᕐᕉᒃ ᐊᓕᒍᖅᑎᓪᓗᒋ ᑭᐱᑎᕆᓂᕐᒥ, ᐊᒻᒪᓗ ᑭᖑᓂᖓᒍᑦ ᐊᑭᑦᑐᕆᐊᖅᑕᐅᓚᐅᙱᒻᒪᑕ. ᑕᐃᒪᓕ 10 ᐳᓴᓐᑎᐅᒐᓗᐊᕐᒥ ᐊᑦᑎᖕᓂᕐᓴᐅᓚᐅᕐᑐᑦ 2015-ᒥᓪᓕ,” ᐲᑦ ᐅᖃᖅᑐᖅ.

ᑕᐃᒪᓕ ᑕᒪᓐᓇ ᐃᓱᒫᓘᑎᙳᓚᐅᕐᐳᖅ ᖃᖓᑦᑎᐊᓵᖅ ᐋᔩᑲᑕᒃᑎᓪᓗᒋᑦ.

“ᐊᖏᖃᑎᒌᒍᑎ ᐋᔩᕈᑎᐅᓚᐅᕐᒪᑦ ᖁᐊᕐᓵᕐᓇᕋᔭᖅᑐᑦ ᐃᓱᒪᒋᔭᐅᓪᓗᑎᒃ,” ᐲᑦ ᐅᖃᖅᑐᖅ.

“ᖁᐊᕐᓵᕐᓇᙱᓐᓂᖅ ᓯᕗᓪᓕᖅ” ᐃᓕᖁᓯᒃᑯᑦ

ᓄᑖᖅ ᐊᖏᖃᑎᒌᒍᑎ ᐊᒻᒪ ᓴᙱᒃᑎᑦᑎᕚᓪᓕᕐᑐᖅ ᐃᖅᑲᓇᐃᔭᕐᕕᒃᒥᑦ ᖃᓄᐃᑎᑦᑎᑦᑕᐃᓕᓂᕐᒥᒃ, ᐲᑦ ᐅᖃᕐᒥᔪᖅ.

ᐅᓇ ᑕᐃᒪᐃᓕᓚᐅᕐᑐᖅ ᐃᓅᔪᓐᓃᓚᐅᕐᑎᓪᓗᒍ ᑑᓂ ᐋᓐᑯ, 63, ᐅᓯᑲᖅᑕᐅᑎᒥ ᐊᖁᑎᐅᔪᖅ ᐃᓅᔪᓐᓃᓚᐅᕐᑐᖅ ᑎᓯᐱᕆ 16, 2018-ᒥᑦ, ᑖᒃᑯᐊ ᑲᒻᐸᓂᐅᔪᑦ ᐊᑕᐅᓯᖅ ᓄᓇᓯᐅᑎ ᐱᕐᕈᓗᐊᕿᒍᑎᐅᓂᕋᖅᑕᐅᓪᓗᓂ.

ᐊᓯᒃᑲᓐᓂᖓ ᐃᖅᑲᓇᐃᔭᖅᑎ, ᒪᐃᑯᓪ ᓕᕙᐃ, 51, ᐃᒃᐱᐊᕐᔪᒃᒥᐅᑕᖅ, ᐃᓅᔪᓐᓃᓚᐅᕐᓯᒪᖕᒥᖕᒪᑦ ᐱᕐᕈᓗᐊᕿᓪᓗᓂ ᓯᑎᐱᕆ 2015-ᒥᑦ.

“ᐊᖏᖃᑎᒌᒍᑎᓂᒃ ᑕᒪᐃᓐᓂ ᐱᓕᕆᐊᖃᖅᑐᓂᒃ ᓇᓗᓇᙱᓚᖅ ᑕᒪᕐᒥᒃ ‘ᖁᐊᕐᓵᕐᓇᙱᓐᓂᖅ ᓯᕗᓪᓕᖅ” ᐃᓕᖁᓯᕐᒥᒃ ᐊᒻᒪ ᐹᕕᓐᓛᓐ ᓴᕕᕋᔭᒃᓴᒧᑦ ᐅᔭᕋᒃᓯᐅᕐᕕᒃ ᓇᓗᓇᐃᓚᐅᕐᐳᑦ ᑲᒪᒋᔭᒃᓴᖏᓐᓂ ᓈᒻᒪᒃᑐᓂᒃ ᓴᓇᕐᕈᑎᒃᓴᓂᒃ, ᐊᔪᕈᓐᓃᖅᓴᖅᑎᑦᑎᓂᕐᒥᒃ, ᖃᐅᔨᓴᖃᑦᑕᕐᓂᕐᒥᒃ ᐊᒻᒪ ᖁᐊᕐᓵᕐᓇᖅᑐᒦᑦᑕᐃᓕᓂᕐᒥᒃ,” ᐲᑦ ᐅᖃᖅᑐᖅ.

ᑕᐃᒪᓕ, ᐃᖅᑲᓇᐃᔭᖅᑎᐅᔪᑦ ᐅᖃᕈᓐᓇᕐᓂᕐᓴᐅᓕᖅᖢᑎᒃ ᐃᖅᑲᓇᐃᔭᕐᕕᐅᑉ ᖁᐊᕐᓵᕐᓇᙱᑦᑐᒦᓐᓂᖓᓄᑦ, ᐲᑦ ᐅᖃᖅᑐᖅ.

ᑕᐃᒪᐃᓕᐅᖃᑦᑕᖅᑐᑦ “ᐊᓯᐊᒎᖓᔪᓂᒃ ᐱᓕᕆᐊᒃᓴᑎᒍᑦ” ᖁᐊᕐᓵᕐᓇᖅᑐᓂᒃ ᐃᓱᒫᓘᑎᓂᒡᓗ ᐱᓕᕆᐊᖃᕐᓂᐊᕐᓗᓂ, ᐅᖃᕐᒥᔪᖅ.

ᐊᒻᒪᓗ, IUOE ᓘᑯᓪ 793 ᐋᓐᓂᐊᖃᖅᑕᐃᓕᓂᕐᒧᑦ ᐊᒻᒪ ᖁᐊᕐᓵᕐᓇᖅᑐᓕᕆᓂᕐᒧᑦ ᑲᑎᒪᔨᓂ ᐃᓚᒋᔭᐅᓂᐊᕐᑐᑦ ᐹᕕᓐᓛ ᓴᓂᑦᑎᐊᖓᓂᒃ ᑭᒡᒐᖅᑐᐃᔨᓂᒃ ᐊᒻᒪ ᐹᕕᓐᓛᓐ ᐃᖅᑲᓇᐃᔭᖅᑎᖏᓐᓂᒃ, ᐅᖃᖅᑐᖅ.

“ᐱᓕᕆᓂᐊᕐᑐᒍᑦ ᖁᐊᕐᓵᕐᓇᙱᑦᑐᒦᑎᑦᑎᒐᓱᖕᓂᕐᒥᑦ ᑭᒃᑯᑐᐃᓐᓇᕐᓂᒃ,”ᐱᑦ ᐅᖃᖅᑐᖅ.

ᑲᑐᔾᔨᖃᑎᒌᑦ ᐊᐅᓚᑦᑎᔪᑦ ᒨᕆᔅᐴᒡᒥᑦ ᐃᓕᓐᓂᐊᖅᑎᑦᑎᕕᖕᒥᑦ

ᑖᓐᓇᓗ ᐊᖏᕈᑎ ᐃᓗᓕᖃᖅᖢᓂ ᐋᕿᒃᓱᐃᓯᒪᔪᓂᒃ ᑮᓇᐅᔭᓕᐅᕈᑎᐅᖃᑦᑕᕐᓂᐊᖅᑐᓂᒃ, ᐃᓚᖃᖅᖢᑎᒃ ᐊᑭᑦᑐᕆᐊᕈᑎᒃᓴᓂᒃ, ᐲᑦ ᐅᖃᖅᑐᖅ.

IUOE ᓘᑯᓪ 793’s ᑲᑐᔾᔨᖃᑎᒌᖑᖃᑎᖓᑦ, ᐅᑯᐊ ᐱᓕᕆᔾᔪᑎᓂᒃ ᐊᔪᕈᓐᓃᕐᓴᕐᕕᒃᒥᑦ ᐋᓐᑎᐅᕆᐅᒥ, ᖃᐅᔨᒪᔭᐅᑦᑎᐊᖅᑐᖅ ᐊᒥᓱᓄᑦ ᓄᓇᕗᒥᐅᑕᓄᑦ.

ᐱᔾᔪᑎᖃᖅᖢᑎᒃ ᑖᓐᓇ ᐃᒻᒥᒃᑰᖓᓪᓗᓂ ᐱᓕᕆᔾᔪᑎᓂᒃ ᐃᓕᓐᓂᐊᕐᕕᐅᓪᓗᓂ ᐊᔪᕈᓐᓂᕐᓴᕐᕕᒃ ᐅᖁᒪᐃᑦᑐᓂᒃ ᓄᓇᓯᐅᑎᓂᒃ ᐊᖁᑎᓄᑦ ᒨᕆᔅᐴ, ᐋᓐᑎᐅᕆᐅ ᖃᓂᒋᔭᖓᓂ, ᑖᒃᑯᐊᓗ ᐊᔪᕈᓐᓃᖅᓴᖅᑎᑦᑎᓯᒪᓪᓗᑎᒃ ᓄᓇᕗᒥᑦ ᐃᓄᖕᓂᑦ ᐱᒋᐊᖅᖢᑎᒃ ᔭᓄᐊᕆ 2005-ᒥᑦ.

“ᐱᓕᕆᔾᔪᑎᓂᒃ ᐊᔪᕈᓐᓃᕐᓴᕐᕕᒃ ᐱᐅᓂᖅᐹᖑᖕᒪᑦ ᐊᔪᕈᓐᓂᖅᓴᖅᑎᑦᑎᓂᕐᒥ ᐃᓄᖕᓂ ᐊᑐᕈᓐᓇᕐᓯᓂᕐᒥᒃ ᐅᖁᒪᐃᑦᑐᓂᒃ ᐱᓕᕆᔾᔪᑎᓂᒃ, ᖁᐊᕐᓵᕐᓇᖅᑕᐃᓕᒪᓂᕐᒥᒃ, ᐊᒻᒪᓗ ᐃᓱᒪᒋᔭᖃᑦᑎᐊᕐᓂᕐᒥᒃ ᐃᖅᑲᓇᐃᔭᖃᑎᖏᓐᓂᒃ,” ᐲᑦ ᐅᖃᖅᑐᖅ.

ᐅᑯᐊ OETI ᐊᐅᓚᑦᑎᖕᒥᔪᑦ ᖃᓄᐃᓕᐅᕈᑎᓂᒃ ᐆᒃᕕᐅᓪ, ᐋᓐᑎᐅᕆᐅᒥ, ᑕᕝᕙᓂᓕ ᑭᕕᒃᓯᔾᔪᑎᖃᖅᑎᓂᒃ ᑕᑭᔪᓂᒃ ᐊᐅᓚᑦᑎᓂᕐᒥᒃ ᐊᔪᕈᓐᓃᕐᓴᕐᕕᐅᓪᓗᓂ.

ᐅᑯᐊ IUOE ᓘᑯᓪ 793 ᑲᑐᔾᔨᖃᑎᒌᑦ ᑭᒡᒐᖅᑐᐃᔪᑦ ᒫᓂ 15,000 ᑕᑭᔪᓂᒃ ᑭᕕᒃᓯᔾᔪᑎᓕᖕᓂᑦ ᐊᒻᒪ ᐅᖁᒪᐃᑦᑐᓂᒃ ᐱᓕᕆᔾᔪᑎᓂᒃ ᐊᖁᑎᓂᒃ ᐋᓐᑎᐅᕆᐅᒥ ᓄᓇᕗᒥᓪᓗ. ᐊᓯᖏᑦᑎᒍᑦ ᑲᑐᔾᔨᖃᑎᒌᖑᔪᓂᒡᓕ, ᑖᒃᑯᐊ ᑲᑐᔾᔨᖃᑎᒌᖑᔪᑦ ᑭᒡᒐᖅᑐᐃᔪᑦ ᒫᓂ 400,000 ᓴᓇᔨᓂᒃ ᑲᓇᑕᒥ ᐊᒻᒪ ᐊᒥᐊᓕᑲᒥ.

“ᖁᔭᒋᕙᕗᑦ ᐃᖅᑲᓇᐃᔭᓯᖅᑎᐅᔪᑦ ᐹᕕᓐᓛᓐᒥ ᐅᒃᐱᕈᓱᒃᓯᒪᓂᖏᓐᓂᒃ ᐅᑯᓂᖓ IUOE ᓘᑯᓪ 793 ᑲᑐᔾᔨᖃᑎᒌᓂᒃ ᐊᒻᒪᓗ ᓂᕈᐊᕐᓂᕐᓴᐅᓂᖏᓐᓂᒃ ᐃᖅᑲᓇᐃᔭᕐᓂᕐᒧᑦ ᐊᖏᕈᑎᓂᒃ,” ᐅᖃᖅᑐᖅ ᒪᐃᒃ ᒑᓚᒍ, IUOE ᓘᑯᓪ 793-ᒥ ᓇᖕᒥᓂᕆᔭᐅᔪᓂᒃ ᐊᐅᓚᑦᑎᔨ ᐅᖃᓚᐅᕐᑐᖅ ᑐᓴᒐᒃᓴᓕᐊᑎᒍᑦ.

ᐳᕋᐃᐊᓐ ᐸᓂ, ᐊᖓᔪᖅᑳᖅ ᐊᒻᒪ ᐊᐅᓚᑦᑎᔨ ᐹᕕᓐᓛᓐᒧᑦ, ᐅᖃᓚᐅᕐᑐᖅ ᐊᖏᕈᑎ ᐱᐅᒋᓂᕋᖅᖢᓂᐅᒃ ᓲᖃᐃᒻᒪ “ᓇᓗᓇᐃᖅᓯᓯᒪᖕᒪᑦ ᐱᓕᕆᖃᑎᒌᖕᓂᕐᒥᒃ, ᐃᓱᒪᒋᔭᖃᕐᓯᒪᑦᑎᐊᖅᖢᓂ IIBA-ᒥ (ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗ ᐊᖏᕈᑎᑦ) ᐊᒻᒪᓗ ᓴᕿᑎᑦᑎᓯᒪᓪᓗᓂ ᐹᕕᓐᓛᓐ ᐃᓚᐅᑎᑦᑎᔪᒪᓂᖏᓐᓂᒃ ᐊᒻᒪ ᐱᕙᓪᓕᐊᑎᑦᑎᔪᒪᓂᖏᓐᓂᒃ ᐃᖅᑲᓇᐃᔭᖅᑎᒋᔭᑦᑎᓐᓂᒃ.”

ᓇᓗᓇᐃᕐᓯᓪᓗᓂᓗ ᐊᖏᖃᑎᒌᒍᑎ ᐃᒪᓐᓇ “ᐊᔾᔨᐅᙱᑦᑐᖅ ᐱᓕᕆᖃᑎᒌᖕᓂᖅ, ᐃᖅᑲᓇᐃᔭᖅᑎᖏᓐᓂᒃ ᓯᕗᓪᓕᐅᑎᓯᒪᓪᓗᑎᒃ.”