ᐹᕙᓐᓛᓐᑯᑦ ᐅᖃᓚᐅᕐᑐᑦ ᓱᖁᓯᔾᔮᙱᓐᓂᕋᖅᖢᑎᒃ ᑐᒃᓯᕋᐅᑎᐅᓯᒪᔪᒥ ᓄᓇᓯᐅᑎᑯᑖᑉ ᐊᖅᑯᑎᒋᓂᐊᕐᑕᖓᓂᒃ

ᒥᑦᑎᒪᑕᓕᒃᒥᑦ ᕼᐋᒻᒪᓚᒃᑯᑦ ᐊᒻᒪ ᐊᖑᓇᓱᒃᑐᓕᕆᔨᒃᑯᑦ ᐃᓱᒫᓘᑎᖃᕐᐳᑦ ᓱᓕ ᐊᒃᑐᐃᒍᑎᓂᒃ ᑐᒃᑐᓄᑦ

ᒦᒐᓐ ᓗᐊᑦ-ᕼᐅᐊᐃᐅᓪ, ᐹᕙᓐᓛᓐᑯᓐᓄᑦ ᐊᖓᔪᖅᑳᒧᑦ ᑐᒡᓕᕆᔭᐅᔪᖅ ᐊᑐᒃᑲᓐᓂᕈᓐᓇᖅᑐᓕᕆᓂᕐᒥᒃ, ᐅᖃᓚᐅᕐᑐᑦ ᑲᒻᐸᓂᐅᔪᑦ ᐱᓇᓱᒃᓯᒪᔭᖓᓂ ᓄᓇᓯᐅᑎᑯᑖᑉ ᐊᖅᑯᑎᒋᓂᐊᕐᑕᖓᓂᒃ ᐱᓇᓱᓪᓚᕆᖕᓂᐊᕐᓂᕋᖅᖢᑎᒃ. ᑲᒻᐸᓂᐅᔪᑦ ᐸᕐᓇᐅᑎᖏᓐᓂᒃ ᓈᒻᒪᒃᓴᙱᑦᑐᑦ ᐅᖃᓚᐅᕐᑐᑦ ᑕᒪᑐᒧᖓ ᐱᓕᕆᐊᖃᒃᑲᓐᓂᕆᐊᖃᕐᓂᖏᓐᓂᒃ. (ᐊᔾᔨᙳᐊᖁᑎᒥᒃ ᐅᑯᓇᙵᑦ NIRB/Zoom)

By ᑕᐃᕕᑦ ᕕᐊᓐ
ᓄᓇᓕᖕᓂ ᑐᓴᒐᒃᓴᓕᐅᕐᑎᐅᓂᕐᒧᑦ ᐱᓕᕆᐊᒃᓴᓄᑦ ᑐᓴᒐᒃᓴᓕᐅᕐᑎ

For an English version of this story, see Baffinland says it won’t budge on proposed railway route

ᐹᕙᓐᓛᓐᑯᑦ ᐅᖃᓚᐅᕐᑐᑦ ᐅᑎᕈᓐᓇᐃᓪᓕᖕᒪᑕᒎᖅ ᐆᒧᖓ 110 ᑭᓛᒥᑕᓂ ᑕᑭᓂᓕᒃᒥ ᓄᓇᓯᐅᑎᑯᑖᒧᑦ ᐊᖅᑯᑎᒃᓴᒥ ᓴᓇᔪᒪᔭᖓᓂ ᐊᖏᒡᓕᒋᐊᖅᑎᑦᑎᔪᒪᓂᕐᒥᒃ ᓄᓘᔮᖕᓂ ᓴᕕᕋᔭᒃᓴᒥᒃ ᐅᔭᕋᒃᓯᐅᕐᕕᖓᓂᒃ, ᐅᖃᖅᖢᑎᒃ ᑖᓐᓇ ᐱᐊᓂᒃᑕᐅᓚᐅᕐᓯᒪᓂᖓᓄᑦ ᑖᒃᑯᐊ ᑲᒻᐸᓂᐅᔪᒃ ᐆᒥᖓ ᐃᓄᐃᑦ ᓇᓗᓇᐃᕐᓯᒪᓂᒃᑯᑦ ᐊᖏᕈᑎᓂᒃ ᐅᑯᓂᖓ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐊᑎᓕᐊᓚᐅᕐᓯᒪᑎᓪᓗᒋᑦ.

ᑭᓯᐊᓂᓕ ᕿᑭᖅᑕᓂ ᐃᓄᐃᒃ ᑲᑐᔾᔨᖃᑎᒌᖏᑦ ᐊᓯᐊᒍᑦ ᑕᒪᑐᒥᖓ ᑕᐅᑐᒃᑐᑦ. ᖃᕋᓴᐅᔭᒃᑯᑦ ᑎᑎᕋᖅᑕᖏᓐᓂ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ, ᑲᑐᔾᔨᖃᑎᒌᑦ ᐅᖃᓚᐅᕐᑐᑦ ᑕᕝᕘᓇᓕ ᐊᖏᖃᑎᒌᒍᑎᑎᒍᑦ, ᔪᓚᐃ 2020-ᒥᑦ ᐊᖏᕈᑎᕕᓂᖅ, ᐹᕙᓐᓛᓐ ᓴᕕᕋᔭᒃᓴᒥᑦ ᐅᔭᕋᒃᓯᐅᕐᕕᒃ ᑯᐊᐳᕇᓴᓐᑯᑦ “ᐱᓇᓱᐊᒐᖃᓚᐅᕐᒪᑦ ᖃᐅᔨᓇᓱᒡᓗᑎᒃ ᓄᓇᓕᖕᓂ ᐃᑲᔪᖅᑐᐃᔪᖃᕐᓯᒪᔭᕆᐊᒃᓴᖓᓂᒃ” ᑖᔅᓱᒧᖓ ᓄᓇᓯᐅᑎᑯᑖᑉ ᐊᖅᑯᑎᒋᓂᐊᕐᑕᖓᓄᑦ ᑐᓴᐅᒪᑎᑦᑎᓂᕐᒧᑦ ᑲᑎᒪᑎᑦᑎᑎᓪᓗᒋᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ.

“ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᙱᑦᑎᒍᓪᓕ ᐅᓇ ᓄᓇᓕᖕᓂᑦ ᐃᑲᔪᖅᑕᐅᓯᒪᔭᕆᐊᒃᓴᕐᒥᒃ ᓱᓕ ᐱᓕᕆᐊᒍᐊᓂᒃᓯᒪᙱᒻᒪᑦ,” ᐅᖃᕐᓯᒪᓚᐅᕐᑐᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᑎᑎᕋᖅᑕᖏᓐᓂᒃ.

ᕼᐋᒻᒪᓚᒃᑯᑦ ᒥᑦᑎᒪᑕᓕᒃᒥᑦ ᐊᒻᒪᓗ ᒥᑦᑎᒪᑕᓕᒃ ᐊᖑᓇᓱᒃᑐᓕᕆᔨᒃᑯᑦ ᓱᓕ ᐊᖅᑯᑎᒋᔭᐅᔪᒪᔪᒥᒃ ᓈᒻᒪᒃᓴᙱᑦᑐᑦ, ᑖᓐᓇ ᓄᓘᔮᖕᓂᙶᕐᓗᓂ ᒪᐅᖓ ᐅᐊᖕᓇᖅᐸᓯᐊᑕ ᑲᓇᖕᓇᖓᓄᙵᐅᓗᓂ ᑐᓚᒃᑕᖅᕕᖓᓄᑦ ᐅᕗᖓ ᓄᓘᔮᑦ ᕿᙳᐊᓄᑦ. ᐃᓱᒫᓘᑎᖃᕐᓯᒪᖕᒪᑕ ᑖᓐᓇ ᓄᓇᓯᐅᑎᑯᑖᒧᑦ ᐊᖅᑯᑎᐅᔪᖅ ᑐᒃᑐᓂᒃ ᕿᒫᑎᑦᑎᑐᐃᓐᓇᕋᔭᕐᓂᖓᓂᒃ.

ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦᑕ ᑭᖑᓪᓕᖅᐹᑦ ᑐᓴᕋᓱᖕᓂᕐᒧᑦ ᑲᑎᒪᔾᔪᑎᖏᑦ ᐆᒧᖓ ᐹᕙᓐᓛᓐᑯᑦ ᐊᖏᒡᓕᒋᐊᕈᒪᓂᕐᒧᑦ ᐸᕐᓇᐅᑎᖏᓐᓂᒃ ᐱᒋᐊᓕᓚᐅᕐᒪᑦ ᐊᐃᑉᐸᖓᓂ ᐱᓇᓱᐊᕈᓯᖓᓂᒃ ᓇᒡᒐᔾᔭᒥᑦ, ᐱᓇᓱᐊᕈᓯᐅᓚᐅᕐᑐᒥ, ᑖᒃᑯᐊ ᑲᒻᐸᓂᐅᔪᑦ ᐅᖃᒻᒪᕆᓚᐅᕐᑐᑦ ᑖᓐᓇ ᓄᓇᓯᐅᑎᑯᑖᑉ ᐊᖅᑯᑎᖓ ᑭᖑᓪᓕᖅᐹᒃᑯᑦ ᐅᓄᕐᑐᓂᒃ ᒦᓕᐊᓐ ᑖᓚᑲᓪᓚᖕᓂ ᐊᖏᕈᑎᐅᕌᓂᓚᐅᕐᓂᖓᓂᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ.

ᒦᒐᓐ ᓗᐊᑦ-ᕼᐅᐊᐃᐅᓪ, ᐹᕙᓐᓛᓐᑯᑦ ᐊᖓᔪᖅᑳᖓᑦᑕ ᑐᒡᓕᖓ ᐊᑐᒃᑲᓐᓂᕈᓐᓇᖅᑐᓕᕆᓂᕐᒧᑦ, ᐅᖃᓚᐅᕐᑐᖅ ᑐᓴᐅᒪᑎᑦᑎᓂᕐᒧᑦ ᑲᑎᒪᓂᕐᒥᒃ ᑎᓴᒻᒥᕐᒥᒃ ᔭᓄᐊᕆ 28-ᒥᑦ ᐅᑯᐊ ᐹᕙᓐᓛᓐᑯᑦ ᐱᓇᓱᐃᓐᓇᕐᓂᐊᕐᓂᖏᓐᓂᒃ ᓄᓇᓯᐅᑎᑯᑖᒧᑦ ᐊᖅᑯᑎᒋᔭᐅᔪᒪᔪᒥᒃ, ᐃᓱᒫᓘᑎᓂᒃ ᓴᖅᑭᑦᑐᖃᖅᐸᓪᓕᐊᒐᓗᐊᕐᑎᓪᓗᒍ ᓄᓇᓕᖕᓂ ᑲᑐᔾᔨᖃᑎᒌᖑᔪᓂᒃ.

ᐹᕙᓐᓛᓐᑯᑦ ᐅᖃᓚᐅᕐᑐᑦ ᒫᓐᓇ ᐊᖅᑯᑎᒋᔭᖓ, ᑕᐃᔭᖓ ᐊᖅᑯᑎ 3, ᐃᓱᒪᒋᔭᖃᕈᑎᐅᓯᒪᔪᖅ ᓯᕗᓂᐊᒍᑦ ᐃᓱᒫᓘᑎᐅᓂᑯᓂᒃ ᑖᒃᑯᐊ ᑲᒻᐸᓂᐅᔪᑦ ᓯᕗᓪᓕᕐᒥ ᐊᖅᑯᑎᒋᔪᒪᔭᖓᓄᑦ ᑐᒃᓯᕋᐅᑎᕕᓂᕐᓂ ᑖᓐᓇᓗ ᐊᔾᔨᐸᓗᐊᒎᖓᓇᔭᓚᐅᖅᖢᓂ ᒫᓐᓇ ᐅᓯᑲᖅᑕᖅᑐᓄᑦ ᐊᖅᑯᑎᐅᔪᒥᒃ. ᐊᐃᑉᐸᖓᓕ ᐊᖅᑯᑎ, ᑐᒃᓯᕋᐅᑎᐅᓯᒪᔪᖅ ᓄᓇᖃᖅᑐᓂᒃ ᐃᓄᖕᓂ, ᐃᓱᒪᒋᔭᐅᓚᐅᕐᒪᑦ ᖁᐊᕐᓵᕐᓇᕋᔭᕐᓂᖓᓂᒃ ᐹᕙᓐᓛᓐᑯᓐᓂ.

ᑖᒃᑯᐊ ᑲᒻᐸᓂᐅᔪᑦ ᐅᓇ ᐊᖅᑯᑎ 3 ᐊᒃᑐᐃᒍᑎᖃᙱᓛᖑᓇᔭᕐᓂᖓᓂᒃ ᑐᒃᑐᓂ — ᐊᒻᒪᓗ ᐅᕐᓱᐊᓗᖕᒥ ᐊᑐᕐᓇᙱᓛᖑᓇᔭᖅᖢᓂ ᓄᓇᓯᐅᑎᑯᑖᓄᑦ — ᐱᖓᓱᓂᒃ ᐊᖅᑯᑎᒋᔭᐅᔪᓂᒃ.

ᐹᕙᓐᓛᓐᑯᓐᓂ ᓈᒻᒪᒃᓴᖅᐸᙱᑦᑐᑦ, ᒫᓐᓇᓕ, ᐅᖃᓚᐅᕐᑐᑦ ᑖᒃᑯᐊ ᑲᒻᐸᓂᐅᔪᑦ ᑎᑎᖃᓂᒃ ᐱᓯᒪᑯᙱᓗᐊᕐᓂᖏᓐᓂᒃ ᐊᖅᑯᑎᓕᐊᖑᔪᒪᔪᒧᑦ.

ᔭᓄᐊᕆ 28-ᒥᑦ, ᐊᐱᕆᔭᐅᑎᓪᓗᒍ ᐃᒡᓗᓕᒃᒧᑦ ᒪᐃᔭᒧᑦ ᒨᓕᓐ ᕋᓰᓄᔅ, ᓗᐊᑦ-ᕼᐅᐊᐃᐅᓪ ᐅᖃᓚᐅᕐᑐᖅ ᐹᕙᓐᓛᓐᑯᑦ ᐱᐊᓂᒃᓯᓯᒪᙱᓐᓂᖏᓐᓂᒃ ᓄᓇᒥ ᖃᐅᔨᓴᕐᓂᕐᒥᒃ ᐊᖅᑯᑎᐅᓂᐊᕐᑐᒥᒃ, ᓄᓇᐅᑦ ᐅᓗᕆᐊᓇᙱᓐᓇᔭᕐᓂᖓᓂᒃ.

ᐹᕙᓐᓛᓐᑯ ᑭᖑᓂᐊᒍᑦ ᓇᓗᓇᐃᒃᑲᓐᓂᓚᐅᕐᑐᑦ ᑎᑎᕋᖅᖢᑎᒃ ᖃᕋᓴᐅᔭᒃᑯᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᓄᓇᒥ ᖃᐅᔨᓴᖅᐸᓪᓕᐊᓂᖅ ᐱᒋᐊᓚᐅᕐᓂᖓᓂᒃ 2020-ᒥᑦ ᐊᒻᒪᓗ ᑲᔪᓯᓂᐊᖅᖢᓂ 2021-ᒥᑦ “ᓇᓗᓇᐃᕐᓯᓇᓱᒃᖢᑎᒃ ᑭᓱᓪᓚᕆᖕᓂᒃ ᐱᓕᕆᓂᐅᔪᓂᒃ ᐱᖃᕆᐊᖃᕐᓂᕐᒥᒃ” ᑭᓯᐊᓂᓕ ᐊᓯᙳᖅᑎᑦᑎᓂᕐᒨᙱᑦᑐᖅ ᐊᖅᑯᑎᐅᓂᐊᕐᑐᒥ.

“ᐱᒻᒪᕆᐊᓘᖕᒪ ᖃᐅᔨᒪᓗᓂ ᑕᒪᓐᓇ ᐱᐊᓂᒃᑕᐅᒐᓗᐊᕐᐸᑦ ᐱᐊᓂᒃᑕᐅᙱᑉᐸᓪᓘᓐᓃᑦ, ᐊᓯᔾᔨᕈᑎᐅᙱᑦᑐᖅ ᐱᓇᓱᒍᒪᔭᑦᑎᓐᓂᒃ ᑖᔅᓱᒥᖓ ᐊᖅᑯᑎᖃᕈᒪᓂᕐᒥᒃ ᐅᓇ ᐱᓕᕆᓂᒃᓴᖅ 2 ᐊᖏᖅᑕᐅᓂᐊᕈᓂ,” ᓗᐊᑦ ᕼᐅᐊᐃᐅᓪ ᐅᖃᓚᐅᕐᑐᖅ ᑐᓴᐅᒪᑎᑦᑎᓂᕐᒧᑦ ᑲᑎᒪᓂᕐᒥᑦ ᔭᓄᐊᕆ 28-ᖑᑎᓪᓗᒍ.

ᐋᓐᑐᕉ ᑕᒻᐳᕆᐊᓪ, ᓄᓇᕐᔪᐊᒥ ᐆᒪᔪᓕᕆᔨᕐᔪᐊᒃᑯᑦ ᑲᓇᑕᒥ ᐱᓕᕆᔨᒻᒪᕆᒋᔭᐅᔪᖅ ᐃᒪᒃᑯᑦ ᐅᒥᐊᕐᔪᐊᒃᑯᑦ ᐃᖏᕐᕋᖃᑦᑕᕈᑎᓂᒃ ᐊᒻᒪᓗ ᓴᐳᔾᔨᓯᒪᓂᕐᒧᑦ, ᐅᖃᓚᐅᕐᑐᖅ ᐊᐱᖅᓱᖅᑕᐅᑎᓪᓗᒍ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ ᑖᓐᓇ ᖃᐅᔨᓴᕐᓂᐅᔪᖅ ᐱᐊᓂᒃᑕᐅᓯᒪᙱᒃᑯᓂ ᐅᓇ ᐊᖅᑯᑎᐅᓇᔭᕐᑐᖅ ᐊᓯᙳᖅᑕᐅᑐᐃᓐᓇᕆᐊᖃᕋᔭᕐᒪᑦ ᐊᖏᖅᑕᐅᕌᓂᓚᐅᕐᑎᓪᓗᒍ.

ᖃᐅᔨᓴᕐᓂᖅ ᓴᖅᑭᑎᑦᑎᓯᒪᔪᖅ “ᐃᓚᖓᒍᑦ ᓄᓇᐅᑉ ᐅᖁᒪᐃᑦᑐᓂᒃ ᖄᖓᒎᕐᕕᐅᔪᓐᓇᕆᐊᒃᓴᖏᓐᓂᒃ ᐊᒻᒪ ᓄᓇᓯᐅᑎᑯᑖᒧᑦ ᐊᖅᑯᑎᒃᓴᖅ ᓴᓇᔭᐅᑎᓪᓗᒍ. ᐊᒻᒪᓗ ᑕᐃᒪᐃᓯᒪᙱᒻᒪᑕ,” ᐅᖃᖅᑐᖅ. “ᐱᓕᕆᓂᐅᑎᓪᓗᒍ ᑕᐃᒪᓐᓇ ᐊᖏᔪᐊᓘᓪᓗᓂ, ᑐᓂᔭᕆᐊᖃᙱᓐᓇᑦᑎᒍᑦ ᐹᕙᓐᓛᓐᑯᑦ ᑮᓇᐅᔭᒃᓴᒥ ᑎᑎᕋᕐᓯᒪᙱᑦᑐᒥᒃ.”

ᐹᕙᓐᓛᓐᑯ ᐅᖃᓚᐅᕐᑐᑦ ᐊᓯᖏᑦ ᖃᐅᔨᓴᕈᑎᐅᔪ ᓂᕈᐊᕐᓯᒪᓂᕐᓴᐅᓂᖏᑦ ᓄᓇᓯᐅᑎᑯᑖᒧᑦ ᐊᖅᑯᑎᐅᓂᐊᕐᑐᒥᒃ, ᐃᓱᒪᒋᔭᖃᕐᓯᒪᓪᓗᑎᒃ ᑐᒃᑐᐃᑦ ᖃᓄᐃᑕᐅᑦᑕᐃᓕᒋᐊᖃᕐᓂᖏᓐᓂᒃ, ᐊᑐᒃᑲᓐᓂᕈᓐᓇᖅᑐᓕᕆᓂᖅ ᐊᒻᒪ ᐃᓕᖁᓯᒃᑯᑦ ᖃᐅᔨᒪᔭᐅᔪᑐᖃᕐᓂᒃ.

ᐊᒻᒪᓗ ᒫᓐᓇ ᓄᓇᓯᐅᑎᑯᑖᒧᑦ ᐊᖅᑯᑎᐅᓂᐊᕐᑐᑦ, ᐅᖃᓚᐅᕐᑐᖅ, ᐋᖅᑭᒃᓯᒪᔪᖅ ᐃᓄᖕᓂᑦ ᐱᓕᕆᖃᑎᖃᕐᓂᒃᑯᑦ.

Share This Story

(0) Comments

Join the Conversation

Your email address will not be published. Required fields are marked *

*