ᐹᕙᓐᓛᓐᑯᑦ ᐊᑭᓕᕐᓯᔭᕆᐊᖃᕐᓂᐊᕐᑐᑦ ᐃᓄᖕᓂᑦ ᐊᐅᓚᑕᐅᔪᒧᑦ ᖃᐅᔨᓴᖅᐸᓪᓕᐊᓂᕐᒧᑦ ᐅᔭᕋᒃᓯᐅᕐᕕᒃ ᐊᖏᒡᓕᒋᐊᖅᑕᐅᕙᓪᓕᐊᓂᖓᓂᒃ, ᐅᖃᖅᑐᖅᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐅᖃᕐᑐᑦ ᐃᓄᐃᑦ ᑲᒪᔨᐅᓂᖏᓐᓄᑦ ᐸᕐᓇᐅᑎᑦ ᓯᕗᒧᑦ ᐱᕙᓪᓕᐊᒍᑎᐅᔪᓐᓇᕐᓂᖏᓐᓂᒃ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐅᖃᕐᑐᑦ ᐅᓄᕐᑐᐃᑦ ᐊᕙᑎᓕᕆᓂᕐᒨᖓᔪᑦ ᐃᓱᒫᓘᑎᒋᔭᐅᔪᑦ ᓱᓕ ᐱᑕᖃᕐᑐᑦ ᐅᑯᐊ ᐹᕙᓐᓛᓐᑯᑦ ᑐᒃᓯᕋᐅᑎᒋᔭᖓ ᐅᔭᕋᒃᓯᐅᕐᕕᒃᒥᑦ ᐊᖏᒡᓕᒋᐊᖅᑎᑦᑎᔪᒪᓂᖓᓄᑦ, ᑭᓯᐊᓂᓕ ᐊᖏᖃᑎᒌᒍᑎ ᑲᒻᐸᓂᐅᔪᓄᑦ ᓯᕗᒧᑦ ᐱᒋᐊᕈᑎᐅᔪᓐᓇᕈᑎᐅᕗᖅ. (ᐊᔾᔨᙳᐊᖅ ᐅᑯᓇᙵᑦ ᐹᕙᓐᓛᓐ).

By ᑕᐃᕕᑦ ᕙᓐ

For an English version of this story, see Baffinland to pay for Inuit-led program for monitoring impacts of proposed mine expansion, says QIA

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐅᖃᓚᐅᕐᑐᑦ ᐃᓱᒫᓘᑎᒋᔭᐅᔪᑦ ᐃᓚᖏᑦ ᐆᒧᖓ ᐹᕙᓐᓛᓐᑯᑦ ᐅᔭᕋᒃᓯᐅᕐᕕᒃᒥᑦ ᐊᖏᒡᓕᒋᐊᖅᑎᑦᑎᔪᒪᓂᖓᓄᑦ ᐱᓕᕆᐊᖑᔪᓐᓇᕐᓂᐊᕐᓂᖏᓐᓂᒃ ᐊᖏᖃᑎᒌᖕᓂᒃᑯᑦ ᑲᒻᐸᓂᐅᔪᓂᒃ ᒪᐅᓇ ᐃᓄᐃᑦ ᐊᕙᑎᒋᔭᒥᒃ ᖃᐅᔨᓴᖅᐸᓪᓕᐊᓂᕐᒧᑦ ᐃᓱᒪᓕᐅᕆᓂᕐᓴᐅᓗᑎᒃ.

ᐅᓇ ᑕᐃᒪᐃᓕᖓᔪᖅ ᐆᒧᖓ ᐅᕆᑦᓱᑦ ᐸᐃᑕᓐ, ᑲᑐᔾᔨᖃᑎᒌᒃᑯᑦ ᑐᑭᒧᐊᖅᑎᑦᑎᔨᖓ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐊᒻᒪ ᐱᓕᕆᖃᑎᖃᕐᓂᕐᒥᒃ. ᑖᓐᓇ ᑕᐃᒪᐃᓕᓚᐅᕐᑐᖅ ᐅᖃᓪᓚᒍᓐᓇᕐᑎᑕᐅᑎᓪᓗᒍ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᑐᓴᐅᒪᑎᑦᑎᓂᕐᒧᑦ ᐊᖏᒡᓕᒋᐊᖅᑎᑦᑎᓂᕐᒥ ᕕᕝᕗᐊᕆ 4-ᒥ ᑲᑎᒪᑎᑦᑎᓪᓗᒋᑦ.

“ᐅᓇ ᑕᐅᑐᒃᑲᑦᑎᒍᑦ ᐃᓄᐃᑦ ᓴᙱᓂᖃᕐᓂᕐᓴᐅᓕᕐᓂᐊᕐᓂᖏᓐᓂᒃ ᐱᓕᕆᐊᒧᑦ ᐊᐅᓚᑦᑎᓂᒃᑯᑦ,” ᐅᖃᖅᑐᖅ.

ᑲᑎᒪᔨᒃᑯᑦ ᑐᙵᓱᒃᑎᑦᑎᔨᐅᓚᐅᕐᒪᑕ ᑲᑎᒪᓂᐅᔪᓂᒃ ᐱᓇᓱᐊᕈᓰᖕᓂ ᒪᕐᕉᖕᓂ ᐅᑯᐊ ᐹᕙᓐᓛᓐᑯᑦ ᐊᖏᒡᓕᒋᐊᖅᑎᑦᑎᔪᒪᓂᖓᓄᑦ ᐆᒥᖓ ᓄᓘᔮᖕᓂ ᓴᕕᕋᔭᒃᓴᒧᑦ ᐅᔭᕋᒃᓯᐅᕐᕕᒃᒥ ᕿᑭᖅᑖᓘᑉ ᐅᐊᑉᓇᕐᐸᓯᐊᓃᑦᑐᒥᒃ ᑲᔪᓯᑎᑕᐅᓇᔭᕆᐊᒃᓴᖓᓂ.

ᑲᒻᐸᓂᐅᔪᑦ ᐱᔪᒪᖕᒪᑕ 110 ᑭᓛᒥᑕᓂ ᑕᑭᓂᓕᖕᒥ ᓄᓇᓯᐅᑎᑯᑖᒧᑦ ᐊᖅᑯᑎᒃᓴᒥᒃ ᐅᔭᕋᒃᓯᐅᕐᕕᖕᒥᙶᖅᑐᒥ ᐅᕗᖓ ᓄᓘᔮᑦ ᕿᙳᐊᓄᑦ, ᐊᒻᒪ ᑐᓚᒃᑕᕐᕕᓕᐅᒃᑲᓐᓂᕐᓗᑎᒃ ᓄᓘᔮᑦ ᕿᙳᐊᓂ, ᐅᒥᐊᕐᔪᐊᑦ ᐅᓄᕐᓯᒃᑲᓐᓂᕐᓗᑎᒃ ᐅᓯᑲᖅᑕᖃᑦᑕᕐᓂᐊᕐᑐᑦ, ᐊᒻᒪᓗ ᐊᖏᒡᓕᒋᐊᖅᑎᑦᑎᓗᑎᒃ ᒫᓐᓇ ᓴᕿᑎᑉᐸᓪᓕᐊᔭᖓᓂᒃ 6 ᒥᓕᐊᓐ ᑕᓐᔅ ᓴᕕᕋᔭᒃᓴᖅ ᐊᕐᕌᒍᒧᑦ ᒪᐅᖓ 12 ᒥᓕᐊᓐᒧᑦ ᐊᕐᕌᒍᒧᑦ.

ᐃᑲᕐᕋᒥ ᐅᖃᓪᓚᒍᓐᓇᖅᑎᑕᐅᑎᓪᓗᒍ, ᐸᐃᑕᓐ ᐅᖃᐅᓯᖃᕈᓘᔭᓚᐅᕐᑐᖅ ᐊᕙᑎᓕᕆᓂᕐᒨᖓᔪᓂᒃ ᐃᓱᒫᓘᑎᒋᔭᐅᔪᓂᒃ ᐊᒃᑐᐊᔪᓂᒃ ᑐᒃᓯᕋᐅᑎᒋᔭᐅᔪᒧᑦ ᐱᓕᕆᐊᒃᓴᒧᑦ ᐊᒻᒪ ᐅᖃᖅᖢᓂ ᑖᒃᑯᐊ ᓱᓕ ᐱᓕᕆᐊᖑᔭᕆᐊᖃᕐᓂᕋᖅᖢᓂᒋᑦ. ᐃᓚᒋᔭᐅᓚᐅᕐᑐᓪᓕ ᑐᙵᕕᓕᐊᖑᔪᒃᓴᖅ ᐊᖅᑯᑎᒃᓴᒧᑦ ᐃᒪᐃᔭᖅᐸᓪᓕᐊᓂᖓ, ᑕᒫᓃᑉᐸᙱᑦᑐᓂᒃ ᐆᒪᔪᖃᓕᑐᐃᓐᓇᕆᐊᖃᕐᓂᖅ, ᑐᒃᑐᐃᑦ ᐃᑳᕐᕕᒋᕙᒃᑕᖏᑦ, ᓄᓇᓯᐅᑎᑯᑖᑉ ᐊᖅᑯᑎᒋᓂᐊᕐᑕᖓ, ᓯᑯᖃᕈᓐᓃᕐᐸᓪᓕᐊᖃᑦᑕᕐᓂᖅ ᐊᒻᒪᓗ ᐃᖃᓗᐃᑦ ᖃᓄᐃᙱᒃᑲᓗᐊᕆᐊᒃᓴᖏᓐᓂᒃ. ᐸᐃᑕᓐ ᐅᖃᓚᐅᕐᒥᔪᖅ ᑲᑐᔾᔨᖃᑎᒌᖑᔪᑦ ᑕᑯᔪᒪᓂᕋᖅᖢᓂᒋᑦ ᐱᐅᓯᕚᓪᓕᖅᑎᑦᑎᓗᑎᒃ ᐃᓄᖕᓂ ᐃᖅᑲᓇᐃᔭᖅᑎᑦᑎᓂᕆᕙᒃᑕᖏᓐᓂᒃ ᐊᒻᒪ ᐊᔪᕈᓐᓃᕐᓴᕈᑎᐅᔪᓐᓇᖅᑐᓂᒃ ᑖᑯᓇᓂ ᑲᒻᐸᓂᐅᔪᓂᒃ ᐃᓄᖕᓄᑦ.

ᐸᐃᑕᓐ ᐅᖃᓚᐅᕐᑐᖅ ᐹᕙᓐᓛᓐᑯᑦ ᖃᐅᔨᓴᕈᑎᒋᒋᐊᕐᓯᒪᔭᖓ ᓂᔪᑏᑦ ᐃᒪᕐᒥᐅᑕᓪᓗ ᐅᓄᕐᓂᕆᔭᖏᓐᓂᒃ ᓈᒻᒪᙱᓗᐊᕐᓂᖓᓂᒃ, ᐃᓚᖃᒃᑲᓐᓂᕆᐊᖃᕐᓂᕋᖅᖢᓂᐅᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐊᒻᒪᓗ ᐅᑯᐊ ᐹᕙᓐᓛᓐᑯᑦ ᑭᖑᓪᓕᕐᐹᖅ ᐊᕙᑎᓕᕆᓂᕐᒧᑦ ᐅᓂᒃᑳᖏᑦ “ᓈᒻᒪᙱᓗᐊᕐᑐᒃᑯᑦ ᐃᓱᒪᒋᔭᖃᕐᓯᒪᖕᒪᑕ” ᐊᒃᑐᐃᒍᑎᓂᒃ ᐃᓄᐃᑦ ᐊᑐᕈᓐᓇᖅᑕᖏᓐᓄᑦ.

ᐅᖃᓚᐅᕐᑐᖅ ᑲᒻᐸᓂᐅᔪᑦ ᖃᐅᔨᔭᖏᑦ “ᐃᓄᐃᑦ ᐃᓕᖅᑯᓯᒃᑯᑦ ᖃᐅᔨᓯᒪᔭᖏᓐᓂᒃ ᒫᓐᓇᒧᑦ ᐃᓚᖃᙱᑦᑎᐊᕐᒪᑕ.”

“ᐃᓄᐃᑦ ᑲᒪᔨᐅᖕᒪᑕ ᐅᑯᓂᖓ ᓄᓇᓂᒃ ᐊᒻᒪᓗ ᑐᑭᖃᖅᑐᒃᑯᑦ ᐊᒻᒪ ᐱᓕᕆᖃᑕᐅᓂᒃᑯᑦ ᐱᓕᕆᖃᑎᖃᕐᓗᑎᒃ ᐊᕙᑎᓕᕆᓂᒃᑯᑦ ᐊᐅᓚᑦᑎᓂᕐᒥᒃ ᐱᓕᕆᐊᒃᓴᒥ ᐱᓕᕆᐊᖑᓂᖓᓂ, ᐸᐃᑕᓐ ᐅᖃᕐᑐᖅ. “ᐱᓕᕆᐊᖑᔪᑦ ᓈᒻᒪᓈᕐᓯᒪᔭᕆᐊᖃᕐᒪᑦ ᐃᓄᐃᑦ ᓄᓇᖏᓐᓄᑦ ᐊᒻᒪ ᐃᓕᖁᓯᖏᓐᓄᑦ.”

ᑕᐃᒪᓕ ᐅᓇ ᐃᓄᐃᑦ ᖃᐅᔨᒪᓂᖏᑦᑎᒍᑦ ᐊᖏᕈᑎ (Inuit Certainty Agreement) ᐊᑐᕆᐊᖃᕐᐳᖅ. ᐊᖏᕈᑎ, ᐊᖏᕈᑎᐅᓂᑯ ᑲᒻᐸᓂᐅᔪᓄᑦ ᐊᒻᒪ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄ ᔪᓚᐃᖑᓚᐅᕐᑐᒥ, ᐃᒪᓐᓇ ᐃᓄᐃᑦ ᑲᒪᔨᐅᓂᖏᓐᓄᑦ ᐸᕐᓇᐅᑎᑕᖃᕐᓗᓂ ᐃᓄᖕᓂ ᐃᖅᑲᓇᐃᔮᖃᖅᑎᑦᑎᔭᕆᐊᖃᕐᓂᕐᒥ ᐅᑯᑎᒎᓇᖅ ᐃᑲᔫᑎᑖᕈᑎᓂᒃ ᐹᕙᓐᓛᓐᑯᓐᓂᒃ ᐊᑐᕐᓗᑎ ᐅᒧᖓ ᐅᔭᕋᒃᓯᐅᕐᕕᐅᑉ ᐊᕙᑎᒋᔭᖓᓂᒃ ᐊᒃᑐᐃᒍᑎᐅᓇᔭᕐᑐᓂᒃ ᖃᐅᔨᓴᖅᐸᓪᓕᐊᖃᑦᑕᕐᓂᐊᕐᑐᓂᒃ.

ᑖᓐᓇ ᐊᖏᕈᑎ ᐱᔾᔪᑎᒋᓪᓗᒍ, ᐹᕙᓐᓛᓐᑯᑦ ᐊᖏᕐᓯᒪᔪᑦ ᐊᑭᓕᓱᐃᓂᐊᕐᓂᕋᖅᖢᑎᒃ ᑕᐃᒪᐃᓕᐅᕈᑎᒃᓴᓄᑦ ᐱᓕᕆᐊᒃᓴᒥᒃ 2021-ᒥ 2022-ᒧ, ᐊᒻᒪᓗ ᐅᔭᕋᒃᓯᐅᕐᕕᒃ ᐱᓕᕆᕝᕕᐅᓕᒫᕐᓂᖓᓄᑦ, ᑖᓐᓇ ᐊᖏᒡᓕᒋᐊᖅᑎᑦᑎᔪᒪᓂᖓᑦ ᐊᖏᖅᑕᐅᒃᐸᑦ, ᑕᐃᒪᓐᓇ ᖃᕋᓴᐅᔭᒃᑯᑦ ᑎᑎᕋᖅᑕᐅᓂᑯᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐅᖃᕐᓯᒪᔪᑦ.

ᐸᐃᑕᓐ ᐅᖃᓚᐅᕐᑐᖅ ᑖᓐᓇ ᐱᓕᕆᐊᒃᓴᖅ ᑲᑎᒪᔨᖃᕋᔭᕐᖢᓂ ᐃᓄᖕᓂ ᖃᐅᔨᓴᖃᑦᑕᕐᓂᐊᕐᑐᓂᒃ ᐊᓯᙳᖅᐸᓪᓕᐊᓂᐅᔪᓂᒃ ᐊᕙᑎᒋᔭᐅᔪᒥᑦ, ᐊᒻᒪᓗ ᐃᓄᖕᓂᒃ ᐊᒻᒪ ᓄᓇᓕᖕᓂᙶᖅᑐᓂᒃ ᖃᐅᔨᓴᖃᑦᑕᕐᓂᐊᕐᑐᓂᒃ ᐅᓇ ᐃᓄᐃᑦ ᖃᐅᔨᒪᔭᑐᖃᖓ ᐊᑐᖅᑕᐅᓯᒪᒐᓗᐊᕆᐊᒃᓴᖓᓂᒃ.

ᐅᑯᐊ ᖃᐅᔨᓴᕐᓂᐅᔪᑦ ᑲᑎᕐᓱᐃᕙᓪᓕᐊᒍᑎᐅᓂᐊᕐᑐᑦ ᑐᓴᐅᒪᔭᐅᕙᓪᓕᐊᔪᓂᒃ, ᓈᒻᒪᙱᓕᐅᕈᑎᓂᒃ ᖃᐅᔨᒋᐊᖅᐸᒡᓗᑎᒃ ᐊᒻᒪ ᓇᓗᓇᐃᕐᓯᕙᒡᓗᑎᒃ ᐊᒻᒪᓗ ᖃᓄᐃᓕᐅᕈᑎᐅᓇᔭᕐᑐᓂᒃ ᓈᒻᒪᙱᓕᐅᕈᑎᐅᔪᓄᑦ. ᐃᓚᖏᑦ ᖃᓄᐃᓕᐅᕈᑎᐅᔪᑦ ᐃᓚᖃᑐᐃᓐᓇᕆᐊᖃᖅᖢᑎᒃ ᖃᐅᔨᓴᖃᑦᑕᕐᓂᕐᓴᐅᓗᑎᒃ ᐊᓯᙳᕈᑎᓂᒃ ᐹᕙᓐᓛᓐᑯᑦ ᐱᓕᕆᓂᖏᑦᑎᒍᑦ, ᐅᕝᕙᓘᓐᓃᑦ ᑮᓇᐅᔭᖅᑖᖃᑦᑕᕐᓂᒃᑯᑦ, ᐸᐃᑕᓐ ᐅᖃᖅᑐᖅ.

Share This Story

(0) Comments