ᐹᕙᓐᓛᓐ ᑐᒃᓯᕋᖅᐳᑦ ᐅᒥᐊᕐᔪᐊᒃᑰᖅᑎᑦᑏᓐᓇᕐᓂᕐᒥ 6 ᒥᓕᐊᓐ ᑕᓐᓂ ᓴᕕᕋᔭᒃᓴᓂ ᐅᕘᓇ ᕿᙳᐊᓂ ᐊᕐᕌᒍᒃᑲᓐᓂᕐᓂ ᒪᕐᕉᖕᓄᑦ

For English version, see Baffinland applies to continue shipping 6M tonnes of ore through Milne Inlet for 2 more years

ᐹᕙᓐᓛᓐ ᓴᕕᕋᔭᒃᓴᒧᑦ ᐅᔭᕋᖕᓂᐊᕐᕕᖓ ᑎᒥᖓᑦ ᐅᒥᐊᕐᔪᐊᒃᑰᖅᑎᑦᑏᓐᓇᕈᒪᕗᑦ 6 ᒥᓕᐊᓐ ᑕᓐᓂ ᕿᙳᐊᓂ ᑕᐃᑯᖓ 2024−ᒧᑦ.

ᐸᕐᓇᐅᑎ ᓇᓗᓇᐃᖅᑕᐅᓯᒪᕗᖅ ᑎᑎᖅᑲᖁᑕᐅᔪᓂ ᑲᒻᐸᓂᐅᔪᖅ ᑎᑎᕋᐃᓚᐅᖅᑕᖓᓂ ᑕᖅᑭᐅᓚᐅᖅᑐᒥ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ. ᑐᒃᓯᕋᐅᑕᐅᔪᒥ ᐱᓕᕆᓂᖓ ᐅᖃᖅᓯᒪᕗᖅ ᐊᖏᖅᑕᐅᓂᖓᓂ ᓄᖅᑲᖅᑎᑦᑎᓂᐊᖅᐳᖅ ᒥᑭᒡᓕᒋᐊᕆᐊᖃᕐᓂᐅᔪᒥ ᐊᐅᓚᑕᐅᓂᖏᓐᓂ ᐅᔭᕋᖕᓂᐊᕐᕕᖕᒥ, ᐃᓚᖃᕈᓐᓇᖅᑐᒥ ᐃᖅᑲᓇᐃᔮᓂ ᓇᑲᑎᕆᔭᕆᐊᖃᕐᓂᐅᔪᒥ.

ᐹᕙᓐᓛᓐᑯᑦ <ᐃᓴᓐᓯᖃᖅᐳᖅ ᐱᔪᓐᓇᖅᑎᑦᑎᔪᒥ ᑲᒻᐸᓂᐅᔪᒥ ᐅᒥᐊᕐᔪᐊᒃᑰᖅᑎᑦᑎᔪᓐᓇᕐᓂᖏᓐᓂ 4.2 ᒥᓕᐊᓐ ᑕᓐᓂ ᐊᕐᕌᒍᑕᒫᒥ ᓄᓘᔭᕐᓂ ᓴᕕᕋᔭᒃᓴᒥ ᐅᔭᕋᖕᓂᐊᕐᕕᖓᓂ, ᐃᓂᖃᖅᑐᒥ ᐅᐊᖕᓇᒥ ᕿᑭᖅᑖᓗᖕᒥ. ᑭᓯᐊᓂ, ᐱᓯᒪᕗᖅ ᕿᓚᒻᒥᐅᔪᒥ ᐱᔪᓐᓇᐅᑎᓂ ᑕᐃᒪᙵᓂ 2018−ᒥ ᐊᖏᒡᓕᒋᐊᖅᓯᓂᖏᓐᓂ ᑕᐃᔅᓱᒥᖓ ᑭᒡᓕᐅᔪᒥ 6 ᒥᓕᐊᓐ ᑕᓐᓄᑦ.

ᐊᖏᒡᓕᒋᐊᕐᓂᐅᔪᖅ ᓯᕗᓪᓕᕐᒥ ᑐᕌᖓᓂᖃᓚᐅᖅᐳᖅ ᐊᒡᔭᖅᓯᓂᕐᒥ ᑲᒻᐸᓂᐅᔪᒥ ᐃᓄᓕᒫᓄᑦ ᑐᓵᑎᑦᑎᓂᐅᔪᒥ ᑐᒃᓯᕋᐅᑎᖓᓐᓂ ᓴᓇᓂᕐᒧᑦ ᐊᖏᔪᒥ ᐊᖏᒡᓕᒋᐊᖅᑕᐅᓂᖓᓂ ᓄᓘᔭᕐᓂ, ᑕᐃᔭᐅᔪᒥ ᐱᓕᕆᐊᖑᔪᒥ 2−ᒥ, ᐊᖏᖅᑕᐅᒍᓂ ᐱᔪᓐᓇᖅᑎᑦᑎᓇᔭᓚᐅᖅᑐᒥ ᐹᕙᓐᓛᓐᑐᓐᓂ ᐅᒥᐊᕐᔪᐊᒃᑰᖅᑎᑦᑎᓂᕐᒥ 12 ᒥᓕᐊᓐ ᑕᓐᓂ ᓴᕕᕋᔭᒃᓴᓂ ᕿᙳᐊᓂ ᐊᔮᖅᑕᐅᔪᓂ ᐅᔭᕋᖕᓂᐊᕐᕕᖕᒥ ᑲᖏᖅᖢᕐᔪᐊᒃᑯᑦ.

ᐅᑭᐅᖅᑕᖅᑐᒥ ᐱᓕᕆᓂᐅᔪᒥ ᒥᓂᔅᑕᖓ ᑖᓂᐅᓪ ᕚᓐᑎᐅᓪ ᐊᖏᓚᐅᙱᓚᖅ ᐱᓕᕆᐊᖑᔪᒥ 2−ᒥ ᐊᕐᕌᓂᐅᓚᐅᖅᑐᒥ, ᐊᒻᒪ ᐹᕙᓐᓛᓐᑯᑦ ᓴᖑᑎᑦᑎᓚᐅᖅᐳᑦ ᐊᔾᔨᒋᙱᑕᖓᓂ ᐸᕐᓇᐅᑎᒧᑦ ᐸᐸᑦᑏᓐᓇᕐᓂᕐᒧᑦ ᐊᐅᓚᑕᐅᓂᖏᓐᓂ ᐱᓕᕆᐅᔮᕐᔪᒃᑎᓪᓗᒋᑦ ᐊᖏᖅᑕᐅᓯᒫᓂᒃᑐᒥ ᓄᓇᓯᐅᑎᑯᑖᒃᑯᑦ ᐱᓕᕆᐊᒃᓴᐅᔪᒥ ᓂᒋᕐᒥ ᐅᔭᕋᖕᓂᐊᕐᕕᖕᒥ ᐅᕘᓇ ᑲᖏᖅᖢᕐᔪᐊᒃᑯᑦ.

ᐹᕙᓐᓛᓐ ᐊᐅᓚᑦᑎᔨᒻᒪᕆᖓ ᐳᕋᐃᔭᓐ ᐸᓂ ᐅᖃᐅᓯᖃᓚᐅᖅᐳᖅ ᕕᕗᐊᕆᒥ ᑲᒻᐸᓂ ᐸᕐᓇᖕᓂᖏᓐᓂ ᐅᑎᕐᓂᐊᕐᓂᖏᓐᓂ ᐱᓕᕆᓂᕐᒧᑦ ᐱᓕᕆᐊᒃᓴᐅᔪᒧᑦ ᑭᖑᓂᐊᒍᑦ ᑕᒪᑐᒪᓂ ᐊᕐᕌᒎᔪᒥ.

ᐲᑕ ᐋᒃᒥᓐ, ᐹᕙᓐᓛᓐᑯᑦ ᐊᖓᒧᖅᑳᖓ ᐋᔩᖃᑎᒌᖕᓂᐅᔪᒥ, ᐅᖃᓚᐅᖅᐳᖅ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᐱᔪᓐᓇᐅᑎᒥᒃ ᐅᒥᐊᕐᔪᐊᒃᑰᖅᑎᑦᑎᓂᕐᒥ 6 ᒥᓕᐊᓐ ᑕᓐᓂ ᑕᐃᑯᖓ 2024−ᒧᑦ ᐃᑲᔪᕐᓂᐊᖅᐳᖅ ᐱᓂᕐᒥ ᐅᔭᕋᖕᓂᐊᕐᕕᐅᑉ ᐊᑯᓂᐅᔪᒥ ᑐᙵᓂᕆᔭᖓᓂ ᐱᓇᓱᐊᖅᑎᓪᓗᒍ ᑲᖏᖅᖢᕐᔪᐊᖅ ᐱᓕᕆᐊᒃᓴᐅᔪᒥ.

“ᓂᕆᐅᖕᓂᕆᔭᕗᑦ ᐅᓇ ᑐᒃᓯᕋᕐᓂᐅᔪᖅ ᐱᓕᕆᐊᖑᓂᐊᕐᓂᖓᓂ ᐊᑯᓂᐅᓗᐊᙱᑦᑐᒥ ᐱᔪᓐᓇᖅᑎᑦᑎᓂᐊᖅᑐᒥ ᓄᖅᑲᖅᑎᑕᐅᔭᕆᐊᖃᙱᓪᓗᓂ ᐱᓕᕆᓂᐅᔪᒥ ᑕᐃᑲᓂ 2023-ᒥ,” ᐋᒃᒥᓐ ᐅᖃᓚᐅᖅᐳᖅ.

ᑐᓂᔭᐅᓂᐅᔪᒥ ᐊᕙᑎᓕᕆᔨᒃᑯᓐᓄᑦ ᑲᑎᒪᔨᐅᔪᓄᑦ ᐃᓚᖃᖅᐳᖅ ᖃᔅᓯᒐᓚᖕᓂ ᑎᑎᖅᑲᖁᑕᐅᔪᓂ, ᐃᓚᖃᖅᑐᒥ ᐅᖃᐅᓯᒃᓴᓕᐊᖑᔪᓂ ᒪᐃᔭᓂ ᐊᒻᒪ ᐊᖑᓇᓱᒃᑐᓕᕆᔨᒃᑯᓐᓂ ᐊᒻᒪ ᒥᑭᒋᐊᕐᓂᐊᖅᑎᒃᑯᓐᓂ ᑲᑐᔾᔨᖃᑎᒌᖑᔪᓂ ᓄᓇᓕᖕᓂ ᐊᕙᓗᔭᖓᓂ ᐊᕕᒃᑐᖅᓯᒪᓂᐅᔪᒥ .

ᒪᐃᔭᐅᔪᑦ ᒥᑦᑎᒪᑕᓕᖕᒥ, ᐃᒡᓗᓕᒃ, ᐃᒃᐱᐊᕐᔪᒃ ᐊᒻᒪ ᓴᓂᕋᔭᖕᒥ ᑐᓂᓯᓯᒪᔪᐃᓐᓇᐅᕗᑦ ᐅᖃᐅᓯᒃᓴᓂ ᖃᐃᖁᔨᔪᓂ ᐱᐅᔪᒥ ᐃᓱᒪᓕᕆᓂᐅᔪᒥ ᐊᕙᑎᓕᕆᒡᒃᑯᓐᓂ ᑲᑎᒪᔨᐅᔪᓂ ᑕᒪᑐᒪᓂ ᐊᐅᔭᐅᔪᒥ.

ᖃᔅᓯᒐᓚᖕᓂ ᐊᖑᓇᓱᒃᑐᓕᕆᔨᒃᑯᓐᓂ ᐊᒻᒪ ᒥᑭᒋᐊᕐᓂᐊᖅᑎᒃᑯᓐᓂ ᑲᑐᔾᔨᖃᑎᒌᖑᔪᓂ ᑕᐃᒪᐃᓕᐅᕆᓯᒪᒋᕗᑦ.

ᐃᒡᓗᓕᐅᑉ ᐊᖑᓇᓱᒃᑐᓕᕆᔨᒃᑯᓐᓂ ᐊᒻᒪ ᒥᑭᒋᐊᕐᓂᐊᖅᑎᒃᑯᓐᓂ ᑲᑐᔾᔨᖃᑎᒌᖑᔪᓂ ᐅᖃᓚᐅᖅᐳᖅ ᐃᑲᒧᖅᓱᐃᔾᔮᙱᓐᓂᖏᓐᓂ ᐹᕙᓐᓛᓐᑯᑦ ᑐᒃᓯᕋᐅᑎᖓᓐᓂ.

ᕚᓐᑕᓪ ᑭᖑᓪᓕᖅᐹᖑᔪᒥ ᐅᖃᕐᓂᖃᕐᓂᐊᖅᐳᖅ ᐊᖏᖅᓯᓂᕐᒥ ᐋᒃᑳᖅᓯᓂᕐᒥᓪᓘᓐᓃᑦ ᐊᕙᑎᓕᕆᔨᒃᑯᑦ ᑲᑎᒪᔨᐅᔪᓂ ᐊᑐᖁᓇᔭᖅᑕᖓᓂ.

ᑎᑎᖅᑲᒥ ᐅᓪᓗᓕᖅᓯᒪᔪᒥ ᐊᐃᑉᕆᓕ 20−ᒥ, ᕚᓐᑕᓪ ᐅᖃᐅᓯᖃᓚᐅᕆᕗᖅ ᐃᑲᔪᖅᓱᐃᓂᖓᓂ ᑐᒃᓯᕋᐅᑕᐅᔪᒥ.

“ᑲᒪᒋᔭᖃᖅᑐᑦ ᒥᓂᔅᑕᐅᔪᑦ ᐃᓱᒪᒋᔭᖃᖅᐳᑦ ᐹᕙᓐᓛᓐᑯᑦ ᑐᒃᓯᕋᖅᑕᖓᓂ ᐊᑯᓂᐅᓂᐊᕐᓂᖓᓂ ᓈᒻᒪᖕᓂᖓᓂ ᐊᒻᒪ ᓱᓕᑦᑎᐊᕐᓂᖓᓂ ᐱᓕᕆᓂᐅᔪᒥ ᑕᐅᑐᙳᐊᖅᑕᐅᔪᒥ ᐅᕘᓇ ᓄᓇᕗᒻᒥ ᐊᖏᕈᑕᐅᔪᒥ ᐊᒻᒪ ᒪᓕᒐᖅ ᐋᖅᑭᐅᒪᑎᑕᐅᓇᔭᕐᓂᖓᓂ ᖃᐅᔨᓴᐃᓂᐅᔪᒧᑦ ᑐᕌᖓᔪᒥ ᑐᒃᓯᕋᖅᑕᐅᔪᒥ ᐊᓯᔾᔨᕐᓂᐅᔪᓄᑦ ᐊᒻᒪ ᐱᔾᔪᑎᓕᖕᓂ ᐊᖏᖅᑕᐅᓯᒪᓂᐅᔪᓄᑦ,” ᑎᑎᕋᓚᐅᖅᐳᖅ.