ᑎᑎᕋᐅᓯᖃᕐᓂᖅ ᔮᓂ ᕗᐊᑦ ᐊᑐᖅᑕᕕᓂᖏᓐᓂ ᐃᒃᐱᒍᓱᑦᑎᐊᕐᓇᓚᐅᕐᑐᖅ ᐃᕐᓂᖓᓄᑦ

For English version, see Writing Johnny Watt’s life story was moving experience for his son

ᐃᓅᓂᑰᓪᓗᓂ ᐃᓄᐃᑦ ᐃᒡᓗᖓᓂ, ᔮᓂ ᕗᐊᑦ ᐱᕈᓚᐅᕐᓯᒪᔪᖅ ᖃᐅᔨᒪᔭᐅᓛᖑᖃᑕᐅᓪᓗᓂ ᒪᓕᒐᓕᕆᓂᕐᒥ ᐱᓕᕆᐊᖃᕐᓯᒪᓂᕐᒥᒃ ᓄᓇᕕᒃᒥ.

ᐃᓅᔪᓐᓃᓚᐅᕐᓯᒪᔪᖅ ᐊᕐᕌᒍᐅᖓᓪᓕᕐᒥ ᐊᒻᒪ ᓯᕗᓂᑦᑎᐊᖓᓂ, ᐃᕐᓂᖓ, ᓕᐅᕆ ᕗᐊᑦ ᐱᕕᖃᓕᓚᐅᕐᓯᒪᔪᖅ ᐊᑖᑕᖓᑕ ᐅᓂᒃᑳᖏ ᑎᑎᕋᕈᒪᓪᓗᓂᒋ ᐊᓯᐅᑐᐃᓐᓇᓚᐅᙱᓐᓂᖏᓐᓂᒃ.

ᐅᓇ ᓴᕿᓕᓚᐅᕐᑐᖅ ᐅᖃᓕᒫᖑᓪᓗᓂ Johnny Watt: His Life, His World, His Ways, (ᔮᓂ ᕗᐊᑦ: ᐃᓅᓯᖓ, ᓄᓇᖓ, ᐃᓕᖅᑯᓯᖏᑦ) ᐊᐱᕐᓱᖅᑕᐅᕙᒃᖢᓂ ᑲᑎᑦᑐᓂᒃ ᐃᑲᕐᕋᐃᑦ 30 ᐅᖓᑖᓂ ᐃᕐᓂᖓᓄ ᐊᒻᒪᓗ ᐅᖃᓕᒫᒐᕐᒥ ᑎᑎᕋᖃᑕᐅᔪᒧᑦ ᕌᐱᓐ ᐳᕋᐃᐊᓐ.

ᐱᒻᒪᕆᐊᓘᖕᒪᑦ ᐃᒪᓐᓇ “ᑭᖑᕚᒃᓴᕗᑦ ᖃᐅᔨᒪᓂᐊᕐᒪᑕ ᐃᓅᓯᖓᓂ ᐊᑐᖃᑦᑕᓚᐅᖅᑕᖏᓐᓂᒃ ᐊᑖᑕᒪ,” ᐅᖃᕐᑐᖅ ᓕᐅᕆ ᕗᐊᑦ.

“ᑐᙵᕕᒋᓪᓚᕆᓚᐅᕐᑕᕗᑦ ᐃᓚᒌᑎᒍᑦ ᐊᒻᒪ ᓄᓇᑦᑎᓐᓃᑦᑐᓄᑦ, ᐊᒻᒪᓗ ᐃᓱᒪᓚᐅᖅᖢᖓ ᐱᒻᒪᕆᐅᓂᖓᓂ ᐅᕙᓐᓄ ᐅᓂᒃᑳᖏ ᑐᓴᖅᑕᐅᒃᐸᑕ ᓲᖃᐃᒻᒪ ᐃᓚᒃᑲ ᐱᔭᒃᓴᖃᑲᑕᓗᐊᕐᒪᑕ ᑖᔅᓱᒥᖓ ᐱᓕᕆᐊᖃᕆᐊᒃᓴᖅ,” ᐅᖃᓚᐅᕐᑐᖅ ᐊᐱᕐᓱᖅᑕᐅᑎᓪᓗᒍ ᑎᑎᕋᕐᕕᖓᓂ ᐅᕙᓂ ᐅᖓᕙ ᑐᓚᑦᑕᕕᒃᐊᓐᓂᐊᕕᒃᒥ ᑰᔾᔪᐊᖅᒥ, ᑕᐃᑲᓂ ᐊᖓᔪᖅᑳᕆᔭᐅᓪᓗᓂ.

ᐅᖃᓕᒫᒐᖅ ᑎᑎᕋᖅᑕᐅᓚᐅᕐᑐᖅ ᒪᕐᕈᐃᖅᖢᑎᒃ ᐊᐱᕐᓱᕈᑎᕕᓂᖏᓐᓂᒃ ᐅᑯᐊᒃ ᓕᐅᕆ ᐊᒻᒪ ᐳᕋᐃᐊᓐ ᔮᓂᒥ. ᐱᐊᓂᓚᐅᕐᓯᒪᔫᑦ ᐱᓇᓱᐊᕈᓰᒃ ᒪᕐᕉᒃ ᐊᓂᒍᖅᑎᓪᓗᒋᑦ ᐊᒻᒪᓗ ᑲᑎᕐᓱᐃᓪᓗᑎᒃ ᐃᑲᕐᕋᒐᓴᒻᒪᕆᖕᓂ ᐃᖅᑲᐅᒪᔭᖏᓐᓂᒃ ᔮᓂᐅᑉ ᐃᓅᓯᖓᓂᒃ.

ᑕᐃᔅᓱᒪᓂ ᐊᐱᕐᓱᑲᑕᒃᑎᓪᓗᒋᑦ ᔮᓂᒥ, ᑭᓱᓕᕆᕙᒍᓐᓃᕐᓯᒪᓚᐅᕐᑐᖅ ᐱᓕᕆᐊᕆᕙᓚᐅᖅᑕᖏᓐᓂᒃ.

“ᖁᕕᐊᓇᓚᐅᕐᑐᖅ ᐊᖏᖅᑎᓪᓗᒍ ᐊᐱᕐᓱᕈᒪᒐᑦᑎᒍ ᐃᑲᕐᕋᒐᓴᒻᒪᕆᖕᓂ ᐊᐱᕐᓱᖅᖢᑎᒍᑦ,” ᐅᖃᕐᑐᖅ ᕗᐊᑦ. “ᐃᓅᓯᖓ ᑕᒪᐅᖓᒥᐊᖅ ᐅᖃᐅᓯᕆᔪᒪᕙᓚᐅᙱᒻᒪᒍ.”

ᐱᓗᐊᖅᑐᒥ ᐅᖃᓪᓚᒍᓐᓇᑦᑎᐊᓕᖅᑎᓪᓗᒍ “ᑎᑎᕋᖃᑎᒋᔭᓐᓄᑦ, ᖃᓪᓗᓈᕐᒧ, ᑕᒪᑐᒥᖓ ᐱᓕᕆᐊᖃᕈᒪᓚᐅᕐᓂᖓᓄᑦ.”

ᐃᓅᓯᓕᒫᐸᓗᐊᓂᒃ ᔮᓂ ᕗᐊᑦ ᐃᖅᑲᓇᐃᔮᕆᕙᒃᑕᓂ ᐊᖏᕐᕋᐅᑎᕙᓚᐅᙱᑕᖏᑦ. ᓕᐅᕆᐅᓪᓕ ᐃᓱᒪᒋᔭᖓᒍᑦ, ᐊᑖᑕᖓ ᐅᐃᒪᔮᖅᐸᓚᐅᙱᑦᑐᖅ ᐊᒻᒪ ᐋᖅᑭᒃᓱᖅᓯᒪᔪᓐᓇᑦᑎᐊᖅᖢᓂ.

ᑕᐃᒪᓕ, ᐊᐱᕐᓱᖅᑕᐅᑲᑕᒃᑎᓪᓗᒍ ᖃᐅᔨᕙᓪᓕᐊᓕᓚᐅᕐᑐᑦ ᐊᑖᑕᖓᑕ ᐊᒃᓱᕈᕈᑎᒋᕙᓚᐅᖅᑕᖏᓐᓂᒃ — ᐊᒻᒪ ᐃᓛᓐᓂ ᐊᕐᕌᒍᒐᓴᐃᑦ ᐊᓂᒍᕐᓯᒪᓕᕋᓗᐊᖅᑎᓪᓗᒍ ᐊᒃᓱᕈᕈᑎᕕᓂᖏᑦ ᓱᓕ ᐃᒃᐱᒋᒻᒪᕆᖃᑦᑕᖅᖢᓂᒋᑦ — ᑕᒪᓐᓇ ᑲᒪᒋᓚᐅᕐᑕᖓ.

ᓲᕐᓗ ᐃᒪᓐᓇ: “ᐅᖃᓪᓚᒃᑎᓪᓗᒍ ᒪᑯᓂᖓ ᓇᓗᓇᐃᒃᑯᑎᐅᓚᐅᕐᓯᒪᔪᓂᒃ ᐊᖕᒪᓗᖅᑐᓂ E-8 ᕕᓂᕐ, ᒐᕙᒪᒃᑯᓐᓄ ᓇᓗᓇᐃᒃᑯᑎᐅᑎᑕᐅᔪᑦ ᑭᓇᐅᓂᑦᑎᓐᓄᑦ,” ᐃᖅᑲᐅᒪᔪᖅ ᓕᐅᕆ, “ᐅᖃᐅᓯᖃᓕᖅᑎᓪᓗᒍ ᑕᒪᑐᒥᖓ ᐊᒻᒪ ᐃᒋᖢᓂᐅᒃ E-8 ᓇᓗᓇᐃᒃᑯᑎᖓ ᑭᐳᕋᓛᒧᑦ.

“ᑕᐃᒪᓐᓇ ᓈᒻᒪᒃᓴᙱᓗᐊᖅᑐᖅ ᖃᐅᔨᓚᐅᕐᓯᒪᙱᑕᕋ.”

ᐅᓇ E ᓇᓗᓇᐃᒃᑯᑎᓄᑦ ᖃᓄᐃᓕᐅᕈᓯᖅ — ᖃᐅᔨᒪᔭᐅᓂᑯᑦ ᐃᓄᖕᓂ ᓇᓗᓇᐃᕐᓯᔾᔪᑎᐅᓂᖏᓐᓂᒃ — ᐱᓕᕆᐊᖑᓚᐅᕐᓯᒪᔪᖅ ᒐᕙᒪᑐᖃᒃᑯᓐᓄᑦ 1940-ᖏᑦ ᐱᒋᐊᓕᖅᑎᓪᓗᒋᑦ ᑎᑭᖢᒍ 1970-ᖏᓐᓄᑦ.

ᐊᑐᓂ ᐃᓄᐃᑦ ᓇᓗᓇᐃᒃᑯᑎᑖᖅᑎᑕᐅᓚᐅᕐᓯᒪᔪᑦ ᐊᖕᒪᓗᖅᑐᒥᒃ, ᐊᑐᖅᑕᐅᕙᒃᖢᑎᒃ ᒐᕙᒪᒃᑯᑦ ᐱᓕᕆᐊᖃᓕᕌᖓᑕ ᑖᒃᑯᐊ ᒥᒃᓵᓄᑦ. ᐊᓯᖏᑦ ᑲᓇᑕᒥᐅᑕᐃᑦ ᑕᐃᒪᐃᑦᑐᓂ ᐱᖃᖅᑎᑕᐅᓚᐅᕐᓯᒪᙱᑦᑐᑦ.

ᑖᓐᓇ ᐊᒻᒪ ᔮᓂ ᐅᖃᐅᓯᖃᖅᑎᓪᓗᒍ ᕿᒻᒥᖏᑦ ᑐᖁᑕᐅᓚᐅᕐᓯᒪᓂᖏᓐᓂᒃ ᐸᓖᓯᓄᑦ ᐃᓅᓱᒃᑎᓪᓗᒍ, ᐃᕐᓂᖓ ᑕᐃᒪᓐᓇᑎᒋ ᐊᑖᑕᒥᓂ ᑕᑯᓚᐅᕐᓯᒪᙱᑦᑐᖅ.

“ᑕᐃᔅᓱᒪᓂ ᐃᓅᓯᖓᓂ ᐊᑐᕐᑕᕕᓂᖏᑦ ᐃᒃᐱᒋᓚᐅᕐᓯᒪᙱᑕᒃᑲ ᑭᓯᐊᓂ ᑕᑯᒐᒃᑯ ᐅᓂᒃᑳᓕᕐᑎᓪᓗᒍ.”

ᓕᐅᕆᒧ ᑕᒪᓐᓇ ᐱᒻᒪᕆᐅᓚᐅᕐᓯᒪᔪᖅ ᐊᑖᑕᖓ ᑖᔅᓱᒧᖓ ᐅᓂᒃᑳᑲᑕᓕᖅᑎᓪᓗᒍ.

“ᑕᐃᑲᙵᓪᓕ ᐃᓱᒪᒋᑦᑎᐊᒃᑲᓐᓂᓕᓚᐅᕐᓯᒪᔭᕋ ᓲᖃᐃᒻᒪ ᐊᑐᖅᑕᕕᓂᖏᓐᓂᒃ ᐃᒃᐱᒍᓱᑦᑎᐊᒻᒪᕆᓚᐅᕐᓯᒪᖕᒪᑦ,” ᓕᐅᕆ ᐅᖃᕐᑐᖅ. “ᖁᕕᐊᓇᙱᑦᑐᑦ ᐊᑐᖅᑕᕕᓂᖏᑦ ᖃᓄᐃᓕᐅᕈᓯᖏᓐᓄᑦ ᐊᒃᑐᐃᓯᒪᓚᐅᙱᑦᑐᑦ.

“ᐊᕐᕌᒍᒐᓴᖕᓂ ᐃᓱᒫᓗᖕᓇᖅᑐᓂ ᖃᐅᔨᓚᐅᙱᑦᑐᖓ, ᓈᒻᒪᒃᓴᑲᑕᙱᓗᐊᖅᑐᓂᒡᓗ ᐃᒡᓗᑦᑎᓐᓂᒃ, ᑕᒪᒃᑯᓂᖓ ᐊᓯᔾᔨᖅᐸᓪᓕᐊᔪᓂᒃ ᐊᑐᕋᓗᐊᖅᑎᓪᓗᒍ.”

ᔮᓂ ᕗᐊᑦ ᐃᓅᓯᓕᒫᐸᓗᐊᓂ ᓄᓇᖃᓚᐅᕐᑐᖅ ᑰᔾᔪᐊᖅᒥ, ᑕᐃᑲᓂ ᓄᓕᐊᖓᓗ ᓗᐃᓴ, 6-ᓂ ᕿᑐᖓᖃᓚᐅᕐᓯᒪᔪᑦ.  ᓄᓇᓕᖕᓂᓪᓗ ᐱᓕᕆᖃᑕᐅᕙᖕᓂᖓ ᑰᔾᔪᐊᖅᒥ ᐃᑲᔫᑎᒻᒪᕆᐅᓚᐅᕐᓯᒪᔪᖅ.

ᐃᑲᔪᓚᐅᕐᓯᒪᔪᑦ ᓄᓇᓕᖕᓂ ᑳᒃᑐᐊᓘᑎᓪᓗᒋᑦ 1940-ᖏᓐᓂᒃ ᐃᖅᑲᓇᐃᔭᖅᖢᓂ ᓂᐅᕕᖅᑎᒃᑯᓐᓂᒃ (ᕼᐊᑦᓴᓐ ᐸᐃ) ᐊᒻᒪᓗ ᓂᕿᓂᒃ ᑐᓂᐅᖅᑲᐃᕙᒃᖢᓂ ᐃᓄᖕᓄ ᑰᒃᓱᐊᑉ ᑰᖕᒥ ᓄᓇᖃᖅᑐᓂᒃ; ᖃᖓᑕᓲᖅᑎᐅᓚᐅᕐᓯᒪᔪᖅ ᐅᒥᐊᕐᔪᐊᓂ ᐃᑲᔪᖅᐸᒃᖢᓂ ᑰᒃᑰᕆᐊᖅᑐᓂᒃ; ᓯᕗᓪᓕᖅᐹᖑᓚᐅᕐᓯᒪᔪᖅ ᐃᓅᓪᓗᓂ ᒪᐃᔭᐅᓪᓗᓂ 1973-ᒥ 1991-ᒧ; ᐊᒻᒪᓗ ᐊᖓᔪᖅᑳᕆᔭᐅᓚᐅᕐᓯᒪᓪᓗᓂ ᒪᑭᕕᒃᑯᓐᓄᑦ.

“ᑭᖑᒻᒪᒧᑦ ᑕᑯᓪᓗᒍ,” ᓕᐅᕆ ᐅᖃᕐᑐᖅ. “ᐱᓕᕆᐊᖃᖅᐸᓚᐅᕐᑐᖅ ᑕᒪᒃᑯᓂᖓ ᐅᐃᒪᙱᑦᑎᐊᖅᖢᓂ, ᐱᓕᕆᑦᑎᖅᐸᒃᖢᓂ; ᑕᐃᒪᓐᓇᓗ ᐊᔪᕐᓇᖅᑰᔨᖏᑎᖢᓂᐅᒃ.”

ᐅᖃᖅᖢᓂ “ᐊᐱᕐᓱᖅᑕᐅᑎᓪᓗᒍ ᐃᓄᒃᑎᑐᑐᐃᓐᓇᐅᓚᐅᕐᑐᖅ. ᑕᐃᒪᓕ ᖃᓪᓗᓈᑐᑦ ᑎᑎᕋᕆᐊᖃᓚᐅᕐᓯᒪᔭᕋ ᑎᑎᕋᖃᑎᓐᓄᑦ ᐊᒻᒪᓗ ᑭᖑᓂᐊᒍᑦ ᐅᖃᓕᒫᒐᓕᐅᓕᖅᖢᑕ.”

ᖃᓪᓗᓈᑎᑑᓕᖅᑎᑦᑎᓂᖅ ᐊᒃᓱᕈᕈᓘᔭᕐᓇᓚᐅᕐᑐᖅ, ᐊᒻᒪ “ᐅᖃᐅᓯᖏᑦ ᑐᑭᖏᑦᑎᒍᑦ ᑎᑎᕋᐅᓯᕆᓇᓱᒃᐸᒃᖢᑎᒍᑦ ᐅᖃᓕᒫᒐᓕᐊᑦᑎᒍᑦ,” ᓕᐅᕆ ᐅᖃᕐᑐᖅ.

ᔫᓂ 2021-ᒥ, ᑭᖑᓪᓕᖅᐹᖓᓂ ᐋᖅᑭᒃᓱᖅᑕᐅᓕᖅᑎᓪᓗᒍ ᐅᖃᓕᒫᒐᖅ, ᔮᓂ ᐃᓅᔪᓐᓃᓚᐅᕐᓯᒪᔪᖅ ᑰᔾᔪᐊᑉ ᑐᓵᔨᐊᐱᒃ ᐃᓐᓇᑐᖃᐃᑦ ᐊᖏᕐᕋᖓᓂᒃ 94-ᓂ ᐅᑭᐅᖃᓕᖅᖢᓂ.

ᓕᐅᕆᒧᓪᓕ ᑖᓐᓇ ᐅᖃᓕᒫᒐᖅ ᐱᒻᒪᕆᐅᒃᑲᓐᓂᕆᓕᓚᐅᕐᑕᖓ.

“ᐃᓐᓇᑐᖃᐃᑦ ᐊᖏᕐᕋᖓᓃᑎᓪᓗᒍ ᐊᒻᒪ ᑭᖑᓪᓕᖅᐹᒥ ᐊᐱᖅᓱᖅᖢᑎᒍᑦ, ᖁᕕᐊᓱᒻᒪᕆᓚᐅᕐᑐᖓ ᐅᓂᒃᑳᖏᑦ ᐱᐊᓂᒃᑎᓪᓗᑎᒍᑦ,” ᐅᖃᕐᑐᖅ.

ᑭᖑᓂᐊᒍᓪᓕ ᕗᐊᑦ ᐊᒻᒪ ᐳᕋᐃᐊᓐᑦ ᑐᑭᖃᕈᓐᓇᑦᑎᐊᕐᓗᓂ ᐅᖃᓕᒫᒐᓕᐅᕈᒪᓕᓚᐅᕐᓯᒪᔫᒃ.

ᐅᓇ ᐅᖃᓕᒫᒐᖅ ᐋᖅᑭᒃᓯᒪᔪᖅ ᐊᕕᒃᑐᕐᓯᒪᐅᕐᓂᖏᑦ ᐋᖅᑭᒃᑕᐅᓯᒪᓇᓱᒃᖢᑎᒃ ᐊᑕᐅᓯᕐᒥ ᐅᖃᐅᓯᖃᕐᓂᖓᒍᑦ, ᐃᒪᓐᓇᐅᙱᑦᑐᖅ ᑎᑎᕋᖅᑕᐅᕙᓪᓕᐊᓯᒪᓂᖓᒍᑦ ᐋᖅᑭᒃᓯᒪᙱᖢᓂ.

“ᐅᓇ ᐅᖃᓕᒫᒐᖅ ᐃᓕᓐᓂᐊᕐᕕᖕᓂ ᐊᑐᖅᑕᐅᔪᓐᓇᖅᑎᓐᓇᓱᓚᐅᕐᑕᕗᑦ,” ᓕᐅᕆ ᐅᖃᕐᑐᖅ.

ᐅᓇ ᐅᖃᓕᒫᒐᖅ ᐱᔭᐅᔪᓐᓇᖅᑐᖅ ᖃᕋᓴᐅᔭᒃᑯᑦ ᐅᑯᐊ ᐊᕙᑕᖅ ᐃᓕᖅᑯᓯᓕᕆᔨᒃᑯᑦ ᓴᖅᑭᔮᒐᖓᓂᒃ ᐅᕙᓂ publicationsnunavik.com ᐅᕙᓂᓘᓐᓃᑦ ᑎᕕ ᑎᑎᕋᐅᔭᒐᖃᕐᕕᒃᒥ ᑰᔾᔪᐊᖅᒥ.