ᑎᑎᕋᐅᔭᒐᐅᓪᓗᓂ ᐅᖃᓕᒫᒐᖅ ᓴᖅᑭᑎᑦᑎᓯᒪᔪᖅ ᓄᓇᕗᑦ ᐅᐊᖕᓇᖓᑕ ᐃᓕᖅᑯᓯᐊᓂᒃ ᐃᓄᐃᓐᓇᖅᑐᓐ

For an English version of this story, please see Picture book highlights Inuinnaqtun, western Nunavut culture.

ᓄᑖᖅ ᑎᑎᕋᐅᔭᒐᐅᓪᓗᓂ ᐅᖃᓕᒫᒐᖅ ᓱᕈᓯᓛᓄᑦ ᐊᒻᒪ ᐱᓱᓕᓵᕐᓂᑯᓄᑦ ᓴᖅᑭᔮᖅᑎᑦᑎᔾᔪᑎᐅᕗᖅ ᐃᓄᐃᓐᓇᖅᑐᓐ ᐅᖃᐅᓯᕐᒥᒃ ᐊᒻᒪᓗ ᐅᑭᐅᕐᑕᖅᑑᑉ ᐅᐊᖕᓇᖓᓂᒃ ᐃᓄᐃᑦ ᐃᓕᖅᑯᓯᖏᓐᓂᒃ.

Takuttaaqtagit (ᑕᑯᑦᑖᖅᑕᒋᑦ), ᖃᓪᓗᓈᑐᑦ I Can See You, ᑕᕐᓴᖃᐅᑦᑎᐊᖅᖢᓂ ᓱᕈᓯᕐᓄᑦ ᐅᖃᓕᒫᒐᓕᐅᖑᓯᒪᔪᖅ ᖁᒡᓗᖅᑑᒥ ᑎᑎᕋᐅᔭᖅᑎᒥᒃ ᐅᕉᔅᒥᐅᕆ ᐊᕝᕋᓇ ᒦᔪᒃ ᐊᒻᒪ ᐃᖃᓗᖕᓂ ᐅᖃᓕᒫᒐᓕᐅᖅᑎᓂᒃ ᐃᓐᕼᐊᐱᑦ ᒦᑎᐊᑯᓐᓂᒃ (Inhabit Media).

ᒦᔪᒃ, 68-ᓂ ᐅᑭᐅᓕᒃ, ᐃᓄᐃᓐᓇᖅᑐᓐ ᐃᓕᓴᐅᔨᐅᓚᐅᕐᓯᒪᔪᖅ ᐃᓐᓇᐅᓕᕐᓂᕐᒧᑦ ᓄᖅᑲᖅᓯᒪᓕᕐᑐᖅ, ᑐᑭᓕᐅᕆᔨᐅᓪᓗᓂ ᐊᒻᒪᓗ ᐱᓕᕆᐊᒃᓴᓂᒃ ᖃᐅᔨᒪᔨᐅᓪᓗᓂ. ᐊᕐᕌᒍᒐᓴᒻᒪᕆᖕᓂᒃ ᐋᖅᑭᒃᓱᐃᕙᓪᓕᐊᓯᒪᔪᖅ ᐅᖃᐅᓯᒃᑯᑦ ᐃᓕᓐᓂᐊᕈᑎᒃᓴᓂᒃ ᐅᑯᓄᖓ ᓄᓇᕗᒥᑦ ᐃᓕᓐᓂᐊᕐᓂᓕᕆᔨᒃᑯᓐᓂᒃ ᐊᒻᒪᓗ ᖃᐅᔨᓴᖅᐸᓪᓕᐊᓪᓗᓂ ᐱᐅᓂᖅᐹᒃᑯᑦ ᐃᓕᓐᓂᐊᖅᑎᑦᑎᔾᔪᑎᐅᔪᓐᓇᖅᑐᓂᒃ ᐅᖃᐅᓯᕐᓂᒃ ᐃᓕᓐᓂᐊᓕᓵᖅᑐᓄᑦ, ᓲᓗ ᐊᐅᓚᑲᑕᖕᓂᒃᑯᑦ ᒪᐅᖓ ᐅᖃᓪᓚᑲᑕᖕᓂᒃᑯᑦ ᐊᒻᒪᓗ ᐃᓐᓇᑐᖃᕐᓂᒃ ᐃᓕᖅᑯᓯᓕᕆᓂᕐᒥᒃ ᐅᖃᐅᓯᓕᕆᓂᕐᒥᒡᓗ ᐃᑲᔪᖅᑎᑦᑎᕙᒃᖢᓂ ᐱᒋᐊᓕᓵᖅᑐᓄᑦ, ᐅᖃᓪᓚᒃᑐᓂᒃ ᑐᓵᕙᒡᓗᑎᒃ ᐊᔪᕈᓐᓃᖅᓴᖅᑎᑕᐅᓪᓗᑎᒃ.

ᑕᐃᒪᓕ ᐃᓐᕼᐊᐱᑦ ᒦᑎᐊᒃᑯᑦ ᐅᐸᓚᐅᕐᓯᒪᔪᑦ ᑖᔅᓱᒥᖓ ᑎᑎᕋᐅᔭᒐᕐᒥᒃ ᐅᖃᓕᒫᒐᓕᐅᕈᒪᔭᕆᐊᒃᓴᖓᓂᒃ ᐅᖃᐅᓯᕐᒥ ᐃᓕᓐᓂᐊᓕᓵᖅᑐᓄᑦ, ᑖᓐᓇᓕ ᒦᔪᒃ ᐃᓱᒪᑲᐅᑎᒋᓚᐅᕐᓯᒪᔪᖅ ᐊᓈᓇᐅᔪᖅ ᓱᕈᓯᖓᓗᒃ ᑕᓪᓕ

ᒪᓂᒃ ᐃᒃᐱᒋᓐᓇᖅᑐᓂᒃ ᐊᔪᕈᓐᓃᕐᓴᕐᓗᑎᒃ ᖃᓄᐃᓕᐅᑲᑕᖕᓂᒃᑯᑦ ᐊᒻᒪᓗ ᐊᕙᑎᒋᔭᖏᓐᓂᒃ.

“ᐱᐅᓂᖅᐹᕐᓕ ᐅᖃᐅᓯᕐᒥ ᐃᓕᓐᓂᐊᕐᓂᐊᓗᓂ ᐃᓕᖅᑯᓯᕐᒥᓪᓗ ᑎᓴᒪᓂᒃ ᐊᑭᓐᓇᓄᑦ ᐊᕙᓗᔭᐅᓯᒪᙱᓪᓗᑎᒃ ᐊᒻᒪᓗ ᐊᕙᑎᒋᔭᑦᑎᓐᓂᒃ ᐃᓕᓐᓂᐊᖅᐸᓪᓕᐊᓂᒃᑯᑦ, ᓲᖃᐃᒻᒪ ᓄᓇᒧᑦ ᐊᒃᑐᐊᓂᒃᑯᑦ ᐊᑐᖅᓯᒪᒐᑦᑕ,” ᒦᔪᒃ ᐅᖃᖅᑐᖅ.

ᖃᕋᓴᐅᔭᒃᑯᑦ ᑎᑎᕋᐅᔭᒐᖅᑕᐅᓯᒪᓪᓗᓂ ᐆᒧᖓ ᑎᑎᕋᐅᔭᒐᖅᑎᒧᑦ ᒥᓯᐊᓪ ᓯᒻᓴᓐ, ᐅᖃᓕᒫᒐᖅ ᐊᔾᔨᙳᐊᖃᐅᑦᑎᐊᖅᑐᖅ ᒪᑯᑎᑐᓇᖅ ᕿᓚᓗᒐᙳᐊᖅ ᑑᒑᓕᒃ ᖃᓪᓗᓈᖅᑕᕐᒥ ᓴᓇᓯᒪᔪᖅ ᐃᒡᓕᕐᒦᖢᓂ, ᑖᒃᑯᐊᒃ ᐊᓈᓇᐅᔪᖅ ᓄᑕᕋᓛᖓᓗᒃ “ᑯᓂᒃᖢᑎᒃ”, ᐊᒻᒪᓗ ᐊᕐᓴᕐᓃ ᓴᖅᑭᔮᙳᐊᖅᖢᑎᒃ ᑖᖅᑎᓪᓗᒍ ᓯᓚ.

ᖃᓪᓗᓈᑎᑑᖓᔪᑦ ᐅᕙᓂ I Can See You, ᑎᑎᕋᐅᔭᒐᖅ ᐅᖃᓕᒫᒐᖅ ᓴᖅᑭᑎᑦᑎᓯᒪᔪᖅ ᐊᓈᓇᐅᔪᑦ ᓱᕈᓯᖏᓪᓗ ᖃᓂᒌᒃᐸᖕᓂᖏᓐᓂᒃ. ᐅᓇ ᐅᖃᓕᒫᒐᖅ ᐊᑐᐃᓐᓇᐅᖕᒥᔪᖅ ᐃᓄᐃᓐᓇᖅᑐᓐ. ᑎᑎᕋᖅᑎ ᐅᕉᔅᒥᐅᕆ ᐊᕝᕋᓇ ᒦᔪᒃ ᐅᖃᓚᐅᕐᑐᖅ ᓴᖅᑭᑎᑦᑎᓯᒪᔪᒪᓪᓗᓂ ᐃᓕᖅᑯᓯᕐᓂᒃ ᓇᓗᓇᐃᔭᖅᓯᒪᔪᓂᒃ, ᐅᑯᑎᑐᓇᖅ ᑲᓕᑯᒋᔭᐅᔪᑎᑐᑦ ᓄᓇᕋᙳᐊᖃᐅᖅᑐᑦ ᐃᖅᑲᐅᒪᔭᖏ ᓱᕈᓯᐅᑎᓪᓗᒍ ᐅᑭᐅᕐᑕᖅᑑᑉ ᐅᐊᖕᓇᖓᓂᒃ.. (ᐊᔾᔨᙳᐊᑦ ᐅᕙᙵᑦ ᐃᓐᕼᐋᐱᑦ ᒦᑎᐊ)

ᒦᔪᒃ ᑎᑎᕋᓚᐅᕐᒥᔪᖅ ᖃᓄᐃᓕᖓᔾᔪᑎᐅᓂᐊᕐᑐᓂᒃ ᑎᑎᕋᐅᔭᒐᕐᓂᒃ ᑖᒃᑯᐊ ᓴᖅᑭᔮᖅᑎᑦᑎᔪᓐᓇᕐᓂᐊᕐᒪᑕ ᐅᐊᓕᓂᕐᒥᒃ ᐅᑭᐅᕐᑕᖅᑐᕐᒥᐅᑕᓂᒃ ᐱᕈᕐᕕᒋᔭᖓᓂᒃ — ᒦᔪᒃ ᐃᓅᓚᐅᕐᓯᒪᔪᖅ ᓂᐅᕕᕐᕕᖃᓕᕐᑐᒥᒃ ᐅᐅᕙᓂ ᐅᕇᑦ ᕿᑭᖅᑕᓂᒃ, ᓄᓇᑦᓯᐊᕐᒥ.

“ᐱᕈᕐᓯᒪᒐᒪ ᐊᓈᓇᖓ ᐊᓯᖏᓪᓗ ᐊᕐᓇᐃᑦ ᐊᒫᖅᐸᒃᖢᑎᒃ ᓄᑕᕋᓛᖏᓐᓂᒃ ᓇᓴᖏᓐᓂᒃ ᑲᓕᑯᖏᑦᑕ … ᑕᐃᒪᓕ ᐊᓐᓄᕌᖏᑦ ᑲᓇᖕᓇᕐᒥᐅᑦ ᐊᓐᓄᕌᖏᓐᓂᒃ ᐊᑐᙳᐊᖅᑐᑦ ᐅᐊᓕᓂᕐᒥᐅᑦ ᐊᓐᓄᕌᖏᓐᓂᒃ ᐊᑐᖅᑎᖔᓕᖅᖢᒋᑦ,” ᐅᖃᖅᑐᖅ.

ᒦᔪᒃ ᐅᖃᓕᒫᒐᓕᐊᖓᓂᒃ ᑐᓂᐅᖅᑲᐃᓚᐅᕐᑐᖅ ᐃᓚᖏᓐᓄᑦ ᐅᖃᓕᒫᕆᐅᕐᓴᓕᓵᖅᑐᓄᑦ.

“ᑎᑭᑎᓪᓗᒋᑦ ᖁᕕᐊᓱᒡᕕᐅᑉ ᓯᕗᓂᑦᑎᐊᖓᓂᒃ ᐊᒃᓱᐊᓗ ᖁᕕᐊᓱᓚᐅᕐᑐᖓ — ᐱᐅᔪᓪᓛᓗᒃ,” ᐅᖃᖅᑐᖅ.

ᒦᔪᒃ ᐅᖃᓚᐅᕐᑐᖅ ᐅᖃᓕᒫᒐᓕᐊᓂᒃ ᐅᑯᓄᖓ ᐃᕐᖑᑕᖏᓐᓄᑦ ᐊᒻᒪ ᐃᓗᓕᖏᓐᓅᓂᕋᖅᖢᓂᒋᑦ ᐊᒻᒪᓗ ᐃᓱᒪᓪᓗᓂ “ᐅᖃᓪᓚᖃᑦᑕᓛᕐᓗᑎᒃ ᐊᒻᒪᓗ ᐅᖃᓕᒫᕈᓐᓇᖅᓯᓛᕐᓗᑎᒃ ᐃᖕᒥᖕᓄᑦ.”

ᐅᓇ ᓈᒻᒪᓈᕐᓯᒪᔪᖅ ᑖᔅᓱᒪ ᐅᖃᓕᒫᒐᐅᑉ ᓴᖅᑭᑕᐅᓪᓚᕆᖕᓂᖓ ᑕᕝᕙᓂᑦᑕᐃᓐᓇᐅᖕᒪᑦ ᑕᖅᑭᕐᒥ ᓄᓇᕗᑦ ᓇᓗᓇᐃᕐᓯᒪᔭᖓᓂᒃ ᐅᖃᐅᓯᕐᒥ ᖁᕕᐊᓲᑎᖃᕐᓇᒥᒃ ᑕᐃᔭᐅᓪᓗᓂ ᐅᖃᐅᓯᕐᒧᑦ ᖁᕕᐊᓲᑎᖃᕐᓂᖅ.

ᒦᔪᒃ ᐅᓄᙱᑦᑐᓂᒃ ᐱᓕᕆᐊᒃᓴᖃᖅᑐᖅ ᒫᓐᓇ ᐅᑯᓂᖓ ᐱᓕᕆᖃᑎᖃᖅᖢᓂ ᐃᓐᕼᐊᐱᑦ ᒦᑎᐊ, ᐃᓚᖃᖅᖢᑎᒃ ᐅᖃᐅᓯᐅᓂᑯᓂᒃ ᑎᑎᕋᖅᐸᓪᓕᐊᓂᕐᒥᒃ ᐊᒻᒪ ᑐᑭᓕᐅᕆᕙᓪᓕᐊᓂᕐᒥᒃ ᑎᑎᕋᖅᑕᐅᔪᕕᓂᕐᓂᒃ ᐅᓂᒃᑳᓂᒃ ᐊᑖᑕᖓᑕ ᐃᓚᖓᓂᒃ ᑖᔅᓱᒧᖓ ᐅᓂᒃᑳᖃᑦᑕᓚᐅᕐᓯᒪᔭᖏᓐᓂᒃ ᓄᑕᕋᐅᑎᓪᓗᒍ.

“ᐅᖃᐅᓯᕗᑦ ᐱᒻᒪᕆᐊᓘᖕᒪ ᓯᕗᕚᒃᓴᑦᑎᓐᓄᑦ ᖃᐅᔨᒪᔭᐅᓗᓂ ᐊᒻᒪ ᐅᖃᓪᓚᒃᑕᐅᔪᓐᓇᕐᓗᓂᓗ ᑭᖑᕚᕆᓚᐅᖅᑕᑦᑎᑐᑦ, ᓄᓇᒥᓗ ᐅᔾᔨᕈᓱᒍᓐᓇᑦᑎᐊᕐᓂᕐᒥᒃ ᐊᕙᑎᒋᔭᒥᓪᓗ ᐊᒻᒪᓗ ᐊᓯᑦᑎᓐᓂᒃ ᓯᕗᓪᓕᐅᓚᐅᕐᑐᑎᑐᑦ, ᐅᖃᓪᓚᖃᑎᒌᒍᓐᓇᕐᓗᑎᒃ, ᐊᒻᒪᓗ ᐃᖕᒥᖕᓄᑦ ᑕᐃᒎᓯᖃᖅᐸᒡᓗᑎᒃ ᐊᑎᖏᑦᑎᒎᙱᑦᑐᖅ, ᑭᓯᐊᓂᓕ ᐃᖕᒥᖕᓄᑦ ᐅᖃᖃᑎᒌᒍᓐᓇᕐᓗᑎᒃ,” ᐅᖃᖅᑐᖅ ᒦᔪᒃ.

ᐃᓱᒪᔪᕐᓕ ᐱᓕᕆᐊᖓ ᐅᖃᐅᓯᕐᒥ ᐃᓕᓐᓂᐊᖅᑎᑦᑎᓂᖅ ᐊᒻᒪᓗ ᐱᓕᕆᐊᕆᓯᒪᔭᖓ ᑎᑎᕋᐅᔭᖓᖅᓯᒪᒧᑦ ᐅᖃᓕᒫᒐᖅ ᐃᑲᔪᕈᑎᐅᓂᐊᕐᓗᓂ ᐃᓕᓴᐃᔨᐅᓛᖅᑐᓂᒃ ᐃᓄᐃᓐᓇᖅᑐᑦ ᐃᓕᓐᓂᐊᖅᑎᑦᑎᔾᔪᑎᐅᓂᒃᑯᑦ.

“ᖁᕕᐊᓱᑦᑎᐊᖅᑐᖓ ᓄᑲᖅᓖᑦ ᐃᓕᓴᐃᔨᐅᔪᑦ ᐊᔪᕈᓐᓃᖅᓴᖅᐸᓪᓕᐊᓂᖏᓐᓂᒃ ᓄᑖᓂᒃ ᑎᑎᕋᐅᓯᐅᕙᒃᑐᓂᒃ ᐅᖃᐅᓯᕐᓂ ᓯᕗᓕᑦᑕ ᐅᖃᐅᓯᕆᓚᐅᕐᑕᖏᓐᓂᒃ,” ᐅᖃᖅᑐᖅ.