ᑐᑭᓯᓯᒪᓗᓂ ᓄᓇᕗᒥᑦ ᑲᓇᑕᒥ ᑐᑭᓯᓯᒪᓇᖅᑐᖅ, ᑐᕉᑑ ᐅᖃᖅᑐᖅ

ᓕᐳᕈᑯᑦ ᓯᕗᓕᐅᕐᑎᖓ ᐃᖃᓗᖕᓄᑦ ᓄᖅᑲᓚᐅᑲᒃᐳᖅ ᓇᒡᒐᔾᔭᐅᒥᑦ ᓂᕈᐊᒐᒃᓴᐅᓂᕐᒧᑦ

ᑲᓇᑕᐅᑉ ᐊᖓᔪᖅᑳᖓ ᔭᔅᑎᓐ ᑐᕉᑑ ᐊᒻᒪ ᓄᓇᕗᒧᑦ ᓕᐳᕈᒃᑯᓐᓄᑦ ᓂᕈᐊᒐᒃᓴᖅ ᐹᑦ ᐊᕐᓇᒃᑲᖅ ᑲᑎᖃᑎᖃᖅᐳᑦ ᓄᓇᖃᖅᑐᓂᒃ ᓂᕈᐊᒐᒃᓴᐅᓂᕐᒧᑦ ᖃᓄᐃᓕᐅᖅᑎᓪᓗᒋᑦ ᐅᕙᓂ ᐃᖃᓗᐃᑦ ᑭᑉᐹᕆᒃᑐᒥᒃ ᓇᒡᒐᔾᔭᐅᒥ ᐅᓐᓄᒃᑯᑦ. (ᐊᔾᔨᓕᐅᕆᔨ ᑕᐃᕕᑦ ᕕᐊᓐ)

By ᑕᐃᕕᑦ ᕕᐊᓐ

For an English version of this story, see Trudeau jets into Iqaluit to pledge $360M for housing if re-elected

ᓄᓇᓕᖕᓂ ᑐᓴᒐᒃᓴᓕᐅᕐᑎᐅᓂᕐᒧᑦ ᐱᓕᕆᐊᒃᓴᓄᑦ ᑐᓴᒐᒃᓴᓕᐅᕐᑎ

ᓕᐳᕈᑯᓐᓄᑦ ᐊᖓᔪᖅᑳᖅ ᔭᔅᑎᓐ ᑐᕉᑑ 100-ᖏᓐᓃᑦᑐᓂᒃ ᐃᓄᖕᓄᑦ ᐃᖃᓗᖕᓂ ᓇᒡᒐᔾᔭᐅᑎᓪᓗᒍ ᐅᖃᓪᓚᓚᐅᕐᑐᖅ ᐅᑭᐅᕐᑕᖅᑐᕐᒥ ᑐᑭᓯᓯᒪᓗᓂ ᑭᓯᐊᓂ ᑲᓇᑕᒥ ᑐᑭᓯᓯᒪᔪᓐᓇᕐᓂᖏᓐᓂᒃ.

“ᓄᓇᕗᒥᑦ ᑐᑭᓯᓯᒪᓗᓂ, ᐅᑭᐅᕐᑕᖅᑐᕐᒥ ᑐᑭᓯᓯᒪᓗᓂ ᐱᐅᓛᖑᔪᖅ ᑲᓇᑕᒥ ᐊᒻᒪ ᑲᓇᑕᒥᐅᑕᓂᒃ ᑐᑭᓯᓯᒪᓇᓱᖕᓂᐊᕐᓗᓂ,’ ᐅᖃᓚᐅᕐᑐᖅ ᐃᖃᓗᖕᓂ ᓂᕈᐊᒐᒃᓴᐅᓂᕐᒧᑦ ᐅᖃᓪᓚᒃᑎᓪᓗᒍ. ᐃᓄᐃᑦ ᐃᓄᐃᑦ ᓄᓇᖓᓃᑦᑐ ᐃᑲᔪᖃᑦᑕᐅᑎᔪᓐᓇᕐᓂᖏᑦ ᓇᓗᓇᐃᒃᑯᑎᐅᔪᖅ ᑲᓇᑕᒥᐅᑕᓕᒫᓄ ᐊᒻᒪ ᓄᓇᕐᔪᐊᕐᒥᐅᓄᑦ ᒪᓕᒃᑕᐅᔭᕆᐊᖃᕐᓂᖓᓂᒃ ᐅᖃᓚᐅᕐᑐᖅ.

ᐳᕋᐃᒻ ᒥᓂᔅᑕ ᓄᓇᕗᑦ ᐊᖓᔪᖅᑳᖃᕐᕕᐊᓄᑦ ᐳᓛᑲᐃᓐᓇᓚᐅᕐᑐᖅ ᐃᑲᔪᖅᑐᐃᓯᒪᓂᖓᓂᒃ ᓕᐳᕈᒃᑯᓐᓄᑦ ᓂᕈᐊᒐᒃᓴᒥᒃ ᓄᓇᕗᒧᑦ ᐹᑦ ᐊᕐᓇᒃᑲᖅᒥᒃ ᓯᑎᐱᕆ 20-ᒥᑦ ᓂᕈᐊᕐᓇᐅᓕᕐᐸᑦ ᒐᕙᒪᑐᖃᒃᑯᓐᓂᒃ.

ᐅᓇ ᖃᓄᐃᓕᐅᕐᓇᖅ ᐋᖅᑭᒃᑕᐅᓯᒪᓚᐅᕐᑐᖅ 4:45-ᒧᑦ ᐃᖃᓗᖕᓂ, ᑭᓯᐊᓂᓕ ᑐᕉᑑ, ᐊᕐᓇᑲᖅ ᐊᒻᒪ ᓄᓇᖃᖅᑳᖅᑐᓕᕆᔨᒃᑯᑦ ᒥᓂᔅᑕᖓ ᒫᒃ ᒪᓗ ᐃᑲᕐᕋᓕᒫᒥ ᑭᖑᕙᖅᖢᑎᒃ ᓄᖅᑲᓚᐅᑲᓚᐅᕐᓂᖏᓐᓄᑦ ᓂᐊᖁᙴᒥ. ᐃᓄᐃᑦ ᐅᐸᒍᑎᔪᑦ ᐃᓚᖏᑦ ᐅᑕᕿᓯᒪᓪᓗᑎᒃ ᑭᓯᐊᓂ ᖃᐃᖕᒪᑕ ᑐᕉᑑᑯᑦ.

ᑖᒃᑯᐊ ᐱᖓᓱᑦ ᓕᐳᕈᒃᑯᓐᓄᑦ ᒪᓕᒐᓕᐅᕐᑎᑦ ᐊᑐᓂ ᐅᖃᓪᓚᑲᑕᒍᓐᓇᓚᐅᕐᑐᑦ, ᐅᖃᐅᓯᖃᓗᐊᖅᖢᑎᒃ ᓕᐳᕈᒃᑯᑦ ᓂᕈᐊᒐᒃᓴᐅᔾᔪᑎᒋᔭᖏᓐᓂᒃ ᒪᑯᓄᖓ ᐃᓱᒪᒃᑯᑦ ᐋᓐᓂᐊᖃᖅᑕᐃᓕᑎᑦᑎᓂᕐᒥᒃ ᐊᒻᒪ ᐃᒡᓗᓕᕆᓂᕐᒥᒃ.

ᑐᕉᑑ ᐅᖃᓚᐅᕐᑐᖅ ᓕᐳᕈᓪ ᒐᕙᒪᒃᑯᑦ ᑐᓂᓯᓇᔭᕐᓂᖏᓐᓂᒥᒃ ᐅᖃᐅᓯᐅᓯᒪᔪᑦ “ᒥᓕᐊᓐᑲᓪᓛᓗᖕᓂᒃ ᐃᓚᓯᒪᔪᓂᒃ” ᑕᒪᐃᓐᓄᑦ ᐃᓱᒪᓕᕆᓂᒃᑯᑦ ᐋᓐᓂᐊᖃᖅᑕᐃᓕᓂᕐᒧᑦ ᐊᒻᒪ ᐃᒡᓗᓕᕆᓂᕐᒧᑦ ᐊᒻᒪ ᐊᕐᓇᒃᑲᕐᓗ, ᒪᓕᒐᓕᐅᖅᑎᐅᕋᑖᖅᑐᖅ, ᐅᖃᓪᓚᓚᐅᕐᑐᖅ ᓕᐳᕈᒃᑯᓐᓄᑦ ᓂᕈᐊᖅᑕᐅᓇᓱᖕᓂᖓᓂᒃ ᐱᔾᔪᑎᒋᓪᓗᒍ ᑖᒃᑯᐊ ᓄᓇᕗᒥᑦ ᐱᔭᐅᔭᕆᐊᓕᖕᓂᒃ ᐱᓕᕆᐊᖃᕈᓐᓇᓛᖑᓇᓱᒋᓪᓗᓂᒋᑦ.

“ᐹᑦ ᓴᓂᑦᑎᐊᓐᓃᑦᑕᕆᐊᖃᕐᒪᓐ,” ᑐᕉᑑ ᐅᖃᖅᑐᖅ. “ᓴᙱᔪᒥᒃ ᓄᓇᕗᑦ ᓂᐱᖃᕆᐊᖃᕐᒪᓐ, ᓴᖅᑭᔪᒥᒃ ᓂᐱᖃᕆᐊᖃᕋᑦᑕ ᐃᓕᔅᓯᓐᓄ ᐃᓱᒫᓗᒋᔭᔅᓯ ᑐᓴᖅᑕᐅᓯᒪᔪᓐᓇᖁᓪᓗᒍ.”

ᑐᕉᑑ ᓈᒻᒪᒋᔭᐅᓯᒪᙱᑦᑐᖅ ᓂᕈᐊᖅᑎᑦᑎᓇᓱᖕᓂᖓ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᖅ ᐱᑕᖃᖅᑎᓪᓗᒍ, ᑕᐃᒪᓐᓇᓗ ᐃᓚᖏᓐᓄᑦ ᐃᓱᒪᒋᔭᐅᓕᖅᖢᓂ ᒐᕙᒪᒃᑯᓐᓂᒃ ᐅᓄᕐᓂᖅᓴᓂᒃ ᑭᒡᒐᖅᑐᐃᔨᓂᒃ ᓵᓚᒃᓴᖅᑎᑦᑎᓇᓱᖕᓂᕐᒧᑦ. ᓕᐳᕈᒃᑯᑦ ᑭᒡᒐᖅᑐᐃᔨᖃᐅᙱᓐᓂᖅᓴᐅᓪᓗᑎᒃ ᒐᕙᒪᐅᓯᒪᖕᒪᑕ ᑕᐃᒪᙵᑦ 2019-ᒥᑦ ᓂᕈᐊᕐᓇᐅᓚᐅᖅᓯᒪᔪᒥᒃ.

ᐅᖃᓪᓚᒃᑎᓪᓗᒍ ᑐᕉᑑ ᐅᖃᓚᐅᕐᑐᖅ ᓂᕈᐊᖅᑎᑦᑎᔭᕆᐊᖃᓕᓚᐅᕐᓂᕋᖅᖢᓂᒋᑦ ᐃᓱᒪᓕᐅᕆᑲᑕᒋᐊᖃᕐᓂᐊᕐᒪᑕ ᒪᑯᓄᖓ ᐋᓐᓂᐊᕕᒡᔪᐊᕐᓇᒧᑦ, ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᐊᒻᒪᓗ ᐊᔾᔨᒌᙱᑎᑦᑎᓗᐊᕐᓂᖅᒧᑦ “ᑕᖅᑭᓂᒃ ᐊᒡᒋᖅᑐᓂᒃ, ᐊᕐᕌᒍᓂᐅᙱᑦᑐᖅ ᒫᓐᓇᒥᓐ.”

“ᑕᐃᒪᐃᓐᓂᖓᓄᑦ ᐅᓇ ᓂᕈᐊᕐᓇᖅ ᐊᑐᕆᐊᖃᖅᑐᖅ ᒫᓐᓇ.” ᑐᕉᑑ ᐅᖃᖅᑐᖅ. “ᓲᖃᐃᒻᒪ ᐅᑕᖅᑭᔪᓐᓇᙱᓐᓇᑦᑕ ᐊᕐᕌᒍᒥᓐ ᐊᕐᕌᒎᖕᓂᓪᓘᓐᓃ ᒪᕐᕉᖕᓂ ᐃᓱᒪᓕᐅᕆᓇᓱᒃᑎᓪᓗᑕ ᖃᓄᖅ ᑲᓇᑕᒥ ᓯᕗᒧᒃᐸᓪᓕᐊᓂᐊᕐᓂᑦᑎᓐᓂᒃ ᓄᕙᒡᔪᐊᕐᓇᐅᑉ ᐅᖓᑖᒍᑦ.”

ᐊᓐᑏᐲᑯᓐᓄᑦ ᓂᕈᐊᒐᒃᓴᖅ ᓘᕆ ᐃᓪᓚᐅᖅ ᐅᖃᐅᓯᒃᓴᓕᐅᓚᐅᕐᒥᔪᖅ ᑐᕉᑑ ᐅᖃᓪᓚᒃᑎᓪᓗᒍ ᐃᓄᒋᐊᓄᑦ, ᐅᖃᖅᖢᓂ ᑖᓐᓇ “ᐱᓂᐊᕐᓂᕋᖅᑕᖏᓐᓂᒃ ᐊᑐᔾᔮᙱᑐᐃᓐᓇᕐᓂᕋᖅᖢᓂᐅᒃ.”

“ᐊᕐᕌᒍᓂᒃ 6-ᓂ ᐱᕕᖃᓚᐅᕐᑐᖅ ᐃᒡᓗᓄᑦ ᓈᒻᒪᙱᓕᐅᕈᑎᓂᒃ ᐋᖅᑭᒃᓯᔪᓐᓇᕐᓗᓂ ᐊᒻᒪᓗ ᐱᓕᕆᐊᖃᕐᓗᓂ ᐊᑭᓕᒐᕐᓂᖅᑐᓂᒃ ᓄᓇᕗᒥᑦ — ᑭᓯᐊᓂᓕ ᒫᓐᓇ ᓱᓕ ᐃᒡᓗᖃᖅᑐᒍᑦ ᐅᖁᐊᓗᖕᓂᒃ, ᐃᓄᒋᐊᓗᐊᖅᑐᐊᓗᖕᓂ ᐃᒡᓗᓂᒃ,” ᐅᖃᖅᑐᖅ.

ᑐᕉᑑ ᖃᖓᑕᓲᖓ — ᓇᓗᓇᙱᑦᑎᐊᖅᖢᓂ ᒥᕝᕕᒃᒥ ᐊᐅᐸᖅᑐᒥ ᐊᒻᒪ ᖃᐅᓪᓗᖅᑕᓂᒃ ᑕᕐᓴᖃᖅᖢᓂ ᐊᒻᒪᓗ Trudeau 2021 ᑎᑎᕋᖅᓯᒪᓪᓗᓂ ᖃᖓᓂ — ᐃᖃᓗᖕᓄᑦ ᒥᓚᐅᕐᑐᖅ 3:30-ᒥ ᐅᓐᓄᓴᒃᑯᑦ. ᐊᐅᓪᓚᖅᖢᓂᓗ ᐋᑐᕚᓕᐊᖅᖢᓂ ᑎᓴᒪᓐ ᐃᑲᕐᕋᑦ ᐱᐊᓂᒃᑎᓪᓗᒍ 7:30 ᐸᓗᖕᒥᓐ.

ᐃᖃᓗᖕᓄᑦ ᓄᖅᑲᓚᐅᑲᖕᓂᖓ ᐊᔾᔨᒋᓚᐅᙱᑕᖓ ᐳᓛᑲᑕᓚᐅᕐᑕᖓᓂ ᖃᓪᓗᓈᓃᑦᑐᓂᒃ ᐱᓇᓱᐊᕈᓯᐅᓚᐅᕐᑐᒥ, ᑖᒃᑯᓇᓂᓕ ᓈᒻᒪᒃᓴᙱᑦᑐᓂᒃ ᐅᕙᓂ ᓅᐳᑕᓐ, ᐋᓐᑎᐅᕆᐅᒥ ᑕᐃᒪᐃᓐᓂᖓᓄᓪᓗ ᐅᓐᓄᒃᑯ ᐅᖃᓪᓚᓂᐊᕐᓂᖓ ᓄᖅᑲᖅᑎᑕᐅᓕᓚᐅᖅᖢᓂ ᐴᑕᓐ, ᐋᓐᑎᐅᕆᐅᒥ, ᐅᖃᖅᖢᓂ ᐅᓗᕆᐊᓇᕋᔭᕆᐊᒃᓴᖓᓄᑦ ᐃᓱᒪᒋᔭᐅᓪᓗᓂ.

Share This Story

(0) Comments

Join the Conversation

Your email address will not be published. Required fields are marked *

*