ᑐᕉᑑ ᒐᕙᖓᑦ 2.0: ᓂᕆᐅᓗᐊᙱᓪᓗᓯ
“ᐃᓱᒪᑦᑎᐊᕈᓐᓇᕈᔅᓯ ᓂᕆᐅᓗᐊᙱᓪᓗᓯ”
ᔭᐃᓐ ᕕᐊᐹᑦ ᑕᐃᔅᓱᒪᓂ ᓄᓇᖃᖅᑳᖅᑐᓄᑦ ᐱᔨᑦᑎᕋᐅᓂᓂᒃ ᒥᓂᔅᑕᐅᓂᑯ ᒫᑦᓯ 23, 2018-ᒥᑦ, ᐱᖃᑎᖃᖅᖢᓂ ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᒥᑦ ᓇᐃᑕᓐ ᐅᐱᐊᑦ, ᐅᖃᖅᑎᓪᓗᒍ ᒐᕙᒪᑐᖃᒃᑯᑦ ᓄᖑᑎᑦᑎᓂᐊᕐᓂᕋᖅᖢᓂᖏᑦ ᐃᓄᐃᑦ ᓄᓇᖓᓂᒃ 2030 ᑎᑭᓚᐅᕐᑎᓐᓇᒍ. ᐊᕐᕌᒎᙱᑦᑐᖅ ᓄᖃᓚᐅᕐᓯᒪᔪᖅ ᒐᕙᒪᑐᖃᒃᑯᓐᓄᑦ ᑲᑎᒪᔨᐅᓂᕐᒥ. (ᐊᔾᔨᙳᐊᖁᑎᒋᔭᐅᔪᖅ)
For an English version of this editorial, see The Trudeau government 2.0: prepare for a letdown
ᑕᒪᓐᓇ ᑲᒪᓇᙱᓚᖅ. ᐱᒻᒪᕆᐅᓂᕐᓴᑦ ᒪᓕᒐᓕᕆᔨᐅᕙᒃᑐᑦ ᐃᓱᒫᓂᕐᓴᐅᖂᔨᖕᒪᑕ ᑲᓇᑕᒥᐅᑕᑦ ᐅᓄᕐᓂᓴᐃᑦ, ᐱᔾᔪᑎᖃᖅᖢᑎᒃ ᖃᓪᓗᓈᓃᑦᑐᓂᒃ, ᐅᓄᙱᓗᐊᕐᒪᑕ ᓂᕈᐊᕋᔭᕐᑐᑦ ᐅᖃᐅᓯᖃᕋᓗᐊᕈᑎᒃ ᐅᑭᐅᕐᑕᖅᑐᕐᒥᐅᑕᓂᒃ ᑕᒪᒃᑯᐊ ᑲᓇᑕᒥᐅᑕ ᐅᓄᕐᓂᕐᓴᐃᑦ ᓄᓇᖓᓃᑦᑐᑦ ᑐᓴᓚᐅᕐᓯᒪᙱᑕᖏᓐᓂᒃ.
ᓕᐳᕈᓪ ᒐᕙᒪᒃᑯᑦ ᑕᒪᑐᒥᖓ ᖃᐅᔨᒪᑎᓚᐅᕐᑐᑦ, ᐃᒪᓐᓇ ᓲᕐᓗ ᑲᑕᐃᒐᒥᒃ ᕿᒪᒃᓯᓪᓗᑎᒡᓗ ᓴᕿᑎᑦᑎᓚᐅᕐᖢᑎᒃ ᑭᖑᕙᓯᒻᒪᕆᒃᑐᒥᓐ ᐅᑭᐅᕐᑕᖅᑐᕐᒧᑦ ᐊᒻᒪ ᐅᑭᐅᕐᑕᖅᑐᕐᒥᐅᓄᑦ ᐊᑐᐊᒐᓄᑦ ᐋᕿᒃᓱᐃᒍᑎᒃᓴᓂᒃ ᐅᓪᓘ ᓯᕗᓂᐊᒍᑦ ᓂᕈᐊᒐᒃᓴᐅᓂᖅ ᐱᖏᐊᕐᓂᐊᓵᖅᑎᓪᓗᒍ.
ᓂᕈᐊᒐᒃᓴᐅᓐᓇᖅᑎᓪᓗᒍ, ᓄᓇᖃᖅᑳᖅᑐᓅᖓᓗᐊᖅᑐᑦ ᐃᓱᒪᒋᔭᒃᓴᑦ, ᐊᒥᓱᑦ ᐅᑭᐅᕐᑕᖅᑐᕐᒥᐅᓄᑦ ᐃᓱᒫᓘᑎᓂᒃ ᖄᓪᓕᕐᓯᕙᒃᖢᑎᒃ, ᑲᒪᒋᔭᐅᓗᐊᓚᐅᙱᒻᒥᔪᑦ.
ᑕᐃᒪᓕ ᓄᑖᒧᑦ ᒥᒃᖠᕚᓪᓕᕐᓯᒪᔪᒧ ᔭᔅᑎᓐ ᑐᕌᑑ ᒐᕙᒪᒋᓕᖅᑕᖏᓐᓄᑦ, ᐊᒻᒪᓗ ᑲᑎᒪᔨᐅᓂᐊᖅᑐᑦ ᐊᖏᖅᑎᑕᐅᓚᐅᖅᖢᑎᒃ ᐱᓕᕆᐊᒃᓴᖏᓐᓄᑦ ᓄᕕᐱᕆ 20-ᐅᓚᐅᕐᑐᒥᑦ, ᐃᓱᒪᓇᖅᐳᖅ ᑲᔪᓯᑐᐃᓐᓇᕐᓂᐊᕆᐊᒃᓴᖏᓐᓂᒃ ᓱᖁᑎᒃᓴᓗᐊᖅᑰᔨᙱᓪᓗᑎᒃ.
ᐅᕙᐅᓇ ᓇᓗᓇᐃᒃᑯᑎᐅᔪᓐᓇᖅᑐᑦ ᐃᓚᖓ. ᐱᔾᔪᑎᖃᖅᑐᕐᓕ ᐅᔾᔨᕐᓇᓗᐊᕐᓯᒪᔪᒥᑦ ᐱᓂᐊᕐᓂᕋᕈᑎᕕᓃᑦ ᐅᑭᐅᕐᑕᖅᑐᕐᒧᑦ ᑕᐃᒪᙵᑦ ᑐᕌᑑ ᒐᕙᒪᖏ ᐊᖓᔪᖅᑳᖑᓕᓚᐅᕐᑎᓪᓗᒋᑦ 2015-ᒥᑦ: ᐱᑕᖃᕈᓐᓃᖅᑎᑦᑎᓗᑎᒃ ᐊᒃᓱᓪᓘᓐᓃᑦ 50 ᐳᓴᓐᑎᓂᒃ (ᓇᑉᐸᖏᓐᓂᒃ) ᐳᕙᒡᓗᒍᑎᐅᔪᓂᒃ ᐃᓄᐃᑦ ᓄᓇᖓᓂᒃ ᑎᑭᓪᓗᒍ 2025 ᐊᒻᒪᓗ ᓄᖑᑎᑕᐅᑦᑎᐊᒻᒪᕆᒡᓗᓂ 2030 ᑎᑭᓚᐅᖅᑎᓐᓇᒍ.
ᐅᓇ ᐃᓚᖃᓚᐅᕐᑐᖅ ᐱᒋᐊᕈᑎᓂᒃ ᐃᑲᔫᑎᓂᒃ $27.5 ᒥᓕᐊᓐᑖᓚᓂ ᐊᕐᕌᒍᓄᑦ ᑕᓪᓕᒪᓄᑦ, ᐊᑐᖅᑕᐅᓂᖓᓕ “ᐋᖅᑭᒃᑕᐅᓂᐊᖅᖢᑎᒃ” ᑎᓴᒪᓄᑦ ᐃᓚᒋᔭᐅᔪᓄᑦ ᐅᑯᓄᖓ ᐃᓄᐃᑦ ᑕᐱᕇᑦ ᑲᓇᑕᒥ.
ᑭᓯᐊᓂᓕ ᐅᖃᖅᑕᐅᓚᐅᕐᓯᒪᔪᖅ ᑎᐱᕐᓗᖂᔨᓕᕐᑐᖅ ᓱᕋᒃᓯᒪᔪᑎᑐᑦ ᖃᓄᐃᓂᐊᕐᓂᕋᕐᓯᒪᓂᕐᒥᒃ. ᐱᒋᐊᕐᕕᒋᓗᒍ, ᐅᓇ ᐳᕙᒡᓗᖕᓇᒥᑦ ᓄᖑᑎᑦᑎᓂᕐᒧᑦ ᐱᓕᕆᔨᒻᒪᕆᐅᓚᐅᕐᑐᖅ ᒐᕙᒪᑐᖃᒃᑯᓐᓄᑦ, ᔭᐃᓐ ᕕᐊᐹᑦ, ᓄᓇᖃᖅᑳᖅᑐᓄᑦ ᐱᔨᑦᑎᕋᐅᑎᓄᑦ ᒥᓂᔅᑕᐅᓚᐅᕐᑐᖅ ᑖᔅᓱᒥᖓ ᐅᖃᓚᐅᕐᓯᒪᓪᓗᓂ.
ᓄᖃᓚᐅᕐᑐᖅ ᑐᕉᑑᑉ ᒪᓕᒐᓕᕆᔨᖏᓐᓂᒃ ᒫᔅᓯ 4-ᖑᓚᐅᕐᑐᒥᑦ ᓈᒻᒪᒃᓴᙱᖢᓂ ᑐᕉᑑ ᐱᓕᕆᐊᖃᑦᑎᐊᙱᓐᓂᖓᓂᒃ ᔪᑎ ᕗᐃᐊᓴᓐ-ᕆᐳᑦᒥ. ᑕᐃᒪᐃᓕᐅᓚᐅᕐᓯᒪᔪᖅ ᐅᓪᓗᑦ ᑎᓴᒪᑦ ᑐᖔᓂ ᑐᕉᑑ ᐃᖃᓗᖕᓄᐊᕐᓂᐊᓵᖅᑎᓪᓗᒍ ᒪᒥᐊᑦᑕᖅᑐᕐᓗᓂ ᑲᓇᑕ ᓈᒻᒪᙱᑦᑐᒃᑯᑦ ᑲᒪᒋᔭᖃᓚᐅᕐᓯᒪᓂᖓᓄᑦ ᐃᓄᖕᓂ ᐳᕙᒡᓗᒋᐊᕐᓯᒪᓂᑯᓂᑦ 1950-ᖏᓐᓂᒃ ᐊᒻᒪ 1960-ᖏᓐᓂᒃ.
ᑕᐃᒪᙵᓪᓕ, ᓂᐱᖃᙱᑐᐃᓐᓇᓕᓚᐅᕐᐳᑦ ᐅᑭᐅᕐᑕᖅᑐᕐᒥ ᐳᕙᒡᓗᖕᓇᕐᒨᖓᔪᓂᒃ. ᓂᕈᐊᒐᒃᓴᐅᑲᑕᒃᑲᓗᐊᖅᑎᓪᓗᒋᑦ, ᑕᒪᓐᓇ ᑲᒪᒋᔭᐅᓗᐊᓚᐅᙱᑦᑐᖅ.
ᐊᒻᒪᓗ ᒫᓐᓇᒧᑦ, ᐳᕙᒡᓗᖕᓇᒥᑦ ᓄᖑᑎᑦᑎᓇᓱᖕᓂᖅ ᓄᖃᑐᐃᓐᓇᖅᓯᒪᓕᕐᐳᖅ.
ᓲᕐᓗ ᐃᒪᓐᓇ, ᓄᓇᑦᓯᐊᕗᒥᑦ, ᐳᕙᒡᓗᑲᑕᒃᑎᓪᓗᒋᑦ 2006-ᓗ 2016-ᓗ ᐊᑯᓐᓂᖓᓂ ᑎᑎᕋᖅᑕᐅᓯᒪᓪᓗᓂᓗ 248.5 ᐃᓄᐃᑦ 100,000-ᖏᓐᓂᒃ, ᐋᓐᓂᐊᖃᕐᓇᙱᑦᑐᓕᕆᔨᐅᔪᑦ ᐊᑕᐅᓯᑐᐊᕐᒥᑦ ᓄᓇᓕᖕᓂ ᖃᐅᔨᓴᕐᓯᒪᓂᑰᕗᑦ.
ᑕᐃᒪᐃᓕᐅᓚᐅᕐᓯᒪᔪᑦ ᓇᐃᓐᒥᑦ, 2018-ᖑᑎᓪᓗᒍ, ᐳᕙᒡᓗᓂᕐᒥ ᐋᓐᓂᐊᖅᑖᖅᑐᖃᐅᕐᑎᓪᓗᒍ ᐊᒻᒪᓗ ᓄᑲᑉᐱᐊᒥ 14-ᓂ ᐅᑭᐅᓕᖕᒥ ᐃᓅᔪᓐᓃᖅᑐᖃᓚᐅᕐᓯᒪᓪᓗᓂ ᑖᔅᓱᒧᖓ ᐋᓐᓂᐊᔪᑦ ᐋᓐᓂᐊᕕᖕᒦᖢᓂ ᔭᐃᓐ ᔮᓐᔅᒥᑦ.
ᓄᓇᕕᒥᑦ, 313 ᐃᓄᐃᑦ ᐋᓐᓂᐊᓕᓚᐅᕐᓯᒪᔪᑦ ᐳᕙᒡᓗᖕᓇᒧᑦ 2006-ᓗ 2016-ᓗ ᐊᑯᓐᓂᖓᓂᒃ, ᑖᓐᓇᓗ ᐱᖃᑎᒋᔭᐅᓪᓗᓂ ᐳᕙᒡᓗᓗᐊᕐᓇᖅ ᐃᓄᐃᑦ ᓄᓇᖓᓂᒃ, 234 ᖃᐅᔨᔭᐅᔪᑦ 100,000-ᖏᓐᓂᒃ.
ᑭᓯᐊᓂᓕ ᓄᓇᓕᖕᓃᑦᑐᓕᒫᓂ ᖃᐅᔨᓴᕐᓂᖅᑕᖃᖅᑰᔨᓯᒪᙱᑦᑐᖅ ᓄᓇᕕᒻᒥ ᑕᐃᒪᙵᓂᑦ 2018-ᖑᓚᐅᕐᑐᒥ, ᐅᓇ ᕕᐅᐹᑦ ᑐᓴᒐᒃᓴᓕᐅᓚᐅᕐᓯᒪᑎᓪᓗᒍ.
ᐄᖑᒐᓗᐊᖅ ᓄᓇᕗᒥᑦ ᖃᖓᑦᑎᐊᓵᐸᓗᒃ ᐃᓄᒋᐊᓂ ᖃᐅᔨᓴᓚᐅᕐᓯᒪᔪᑦ ᐳᕙᒡᓗᑲᑕᖕᓂᖅᑕᖃᓚᐅᕐᑎᓪᓗᒍ, ᐅᓇ ᓯᑏᕙᓐ ᕼᐋᐳ ᑲᓐᓲᕕᑎᕝᓗ ᐊᖓᔪᖅᑳᖑᓱᖓᖅᑎᓪᓗᒋᑦ, ᓯᕗᓂᑲᓪᓛᓂᒃ ᑐᕉᑑ ᓕᐳᕈᖏᑦ ᓂᕈᐊᖅᑕᐅᓚᐅᖅᑎᓐᓇᒋᑦ.
ᓄᓇᕗᒧᓪᓕ, ᑕᒪᓂᓗ 670-ᓂ ᐃᓄᖕᓂ ᐳᕙᒡᓗᒃᑐᖃᖅᓯᒪᓪᓗᓂ 2006-ᓗ 2016-ᓗ ᐊᑯᓐᓂᖓᓂᒃ, ᐃᒪᐃᓕᖓᓕᖅᖢᓂ 171.8 ᐅᑯᓇᙵᑦ 100.000-ᓂ ᐊᒻᒪᓗ ᐱᓕᕆᓂᖅᑕᖃᕐᓯᒪᓪᓗᓂ ᑕᒪᑐᒧᖓ.
2018-ᒥ, ᓄᓇᕗᑦ ᒐᕙᒪᖓᑦᑕ ᐋᓐᓂᐊᖃᕐᓇᙱᑦᑐᓕᕆᔨᖏᑦ ᖃᐅᔨᓴᖃᑦᑕᓚᐅᕐᑐᑦ ᕿᑭᖅᑕᖅᔪᐊᕐᒥᑦ ᐊᒻᒪ ᑎᑭᕋᕐᔪᐊᕐᒥᑦ, ᐃᓄᖕᓂ 90-ᐳᓴᓐᑎᖏᓐᓂᒃ ᖃᐅᔨᓴᖅᖢᑎᒃ ᑕᒪᐃᓐᓂ ᓄᓇᓕᖕᓂᒃ.
(ᐊᑕᐅᓯᕐᓕ ᐊᒃᑐᖅᑕᐅᓯᒪᙱᑦᑐᖅ ᐅᑯᐊ ᐃᓄᕕᐊᓗᒃᒥᐅᑕ ᓄᓇᑦᓯᐊᕐᒥ. ᑕᐃᑲᓂᓕ, ᐳᕙᒡᓗᓪᓚᕆᒃᑐᓂ ᑐᓴᕐᓇᓚᐅᙱᑦᑐᖅ 2007-ᓗ 2016-ᓗ ᐊᑯᓐᓂᖓᓂᒃ.)
ᐳᕙᒡᓗᖕᓇᖅ ᐋᓐᓂᐊᕆᔭᐅᔪᖅ ᑭᓱᖃᙱᓗᐊᒧᑦ. ᑕᒪᓐᓇ ᑕᐃᒪᐃᓐᓂᕋᖅᑕᐅᒡᒍᓂᖓᓄᑦ ᑕᐃᒪᓐᓇ ᐅᖃᐅᓯᐅᕙᓕᖅᑐᖅ. ᑭᓯᐊᓂᓕ ᓱᓕᔪᖅ. ᐃᓄᐃᑦ ᓂᕿᖃᑦᑎᐊᖃᑦᑕᙱᒃᑯᑎᒃ ᐊᒻᒪ ᐃᒡᓗᖃᑦᑎᐊᙱᒃᑯᑎ, ᐳᕙᒡᓗᖕᓇᖅ ᐱᕙᓪᓕᐊᒍᓐᓇᖅᐳᖅ.
ᐅᓇᑦᑕᐅᖅ ᐃᓱᒪᒋᓪᓗᒍ, ᐊᔪᕐᓴᕐᓇᕐᓂᖅ ᑭᙵᓂᑦ, ᑕᕝᕙᓂᓕ ᐱᓇᓱᐊᕈᓯᕐᓂᒃ 12-ᓂ ᐳᕙᒡᓗᓇᒥ ᖃᐅᔨᓴᕐᓂᖓᑦ ᐃᓱᓕᓚᐅᕐᓯᒪᔪᖅ ᒪᐃᒥ. 2016-ᒥ ᐃᖅᑲᓇᐃᔭᙱᑦᑐᑦ ᒫᓃᓚᐅᕐᑐᖅ 27.3 ᐳᓴᓐᑎ. 2015-ᒥᓪᓕ ᐅᑭᐅᖃᖅᑐᑦ 15-ᓂᒃ ᐅᖓᑖᓄᑦ ᑮᓇᐅᔭᓕᐅᕐᓂᖏᑦ ᒫᓃᓚᐅᕐᑐᑦ $18,933 ᐅᖓᑎᑦᑎᐊᖓᓂᒃ. ᐅᑯᓇᙵᓪᓕ 370-ᓂ ᐃᒡᓗᒋᔭᐅᔪᓂᒃ, 120 ᐃᒡᓗᐃᑦ ᓴᓇᔭᐅᒃᑲᓐᓂᕆᐊᖃᒻᒪᕆᓚᐅᕐᑐᑦ.
ᐅᑯᑎᒎᓇᕐᓕ ᑲᓇᑕᒥ ᐃᓄᒋᐊᓗᐊᕆᔭᐅᓂᒃᑯᑦ, ᐅᑯᐊ 140 ᐃᒡᓗᐃᑦ ᐅᑯᓇᙵᑦ 370 ᐃᒡᓗᓂᒃ ᐃᒪᐃᓕᒍᑎᐅᓯᒪᓂᑯᑦ “ᐃᒡᓗᒃᓴᐅᙱᑦᑐ” ᐅᑯᓇᙵᑦ ᑲᓇᑕᒥ ᐃᒡᓗᓕᕆᔨᕐᔪᐊᒃᑯᑦ ᒪᓕᒐᖏᑦᑎᒍᑦ. ᑕᒪᓐᓇ ᑐᑭᖃᖅᑐᖅ ᐃᒡᓗᕈᓯᖃᙱᓗᐊᕐᓂᖏᓐᓂᒃ ᐃᓄᒋᐊᖕᓂᖏᑦ ᒪᓕᒃᖢᒋᑦ ᐃᒡᓗᖃᖃᑕᐅᔪᑦ.
ᐅᓄᙱᑦᑐᓂᒃ ᑲᓇᑕᒥ ᐃᓄᒃᑕᖃᕐᒥᔪᖅ ᐃᒡᓗᖃᖅᑎᑕᐅᙱᓐᓂᕐᓴᓂᒃ. ᑲᒪᓇᙱᓚᕐᓕ ᐊᕐᕌᒎᓕᖅᑐᓂᒃ ᐊᕙᑎᓂᒃ (20), ᐳᕙᒡᓗᖕᓇᖅ ᑐᐊᕕᕐᓇᖅᑐᕆᔭᐅᖤᕋᒥ ᓄᓇᕗᒧᑦ ᐊᒻᒪ ᐊᓯᖏᓐᓄᑦ ᐅᑭᐅᕐᑕᖅᑐᕐᒦᑦᑐᓂᒃ.
ᐊᒻᒪᓗ ᐃᓱᒪᓇᙱᖢᓂ ᐳᕙᒡᓗᖕᓇᖅ ᓄᖑᑎᑕᐅᔪᓐᓇᕆᐊᒃᓴᖓᓂᒃ ᑖᒃᑯᓇᓂ ᓄᓇᓕᖕᓂ ᑭᓯᐊᓂ ᐊᓯᔾᔨᖅᓯᒻᒪᕆᒃᑯᑎᒃ ᒪᑯᐊ ᐃᒡᓗᒃᓴᐃᑦ ᐅᓄᕐᓯᑎᑕᐅᒃᑲᓐᓂᕐᓗᑎᒃ ᐊᒻᒪ ᐱᐅᓂᕐᓴᐅᑎᑕᐅᓗᑎᒃ.
ᑭᓯᐊᓂᓕ ᑭᖑᓪᓕᖅᐹᒥᑦ ᓂᕈᐊᒐᒃᓴᐅᑲᑕᒃᑎᓪᓗᒋᑦ, ᑐᕉᑑᑯᑦ ᒪᓕᒐᓕᕆᔨᖏᑦ ᒪᓂᒻᒪᐃᓯᒪᓚᐅᙱᑦᑎᐊᖅᑐᑦ ᐃᓄᐃᑦ ᐃᒡᓗᒃᓴᖏᓐᓂᒃ, ᑭᓯᐊᓂᓕ ᐅᖃᐅᓯᖃᒃᑲᓐᓂᑐᐃᓐᓇᖅᖢᑎᒃ 2016-ᒥᑦ ᐊᒻᒪ 2017-ᒥᑦ ᐊᑐᖅᑕᐅᔪᒃᓴᓂᒃ ᐊᐅᓚᔾᔪᑎᒃᓴᓂᒃ ᐱᓂᐊᕐᓂᕋᕐᓯᒪᔭᖏᓐᓂᒃ. ᑕᒪᐅᓇᓕ, ᐱᒃᑲᖅᑎᑕᐅᔪᓐᓇᙱᑦᑐᓪᓘᓐᓃᑦ ᓱᕋᐃᓯᒪᓂᖏᓐᓂᒃ ᐅᖃᐅᓯᖏᓐᓂᒃ. ᑕᒪᑐᒧᖓᓘᓐᓃᑦ ᐃᓱᒫᓘᑎᖃᓚᐅᙱᒻᒥᔪᑦ ᐅᖃᐅᓯᖃᓚᐅᕐᓯᒪᓂᖏᓐᓂᒃ.
ᑕᒪᓐᓇᓕ ᓴᕿᑎᑦᑎᓯᒪᒍᑎᐅᒋᕗᖅ ᖃᓄᐃᓕᐅᕐᓯᒪᓂᖏᓐᓂᒃ ᑲᓇᑕᒥ ᐋᓐᓂᐊᕆᔭᐅᔪᒧᑦ ᑐᐊᕕᕐᓇᖅᑐᓕᕆᓂᒃᑯᑦ, ᑕᒫᓂ ᐳᕙᒡᓗᒃᑐᑦ ᐃᓄᐃᑦ ᓄᓇᖓᓂ 300-ᖏᕐᓱᖅᓯᒪᓪᓗᓂ ᐅᓄᕐᓂᕐᓴᐅᒻᒪᕆᒃᑎᓪᓗᒋᑦ ᐳᕙᒡᓗᒃᑐᓂᑦ ᓄᓇᖃᖅᑳᙱᑦᑐᓂᒃ ᑲᓇᑕᒥ ᐃᓅᓂᑯᓂᒃ ᑕᐅᑐᒃᖢᓂ.
ᓄᓇᕗᒥᓪᓕ, ᐱᐅᙱᓐᓂᕐᓴᐅᑐᐃᓐᓇᕆᐊᖃᖅᑐᖅ. ᐊᕐᕌᓂ ᐅᓂᒃᑳᓕᐊᓕᐊᕆᔭᐅᓚᐅᕐᑐᓂᒃ ᖃᐅᔨᒍᑎᐅᓚᐅᕐᐳᖅ ᐊᑕᐅᓯᖅ 100-ᓂ ᓄᑕᕋᓛᓂ ᐃᓅᔪᓂᒃ ᓄᓇᕗᒥᑦ ᑖᔅᓱᒥᖓ ᐋᓐᓂᐊᖃᑐᐃᓐᓇᕆᐊᖃᕐᓂᖏᓐᓂᒃ.
ᑕᐃᒪᓕ ᑕᒪᒃᑯᓂᖓ ᐃᓱᒫᓘᑎᖃᓗᐊᖅᑎᓐᓇᒋᑦ ᑐᐊᕕᕐᓇᖅᑐᓂᒃ ᐋᓐᓂᐊᕆᔭᐅᔪᒧᑦ, ᑕᐃᒪᓕ ᖃᓄᕐᓕ ᐃᓱᒫᓘᑎᖃᖅᐸᑦ ᑐᕉᑑ ᓕᐳᕈᓪ ᒐᕙᒪᖏᑦ ᐊᓯᖏᓐᓂᒃ ᒪᑯᓂᖓ ᐃᓱᒪᒃᑯᑦ ᐋᓐᓂᐊᖃᕐᓂᕐᒥᒃ, ᓄᓇᓕᖕᓂᑦ ᐃᒡᓗᑖᖅᑐᕆᐊᖃᕐᓂᕐᒥᒃ, ᐃᓕᓐᓂᐊᒃᑲᓐᓂᕆᐊᖃᕐᓂᕐᒥᒃ ᐊᒻᒪᓗ ᐊᓯᒃᑲᓐᓂᖏᓐᓂᒃ?
ᐃᓱᒪᑦᑎᐊᕈᓐᓇᕈᔅᓯ, ᓂᕆᐅᓗᐊᙱᓪᓗᓯ. ᑕᐃᒪᐃᙱᒃᑯᔅᓯᓕ, ᐸᕐᓇᒃᓯᒪᓗᓯ ᑲᑕᑦᑎᑕᐅᓇᔭᕐᓂᕐᒧᑦ.
ᖃᐅᔨᒪᒋᑦᑎ: ᖃᔅᓯᐅᓂᕆᔭᐅᓯᒪᔪᑦ ᐳᕙᒡᓗᖕᓇᐅᑉ ᐱᕙᓪᓕᐊᓯᒪᐃᓐᓇᕐᓂᖓ ᐅᑯᓇᙶᕐᓯᒪᔪᖅ ᐃᓄᐃᑦ ᑕᐱᕇᑦ ᑲᓇᑕᒥ ‘ᐃᓄᖕᓂᑦ ᐳᕙᒡᓗᖕᓇᒥᑦ ᓄᖑᑎᑦᑎᓂᕐᒧᑦ ᐊᑐᖅᑕᒃᓴᓂᒃ’, ᓴᕿᑕᐅᓂᑯᑦ ᓄᕕᐱᕆ 2018-ᒥᑦ. ᑭᙵᓂᑦ ᓇᓗᓇᐃᔭᖅᑕᐅᓯᒪᔪᑦ ᐅᑯᓇᙶᖅᑐᑦ ᓇᐃᓴᐃᔨᒃᑯᓐᓂᒃ ᑲᓇᑕᒥᑦ ᐅᓂᒃᑳᓂ ᑲᑎᕐᓱᖅᑕᐅᔪᕕᓂᕐᓂᒃ 2016-ᒥ ᓇᐃᓴᐃᑎᓪᓗᒋᑦ.
(0) Comments