ᑐᕉᑑ ᓇᓗᓇᐃᕐᓯᑎᓪᓗᒍ ᐃᒡᓗᒃᓴᓄᑦ ᑮᓇᐅᔭᖅᑕᖃᕐᓂᖓᓂᒃ, ᓄᓇᕗᑦ ᓯᕗᓕᐅᕐᑎᖓ ᑕᒪᑐᒥᖓ ᐱᒻᒪᕆᐅᑎᑦᑎᓚᐅᕐᐳᖅ

“ᑲᓇᑕᐅᑉ ᐊᖓᔪᖅᑳᖓ ᑐᓴᖅᑎᑦᑎᖕᒪᑦ ᑕᐃᒪᓕ ᑖᓐᓇ ᐱᐅᕗᖅ”

ᓄᓇᕗᑦ ᓯᕗᓕᐅᕐᑎᖓ ᔫ ᓴᕕᑲᑖᖅ, ᑲᓇᑕᐅᑉ ᐊᖓᔪᖅᑳᖓ ᔭᔅᑎᓐ ᑐᕉᑑ ᐊᒻᒪ ᐃᖃᓗᐃᑦ ᒪᐃᔭᖓ ᒫᑎᓚᐃᓐ ᕆᐊᑦᕗᓐ ᓯᓚᒻᒧᑦ ᐱᓱᒃᐸᓪᓕᐊᕗᑦ ᑐᓴᒐᒃᓴᓕᐅᕐᓂᐊᕐᓗᑎᒃ ᐅᕙᓂ ᐃᖃᓗᐃᑦ ᕼᐋᐱ ᕚᓕᒥᑦ ᐃᓄᖕᓄᑦ ᐋᒐᓯ 2-ᖑᓚᐅᕐᑐᒥ. (ᐊᔾᔨᓕᐅᕆᔨ ᔨᒻ ᐱᐅᓪ)

By ᔨᒻ ᐱᐅᓪ

For an English version of this story, see As Trudeau confirms existing housing money, Nunavut’s premier makes the best of it

ᓄᓇᕗᑦ ᓯᕗᓕᐅᕐᑎᖓ ᔫ ᓴᕕᑲᑖᖅ ᖃᐅᔨᒪᔪᖅ ᓄᓇᕗᑦ ᒐᕙᒪᖓᑦ ᓈᒻᒪᙱᓗᐊᕐᑐᓂᒃ ᑮᓇᐅᔭᖅᑖᑲᑕᖕᓂᖏᓐᓂᒃ ᐃᒡᓗᒃᓴᓕᐅᕐᓂᕐᒨᖅᑐᓂᒃ, ᑭᓯᐊᓂᓕ ᑲᓇᑕᐅᑉ ᐊᖓᔪᖅᑳᖓ ᔭᔅᑎᓐ ᑐᕉᑑ ᓴᓂᑦᑎᐊᖓᓂ ᓇᖏᖅᑎᓪᓗᒍ ᐋᒐᓯ 2-ᖑᓚᐅᕐᑐᒥᓐ, ᓂᓪᓕᓚᐅᙱᒻᒥᔪᖅ ᓈᒻᒪᒃᓴᙱᓐᓂᖓᓂᒃ ᓄᓇᕗᑦ ᒐᕙᒪᒃᑯᑦ ᒐᕙᒪᑐᖃᒃᑯᓐᓂᑦ ᐃᑲᔫᓯᐊᖅᑖᕆᕙᒃᑕᖏᓐᓂᒃ.

ᑭᖑᓂᐊᒍᑦ ᐊᖏᖃᑎᒌᒍᑎᒥᓐ ᐊᑎᓕᐅᓚᐅᕐᑎᓗᒋ ᐋᒐᓯ 1-ᒥ ᐋᕿᒃᓯᓂᕐᒧᑦ ᑕᓪᓗᕈᑎᐅᑉ ᐃᒪᖓᓂ ᑕᕆᐅᕐᒥᐅᑕᓂᒃ ᓴᐳᔾᔨᓯᒪᕝᕕᒃᓴᒥ ᐊᒻᒪᓗ ᐱᒋᐊᕐᓂᖓᓂ ᐆᒪ ᓄᑖᖅ ᓴᐳᔾᔭᐅᓯᒪᔪᖅ ᑕᐃᔭᐅᒧᖅ ‘ᑐᕙᐃᔪᐃᑦᑐᖅ’, ᑐᕉᑑ ᐃᖅᑲᓇᐃᔭᖅᑎᖏ ᑐᓴᒐᒃᓴᓕᐅᖅᑎᓂ ᖃᐃᖁᔨᓚᐅᕐᑐᖅ ᖃᐅᒃᐸᙳᖅᑎᓪᓗᒍ ᐅᓪᓛᒃᑯᑦ ᓯᒪᒥ ᑐᓴᒐᒃᓴᓕᐅᕐᓂᐊᕐᒪᑕ ᐃᒡᓗᖃᕐᕕᐅᙱᑦᑐᒥᒃ ᕼᐋᐱ ᕚᓕᒥᓐ.

ᑕᐃᑲᓂ, ᑐᕉᑑ ᑐᓴᖅᑎᑦᑎᓚᐅᕐᑐᖅ ᐃᒡᓗᒃᓴᓕᐅᕐᓂᕐᒧᑦ ᑮᓇᐅᔭᓂᒃ ᓄᓇᕗᑦ ᐃᒡᓗᓕᕆᔨᓄᑦ ᑐᓂᓯᓂᐊᕐᓂᖏᓐᓂᒃ ᐊᕐᕌᒍ 8 ᐃᓗᐊᓂ ᐃᒪᓐᓇ: $290 ᒥᓕᐊᓐ.

“ᖃᐅᔨᒪᔪᒍᑦ ᐅᓇ ᐱᒋᐊᕈᑎᕐᔪᐊᖑᓂᐊᕐᑐᖅ ᓯᕗᒧᒃᐸᓪᓕᐊᓂᕐᒧᑦ ᐊᒻᒪ ᐃᑲᔪᕈᑎᕐᔪᐊᖑᓂᐊᖅᖢᓂ,” ᑐᕉᑑ ᐅᖃᖅᑐᖅ.

ᑭᓯᐊᓂᓕ ᑖᒃᑯᐊ ᐃᑲᔫᑎᒃᓴᑦ ᓯᕗᓂᐊᓂ ᐱᓂᐊᕐᓂᕋᕈᑎᐅᓯᒪᔪᑦ ᒐᕙᒪᑐᖃᒃᑯᑦ 2016-ᒥᑦ ᐊᒻᒪ 2017-ᒥᑦ ᐊᐅᓪᓚᔾᔪᑎᒃᓴᓕᐅᕈᑎᖏᓐᓂᒃ.

ᑖᓐᓇᓕ ᑮᓇᐅᔭᖅ ᓄᓇᕗᒥᑦ ᐃᒡᓗᑖᕆᔭᐅᔭᕆᐊᓕᖕᓄᑦ ᓈᒻᒪᙱᓗᐊᖅᑐᖅ. ᓄᓇᕗᑦᒥ ᐃᒡᓗᓕᕆᔨᕐᔪᐊᒃᑯᑦ ᑭᖑᓪᓕᖅᐹᒥᑦ ᓇᐃᓴᐅᑎᖁᑎᖏ ᐃᓱᒪᒋᔭᖃᕐᓯᒪᔪᑦ ᒫᓂ 3,100-ᓂᒃ ᓄᑖᓂ ᐃᒡᓗᑖᕆᐊᖃᕐᓂᖏᓐᓂᒃ.

ᐅᓇ ᓴᕿᔮᖅᑎᑦᑎᔪᖅ ᒫᓂ 5,000 ᐃᓄᐃᑦ, ᐅᕝᕙᓘᓐᓃᑦ 2,500 ᐃᓚᒌᖑᔪᑦ ᓄᓇᕗᒥᑦ ᐃᒡᓗᑖᕆᐊᖃᒻᒪᕆᒃᑐᑦ ᓈᒻᒪᒃᑐᓂᒃ.

“ᐃᑲᔫᑎᒃᓴᑦ 83-ᓂ ᐃᒡᓗᓕᐅᕈᑎᐅᓇᔭᖅᑐᖅ ᐊᕐᕌᒍᒥ, ᑕᐃᒪᓕ ᓇᐃᓴᐅᓯᕆᓂᒃᑯ ᐊᑯᓂᐊᓗᒃ 3,100 ᑎᑭᒐᓱᒐᔭᖅᑕᕗᑦ. ᑎᑭᐅᑎᓚᐅᕐᓯᒪᔾᔮᙱᑦᑐᒍᑦ,” ᓴᕕᑲᑖᖅ ᐅᖃᖅᑐᖅ.

ᐅᑯᐊ 83 ᐃᒡᓗᒃᓴᐃᑦ ᐊᕐᕌᒍᒧ ᐃᓱᒪᒋᔭᐅᓂᖓ ᓄᑖᙳᖏᑦᑐᖅ. ᓴᕕᑲᑖᖅ ᐅᖃᓚᐅᕐᓯᒪᔪᖅ ᐊᐃᐲᑏᐊᓐᑯᓐᓄᑦ ᒫᑦᓯᐅᓚᐅᕐᑐᒥ ᒐᕙᒪᒋᔭᖏᑦ ᓂᕆᐅᖕᓂᕋᖅᖢᑎᒃ ᓴᓇᓂᐊᕐᓗᑎᒃ 83-ᓂ ᐃᒡᓗᒃᓴᓂᒃ 2019/20 ᐊᕐᕌᒍᒥ.

ᐅᓇ ᐊᑦᑎᖕᓂᕐᓴᐅᓕᕐᑐᖅ ᐅᑯᓇᙵᑦ 91-ᓂ ᓄᓇᕗᑦ ᒐᕙᒪᒃᑯᑦ ᐃᓱᒪᒋᓚᐅᕐᑕᖏᓐᓂᒃ ᓴᓇᔪᒪᔭᖏᓐᓂᒃ 2018/19-ᒥᑦ.

ᓇᐃᓴᐅᑏᑦ ᓇᓕᒧᒌᖃᑦᑕᔾᔮᔪᒃᓴᐅᙱᑦᑐᑦ ᐊᕐᕋᒍᓂ ᐊᑐᓵᖅᑐᓂᒃ, ᑕᐃᒪᓐᓇ ᓄᓇᕗᑦ ᓂᕆᐅᒍᓐᓇᕐᓂᐊᖅᑐᑦ ᓴᓇᔭᐅᓂᐊᖅᑐᓂᒃ ᐊᕐᕌᒍᑕᒫᓐ, ᒫᓐᓇᒥᑦ ᒪᐅᖓᐸᓗᒃ 2026 ᐅᕝᕙᓘᓐᓃᑦ 2027.

ᑮᓇᐅᔭᑦ ᐅᓄᕐᓂᕐᓴᐃᑦ ᓄᓇᕗᒧᑦ ᐃᒡᓗᓕᐅᕈᑎᒃᓴᑦ ᑐᓐᓂᔭᐅᓚᐅᕐᑐᑦ ᒐᕙᒪᑐᖃᒃᑯᓐᓂ 2016-ᒥᑦ—$76.7 ᒥᓕᐊᓐ—ᐊᒻᒪ 2017-ᒥ—$240 ᒥᓕᐊᓐ, ᐃᓚᖃᖅᖢᓂ ᓄᓇᕗᑦ ᒐᕙᒪᒃᑯᓐᓂ ᑐᓂᔭᐅᔪᓂᒃ.

ᓄᓇᕗᑦ ᑐᓂᔭᐅᓚᐅᕐᓯᒪᙱᑦᑐᑦ ᐃᒡᓗᓂᒃ ᓴᓇᔭᐅᔪᒃᓴᓂᒃ 2019-ᒥ, ᑕᐃᒪᓐᓇᓗ ᔪᐊᔾ ᕼᐃᒃᖦ, ᓄᓇᕗᑦ ᒐᕙᒪᒃᑯᑦ ᑮᓇᐅᔭᓕᕆᓂᕐᒧᑦ ᒥᓂᔅᑕᖓ, ᐃᒪᐃᓕᓕᓚᐅᕐᓯᒪᔪᖅ ᒫᑦᓯᐅᓚᐅᕐᑐᒥ: “ᐱᑕᖃᙱᓗᐊᕐᓂᖅ ᓄᓇᕗᑦᒨᓪᓚᕆᒃᑐᓂᒃ ᖃᓄᐃᓕᐅᕈᑎᓂ ᓈᒻᒪᙱᓕᐅᕈᑎᐅᓗᐊᕐᑐᖅ, ᐊᒻᒪᓗ ᐊᒃᓱᕈᕈᑎᐅᒻᒪᕆᒃᖢᓂ ᐊᓂᒍᐃᑦᑎᐊᕐᓂᕐᒥ ᐱᕈᖅᑎᑦᑎᕙᓪᓕᐊᓂᒃᑯᑦ.”

ᑭᓯᐊᓂᓕ ᓴᕕᑲᑖᖅ, ᑕᓪᓕᕐᒥᐅᓚᐅᕐᑐᒥᓐ, ᐅᖃᓚᐅᕐᑐᖅ ᐊᑑᑎᖃᕐᓂᖓᓂᒃᓱᓕ ᐅᓇ ᑐᕉᑑ ᐅᖃᓪᓚᒍᓐᓇᓚᐅᕐᓂᖓ ᓄᓇᕗᒥᑦ ᐃᒡᓗᓕᕆᓂᕐᒥᒃ ᐃᖃᓗᖕᓂᑦ.

“ᐃᓱᒪᒃᑯᓪᓕ, ᑕᒪᓐᓇ ᑐᑭᖃᖅᑐᖅ ᒐᕙᒪᒃᑯᑦ ᐅᕙᑦᑎᓐᓂᑦ ᓯᕗᓪᓕᐅᑎᔭᕆᐊᓕᖕᓂᑦ ᐃᓱᒪᒋᔭᖃᕐᓂᖏᓐᓂᒃ. ᑲᓇᑕᐅᑉ ᐊᖓᔪᖅᑳᖓ ᑐᓴᖅᑎᑦᑎᖕᒪ ᑕᒪᓐᓇᓗ ᐱᐅᓪᓗᓂ,” ᓴᕕᑲᑖᖅ ᐅᖃᖅᑐᖅ.

“ᓱᓕ ᐃᑲᔫᑎᒻᒪᕆᐅᔪᖅ, ᓲᖃᐃᒻᒪ ᓯᕗᓪᓕᐅᑎᑕᐅᓕᕐᒪ ᐊᒻᒪᓗ ᐅᖃᐅᓯᐅᑲᑕᖕᓂᐊᓕᖅᖢᓂ ᐊᒻᒪ ᖃᐅᔨᒪᓕᕈᑎᐅᓗᓂ ᐃᒡᓗᖃᕆᐊᖃᒻᒪᕆᖕᓂᑦᑎᓐᓂ ᓄᓇᕗᒥᑦ.”

ᒪᑯᓄᖓᓕ ᐊᖏᕐᕋᖃᙱᓐᓂᐅᔪᓄᑦ, ᓴᕕᑲᑖᖅᐅᖃᓚᐅᕐᑐᖅ ᐅᑯᐊ ᓄᓇᓖᑦ ᒐᕙᒪᖓᑦ “ᐱᓕᕆᐊᖃᖅᖢᑎ” ᐃᖃᓗᖕᓂᑦ, ᐱᑕᖃᕆᐊᖃᓪᓚᕆᖕᒪᑦ ᐊᖏᕐᕋᖃᙱᑦᑐᒃᑯᕕᖕᓂᑦ, ᐊᖏᕐᕋᒃᓴᒥᑦ ᐅᑕᕿᕕᐅᔪᓐᓇᕐᓂᐊᕐᑐᓂᒃ ᐊᒻᒪ ᑐᐊᕕᕐᓇᖅᑐᓂ ᐊᖏᕐᕋᕆᔭᐅᔪᓐᓇᕐᓂᐊᖅᑐᓂᒃ ᐊᓯᖏᓐᓃᑦᑐᓂᒃ ᓄᓇᓕᖕᓂ.

ᐅᖃᓚᐅᕐᑐᖅ ᒐᕙᒪᒃᑯᑦ ᐱᓕᕆᔨᒻᒪᕆᖏᑦ ᑕᒪᑐᒥᖓ ᐅᖃᐅᓯᖃᕈᓘᔭᖃᑦᑕᕐᓂᖏᓐᓂᒃ, ᑭᓯᐊᓂᓕ ᐅᖃᖅᑐᖅ ᓄᓇᕗᑦ ᒐᕙᒪᒃᑯᑦ ᑮᓇᐅᔭᖃᑐᐃᓐᓇᕐᒥᖕᒪᑕ ᐊᑐᕈᓐᓇᑐᐃᓐᓇᖅᑐᓂᒃ ᐊᒻᒪᓗ ᐊᑐᕐᑕᐅᓂᕐᓴᐅᕙᒃᖢᑐ ᐊᑐᕐᕕᐅᔭᕆᐊᖃᓛᓂᒃ.

ᒪᑯᑎᒎᓇᕐᓕ ᓄᓇᕗᒥᑦ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪ ᑯᐊᐳᕇᓴᐃᓐ, ᒫᓐᓇᓗ ᑮᓇᐅᔭᖅᑖᑲᑕᓕᖅᖢᑎᒃ ᑕᒪᐃᓐᓂ ᐱᖓᓱᓂᒃ ᐊᕕᒃᑐᖅᓯᒪᔪᓂᒃ ᓴᕕᕋᔭᒃᓴᓕᕆᓂᕐᒧᑦ ᐊᑭᓕᐅᑎᐅᕙᓪᓕᐊᔪᓂᒃ, ᓴᕕᑲᑖᖅ ᐅᖃᓚᐅᕐᑐᖅ ᐅᖃᐅᓯᖃᖃᑦᑕᐃᓐᓇᕐᓂᖏᓐᓂ ᐃᒡᓗᓕᕆᓂᕐᒥᒃ ᐱᓕᕆᖃᑕᐅᓂᐊᕐᓂᕐᒥ, ᑭᓯᐊᓂᓕ ᓴᕿᑦᑐᖃᓪᓚᕆᓚᐅᙱᑦᑐᖅ.

2019-ᒥ ᐃᓄᐃᑦ ᓄᓇᖓᓂᒃ ᐃᒡᓗᓕᕆᓂᕐᒧᑦ ᖃᓄᐃᓕᐅᕈᑎᑦ, ᐋᕿᒃᑕᐅᓯᒪᔪᑦ ᐃᓚᐅᓪᓗᑎᒃ ᒐᕙᒪᑐᖃᒃᑯᑦ ᐊᒻᒪ ᐃᓄᐃᑦ ᑕᐱᕇᑦ ᑲᓇᑕᒥ, ᐊᒻᒪᓗ ᐃᓄᐃᑦ ᑲᑐᔾᔨᖃᑎᒌᖏᑦ ᓄᓇᕗᒥᑦ “ᐃᑲᔪᕈᒪᑦᑎᐊᖅᑐᑦ ᐅᖃᐅᓯᖃᕐᓂᕐᒥᒃ ᐃᒡᓗᖃᙱᓗᐊᕐᓂᕐᒥᓐ ᓄᓇᕗᒥᑦ.”

ᑭᓯᐊᓂᓕ ᐸᕐᓇᐅᑎᐅᔪᑦ ᓄᓇᕗᑦ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᑐᕌᖓᓗᐊᖅᑳᔨᙱᒻᒪᑕ ᑮᓇᐅᔭᓕᐅᙱᓐᓂᕐᓴᓄᑦ ᑕᒪᒃᑯᐊ ᐊᑭᒃᖠᒋᐊᕐᓯᒪᔪᓂᑦ ᐃᒡᓗᒋᔭᐅᔪᓐᓇᖅᑐᓂᒃ.

ᐃᒪᓐᓇᖔᕐᓕ, ᐃᓄᐃᑦ ᑲᑐᔾᔨᖃᑎᒌᖏᑦ ᓄᓇᕗᒥᑦ ᕿᓂᕐᒪᑕ ᐊᑭᓖᒐᒃᓴᐅᓇᔭᖅᑐᓂᒃ ᓇᖕᒥᓂᖃᓕᕈᑎᒃᓴᓂ ᐃᓄᖕᓄᑦ ᒫᓐᓇ ᒐᕙᒪᒃᑯᑦ, ᓇᖕᒥᓂᕆᔭᐅᔪᓂᒃ ᐅᕝᕙᓘᓐᓃᑦ ᐃᒻᒥᒃᑰᖓᔪᑎᒍᑦ ᐃᒡᓗᖏᓐᓂᒃ ᐊᑐᖅᑐᐊᖅᑐᓂᒃ.

“ᐅᓇ ᖃᓄᐃᓕᐅᕈᑎ ᐃᑲᔪᕈᑎᐅᓇᔭᕐᒥᔪᖅ ᐊᒻᒪ ᓇᖕᒥᓂᖅ ᐃᒡᓗᖃᕈᓐᓇᕐᓂᕐᒥ ᐱᒋᐊᖅᑎᑦᑎᒍᑎᐅᓗᓂ ᐊᔪᕈᓐᓃᖅᐹᓪᓕᕐᓂᕐᒥᒃ ᐊᒻᒪᓗ ᐃᖅᑲᓇᐃᔮᓂᒃ ᓴᕿᑎᑦᑎᒃᑲᓐᓂᕐᓂᕐᒥᒃ ᑕᒪᒃᑯᐊᓗ ᑮᓇᐅᔭᓂ ᐊᒃᓱᕈᕈᑎᐅᙱᓐᓂᕐᓴᐅᓗᑎᒃ ᒐᕙᒪᐅᔪᓄᑦ,” ᖃᓄᐃᓕᐅᕈᑎᒃᓴᖅ ᐅᖃᕐᓯᒪᔪᖅ.

2016ᒡᒥ, 56.4 ᐳᓴᓐᑎᐅᔪᑦ ᐃᓄᐃᑦ ᐃᓄᒋᐊᓗᐊᖅᑐᓃᑦᑐ ᐊᒻᒪ 34.3 ᐳᓴᓐᑎᐅᔪᑦ ᐃᒡᓗᖃᓚᐅᕐᑐᑦ ᓴᓇᔭᐅᔭᕆᐊᖃᒻᒪᕆᒃᑐᓂᒃ.

ᐊᒻᒪᓗ 2017-ᒥ, ᑲᓇᑕᒥ ᐃᒡᓗᓕᕆᔨᕐᔪᐊᒃᑯᑦ (CMHC) ᐅᓂᒃᑳᕐᓯᒪᓚᐅᕐᑐᑦ ᒪᑯᓇᓂ ᐃᒻᒥᒃᑰᖓᔪᓂᒃ ᐃᒡᓗᓂ ᓂᐅᕕᐊᒃᓴᖃᖅᑐᓂᒃ ᐃᖃᓗᖕᓂᑦ, ᑕᖅᑭᒧᑦ ᐊᑐᖅᑐᐊᖅᖢᓂ ᒪᕐᕉᖕᓂ ᐃᒡᓗᕈᓯᖃᖅᑐᒥ ᒫᓃᓚᐅᕐᓂᖓᓂᒃ $2,597.

Share This Story

(0) Comments