ᑕᓗᕐᔪᐊᖅᒥᐅᑕᑦ ᐃᓅᓱᒃᑑᑦ ᐅᑎᕐᐳᒃ ᐋᓐᓂᐅᕆᐅᒥ ᕼᐋᑭᕐᓂᕐᒥᒃ ᐃᓕᓐᓂᐊᕆᐊᓚᐅᖅᖢᑎᒃ ᓄᑖᓂ ᐊᔪᕈᓐᓃᖅᐹᓪᓕᖅᖢᑎᒃ ᖃᐅᔨᕚᓪᓕᖅᖢᑎᒡᓗ

For English version, please see Taloyoak teens return from Ontario hockey academy with new skills, knowledge

ᑕᕿᓂᒃ ᑕᓪᓕᒪᓂᒃ ᐊᔪᕈᓐᓃᕐᓴᓚᐅᖅᖢᑎᒃ, ᑎᐅᕆᐊᔅ ᐊᓕᑭ ᐊᒻᒪ ᔮᓇᑕᓐ ᐃᑦᑐᓗᒃ ᐅᑎᕐᓯᒪᓕᕐᑑᒃ ᐊᖏᕐᕋᖓᓄᑦ ᑕᓗᕐᔪᐊᖅᒧᑦ ᐊᒻᒪᓗ ᐊᔪᕈᓐᓃᕐᓴᒃᑲᓐᓂᓕᖅᖢᑎᒃ ᐊᔪᕈᓐᓃᕐᓴᓚᐅᖅᑕᖏᓐᓂᒃ ᕼᐋᑭᕐᓂᕐᓯᒃ ᐃᓕᓐᓂᐊᕐᕕᒃᒥ (Academy of Hockey Training & Development).

ᐃᓕᓐᓂᐊᕐᕕᐊᓗᖕᒥ ᐃᓕᓐᓂᐊᖅᑎᐅᔫᒃ ᐅᑭᐅᖅ ᒍᕌᕙᓐᕼᐆᔅᑦ, ᐋᓐᑎᐅᕆᐅᒦᓚᐅᖅᑑᒃ ᓯᑯᒦᑲᑕᒃᖢᑎᒃ ᐱᙳᐊᖅᑐᓕᕆᔨᒃᑯᓐᓄᑦ ᑲᑐᔾᔨᖃᑎᒌᓄᑦ ᐊᔪᕈᓐᓃᕐᓴᕈᑎᒃᓴᓂᒃ ᒪᓂᒻᒪᐃᓯᒪᖃᑦᑕᖅᑐᑦ ᐃᓅᓱᒃᑐᓄᑦ ᐊᔪᕈᓐᓃᖅᐹᓪᓕᕈᒪᔪᓂᒃ ᕼᐋᑭᒥ.

ᑖᒃᑯᐊ ᐊᖑᑏ ᐃᓕᓐᓂᐊᕆᐊᕈᓐᓇᓕᓚᐅᕐᓯᒪᔪᑦ ᑎᓯᐱᕆᒥ ᐃᑲᔪᖅᑕᐅᓯᒪᓪᓗᑎᒃ ᑮᓇᐅᔭᓕᐅᕋᓱᙱᑦᑐᓂᒃ ᓄᓇᖃᖅᑳᖅᑐᓄᑦ ᓱᕈᓯᕐᓄᑦ ᖃᓄᐃᓕᐅᖃᑎᒌᒃᑐᓂᒃ ᑲᓇᑕᒥ ᐊᒻᒪᓗ ᐃᓄᐃᑦ ᓱᕈᓰᑦ ᓯᕗᓪᓕᐅᓕᑦ ᐱᓕᕆᐊᒃᓴᒃᑯᑦ, ᑖᓐᓇ ᒐᕙᒪᒃᑯᓐᓂ ᐃᑲᔫᑎᖃᕐᓂᒃᑯᑦ ᐱᓕᕆᐊᒃᓴᖅ ᐃᑲᔪᕈᑎᐅᓪᓗᓂ ᐃᓄᖕᓂ ᐃᓅᓱᒃᑐᓂᒃ ᐋᓐᓂᐊᖃᖅᑕᐃᓕᓂᒃᑯᑦ, ᐃᓅᖃᑎᒌᖕᓂᒃᑯᑦ ᐊᒻᒪᓗ ᐃᓕᓐᓂᐊᕐᓂᒃᑯᑦ ᐃᑲᔫᑎᒃᓴᓕᕆᓂᒃᑯᑦ.

“ᑕᕿᑦ ᑕᓪᓕᒪᑦ ᐊᑯᓂᐊᓘᓚᐅᕐᑐᑦ ᑭᓯᐊᓂᓕ ᐊᓂᒍᐃᓪᓗᑕ,” ᐅᖃᕐᑐᖅ ᐊᓕᑭ, 16, ᐃᒡᓚᖅᓯᓪᓗᓂ ᐅᖄᒪᐅᑎᒃᑯᑦ ᑕᓗᕐᔪᐊᕐᒥ.

ᐅᖃᓚᐅᕐᑐᖅ ᑖᓐᓇ ᐊᒻᒪ ᐱᖃᓐᓇᖓ ᐃᑦᑐᓗᒃ, 17, ᐊᔪᕈᓐᓃᖅᐹᓪᓕᒻᒪᕆᓚᐅᕐᓂᖏᓐᓂᒃ ᕼᐋᑭᕐᓂᕐᒥᒃ ᐊᒻᒪᓗ ᐱᙳᐊᕈᓯᕆᕙᒃᑕᖏᓐᓂᒃ ᐊᔪᕈᓐᓃᓴᕈᑎᖃᒃᑲᓐᓂᖅᖢᑎᒃ.

ᐊᓕᑭ, ᕼᐋᖅᑐᓂᒃ ᓴᐳᓐᓂᐊᖅᑎᐅᕙᒃᑐ ᐅᖃᓚᐅᕐᑐᖅ ᓱᒃᑲᓂᕐᓴᐅᓕᕐᓂᕋᖅᖢᓂ ᐊᒻᒪ ᐅᓇ ᐃᑦᑐᓗᒃ ᕗᐃᖒᓪᓗᓂ ᐅᖃᓚᐅᕐᑐᖅ “ᐊᒃᓱᕈᕈᓐᓇᕐᓯᓂᕐᒥ” ᐸᒃ ᐱᓇᓱᑲᑕᒃᖢᒍ ᐊᒻᒪᓗ ᑎᒥᒥᓂ ᐊᑐᕐᓂᕐᓴᐅᔪᓐᓇᖅᓯᓪᓗᓂ ᐅᐸᒍᑎᕙᓪᓕᐊᓂᒃᑯᑦ.

“ᐊᔪᕈᓐᓃᕐᓴᖅᑎᑦᑎᔩᑦ ᐅᕙᓐᓂ ᐃᓕᓐᓂᐊᖅᑎᑦᑎᒻᒪᕆᓚᐅᕐᒪᑕ ᓯᑯᒦᓪᓗᓂ ᐊᒻᒪ ᓯᑯᒦᙱᓪᓗᓂ,” ᐅᖃᕐᑐᖅ ᐃᑦᑐᓗᒃ, ᐅᖃᕐᖢᓂᓗ ᕼᐋᑭ ᖁᕕᐊᒋᓛᕆᓂᕋᖅᖢᓂᐅᒃ.

“ᓯᑯᒥ ᐊᔪᕈᓐᓃᕐᓴᖅᖢᑕ, ᐊᔪᕈᓐᓃᖅᓴᖅᑎᑕᐅᖃᑦᑕᓚᐅᕋᑦᑕ ᐃᓂᒋᔭᑦᑎᓐᓂ ᐱᙳᐊᕈᓐᓇᕐᓂᕐᒥᒃ ᓲᕐᓗ ᐃᒪᓐᓇ 1-3-1 ᐋᖅᑭᒃᓯᒪᓂᕐᒥᒃ ᐅᓇ ᐃᓚᒋᔭᕗᑦ ᓴᐳᔾᔨᓯᒪᔾᔪᓯᖏᑦ ᐊᑭᕋᙳᐊᑦᑎᓐᓄᑦ.”

ᐃᑦᑐᓗᒃ ᐅᖃᓚᐅᕐᑐᖅ ᐊᔪᕈᓃᖅᐹᓪᓕᕐᓂᖓᓂᒃ ᖃᓄᖅ ᐱᙳᐊᖅᑎᑦᑎᔪᓐᓇᓕᕐᓂᕐᒥᒃ ᐊᒻᒪ ᐱᑐᐃᓐᓇᕆᐊᖃᓕᕐᓂᕐᒥ ᑖᓐᓇ ᐸᒃ ᐃᓂᖓᓃᓐᓂᕐᓴᐅᑎᓪᓗᒍ.

ᓯᑯᒦᙱᖢᑎᒃ ᐊᔪᕈᓐᓃᕐᓴᖃᑦᑕᓚᐅᕐᒥᔪᑦ ᐃᖃᐃᓕᓴᑲᑕᖕᓂᕐᒥᒃ ᐊᒻᒪ ᓴᙱᒃᑎᓴᕐᓂᕐᒥᒃ ᐊᒻᒪᓗ ᐃᓕᓐᓂᐊᖅᖢᑎᒃ ᓂᕿᑦᑎᐊᕙᓕᕆᓂᕐᒥᒃ ᐊᒻᒪ ᑎᒥ ᐃᒪᖃᖅᑎᑦᑎᐊᕐᓂᖓᓂᒃ. ᑖᒃᑯᐊᒃ ᐃᒡᓗᖃᑎᒌᓚᐅᕐᑑᒃ ᐃᓚᒌᓂᒃ ᑐᔪᕐᒥᓪᓗᑎᒃ ᑕᕿᓂᒃ ᑕᓪᓕᒪᓂᒃ ᒍᕇᕙᓐᕼᐆᔅᑦᒥ, ᐊᒻᒪᓗ ᐃᓕᓐᓂᐊᒐᓴᓄᑦ ᐃᑲᔪᖅᑎᖃᖅᐸᒃᖢᑎᒃ.

ᕼᐋᑭᙱᑦᑕᕌᖓᑕ ᐃᓕᓐᓂᐊᙱᒃᑯᑎᒡᓘᓐᓃᑦ ᑖᒃᑯᐊ ᐱᙳᐊᕆᐊᖅᐸᒃᖢᑎᒃ ᐴᓕᖕᒥ, ᐊᒻᒪᓗ ᓂᕆᔭᖅᑐᕐᕕᖕᓂ ᐱᓱᑲᑕᑐᐃᓐᓇᖅᖢᑎᒡᓘᓐᓃᑦ. ᐳᓚᕋᖅᑐᓄᑦ ᑕᑯᔭᐅᔭᖅᑐᖃᑦᑕᖅᑐᓂᒃ ᑕᑯᔭᖅᑐᖃᑦᑕᓚᐅᕐᒥᔫᒃ ᐆᑐᓇ ᐅᕆᑉᓕᔅ ᐃᒪᕐᒥᐅᑕᓕᕆᔨᑦ ᑲᓇᑕᒥ ᐊᒻᒪᓗ ᕈᐃᐅᓪ ᐋᓐᑎᐅᕆᐅ ᑕᑯᔭᒐᖃᕐᕕᒃᒥᑦ ᑐᕌᓐᑐᒥ.

ᐅᑎᕐᑎᓪᓗᒋᑦ ᐊᖏᕐᕋᖓᓄᑦ ᒫᔅᓯᐅᑉ ᐃᓱᐊᓂᒃ, ᐃᑦᑐᓗᒃ ᐊᒻᒪ ᐊᓕᑭ ᐊᔪᕈᓐᓃᕐᓴᓚᐅᕐᑕᖏᓐᓂᒃ ᐱᓕᕆᐊᖃᓕᓚᐅᖅᑑᒃ — ᑕᒪᕐᒥᒃ ᐱᒡᒍᓴᐅᑎᔪᓂᒃ ᐃᓚᐅᓯᒪᓕᕐᑑᒃ, ᐃᑦᑐᓗᒃ ᐅᑯᓇᓂ ᑕᓗᕐᔪᐊᖅ ᑎᕆᐅᓪ ᐱᓖᔪᔅᓄᑦ ᐊᒻᒪ ᐊᓕᑭ ᐊᓯᖏᓐᓄᑦ ᐃᓚᒌᒃᑐᓄᑦ.

ᐃᑦᑐᓗᒃ ᐃᓱᒪᔪᖅ ᕼᐋᑭᕐᑎᒻᒪᕆᐅᓕᓛᕈᒪᓪᓗᓂ, ᑭᓯᐊᓂᓕ ᐅᓇ ᐊᓕᑭ ᐃᓱᒪᔪᖅ ᓘᒃᑖᙳᕈᒪᓪᓗᓂ ᐊᒻᒪᓗ ᐊᔪᕈᓐᓃᕐᓴᖅᑎᑦᑎᕙᒡᓗᓂ ᓄᑲᖅᖠᕐᓂᒃ ᐱᙳᐊᖅᑎᓂᒃ ᐊᖏᕐᕋᖓᓂ.

ᑕᐃᒪᓕ ᐃᑲᔪᖅᑎᑖᒃᑲᓐᓂᕈᓐᓇᖅᐸᑕ ᑖᒃᑯᐊᒃ ᐅᑎᕈᒪᔫᒃ ᐃᓕᓐᓂᐊᕐᕕᒃᒧᑦ ᐊᕐᕌᒎᓛᕐᑐᖅ.

“ᖁᕕᐊᒋᓛᕆᓚᐅᕐᑕᕋ ᑕᒪᕐᒥ ᐱᓕᕆᐊᕆᔭᒃᑲ,” ᐃᑦᑐᓗᒃ ᐅᖃᕐᑐᖅ ᖃᓪᓗᓈᓃᓚᐅᕈᓯᕐᒥᓂᒃ. “ᐃᓕᑦᑎᕚᓪᓕᓚᐅᕐᑐᖓ ᐊᒻᒪᓗ ᐱᖃᓐᓇᕆᔭᖃᐅᓕᕐᖢᖓ ᐃᓚᖃᓕᖅᖢᖓ ᐊᒻᒪ ᖃᑕᙳᑎᖃᐅᓕᕐᖢᖓ. ᐊᔪᕈᓐᓃᖅᐹᓪᓕᒻᒪᕆᓚᐅᕐᑐᒍᑦ.”

“ᖁᔭᓕᔪᒪᔪᖓ ᐊᖏᔪᒥ ᐅᕙᓐᓂ ᐃᔪᖅᑐᐃᑦᑎᐊᓚᐅᕐᑐᓂᒃ ᑕᓪᓕᒪᓂᒃ ᑕᕿᓂᒃ ᐊᓂᒍᐃᓇᓱᒃᑎᓪᓗᖓ,” ᐊᓕᑭ ᐅᖃᕐᑐᖅ.

“ᐊᓕᐊᓇᐃᑦᑎᐊᓚᐅᕐᒪᑦ ᐱᓕᕆᐊᕆᓪᓗᒍ ᐊᒻᒪ ᒫᓐᓇᒧᑦ ᖁᕕᐊᓇᕐᓂᖅᐹᖑᓪᓗᓂ.”