ᖃᐅᔨᒪᔭᐅᑦᑎᐊᖅᑐᖅ ᔮᓐ ᐊᒪᕈᐊᓕᒃ ᑕᐃᔭᐅᕗᖅ ᐃᓚᒋᔭᐅᓕᕐᓂᖓᓂᒃ ᑲᓇᑕᒥ ᐃᓕᓴᕆᔭᐅᔾᔪᑎᒻᒪᕆᖕᒥᓐ ᐱᓕᕆᖃᑕᐅᓯᒪᓂᑰᓂᖓᓂᒃ ᓄᓇᕗᑦ ᐱᒋᐊᕐᓂᖓᓄᑦ. (ᐊᔾᔨᙳᐊᖁᑎᒋᔭᐅᔪᖅ)

ᑕᓪᓕᒪᑦ ᐃᓄᐃᑦ ᓄᓇᕗᒥᑦ, ᓄᓇᕕᒃᒥᓪᓗ ᑕᐃᔭᐅᕗᑦ ᑲᓇᑕᒥ ᐃᓕᓴᕆᔭᐅᔾᔪᑎᒻᒪᕆᖕᒧᑦ

ᔮᓐ ᐊᒪᕈᐊᓕᒃ, ᔫᓴᕝ ᓯᕗᐳᑕ, ᐲᑕ ᐋᑕᒥ, ᔮᓂ ᐄᓴᓗᒃ, ᐊᒻᒪ ᐹᓪ ᓂᒃᓚᓐ ᑎᒃᑯᐊᖅᑕᐅᕗᑦ

By ᔨᒻ ᐱᐊᓪ

For an English version of this story, see Five people with ties to Nunavut, Nunavik named to Order of Canada

ᑕᓪᓕᒪᑦ ᐅᔾᔨᕐᓇᓗᐊᕐᐸᒃᑐᑦ ᑲᓇᑕᒥᐅᑕ ᓄᓇᕗᒥᑦ ᐊᒻᒪ ᓄᓇᕕᒃᒥᑦ ᐊᒃᑐᐊᓂᖃᖅᑐ ᐃᓚᒋᔭᐅᕗᑦ 120-ᓂᒃ ᒐᕙᓇ ᔭᓄᕈᓪ ᔫᓕ ᐸᐃᔭᑦ ᑕᐃᔭᖏᓐᓂᒃ ᑲᓇᑕᒥ ᐃᓕᓴᕆᔭᐅᔾᔪᑎᒧᑦ ᑎᓯᐱᕆ 28-ᒥᑦ.

ᑖᒃᑯᐊ ᓄᑖᑦ ᐃᓚᒋᔭᐅᓕᕐᑐᑦ ᐃᓕᓴᕆᔭᐅᔾᔪᑎᒧᑦ ᖁᕕᐊᓲᑎᖃᕈᑎᐅᓂᐊᖅᑐᑦ ᐅᕙᓂ ᐅᕇᑑ ᕼᐋᓪᒥ ᐅᓪᓗᖓ ᓱᓕ ᐅᖃᐅᓯᐅᓯᒪᙱᖢᓂ, ᐅᕇᑑ ᕼᐋᓪᒥ ᑐᓴᒐᒃᓴᓕᐊᕆᔭᐅᓂᑯ.

ᒪᕐᕉᒃ ᑕᓪᓕᒪᓂ ᖁᑦᑎᖕᓂᖅᐹ ᑐᒡᓕᖓᓂ ᐃᓕᓴᕆᔭᐅᔾᔪᑎᑖᕐᓂᐊᖅᖢᑎᒃ: ᐱᓕᕆᔨᒻᒪᕆᒃ ᑲᓇᑕᒥ ᐃᓕᓴᕆᔭᐅᔾᔪᑎᒧᑦ, ᑖᓐᓇ ᐃᓕᓴᕆᔭᐅᔾᔪᑎᖃᕈᑎ ᑲᓇᑕᒧᑦ ᐱᔨᑦᑎᕋᕐᓯᒪᓂᕐᒧᑦ ᐅᕝᕙᓘᓐᓃᑦ ᖃᓄᐃᑉᐹᓪᓕᖅᑎᑦᑎᓂᕐᒧᑦ.

ᐅᕝᕙᐅᑯᐊ:

• ᔮᓐ ᐊᒪᕈᐊᓕᒃ ᐃᖃᓗᖕᒥᐅᑕᖅ ᐆᒧᖓ “ᐃᓚᒋᔭᐅᒻᒪᕆᓚᐅᕐᓂᖓᓄᑦ ᓄᓇᕗᑦ ᐱᒋᐊᕐᓂᖓᓂᒃ.”

ᐱᒋᐊᖅᖢᓂ 1993-ᒥᑦ 1999-ᒧᑦ, ᐊᒪᕈᐊᓕᒃ, ᐃᓕᓴᕆᔭᐅᔾᔪᑎᑖᕐᓂᑯ ᐃᓕᓴᕆᔭᐅᔾᔪᑎᒥ ᓄᓇᕗᒥ 2014-ᖑᑎᓪᓗᒍ, ᐃᒃᓯᕙᐅᑕᕆᔭᐅᓚᐅᕐᓯᒪᔪᖅ ᐅᑯᓄᖓ ᓄᓇᕗᒥ ᐊᑐᓕᖅᑎᑦᑎᓂᕐᒧᑦ ᑲᒥᓴᓐᑯᓐᓄᑦ, ᖁᓕᓂᒃ ᑲᑎᒪᔨᖃᖅᖢᓂ ᑎᒥᒋᔭᐅᔪᖅ ᐋᖅᑭᒃᑕᐅᓂᑯ ᐱᒋᐊᕈᑎᒃᓴᓂᒃ ᓄᓇᕗᑦ ᓇᖕᒥᓂ ᒐᕙᒪᖃᓕᕐᓂᖓᓄᑦ, ᑖᓐᓇᓗ ᐱᒋᐊᒻᒪᕆᓚᐅᕐᓯᒪᓪᓗᓂ ᐄᐳᕈᓪ 1, 1999-ᒥᑦ.

ᐊᒪᕈᐊᓕᒃ, 72, ᒪᕐᕈᐃᖅᖢᓂ ᐊᖓᔪᖅᑳᖑᓚᐅᕐᓯᒪᔪᖅ ᐃᓄᐃᑦ ᑕᐱᕇᒃᓴᑦ ᑲᓇᑕᒥ 1980-ᖏᓐᓂᒃ, ᐊᒻᒪᓗ ᐃᒃᓯᕙᐅᑕᐅᖃᑕᐅᓪᓗᓂ ᐃᓄᐃᑦ ᑲᑎᒪᔨᓄᑦ ᑲᓇᑕᒥ ᐊᒻᒪᓗ ᐃᒃᓯᕙᐅᑕᐅᖃᑕᐅᓪᓗᓂ ᓄᓇᕗᒥᑦ ᒪᓕᒐᓕᕆᓂᕐᒧᑦ ᐱᓕᕆᔪᓄᑦ.

ᐊᕐᕌᒍᓂ ᐅᓄᕈᓘᔭᕐᑐᓂᒃ, ᑎᑎᕋᖃᑦᑕᕐᓯᒪᔪᖅ ‘ᑲᓇᑕᒥ ᑎᕆᖅᑯᕋ’, ᐱᓇᓱᐊᕈᓯᑕᒫᓐ ᓴᖅᑭᑎᑕᐅᖃᑦᑕᖅᖢᑎᒃ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ.

ᐊᒪᕈᐊᓕ ᐃᓅᓚᐅᕐᓯᒪᔪᖅ ᑕᒻᒫᕐᕕᖕᒥᓐ ᐃᓄᒃᔪᐊᒃ ᖃᓂᒋᔭᖓᓂᒃ 1947-ᐅᑎᓪᓗᒍ ᐊᒻᒪᓗ ᐃᓚᒌᖑᔪᑦ ᓄᒃᑎᖅᑕᐅᓂᑰᓪᓗᑎᒃ ᖃᐅᓱᐃᑦᑐᕐᒧᑦ 1953-ᒥᑦ, ᑕᐃᑲᓂᓗ ᐊᒃᓱᕈᕐᓇᖅᑐᖅᓯᐅᖅᐸᒃᖢᑎᒃ.

ᑕᐃᒪᐃᑕᐅᓚᐅᕐᑎᓪᓗᒍ, ᐊᒪᕈᐊᓕᒃ ᐊᒻᒪ ᐊᓯᖏᑦ, ᑲᓇᑕᐅᑉ ᒐᕙᒪᒃᑯᖏᓐᓂᒃ ᑮᓇᐅᔭᖅᑖᕋᓱᒃᓯᒪᔪᑦ ᐊᕐᕌᒍᒐᓴᒻᒪᕆᖕᓂᒃ, ᑕᐃᒪᐃᓕᐅᕐᓂᖓᓄᑦ ᐱᒋᐊᕈᑎᐅᓚᐅᕐᓯᒪᔪᖅ $10 ᒥᓕᐊᓐ ᑖᓚᓂ ᑮᓇᐅᔭᖅᑖᕈᑎᒃᓴᓂᒃ 1996-ᒥᑦ ᐊᒻᒪᓗ ᒪᒥᐊᕝᕕᐅᓪᓚᕆᒃᖢᑎᒃ 2009-ᒥᑦ.

ᖃᐅᔨᒪᔭᐅᑦᑎᐊᖅᑐᖅ ᐱᕈᖅᐸᓪᓕᐊᔪᓕᕆᔨ, ᔫᓴᕝ ᓯᕗᐳᑕ. 1968-ᒥ ᑲᓇᑕᒧᐊᓚᐅᕐᓯᒪᑎᓪᓗᒍ ᒪᓕᒐᓕᕆᓂᕐᒧ ᕿᒪᐃᓂᑯ ᓄᓇᒥᓂ ᓴᑯᔅᓚᕚᑭᐊᒥ, ᓯᕗᐳᑕ ᐊᕐᕌᒍᓂᒃ 40 ᐅᖓᑖᓂ ᐅᑭᐅᕐᑕᖅᑑᑉ ᐱᕈᖅᑐᖏᓐᓂᒃ ᓄᓇᕗᒥᑦ ᖃᐅᔨᓴᖃᑦᑕᕐᓯᒪᕗᖅ. (ᐊᔾᔨᙳᐊᖁᑎᒋᔭᐅᔪᖅ)

• ᔫᓴᕝ ᓯᕗᐳᑕ ᑐᕌᓐᑐᒥᐅᑕᖅ  “ᖃᐅᔨᓴᖃᑦᑕᕐᓯᒪᓂᖓᓄᑦ ᓇᐹᖅᑐᖃᙱᑦᑐᒥ ᐆᒪᔪᓂᒃ ᐊᒻᒪᓗ ᐃᓅᓯᕐᒥᓂᒃ ᖃᐅᔨᓴᖅᑎᐅᓂᕐᒧᑦ ᐅᑭᐅᕐᑕᖅᑐᕐᒥᑦ.”

ᓯᕗᐳᑕ, 90, ᐱᕈᖅᑐᓂᒃ ᖃᐅᔨᓴᖅᑎ ᐊᒻᒪ ᐃᓕᓴᐃᔨᓄᑦ ᐃᑲᔪᖅᑎ ᐱᕈᖅᑐᓕᕆᓂᕐᒧᑦ ᐅᕙᓂ ᔫᓂᕘᓯᑎ ᑐᕌᓐᑐᒥ ᒥᓯᓵᒐᒥᑦᑐᓂᒃ, ᖃᐅᔨᓴᕐᓯᒪᖕᒪᑦ ᐅᑭᐅᕐᑕᖅᑐᕐᒥᑦ ᐱᕈᖅᑐᓂᒃ ᓄᓇᕗᒥᑦ ᑕᒪᐃᙵᓂᑦ 1973-ᒥᑦ.

ᓱᓅᐳᒥ ᖄᖅᑐᖃᓚᐅᖅᑎᓪᓗᒍ ᐄᐳᕈᓪ 1986-ᒥᑦ, ᓯᕗᐳᑕ ᓴᓇᖃᑎᖏᓪᓗ ᑎᑎᕋᐅᓯᖃᓚᐅᕐᓯᒪᖕᒪᑕ ᖁᕝᕙᖅᐹᓪᓕᕐᓂᕐᒥᑦ ᖄᖅᑐᒥᙶᕐᓯᒪᔪᓂ ᒪᑯᓇᓂ ᐱᕈᖅᑐᓂᒃ ᐊᒻᒪᓗ ᑐᒃᑐᐃᑦ ᓂᕿᖏᓐᓂᒃ ᐃᓚᖏᓐᓃᑦ ᑲᓇᑕᐅᑉ ᐅᑭᐅᕐᑕᖅᑐᖓᓂᒃ.

ᐊᒻᒪᓗ ᑕᐃᒪᙵᑦ 1992-ᖑᓚᐅᕐᑎᓪᓗᒍ, ᐃᓚᐅᓯᒪᔪᖅ ᐱᓕᕆᐊᕆᔭᐅᔪᒥᑦ ᑕᐃᔭᔪᖅ ᓄᓇᕐᔪᐊᒥ ᓇᐹᖅᑐᖃᙱᑦᑐᓂᒃ ᖃᐅᔨᓴᕐᓂᕐᒥᒃ, ᑖᒃᑯᐊᓗ ᖃᐅᔨᓴᕐᓯᒪᔪᑦ ᖃᓄᖅ ᓄᓇᕐᔪᐊᒥ ᐅᖅᑰᓯᕙᓪᓕᐊᓂᖅ ᐊᒃᑐᐃᓯᒪᖕᒪᖔᑦ ᐅᑭᐅᕐᑕᖅᑐᕐᒥᑦ ᐱᕈᖅᑐᓂᒃ.

ᖃᐅᔨᓴᖅᑎᐅᓂᕐᒧᑦ ᐃᓕᓐᓂᐊᕌᓂᓚᐅᕐᓯᒪᙱᑦᑐᖅ ᑭᓯᐊᓂ 1968 ᐊᓂᒍᖅᑎᓪᓗᒍ ᐅᑭᐅᖃᓕᖅᖢᓂ 37-ᓂᒃ ᑲᓇᑕᒧᐊᖅᑎᓪᓗᒍ ᒪᓕᒐᓕᕆᓂᕐᒧᑦ ᓅᓐᓂᑰᓪᓗᓂ, ᕿᒫᓪᓗᓂ ᑳᒥᐅᓂᔅᑯᓐᓂᒃ ᓄᓇᖓᓂᒃ ᐊᐅᓚᑦᑎᔪᓂᒃ ᐅᕙᓂ ᓴᑯᔅᓚᕚᑭᐊᒥᑦ.

ᓯᕗᐳᑕ ᑎᒍᔭᐅᓯᒪᓚᐅᕐᓯᒪᖕᒪᑦ ᒪᓕᒐᓕᕆᓂᒃᑯᑦ ᐱᓕᕆᐊᖃᕐᓂᖓᓂᒃ ᓴᑯᔅᓚᕚᑭᐊᒥ ᐊᕐᕌᒍᓂ 9-ᓂ. 1949-ᓗ 1958-ᓗ ᐊᑯᓐᓂᖓᓂᒃ, ᑕᕝᕙᓂᓗ ᑳᖃᑦᑕᖅᑐᐊᓘᓂᑰᓪᓗᓂ, ᐋᓐᓂᕐᓱᖅᑕᐅᕙᒃᖢᓂ ᐊᒻᒪᓗ ᐊᕐᕌᒍᓂ ᑎᓴᒪᓂᒃ ᐃᖅᑲᓇᐃᔭᖅᑎᑕᐅᓪᓗᓂ ᔪᕇᓂᐊᒻᒥ ᐅᔭᕋᒃᓯᐅᕐᕕᖕᒥᑦ. ᖃᓄᐃᓕᐅᕈᓯᕕᓂᖏᓐᓂᒃ ᑎᑎᕋᐅᓯᖃᓚᐅᕐᓯᒪᔪᖅ 2017-ᒥᑦ ᑕᐃᔭᐅᔪᖅ Wine from Raisins: A Life Transformed Through Communist Gulag to Canadian Arctic.

1973 ᑎᑭᑎᓪᓗᒍ, ᓯᕗᐳᑕ ᐃᓕᓐᓂᐊᕌᓂᖕᓂᕐᒧᑦ ᐸᐃᑉᐹᕐᑖᓚᐅᕐᓯᒪᔪᖅ ᐊᒻᒪ ᔫᓂᕘᓯᑎ ᑐᕌᓐᑐᒥ ᐃᖅᑲᓇᐃᔭᖅᑎᓂᒃ ᐃᓚᒋᔭᐅᓕᕐᖢᓂ, ᑕᕝᕙᓂᓗ ᐱᒋᐊᓕᓚᐅᕐᓯᒪᓪᓗᓂ ᐅᑭᐅᕐᑕᖅᑐᕐᒥᑦ ᖃᐅᔨᓴᕐᓂᕐᒥᓐ.

ᐱᖓᓱᒃᑲᓐᓃᑦᑕᐅᖅ ᑕᐃᔭᐅᓚᐅᕐᒥᔪᑦ ᐃᓚᒋᔭᐅᓕᕐᓂᕐᒥᒃ ᑲᓇᑕᒥ ᐃᓕᓴᕆᔭᐅᔾᔪᑎᒧᑦ, ᑖᓐᓇᓕ ᐊᑦᑎᓛᙳᓪᓗᓂ ᐃᓕᓴᕆᔭᐅᔾᔪᑎᓂᒃ.

ᑖᓐᓇ ᐃᓕᓴᕆᔭᐅᓂ ᐱᔾᔪᑎᖃᖅᑎᑕᐅᔪᖅ ᐃᓕᓴᕆᔭᐅᓂᕐᒥ ᐱᓕᕆᐊᑎᒍᑦ ᓄᓇᓕᖕᓄᑦ ᐊᕕᒃᑐᕐᓯᒪᓂᑯᓪᓘᓐᓃᑦ, ᐅᕝᕙᓘᓐᓃ ᐊᑐᖅᑕᐅᖏᓐᓇᖃᑦᑕᙱᑦᑐᒃᑯᑦ ᐱᓕᕆᐊᑎᒍᑦ.

ᐅᑯᐊᖑᔪᓪᓕ:

• ᐲᑕ ᐋᑕᒥ ᑰᔾᔪᐊᕐᒥᐅᑕᖅ ᐱᓕᕆᓯᒪᓂᖓᓄᑦ ᑮᓇᐅᔭᓕᐅᕋᓱᖕᓂᕐᒥᒃ, ᐃᓅᖃᑎᒌᖕᓂᕐᒧᑦ ᐊᒻᒪ ᒪᓕᒐᓕᕆᓂᒃᑯᑦ ᐱᕙᓪᓕᐊᔪᓕᕆᓂᕐᒥᒃ ᓄᓇᕕᒃᒥᑦ.

ᐋᑕᒥ, 58, ᐊᖓᔪᖅᑳᖑᓚᐅᕐᓯᒪᔪᖅ ᒪᑯᕕᑦ ᑯᐊᐳᕇᓴᓐᑯᓐᓄᑦ ᐊᒻᒪᓗ ᒫᓐᓇ ᐊᖓᔪᖅᑳᖑᓪᓗᓂ ᐃᓄᐃᑦ ᖃᖓᑕᓲᖓᓄᑦ.

• ᔮᓂ ᓄᕐᕋᖅ ᓯᐅᑕᐃᑦᑐᖅ ᐄᓴᓗᒃ ᐃᒡᓗᓕᒑᕐᔪᒃᒥᐅᑕᖅ ᐊᒻᒪ ᐃᖃᓗᖕᓂᑦ “ᐱᓕᕆᐊᖃᕐᓯᒪᓂᖓᓄᑦ ᐱᙳᐊᖅᑐᓕᕆᓂᒃᑯᑦ, ᐱᙳᐊᖅᑎᐅᓂᒃᑯᑦ, ᐃᓕᓐᓂᐊᖅᑎᑦᑎᔨᐅᓂᕐᒧᑦ ᐊᒻᒪᓗ ᐅᑭᐅᕐᑕᖅᑐᕐᒥ ᑭᒡᒐᖅᑐᐃᔨᐅᓪᓗᓂ ᐅᑭᐅᕐᑕᖅᑐᕐᒥ ᐊᒻᒪ ᐃᓄᐃᑦ ᐃᓕᖁᓯᖏᓐᓂᒃ.”

ᐄᓴᓗᒃ, 46, ᑕᕐᕆᔭᐅᓯᐊᕐᒥᑦ Indian Horse-ᒥ ᐃᓚᐅᓚᐅᕐᓯᒪᔪᖅ ᐊᒻᒪᓗ ᖃᖓᑦᑎᐊᓵᖅ AMC-ᑯᑦ ᑲᑉᐱᐊᓇᙳᐊᖅᑐᓂᒃ ᐊᔾᔨᓕᐅᒐᖏᓐᓂᒃ, The Terror. ᖃᐅᔨᒪᔭᐅᑦᑎᐊᕐᒥᔪᖅ ᐃᓄᐃᑦ ᐱᙳᐊᕈᓯᖏᓐᓂᒃ ᐱᙳᐊᖅᑎᐅᓂᖓᓄᑦ ᐊᒻᒪᓗ ᐃᓚᐅᓯᒪᓪᓗᓂ ᐃᓕᓐᓂᐊᖅᑎᑦᑎᓂᕐᒥᒃ ᐃᓅᓱᒃᑐᓂᒃ ᐃᓄᐃᑦ ᐱᙳᐊᕈᓯᖏᓐᓂᒃ ᐊᒻᒪ ᐃᓄᐃᑦ ᐃᓕᖁᓯᖏᓐᓂᒃ ᑲᓇᑕᒥᐅᑕᓄᑦ.

• ᐹᓪ ᓂᒃᓚᓐ ᕕᒃᑐᕆᐊᒥᐅᑕᖅ “ᐃᑲᔪᖅᑐᐃᓯᒪᓂᖓᓄᑦ ᓄᓇᒥᐅᑕᓂᒃ ᐊᔾᔨᓕᐅᕆᖃᑦᑕᕐᓂᒃᑯᑦ ᐊᒻᒪ ᑎᑎᕋᐅᓯᖃᖅᐸᖕᓂᖓᓄᑦ ᑲᓇᑕᒥ ᐃᓱᒫᓘᑎᐅᕙᒃᑐᓂᒃ ᐊᒻᒪ ᓄᓇᕐᔪᐊᒥᑦ.”

ᓂᒃᓚᓐ, 51, ᐊᕐᕌᒍᓂ ᐱᖓᓱᓂᒃ ᑭᒻᒥᕈᒦᓚᐅᕐᓯᒪᔪᖅ ᓱᕈᓯᐅᓪᓗᓂ, ᐊᒻᒪᓗ ᐊᓯᖏᓐᓂᒃ ᐅᑭᐅᕐᑕᖅᑐᕐᒥ ᓄᓇᖃᕐᓯᒪᓪᓗᓂ. ᖃᐅᔨᒪ-ᔭᐅᑦᑎᐊᖅᑐᖅ ᐊᔾᔨᓕᐊᕆᕙᒃᑕᖏᓐᓂᒃ ᐊᒻᒪ ᑕᕐᕆᔭᒐᒃᓴᓕᐊᖏᓐᓄᑦ.

Share This Story

(1) Comment:

  1. Posted by Chosen on

    One of them will be chosen, for sure. You know what I am so proud for Mr. John Amagoalik because he is originally from INUKJUAK. They were relocated in early 1950’s as you all know and heard about it.

    I also have relatives who were also relocated namely my uncle Simionie Amagoalik, Zebedee Amagoalik, and my aunt Rynee Flaherty.

    Good Luck<

Comments are closed.