ᑖᒪᔅ ᐴᔪ ᐃᖅᑲᐅᒪᔭᐅᔪᖅ ᐃᒪᓐᓇ ‘ᐱᖃᑎᐊᓘᒋᔭᐅᔪᖅ ᐃᓄᓕᒫᓄᑦ,’ ᐅᖃᖅᑐᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐊᖓᔪᖅᑳᖓ

ᓄᓇᕗᒥᑦ ᓯᕗᓕᐅᕐᑎᐅᔪᑦ ᐃᓱᒪᒋᔭᖃᓚᐅᖅᐳᑦ ᐃᓅᔪᓐᓃᖅᑎᓪᓗᒍ ᑖᒪᔅ ᐴᕐᔪ, ᐳᕆᑎᔅ ᑲᓚᒻᐱᐊᒥ ᐃᖅᑲᖅᑐᐃᔨᕐᔪᐊᓄᑦ ᐃᖅᑲᖅᑐᐃᔨᕕᓂᖅ, ᓗᐊᐃᔭᕕᓂᖅ ᐊᒻᒪᓗ ᓄᓇᖃᖅᑳᖅᑐᑦ ᐱᔪᓐᓇᐅᑎᖏᓐᓂᒃ ᐃᑲᔪᖅᑎᒻᒪᕆᐅᓪᓗᓂ

ᐴᕐᔪ ᐃᓅᔪᓐᓃᓚᐅᖅᑐᖅ ᐄᐳᕈᓪ 28-ᖑᑎᓪᓗᒍ ᐅᑭᐅᖃᓕᖅᖢᓂ 88-ᓂᒃ.

“ᐊᓕᐊᓇᐃᑦ ᑲᑎᖃᑎᒋᓚᐅᖅᓯᒪᒐᒃᑯ ᐊᒻᒪ ᐱᓕᕆᖃᑎᒋᓪᓗᒍ ᐃᖅᑲᖅᑐᐃᔨ ᐴᕐᔪ … ᐱᖃᑎᐅᓘᓚᐅᖅᓯᒪᖕᒪᑦ ᐊᒻᒪ ᐃᑲᔪᖅᑎᒻᒪᕆᐅᓪᓗᓂ ᐃᓄᓕᒫᓄᑦ,” ᐸᐅᓗᓯ ᐊᕿᐊᕈᖅ, ᐊᖓᔪᖅᑳᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ ᐅᖃᓚᐅᖅᑐᖅ ᑎᑎᖃᑎᒍᑦ.

“ᐱᓕᕆᕐᔪᐊᕐᓂᕕᓂᖓ ᐋᖅᑭᒃᓯᓯᒪᖕᒪᑦ ᓯᕗᓂᒃᓴᑦᑎᓐᓂᒃ ᐱᐅᓂᖅᓴᒧᑦ.”

ᑖᒃᑯᐊ 2017-ᒥ ᐱᓕᕆᓚᐅᖅᓯᒪᖕᒪᑎ ᐅᓇ ᐴᕐᔪ ᐃᓚᒋᔭᐅᑎᓪᓗᒍ ᐋᖅᑭᒃᓯᓇᓱᒃᑎᓪᓗᒋᑦ ᓈᒻᒪᙱᓕᐅᕈᑎᓂᒃ ᐅᑯᓄᖓ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ ᐊᒻᒪᓗ ᐹᕙᓐᓛᓐ ᓴᕕᕋᔭᒃᓴᒧᑦ ᐅᔭᕋᒃᓯᐅᖅᕕᒃᑯᑦ.

1960-ᖏᓐᓂᒃ ᐊᒻᒪ 70-ᖏᓐᓂᒃ, ᐴᕐᔪ ᓗᐊᐃᔭᐅᓚᐅᖅᓯᒪᔪᖅ ᓂᔅᒐ ᐊᓪᓚᐃᑦ ᓄᓇᖓᓄᑦ ᐃᖅᑲᖅᑐᐃᕕᒡᔪᐊᒃᑯᑦ ᐱᓕᕆᐊᖑᑎᓪᓗᒍ ᐅᑯᓄᖓ ᑳᑐ ᐅᑯᐊᓗ ᐳᕆᑎᔅ ᑲᓚᒻᐱᐊ, ᑕᕝᕙᓂᓕ ᓄᓇᖃᖅᑳᖅᑐᑦ ᓄᓇᖃᓪᓚᕆᖕᓂᖏᓐᓂᒃ ᐃᓕᓴᕆᔭᐅᓕᓚᐅᖅᓯᒪᔪᖅ ᓯᕗᓪᓕᖅᐹᒥᑦ ᐅᕘᓇ ᑲᓇᑕᐅᑉ ᒪᓕᒐᖏᑦᑎᒍᑦ.

1974-ᒥ, ᐃᖅᑲᖅᑐᐃᕕᒡᔪᐊᖅᒥᑦ ᐳᕆᑎᔅ ᑲᓚᒻᐱᐊᒥ ᐃᖅᑲᖅᑐᐃᔨᐅᓪᓗᓂ, ᐴᕐᔪ ᐃᓕᖅᑯᓯᕆᔭᐅᔪᓂ ᓱᕋᐃᓚᐅᖅᓯᒪᔪᖅ ᐊᒻᒪᓗ ᑐᓴᑲᑕᒐᓱᓕᖅᖢᓂ ᒪᑯᓇᙵᑐᐊᙳᙱᑦᑐᖅ ᐅᖅᓱᐊᓗᓕᕆᔨᓂᒃ ᑭᓯᐊᓂᓕ 35-ᓂ ᓄᓇᓕᖕᓂ ᓄᓇᑦᓯᐊᕐᒥ ᐅᓇ ᐱᔾᔪᑎᒋᓪᓗᒍ ᑐᑭᒃᓯᕋᐅᑎᐅᓂᑯ ᒪᑲᓐᔨ ᕚᓕ ᐅᖅᓱᐊᓗᖕᒧᑦ ᓱᓪᓗᓕᒃᓴᖅᒧᑦ.

“ᐅᑭᐅᕐᑕᖅᑑᑦ ᓯᕗᓂᒃᓴᖓ ᐋᖅᑭᒃᓱᖅᑕᐅᔭᕆᐊᖃᙱᒻᒪᑦ ᐅᑯᓄᖓᑐᐊᖅ ᖃᓪᓗᓈᓂᒃ ᐃᓱᒪᓕᐅᕆᔭᐅᓯᒪᔪᑎᒍᑦ ᓄᓇᓕᖕᓂ ᐋᖅᑭᒃᓱᐃᔨᓂᒃ … ᐋᖅᑭᒃᓯᒪᔭᕆᐊᖃᕐᒪᑦ ᐃᓄᖕᓄᑦ ᐊᖏᕐᕋᖃᖅᑐᓄᑦ ᐃᓱᒪᒋᔭᐅᓯᒪᔪᒃᑯᑦ,” ᑎᑎᕋᓚᐅᕐᑐᖅ ᐅᓂᒃᑳᓕᐊᖏᓐᓂᒃ ᐆᒧᖓ ᓱᓪᓗᐊᓗᖕᒧᑦ ᑐᒃᓯᕋᐅᑎᐅᔪᒧᑦ.

ᑐᒃᑐᐃᑦ ᐅᓄᕐᓂᖏᑦ ᓈᒻᒪᑦᑎᓐᓇᓱᖕᓂᖏᑦ ᐃᓱᒫᓘᑎᒋᔭᐅᖕᒥᔭᖓ ᐴᕐᔫᑉ ᖃᐅᔨᓇᓱᒡᕕᒋᔭᖏᓐᓂᒃ.

“ᖃᐅᔨᒪᖕᒪᑕ ᖃᓄᑎᒋ ᖃᓪᓗᓈᑦ ᓴᙱᓂᖃᕈᓐᓇᕐᓂᖏᑦ,” ᑎᑎᕋᖅᑐᖅ. “ᖃᐅᔨᒪᖕᒪᑕ ᐊᓯᐊᓃᑦᑐᑦ ᐆᒪᔪᐃᑦ ᐱᑕᖃᕈᓐᓃᖅᓯᒪᓂᖏᓐᓂᒃ ᐱᕈᖅᕕᒃᓴᓕᐅᖅᐸᓪᓕᐊᓂᖅᒧᑦ ᐊᒻᒪ ᓴᓇᕝᕕᒃᓴᓕᐅᕐᓂᖅᒧᑦ.

“ᐅᑯᐊ ᐃᓄᐃᑦ ᑲᑉᐱᐊᓱᖕᒪᑕ ᖃᓪᓗᓈᑦ ᓱᕋᐃᑐᐃᓐᓇᕐᓂᐊᕆᐊᒃᓴᖏᓐᓂᒃ ᓄᓇᖏᓐᓂᒃ ᐊᒻᒪ ᑐᒃᑐᓂᒃ,” ᑎᑎᕋᖅᑐᖅ.

“ᑖᒃᑯᐊ ᐃᓄᐃᑦ ᐊᒻᒪᓗ ᑐᒃᑐᐃᑦ ᐊᑯᓂᐊᓗᒃ ᐃᖏᕐᕋᖃᑦᑕᖅᓯᒪᓕᕐᒪᑎᒃ ᖃᖓᑐᖄᓗᖕᓂᒃ ᐊᒻᒪ ᓇᓂᕈᓘᔭᖅ … ᑕᒪᓐᓇᓕ ᐃᖏᕐᕋᓂᖅ ᒫᓐᓇ ᓄᖅᑲᕐᓂᐊᓯᕚ?”

ᑖᓐᓇᓕ ᑭᖑᓂᐊᒍᑦ, ᑖᓐᓇ ᓱᓪᓗᐊᓗᒃᓴᖅ, ᓴᓇᔭᐅᓂᐊᓚᐅᖅᓯᒪᔪᖅ ᓄᓇᖃᖅᑳᖅᑐᑦ ᓄᓇᓕᖏᑦᑎᒍᑦ ᒪᑲᓐᔨ ᕚᓕᒥ, ᓄᖅᑲᖅᑎᑕᐅᓕᓚᐅᖅᓯᒪᔪᖅ.

ᓄᓇᕗᑦ ᓯᕗᓕᐅᖅᑎᖓ ᔫ ᓴᕕᑲᑖᖅ ᐅᖃᓚᐅᖅᑐᖅ ᐅᖃᐅᓯᒃᓴᖏᑦᑎᒍᑦ ᐅᓇ ᐋᖅᑭᒃᓱᐃᒍᑎᐅᓕᓚᐅᖅᓯᒪᓂᖓᓂᒃ ᐅᖃᖃᑎᒌᖃᑦᑕᕐᓂᖅᒥᒃ ᓄᓇᖃᖅᑳᖅᑐᓂᒃ ᓄᓇᐃᑦ ᐱᕙᓪᓕᐊᔭᐅᔪᒪᓂᕐᒧᑦ ᐊᒻᒪᓗ ᐱᒋᐊᕈᑎᒻᒪᕆᐅᓕᖅᖢᓂ ᓄᓇᑖᕋᓱᖕᓂᖅᒧᑦ ᐊᖏᕈᑎᓂᒃ ᐱᐊᓂᒃᓯᓂᖅᒥᒃ ᓄᓇᑦᓯᐊᕐᒥ ᐊᒻᒪ ᓄᓇᕗᒥᑦ.

“ᐊᐃᑦᑖᖑᒐᓗᐊᖅ ᑕᑯᔾᔮᔪᓐᓃᕋᑦᑎᒍᑦ ᐃᖅᑲᖅᑐᐃᔨ ᑖᒪᔅ ᐴᕐᔪ, ᕿᒪᐃᖕᒪᑦ ᐊᑐᖅᓯᒪᓂᕐᔪᐊᕌᓗᖕᒥᒃ ᐊᒻᒪ ᐊᒃᑐᐃᓯᒪᓪᓚᕆᖕᓂᖅᒥᒃ ᑲᓇᑕᐅᑉ ᐅᑭᐅᕐᑕᖅᑐᖓᓂᒃ,” ᓴᕕᑲᑖᖅ ᐅᖃᖅᑐᖅ. “ᐅᓄᕈᓘᔭᖅᑐᑦ ᐃᑲᔪᕈᑎᖏᑦ … ᐊᒃᑐᐃᓯᒪᖕᒪᕆᖕᒪᑕ ᓄᓇᕗᒥᑦ.”

2006-ᒥᑦ, ᐲᕐᔪ ᐃᓱᒪᓕᐅᕆᓚᐅᖅᓯᒪᔪᖅ ᒪᕐᕈᐃᓂᒃ ᐅᖃᐅᓰᖕᓂᖅ ᖃᓪᓗᓈᑐᑦ ᐊᒻᒪ ᐃᓄᒃᑐᑦ ᐃᓕᓐᓂᐊᕈᑎᒃᓴᓂᒃ ᐃᓕᓐᓂᐊᓕᓵᖅᑐᓂᒃ ᒍᕇᑦ 12-ᒧᑦ ᓄᓇᕗᒥᑦ ᑕᒪᒃᑯᐊ ᐊᓂᒍᐃᔪᑦ ᐅᖃᓕᒫᕈᓐᓇᖅᓯᓯᒪᖁᓪᓗᒋᑦ ᐊᓂᒍᐃᔪᓐᓇᖅᓂᖅᒧᑦ ᐃᖅᑲᓇᐃᔮᖃᕈᓐᓇᖅᓯᒍᑎᒃ.

ᓴᕕᑲᑖᖅ ᐅᖃᓚᐅᖅᑐᖅ ᐅᓇ ᐱᓕᕆᓂᖅ “ᐱᒻᒪᕆᐅᓂᑯ ᓇᓗᓇᐃᖅᓯᕙᓪᓕᐊᓂᒃᑯᑦ ᑐᑭᓕᖕᒥ ᓄᓇᕗᑦ ᐃᓄᐃᑦ ᐃᓚᐅᔪᓐᓇᕈᓐᓇᖅᓯᓗᑎᒃ ᓄᓇᑦᑎᓐᓂᒃ ᐊᒻᒪ ᐃᓅᖃᑎᒌᖕᓂᖅᒧᑦ.”

ᐴᕐᔫᐃ ᐅᓂᒃᑳᖏᓐᓂᒃ ᐊᑐᓕᖅᑎᑦᑎᓂᖅ ᓄᓇᕗᒧᑦ ᐊᖏᕈᑎᓂᒃ — ᐱᓗᐊᖅᑐᒥᓐ ᐅᖃᐅᔨᖃᕐᓂᓕᒃ ᐃᓄᐃᑦ ᐃᖅᑲᓇᐃᔭᖅᑎᑕᐅᓂᖏᑦ ᓈᒻᒪᙱᓗᐊᕐᓂᖏᓐᓂᒃ ᓄᓇᕗᒥᑦ ᒐᕙᒪᒃᑯᓐᓂᒃ — ᑎᑎᕋᓚᐅᕐᒪᑦ “ᐃᓄᐃᑦ ᐅᖃᐅᓯᖏᓐᓂᒃ ᐊᓯᐅᔨᓯᒪᙱᑦᑐᑦ ᐃᓅᓯᖏᓐᓂᒃ ᓇᓗᓈᕿᙱᓐᓂᖅᓴᐅᑐᐃᓐᓇᕆᐊᖃᕐᑐᑦ.”

ᐳᕋᐃᒻ ᒥᓂᔅᑕ ᔭᔅᑎᓐ ᑐᕉᑑ ᐅᖃᓚᐅᕐᒥᔪᑦ ᐃᓱᒫᒋᔭᖃᕐᓂᕐᒥᓂᒃ ᐅᖃᐅᓯᖓᒍᑦ, ᐅᖃᖅᖢᓂ ᐴᕐᔪ “ᑲᓇᑕᒥ ᓗᐊᐃᔭᓂ ᐃᓱᒪᒋᔭᐅᑦᑎᐊᓛᖑᖃᑕᐅᓂᖓᓂᒃ ᐊᒻᒪᓗ ᓄᓇᖃᖅᑳᖅᑐᓄᑦ ᐊᒻᒪ ᐊᕙᑎᓕᕆᓂᖅᒧᑦ ᐱᔪᓐᓇᐅᑎᓄᑦ ᐱᓕᕆᔨᒻᒪᕆᐅᓪᓗᓂ.”

“ᑐᓵᓪᓚᕆᖃᑦᑕᓚᐅᕐᒪᑦ, ᐊᒻᒪᓗ ᑕᐃᒪᓐᓇ ᓴᙱᒃᑎᕚᓪᓕᖅᑎᑦᑎᓕᓚᐅᖅᑐᖅ ᓯᕗᓕᐅᖅᑎᒃᓴᓂᒃ ᓂᐱᐅᓂᐊᖅᑐᓂᒃ ᓄᓇᓕᖏᓐᓂᒃ,” ᔭᔅᑎᓐ ᑐᕉᑑ ᐅᖃᖅᑐᖅ.