ᑭᖕ ᑭᒡᒐᖅᑐᖅᑎᖓ ᑲᓇᑕᒥ ᒥᐊᕆ ᓴᐃᒪᓐ ᐃᖅᑲᐅᒪᕗᖅ ᐊᑐᖅᑕᐅᓚᐅᖅᓯᒪᙱᑦᑐᒥ ᑎᒃᑯᐊᖅᑕᐅᓯᒪᓂᖓᓂ ᒫᓐᓇᒧᑦ ᑎᑭᖦᖢᒍ

For English version, see ‘Let’s make the change’: Mary Simon reflects on historic term so far

ᑭᖕ ᑭᒡᒐᖅᑐᖅᑎᖓ ᑲᓇᑕᒥ ᒥᐊᕆ ᓴᐃᒪᓐ ᐃᓕᓐᓂᐊᖅᑎᐅᑎᓪᓗᒍ ᐱᕈᖅᓴᓪᓗᓂ ᓄᓇᕕᖕᒥ 1950−ᖏᓐᓂ, ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ’ ᐊᑐᖅᑕᐅᓚᐅᖅᓯᒪᔪᓂ ᐃᓕᑦᑎᓚᐅᙱᓐᓂᖓᓂ ᐃᓕᓐᓂᐊᕐᕕᖕᒥ.

“ᐃᖅᑲᐅᒪᕗᖓ ᐃᓕᑦᑎᓂᕐᒥ ᐊᑐᖅᑕᐅᓂᑯᓂ ᑲᓇᑕᒥ ᑕᑉᐹᓂ ᐅᑭᐅᖅᑕᖅᑐᒥ. ᐱᑕᖃᓚᐅᙱᓚᖅ ᓄᓇᖃᖅᑳᖅᓯᒪᔪᓄᑦ ᐃᓄᖕᓂ,” ᐅᖃᓚᐅᖅᐳᖅ.

“ᖃᐅᔨᒪᓚᐅᙱᓚᖓᓘᓐᓃᑦ ᐅᑯᐊᓕᒫᕌᓗᐃᑦ ᓄᓇᖃᖅᑳᖅᓯᒪᔪᓄᑦ ᐃᓄᖕᓂ ᑲᓇᑕᓕᒫᒥ ᑭᓯᐊᓂ ᐃᓐᓇᐅᓕᖅᑎᓪᓗᒍ ᐊᕐᓇᐅᓪᓗᓂ.”

ᐊᕐᕌᒍᒐᓴᐅᓕᖅᑐᓂ ᖄᖏᖅᓯᒪᓕᖅᑐᓂ, ᓯᕗᓪᓕᖅᐸᐅᓪᓗᓂ ᓄᓇᖃᖅᑳᖅᓯᒪᔪᓄᑦ ᐃᓅᓪᓗᓂ ᑭᖕ ᑭᒡᒐᖅᑐᖅᑎᙳᕐᓂᖓᓂ ᑲᓇᑕᒥ, ᓴᐃᒪᓐ ᐃᒻᒥᓂᒃ ᓇᓂᓯᕗᖅ ᐊᔾᔨᐅᙱᑦᑐᒥ ᐃᓕᓯᒪᓂᖓᓂ ᓇᓗᓇᐃᖅᓯᓂᕐᒧᑦ ᓯᕗᓂᒃᓴᒥ ᐱᐅᓯᖃᑎᒌᖑᔪᓂ ᑲᓇᑕᒥᐅᑕᓂ ᐃᓕᑦᑎᓂᖏᓐᓂ ᐊᑐᖅᑕᐅᓂᑯᓂ ᐊᒻᒪ ᐅᓂᒃᑳᖅᑐᐊᖑᔪᓂ ᐃᓄᖕᓂ ᐃᒻᒥᑎᑐᑦ.

“ᑲᑎᒪᔨᕐᔪᐊᖑᙱᓚᖓ, ᑭᓯᐊᓂ ᐱᓕᕆᕐᔪᐊᕈᓐᓴᖅᐳᖓ” ᑭᖕ ᑭᒡᒐᖅᑐᖅᑎᖓ ᑲᓇᑕᒥ, ᐅᖃᓚᐅᖅᐳᖅ.

ᐃᓅᓚᐅᖅᓯᒪᓪᓗᓂ ᑲᖏᖅᓱᐊᓗᔾᔪᐊᕐᒥ, ᓴᐃᒪᓐ ᐃᖅᑲᓇᐃᔭᖅᓯᒪᕗᖅ ᐃᓕᓴᐃᔨᐅᓪᓗᓂ ᐊᒻᒪ ᐅᖃᓪᓚᒃᑎᐅᓪᓗᓂ, ᑭᒡᒐᖅᑐᐃᓪᓗᓂ ᑲᓇᑕᒥ ᓄᓇᐅᑉ ᐊᓯᖏᓐᓂ ᐊᖏᖃᑎᒌᒐᓱᐊᖅᑎᐅᓪᓗᓂ ᐊᒻᒪ ᐱᔨᑦᑎᕋᖅᖢᓂ ᐊᖓᔪᖅᑳᖑᓂᕐᒧᑦ ᐃᓄᐃᑦ ᑕᐱᕇᑦ ᑲᓇᑕᒥ.

ᒫᓐᓇ ᓇᑉᐸᓪᓗᐊᖓᓂ ᐊᕐᕌᒍᓄᑦ-ᑕᓪᓕᒪᓄᑦ ᑎᒃᑯᐊᖅᑕᐅᓯᒪᓂᖓᓂ, ᓴᐃᒪᓐ ᐅᖃᓚᐅᖅᐳᖅ ᕿᓚᒥᐊᓗᒃ ᐊᓂᒍᖅᓯᒪᕗᖅ.

“ᐅᑎᒧᑦ ᐃᓱᒪᓪᓗᓂ ᐃᓚᖏᓐᓂ ᖃᓄᐃᓯᒪᔪᓂ, ᑲᔪᖏᖅᓴᐃᓂᐅᓯᒪᕗᖅ ᐱᓕᕆᓂᐅᔪᒥ ᐅᕙᓐᓄᑦ ᐊᒻᒪ ᐃᒻᒪᖄ ᐊᓯᖏᓐᓄᑦ ᑲᓇᑕᒥᐅᑕᐅᔪᓄᑦᑕᐅᖅ,” ᐅᖃᓚᐅᖅᐳᖅ, ᐅᖃᖃᑎᖃᖅᖢᓂ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ ᑕᖅᑭᐅᑉ ᐱᒋᐊᕐᓂᐸᓗᐊᓂ ᕇᑑ ᑲᑎᒪᕝᕕᖓᓂ, ᑭᖕ ᑭᒡᒐᖅᑐᖅᑎᖓ ᑲᓇᑕᒥ ᐊᖏᕐᕋᕆᓯᒪᔭᖓᓂ ᐋᑐᕚᒥ.

ᑎᒃᑯᐊᖅᑕᐅᓯᒪᓂᐅᕗᖅ ᓇᓗᓇᐃᖅᑕᐅᔪᒥ ᐊᑐᖅᑕᐅᓚᐅᖅᓯᒪᙱᑦᑐᓂ ᓯᕗᓪᓕᖅᐸᐅᔪᓂ, ᓲᕐᓗ ᐃᒃᓯᕋᕐᔪᐊᕌᐱᒃ ᕗᕌᓐᓯᔅᒥ ᐊᑯᓂᐅᔪᒥ−ᐅᑕᖅᑭᔭᐅᔪᒥ ᐳᓚᕋᕐᓂᖓᓂ ᑲᓇᑕᒧᑦ ᔪᓚᐃ 2022−ᒥ  ᒪᒥᐊᑦᑕᖅᑐᕐᓂᖓᓂ ᐃᒃᓯᕋᕐᔪᐊᒃᑯᑦ ᑐᒃᓯᐊᕐᕕᖓᓂ ᐊᑐᕐᓂᑯᖏᓐᓂ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓂ ᐱᓕᕆᔾᔪᓯᐅᔪᒥ.

“ᑕᒪᓐᓇ ᐱᕐᔪᐊᖑᓪᓗᓂ ᑎᑭᐅᑎᓯᒪᓂᐅᔪᒥ. ᐱᓕᕆᓚᐅᖅᐳᒍᑦ ᐊᕐᕌᒍᓄᑦ 20−ᓄᑦ ᐱᓂᕐᒥ ᐃᒃᓯᕋᕐᔪᐊᕌᐱᖕᒥ ᑕᒪᐅᙵᕐᓂᕐᒧᑦ ᒪᒥᐊᑦᑕᖅᑐᖅᖢᓂ, ᐊᒻᒪ ᑕᐃᑲᓂ ᑎᒃᑯᐊᖅᑕᐅᓯᒪᓂᓐᓂ ᑭᖕ ᑭᒡᒐᖅᑐᖅᑎᖓ ᑲᓇᑕᒥ, ᐅᕙᓐᓄᑦ ᐱᒻᒪᕆᐅᓚᐅᖅᐳᖅ,” ᓴᐃᒪᓐ ᐅᖃᓚᐅᖅᐳᖅ.

ᑭᖑᓂᑦᑎᐊᖓᓂ, ᑐᖁᓂᐅᔪᒥ ᑯᐃᓐ ᐃᓕᓴᐱ II−ᒥ ᓯᑎᐱᕆ 2022−ᒥ ᓇᓗᓇᐃᖅᓯᓚᐅᖅᐳᖅ ᐱᒋᐊᕐᓂᐅᔪᒥ ᓄᑖᖑᔪᒥ ᐱᓕᕆᖃᑎᖃᕐᓂᐅᔪᒥ ᓴᐃᒪᓐᒧᑦ.

ᑎᒍᓯᑲᐅᖅᑐᓚᐅᖅᐳᖅ ᐱᕕᒃᓴᖃᕐᓂᐅᔪᒥ ᑭᒡ ᓴᕐᓕᒥ ᑭᙳᖅᑎᑕᐅᓂᖓᓂ ᒪᐃᒥ ᐋᖅᑭᒃᓱᐃᓂᕐᒥ ᐊᑐᖅᑕᐅᓚᐅᖅᓯᒪᙱᑦᑐᒥ ᑲᑎᒪᓂᐅᔪᒥ ᑲᓇᑕᐅᑉ ᓄᓇᖃᖅᑳᖅᓯᒪᔪᓄᑦ ᓯᕗᓕᐅᖅᑎᐅᔪᓂ ᐳᕆᑎᔅ ᐊᖓᔪᖅᑳᖑᓂᐅᔪᓄᑦ, ᐅᖃᐅᓯᖃᖅᖢᓂ ᐱᒻᒪᕆᐅᓂᖓᓂ ᑲᓇᑕᐅᑉ ᒐᕙᒪᖏᑕ-ᓄᓇᖃᖅᑳᖅᓯᒪᔪᓄᑦ ᐱᓕᕆᓂᐅᔪᓂ ᐊᖅᑯᒻᒥ ᓴᐃᒻᒪᖃᑎᒌᖕᓂᐅᔪᒧᑦ.

ᑕᐃᓐᓇ ᑲᔪᓯᓂᐅᔪᖅ ᐱᓕᕆᓂᐅᔪᒥ ᓴᐃᒻᒪᖃᑎᒌᖕᓂᐅᔪᒥ ᓴᐃᒪᓐ ᑕᑯᔭᖓᓂ ᐊᖏᓛᖑᔪᒥ ᑲᒪᒋᔭᕆᐊᖃᕐᓂᖓᓐᓂ ᑭᖕ ᑭᒡᒐᖅᑐᖅᑎᐅᓂᖓᓂ ᑲᓇᑕᒥ.

“ᑐᑭᓯᓇᑦᑎᐊᖅᓯᒪᕗᖅ, ᑕᐃᒪᙵᓂ ᑎᒃᑯᐊᖅᑕᐅᓚᐅᖅᑎᓪᓗᖓ, ᑲᓇᑕᒥᐅᑕᑦ ᐃᑲᔪᖅᓱᐃᕐᔪᐊᖅᓯᒪᓂᖏᓐᓂ ᐊᒻᒪ ᓄᓇᖃᖅᑳᖅᓯᒪᔪᓂ ᐃᓄᖕᓂ ᐊᒻᒪ ᐊᓯᖏᓐᓂ ᑲᓇᑕᒥᐅᑕᓂ ᑲᑎᖃᑎᒌᒃᑲᓐᓂᕐᓂᖏᓐᓂ ᐊᒻᒪ ᐱᓕᕆᖃᑎᒌᒡᓗᑎᒃ ᐱᓕᕆᖃᑎᒌᒃᑎᐅᓗᑎᒃ,” ᓴᐃᒪᓐ ᐅᖃᓚᐅᖅᐳᖅ.

ᐅᑯᐊ ᐊᔪᕐᓇᖅᖢᑎᒃ ᐅᖃᓪᓚᖕᓂᐅᔪᓐᓇᖅᐳᑦ, ᑭᓯᐊᓂ, ᐊᒥᓱᐊᓗᖕᓂ ᓄᓇᖃᖅᑳᖅᓯᒪᔪᓄᑦ ᓄᓇᓕᐅᔪᓂ ᐊᒃᓱᕉᓴᖕᓂᖏᓐᓂ ᐊᑯᓂᐅᔪᒥ ᐊᒃᑐᐃᓂᐅᔪᒥ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓂ ᐊᒻᒪ ᓵᙵᓂᕐᒥ ᐊᔪᕐᓇᖅᑐᓂ ᖃᓄᐃᓐᓂᐅᔪᓂ ᐃᓅᓯᐅᔪᒥ, ᐅᖃᓚᐅᖅᐳᖅ.

“ᐃᓱᒪᕗᖓ ᐱᒻᒪᕆᐅᓂᖓᓂ ᐅᖃᐅᓯᖃᕐᓂᕐᒥ ᑕᐃᒃᑯᓂᖓ, ᓯᕗᓂᒃᓴᐅᔪᒥ ᑲᓇᑕᒥ ᐃᓚᐅᑎᑦᑎᓂᖃᕐᓂᖅᓴᐅᖁᓪᓗᒍ, ᐅᖃᐅᓯᐅᓂᐅᑐᐃᓐᓇᙱᑦᑐᒥ ᖃᓄᖅ ᐅᖃᓪᓚᐅᓯᕆᓂᑦᑎᓐᓂ ᑭᓯᐊᓂ ᐱᔾᔪᑎᖃᖅᑐᒥ ᖃᓄᖅ ᐊᑐᖅᐸᒃᑕᑦᑎᓐᓂ.

“ᒫᓐᓇᐅᓕᖅᑐᒥ, ᐱᒻᒪᕆᐅᕗᖅ ᓵᙵᖃᑦᑕᐅᑎᔪᓂ ᐅᖃᓪᓚᖃᑎᖃᕐᓂᐅᔪᒥ, ᑲᔪᓯᓂᕐᒥ ᖃᐅᑕᒫᒥ ᐃᓅᓯᑦᑎᓐᓂ, ᐊᒻᒪ ᖃᐅᔨᒪᓕᕐᓗᑕ ᐃᓄᖕᓂ ᐊᒻᒪ ᖃᐅᔨᓂᕐᒥ ᑭᓇᐅᓂᖏᓐᓂ. ᓇᓂᓰᓐᓇᐅᔭᖅᐳᖓ ᐅᓂᒃᑳᖅᑐᐊᖅᑎᓪᓗᖓ ᑭᓇᐅᓂᓐᓂ, ᓲᕐᓗ ᐃᓄᐃᑦ ᐃᓗᐊᖅᓯᕚᓪᓕᖅᐸᖕᓂᖏᓐᓂ ᐅᕙᓐᓄᑦ ᐅᖃᓪᓚᖃᑎᖃᕐᓂᕐᒧᑦ ᑭᓇᐅᓂᖏᓐᓂ.”

ᓴᐃᒪᓐ ᐊᑐᓚᐅᖅᐸᖓ ᓯᕗᓪᓕᖅᐹᖑᔪᒥ ᑕᒪᑐᒪᓂ ᐊᕐᕌᒎᔪᒥ, ᐅᖃᓪᓚᒃᑎᓪᓗᒍ ᐃᓄᓕᒫᓄᑦ ᕕᕗᐊᕆᒥ ᖃᕋᓴᐅᔭᑎᒍᑦ ᐱᑦᑎᐊᙱᓐᓂᐅᔪᒥ ᐃᒻᒥᓂᒃ ᐊᒻᒪ ᐃᖅᑲᓇᐃᔭᖅᑎᖏᓐᓂ ᐱᓚᐅᖅᑕᖏᓐᓂ ᐃᓅᖃᑎᒌᖑᔪᓄᑦ ᓯᐊᒻᒪᖅᑎᑦᑎᓂᐅᔪᒥ.

“ᕿᒪᒃᓯᑐᐃᓐᓇᕈᓐᓇᓚᐅᖅᐳᖓ ᐊᒻᒪ ᐅᖃᕐᓗᖓ ᓱᖁᑎᒋᔾᔮᙱᓐᓂᓐᓂ,” ᐅᖃᓚᐅᖅᐳᖅ.

“ᑭᓯᐊᓂ ᐃᓱᒪᒋᕐᔪᐊᖃᑦᑕᓚᐅᖅᐸᕋ, ᐊᒻᒪ ᐃᒃᐱᒍᓱᓚᐅᖅᐳᖓ ᑲᒪᒋᔭᕆᐊᖃᕋᒃᑯ ᑭᖕ ᑭᒡᒐᖅᑐᖅᑎᐅᓪᓗᖓ ᑲᓇᑕᒥ ᐅᖃᓪᓚᐅᓯᕆᓂᕐᒥ, ᐅᕙᓐᓂ ᐊᑐᖅᖢᖓ ᐆᒃᑑᑎᐅᓪᓗᖓ ᖃᓄᖅ ᐃᓄᐃᑦ ᐊᒃᑐᖅᑕᐅᕐᔪᐊᕈᓐᓇᕐᓂᖏᓐᓂ ᖃᕋᓴᐅᔭᑎᒍᑦ ᖀᒥᒍᓱᖕᓂᐅᔪᒥ ᐊᒻᒪ ᖃᕋᓴᐅᔭᑎᒍᑦ ᐱᐅᒃᓴᙱᓐᓂᐅᔪᒥ ᐃᓕᖅᑯᓯᐅᔪᓂ ᑕᑯᔪᓐᓇᖅᑕᕐᓂᑦ.”

ᑕᐃᒪᙵᓂ, ᐅᖃᓪᓚᐃᓐᓇᖅᓯᒪᕗᖅ ᓇᖕᒥᓂᖅ ᐊᑐᓚᐅᖅᓯᒪᔭᖏᓐᓂ ᐊᒻᒪ ᑕᑯᕗᖅ ᐊᑲᐅᙱᓕᐅᕈᑕᐅᔪᒥ ᐊᑕᐅᓯᐅᓪᓗᓂ ᑲᔪᓯᑏᓐᓇᕐᓂᐊᕐᓂᖓᓂ ᐃᓕᓐᓂᐊᖅᑎᑦᑎᓂᕐᒥ ᐃᓄᖕᓂ ᑎᒃᑯᐊᖅᑕᐅᓯᒪᓂ ᑭᖕ ᑭᒡᒐᖅᑐᖅᑎᐅᓂᖓᓂ ᑲᓇᑕᒥ ᐃᓱᓕᒃᑲᓗᐊᖅᐸᑦ, ᐱᓗᐊᖅᑐᒥ ᐊᒃᑐᐃᓲᖑᖕᒪᑦ ᐊᒥᓱᓂ ᒪᒃᑯᒃᑐᓂ.

ᓴᐃᒪᓐ ᐅᖃᓚᐅᖅᐳᖅ ᐃᒻᒥᓂᒃ ᐊᒻᒪ ᑲᑎᙵᓂᕆᔭᖓᓂ ᑲᑎᒪᖃᑎᖃᖅᓯᒪᕗᑦ ᓯᓚᑦᑐᖅᓴᕐᕕᒡᔪᐊᖑᔪᓂ ᐊᑐᕐᓂᖃᐅᑎᒥ ᐱᙳᐊᓪᓗᐊᕐᓂᖏᓐᓂ ᐱᔾᔪᑎᖃᖅᑐᒥ ᖃᓄᖅ ᐃᓕᓐᓂᐊᖅᑏᑦ ᐊᒃᑐᖅᑕᐅᕙᖕᓂᖏᓐᓂ ᐃᓅᖃᑎᒌᖑᔪᓄᑦ ᓯᐊᒻᒪᖅᑎᑦᑎᓂᐅᔪᒥ, ᐅᖃᐅᓯᖃᖅᖢᓂ ᐆᒃᑑᑎᐅᔪᓂ ᒪᒃᑯᒃᑐᓂ ᐃᒻᒥᓃᖃᑦᑕᖅᑐᓄᑦ ᐱᔾᔪᑎᖃᖅᑐᒥ ᖃᕋᓴᐅᔭᑎᒍᑦ ᐱᑦᑎᐊᙱᓐᓂᐅᔪᓂ.

ᐅᖃᓚᐅᖅᐳᖅ ᐊᖓᔪᖅᑳᖑᔪᑦ ᐊᒻᒪ ᐃᓚᒌᑦ ᐃᓕᓐᓂᐊᖅᑎᑦᑎᔭᕆᐊᖃᖅᐳᑦ ᕿᑐᕐᙵᒥᓂᒃ ᖃᓄᐃᙱᓐᓂᖓᓂ ᐅᖃᓪᓚᖕᓂᕐᒥ ᖃᓄᖓᓴᕐᓂᐅᔪᒥ ᐊᒻᒪ ᐱᑦᑎᐊᙱᓐᓂᐅᔪᓂ ᐊᑐᖅᐸᒃᑕᖏᓐᓂ ᖃᕋᓴᐅᔭᑎᒍᑦ.

“ᓱᑰᙱᓪᓗᒋᑦ ᐅᖃᕌᖓᑕ ᑭᓱᑐᐃᓐᓇᒥᒃ ᐊᒻᒪ ᐅᖃᕐᓗᑎᒃ, ‘ᐅᖃᓪᓚᖃᑎᒋᙱᓪᓗᒋᑦ, ᐲᕈᓗᒡᓗᒋᑦ ᖃᕋᓴᐅᔭᑎᒍᑦ.’ ᑕᒪᓐᓴ ᐋᖅᑭᒃᓯᔾᔮᙱᑦᑐᖅ,” ᐅᖃᓚᐅᖅᐳᖅ.

“ᐃᓱᒪᕗᖓ ᑐᓂᓯᓂᖃᕐᓂᐊᖅᑐᒥ ᓱᕈᓯᕐᓂ ᐊᑦᑕᓇᙱᑦᑐᒥ ᐃᓂᐅᔪᒥ ᐊᖓᔪᖅᑳᖑᔪᓄᑦ ᒪᑐᐃᖓᓂᖏᓐᓂ ᕿᑐᕐᙵᒥᓂᑦ ᖃᓄᐃᓐᓂᐅᔪᓂ, ᐊᒻᒪᓗ ᐃᓕᓐᓂᐊᖅᑎᓪᓗᒋᑦ ᑭᓱᑕᖃᕐᓂᖓᓂ ᑕᖅᑳᓂ.”

ᐅᖃᐅᓯᖃᖅᖢᓂ ᓇᖕᒥᓂᖅ ᐅᖃᕐᓂᕆᔭᖓᓂ, ᐊᔪᐃᓐᓇᑦᑕ, ᑐᑭᖃᖅᑐᒥ “ᐊᔪᐃᓐᓇᕐᓂᖃᕐᓂᕐᒥ” ᐃᓄᒃᑎᑐᑦ, ᓴᐃᒪᓐ ᑲᔪᓰᓐᓇᕈᒪᕗᖅ ᑲᔪᖏᖅᓴᐃᓂᕐᒥ ᒪᒃᑯᒃᑐᓂ, ᐱᓗᐊᖅᑐᒥ ᒪᒃᑯᒃᑐᓂ ᓄᓇᖃᖅᑳᖅᓯᒪᔪᓄᑦ ᐃᓄᖕᓂ. ᐃᒻᒥᓂᒃ ᑕᑯᓲᖑᕗᖅ ᐊᔾᔪᒥᓇᖅᑑᓂᖓᓂ, ᐱᓗᐊᖅᑐᒥ ᒪᒃᑯᒃᑐᓄᑦ ᓯᕗᓂᒃᓴᒥ ᓯᕗᓕᐅᖅᑎᐅᔪᒪᔪᓂ.

“ᑲᑎᒪᖃᑎᖃᑐᐊᕌᖓᒪ ᐅᕙᓂ ᕇᑐ ᑲᑎᒪᕝᕕᖓᓂ, ᐃᓚᓕᐅᔾᔨᓇᓱᐊᓲᖑᕗᖓ ᒪᒃᑯᒃᑐᓂ, ᓲᕐᓗ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᓂᐅᔪᒥ ᐱᓕᕆᔭᑦᑎᓐᓂ ᐅᕙᓂ,” ᓴᐃᒪᓐ ᐅᖃᓚᐅᖅᐳᖅ.

“ᒪᒃᑯᒃᑐᑦ ᐃᓚᒋᔭᐅᕐᔪᐊᖅᐳᑦ ᑖᔅᓱᒥᖓ. ᑕᐃᒫᒃ ᐊᓯᔾᔩᓚᐅᖅᑕ.”