ᑭᙳᒻᒧᑦ ᑕᑯᒋᐊᕐᓂᖅ 2018-ᒥᑦ ᓄᓇᕕᒃᒥᑦ

2018 ᓄᓇᕕᒃᒥᑦ ᐊᕐᕌᒎᓚᐅᕐᐳᖅ ᐃᓄᐃᑦ ᓯᕗᓕᐅᕐᑎᓕᕆᒃᑯᑦ ᐅᑎᖅᑎᑕᐅᒃᑲᓐᓂᖅᖢᑎᒃ, ᓂᕈᐊᖅᑕᐅᒃᑲᓐᓂᕐᖢᓂ ᒪᑭᕝᕕᒃ ᑯᐊᐳᕇᓴᓐᑯᑦ ᐱᒋᐊᖅᑎᑦᑎᔨᖓ ᓵᓕ ᕗᐊᑦ ᑖᒃᑯᓄᖓ ᑲᑐᔾᔨᖃᑎᒌᓄᑦ ᐊᖓᔪᖄᙳᒃᑲᓐᓂᕐᖢᓂ. ᕗᐊᑦ ᐱᓇᓱᖕᓂᐊᕐᓂᕋᓚᐅᕐᑐᖅ ᐃᓄᐃᑦ ᓇᖕᒥᓂᖅ ᒐᕙᒪᖃᓕᕐᓗᑎᒃ ᓄᓇᕕᒃᒧᑦ.
ᐅᕙᓂ ᑲᑎᕝᕕᒃ ᓄᓇᓕᓕᒫᑦ ᒐᕙᒪᖓᓂᑦ, ᑲᑎᒪᔩᑦ ᓂᕈᐊᒃᑲᓐᓂᓚᐅᕐᐳᑦ ᔭᓂᕗ ᒥᐅᓂᒃ ᐃᒃᓯᕙᐅᑎᐅᒃᑲᓐᓂᕐᓂᐊᕐᓗᓂ.
ᑭᓯᐊᓂᓕ ᓯᕗᓕᐅᕐᑎᐅᓕᒪᔪᑦ ᓱᓕ ᓄᖃᖅᑎᑦᑎᕚᓪᓕᕐᓯᒪᙱᑦᑐᑦ ᐃᒻᒥᓃᖃᑦᑕᕐᓂᕐᒥᑦ, ᓄᓇᕕᒃᒥᑦ ᐊᒥᓲᓛᓂᒃ ᐃᒥᓐᓃᕐᓯᒪᔪᖃᖅᖢᓂ 2018-ᒥᑦ. ᖃᔅᓯᐅᓂᖏᑦ ᒫᓃᓚᐅᕐᑐᑦ 30 ᐅᖓᑖᓃᖢᑎᒃ ᐅᑭᐅᖅ ᐱᒋᐊᓕᕐᑎᓪᓗᒍ, ᑕᐃᒪᐃᓐᓂᖓᓄᓪᓗ ᓄᓇᓕᖕᓂᑦ ᑲᑐᔾᔨᖃᑎᒌᖑᔪᓄᑦ ᑕᒪᓐᓇ ᑐᐊᕕᕐᓇᖅᖢᓂ ᑲᑎᒪᔾᔪᑎᐅᓚᐅᕐᑐᖅ.
2018 ᓇᓗᓇᐃᕐᑕᐅᓯᒪᓚᐅᕐᐳᖅ ᓴᐱᓕᕐᓇᖢᓂ ᐊᒻᒪ ᑭᖑᕙᕆᐊᕐᓯᒪᔪᑦ ᐋᔩᖃᑎᒌᒍᑎᒃᓴᑦ—ᐃᓚᖏᑦ ᑲᑐᔾᔨᖃᑎᒌᓄᑦ ᐃᖅᑲᓇᐃᔮᓄᑦ ᐊᒻᒪ ᐊᓯᖏᓄᑦ ᑲᑐᔾᔨᖃᑎᒌᖑᔪᓄᑦ ᓄᑖᙳᕆᐊᖅᑎᑦᑎᒐᓱᒃᑐᓂᒃ ᐃᑲᔫᑎᒃᓴᓂᒃ ᐊᖏᕈᑎᒃᓴᓂᒃ ᐅᑯᓇᙵᑦ ᑯᐸᐃᒃᒥᑦ ᐊᒻᒪ ᐋᑐᕚᒥᑦ.
ᐅᕝᕙᐅᑯᐊ ᐃᓚᖏᑦ ᓄᓇᕕᒃᒥᑦ ᐅᓂᒃᑳᖑᓛᖑᓚᐅᕐᑐᑦ ᑕᕿᑦ 12 ᐃᓗᐊᓂᑦ.

ᓂᕈᐊᖅᑕᐅᓵᕐᑐᖅ ᒪᑭᕝᕕᒃ ᑯᐊᐳᕇᓐᑯᑦ ᐊᖓᔪᖄᖓ ᓵᓕ ᕗᐊᑦ ᐊᖏᖅᑎᑕᐅᕗᖅ ᐱᓕᕆᐊᒃᓴᒥᓄᑦ ᒪᑭᕝᕕᒃ ᒐᕙᓇᖓᓄᑦ ᐄᕙ ᑎᐊᒧᑦ ᒫᑦᓯ 2018-ᒥᑦ ᑖᒃᑯᐊ ᑲᑐᔾᔨᖃᑎᒌᑦ ᑲᑎᒪᑎᓪᓗᒋᑦ ᐳᕕᕐᓂᑐᕐᒥᑦ. (ᐊᔾᔨᙳᐊᖅ ᒪᑭᕝᕕᒃᑯᓐᓂᑦ)

ᔭᓄᐊᕆ
• ᐃᓄᐃᑦ ᓯᕗᓕᐅᕐᑎᓕᕆᓂᒃᑯᑦ ᓄᓇᕕᒃᒥᑦ ᓂᕈᐊᒃᑲᓐᓂᓚᐅᕐᑐᑦ ᐆᒥᖓ ᒪᑭᕝᕕᒃᑯᑦ ᑲᑐᔾᔨᖃᑎᒌᖏᓐᓂᒃ ᐱᒋᐊᖅᑎᑦᑎᔨᐅᖃᑕᐅᓂᑯᒥᒃ, ᓵᓕ ᕗᐊᑦ, ᓂᕈᐊᖅᑕᐅᒃᑲᓐᓂᕐᑎᓪᓗᒍ ᑲᑐᔾᔨᖃᑎᒌᑦ ᐊᖓᔪᖅᑳᖓᓄᑦ. ᕗᐊᑦ ᐃᑲᔪᓚᐅᕐᓯᒪᔪᖅ ᒪᑭᕝᕕᒃ ᐋᕿᒃᑕᐅᓂᖓᓂᒃ 1978-ᒥᑦ ᐊᒻᒪᓗ ᓯᕗᓪᓕᖅᐹᙳᓪᓗᓂ ᐊᖓᔪᖅᑲᕆᔭᐅᓪᓗᓂ ᑖᒃᑯᓄᖓ. ᑭᖑᓂᐊᒍᑦ ᓴᓂᑐᙳᖅᑎᑕᐅᓚᐅᕐᓯᒪᓪᓗᓂ ᒐᕙᒪᑐᖃᒃᑯᓐᓂᑦ, ᑖᓐᓇᓕ ᓄᖅᑲᓕᓚᐅᕐᑕᖓ ᒪᑭᕝᕕᒃᑯᓐᓄᑦ ᐊᖓᔪᖅᑳᖑᓂᐊᕋᒥ.
• ᑲᑐᔾᔨᖃᑎᒌᖑᔪᑦ ᑭᒡᒐᖅᑐᐃᔪᑦ ᓄᓇᕕᒃᒥᑦ ᒫᓃᑦᑐᓂᒃ 300-ᖏᓐᓂᒃ ᐃᓕᓴᐃᔨᓂ ᓄᖃᖓᑎᑦᑎᔪᒪᕗᑦ ᐃᖅᑲᓇᐃᔮᖏᓪᓄᑦ ᑳᓐᑐᕌᖃᙱᓯᒪᓂᖏᓐᓄᑦ ᒫᑦᓯ 2015-ᒥᑦ. ᐱᓇᓱᐊᕈᓯᖅ ᐃᓚᖓᒍᑦ, ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦ ᑯᐸᐃᒃ ᐅᐊᖕᓇᖓᓄᑦ (AENQ) ᐊᒻᒪᓗ ᑲᑎᕝᕕᒃ ᐃᓕᓴᕐᓴᓕᕆᓂᒃᑯᑦ ᐊᖏᖃᑎᒌᒍᓐᓇᕐᓯᓚᐅᕐᐳᑦ.
• ᒪᓐᑐᕆᐊᒥᑦ ᓘᒃᑖᑦ ᑯᐸᐃᒃᒥᑦ ᑎᓕᐅᕆᓯᒪᔪᑦ ᓄᑖᙳᕆᐊᖅᑎᑦᑎᖁᔨᓪᓗᑎᒃ ᐊᑐᐊᒐᕐᒥᒃ ᐱᔪᓐᓇᙱᑎᑦᑎᓯᒪᔪᒥᒃ ᐊᖓᔪᖄᓂᒃ ᖃᖓᑕᖃᑕᐅᔪᓐᓇᙱᖢᑎᒃ ᐋᓐᓂᐊᕐᑐᖅ ᓱᕈᓯᖓ ᑯᐸᐃᒃ ᐋᓐᓂᐊᖅᑐᓄᑦ ᖃᖓᑕᓲᖓᒍᑦ, ᑖᒃᑯᐊᓗ ᐱᔨᑦᑎᕋᖅᐸᒃᖢᑎᒃ ᓄᓇᕕᒃᒦᑦᑐᓂᒃ. “ᐃᓄᐃᑦ ᑕᒪᑐᒧᖓ ᐊᒃᑐᖅᑕᐅᓯᒪᓗᐊᕐᒪᑕ,” ᓘᒃᑖᑦ ᑎᑎᕋᓚᐅᕐᑐᑦ ᑎᑎᖃᑎᒍᑦ.
• ᓄᓇᕕᒃᒥᑦ ᐃᓄᐃᑦ ᐊᐱᕆᔪᑦ ᐃᓚᐅᔪᒪᙱᖢᑎᒃ ᑯᐸᐃᒃᒥᑦ ᖁᑭᐅᑎᖃᕐᓂᕐᒧᑦ ᐊᑎᓕᐅᕆᐊᖃᕐᓂᕐᒥᑦ ᑖᓐᓇᓗ ᐊᑐᓕᕆᐊᕐᓂᐊᖅᖢᓂ ᔭᓄᐊᕆ 29-ᒥᑦ. ᒪᑭᕝᕕᒃ ᑯᐊᐱᕇᓴᓐᑯᑦ ᑭᐅᓘᑎᖃᖅᑐᑦ ᐃᓄᐃᑦ ᐃᓚᐅᑎᑕᐅᔭᕆᐊᖃᙱᓐᓂᖏᓐᓂᒃ ᐱᔪᓐᓇᐅᑎᖃᕐᓂᖏᓐᓂᒃ ᐊᖑᓇᓱᒃᑎᐅᓂᕐᒥᒃ ᐅᕘᓇ ᔭᐃᒻᔅ ᐸᐃ ᐊᒻᒪ ᓄᓇᕕᒧᑦ ᐊᖏᕈᑎᓂᒃ.
ᕕᕝᕗᐊᕆ
• ᑯᐸᐃᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᒥᓂᔅᑕ ᒐᐃᑖᓐ ᐳᕋᑦ ᐅᖃᖅᑐᖅ ᑐᓴᒐᒃᓴᓕᐅᕐᑎᓄᑦ ᑯᐸᐃᒃᒥᑦ ᑲᑎᒪᓂᕐᔪᐊᕐᒥᑦ ᕕᕝᕗᐊᕆ 6-ᒥ ᑖᒃᑯᐊ ᐱᓕᕆᕝᕕᖏᑦ ᐋᕿᒃᓱᐃᒐᓱᖕᓂᕋᖅᖢᓂᒋᑦ ᐊᒃᓱᓪᓘᓐᓃᑦ ᐊᑕᐅᓯᕐᒥᑦ ᐊᖓᔪᖄᒥᑦ ᐃᓚᐅᔪᖃᕈᓐᓇᕐᓗᓂ ᐋᓐᓂᐊᕕᓕᐊᕆᑎᒥ ᖃᖓᑕᓲᒥᑦ.
• ᒪᓐᑐᕆᐊᒥᐅᑕᖅ ᑯᕗᐊᓯ ᐱᐊᓐᔭᒥᓐ ᐃᖅᑲᖅᑐᖅᑕᐅᓂᖓ ᐱᒋᐊᓯᕗᖅ ᐸᓯᔭᒃᓴᐅᓂᖓᓄᑦ ᐃᓄᐊᕐᓯᓂᕐᒥᒃ 29-ᓂᑦ ᐅᑭᐅᓕᖕᒥᑦ ᓂᐊᓕ ᐊᖑᑎᒍᓗᒃᒥᑦ, ᐱᖃᓐᓈᖓ ᐊᒻᒪ ᐊᓈᓇᒋᔭᐅᓪᓗᓂ ᐱᖓᓱᓄᑦ ᐳᕕᕐᓂᑐᕐᒥᐅᑕᕕᓂᖅ.
• ᓄᑖᖅ ᓴᕿᑕᐅᓵᕐᓂᑯ ᑐᖁᖓᔪᓕᕆᔨᒃᑯᓐᓂ ᐅᓂᒃᑳᑦ ᓇᓗᓇᐃᕐᓯᓯᒪᕗᑦ ᐅᓇ 21-ᓂ ᐊᕐᕌᒍᓕᒃ ᑲᖏᕐᓱᐊᓗᒡᔪᐊᕐᒥᐅᑕᖅ ᐃᓅᔪᓐᓃᕐᓂᑯ ᐊᐅᔭᐅᓚᐅᕐᑐᒥ ᐳᕙᒡᓗᖕᓇᒧᑦ ᐃᓅᔪᓐᓃᕐᓂᕋᖅᑕᐅᓪᓗᓂ—ᓯᕗᓪᓕᖅᐹᖅ ᐳᕙᒡᓗᖕᓇᒧᑦ ᐃᓅᔪᓐᓃᕐᑐᖅ ᖃᖓᑲᓪᓚᖕᓂᑦ.
• ᑲᑎᕝᕕᒃ ᓄᓇᓕᓕᒫᑦ ᒐᕙᒪᖓᑦ ᓯᕗᓕᖅᐹᒥᑦ ᐱᒋᐊᖅᑎᑦᑎᔨᐅᕗᑦ ᖃᕋᓴᐅᔭᓄᑦ ᐊᑦᑕᑕᕈᓐᓇᐅᑎᓂᒃ fibre optic ᑕᒪᐅᖓ ᓄᓇᕕᒃᒧᑦ, ᑐᓂᓯᓪᓗᑎᒃ ᐱᓕᕆᑎᑦᑎᓂᐊᕐᓗᑎᒃ ᐱᓕᕆᕝᕕᖕᒥᑦ ᑕᕆᐅᑉ ᐊᑖᒍᑦ ᖃᐅᔨᓴᕐᓂᐊᕐᑐᓂᒃ ᑕᓯᐅᔭᕐᔪᐊᑉ ᓯᒡᔭᖓᓂᒃ ᓯᑯᖃᕈᓐᓃᕐᐸᑦ.
ᒫᑦᓯ
• ᑯᐸᐃᒃᒥᑦ ᐃᒻᒥᒃᑰᖓᔪᑦ ᖃᐅᔨᓴᕐᑎᐅᔪᑦ ᑎᑭᑎᑕᐅᕗᑦ ᐃᓅᔪᓐᓃᖅᑐᒥᑦ ᐃᓄᒃᔪᐊᒃᒥᑦ ᐊᖑᑎᒥᒃ, ᐅᓪᓗᖅ ᐊᓂᒍᕐᑎᓪᓗᒍ ᓄᓇᕕᒃᒥᑦ ᐸᓖᓯᒃᑯᑦ ᐅᐸᒍᑎᓚᐅᕐᑎᓪᓗᒋᑦ ᐊᐃᑉᐸᖓᓄᑦ ᐱᑦᑎᐊᖅᑕᐅᙱᓐᓂᕋᖅᑐᒥᒃ. ᐅᑯᐊ Bureau des enquêtes indépendantes ᖃᐅᔨᓴᖃᑦᑕᕆᐊᖃᕐᒪᑕ ᐸᓖᓯᒃᑯᑦ ᐱᓕᕆᐊᕆᓂᑯᖏᓐᓂᒃ.
• ᑲᖏᕐᓱᒡᔪᐊᖅᒥᑦ, 31-ᓂ ᐅᑭᐅᓕᒃ ᒫᑎᐅᓯ ᑲᒧᒑᓗᒃ ᐸᓯᔭᒃᓴᙳᖅᑎᑕᐅᕗᖅ ᐃᓅᔪᓐᓃᓚᐅᕐᓂᖓᓄᑦ ᐅᓇ 19-ᓂ ᐅᑭᐅᓕᒃ ᕌᐳᑦ ᐋᑕᒻᔅ.
• ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓄᓇᕕᒃᒥᑦ ᑐᒃᓯᕋᓚᐅᕐᓂᕋᖅᑐᑦ ᑯᐸᐃᒃ ᒐᕙᒪᖓᓄᑦ ᐊᖏᒡᓕᒋᐊᖅᑕᐅᖁᔨᓪᓗᑎᒃ ᐸᕿᔨᐅᔪᑦ ᐊᑭᓕᖅᑕᐅᔾᔪ­ᑎᒋᖃᑦᑕᖅᑕᖏᓐᓂᒃ $25-ᓂᑦ $100-ᓄᑦ, ᐸᕿᔨᒃᓴᖃᒃᑲᓐᓂ­ᕈᓐᓇᖁᓪᓗᒋᑦ ᓄᓇᕕᒃᒥᑦ.
• ᑲᓇᑕᒥ ᐊᓯᐅᓯᒪᔪᓂᒃ ᐊᒻᒪ ᐃᓄᐊᖅᑕᐅᓯᒪᔪᓂᒃ ᓄᓇᖃᖅᑳᖅᑐᓂᒃ ᐊᕐᓇᓂᒃ ᐊᒻᒪ ᓂᕕᐊᕐᓵᓂᒃ ᖃᐅᔨᒐᓱᖕᓂᕐᒧᑦ (MMIWG) ᐱᓕᕆᓂᖃᓚᐅᕐᐳᑦ ᐱᓇᓱᐊᕈᓯᕐᒥᑦ ᒪᓐᑐᕆᐊᒥᑦ, ᐅᓪᓗᖅ ᐊᑕᐅᓯᖅ ᑐᕌᖓᓪᓗᓂ ᓄᓇᕕᒃᒥᐅᑕᐃᑦ ᐃᓄᐃᑦ ᐅᖃᓪᓚᒍᓐᓇᖅᑎᑕᐅᓪᓗᑎᒃ ᐃᓚᖏᓪᓗ.
ᐄᐳᕈᓪ
• ᖃᐅᒻᒪᖁᑎᓕᕆᔨᑦ ᑯᐸᐃᒃᒥᑦ Hydro-Québec ᑐᓴᖅᑎᑦᑎᕗᑦ ᐸᕐᓇᐅᑎᖏᓐᓂᒃ ᐅᓇ ᐊᐅᓚᑕᐅᓗᓂ ᐃᒪᐃᔭᐃᓂᐊᕐᓂᕐᒥᒃ ᑕᑕᓯᒪᑲᓴᒃᑐᒥᑦ ᑳᓂᐊᐱᔅᑲᐅ ᐃᒪᖃᕐᕕᒃᒥᑦ (Caniapiscau reservoir). ᑖᓐᓇ ᐃᓱᒫᓘᑎᐅᓚᐅᕐᑐᖅ ᑰᔾᔪᐊᕐᒥᐅᑕᓂᒃ ᑖᔅᓱᒪ ᑯᕕᑎᑕᐅᓂᖓ ᐃᒪᖃᓗᐊᓕᖅᑎᑦᑎᓂᐊᕆᐊᒃᓴᖓᓂᒃ ᑳᓂᐊᐱᔅᑲᐅ ᑰᖕᒥᑦ, ᐅᕙᙶᖓᔪᖅ ᑰᒃᓱᐊᒃ ᑰᖕᒥᑦ, ᑖᓐᓇ ᑰᔾᔪᐊᒃᑰᖃᑦᑕᕐᒪᑦ. ᓄᓇᕕᒻᒥᐅᑦ ᐃᖅᑲᐅᒪᔪᑦ 1984-ᒥᑦ ᑖᓐᓇ ᐃᒪᖃᕈᓐᓃᖅᑎᑕᐅᓇᓱᒃᑎᓪᓗᒍ 9,000-ᖏᓐᓃᑦᑐᓂᒃ ᑐᒃᑐᓂᒃ ᐃᐱᓂᕐᒧᑦ ᑐᖁᔪᖃᓚᐅᕐᓯᒪᓂᖓᓂᒃ.
• ᑲᑎᕝᕕᒃ ᓄᓇᓕᓕᒫᑦ ᒐᕙᒪᖓ ᐊᒻᒪ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦ ᐅᑯᐊ KRGEU, ᐊᖏᖃᑎᒌᓚᐅᕐᐳᑦ ᓄᑖᒥ ᑳᓐᑐᕌᖑᓂᐊᖅᑐᒥᒃ. ᒫᓐᓇᒧᓪᓕ ᑖᒃᑯᐊ ᑲᑐᔾᔨᖃᑎᒌᑦ 200 ᐃᖅᑲᓇᐃᔭᖅᑎᐅᕙᒃᑐᑦ ᐃᓚᒋᔭᐅᔪᑦ ᐊᒻᒪ 66 ᒐᕙᒪᑐᖃᒃᑯᑦ ᐃᖏᕐᕋᔾᔪᑎᓕᕆᓂᕐᒧᑦ ᐃᖅᑲᓇᐃᔭᖅᑎᖏ ᑳᑐᕌᖃᕐᓯᒪᙱᒻᒪᑕ ᑕᐃᒪᙵᑦ ᑎᓯᐱᕆ 2015-ᖑᓚᐅᕐᑐᒥᒃ.
ᒪᐃ
• ᒪᑭᕝᕕᒃ ᑯᐊᐳᕇᓴᓐᑯ ᐊᕐᕌᒍᒥ ᐊᑕᐅᓯᕐᒥ ᐃᖏᕐᕋᓕᕐᑐᒥᒃ ᐱᕙᓪᓕᐊᔪᓕᕆᕝᕕᒃ ᓇᖕᒥᓂᕆᔭᐅᔪᓂᒃ, ᓄᕝᕕᑎ ᐱᕙᓪᓕᐊᔪᓕᕆᔨᒃ ᑯᐊᐳᕇᓴᓐ, ᐋᕿᒋᐊᖅᑕᐅᒃᑲᓐᓂᕐᓯᒪᕗᖅ ᐊᐅᓚᑕᐅᓪᓗᓂ ᒪᑭᕝᕕᒃᑯᑦ ᐊᖓᔪᖄᖓᓄᑦ ᓵᓕ ᕗᐊᑦᒧᑦ, ᐅᖃᕐᓯᒪᓪᓗᓂ ᑖᓐᓇ ᓄᑖᖅ ᑯᐊᐳᕇᓴᓐ ᒪᓕᒃᓯᒪᑐᐃᓐᓇᓚᐅᕐᓂᕋᖅᖢᓂᐅᒃ ᒪᑭᕝᕕᒃᑯᑦ ᒫᓐᓇ ᐱᓕᕆᐊᖏᓐᓂᒃ ᐊᒻᒪᓗ ᐲᕐᓯᓯᒪᓪᓗᓂ ᐃᓄᐃᑦ ᓇᖕᒥᓂᖃᕐᓂᖏᓐᓂᒃ. ᒪᑭᕝᕕᒃ ᓄᑖᓂᒃ ᑲᑎᒪᔨᑖᓚᐅᕐᑐᑦ ᐊᒻᒪᓗ ᐊᓯᔾᔨᖅᓯᒃᑲᓐᓂᕐᓯᓂᐊᕋᓱᒋᓪᓗᑎᒃ.
• ᑲᑎᕝᕕᒃ ᓄᓇᓕᓕᒫᑦ ᒐᕙᒪᖓᑦᑕ ᑕᒫᓂ ᖃᕋᓴᐅᔭᓄᑦ ᐊᑦᑕᑕᕈᓐᓇᐅᑎ (Tamaani Internet), ᐱᓕᕆᖃᑎᖃᖅᖢᑎᒃ ᐊᐃᔅ ᕗᐊᐃᔪᓚᔅ (Ice Wireless), ᑐᓴᖅᑎᑦᑎᓚᐅᕐᐳᑦ ᑕᒪᕐᒥᒃ 14 ᓄᓇᕕᒃᒥᑦ ᓄᓇᓖᑦ ᐋᕿᒡᕕᐅᓯᒪᓂᕋᖅᑕᐅᓪᓗᒋᑦ 3G ᐅᖄᓚᐅᑎᖃᓛᓂᒃ ᐱᔨᑦᑎᕋᐅᑎᖃᓕᕐᓂᐊᕐᓂᖏᓐᓂᒃ ᑕᒪᑐᒪ ᐊᕐᕌᒎ ᓄᙳᐊᒍᑦ.
ᔫᓂ
• 28-ᓂ ᐊᕐᕌᒍᓕᒃ ᖃᐅᔨᓴᕐᕕᖕᒥ ᐱᓕᕆᔾᔪᑎᓕᕆᔨ ᑐᖁᖓᔪᖅ ᓇᓂᔭᐅᓚᐅᕐᑐᖅ ᔫᓂ 12-ᒥᑦ ᐊᖏᕐᕋᖓᓂᒃ ᑰᔾᔪᐊᕐᒥᑦ. ᖃᐅᒃᐸᙳᕐᑎᓪᓗᒍ, ᕌᓐᑎ ᑰᓂᐊᒃ ᑎᒍᔭᐅᓚᐅᕐᑐᖅ ᐊᒻᒪ ᐸᓯᔭᒃᓴᙳᖅᑎᑕᐅᓪᓗᓂ ᐃᓄᐊᕐᓯᓂᕐᒥ ᑖᔅᓱᒥᖓ.
• ᑯᐸᐃᒃ ᒐᕙᒪᖓ ᐅᖃᕐᑐᑦ ᐊᖓᔪᖅᑳᕆᔭᐅᔪᑦ ᓱᕈᓯᖏᓐᓂᒃ ᐃᑭᒪᖃᑕᐅᔪᓐᓇᓕᕐᓂᖏᓐᓂᒃ ᑯᐸᐃᒃ ᑐᐊᕕᕐᓇᖅᑐᒧᑦ ᖃᖓᑕᓲᖓᒍᑦ, ᐱᖏᐊᕐᓗᓂ ᔪᓚᐃᒥᑦ. ᑭᓯᐊᓂᓕ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᒥᓂᔅᑕ ᒐᐃᑖᓐ ᐳᕋᑦ ᐱᓕᕆᐊᖑᕈᓘᔭᓕᓚᐅᕐᑐᖅ ᐅᖃᐅᓯᖏᓐᓄᑦ ᖃᑎᖃᑎᒌᖕᓇᕐᓂᕐᒥᒃ, ᐅᖃᖅᖢᓂ ᓄᓇᕕᒻᒥᐅᑦ ᐊᖓᔪᖅᑳᖏᑦ ᐊᖓᔮᓗᐊᖃᑦᑕᕋᔭᕐᓂᖏᓐᓂᒃ ᖃᖓᑕᓲᒧᑦ ᐃᑭᑎᑕᐅᔭᕆᐊᒃᓴᖏᓐᓂᒃ.
ᔪᓚᐃ
• ᒪᑭᕝᕕᒃᑯᑦ ᐊᖓᔪᖅᑳᖓ ᓵᓕ ᕗᐊᑦ ᐅᖃᖅᑐᖅ ᑲᓇᑕᐅᑉ ᐅᑭᐅᕐᑕᖅᑐᖓᑕ ᑲᓇᖕᓇᖓᓃᑦᑐᑦ ᐊᖏᓗᐊᕐᓂᖓᓂᒃ ᐊᒻᒪ ᓄᓇᓖᑦ ᐅᖓᓯᒌᒃᑑᑎᐅᓗᐊᕐᓂᖏᓐᓂᒃ ᒪᕐᕉᖕᓂ ᖃᖓᑕᓲᖕᓂ ᐊᐅᓚᑕᐅᔭᕆᐊᒃᓴᖅ. ᐱᔾᔪᑎᒋᔭᐅᔪᑦ ᑲᑎᒪᓂᕐᒥᑦ ᐱᒋᐊᕈᑎᐅᒃᑲᓐᓂᓕᓚᐅᕐᐳᑦ ᐅᑯᓂᖓ ᑲᑐᔾᔨᖃᑎᒌᙱᑦᑕ ᕘᔅᑦ ᐃᐅᖁᑎᖏᑦ ᐊᒻᒪ ᖃᖓᑕᓲᖑᖃᑎᖏᑦ, ᑲᓃᑎᐊᓐ ᓄᐊᑦ, ᑖᓐᓇᓕ ᓇᖕᒥᓂᕆᔭᐅᔪᖅ ᐃᓄᕕᐊᓗᐃᑦ ᐱᓕᕆᕝᕕᓕᕆᓂᕐᒧᑦ ᑲᑐᔾᔨᖃᑎᒌᓄᑦ.
• ᖃᐅᒻᒪᖅᑯᑎᓕᕆᔨᒃᑯᑦ ᑯᐸᐃᒃᒥᑦ Hydro-Québec ᐱᒋᐊᖅᓕᓚᐅᕐᐳᑦ ᐊᐅᓚᑕᐅᓪᓗᓂ ᑯᕕᑎᑦᑎᕙᓪᓕᐊᓂᕐᒥ ᐅᕙᙵᑦ ᑳᓂᐊᐱᔅᑲᐅ ᐃᒪᖃᕐᕕᒃᒥᑦ ᔪᓚᐃ 20-ᒥᑦ, ᑕᐃᒪᐃᓕᐅᕈᑎᖃᖅᖢᑎᒃ ᐃᒪᐅᑉ ᖁᑦᑎᓗᐊᕐᓂᖓᓂᒃ ᑕᒫᓂᑦ. ᑰᔅᕕᐅᓗᐊᖅᑐᐊᓗᖕᓂ ᑐᓴᕐᓇᓚᐅᙱᑦᑐᖅ ᑰᔾᔪᐊᑉ ᖃᓂᒋᔭᖓᓂᒃ.
ᐋᒐᓯ
• ᒐᕙᒪᑐᖃᒃᑯᑦ ᐊᒻᒪ ᐊᕕᒃᑐᕐᓯᒪᓂᒃᑯᑦ ᒐᔭᒪᐅᔪᑦ ᐊᖏᕈᓐᓇᕐᓯᓚᐅᕐᐳᑦ ᑐᓂᓯᓂᐊᕐᓂᕐᒥᒃ $125 ᒥᓕᐊᓐ ᑖᓚᓂᒃ ᓄᓇᕕᒃᒧᑦ ᐅᕘᓇ ᐱᓕᕆᖃᑎᒌᖕᓂᖅ ᐱᓕᕆᓕᕈᒪᓂᕐᒧᑦ Connect to Innovate ᐱᓕᕆᐊᒃᓴᒥᑦ. ᑖᓐᓇ ᐱᕕᖃᕈᑎᐅᓕᓚᐅᕐᑐᖅ ᑲᑎᕝᕕᒃ ᓄᓇᓕᓕᒫᑦ ᒐᕙᒪᖓ ᓯᕗᒧᑦ ᐱᓕᕆᐊᖃᕈᓐᓇᕐᓯᓗᑎᒃ ᑕᕆᐅᑉ ᐊᑖᒍᑦ ᖃᐅᔨᓴᕐᓂᕐᒥᒃ ᑕᓯᐅᔭᕐᔪᐊᑉ ᓯᒡᔭᖏᓐᓂᒃ, ᐅᑯᐊ ᖃᕋᓴᐅᔭᓄᑦ ᐊᑦᑕᑕᕈᓐᓇᐅᑎᐅᓇᔭᕐᑐᑦ fibre optic ᐃᓂᒋᓇᔭᖅᑕᖏᓐᓂᒃ, ᐊᒻᒪᓗ ᓴᓇᖃᓯᐅᑎᓗᑎᒃ ᓄᑖᒥᒃ ᐆᑎᕈᓐᓇᐅᑎᓂᒃ ᓇᐸᔪᓂᒃ ᐊᒻᒪ ᖁᒻᒧᒃᑎᑕᐅᓯᒪᔪᒧᑦ ᐃᑲᔫᑎᒃᓴᒃᑲᓐᓂᐅᓇᔭᖅᑐᒥᒃ ᓄᓇᕕᒃᒥᑦ ᖃᕋᓴᐅᔭᒃᑰᕈᓐᓇᐅᑎᖓ ᐊᖏᒡᓕᒋᐊᕈᓐᓇᖁᓪᓗᒍ 2021 ᑎᑭᓚᐅᕐᑎᓐᓇᒍ.
• ᐃᐊᑎ ᐅᐊᑖᓗᑐᒃ, ᓄᓇᕕᒃᒥᐅᑕᖅ ᐃᓄᒃ ᑯᕆᐊᓐ ᐅᓇᑕᕐᔪᐊᕐᓴᒥᑦ ᐃᓚᐅᓂᑯ, ᐅᓇᑕᖅᑐᒃᓴᓂᒃ ᓇᓗᓇᐃᒃᑯᑎᑖᕐᓂᐊᕐᑐᖅ ᐃᓗᕕᖅᑕᐅᕝᕕᐊᓂᒃ ᐅᒥᐅᔭᕐᒥ, ᖁᔭᓐᓇᒥᒃ ᐅᓇᑕᖃᑕᐅᔪᕕᓂᖅ ᓄᓇᖃᑎᖓ ᑖᔅᓱᒥᖓ ᐱᓇᓱᓚᐅᕐᓂᖓᓂᒃ. ᐅᓇ ᓇᓗᓇᐃᒃᑯᑎ ᐋᕿᒃᑕᐅᓂᐊᕐᑐᖅ ᐅᑯᓇᙵᑦ Last Post Fund 2019-ᒥᑦ. ᐅᐃᑖᓗᑐᒃ ᐃᓅᔪᓐᓃᓚᐅᕐᓯᒪᔪᖅ 2005-ᒥᑦ 73-ᓂ ᐅᑭᐅᖃᓕᖅᖢᓂ.
• ᑯᐸᐃᒃᒥᑦ ᐃᖅᑲᖅᑐᐃᕕᒡᔪᐊᕐᒧᑦ ᐃᖅᑲᖅᑐᐃᔨ ᐋᕿᒃᓯᓚᐅᕐᑐᖅ ᑰᔾᔪᐊᕐᒥᐅᑕᖅ ᐊᕐᓇᖅ ᐃᖅᑲᖅᑐᖅᑕᐅᔾᔪᑎᐊᓂᒃ ᐱᐊᓂᒃᓯᔭᕆᐊᖃᙱᓐᓂᖓᓂᒃ ᑭᓯᐊᓂ ᐃᓂᖃᖅᑎᑕᐅᓕᕈᓂ ᑲᒪᒋᔭᐅᕝᕕᒃᓴᖓᓂᒃ ᑎᒍᔭᐅᓯᒪᔭᕆᐊᖃᕐᓂᖓ ᐃᓱᓕᒐᓱᖕᓂᖓᓂᒃ ᓄᓇᕕᒃᒥᑦ. ᐅᓇ ᓴᕿᑎᑦᑎᒻᒪᕆᒃᑐᖅ ᐊᑯᑦᑐᔫᑎᐅᓂᖏᓐᓂᒃ ᐱᕋᔭᒃᓯᒪᔪᓕᕆᓂᐅᑉ ᓄᓇᕕᒃᒥᑦ, ᐅᕝᕙᓘᓐᓃᑦ ᐱᑕᖃᙱᓗᐊᕐᓂᖓᓂᒃ, ᐃᒪᓐᓇ ᐱᕋᔭᒃᓯᒪᔪᑦ ᓄᓇᖏᑦᑕ ᓯᓚᑖᓅᕆᐊᖃᕐᓂᖏᓐᓂᒃ ᑎᒍᔭᐅᓯᒪᔾᔪᑎᖏᓐᓄᑦ.

ᕘᔅᑦ ᐃᐅᑯᓐᓄᑦ ᐃᒃᓯᕙᐅᑕᖅ ᔮᓂ ᐋᑕᒻᔅ, ᓴᐅᒥᐊᓂᒃ, ᐊᔾᔨᖃᖃᑎᖃᖅᑐᖅ ᐃᓄᕕᐊᓗᐃᑦ ᐊᕕᒃᑐᕐᓯᒪᓂᒃᑯᑦ ᑯᐊᐳᕇᓴᓐ ᐃᒃᓯᕙᐅᑕᖓᓂᒃ ᑐᐃᓐ ᓯᒥᑦ ᒪᓐᑐᕆᐊᒥᑦ ᓯᑎᐱᕆ 28-ᒥᑦ ᑖᒃᑯᐊᒃ ᒪᕐᕈᒃ ᖃᖓᑕᓲᒃ ᐊᖏᕈᑎᒥᒃ ᐊᑎᓕᐅᕐᑎᓪᓗᒋᑦ ᑲᑎᑎᓐᓂᐊᕐᓗᒋᑦ ᕘᔅᑦ ᐃᐅ ᐊᒻᒪ ᑲᓃᑎᐊᓐ ᓄᐊᑦ ᐊᑕᐅᓯᐅᓕᕐᓗᑎᒃ ᐅᑭᐅᕐᑕᖅᑐᕐᒥᑦ ᖃᖓᑕᓲᖑᕐᓗᑎᒃ. (ᐊᔾᔨᙳᐊᖅ ᒪᑭᕝᕕᒃᑯᓐᓂᑦ)

ᓯᑎᐱᕆ
• ᑲᑎᕝᕕᒃ ᓄᓇᓕᖕᓂ ᐃᒡᓗᓕᕆᔨᖏ ᑲᔪᓯᔪᒪᔪᑦ ᐊᓂᑦᑎᑲᑕᖕᓂᕐᒥᑦ ᐃᒡᓗᓂ ᐊᑐᖅᑐᐊᕐᓂᕐᒧᑦ ᐊᑭᓕᕐᓱᐃᙱᑦᑐᓂᒃ 2018-ᒥᑦ, ᐊᕐᕌᒍ 2017-ᒥᑦ ᐊᓂᑦᑎᔪᒪᑲᑕᙱᐊᓪᓚᓚᐅᕐᖢᑎᒃ. ᑲᑐᔾᔨᖃᑎᒌᑦ ᐱᒋᐊᖅᑎᑦᑎᕗᑦ ᐃᒡᓗᒧᑦ ᐊᑭᓕᕐᓱᐃᓂᕐᒥᒃ ᐅᔾᔨᕈᓱᓕᖅᑎᑦᑎᒐᓱᖕᓂᕐᒥᒃ, ᑖᒃᑯᓂᖓ ᐃᖅᑲᓇᐃᔭᖅᑎᐅᔪᓂᒃ ᐃᒡᓗᓕᕆᔨᓄᑦ ᑲᑎᖃᑎᖃᑲᑕᒡᓗᑎᒃ ᐃᒡᓗᓂ ᐊᑐᖅᑐᐊᖅᑐᓂᒃ ᖃᓄᖅ ᐊᑭᓕᕐᓱᐃᕙᓪᓕᐊᔪᓐᓇᕐᓂᕐᒥᒃ ᐊᓂᑕᐅᙱᑦᑐᓐᓇᕐᓂᐊᕐᒪᑕ.
• ᖃᓄᐃᑲᑕᕈᓘᔭᓕᕐᑐᑦ ᓄᓇᕕᒃᒥᑦ ᐊᖓᔪᖅᑲᐅᑏᑦ ᐅᓇ ᓱᐴᖅᑐᒐᖅ ᐊᑐᐃᓐᓇᐅᓕᕐᓂᐊᕐᑎᓪᓗᒍ ᑲᓇᑕᓕᒫᒥᑦ, ᓂᐅᕕᕐᕕᐅᔪᓐᓇᕐᑐᓂᒃ ᐋᕿᒃᓯᓯᒪᙱᒃᑲᓗᐊᕐᑎᓪᓗᒋᑦ ᓄᓇᕕᒃᒥᑦ. ᓄᓇᕕᒻᒥᐅᑦ ᐃᓱᒫᓘᑎᖃᖅᑐᑦ ᐃᓅᓱᒃᑐᑦ ᐃᓱᒪᕐᓲᑎᖃᕐᓂᐊᕐᓂᖏᓐᓂᒃ ᓱᐴᖅᑐᒐᕐᓂᒃ ᐊᒻᒪᓗ ᐊᒃᑐᐃᒍᑎᐅᔪᓐᓇᖅᑐᓂᒃ ᓱᐴᖅᑐᒐᕐᒧᑦ ᐱᕈᖅᐸᓪᓕᐊᔪᓄᑦ ᖃᕋᓴᕐᓄᑦ.
• ᑯᐸᐃᒃ ᐊᕕᒃᑐᕐᓯᒪᓂᒃᑯᑦ ᓂᕈᐊᒐᒃᓴᓕᕆᓂᖓ ᓯᕗᓪᓕᖅᐹᒥᑦ ᐊᑐᕐᓂᖃᖅᐳᑦ: ᒪᕐᕉᒃ ᐃᓅᒃ ᐊᕐᓈᒃ ᓂᕈᐊᒐᒃᓴᐅᓪᓗᑎᒃ. ᐊᓖᓴ ᑕᕿᐊᐱᒃ, ᓄᓇᓕᖕᓄᑦ ᐃᖅᑲᓇᐃᔭᖅᑎ ᑰᔾᔪᐊᕌᐱᒃᒥᑦ, ᓂᕈᐊᒐᒃᓴᐅᔪᖅ ᑭᒡᒐᖅᑐᐃᓪᓗᓂ Québec Solidaire ᐅᖓᕙᒧᑦ, ᐅᓇᓕ ᒨᓇ ᐱᐊᓘ, ᐃᖃᓗᖕᓂ ᓄᓇᖃᕐᓂᑯ, ᐊᓐᑏᐲᑯᓐᓄᑦ ᓂᕈᐊᒐᒃᓴᐅᓪᓗᓂ ᓱᐴᒥᑦ (Chauveau) ᑯᐸᐃᒃ ᓯᑎᐅᑉ ᓯᓚᑎᑦᑎᐊᖓᓂ.
• 20 ᐃᓕᓐᓂᐊᖅᑎᐅᔪᑦ ᐱᒋᐊᓕᕐᐳᑦ ᓄᓇᕕᒃ ᓯᕗᓂᑦᓴᕗᑦᒥᑦ, ᒪᓐᑐᕆᐊᒥᑦ ᓯᓚᑦᑐᖅᓴᕐᕕᒃ ᐊᐅᓚᑕᐅᔪᖅ ᑲᑎ?ᒃ ᐃᓕᓴᕐᓂᓗᕆᓂᒃᑯᓐᓂᑦ ᐊᒻᒪ ᐋᕿᒃᓯᒪᓪᓗᓂ ᓄᓇᕗᒥᑦ ᐊᐅᓚᑕᐅᔪᒥᑦ ᐋᑐᕚᒥᑦ. 2018 ᐊᐃᑉᐸᕆᓕᕐᐸᖓ ᐃᓕᓐᓂᐊᕆᐊᕐᕕᕙᒃᖢᓂ ᐊᒻᒪᓗ ᐱᓕᕆᐊᖑᑐᐃᓐᓇᐅᔪᓐᓃᕐᖢᓂ ᑭᓯᐊᓂᓕ ᐃᓕᓐᓂᐊᕐᕕᒻᒪᕆᐅᓕᕐᖢᓂ.
• ᒪᕐᕉᒃ ᑲᓇᑕᒥ ᐊᖏᓂᖅᐹᒃ ᐃᓄᖕᓄᑦ ᓇᖕᒥᓂᕆᔭᐅᔫᒃ ᖃᖓᑕᓲ ᐅᖃᕐᐳᒃ ᐊᑕᐅᓯᐅᓂᐊᕐᓂᕋᓕᖅᖢᑎᒃ. ᓄᓇᕕᒃᒥᑦ ᒪᑭᕝᕕᒃ ᑯᐊᐳᕇᓴᓐᑯᑦ ᓇᖕᒥᓂᖃᖅᑎᐅᔪᑦ ᕘᔅᑦ ᐃᐅᒥᑦ, ᐊᒻᒪ ᐃᓄᕕᐊᓗᐃᑦ ᐊᕕᒃᑐᕐᓯᒪᓂᒃᑯᑦ ᑯᐊᐳᕇᓴᓐ, ᓇᖕᒥᓂᖃᖅᑎᐅᔪᑦ ᑲᓃᑎᐊᓐ ᓄᐊᑦᒥᑦ, ᐊᑎᓕᐅᓚᐅᕐᐳᑦ ᐊᖏᕈᑎᒥᒃ ᓯᑎᐱᕆ 28-ᒥᑦ, ᐅᖃᖅᖢᑎᒃ ᐋᕿᒃᓯᓂᖏᓐᓂᒃ ᐊᑕᐅᓯᕐᒥᒃ “ᖃᖓᑕᓲᓕᕆᔨᒻᒪᕆᒃ ᐅᑭᐅᕐᑕᖅᑐᕐᒥᑦ.”
ᐅᒃᑑᐱᕆ
• ᑯᐸᐃᒃᒥᐅᑕᑦ ᓄᑖᒥᑦ ᓂᕈᐊᕐᐳᑦ ᐆᒧᖓ Coalition Avenir Québec ᒐᕙᒪᒧᑦ ᐅᒃᑑᐱᕆ 1-ᒥᑦ, ᐊᐅᓚᑕᐅᓪᓗᓂ ᓯᕗᓕᐅᕐᑎᒧᑦ ᕗᕌᓐᓱᐊ ᓕᒎᑦᒧᑦ. ᓄᓇᕕᒃ ᓄᑖᒥᑦ ᑭᒡᒐᖅᑐᐃᔨᑖᕐᒥᔪᑦ ᓄᓇᖃᖅᑳᖅᑐᑦ ᑲᑎᒪᔨᖏᓐᓄᑦᑕᐅᖅ. ᐅᖓᕙᒧᑦ MNA ᑕᓂᔅ ᓚᒫᑦ, ᑯᐸᐃᒃᒧᑦ ᐸᓖᓯᐅᓂᑯ ᓄᓇᕕᒃᒥᑦ ᓴᓇᓂᑰᓪᓗᓂ.
• ᐊᒥᓲᓛᓂᒃ ᐃᒻᒥᓃᖅᑐᖃᓚᐅᕐᑎᓪᓗᒍ 2018-ᒥᑦ—ᐊᒥᓱᑦ ᐃᓅᓱᒃᑐᑦ ᐃᓄᐃᑦ—ᓄᓇᕕᒃᒥᑦ ᐃᓕᓐᓂᐊᖅᑐᓕᕆᓂᕐᒧᑦ ᑲᑎᒪᔨᐅᔪᑦ ᑐᐊᕕᕐᓇᖅᑐᒥᑦ ᑲᑎᒪᑎᑦᑎᕗᑦ ᐊᕕᒃᑐᕐᓯᒪᓂᒃᑯᑦ ᑲᑐᔾᔨᖃᑎᒌᓂᒃ ᐋᕿᒃᓱᐃᓂᐊᕐᓗᑎᒃ ᖃᓄᐃᓕᐅᕈᑎᒃᓴᓂᒃ. ᑲᑎᕝᕕᒃ ᐃᓕᓴᕐᓂᓕᕆᓂᖅ ᐅᖃᖅᑐᑦ ᓇᖕᒥᓂᖅ ᐃᓕᓐᓂᐊᕐᑎᖏᑦ ᐃᖅᑲᓇᐃᔭᖅᑏᓪᓗ ᖁᐊᕐᓵᕐᓯᒪᓂᖏᓐᓂᒃ ᐊᒻᒪᓗ ᖃᓄᐃᓕᐅᖁᔨᓯᒪᓕᖅᖢᑎᒃ.
• ᓄᑖᖅ ᐅᓂᒃᑳᖅ ᐋᕿᒃᓱᖅᑕᐅᓂᑯ ᑯᐸᐃᒃᒥ ᖃᐅᔨᓴᕐᑎ ᒐᕙᒪᒃᑯᓐᓂ ᑯᐸᐃᒃᒥ ᐃᑲᔪᖅᑐᐃᓂᕐᓴᐅᖁᔨᕗᖅ ᓄᓇᕕᒃᒥᑦ ᐃᓕᓐᓂᐊᕐᓂᓕᕆᔨᓂᒃ, ᑲᑎᕝᕕᒃ ᐃᓕᓴᕐᓂᓕᕆᓂᒃᑯᓐᓂᒃ, ᐱᐅᓯᕚᓪᓕᖅᑎᑦᑎᓂᒃᑯ ᐃᓕᓐᓂᐊᖅᑐᓕᕆᓂᕐᒥᒃ ᓄᓇᕕᒃᒥᑦ. ᐅᓂᒃᑳᑦ ᐅᖃᕐᓯᒪᔪᑦ ᐱᑕᖃᙱᓗᐊᕐᓂᖓᓂᒃ ᐃᓄᒃᑎᑐᑦ ᐃᓕᓐᓂᐊᕈᑎᒃᓴᓂᒃ ᐊᒻᒪ ᖁᕝᕙᕆᐊᕈᑎᒃᓴᒃᑲᓐᓂᕐᓂᒃ, ᐃᓕᓴᐃᔨᑕᖃᙱᓗ­ᐊᕐᓂᖓᓂᒃ ᐊᒻᒪ ᐃᒡᓗᐃᑦ ᐃᓄᒋᐊᓗᐊᖃᑦᑕᕐᓂᖏᓐᓂᒃ ᓄᓇᕕᒃᒥᑦ.
• ᑲᑎᕝᕕᒃ ᓄᓇᓕᖕᓂ ᐃᒡᓗᓕᕆᔨᒃᑯᑦ ᐊᓂᑦᑎᕗᑦ 33-ᓂᒃ ᐃᒡᓗᓂᒃ ᐊᑐᖅᑐᐊᕐᑐᓂᒃ ᐃᖅᑲᖅᑐᐃᕕᒃᑯᑦ ᓇᓗᓇᐃᒃᑯᑎᑎᒍᑦ ᐊᑭᓖᙱᒃᑯᑎᒃ ᐊᓂᑕᐅᓂᐊᕐᓂᕋᕐᓯᒪᔪᓂᒃ. ᐃᒡᓗᓂᒃ ᐊᑐᖅᑐᐊᕐᑐᑦ ᐊᓂᑕᐅᓕᒑᔪᑦ ᑕᒪᑐᒪᓂ ᐅᑭᐅᕐᒥᒃ, ᐊᑭᓕᒃᓴᖃᖅᑐᑦ ᒫᙵᑦ $1,300-ᓂᑦ $55,000 ᐅᖓᑖᓄᑦ.

ᑲᑎᕝᕕᒃ ᓄᓇᓕᓕᒫᑦ ᒐᕙᒪᖓᓄᑦ ᓄᑖᖅ ᓂᕈᐊᖅᑕᐅᒃᑲᓐᓂᕐᑐᖅ ᐃᒃᓯᕙᐅᑕᖅ ᔭᓂᕗ ᒥᐅᓂᒃ, ᐅᕙᓂ ᐊᔾᔨᖃᖅᑐᖅ ᓄᕕᐱᕆ 27-ᒥᑦ ᕿᑎᐊᓃᑦᑐᖅ; ᓴᐅᒥᐊᓃᑦᑐᕐᓕ ᑐᒡᓕᖓ ᕼᐃᐊᑕ ᓯᓅᐹᓪ. ᑐᓄᐊᓃᑦᑐᑦ, ᓴᐅᒥᐊᓂᒃ, ᐊᐅᓚᑦᑎᔨᓄᑦ ᐃᓚᒋᔭᐅᔪᑦ ᓵᓕ ᐊᕐᖓᒃ, ᔫᐱ ᑕᕿᐊᐱᒃ ᐊᒻᒪ ᓴᐃᕈᓕ ᐅᐃᑖᓗᒃᑐᒃ. (ᐊᔾᔨᓕᐅᕆᔨ ᓴᐃᕋ ᕌᔾᔪᔅ)

ᓄᕕᐱᕆ
• ᑯᐸᐃᒃᒥᑦ ᕙᐃᓐᔅ ᑲᒥᓴᓐ (Viens commission), ᕿᒥᕐᕈᐊᖅᑎᑕᐅᔪᑦ ᖃᓄᖅ ᐃᓚᖏᑦ ᓄᓇᖃᖅᑳᖅᑐᑦ ᐱᔨᑦᑎᕋᖅᑕᐅᓯᒪᖕᒪᙶᑦ ᒐᕙᒪᒃᑯᑦ ᐱᓕᕆᐊᖏᑦᑎᒍᑦ, ᑐᙵᓱᒃᑎᑦᑎᔨᐅᓚᐅᕐᐳᑦ ᑰᔾᔪᐊᕌᐱᒃᒥᑦ ᐊᒻᒪ ᑰᔾᔪᐊᖅᒥᑦ ᑲᑎᕐᓱᐊᕙᓪᓕᐊᑎᓪᓗᒋᑦ ᐅᖃᐅᔨᕐᓂᒃ ᓄᓇᕕᒻᒥᐅᓂᒃ. ᐅᖃᐅᓯᐅᓚᐅᕐᑐᑦ ᐃᓚᖃᓚᐅᕐᑐᖅ ᐆᒥᖓ, ᐃᓄᒃᔪᐊᒃᒥᐅᑕᑦ ᐃᓚᒌᑦ ᐊᓯᐅᔨᓚᐅᕐᓯᒪᓂᖏᓐᓂᒃ ᐊᓈᓇᐅᔪᖅ ᓄᓕᐊᕆᔭᐅᔪᕐᓗ, ᐄᕙ ᑯᓗᓚ-ᐅᒃᐱᒃ, ᐃᓅᔪᓐᓃᓚᐅᕐᓯᒪᑎᓪᓗᒋ ᐃᒍᓇᕐᒥ ᑐᖁᓐᓇᖅᑐᖃᖅᑐᒥᒃ ᐋᓐᓂᐊᖓ ᑕᒻᒪᖅᑕᐅᓚᐅᕐᑎᓪᓗᒍ ᖃᓄᐃᒋᐊᒃᓴᖓᓂᒃ ᓄᓇᓕᖕᓂᑦ ᐋᓐᓂᐊᕕᖕᒥᑦ.
• ᑲᑎᕝᕕᒃ ᓄᓇᓕᓕᒫᑦ ᐸᓖᓯᒃᑯᑦ ᐊᖓᔪᖅᑳᖓ ᔮᓐ-ᐱᐊᕐ ᓚᕉᔅ ᐸᓖᓯᓕᕆᓂᕐᒥᒃ ᑐᓂᓯᔪᒪᑐᐃᓐᓇᓕᕐᐳᖅ ᑯᐸᐃᒃ ᐸᓖᓯᖏᓐᓄᑦ, ᒐᕙᒪᑐᖃᒃᑯᑦ ᐊᒻᒪ ᑯᐸᐃᒃ ᒐᕙᒪᖓ ᐋᕿᒃᓯᐊᓂᒍᓐᓇᔾᔮᙱᒃᑯᑎᒃ ᐃᑲᔫᑎᒃᓴᓄᑦ ᐊᖏᕈᑎᓂᒃ, ᑖᓐᓇ ᐃᓱᓕᓚᐅᕐᓯᒪᑎᓪᓗᒍ ᐄᐳᕉᓚᐅᕐᓯᒪᔪᒥᒃ. ᓚᕉᔅ ᐅᖃᓚᐅᕐᑐᖅ ᐅᑯᐊ KRPF-ᑯᑦ ᐃᑲᔫᑎᒃᓴᖏᑦ ᓄᖑᓯᒪᓂᕋᖅᖢᒋᑦ ᐊᒻᒪ ᓲᕐᓗ “ᐆᒻᒪᖁᑎᒧᑦ ᐃᑲᔪᖅᑕᐅᑐᐃᓐᓇᖅᖢᑎᒃ.”
• ᑲᑎᕝᕕᒃ ᓄᓇᓕᓕᒫᑦ ᒐᕙᒪᖓᓄᑦ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦ ᓂᐳᖃᖅᐳᑦ ᐃᖅᑲᓇᐃᔭᙱᓕᕐᓂᐊᕐᓗᑎᒃ ᓄᕕᐱᕆ 26-ᒥᑦ. ᑲᑐᔾᔨᖃᑎᒌᑦ, ᑲᒪᒋᔭᖃᖅᑐᑦ 200 ᐅᖓᑖᓂᒃ ᐃᖅᑲᓇᐃᔭᖅᑎᓂᒃ ᓄᓇᕕᐅᑉ ᐊᕕᒃᑐᕐᓯᒪᓂᒃᑯᑦ ᐊᐅᓚᑦᑎᔨᖏᓐᓂᒃ, ᐃᑲᔪᕋᓱᓯᕗ ᑖᒃᑯᓂᖓ ᑖᒃᑯᐊ ᐊᕐᕌᒍᓂᒃ ᐱᖓᓱᓂᒃ ᑳᓐᑐᕌᖃᕈᓐᓃᕐᓯᒪᓕᕐᑎᓪᓗᒋᑦ.
• ᑲᑎᕝᕕᒃ ᓄᓇᓕᓕᒫᑦ ᒐᕙᒪᖓᓄᑦ ᑲᑎᒪᔩᑦ ᓂᕈᐊᒃᑲᓐᓂᕐᐳᑦ ᐃᒃᓯᕙᐅᑕᐅᕋᑖᖅᑐᒥᒃ ᔭᓂᕗ ᒥᐅᓂᒃᒥᑦ ᐊᐃᑉᐸᖓᓂ ᐃᒃᓯᕙᐅᑎᐅᓂᐊᕐᓗᓂ ᓄᕕᐱᕆ 27-ᒥᑦ. ᒥᐅᓂᒃ ᓂᕈᐊᖅᑕᐅᒃᑲᓐᓂᓚᐅᙱᑦᑐᖅ ᓄᓇᓕᖕᓄᑦ ᑲᑎᒪᔨᒃᓴᐅᓂᕐᒧᑦ ᓄᓇᖓᓂᒃ ᑰᔾᔪᐊᕐᒥᑦ, ᑭᓯᐊᓂᓕ ᒪᓕᒐᖃᕐᒪᑕ ᑲᑎᕝᕕᒃᑯᑦ ᐱᖁᔭᕐᔪᐊᖓ ᐱᔪᓐᓇᕐᓂᖃᖅᑎᑦᑎᓪᓗᓂ ᐃᒃᓯᕙᐅᑕᑦ ᓂᕈᐊᒐᒃᓴᐅᒃᑲᓐᓂᕈᓐᓇᕐᓂᖏᓐᓂᒃ. ᕼᐃᐅᑕ ᓯᓅᐹᓪ ᑲᖏᓱᐊᓗᒡᔪᐊᖅᒥᐅᑕᖅ ᓂᕈᐊᖅᑕᐅᕗᖅ ᑲᑎᕝᕕᒃ ᓄᓇᓕᓕᒫᑦ ᒐᕙᒪᖓᓄᑦ ᐃᒃᓯᕙᐅᑕᕐᒧᑦ ᑐᒡᓕᕆᔭᐅᓂᐊᓕᕐᓗᓂ.

ᓘᓯ ᒍᕇ, ᐃᓄᖕᓂᑦ ᖃᐅᔨᒪᑎᑦᑎᔨᐅᔪᖅ ᐅᑯᓄᖓ ᕕᐃᓐᔅ ᑲᒥᓴᓐᑯᓐᓄᑦ, ᓴᙱᔪᒥᒃ ᐅᖃᐅᓯᖃᖅᐳᑦ ᖃᐅᔨᓇᓱᖕᓂᕐᒧᑦ ᐱᓕᕆᐊᖃᖅᑎᓪᓗᒋᑦ ᑰᔾᔪᐊᕐᒥᑦ ᓄᕕᐱᕆᐅᑉ ᓄᙳᐊᓂ. (ᐊᔾᔨᓕᐅᕆᔨ ᓴᐃᕋ ᕌᔾᔪᔅ)

ᑎᓯᐱᕆ
• ᒫᓂ ᑕᕿᑦ 9 ᓇᓪᓕᖅᑎᓪᓗᒋᑦ ᐅᑯᐊ ᑕᐃᓱᔅ ᓱᑲᑎᑦᑎᔾᔪᑏᑦ ᐊᑐᖅᑕᐅᓕᓚᐅᕐᑎᓪᓗᒋᑦ ᑎᓴᒪᓄᑦ ᑲᑎᕝᕕᒃᒥᑦ ᐊᕕᒃᑐᕐᓯᒪᓂᒃᑯᑦ ᐸᓖᓯᓄᑦ ᓄᓇᕕᒃᒥᑦ—ᓄᖃᖅᑎᑦᑎᕚᓪᓕᕈᑎᐅᓇᓱᒃᖢᓂ ᐱᑦᑎᐊᙱᓗᐊᖅᑐᓄᑦ—ᐸᓖᓯᒃᑯᑦ ᐅᖃᕐᓯᒪᔪᑦ ᐊᑕᐅᓰᖅᖢᑎᒃ ᑕᐃᒪᐃᑦᑐᒥᑦ ᐊᑐᓚᐅᕐᓯᒪᓂᕋᖅᑐᑦ. ᐱᔾᔪᑎᖓᓪᓕ? ᑕᒪᒃᑯᐊ ᐊᓐᓄᕌᓄᑦ ᐃᔾᔪᔪᓄᑦ ᓱᕙᓕᑭᐊᖑᖕᒪᑕ ᒪᑯᑎᑐᓇᖅ ᖁᓕᑦᑕᐅᔭᑎᑐᑦ.
• ᐃᑲᔪᕐᑕᐅᓪᓗᑎᒃ ᐋᔩᖅᑎᒥᒃ, ᑲᑎᕝᕕᒃ ᓄᓇᓕᓕᒫᑦ ᒐᕙᒪᖓᑕ ᐊᐅᓚᑦᑎᔨᖏᑦ ᐊᒻᒪ 200 ᐅᖓᑖᓃᑦᑐᑦ ᐃᖅᑲᓇᐃᔭᖅᑎᓄᑦ ᑲᑐᔾᔨᖃᑎᒌᓄ ᐃᓚᒋᔭᐅᔪᑦ ᐊᖏᖃᑎᒌᑕᐃᓐᓇᓚᐅᕐᐳᑦ ᐊᕐᕌᒍ ᐱᖓᓱᑲᓴᖕᓂᒃ ᑳᓐᑐᕌᓕᕆᐊᓪᓚ­ᓚᐅᕐᑎᓪᓗᒋᑦ. ᑲᑐᔾᔨᖃᑎᒌᓄᑦ ᐃᓚᒋᔭᐅᔪᑦ “ᖁᕕᐊᓱᖕᓂᕋᖅᖢᑎᒃ” ᐊᖏᖃᑎᒌᒍᑎᒥᒃ, ᑭᓯᐊᓂᓕ ᓇᓗᓇᐃᓚᐅᕐᑐᑦ ᑖᒃᑯᐊ ᐱᓕᕆᐊᖃᓵᖅᑐᑦ ᐅᑎᓛᕐᓂᖏᓐᓂᒃ ᐋᔩᖃᑎᒌᖃᑎᖃᒃᑲᓐᓂᕐᓂᐊᕐᓗᑎᒃ ᑕᕿᑦ 9 ᐊᓂᒍᖅᐸᑕ.