ᑭᙵᓂᑦ ᑎᑎᕋᐅᔭᒐᖅᑏᑦ ᑕᑯᑎᑦᑎᕗᑦ ᑎᑎᕋᐅᔭᒐᕐᓂᒃ ᐱᓕᕆᐊᖃᖅᑎᓪᓗᒋᑦ

ᑕᒪᑐᒪᓂ ᑕᖅᑭᕐᒥᑦ 62-ᒋᓕᖅᑕᖓᓂ ᑭᙵᐃᑦ ᑎᑎᕋᐅᔭᒐᖃᑦᑕᖅᑕᖏᓐᓄᑦ ᕿᒥᕐᕈᐊᒐᖅ ᓴᖅᑭᓐᓂᖅᑐᖅ

By ᑕᐃᕕᑦ ᕕᐊᓐ
ᓄᓇᓕᖕᓂ ᑐᓴᒐᒃᓴᓕᐅᕐᑎᐅᓂᕐᒧᑦ ᐱᓕᕆᐊᒃᓴᓄᑦ ᑐᓴᒐᒃᓴᓕᐅᕐᑎ

For an English version of this story, see Kinngait artists allow peek behind the printmaking curtain

ᑭᙵᐃᑦ — ᐃᓚᖓᓂᒃ ᕿᓐᓄᐊᔪᐊᒃ ᐃᓕᖅᑯᓯᓕᕆᕝᕕᒃᒥᑦ ᐊᒻᒪ ᑎᑎᕋᐅᔭᒐᕐᕕᒃᒥᑦ, ᑎᑎᕋᐅᔭᒐᖅᑎ ᖁᕕᐊᓇᖅᑐᖅ ᐳᓪᓚᑦ ᑎᑎᕋᐅᔭᒐᖅᑕᖓᓂᒃ ᐱᓕᕆᐊᖃᕐᑐᖅ ᖃᕝᕕᒑᕐᔪᙳᐊᕐᒥ, ᐅᓄᖅᑐᒻᒪᕆᐊᓗᖕᓂ ᒥᑭᑦᑐᓂᒃ ᑐᑭᓕᐊᖅᑐᓂᒃ ᑎᑎᕐᓯᒪᐅᖅᖢᓂ ᒥᖅᑯᙳᐊᖓᓄ.

ᑖᔅᓱᒪ ᐊᓯᙶᖓᓂ, ᐅᓇ ᑎᑎᕋᐅᔭᒐᕐᓂᒃ ᐊᒥᐊᕆᔨ ᓂᕕᐊᕐᓯ ᖁᕕᐊᓇᖅᑐᓕᐊᖅ ᐱᓕᕆᐊᖃᖅᑐᖅ ᑎᑎᕋᐅᔭᒐᖅᑕᐅᓯᒪᔪᓂᒃ ᐸᐃᑉᐹᓄᐊᖅᑎᑦᑎᑲᑕᒃᖢᓂ, ᑖᒃᑯᐊᓗ ᐃᓚᖏᑦ ᐊᐅᓪᓚᖅᑎᑕᐅᓂᐊᖅᖢᑎᒃ ᑐᕌᓐᑐᒧᑦ, ᐅᑯᓄᖓ Dorset Fine Arts.

ᐅᓪᓗᒥ ᓯᑎᐱᕆ 7 ᐊᒻᒪᓗ ᑕᐃᒪᓐᓇᑦᑕᐃᓐᓇ ᐊᓯᖏᑦᑎᑐᑦ ᐅᓪᓘᓪᓗᓂ ᑕᕝᕙᓂ ᑎᑎᕋᐅᔭᒐᖅᕕᒃᒥᑦ. ᒪᕐᕉᒃ ᑎᑎᕋᐅᔭᒐᖅᑏᑦ ᐱᓕᕆᐊᖅᑲᖅᑑᑦ ᐅᑯᓄᖓ ᑯᐊᐸᒃᑯᑦ ᑭᙵᐃᑦ ᓴᓇᐅᒐᓕᐅᕐᕕᖓᓂᒃ, ᑖᓐᓇᓕ ᐱᓕᕆᕝᕕᐅᓯᒪᓕᖅᖢᓂ ᐊᕐᕌᒍᑦ 50 ᐅᖓᑖᓂᒃ. ᑕᒪᑐᒪᓂ ᑕᖅᑭᒥ, ᑯᐊᐸᒃᑯᑦ ᓴᖅᑭᑎᑦᑎᓂᐊᕐᒪᑕ 62-ᒋᓕᖅᑕᖓᓂᒃ ᕿᒥᕐᕈᐊᒐᕐᒥᒃ ᑭᙵᐃᑦ ᐊᕐᕌᒍᒥ ᑲᑎᕐᓱᒐᕆᔭᖏᓐᓂᒃ, ᑖᓐᓇ ᐱᖃᕐᓂᐊᖅᑐᖅ 50-ᓂ ᑕᕐᕋᓕᐊᓂᒃ 32-ᓂ ᓴᓇᔭᐅᓯᒪᔪᓂᒃ 13-ᓄᑦ ᓴᓇᐅᒐᓕᐅᖅᑎᓄᑦ.

“ᑭᙵᐃᑦ ᖃᐅᔨᒪᔭᐅᖕᒪᑦ ᑎᑎᕋᐅᔭᒐᖅᑎᓂᒃ ᐱᑕᖃᓛᖑᓂᖓᓂᒃ ᑲᓇᑕᒥ,” ᐅᖃᖅᑐᖅ ᐊᐅᓚᑦᑎᔨᐅᑉ ᐃᑲᔪᖅᑎᖓ ᔫᒥ ᑕᒃᐸᐅᖓᐃ ᖃᖓᑦᑎᐊᓵᖅ ᐊᐱᖅᓱᖅᑕᐅᑎᓪᓗᒍ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ. “ᖃᐅᔨᒪᔭᐅᑦᑎᐊᐸᓗᖕᒪᑦ ᑎᑎᕋᐅᔭᒐᖅᑎᖏᓐᓄᑦ ᓲᖃᐃᒻᒪ ᑕᐃᒪᐃᓕᐅᕐᓯᒪᓕᕐᑐᖅ 60 ᐃᓚᓪᓗᒍ ᐊᕐᕌᒍᓂᒃ.”

ᐳᓪᓚᑦ, ᓂᕈᐊᕐᓯᒪᔪᖅ ᖃᕝᕕᒑᕐᔪᒃᒥᑦ ᑎᑎᕋᐅᔭᒐᕈᒪᓪᓗᓂ ᐅᖃᖅᖢᓂ “ᐃᓄᑑᒃᑳᓘᒻᒪ,” ᓄᖃᓚᐅᕐᐸᒃᖢᓂ ᐃᒐᓛᒃᑯ ᓄᓇᓕᖕᓂ ᑕᑯᒋᐊᖅᐸᒃᖢᓂ ᐊᒻᒪᓗ ᓈᓚᐅᑎᓂᒃ ᑐᓵᓪᓗᓂ.

ᐊᕐᕌᒍᓂ ᑎᓴᒪᓂᒃ ᑎᑎᕋᐅᔭᒐᖃᑦᑕᓕᕐᑐᖅ ᑮᓇᐅᔭᓕᐅᕈᑎᒋᓪᓗᓂᐅᒃ, “ᑭᖑᕙᕋᓗᐊᖅᖢᓂ,” ᐅᖃᖅᑐᖅ. ᑖᔅᓱᒪᓗ ᑎᑎᕋᐅᔭᒐᖏ ᓴᖅᑭᔮᖅᑎᑕᐅᕙᒃᖢᑎᒃ ᐊᕐᕌᒍᒥᑦ ᑎᑎᕋᐅᔭᒐᐃᑦ ᐋᖅᑭᒃᓱᖅᑕᐅᓕᕌᖓᑕ ᑎᑎᕋᐅᔭᒐᕐᕕᒃᒥᑦ.

ᐱᓕᕆᐊᕆᔭᖏᓪᓕ ᓴᖅᑭᔮᖅᑎᑦᑎᔪᑦ ᖃᓄᐃᑦᑐᓂᒃ ᓂᕐᔪᑎᖃᕐᓂᖓᓂᒃ ᐅᑭᐅᕐᑕᖅᑐᕐᒥ.

ᑎᑎᕋᐅᔭᒐᕐᕕᖕᒦᖃᑦᑕᖅᑐᑦ ᐱᓇᓱᐊᕈᓯᓕᒫᖅ ᓇᒡᒐᔭᐅᒥ ᑕᓪᓕᕐᒥᕐᒧᑦ. ᐳᓪᓚᐅᑉ ᑎᑎᕋᐅᔭᒐᕐᓯᒪᔭᖓ ᑕᒪᑐᒪᓂ ᐊᕐᕌᒍᒧᑦ ᓄᐊᑕᐅᓯᒪᔪᓃᑦᑐ ᑕᐃᔭᖓ ‘ᕿᓚᓗᒐᐃᑦ ᐹᔪᒃ’ ᒪᕐᕉᒃ ᕿᓚᓗᒑᒃ ᑑᒑᖏᑦ ᐃᖕᒥᖕᓄᑦ ᕿᐱᓯᒪᓪᓗᑎᒃ.

ᐅᓇ ᐊᒥᐊᒐᒃᓴᙳᖅᑎᑕᐅᓚᐅᕐᑐᖅ ᖁᕕᐊᓇᖅᑐᓕᐊᖅᒧᑦ, ᑖᓐᓇ ᐊᒥᐊᒐᒃᓴᙳᖅᑎᑦᑎᔨᐅᓯᒪᓕᖅᑐᖅ ᐊᕐᕌᒍᓂ 31-ᓂ ᑕᕝᕙᓂ ᓴᓇᐅᒐᓕᐅᕐᕕᒃᒥᑦ.

ᑕᕝᕙᓂ ᐱᓕᕆᐊᖃᙱᑎᓪᓗᒍ ᖁᕕᐊᓇᖅᑐᓕᐊᖅ ᑭᒍᑎᓕᕆᔨᒧᑦ ᐃᑲᔪᖅᑎᐅᓚᐅᕐᓯᒪᔪᖅ, ᐃᓕᓴᐃᔨᓄᑦ ᐃᑲᔪᖅᑎᐅᓪᓗᓂ, ᕿᔪᓕᕆᔨᒧᑦ ᐃᑲᔪᖅᑎᐅᓪᓗᓂ, ᓂᐅᕕᕐᕕᒃᒥᑦ ᓂᐅᕕᖅᑎᐅᓪᓗᓂ ᐊᒻᒪᓗ ᐊᒃᑕᖅᑎᐅᓂᑰᓪᓗᓂ ᑖᔅᓱᒥᖓ ᐱᓕᕆᐊᖃᙱᑎᓪᓗᒍ ᐊᕐᕌᒍᑦ 31 ᓯᕗᓂᐊᓂ. ᖁᕕᐊᒋᓛᕆᔭᖓᓂ ᐱᓕᕆᐊᖓᓂᒃ ᐱᓕᕆᖃᑎᖃᖅᑎᓪᓗᒍ ᑎᑎᕋᐅᔭᒐᖅᑎᓂᒃ.

“ᐃᓄᐃᑦ ᐅᖃᖃᑦᑕᕐᒪᑦ, “ᖃᓄᐃᑉᐸᓕ ᖃᐅᔨᒪᔭᐅᑦᑎᐊᖅᑐᓂᒃ ᑎᑎᕋᐅᔭᒐᖅᑎᓂᒃ ᐱᓕᕆᖃᑎᖃᖅᖢᓂ?” ᖃᓄᐃᙱᑦᑎᐊᖅᑐᑦ ᐊᒻᒪ ᖁᕕᐊᓇᖅᐸᒃᖢᓂ ᐱᓕᕆᓪᓗᑕ,” ᐅᖃᖅᑐᖅ.

ᐅᖃᓚᐅᕐᑐᖅ ᐊᔪᕈᓐᓃᖅᓴᒃᑲᓐᓂᓂᐊᓚᐅᕐᓂᖓᓂᒃ ᐋᐸᑰᑭ, ᓂᐅ ᒪᒃᓯᑯᒥ 2020-ᒥ ᑭᓯᐊᓂᓕ ᓄᖃᖅᑎᑕᐅᓚᐅᕐᒪᑦ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᖅ ᐱᔾᔪᑎᒋᔭᐅᓪᓗᓂ.

“ᐅᕙᓐᓄᓪᓕ ᑕᒫᓂ 24 C ᐅᖂᓛᖑᖕᒪᑦ. ᑕᐅᓄᙵᕈᒪᓕ ᒫᓃᓐᓇᔭᖅᑐᖃᐃᑦ 50-ᖏᓐᓂ 60-ᖏᓐᓄ”, ᐅᖃᖅᑐᖅ ᐃᒡᓚᖅᖢᓂ.

ᓄᑲᖓ, ᓄᔭᓕᐊ ᖁᕕᐊᓇᖅᑐᓕᐊᖅ, ᐊᔪᕈᓐᓃᖅᓴᕐᒥᔪᖅ ᐊᒥᐊᕆᔭᒃᓴᐅᓕᖅᑎᑦᑎᓂᕐᒥᒃ ᑖᔅᓱᒪᙵᑦ. ᑕᒪᑐᒪᓂ ᑲᑎᕐᓱᖅᑕᐅᔪᓂᒃ, ᐊᒥᐊᕆᔭᒃᓴᓕᐅᓚᐅᕐᑐᖅ ᒪᕐᕉᖕᓂ ᑎᑎᕋᐅᔭᖅᑕᐅᔪᓂᒃ ᓂᖏᐅᑯᓗ ᑏᕖᒧ ᐊᒻᒪ ᐊᑕᐅᓯ ᐅᓘᓯ ᓴᐃᓚᒧᑦ.

ᐅᑯᐊ ᓴᖅᑭᔮᖅᑎᑕᐅᔪᑦ ᑲᑎᕐᓱᒐᓂᒃ, ᑕᒃᐸᐅᖓᐃ ᐅᖃᓚᐅᕐᑐᖅ, ᑐᓐᓂᖅᑯᑎᐅᓚᐅᕐᓯᒪᔪᑦ ᓯᑎᐱᕆ 2020-ᓗ ᔫᓂ 2021-ᓗ ᐊᑯᓐᓂᖓᓂᒃ.

“ᑎᑎᕋᐅᔭᒐᓕᐅᕐᕕᒃ ᖃᐅᔨᒪᔭᐅᑦᑎᐊᕐᒪᑦ ᐃᓄᖏᓐᓄᑦ…ᐱᓇᓱᑦᑎᐊᒻᒪᕆᒃᑲᑦᑕ ᑎᑐᕋᐅᔭᒐᕐᓂᒃ ᓂᐅᕐᕈᑎᖃᕋᓱᒃᖢᑕ,” ᐅᖃᖅᑐᖅ.

Share This Story

(0) Comments

Join the Conversation

Your email address will not be published. Required fields are marked *

*