ᑯᐸᐃᒃᒥᑦ ᒪᓕᒐᖅ 96 ᓄᓇᕕᒃᒥ ᐊᒃᑐᐃᔾᔮᕋᓱᒋᔭᐅᙱᑦᑐᖅ, ᑲᑎᕕᒃ ᓄᓇᓕᓕᒫᑦ ᑲᕙᒪᖏᑦ ᐅᖃᖅᑐᑦ
“ᓇᖕᒥᓂᖅ ᐅᖃᐅᓯᕆᔭᑦᑎᓐᓂᒃ ᓴᐳᔾᔭᐅᓯᒪᑎᑦᑎᔪᒪᒐᑦᑕ,” ᐅᖃᖅᑐᖅ ᐃᓄᒃ ᑲᑎᒪᔨ
ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ ᑲᑎᒪᔨᖏᑦ ᖃᖓᑦᑎᐊᓵᖅ ᑲᑎᒪᓚᐅᕐᒪᑕ ᑕᓯᐅᔭᖅᒥᓐ. ᐃᓚᖏᑦ ᑲᑎᒪᔩᑦ ᐅᖃᓚᐅᖅᑐᑦ ᐃᓱᒫᓘᑎᖃᕐᓂᖏᓐᓂᒃ ᐅᖃᐅᓯᕐᒧᑦ ᒪᓕᒐᐅᓂᐊᓕᖅᑐᒥᒃ ᑯᐸᐃᒃᒥᑦ ᑖᓐᓇᓗ ᐃᓄᒃᑎᑐᑦ ᐊᑐᖅᑕᐅᕙᖕᓂᖓᓂᒃ ᐊᒃᑐᐃᒍᑎᖃᕋᔭᕆᐊᒃᓴᖓᓂᒃ ᓄᓇᕕᒃᒥᑦ. (ᐊᔾᔨᙳᐊᖅ ᐅᑯᓇᙵᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ)
For an English version of this story, see Quebec’s Bill 96 not expected to impact Nunavik, KRG says
ᓄᑖᖅ ᑯᐸᐃᒃᒥ ᒪᓕᒐᖅ ᑐᕌᖓᔪᖅ ᐅᐃᕖᑦ ᐅᖃᐅᓯᖓ ᐱᒻᒪᕆᐅᓛᖑᓂᐊᕐᓂᖓᓂᒃ ᑯᐸᐃᒃᒥᑦ ᐊᒃᑐᐃᒍᑎᖃᔾᔮᕋᓱᒋᔭᐅᙱᑦᑐᖅ ᐃᓄᒃᑐᑦ ᐊᑐᖅᑕᐅᕙᖕᓂᖓᓂᒃ ᓄᓇᕕᒃᒥᑦ, ᓄᓇᓕᓕᒫᑦ ᑲᕙᒪᖏᑦ ᐅᖃᖅᑐᑦ.
ᑲᑎᕕᒃ ᓄᓇᓕᓕᒫᑦ ᑲᕙᒪᖏᓐᓄᑦ ᑲᑎᒪᔩᑦ ᖃᖓᑦᑎᐊᓵᖅ ᐃᓱᒫᓘᑎᖃᒪᐅᕐᒪᑕ ᑖᒃᑯᐊ ᑲᑐᔾᔨᖃᑎᒌᑦ ᖃᓄᐃᓕᖓᓂᖃᕆᐊᒃᓴᖏᓐᓂᒃ ᒪᓕᒐᖅ 96-ᒥᒃ, ᑯᐸᐃᒃᒥᑦ ᓄᑖᕕᓂᖅ ᒪᓕᒐᖅ ᐅᐃᕖᑦ ᐅᖃᐅᓯᖓᓂᒃ ᐱᒻᒪᕆᐅᓛᖑᑎᑦᑎᓯᒪᓂᕐᒥᒃ ᐊᒻᒪᓗ ᐅᖃᐅᓯᓪᓗᐊᑕᐅᓂᐊᕐᓂᖓᓂᒃ ᑯᐸᐃᒃᒥᑦ.
ᒪᓕᒐᖅ 96 ᐊᓯᙱᖅᑎᑦᑎᔪᒪᖕᒪᑦ ᑯᐸᐃᒃ ᐊᕐᕌᒍᓂᒃ 44-ᓂᒃ ᒪᓕᒐᖓᓂᒃ 101 ᓴᐳᔾᔨᓯᒪᒃᑲᓐᓂᕋᓱᖕᓂᖅᒥᒃ ᐅᐃᕖᑦ ᐅᖃᐅᓯᖓᓂᒃ ᐱᓕᕆᐊᖃᖅᑐᑎᒍᑦ, ᐃᓕᓐᓂᐊᕐᓂᓕᕆᓂᒃᑯᑦ, ᐊᓯᐊᓂᒃ ᓄᓇᖃᖅᑐᓕᕆᓂᒃᑯᑦ ᐊᒻᒪᓗ ᐃᖅᑲᖅᑐᐃᕕᓕᕆᓂᒃᑯᑦ.
ᒪᓕᒐᖅ ᒪᓕᒐᖏᓐᓂᒃ ᓴᙱᒃᑎᕚᓪᓕᖅᑎᑦᑎᓯᒪᓇᓱᒃᑐᖅ ᐅᓇ ᐅᖃᐅᓯᖅ ᐅᐃᕖᒃᑯᑦ ᐅᖃᐅᓯᖓ ᐊᑐᖅᑕᐅᖃᑦᑕᕐᓗᓂ ᐃᖅᑲᓇᐃᔭᖅᕕᒋᔭᐅᔪᓂᒃ, ᖁᓪᓕᐅᓂᖅᓴᐅᓗᓂ ᖃᓪᓗᓈᑐᑦ ᐃᓕᓐᓂᐊᕈᒪᔪᓂᒃ ᒪᑯᓄᖓ CEGEPS, ᐅᕝᕙᓘᓐᓃᑦ ᓯᓚᑦᑐᕐᓴᖅᕕᒃᓴᓂᒃ, ᐊᒻᒪᓗ ᑎᑎᖃᓂᒃ ᐅᐃᕖᑐᑦ ᑎᑎᕋᖅᓯᒪᔪᓂᒃ ᓴᖅᑭᔮᖅᑎᑦᑎᓂᖅᓴᐅᓗᑎᒃ ᐊᒻᒪᓗ ᒪᕐᕈᐃᓂᒃ ᐅᖃᐅᓯᕐᓂᒃ ᐊᑐᕈᓐᓃᖅᑎᑦᑎᓗᑎᒃ ᐃᓄᒋᔭᐅᔪᑦ ᓇᑉᐸᖓᑕ ᐅᖓᑖᓃᑦᑐᑦ ᖃᓪᓗᓇᐅᔭᕈᓐᓇᙱᑉᐸᑕ.
“ᐱᔾᔪᑎᒋᔭᐅᔪᕐᓕ ᒪᓕᒐᕐᒧᑦ ᐅᓇ ᐅᐃᕖᑦ ᐅᖃᐅᓯᖓ ᐅᖃᐅᓯᓪᓚᕆᑐᐊᖑᓂᐊᕐᓂᖓᓂᒃ ᑯᐸᐃᒃᒥᑦ,” ᒪᓕᒐᖅ ᐅᖃᖅᓯᒪᔪᖅ. “ᐅᖃᖅᓯᒪᒻᒪᕆᒃᖢᓂ ᐅᐃᕖᑦ ᐅᖃᐅᓯᖓ ᑯᐸᐃᒃᒥᐅᑦ ᐅᖃᐅᓯᓪᓚᕆᒋᓂᖓᓂᒃ.”
ᑭᓯᐊᓂᓕ ᓄᓇᕕᒻᒥᐅᑦ ᐅᖃᓚᐅᖅᑐᑦ ᑕᒪᑐᒥᖓ ᒪᓕᒐᐅᓕᖅᑐᒥᑦ ᐅᖃᓪᓚᖃᑎᒋᔭᐅᔭᕆᐊᖃᕐᓂᖏᓐᓂᒃ ᓱᓕ.
“ᑕᒪᓐᓇ ᐃᓱᒪᕈᓘᔭᕐᓇᕐᒪᓐ,” ᑲᖏᕐᓱᒃᒥᐅᑕᖅ ᑲᑎᒪᔨ, ᔩᓂ ᓄᙵᒃ ᐅᖃᓚᐅᖅᑐᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖏᑦ ᑲᑎᒪᑎᓪᓗᒋᑦ ᒪᐃ 31-ᒥᑦ ᑕᓯᐅᔭᖅᒥᓐ.
“ᐅᓇ ᓈᒻᒪᒋᓚᐅᙱᑕᕗᑦ ᒪᓕᒐᖅ 101 ᓴᖅᑭᑕᐅᓵᖅᑎᓪᓗᒍ. ᓄᓇᖃᖅᑳᖅᓯᒪᒐᑦᑕ ᑕᒪᑐᒪᓂ ᓄᓇᒥ. ᐅᓄᙱᓐᓂᖅᓴᐅᒐᓗᐊᖅᑎᓪᓗᑕ ᐱᔪᓐᓇᐅᑎᕗᑦ ᑐᓪᓕᕋᖅᑕᐅᑐᐃᓐᓇᕆᐊᖃᙱᑦᑐᑦ.”
ᒪᓕᒐᖅ 101 ᐱᔪᓐᓇᕐᓂᖃᖅᓯᒪᖕᒪᑦ ᓄᓇᖃᖅᑳᖅᑐᑦ ᐅᖃᐅᓯᖏᓐᓂᒃ ᑯᐸᐃᒃᒥᑦ. ᐃᓄᐃᑦ ᐊᑎᓕᐅᖅᓯᒪᔪᑦ ᔭᐃᒻᔅ ᐸᐃ ᐊᒻᒪ ᑯᐸᐃᒃ ᐅᐊᖕᓇᖓᓄᑦ ᐊᖏᕈᑎᓂᒃ ᑕᒪᑐᒧᖓ ᐅᖃᐅᓯᖅᒧᑦ ᒪᓕᒐᖅᒧᑦ ᐊᒃᑐᑎᖅᑕᐅᔪᓐᓇᙱᑦᑐᑦ.
ᐅᓇ ᒪᓕᒐᖅ ᐃᓄᒃᑎᑐᑦ ᐅᖃᐅᓯᖅᒥᒃ ᐃᓕᓐᓂᐊᖅᑎᑦᑎᒍᑎᖃᕐᓂᕋᐃᔪᖅ ᓄᓇᕕᒃᒥᑦ ᐃᓕᓐᓂᐊᕐᕕᖕᓂᒃ.
ᑖᔅᓱᒪ ᒪᓕᒐᐅᑉ ᐊᒃᑐᐃᒍᑎᒋᓇᔭᖅᑕᖓ ᓱᓕ ᓇᓗᓇᕋᓗᐊᖅᑎᓪᓗᒍ, ᐅᓇ ᑲᑎᕕᒃ ᓄᓇᓕᓕᒫᑦ ᑲᕙᒪᑎᑦᑕ ᑐᑭᒧᐊᖅᑎᑦᑎᔨᖓ ᒪᓕᒐᓕᕆᓂᖅᒧᑦ ᐅᖃᓚᐅᕐᑐᖅ ᑲᑎᒪᔨᓄᑦ ᑖᒃᑯᐊ ᒐᕙᒪᐅᔪᑦ ᐊᓯᙳᕈᑎᐅᓇᔭᖅᑐᓂᒃ ᖃᐅᔨᒪᒋᓐᓂᕋᖅᖢᑎᒃ ᓄᓇᕕᒃᒧᑦ.
“ᒫᓐᓇᐅᔪᕐᓕ, ᒪᓕᒐᖅ 96 ᐅᓗᕆᐊᓇᙱᑦᑐᖅ,” ᔪᐋᓐ ᕗᐊᑎᓐ ᐅᖃᓚᐅᖅᑐᖅ. “ᐊᒃᑐᐃᓂᖃᖅᑰᔨᙱᒻᒪᑦ ᑲᑎᕕᒃ ᓄᓇᓕᓕᒫᑦ ᑲᕙᒪᑲᓐᓄᑦ ᓄᓇᓕᖏᓐᓄᓪᓘᓐᓃᑦ. ᑕᐃᒪᓗ ᑕᒪᑐᒧᖓ ᐃᓚᐅᑎᑕᐅᖂᙱᓐᓇᑦᑕ.”
ᕗᐊᑎᓐ ᐅᖃᓚᐅᖅᑐᖅ ᒪᓕᒐᓕᕆᓂᖅᒧᑦ ᐱᓕᕆᕝᕕᐅᔪᑦ ᖃᐅᔨᓴᑲᑕᐃᓐᓇᕐᓂᐊᖅᑐᑦ ᒪᓕᒐᐅᓕᖅᑐᒥᒃ ᑯᐸᐃᒃ ᒪᓕᒐᖏᓐᓄᑦ ᐊᑐᖅᑕᐅᕙᓪᓕᐊᓕᖅᑎᓪᓗᒍ.
ᑭᓯᐊᓂᓕ ᐃᓚᖏᑦ ᑲᑎᒪᔨᐅᔪᑦ ᐅᖃᓚᐅᖅᑐᖅ ᐃᓚᐅᑎᑕᐅᙱᓐᓂᑐᐊᖅ ᓈᒻᒪᓗᐊᙱᓐᓂᖓᓂᒃ; ᑕᑯᔪᒪᓂᕋᖅᖢᑎᒃ ᑯᐸᐃᒃ ᒪᓕᒐᓕᕆᓂᖏᑦᑎᒍᑦ ᐃᓄᒃᑎᑐᑦ ᓴᙱᒃᑎᕙᓪᓕᖅᑎᑕᐅᓗᓂ ᓄᓇᕕᒃᒥᑦ.
“ᐃᕝᕕᓪᓕ ᐅᐃᕖᖑᓗᑎᒃ, ᐅᖃᐅᓰᑦ ᓴᙱᒃᑎᕚᓪᓕᕐᓂᐊᖅᑐᖅ ᐅᕙᒍᓪᓕ ᐊᒃᓱᕈᓕᖅᑎᓪᓗᑕ,” ᐃᓄᒃᔪᐊᒃᒧᑦ ᑲᑎᒪᔨ ᓴᕈᓕ ᐅᐃᑖᓗᒃᑐᒃ ᐅᖃᓚᐅᖅᑐᖅ ᒪᓕᒐᓕᕆᔨᒃᑯᑦ ᐱᓕᕆᔨᖏᓐᓄᑦ ᐃᓄᒃᑎᑐᑦ ᐅᖃᓪᓚᒃᖢᓂ.
“ᑐᓴᑐᐃᓐᓇᕈᒪᙱᑦᑐᒍᑦ ᐃᒪᓐᓇ ᐊᒃᑐᖅᑕᐅᔾᔮᙱᓐᓂᑦᑎᓐᓂᒃ — ᓇᖕᒥᓂᖅ ᐅᖃᐅᓯᕗᑦ ᓴᐳᔾᔭᐅᓯᒪᖁᖕᒥᒐᑦᑎᒍᑦ. ᐱᓕᕆᖃᑎᖃᕈᒪᒐᑦᑕ ᐃᓄᐃᑦ ᐱᔪᒪᔭᖏᓐᓄᑦ.”
ᐅᐃᑖᓗᒃᑐᖅ ᐅᖃᓚᐅᖅᑐᖅ ᐃᓄᐃᑦ ᓂᐱᖃᕈᒪᓂᕋᖅᖢᓂᒋᑦ ᑯᐸᐃᒃᒥᑦ ᐅᖃᐅᓯᓕᕆᓂᖅᒧᑦ ᒪᓕᒐᓕᕆᓂᒃᑯᑦ, ᑕᒪᓐᓇ ᐅᖃᐅᓯᐅᑲᑕᓕᓛᕐᓂᖓᓄᑦ ᑯᐸᐃᒃ ᒪᓕᒐᓕᕆᔨᖏᑦᑎᒍᑦ ᐅᑭᐅᒃᓵᖅ.
ᒪᓕᒐᖅ 96 ᐋᖅᑭᒋᐊᖅᓯᔾᔪᑎᐅᔪᒪᖕᒥᖕᒪᑦ ᐃᓚᖓ 90-ᒥᒃ ᐅᕙᓂ ᑲᓇᑕᒥ ᒪᓕᒐᕐᔪᐊᓂᒃ ᓇᓗᓇᐃᖅᓯᓯᒪᓗᓂ ᑯᐸᐃᒃ ᐃᒻᒥᒃᑰᖓᓕᕐᓗᓂ ᓄᓇᕐᔪᐊᖑᓕᕈᒪᓪᓗᓂ ᐊᒻᒪᓗ ᐅᐃᕖᑦ ᐅᖃᐅᓯᖓ ᐅᖃᐅᓯᑐᐊᖑᓂᐊᕐᓗᓂ ᑯᐸᐃᒃᒥᑦ.
ᐅᓇ ᒪᓕᒐᖅ ᐋᖅᑭᒃᓯᒍᑎᐅᓇᔭᕐᒥᔪᖅ ᒥᓂᔅᑕᒥᑦ ᐅᐃᕖᑦ ᐅᖃᐅᓯᖓᓄᑦ ᑯᐸᐃᒃᒥᑦ, ᐊᒻᒪᓗ ᐅᐃᕖᑦ ᐅᖃᐅᓯᖓᓄᑦ ᑲᒥᓯᓇᒥᒃ.
(0) Comments