ᑯᐸᐃᖕᒥ ᐃᒡᓗᓕᕆᓂᕐᒧᑦ ᒥᓂᔅᑕᖓ ᓴᓇᒃᑲᓐᓂᓛᕈᒪᕗᖅ ᐊᖏᕐᕋᒃᓴᐅᔪᓂ ᓄᓇᕕᖕᒥ

For English version, see Quebec housing minister hopes to build more homes in Nunavik

ᐱᔭᕇᓚᐅᖅᑎᓪᓗᒋᑦ ᐅᓪᓗᓂ ᐱᖓᓱᓂ ᐳᓚᕋᕐᓂᐅᔪᒥ ᑰᔾᔪᐊᕐᒥ ᐱᓇᓱᐊᕈᓯᐅᓚᐅᖅᑐᒥ, ᑯᐸᐃᖕᒥ ᐃᒡᓗᓕᕆᓂᕐᒧᑦ ᒥᓂᔅᑕᖓ ᕗᕌᓐᔅ-ᐃᓚᐃᓐ ᑐᕌᓐᓲ ᑲᑐᔾᔨᖃᑎᒌᖕᓂᐊᕐᓂᕋᖅᐳᖅ ᐊᕕᒃᑐᖅᓯᒪᓂᐅᔪᓂ ᑲᑐᔾᔨᖃᑎᒌᖑᔪᓂ ᐃᒡᓗᒃᓴᒃᑲᓐᓂᕐᓂ ᓴᓇᓂᐊᕐᓂᕐᒧᑦ ᓄᓇᕕᓕᒫᒥ ᕿᓚᒻᒥᐅᑎᒋᔪᒥ ᐊᕐᕌᒎᓛᖅᑐᒥ.

ᑐᕌᓐᓲ ᑐᓂᓯᓚᐅᙱᓚᖅ ᐅᓄᕐᓂᓪᓚᕆᐅᔪᓂ ᐃᒡᓗᒃᓴᓂ ᓂᕆᐅᒋᔭᖓᓂ ᑕᑯᓂᐊᖅᑕᖓᓂ ᓴᓇᔭᐅᓂᖓᓂ ᐅᕝᕙᓘᓐᓃᑦ ᐊᑯᓂᐅᓂᐊᕐᓂᖓᓂ. ᑭᓯᐊᓂ ᑲᑎᒪᓂᐅᔪᓂ ᑲᑎᕕᒃ ᓄᓇᓕᖕᓂ ᐃᒡᓗᓕᕆᔨᒃᑯᓐᓂ, ᑲᑎᕕᒃ ᐊᕕᒃᑐᖅᓯᒪᓂᐅᔪᓂ ᒐᕙᒪᐅᔪᓂ, ᒪᑭᕝᕕᒃ ᑎᒥᖁᑕᐅᔪᓂ ᐊᒻᒪ ᓄᓇᓕᖕᒥᐅᑕᓂ ᐃᑲᔪᕐᓂᖃᓚᐅᖅᐳᖅ ᑐᑭᓯᐅᒪᓂᖓᓂ ᐃᓚᖏᓐᓂ ᐱᓪᓚᕆᐅᔪᓂ ᐃᒡᓗᒃᓴᓂ ᐱᔭᕆᐊᖃᕐᓂᐅᔪᓂ ᐊᕕᒃᑐᖅᓯᒪᓂᐅᔪᒥ. ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ.

“ᐸᕐᓴᐃᓂᖃᒃᑲᓐᓂᕈᒪᕗᖓ ᐱᔪᓐᓇᕐᓂᕐᒧᑦ, ᐅᑭᐅᖅᑕᖅᑐᒥ, ᐃᒪᓐᓇᐅᙱᒻᒪᑦ ᓴᓇᔪᒪᓗᑎᑦ ᐊᒻᒪ ᑭᓱᓕᒫᑦ ᐊᑐᐃᓐᓇᐅᓂᖏᓐᓂ,” ᑐᕌᓐᓲ ᐅᖃᓚᐅᖅᐳᖅ.

“ᑕᐃᒫᒃ ᑐᕌᒐᒃᓴᐅᔪᖅ ᐃᒡᓗᒃᓴᖃᕐᓂᖓᓂ 2024−ᒥ … ᓄᓇᒃᓴᓕᐅᕐᓂᕐᒥ ᐅᕝᕙᓘᓐᓃᑦ ᑐᓂᔭᐅᔪᓐᓇᕐᓂᖓᓂ.”

ᑰᔾᔪᐊᕐᒥ ᐳᓚᕋᕐᓂᐅᔪᖅ ᓯᕗᓪᓕᖅᐹᖑᓚᐅᖅᐳᖅ ᐊᑦᑎᖅᑕᐅᓚᐅᕋᒥ ᐃᒡᓗᓕᕆᓂᕐᒧᑦ ᒥᓂᔅᑕᐅᓂᖓᓂ ᐅᒃᑐᐱᕆᐅᓚᐅᖅᑐᒥ.

ᒫᔾᔨᒥ ᑕᒪᑐᒪᓂ ᐊᕐᕌᒎᔪᒥ, ᑲᑐᔾᔨᖃᑎᒌᖑᔪᒥ Avenir Québec ᒐᕙᒪᖓ ᑐᓂᓯᓚᐅᖅᐳᑦ $43 ᒥᓕᐊᓐᓂ ᑭᐅᓂᕐᒧᑦ ᐃᒡᓗᖃᖅᑎᑦᑎᓂᐅᔪᒥ ᐊᑲᐅᙱᓕᐅᕈᑕᐅᔪᓂ ᓄᓇᕕᖕᒥ.

ᐊᕕᒃᑐᖅᑕᐅᓂᖓᓂ ᑕᐃᔅᓱᒧᖓ ᐊᑐᖅᑕᐅᓂᐊᖅᑐᓄᑦ ᓴᖅᑭᑎᑕᐅᓚᐅᖅᐳᖅ ᐋᒍᔅᑎ 31−ᒥ ᑐᕌᓐᓲ ᐃᓚᐅᖃᑕᐅᓚᐅᕐᓂᖓᓂ ᑲᑎᕕᒃ ᐃᒡᓗᓕᕆᔨᒃᑯᑦ ᐊᕐᕌᒍᑕᒫᒥ ᐃᒡᓗᖃᖅᑎᑦᑎᓂᕐᒥ ᐅᓪᓗᖓᓂ ᐱᒋᐊᕈᑕᐅᔪᓂ.

ᐊᕕᒃᑐᖅᑕᐅᓯᒪᓂᐅᔪᑦ ᐃᒪᐃᓕᖓᕗᑦ:

• $3.2 ᒥᓕᐊᓐ ᓇᑉᐸᖅᑎᕆᓂᕐᒧᑦ ᐃᒡᓗᒃᓴᒧᑦ ᓱᓇᒃᑯᑖᖏᓐᓄᑦ ᓯᕐᓗᐊᒥᒃ ᑲᖏᖅᓱᔪᐊᕐᒧᑦ;
• $20 ᒥᓕᐊᓐ ᑐᕌᕐᓂᐊᖅᑐᒥ ᐋᖅᑭᒃᓱᐃᓂᕐᒥ ᓱᕋᑦᑎᓯᒪᔪᓂ ᐃᒡᓗᒋᔭᐅᔪᓄᑦ;
• $19.8 ᒥᓕᐊᓐ ᐱᐅᓯᒋᐊᖅᑎᑦᑎᓂᕐᒥ ᐃᒡᓗᒃᓴᓂ ᓄᓇᕕᖕᒥ.

ᑲᑎᒪᓂᖏᓐᓂ, ᑐᕌᓐᓲ ᐅᖃᓚᐅᖅᐳᖅ ᑐᑭᓯᓇᖅᐳᖅ ᐃᓄᐃᑦ ᓄᓇᕕᖕᒥ ᐊᖏᖅᓯᒪᕗᑦ ᐱᐅᓯᒋᐊᖅᑎᑦᑎᓂᕐᒥ ᐊᑐᐃᓐᓇᖃᕐᓂᖓᓂ ᐃᒡᓗᒃᓴᓄᑦ ᐊᕕᒃᑐᖅᓯᒪᓂᐅᔪᒥ.

ᐅᓂᒃᑳᕆᓪᓗᓂ ᓄᓇᕕᖕᒥ “ᓄᓇᑦᑎᐊᕙᒻᒪᕆᐊᓘᓪᓗᓂ ᐃᓂᒋᓗᒍ,” ᐅᖃᓚᐅᖅᐳᖅ ᐃᖅᑲᓇᐃᔮᕆᕙᖓ ᓈᓚᖕᓂᕐᒧᑦ ᐊᒻᒪ ᑭᐅᓂᕐᒧᑦ ᑐᓂᓯᓗᓂ ᐱᔭᕆᐊᓕᖕᓂ ᑮᓇᐅᔭᖃᖅᑎᑕᐅᓂᐅᔪᓂ ᐊᒻᒪ ᐊᓯᖏᓐᓂ ᐃᑲᔪᕈᑎᒃᓴᓂ.

“ᐅᓇ ᐅᕙᓐᓂ ᐱᔪᓐᓇᖅᑎᑦᑎᓂᐊᖅᐳᖅ ᐱᐅᓂᖅᓴᐅᓗᖓ ᑭᒡᒐᖅᑐᖅᑎᒻᒪᕆᐅᓂᓐᓂ ᐱᔭᕆᐊᖃᕐᓂᐅᔪᓄᑦ ᐅᑭᐅᖅᑕᖅᑐᒥ ᐊᕐᕌᒍᑕᒫᒥ,” ᐅᖃᓚᐅᖅᐳᖅ.

“ᒫᓐᓇ ᑐᑭᓯᐅᒪᓂᖅᓴᐅᓕᕋᒪ ᓯᕗᓪᓕᐅᑎᑕᐅᖁᔭᐅᔪᓂ ᐃᓄᖕᓂ ᓄᓇᓕᖕᓂ, ᐃᑲᔪᖅᓱᐃᔪᓐᓇᕐᓂᐊᓕᖅᐳᖓ ᒪᓕᒃᑐᒧᑦ ᑮᓇᐅᔭᓂ ᐊᑐᖅᑐᒃᓴᓄᑦ.”

ᒫᑯ ᐋᑎᑦ, ᐃᒡᓗᓕᕆᔨᒃᑯᑦ ᑐᑭᒧᐊᒃᑎᑦᑎᔨᖓ, ᐅᖃᐅᓯᖃᓚᐅᕆᕗᖅ ᓂᕆᐅᖕᓂᖃᕐᓂᐅᔪᒥ ᑐᕌᓐᓲ ᐳᓚᕋᕐᓂᖓᓂ.

ᐋᑎᑦ ᐅᖃᓚᐅᖅᐳᖅ ᒥᓂᔅᑕ ᑕᑯᒃᓴᐅᑎᑦᑎᓚᐅᖅᐳᖅ ᐱᔪᒪᓂᖃᕐᓂᐅᔪᒥ ᓄᓇᓕᖕᒥᐅᑕᓂ ᐅᖃᐅᓯᒃᓴᖏᓐᓄᑦ, ᐊᒻᒪ ᓂᕆᐅᖕᓂᖃᖅᐳᖅ ᑭᐅᓂᐊᕐᓂᖓᓂ ᐱᓪᓚᕆᐅᔪᓄᑦ ᐱᔪᒪᓂᐅᔪᓄᑦ ᐱᐅᓂᖅᓴᓂ ᐃᒡᓗᖃᖅᑎᑦᑎᓂᐅᔪᒥ.

“ᐅᓇ ᐱᐅᑦᑎᐊᖅᖢᓂ ᐱᓕᕆᓂᐅᕗᖅ ᐅᖃᐅᓯᖃᕐᓂᕐᒥ ᐃᓱᒫᓘᑎᑦᑎᓐᓂᒪ ᐊᒃᓱᕈᕈᑎᒋᔭᑦᑎᓐᓂ, ᐱᔭᕆᐊᖃᖅᑕᑦᑎᓐᓂ, ᑕᐃᒫᒃ ᐱᒻᒪᕆᕐᔪᐊᖑᓚᐅᖅᐳᖅ,” ᐋᑎᑦ ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ.

“ᐃᕐᐱᒍᓱᑦᑎᐊᓚᐅᖅᐳᒍᑦ ᐃᑲᔪᖅᓯᖅᑕᐅᓂᑦᑎᓐᓂ.”