ᑯᐸᐃᖕᒥ ᒪᓕᒐᓕᐅᖅᑏᑦ ᒥᓂᔅᑕᖓ ᓱᓕᓂᕋᖅᐳᖅ ᓴᐳᔾᔨᓯᒪᓂᕐᒥ ᓄᓇᖃᖅᑳᖅᓯᒪᔪᓄᑦ ᐅᖃᐅᓯᕐᓂ ᒪᓕᒃᑐᒥ ᐱᖁᔭᒃᓴᖅ 96 ᐃᓯᖅᑕᐅᓂᖓᓂ

ᐄᐊᓐ ᓚᕗᕋᓂᐅᕐ ᐅᖃᖅᐳᖅ ᐃᑲᔪᖅᓱᐃᓂᕐᒥ ᐃᓄᒃᑎᑐᒻᒥ ᐱᒻᒪᕆᐅᕗᖅ ᒐᕙᒪᒃᑯᑦ ᓂᕈᐊᖅᑎᓪᓗᒋᑦ ᓴᐳᔾᔨᓯᒪᓂᕐᒥ ᐅᐃᕖᑎᑐᑦ ᐅᖃᐅᓯᖓᓐᓂ

ᑯᐸᐃᖕᒥ ᓄᓇᖃᖅᑳᖅᓯᒪᔪᓄᑦ ᐱᓕᕆᓂᕐᒧᑦ ᒥᓂᔅᑕᖓ ᐄᐊᓐ ᓚᕗᕋᓂᐅᕐ, ᓴᐅᒥᖕᒥ, ᓇᖏᖃᑦᖃᖅᐳᖅ ᒪᐃᔭᒥ ᒪᑯᒥ ᐋᓇᓈᕐᒥ ᐊᒻᒪ ᐃᓚᒋᔭᐅᔪᒥ ᑲᖏᖅ)ᐊᓗᔾᔪᐊᕐᒥ ᑲᑎᒪᔨᖏᓐᓂ ᒫᓐᓇᓕᓴᐅᔪᒥ ᐳᓚᕋᕐᓂᐅᔪᒥ. (ᐊᔾᔨᓕᐅᖅᑕᐅᔪᖅ ᐄᐊᓐ ᓚᕗᕋᓂᐅᕐᒧᑦ – Député de Vachon/Facebook)

By ᔨᐊᕝ ᐱᓚᑦᑎᐊᕐᒧᑦ

For the English version, see Quebec cabinet minister vows to protect Indigenous languages following Bill 96 passage

ᑯᐸᐃᖕᒥ ᓄᓇᖃᖅᑳᖅᓯᒪᔪᓄᑦ ᐱᓕᕆᓂᕐᒧᑦ ᒥᓂᔅᑕᖓ ᐄᐊᓐ ᓚᕗᕋᓂᐅᕐ ᐅᖃᖅᐳᖅ ᐊᖏᖅᓯᒪᓂᖃᕐᓂᖓᓂ ᐃᑲᔪᖅᓱᐃᓂᕐᒥ ᓄᓇᖃᖅᑳᖅᓯᒪᔪᓄᑦ ᐃᓄᖕᓂ ᑲᓇᑕᐅᑉ ᐊᕕᒃᑐᖅᓯᒪᓂᖓᓂ, ᒐᕙᒪᖓ ᐊᖏᓚᐅᖅᑎᓪᓗᒋᑦ ᓄᑖᒥ ᒪᓕᒐᐅᔪᒥ ᐱᓇᓱᐊᕈᓯᐅᓚᐅᖅᑐᒥ ᓴᐳᔾᔨᓯᒪᓂᕐᒥ ᐅᐃᕖᑎᑐᑦ ᐅᖃᐅᓯᖓᓂ ᐊᑐᕐᓂᕐᒥ.

ᒪᐃ 24−ᒥ, ᑯᐸᐃᖕᒥ ᑲᓇᑕᒥ ᑲᑎᒪᔨᖏᑦ ᓂᕈᐊᓚᐅᖅᐳᑦ ᐊᓂᒍᐃᓂᕐᒥ ᐱᖁᔭᒃᓴᖅ 96−ᒥ, ᑐᕌᒐᖃᖅᑐᒥ ᓇᓗᓇᐃᖅᓯᓂᖓᓂ ᐅᐃᕖᑎᑐᑦ ᐅᖃᐅᓯᐅᔪᒥ ᐃᓕᓴᕆᔭᐅᓯᒪᔭᑐᐊᖑᓂᖓᓂ ᑲᓇᑕᐅᑉ ᐊᕕᒃᑐᖅᓯᒪᓂᖓᓂ. ᓂᕆᐅᒋᔭᐅᕗᖅ ᐱᓕᕆᓂᐊᕐᓂᖓᓂ ᐊᕐᕌᒍᓪᓗᐊᒥ ᒪᓕᒐᖅ ᐊᑐᓕᓚᐅᙱᓐᓂᖓᓂ.

ᐃᓱᒪᒋᓇᒍ ᐱᖁᔭᒃᓴᐅᑉ ᑐᕌᒐᒃᓴᖓᓂ, ᓚᕗᕋᓂᐅᕐ ᐅᖃᓚᐅᖅᐳᖅ ᐃᓄᐃᑦ ᐊᔭᐅᕆᔭᐅᔾᔮᙱᓐᓂᖏᓐᓂ ᐅᖃᓪᓚᖕᓂᕐᒧᑦ ᐅᐃᕖᑎᑐᑦ ᐱᓕᕆᖃᑎᖃᖅᑎᓪᓗᒋᑦ ᑲᓇᑕᒥ ᐊᕕᒃᑐᖅᓯᒪᓂᐅᔪᒥ ᐱᓕᕆᕝᕕᐅᔪᓂ.

ᐅᖃᓚᐅᖅᐳᖅ ᐃᓄᐃᑦ ᑲᑉᐱᐊᓱᒃᓯᒪᓂᖏᓐᓂ ᑕᐃᔭᖓᓂ “ᓴᓪᓗᔪᒥ ᑐᓴᒐᒃᓴᐅᔪᒥ” ᒐᕙᒪᒃᑯᓐᓂ ᐊᑐᖅᑎᑦᑎᓂᖓᓂ ᐊᑐᕐᓂᐅᔪᒥ ᐅᐃᕖᑎᑐᑦ, ᐊᒻᒪᓗ ᓄᓇᖃᖅᑳᖅᓯᒪᔪᓄᑦ ᐃᓄᐃᑦ ᐱᔪᓐᓇᕐᓂᖃᕐᓂᖏᓐᓂ ᓴᐳᔾᔨᓯᒪᓂᕐᒧᑦ ᐊᒻᒪ ᐅᖃᓪᓚᖕᓂᖏᓐᓂ ᐅᖃᐅᓯᖓᓐᓂ.

“ᓴᐳᔾᔨᓯᒪᓂᐅᔪᒥ ᐳᐃᕖᑎᑐᑦ ᐱᓕᕆᐊᖑᓪᓗᐊᙱᓚᖅ ᐊᑭᕋᖅᑐᕐᓗᓂ ᓴᐳᔾᔨᓯᒪᓂᐅᔪᒥ ᐊᓯᖏᓐᓂ ᐅᖃᐅᓯᕐᓂ ᓲᕐᓗ ᐃᓄᒃᑎᑐᑦ,” ᓚᕗᕋᓂᐅᕐ ᐅᖃᓚᐅᖅᐳᖅ ᖃᓪᓗᓈᑎᑐᑦ-ᐅᖃᐅᓯᕐᒥ ᐊᐱᖅᓱᖅᑕᐅᓂᐅᔪᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ.

ᑭᓯᐊᓂ, ᐱᖁᔭᒃᓴᖅ ᓴᖅᑭᑎᑦᑎᓯᒪᕗᖅ ᐊᑭᕋᖅᑐᕐᓂᐅᔪᒥ ᑲᑎᙵᓂᐅᔪᓂ ᐃᓱᒫᓗᒃᑐᓂ ᐊᔪᕐᓇᖅᓯᑎᑦᑎᒃᑲᓐᓂᕐᓂᐊᕐᓂᖓᓂ ᐃᓄᖕᓄᑦ ᓄᓇᕕᖕᒥ ᐊᑐᐃᓐᓇᖃᕐᓂᕐᒥ ᐱᔨᑦᑎᕋᕐᓂᐅᔪᓂ ᓲᕐᓗ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐸᖅᑭᓂᐅᔪᒥ ᐊᒻᒪ ᐃᓕᓐᓂᐊᕐᓂᕐᒥ.

ᐱᔾᔪᑎᖃᕐᒪᑦ ᑭᒡᓕᖃᖅᑎᑕᐅᖕᒪᑦ ᐅᓄᕐᓂᐅᔪᓂ ᐃᓕᓐᓂᐊᖅᑎᓂ ᐱᔪᓐᓇᖅᑎᑕᐅᔪᓂ ᐃᓄᓕᒫᓂ ᑮᓇᐅᔭᖃᖅᑎᑕᐅᓂᐅᔪᒥ, ᖃᓪᓗᓈᑎᑐᑦ-ᐅᖃᐅᓯᕐᒥ ᖁᕝᕙᓯᖕᓂᖅᓴᐅᔪᒥ ᐃᓕᓐᓂᐊᕐᕕᓂᑦ.

ᐊᑐᕈᒪᔪᓐᓃᖅᑎᑦᑎᑐᐃᓐᓇᕆᐊᖃᕆᕗᖅ ᖃᓪᓗᓈᑎᑐᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ−ᐸᖅᑭᓂᐅᔪᒥ ᐱᓕᕆᔾᔪᓯᐅᔪᒥ, ᐅᖃᐅᓯᐅᓪᓗᓂ ᒥᒋᐅᓪ ᓯᓚᑦᑐᖅᓴᕐᕕᒡᔪᐊᖓᓂ ᐃᓕᓴᐃᔨᕐᔪᐊᖅ ᕆᔅᓱᑦ ᐸᑦᔪᓪ ᑯᐸᐃᖕᒥ ᖃᓪᓗᓈᑎᑐᑦ ᐱᖁᔭᒃᓴᖅ 96 ᐊᑐᓕᕈᓂ.

ᓚᕗᕋᓂᐅᕐ ᐅᖃᖃᑎᖃᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᐊᖑᔪᒥ ᐅᑎᓚᐅᖅᑎᓪᓗᒍ ᐱᓇᓱᐊᕈᓯᕐᒥ ᓄᓇᕕᖕᒥ ᓄᓇᓕᖕᓃᓚᐅᖅᑎᓪᓗᒍ, ᐊᒻᒪᓗᑦᑕᐅᖅ ᖃᔅᓯᒐᓚᖕᓂ ᐊᓪᓚᓄᑦ ᓄᓇᓕᐅᔪᓄᑦ ᐅᐊᖕᓇᒥ ᑯᐸᐃᖕᒥ.

ᐅᖃᓚᐅᖅᐳᖅ ᐅᖃᓪᓚᖕᓂᐅᔪᓂ ᐊᐅᓪᓛᖅᓯᒪᑎᓪᓗᒍ ᐱᓕᕆᓂᖃᒃᑲᓐᓂᕈᒪᓐᓇᖅᐳᖅ ᓄᓇᖃᖅᑳᖅᓯᒪᔪᓄᑦ ᓄᓇᓕᖕᓂ ᐊᒻᒪ ᑲᑐᔾᔨᖃᑎᒌᖑᔪᓂ ᓇᓂᓯᓂᕐᒥ ᐱᓕᕆᓂᐅᔪᓂ ᓴᐳᔾᔨᓯᒪᓂᕐᒧᑦ ᐅᖃᐅᓯᖏᓐᓂ.

“ᐱᓕᕆᖃᑎᖃᕈᒪᕗᖓ ᐊᔾᔨᒌᙱᑦᑐᓂ ᐃᓄᖏᓐᓂ, ᓲᕐᓗ ᐃᓄᖕᓂ, ᐊᒻᒪ ᐆᒥᖓ ᐱᓕᕆᓂᐊᖅᐳᒍᑦ ᑕᑯᓇᓱᐊᕐᓂᕐᒥ ᖃᓄᐃᓕᐅᓪᓗᐊᕐᓂᑦᑎᓐᓂ,” ᐅᖃᓚᐅᖅᐳᖅ. “ᒫᓐᓇᐅᔪᒥ ᑐᑭᓯᓇᙱᓚᖅ, ᑭᓯᐊᓂ ᐃᑲᔪᕆᐊᖃᖅᐳᒍᑦ ᐃᓄᖕᓂ ᓴᐳᔾᔨᓯᒪᓂᕐᒥ ᓇᖕᒥᓂᖅ ᐅᖃᐅᓯᖏᓐᓂ ᓲᕐᓗ ᐃᓄᑦᑎᑐᒻᒥ, ᐄᓪᓚᕆᒃ.”

ᓚᕗᕋᓂᐅᕐ ᐅᖃᓚᐅᖅᐳᖅ ᑎᑭᐅᑎᓯᒪᓂᖓᓂ ᑐᕌᒐᒃᓴᐅᔪᒥ ᐃᒻᒥᓄᑦ ᒥᓂᔅᑕᐅᓪᓗᓂ, ᐳᓚᕋᕐᓂᕐᒧᑦ 14−ᓂ ᓄᓇᕕᖕᒥ ᓄᓇᓕᐅᔪᓂ.

ᒪᕐᕉᒃ ᐱᓇᓱᐊᕈᓯᕐᓂ ᐊᓂᒍᖅᓯᒪᓕᖅᑐᓂ, ᓄᖅᑲᓚᐅᑲᓚᐅᖅᐳᖅ ᓴᓪᓗᐃᓄᑦ ᐊᒻᒪ ᑲᖏᖅᓱᐊᓗᔾᔪᐊᕐᒧᑦ — ᒪᕐᕉᒃ ᓄᓇᓕᐅᔪᑦ ᐅᖃᓚᐅᖅᐳᖅ ᓯᕗᓂᐊᓂ ᐸᕐᓇᒃᓯᒪᓚᐅᕐᓂᖓᓂ ᐳᓚᕋᕐᓂᕐᒧᑦ, ᑭᓯᐊᓂ ᖃᖓᑕᑦᑎᐊᙱᓐᓂᐅᔪᒥ ᖃᓄᐃᓐᓂᐅᔪᒥ ᑭᖑᕙᕆᐊᖅᑎᑦᑎᓚᐅᕐᓂᖓᓂ ᑕᐃᒃᑯᓂᖓ ᐸᕐᓇᐳᑎᓂᑦ.

ᐃᓚᖃᖅᖢᓂ ᒪᕐᕉᖕᓂ ᐃᖅᑲᓇᐃᔭᖅᑎᐅᔪᓂ, ᓚᕗᕋᓂᐅᕐ ᑲᑎᒪᖃᑎᖃᓚᐅᖅᐳᖅ ᓄᓇᓕᖕᓂ ᑲᑎᒪᔨᕐᔪᐊᖑᔪᓂ, ᐃᓛᓐᓂᒃᑯᑦ ᐅᓪᓛᕈᒻᒥᑕᕐᓂ ᐃᒐᓚᐅᖅᑕᖓᓂ. ᐳᓚᕋᓚᐅᕆᕗᖅ ᓄᓇᓕᖕᓂ, ᐅᖃᓪᓚᐅᓯᖃᖅᖢᓂ ᓄᓇᓕᖕᓂ ᐃᓅᖃᑎᒌᖑᔪᓄᑦ ᐊᒻᒪ ᓄᓇᓕᖕᓂ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ ᐊᑲᐅᙱᓕᐅᕈᑕᐅᔪᓂ, ᐊᒻᒪ ᑲᑎᒪᖃᑎᖃᓚᐅᖅᐳᖅ ᓄᓇᓕᖕᓂ ᑲᑐᔾᔨᖃᑎᒌᖑᔪᓂ.

ᐊᖏᔪᓂ ᐊᑐᐊᒐᕐᒧᑦ ᐅᖃᐅᓯᒃᓴᓕᐅᓚᐅᙱᑎᓪᓗᒍ ᐳᓚᕋᕐᓂᖓᓂ, ᓚᕗᕋᓂᐅᕐ ᐅᖃᓚᐅᖅᐳᖅ ᐊᐅᓪᓛᕐᓂᖅ ᐱᔨᑦᑎᕋᕐᓂᖃᓚᐅᖅᐳᖅ ᐱᕕᒃᓴᐅᔪᒥ ᓈᓚᖕᓂᕐᒧᑦ ᐊᒻᒪ ᐱᕙᓪᓕᐊᑎᑦᑎᓂᕐᒥ ᑐᑭᓯᐅᒪᓂᖅᓴᐅᔪᒥ ᐊᑲᐅᙱᓕᐅᕈᑕᐅᔪᓂ.

“ᐱᕐᔪᐊᖑᓚᐅᖅᐳᖅ, ᐱᔾᔪᑎᖃᖅᑐᒥ ᖃᐅᔨᒪᓂᐅᔪᒥ ᐅᑎᕈᔾᔨᓚᐅᕐᓂᓐᓂ ᑕᐃᒃᑯᓇᙵᑦ ᑲᑎᒪᓂᐅᔪᓂ,” ᐅᖃᓚᐅᖅᐳᖅ.

ᓚᕗᕋᓂᐅᕐ ᐅᖃᓚᐅᖅᐳᖅ ᐃᓄᐃᑦ ᓄᓇᕕᖕᒥ ᐱᕚᓪᓕᕈᑎᖃᕐᓂᐊᕐᓂᖏᓐᓂ $188 ᒥᓕᐊᓐᓂ ᐊᕐᕌᒍᓄᑦ ᑕᓪᓕᒪᓄᑦ ᐅᕘᓇ ᑯᐸᐃᖕᒥ ᓄᓇᖃᖅᑳᖅᓯᒪᔪᓄᑦ ᐱᒋᐊᕈᑕᐅᔪᓄᑦ ᑮᓇᐅᔭᖃᖅᑎᑕᐅᓂᖓᓂ, ᖁᕝᕙᖅᓴᐃᓂᕐᒥ ᑮᓇᐅᔾᔭᒃᓴᓂᕐᒧᑦ ᐊᒻᒪ ᐱᐅᓯᒋᐊᖅᑎᑦᑎᓗᓂ ᓄᓇᓕᖕᓂ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ, ᑭᓯᐊᓂ ᐅᓂᒃᑳᕆᓚᐅᙱᓚᖅ ᓇᓗᓇᐃᖅᑕᐅᓯᒪᔪᓂ ᐊᖏᓂᐅᔪᓂ ᐅᕝᕙᓘᓐᓃᑦ ᑮᓇᐅᔭᓂ ᓇᒧᙵᐅᓂᐊᕐᓂᖏᓐᓂ.

ᓚᕗᕋᓂᐅᕐ ᐅᖃᓚᐅᖅᐳᖅ ᐊᖏᖅᓯᒪᓂᖃᕆᕗᖅ ᐅᖓᕙᕆᐊᖅᓯᓂᕐᒥ ᐃᓄᖕᓄᑦ ᓇᖕᒥᓂᖅ−ᐃᓱᒪᓕᐅᕆᔪᓐᓇᕐᓂᖏᓐᓂ ᐅᖃᓪᓚᖕᓂᐅᔪᓂ ᑯᐸᐃᖕᒥ — ᓯᕗᓂᐊᓃᓚᐅᖅᑐᒥ ᑯᐃᑉ ᑭᒡᒐᖅᑐᐃᔨᖓᑕ ᒥᐊᕆ ᓴᐃᒪᓐ ᐳᓚᕋᕐᓂᕆᓚᐅᖅᑕᖓᓂ ᐊᕕᒃᑐᖅᓯᒪᓂᐅᔪᒥ ᒪᐃᒥ.

ᑕᐃᑲᓂ ᐳᓚᕋᕐᓂᐅᔪᒥ, ᓴᐃᒪᓐ ᐅᖃᐅᔾᔨᓚᐅᖅᐳᖅ ᐃᓄᖕᓂ ᑭᒡᒐᖅᑐᐃᔨᐅᔪᓂ ᑕᑯᔪᒪᓂᖓᓂ ᑯᐸᐃᖕᒥ ᒐᕙᒪᐅᔪᒥ ᑎᒃᑯᐊᖅᓯᓂᖓᓂ ᐋᔩᖃᑎᒌᒃᑎᐅᔪᒥ ᑕᐃᒃᑯᓄᖓ ᐅᖃᓪᓚᖕᓂᐅᔪᓄᑦ, ᐊᒻᒪ ᓯᕗᓕᖅᑎ ᕗᕌᓐᓱᐊ ᓕᒑᓪᑦ ᐅᖃᓚᐅᖅᐳᖅ ᑕᐃᒪᐃᓐᓂᐊᕐᓂᖓᓂ.

“ᐆᒥᖓ ᐱᓕᕆᕗᒍᑦ,” ᓚᕗᕋᓂᐅᕐ ᐅᖃᓚᐅᖅᐳᖅ. “ᓈᒻᒪᑦᑎᐊᖅᑐᒥ ᐃᓄᖕᒥ ᐱᓇᓱᐊᖅᐳᒍᑦ.”

Share This Story

(0) Comments

Join the Conversation

Your email address will not be published. Required fields are marked *

*