ᑰᔾᔪᐊᖅᒥ ᐃᓕᓐᓂᐊᖅᑎ ᓯᒡᔭᓄᑦ ᓴᐳᓐᓂᐊᖅᑎᓂᒃ ᐃᓚᐅᓯᒋᐊᖅᐳᖅ

ᑯᓄ ᐋᕆᐊᒃ-ᒪᑮ ᐱᖃᑎᒋᔭᐅᔪᖅ ᐃᓕᓐᓂᐊᖅᑐᖕᓂ ᒪᕐᕉᖕᓂ ᐃᓅᖕᓂ ᓴᐳᓐᓂᐊᖅᑎᒃᑯᑦ ᐅᒥᐊᖓᓂ ᑲᖏᖅᖠᓂᖅᒥᒃ

21-ᓂ ᐊᕐᕌᒍᓕᒃ ᑯᓄ ᐋᕆᐊᒃ-ᒪᑮ ᐃᓚᒋᔭᐅᔪᖅ 8-ᓂ ᓄᓇᖃᖅᑳᖅᑐᓂᒃ ᐃᓕᓐᓂᐊᖅᑎᓂᒃ ᓴᐳᓐᓂᐊᖅᑎᒃᑯᑦ ᐅᒥᐊᖓᓂᒃ ᑲᖏᖅᓕᓂᖅᒥᒃ ᐊᐅᔭᐅᔪᖅ. (ᐊᔾᔨᙳᐊᖅ ᐅᕙᙵᑦ ᑯᓄ ᐋᕆᐊᒃ-ᒪᑮ)

By ᒥᓚᓂ ᐅᕆᑦᓵᑦ

For an English version of this story, see Kuujjuaq student makes a splash in the coast guard

ᐅᒥᐊᓂᒃ ᖃᐅᔨᓴᖃᑦᑕᕐᓂᖅ, ᓱᕋᒃᓯᒪᔪᓕᕆᓂᖅ, ᐋᓐᓂᖅᑐᓕᕆᓂᕐᒥᒃ ᐊᔪᕈᓐᓃᖅᓴᕐᓂᖅ ᐊᒻᒪᓗ ᐊᖅᑯᑎᒋᓂᐊᖅᑕᒥᒃ ᓇᓗᓇᐃᔭᖅᐸᓪᓕᐊᓂᖅ ᐃᓚᒋᔭᐅᕗᑦ ᖃᐅᑕᒫᑦ ᐱᓕᕆᐊᒃᓴᖏᓐᓂᒃ ᐆᒪ ᑯᓄ ᐋᕆᐊᒃ-ᒪᑮᒧᑦ, ᑖᓐᓇ ᐃᖅᑲᓇᐃᔭᖅᑐᖅ ᑲᖏᖅᖠᓂᖅᒥᒃ ᑐᐊᕕᕐᓇᖅᑐᓕᕆᔨᒃᑯᑦ ᐅᒥᐊᖓᓂᒃ.

ᐋᕆᐊᒃ-ᒪᑮ, 21, ᑰᔾᔪᐊᖅᒥᐅᑕᖅ ᐃᓚᒋᔭᐅᔪᖅ 8-ᓂᒃ ᓄᓇᖃᖅᑳᖅᑐᓂᒃ ᐃᓕᓐᓂᐊᒃᑲᓐᓂᕆᐊᖅᓯᒪᔪᓂᒃ, ᑲᓇᑕᒥᙶᖅᑐᓂᒃ ᓇᑭᑐᐃᓐᓇᖅ ᐃᖅᑲᓇᐃᔭᖅᑎᑕᐅᓪᓗᑎᒃ ᑲᓇᑕᒥ ᓯᒡᔭᓄᑦ ᓴᐳᓐᓂᐊᖅᑎᒃᑯᓐᓄᑦ ᐊᐅᔭᖅ.

ᑖᒃᑯᐊ ᐱᓕᕆᐊᒃᓴᖏᑦ ᐃᓚᖃᕐᒥᔪᖅ ᐃᒪᕐᓂ ᖃᐅᔨᓴᖃᑦᑕᖅᖢᑎᒃ ᐃᒡᓗᓕᒑᕐᔫᑉ ᐅᐊᖕᓇᖓᓂᒃ, ᒫᐳᓪ ᕿᑭᖅᑕᐅᑉ ᑲᓇᖕᓇᖓᓂᒃ ᐊᒻᒪᓗ ᑎᑭᕋᖅᔪᐊᑉ ᓂᒋᐊᓂ, ᐃᓚᖃᖅᖢᓂᓗ ᑲᖏᖅᖠᓂᐅᑉ ᒥᒃᓵᓃᑦᑐᓂᒃ ᐃᒪᕐᓂᒃ, ᐅᒥᐊᖅᑐᖅᐸᒃᑐᓂᒃ ᑲᒪᒋᔭᖃᖅᐸᒃᖢᑎᒃ ᐊᒻᒪᓗ ᖃᐅᔨᒪᑎᑦᑎᓪᓗᑎᒃ ᓴᐳᓐᓂᖅᑏᑦ ᖃᓂᑦᑐᒦᓐᓂᖏᓐᓂᒃ, ᐋᕆᐊᒃ-ᒪᑮ ᐅᖃᓚᐅᕐᑐᖅ.

“ᐃᓄᐃᑦ ᓱᖏᐅᑎᕙᓪᓕᐊᓇᓱᒃᑐᑦ ᓴᐳᓐᓂᐊᖅᑎᒃᑯᓐᓂ ᖃᖏᖅᖠᓂᖅᒦᑦᑕᓂᒃ ᑕᐃᒪᓕ ᖃᐅᔨᑎᑦᑎᓇᓱᒃᑲᑦᑕ ᐅᕙᑦᑎᓐᓂᒃ ᐊᒻᒪᓗ ᐃᓄᖕᓂ ᖃᐅᔨᒪᖁᔨᓪᓗᑕ ᑕᒫᓃᓐᓂᑦᑎᓐᓂᒃ ᐃᑲᔪᕋᓱᒃᖢᑎᒍᑦ.”

ᑐᐊᕕᕐᓇᖅᑐᓕᕆᓂᕐᒧᑦ ᐱᓕᕆᐊᖑᑲᑕᑦᑐ ᐅᓄᕐᓂᕐᓴᐃᑦ ᐅᒥᐊᕐᓂ ᑲᖏᖅᖠᓂᖅᒧᑦ ᐅᓂᐊᖅᓯᑲᑕᒃᖢᑎᒃ, ᐅᖃᓚᐅᕐᑐᖅ, ᑭᓯᐊᓂᓕ ᑖᒃᑯᐊ ᐸᕐᓇᒃᓯᒪᑦᑎᐊᖅᑐᑦ ᐋᓐᓂᖅᑐᓕᕆᓂᕐᒥᒃ ᐊᒻᒪ ᑐᐊᕕᕐᓇᖅᑐᓕᕆᓂᕐᒥᒃ ᓲᕐᓗ ᒪᑯᓂᖓ ᑭᙳᔪᕕᓂᕐᓂᒃ ᐅᒥᐊᓂᒃ.

ᐃᓕᓐᓂᐊᖅᑎᐅᔪᑦ ᐱᓇᓱᐊᕈᓯᕐᓂᒃ ᐱᖓᓱᓂᒃ ᐱᓕᕆᐊᖃᖅᑎᑕᐅᕙᒃᑐᑦ. ᐊᕐᕌᓂᓕ, ᐅᓇ ᐋᕆᐊᒃ-ᒪᑮ ᓯᕗᓪᓕᖅᐹᒥᒃ ᐅᒥᐊᕐᒦᑎᓪᓗᒍ — ᑖᓐᓇᓗ ᑕᑭᓂᖃᖅᖢᓂ 28 ᕖᑦᓂᒃ — ᐅᖃᓚᐅᕐᑐᖅ ᑰᔾᔪᐊᖅᒧᑦ ᐅᑎᖃᑦᑕᓚᐅᕐᓂᖓᓂᒃ ᕿᑲᓚᐅᑲᓕᕌᖓᒥ.

ᐊᐅᔭᖅ — ᐊᐃᑉᐸᕆᓕᖅᑕᖓᓂᒃ — ᐅᖃᓚᐅᕐᑐᖅ ᑲᖏᖅᖠᓂᕐᒥᐅᑕᓂᒃ ᖃᐅᔨᒪᓂᕐᓴᐅᓕᓚᐅᕋᒥ ᓄᓇᓕᖕᓃᖏᓐᓇᓚᐅᕐᑐᖅ ᐊᐅᔭᓕᒫᖅ, ᐊᖏᕐᕋᖅᓯᒪᓂᕐᓴᐅᖅᑰᔨᓪᓗᓂ ᑕᐃᑲᓂ.

ᐋᕆᐊᒃ-ᒪᑮ ᐃᓕᓐᓂᐊᓚᐅᕐᓯᒪᔪᖅ ᓴᓇᐅᒐᓕᕆᓂᕐᒥᓐ, ᑎᑎᕋᐅᓯᓕᕆᓂᕐᒥᒃ ᐊᒻᒪᓗ ᑐᓴᐅᒪᔾᔪᑎᓕᕆᓂᕐᒥᑦ ᐅᕙᓂ ᔮᓐ ᐋᐸᑦ ᓯᓚᑦᑐᖅᓴᕐᕕᒃᒥᓐ ᒪᓐᑐᕆᐊᒥ, ᑭᓯᐊᓂᓕ ᐊᕐᕌᒍᒥ ᓄᖅᑲᖓᓚᐅᖅᖢᓂ ᓄᕙᒡᔪᐊᕐᓇᖅ-19 ᐱᔾᔪᑎᒋᓪᓗᓂᐅᒃ, ᐃᓕᓐᓂᐊᕈᒪᓕᕐᑐᖅ ᓱᕈᓯᕐᓂ ᐊᒻᒪ ᐃᓅᓱᒃᑐᓂᒃ ᑲᒪᒋᔭᖃᕈᓐᓇᕐᓂᕐᒥᒃ.

ᐊᓯᒃᑲᓐᓂᖓᑦᑕᐅᖅ ᐃᓱᒪᒋᔭᖓ ᐃᓕᓐᓂᐊᕈᒪᓪᓗᓂ ᐃᓄᓕᕆᓂᕐᒥᒃ ᓄᓇᕗᑦ ᓯᓚᑦᑐᖅᓴᕐᕕᒃᒥᓐ.

“ᐊᒃᓱᐊᓗᒃ ᖁᕕᐊᓇᕋᔭᕐᒥᖕᒪᑦ ᐃᓕᖅᑯᓯᕐᓂ ᐊᔪᕈᓐᓃᕐᓴᕐᓗᓂ,” ᐅᖃᖅᑐᖅ, ᐅᖃᒃᑲᓐᓂᖅᖢᓂ ᐃᓄᐃ ᐃᓕᓐᓂᐊᕈᑎᖏ ᐊᑐᕈᒥᒋᓪᓗᓂᐅᒃ.

“ᑕᒪᑐᒥᖓ ᖃᓪᓗᓈᓂ ᐱᔪᓐᓇᙱᓐᓇᒪ,” ᐅᖃᖅᑐᖅ. “ᐃᓕᑦᑎᔪᓐᓇᕋᔭᙱᓐᓇᒪ ᖃᓄᖅ ᐃᓄᖕᓂ ᐱᓕᕆᖃᑎᖃᕈᓐᓇᕐᓂᕐᒥᒃ ᐊᒻᒪᓗ ᖃᓄᖅ ᐃᑲᔪᕈᑎᒃᓴᓂᒃ ᓇᓂᓯᔪᓐᓇᕋᔭᙱᖢᖓ.”

ᐊᐃᑉᐸᖓ ᐊᐅᔭᕆᓕᖅᑕᖓᓂ ᐃᖅᑲᓇᐃᔭᖅᖢᓂ ᐅᒥᐊᕐᔪᐊᕐᒥᓐ, ᐋᕆᐊᒃ-ᒪᑮ ᐅᖃᓚᐅᕐᑐᖅ ᐅᑎᕈᒪᓂᕋᖅᖢᓂ ᐊᕐᕋᒍ, ᑭᓯᐊᓂᓕ ᐅᖃᖅᖢᓂ ᐃᓄᖕᓂ ᐱᓇᓱᒃᑲᓐᓂᖁᔨᓪᓗᓂ ᐃᖅᑲᓇᐃᔮᒃᓴᓂ ᐊᐅᔭᐅᓛᖅᑐᖅ.

“ᐊᒃᓱᐊᓗᒃ ᐱᐅᓇᔭᕐᑐᖅ ᐃᓄᖕᓂ ᐅᓄᕐᓂᖅᓴᓂᒃ ᐅᒥᐊᕐᔪᐊᕐᒦᑦᑐᖃᖅᐸᑦ.”

ᒫᓐᓇᓕ ᐊᐃᑉᐸᕆᔭᐅᔪᖅ ᒪᕐᕉᖕᓂ ᐃᓅᖕᓂ ᐃᖅᑲᓇᐃᔭᖅᑐᓂᒃ ᐊᒻᒪᓗ ᐃᓄᒃᑎᑐᑦ ᑐᓵᔨᐅᖃᑦᑕᕆᐊᖃᖅᖢᓂ ᐃᖅᑲᓇᐃᔭᖃᑎᖏᓐᓄᑦ ᐅᕝᕙᓘᓐᓃᑦ ᐃᓕᖅᑯᓯᕐᒥᓂ ᐅᖃᐅᓯᖃᕆᐊᖃᖅᐸᒃᖢᓂ ᐃᖅᑲᓇᐃᔭᖃᑎᖓᓄᑦ ᑕᒪᓐᓇᓗ ᐱᓕᕆᓂᓪᓚᕆᐅᖃᑕᐅᓪᓗᓂ.

“ᑐᓴᐅᒪᔭᐅᔭᕆᐊᓖᑦ ᐊᒻᒪᓗ ᖃᐅᔨᒪᔭᐅᔭᕆᐊᓖᑦ ᐃᓄᐃᑦ ᒥᒃᓵᓄᑦ ᐅᕙᒍᒃ ᒪᕐᕉᓪᓗᓂ ᐱᓕᕆᐊᕆᔭᕆᐊᖃᖅᐸᒃᖢᑎᒍ ᑕᒪᓐᓇᓗ ᐊᒃᓱᕈᓐᓇᕈᓘᔭᓕᖅᐸᒃᖢᓂ.”

ᐊᑕᐅᓯᕐᓕ ᑐᓗᖅᑕᕈᑎᐅᓗᐊᕐᑐᖅ ᐃᓄᖕᓄᑦ ᐱᓇᓱᖕᓂᐊᖅᑐᓄᑦ ᐅᓇ ᑐᓴᐅᒪᙱᓗᐊᕐᓂᖏᓐᓄᑦ ᐱᓕᕆᐊᒃᓴᒥᒃ, ᐅᖃᖅᑐᖅ, ᐊᒻᒪᓗ ᐃᓕᓐᓂᐊᖅᓯᒪᔭᕆᐊᖃᕐᓂᖅ ᓯᓚᑦᑐᖅᓴᕐᕕᒃᒥᑦ ᓯᓚᑦᑐᖅᓴᕐᕕᐊᓗᖕᒥᓪᓘᓐᓃᑦ ᐃᖅᑲᓇᐃᔮᖅᑖᕋᓱᒃᖢᓂ.

ᓄᓇᖃᖅᑳᖅᑐᑦ ᐃᓕᓐᓂᐊᑎᓂᒃ ᐃᖅᑲᓇᐃᔮᒃᓴᓕᕆᓂᖅ ᐱᓕᕆᐊᖑᕙᒃᑐᖅ ᑲᓇᑕᒥ ᓯᒡᔭᓂᒃ ᓴᐳᓐᓂᐊᖅᑎᓄᑦ ᑐᕌᒐᖃᕋᓱᒃᖢᑎᒃ ᐱᐅᓯᕚᓪᓕᖅᑎᑦᑎᓂᖅᒥᒃ ᐅᑭᐅᕐᑕᖅᑐᕐᒥ ᐱᕐᕈᓗᐊᕿᑎᑦᑎᑦᑕᐃᓕᓂᕐᒥᒃ ᓄᓇᓕᖕᓂ ᐃᖅᑲᓇᐃᔭᖅᑐᓂᒃ, ᐅᓇ ᔨᐅᕆᒥ ᕼᐊᓇᓯ ᐅᖃᓚᐅᕐᑐᖅ ᖃᕋᓴᐅᔭᒃᑯᑦ ᑎᑎᕋᖅᖢᓂ.

ᐅᖃᖅᖢᓂ ᐃᖅᑲᓇᐃᔭᖅᑎᒋᔭᐅᔪᑦ ᐅᒥᐊᕐᔪᐊᕐᒥᓐ ᐃᓕᓐᓂᐊᖅᑎᑦᑎᖃᑦᑕᕐᓂᖏᓐᓂᒃ ᐅᒥᐊᒃᑯᑦ ᐅᓗᕆᐊᓇᙱᑦᑐᑰᕈᓐᓇᕐᓂᕐᒥᒃ ᓄᓇᓕᖕᓃᑦᑐᓂᒃ, ᒪᑯᓂᖓᓗ ᐱᕐᕈᓗᐊᕿᑦᑕᐃᓕᓂᕐᒧᑦ ᐱᖁᑎᒋᔭᐅᔭᕆᐊᓕᖕᓂᒃ ᐅᒥᐊᕐᒥᓐ.

ᐅᑯᐊ ᑐᐊᕕᕐᓇᖅᑐᓕᕆᔨᒃᑯᑦ ᐱᓕᕆᕝᕕᖓ ᑲᖏᖅᖠᓂᖅᒥᒃ ᒪᑐᐃᓚᐅᕐᓯᒪᔪᖅ 2018-ᒥᑦ. ᓯᕗᓂᐊᓂᓪᓕ ᑕᒪᓐᓇ ᖃᐅᔨᓴᖅᑕᐅᖃᑦᑕᓚᐅᕐᓯᒪᔪᖅ ᑲᓇᑕᒥ ᓯᒡᔭᓂ ᓴᐳᓐᓂᐊᖅᑎᒃᑯᓐᓄᑦ ᓯᑯᓯᐅᑎᒦᖢᑎᒃ ᖁᓕᒥᒎᓕᒃᑯᓪᓘᓐᓃᑦ, ᐅᓇᑕᖅᑐᒃᓴᑦ ᖃᖓᑕᓲᖏᑦᑎᒍᓪᓘᓐᓃᑦ.

 

Share This Story

(0) Comments

Join the Conversation

Your email address will not be published. Required fields are marked *

*