ᑲᑎᒪᔩᑦ ᐊᖏᙱᑦᑐᑦ ᓄᐊᑦᒫᑦ ᑐᒃᓯᕋᐅᑎᒋᔭᖓᓂ ᐃᒪᕐᒧᑦ ᐊᑭᓕᒃᓴᖏᓐᓂ ᐲᖅᑎᑕᐅᖁᔨᑎᓪᓗᒋᑦ

For the English version of this story, please see City of Iqaluit denies Northmart manager’s request to forgive water debt.

ᐃᖃᓗᐃᑦ ᓄᓇᓕᐸᐅᔭᖓᓄᑦ ᑲᑎᒪᔩᑦ ᐊᖏᓚᐅᙱᑦᑐᑦ ᐱᓇᓱᐊᕈᓯᐅᓚᐅᕐᑐᒥ ᑐᒃᓯᕋᐅᑎᒋᔭᐅᔪᒥ ᓄᐊᑦ ᕗᐃᐊᔅᑦ ᑲᒻᐸᓂᒃᑯᓐᓂ ᐊᑭᓕᒃᓴᖏᓐᓂᒃ ᖁᕝᕙᓯᓗᐊᖅᑐᓂ ᐃᒪᕐᒧᑦ ᑲᒻᐸᓂᐅᑉ ᓂᐅᕕᕐᕕᐊᑕ ᐃᓚᖓ ᐊᑖᒍᑦ ᑯᑐᑲᑕᓚᐅᕐᓯᒪᓂᖓᓄᑦ.

ᐋᓚᓐ ᓚᐅᕆ, ᐊᐅᓚᑦᑎᔨᐅᔪᖅ ᐃᖃᓗᐃᑦ ᓄᐊᑦᒫᑦ ᓂᐅᕕᕐᕕᒃᒥ, ᑲᑎᒪᔨᓄ ᐅᖃᓚᐅᕐᒪᑦ ᑲᑎᒪᑎᓪᓗᒋᑦ ᕕᕝᕗᐊᕆ 27-ᒥ ᑖᒃᑯᐊ ᑲᒻᐸᓂᒃᑯᑦ ᓈᒻᒪᙱᓕᐅᕈᑎᒥ ᖃᐅᔨᑕᐃᓐᓇᓚᐅᕐᓂᕋᖅᖢᓂᒋᑦ ᓄᕕᐱᕆᐅᑎᓪᓗᒍ.

ᐅᑯᐊ ᓄᐊᑦ ᕗᐃᐊᔅᑦ ᑲᒻᐸᓂᒃᑯᑦ ᑎᑎᕋᕐᕕᖓ ᐃᖃᓗᖕᓄᑦ ᑎᑎᕋᓚᐅᕐᓯᒪᖕᒪᑕ ᐅᓇ ᑕᖅᑭᕐᒧᑦ ᐊᑭᓕᐅᑎᒋᕙᒃᑕᖓ ᒫᓃᑉᐸᒃᑐᖅ $1,700 ᒥᒃᓵᓂ ᐅᓄᕐᓯᕚᓪᓕᓚᐅᕐᓯᒪᓂᖓᓂᒃ ᓯᑎᐱᕆᒥ ᑎᑭᑦᑐᒥᒃ $7,500-ᓄᑦ ᐊᒻᒪᓗ ᐅᒃᑑᐱᕆᒥ ᖁᕝᕙᖅᐹᓪᓕᒃᑲᓐᓂᕆᓪᓗᓂ ᑎᑭᑦᑐᒥ $24,000-ᒧ.

ᓯᑎᐱᕆᒥ ᑎᓯᐱᕆᒧᑦ, ᑲᑎᖢᑎᒃ ᐊᑭᓕᒃᓴᕆᔭᐅᓕᓚᐅᕐᑐᖅ ᐅᖓᑖᓅᓚᐅᕐᑐᖅ $56,000, $50,000-ᓂ ᖁᕝᕙᓯᖕᓂᕐᓴᒻᒪᕆᐅᓪᓗᓂ ᑕᐃᒪᓐᓇ ᐊᑐᖃᑦᑕᕐᓂᑯᖏᓐᓂᒃ, ᓚᐅᕆ ᐅᖃᕐᑐᖅ.

ᐊᐱᕆᓚᐅᕐᑐᖅ ᑲᑎᒪᔨᓄᑦ ᐊᑭᓕᒃᓴᖏᑦᑕ ᐃᓚᖏᑦ ᐊᑐᕈᓐᓃᖅᑎᑕᐅᔪᓐᓇᕆᐊᒃᓴᖏᓐᓂᒃ.

ᐅᑯᐊ ᓄᐊᑦ ᕗᐃᐊᔅᑦ ᑲᒻᐸᓂ ᐃᖃᓗᐃᑦ ᓄᐊᑦᒫᑦᖓᓂ ᐱᖁᑎᖃᖅᑐᑦ ᐊᒻᒪᓗ ᐅᓄᕈᓘᔭᖅᑐᓂᒃ ᐃᒡᓗᓂ ᐊᑐᖅᑐᐊᖅᑕᐅᕙᒃᑐᓂᒃ.

ᓚᐅᕆ ᐅᖃᓚᐅᕐᑐᖅ ᑲᒻᐸᓂᖓ ᓄᓇᓕᐸᐅᔭᐃᑦ ᑮᓇᐅᔭᓕᕆᔨᖏᓐᓄᑦ ᐅᖃᖃᑎᖃᓚᐅᕐᓯᒪᓂᖏᓐᓂᒃ ᓄᕕᐱᕆ 16ᒥ ᐊᐱᕆᓇᓱᒃᖢᓂ ᐃᒪᕐᒧᑦ ᐊᑐᖅᑕᐅᔪᕕᓂᖅ ᖁᕝᕙᓯᓗᐊᖅᑐᐊᓘᓂᖓᓂᒃ ᐃᓱᒪᓪᓗᓂ ᓄᓇᓕᐸᐅᔭᐃᑦ ᑕᒻᒪᕐᓯᒪᔭᕆᐊᒃᓴᖏᓐᓂᒃ.

ᓄᓇᓕᐸᐅᔭᓄᑦ ᑮᓇᐅᔭᓕᕆᔨ, ᐲᑕ ᕚᓐ ᓯᑐᕋᐃᓐ, ᑭᐅᔾᔪᑎᖃᓚᐅᕐᑐᖅ ᓄᐊᑦ ᕗᐃᐊᔅᑦ ᑲᒻᐸᓂᒃᑯᑦ ᐃᓱᒫᓘᑎᖓᓂ ᑎᓯᐱᕆ 7-ᐅᑎᓪᓗᒍ, ᐅᖃᖅᖢᓂ ᐅᒃᑑᐱᕆᒧᑦ ᐊᑭᓕᒐᒃᓴᖅ ᑕᒻᒪᕐᓯᒪᙱᓐᓂᕋᖅᖢᓂᐅᒃ, ᓚᐅᕆ ᐅᖃᕐᑐᖅ. ᕚᓐ ᓯᑐᕋᐃᓐ ᐅᖃᓕᓚᐅᕐᑐᖅ ᑯᑐᑲᑕᒃᑐᖃᕆᐊᒃᓴᖓᓂ.

ᑲᒻᐸᓂᐅᑉ ᑭᒡᒐᖅᑐᐃᔨᖏ ᑕᑯᔭᖅᑐᓚᐅᕐᓯᒪᔪᑦ ᐃᒡᓗ 194-ᒥ, ᐋᑎᒃ ᕙᓐᓱᔅ ᖃᓂᒋᔭᖓᓃᑦᑐᒥ ᐊᒻᒪᓗ ᐅᖓᓯᒋᐊᕐᔪᒃᖢᓂᐅᒃ NC ᓂᐅᕕᕐᕕᐅᑉ, ᑕᐃᑲᓂᓗ ᓇᓂᓯᓕᓚᐅᕐᓯᒪᔪᑦ ᓱᓪᓗᒥ ᓱᕋᒃᓯᒪᔪᒥᒃ ᐃᒡᓘᑉ ᐊᑖᓂ.

ᑖᓐᓇ ᑯᑐᒃᑐᖅ ᐋᖅᑭᒃᑕᐅᓚᐅᕐᓯᒪᔪᖅ ᐊᒻᒪᓗ ᓄᓇᓕᐸᐅᔭᓄᑦ ᐅᖃᐅᓯᐅᓪᓗᓂ.

ᓚᐅᕆ ᐅᖃᓚᐅᕐᑐᖅ ᓄᐊᑦ ᕗᐃᐊᔅ ᑲᒃᐸᓂᒃᑯᑦ ᓄᓇᓕᐸᐅᔭᓂ ᑐᓴᖅᑎᑕᐅᓚᐅᕐᓯᒪᙱᑦᑐᑦ “ᖁᑦᑎᓗᐊᓂᖓᓂᒃ ᐃᒪᖅ ᐊᑐᖅᑕᐅᔪᖅ,” ᐅᖃᕐᑐᖅ.

ᑲᑎᒪᔨᒐᓚᐃ ᐃᓱᒪᓚᐅᕐᑐᑦ ᓄᓇᓕᐸᐅᔭᐃᑦ ᐊᑭᓕᒃᓴᕆᔭᐅᔪᒥᒃ ᐸᓯᔭᒃᓴᐅᔾᔪᑎᖃᕆᐊᖃᙱᓐᓂᖏᓐᓂᒃ.

“ᐊᐃᑦᑖ ᐅᖃᐅᓯᕆᓵᖅᑕᐃᑦ ᓈᒻᒪᖂᔨᙱᓗᐊᕐᒪᑦ…ᐅᖃᖅᑎᓪᓗᑎ ᓄᓇᓕᐸᐅᔭᐃᑦ ᑐᓴᐅᒪᑎᑦᑎᔭᕆᐊᖃᕐᓂᖏᓐᓂᒃ ᐃᒪᕐᒥ ᐊᑐᖃᑦᑕᕐᓂᕆᔭᓯ ᐅᓄᓗᐊᓕᕐᓂᖓᓂ,” ᐅᖃᕐᑐᖅ ᑲᑎᒪᔨ ᑲᐃᐅᓪ ᓴᐳᑦ.

“ᓄᓇᓕᐸᐅᔭᐃᑦ ᑲᒪᒋᔭᖃᙱᒻᒪᑕ ᐃᓕᔅᓯᓐᓂ ᖃᐅᔨᑎᑦᑎᖃᑦᑕᕆᐊᖃᕐᓂᕐᒥᒃ ᐱᖁᑎᓯ ᓈᒻᒪᙱᓕᐅᕈᑎᖃᖅᑎᓪᓗᒋᑦ.”

ᓴᐳᑦ ᐅᖃᓚᐅᕐᑐᖅ ᐃᖃᓗᐃᑦ ᓄᓇᓕᐸᐅᔭᐃᑦ ᐅᖃᕐᓯᒪᙱᓐᓂᖏᓐᓂᒃ ᐊᑭᓕᒃᓴᕆᔭᐅᔪᓂᒃ ᐊᑐᕈᓐᓃᖅᑎᑦᑎᔪᓐᓇᕐᓂᖏᓐᓂᒃ ᑕᐃᒪᐃᓂᕐᒧᑦ. ᐅᖃᖅᖢᓂ ᐊᑭᓕᒐᒃᓴᖅ ᓄᐊᑦ ᕗᐃᐊᔅ ᑲᒻᐸᓂᐅᑉ ᑲᒪᒋᔭᒃᓴᕆᒪᒍ.

ᐃᖃᓗᐃᑦ ᓄᐊᑦᒫᑦᖓ ᐅᖃᐅᓯᐅᓗᐊᓚᐅᕐᓯᒪᔪᖅ ᕕᕝᕗᐊᕆ 23-ᒥ ᓰᐲᓰᒃᑯᑦ The Fifth Estate-ᖓᒍᑦ ᖃᐅᔨᓴᖅᖢᑎ ᐊᑭᑦᑐᖅᐹᓪᓕᖅᑐᕕᓂᕐᓂ ᓂᐅᕕᕐᕕᖕᒥᑦ 2022 ᐃᓱᓕᓕᖅᑎᓪᓗᒍ.

ᒪᐃᔭᐅᑉ ᑐᒡᓕᖓ ᑭᒻ ᓯᒥᑦ ᖃᐅᔨᔪᒪᓚᐅᕐᒪᑦ, “ᖃᓄᐃᒻᒪ ᑲᒻᐸᓂ ᑮᓇᐅᔭᓕᐅᒻᒪᕆᐊᓗᒃᖢᑎᒃ ᐃᖃᓗᖕᓂ ᓄᓇᖃᖅᑐᓂ ᐊᑭᓕᒃᓴᖏᓐᓂ ᐲᖅᑕᐅᖁᔨᕙ?”

ᐅᖃᓕᒫᓚᐅᕐᑐᖅ ᖃᔅᓯᐅᓂᖏᓐᓂᒃ ᑲᒻᐸᓂᐅᑉ ᐊᕐᕌᒍᒧᑦ ᐅᓂᒃᑳᖏᓐ ᐅᖃᖅᖢᓂ ᑖᒃᑯᐊ ᔭᓄᐊᕆ 2023 ᐃᓱᐊᓄ ᑎᑭᓯᒪᓂᖏᓐᓂᒃ, ᑖᒃᑯᐊᓕ ᑲᒻᐸᓂᐅᔪᑦ $2.3 ᐱᓕᐊᓐ ᑖᓚᓂ ᓂᐅᕐᕈᑎᓄᑦ ᑮᓇᐅᔭᓕᐅᓚᐅᕐᓯᒪᔪᑦ ᐊᒻᒪᓗ ᐊᒥᐊᓕᑲᒥ ᐊᒻᒪ ᑲᓇᑕᒥ ᐊᐅᓚᑕᐅᔪᑦ ᑮᓇᐅᔭᓕᐅᕐᓯᒪᓪᓗᑎᒃ $146 ᒥᓕᐊᓐ ᑖᓚᓂ.

“ᐅᖃᕈᓐᓇᙱᑦᑐᖓ ᑕᒪᐃᓐᓄ ᑲᒻᐸᓂᒧᑦ ᑭᓯᐊᓂᓕ ᐅᖃᕈᓐᓇᖅᑐᖓ ᐊᑐᓂ ᓄᓇᓕᖕᓃᑦᑐ ᓂᐅᕕᕐᕖᑦ ᐃᒻᒥᒃᑰᕐᒪᑕ,” ᓚᐅᕆ ᐅᖃᕐᑐᖅ.

ᐅᓄᕐᓂᕐᓴᐃᑦ ᑲᑎᒪᔩᑦ ᐅᖃᓪᓚᓚᐅᖅᖢᑎᒃ ᐅᓇ ᒪᐃᔭ ᓵᓚᒪᓐ ᐊᕙ ᖁᔭᓕᓚᐅᕐᑐᖅ ᓚᐅᕆᒧ ᖃᐃᓚᐅᕐᓂᖓᓂᒃ ᐊᒻᒪ ᐅᖃᖅᖢᓂ, “ᐅᓐᓅᔪᕐᓕ ᑐᒃᓯᕋᐅᑎᒋᔭᐃᑦ ᐊᖏᕈᑎᒋᙱᓐᓇᑦᑎᒍᑦ.”