ᑲᑎᕕᒃ ᓄᓇᓕᓕᒫᑦ ᒐᕙᒪᖓ ᒪᓂᒻᒪᐃᔪᑦ ᕙᐃᐳ ᐋᑉᑎᒃᑯᑦ ᐃᑭᐊᖅᑭᕕᒃᓂ ᐊᑦᑕᑕᕈᓐᓇᐅᑎᐅᓇᔭᖅᑐᓂᒃ ᓄᓇᕕᒃᒥᑦ ᓄᓇᕗᒧᑦ

For an English version of this story, please see KRG offers fibre optic internet connection from Nunavik to Nunavut.

ᑲᑎᕕᒃ ᓄᓇᓕᓕᒫᑦ ᒐᕙᒪᖓᓄᑦ ᐱᓕᕆᔨᒻᒪᕆᐅᔪᑦ ᐅᖃᖅᑐᑦ ᐅᓇ ᑕᒫᓂ ᐃᑭᐊᖅᑭᕕᒃᓄᑦ ᐊᑦᑕᑕᕈᓐᓇᐅᑎ ᕙᐃᐳ ᐋᑉᑎᒃ ᐱᓕᕆᐊᖑᔪᖅ ᐱᔪᓐᓇᕐᕕᖃᕋᔭᕐᑐᑦ ᓄᓇᕗᒧᑦ ᐊᑦᑕᑕᕈᑎᐅᔪᓐᓇᖅᑐᓂᒃ.

ᐅᓇ ᐊᑦᑕᑕᕈᓐᓇᐅᑎ ᒫᓐᓇ ᑎᓴᒪᓂᒃ ᓄᓇᕕᒃᒥ ᓄᓇᓕᖕᓂ ᐱᔨᑦᑎᕋᐅᑎᒋᔭᐅᔪᖅ ᑕᓯᐅᔭᕐᔪᐊᑉ ᓯᒡᔭᖏᓐᓃᑦᑐᓂᒃ: ᑰᔾᔪᐊᕌᐱᒃ, ᐅᒥᐅᔭᖅ, ᐃᓄᒃᔪᐊᒃ ᐊᒻᒪ ᐳᕕᕐᓂᑑᖅ.

ᐅᑯᓄᖓ ᑎᑭᑦᑐᓐᓇᖅᑐᓂᒃ ᐊᑯᓕᕕᒃᒧᑦ, ᐃᕗᔨᕕᒃᒧᑦ ᐊᒻᒪ ᓴᓪᓗᐃᓄ ᐱᐊᓂᒃᑕᐅᓂᐊᕋᓱᒋᔭᐅᔪᖅ ᑕᒪᑐᒪᓂ ᐊᕐᕌᒍᒥ. ᑕᒪᕐᒥ ᓄᓇᓖᑦ ᐊᑦᑕᑕᖅᑕᐅᓯᒪᓕᕐᓂᐊᖅᑐᑦ 2026 ᑎᑭᓚᐅᖅᑎᓐᓇᒍ.

ᐅᒥᐅᔭᖅᒥ, ᐊᑦᑕᑕᕈᓐᓇᐅᑎ ᐃᓚᒋᐊᕐᕕᖃᕐᑐᖅ ᓴᓂᑭᓗᐊᕐᒧᐊᕈᓐᓇᕋᔭᖅᑐᒥ. ᐊᒻᒪᓗ ᓴᓪᓗᐃᑦ ᐊᑦᑕᑕᐅᑎᑖᖅᑎᓪᓗᒋ, ᐊᑦᑕᑕᕈᓐᓇᐅᑎᒧᑦ ᐃᓚᒋᐊᕐᕕᖃᕐᓂᐊᖅᑐᖅ ᐅᑯᐊ ᑭᒻᒥᕈᑦ, ᑭᙵᐃᑦ ᐊᒻᒪ ᐃᖃᓗᐃᑦ ᐊᑦᑕᑕᖅᑎᑕᐅᔪᒪᓐᓂᖅᐸᑕ.

ᑖᓐ ᐱᓗᕆᓐ, ᑐᓴᐅᒪᔾᔪᑎᓕᕆᓂᕐᒧᑦ ᖃᐅᔨᒪᔨᒋᔭᐅᔪᖅ ᐅᑯᓇᓂ ᑲᑎᕕᒃ ᓄᓇᓕᓕᒫᑦ ᒐᕙᒪᖓᓄᑦ, ᐅᖃᓚᐅᕐᑐᖅ ᓄᓇᕕᒃ ᐅᖃᖃᑎᖃᕐᓯᒪᓂᖓᓂᒃ ᓄᓇᕗᒥᑦ ᒐᕙᒪᒃᑯᓐᓂᒃ ᐊᑦᑕᑕᕈᓐᓇᐅᑎᖃᕈᓐᓇᕐᓂᖏᓐᓂᒃ.

“ᑐᓂᓯᒪᓕᕐᑕᕗᑦ ᖃᓄᐃᓕᐅᕈᑎᐅᔪᓐᓇᕋᔭᕐᑐᑦ ᓄᓇᕗᒥᑦ ᒐᕙᒪᒃᑯᓐᓄᑦ ᐊᑦᑕᑕᕈᓐᓇᕐᓂᕐᒧᑦ ᓴᓪᓗᐃᓂᒃ, ᐊᒻᒪᓗ ᑕᒪᐅᓇ ᒪᓐᑐᕆᐊᑰᖅᑎᑕᐅᓗᓂ ᓴᓪᓗᐃᑦ ᐊᖅᑯᓵᖅᑕᐅᑲᓐᓂᓕᕐᓗᑎᒃ ᐊᒻᒪᓗ ᓴᓪᓗᐃᑦ ᑭᒻᒥᕈᒻᒧᑦ ᐊᑦᑕᑕᖅᑎᑦᑎᓗᓂ ᐊᒻᒪ ᑭᒻᒥᕈᒻᒥ ᐃᖃᓗᖕᓄᑦ,” ᐅᖃᕐᑐᖅ.

ᑲᑎᕕᒃ ᓄᓇᓕᓕᒫᑦ ᒐᕙᒪᖓ ᑖᔅᓱᒥᖓ ᑲᐃᐳᒥ ᐃᒪᐅᑉ ᐃᓗᐊᓃᑦᑎᑦᓂᐊᕐᒪᑕ ᓄᓇᕗᑦ ᐊᑦᑕᑕᕐᕕᒋᔪᓐᓇᕐᓂᐊᖅᑕᖓᓂ ᑭᓯᐊᓂᓕ ᐱᓗᕆᓐ ᐅᖃᓚᐅᕐᑐᖅ ᐃᓱᒪᓕᐅᕆᔭᕆᐊᖃᕐᓂᖏᓐᓂᒃ ᓄᓇᕗᒥᑦ ᒐᕙᒪᒃᑯᑦ.

ᓄᓇᕗᒥᑦ ᒐᕙᒪᒃᑯ ᓴᖅᑭᑎᑦᑎᓯᒪᓕᕐᒪᑕ ᐅᓄᕈᓘᔭᕐᑐᓂᒃ ᐃᑲᔫᑎᒃᓴᓄᑦ ᑐᓴᒐᒃᓴᓂᒃ ᐊᒻᒪᓗ ᑐᒃᓯᕋᐅᑎᓂᒃ ᐱᑲᑕᒍᒪᓪᓗᑎᒃ ᐆᒧᖓ ᕙᐃᐳ ᐋᑉᑎᒃᒥ ᐃᑭᐊᖅᑭᕕᖃᕈᑎᒥ ᑭᓯᐊᓂᓕ ᑕᒪᑐᒧᖓ ᓴᖅᑭᑦᑐᖃᒻᒪᕆᓚᐅᙱᑦᑐᖅ.

ᕼᐊᓚ ᑐᐋᓪ, ᐅᖃᖅᑎᒋᔭᐅᔪᖅ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᓂ, ᐅᖃᓚᐅᕐᑐᖅ ᖃᕋᓴᐅᔭᒃᑯᑦ ᑎᑎᕋᖅᖢᓂ ᓄᓇᕗᒥᑦ ᒐᕙᒪᒃᑯᑦ ᕿᓂᕐᓂᕋᖅᖢᓂᒋ5 ᐊᔾᔨᒌᙱᑑᑎᓂᒃ ᐊᑐᖅᑕᐅᔪᓐᓇᕋᔭᖅᑐᓂᒃ ᕙᐃᐳ ᐋᑉᑎᒃᑯᑦ ᐃᑭᐊᖅᑭᕕᓕᕆᓂᕐᒧᑦ.

ᑐᐋᓪ ᐅᖃᓚᐅᕐᑐᖅ “ᖃᖓᑦᑎᐊᓵᖅ ᓄᖅᑲᖅᑎᑦᑎᓚᐅᕐᒪᑕ ᐊᑭᑦᑐᕋᐅᑎᒥᒃ ᑕᕆᐅᑉ ᐊᑖᒍᑦ ᕙᐃᐳᑎᒍᑦ ᐊᑦᑕᑕᕈᓐᓇᐅᑎᒥᒃ ᐃᖃᓗᖕᓄᑦ. ᑖᓐᓇ ᐊᑭᑦᑐᕋᐅᑎᒍᑎ ᓄᖅᑲᖅᑎᑕᐅᓯᒪᓂᖓᓄᑦ ᑖᒃᑯᐊ ᐱᓕᕆᕝᕕᐅᔪᑦ ᖃᐅᔨᓇᓱᑲᑕᒃᑐᑦ ᑕᒪᑐᒧᖓ ᓯᕗᒧᑦ ᐱᕙᓪᓕᐊᔾᔪᑎᒃᓴᓂᒃ, ᐃᓚᖃᖅᖢᓂ ᐱᓕᕆᖃᑎᖃᕐᓂᕐᒥᒃ ᑲᑎᕕᒃ ᓄᓇᓕᓕᒫᑦ ᒐᕙᒪᖓᓂᒃ.”

ᑕᖅᑭᐅᓚᐅᕐᑐᒥ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᑦ ᒥᓂᔅᑕᖓ ᑕᐃᕕᑦ ᔪᐊᓇᓯ ᐅᖃᓚᐅᕐᓯᒪᔪᖅ ᖃᖓᑦᑎᐊᓵᖅ ᑐᒃᓯᕋᐅᑎᒃ ᐱᓇᓱᒍᑎᓂᒃ ᐆᒧᖓ ᕙᐃᐳ ᐋᑉᑎᒃ ᐱᓕᕆᐊᒃᓴᒧᑦ ᑭᐅᔭᐅᓚᐅᕐᓯᒪᙱᒻᒪᑦ ᐊᑭᑦᑐᕋᐅᑎᔪᒪᔪᓂᒃ.

“ᕿᓂᕋᓱᒃᑲᑦᑕ ᐊᓯᖏᓐᓂᒃ ᖃᓄᐃᓕᐅᕈᑎᐅᔪᓐᓇᖅᑐᓂᒃ ᑕᒪᒃᑯᐊ ᑎᒥᐅᔪᑦ ᑕᐃᒪᓐᓇᑦᑕᐃᓐᓇᖅ ᐱᓕᕆᐊᖃᕈᒪᔭᕆᐊᒃᓴᖏᓐᓂᒃ ᐱᓇᓱᒃᓯᒪᔭᑦᑎᓐᓂᒃ,” ᔪᐊᓇᓯ ᐅᖃᓚᐅᕐᓯᒪᔪᖅ ᒪᐃ 29-ᒥ ᒪᓕᒐᓕᕆᔨᕐᔪᐊᑦ ᑲᑎᒪᑎᓪᓗᒋ ᑭᐅᓪᓗᓂ ᐊᐱᖅᑯᑎᒋᔭᐅᔪᒥᒃ ᐃᖃᓗᐃᑦ-ᑕᓯᕐᓗᒃᒧᑦ ᒪᓕᒐᓕᐅᕐᑎᒧᑦ ᔪᐊᔾ ᕼᐃᒃᔅᒧᑦ.

“ᓱᓕ ᐱᓕᕆᖃᑎᖃᕈᒪᔪᖓ ᐱᓕᕆᖃᑎᒋᔭᓐᓂᒃ ᐅᕙᓂ ᖃᓄᖅ ᑮᓇᐅᔭᖅᑐᔪᓄᑦ ᐃᑲᔫᑎᒃᓴᑦ ᐊᑐᑦᑎᐊᓛᖑᓇᔭᕆᐊᒃᓴᖏᓐᓂᒃ ᐊᒻᒪᓗ ᐅᓇ ᕙᐃᐳ ᐊᕐᕌᒍᒐᓴᐅᓕᕐᑐᓂᒃ ᓯᕗᓪᓕᐅᑎᓯᒪᒐᑦᑎᒍᑦ.”

ᐊᐱᕐᓱᖅᑕᐅᓪᓗᓂ ᔫᓂ 6-ᒥ, ᕼᐃᒃᔅ ᐅᖃᐅᓯᖃᓚᐅᕐᑐᖅ ᑕᒫᓂ ᐃᑭᐊᖅᑭᕕᖓ ᖃᓄᐃᑉᐸᓪᓕᐊᓂᖓᓂᒃ ᐃᒪᓐᓇ “ᐊᕐᕌᒍᒐᓴᖕᓂ ᓯᕗᓪᓕᐅᓂᕐᓴᒻᒪᕇᑦ” ᖃᓄᐃᓕᐅᕈᑎᐅᔪᓂᒃ ᓄᓇᕗᒥᑦ ᐱᓕᕆᐊᕆᓯᒪᔭᖏᓐᓂᒃ.

“ᐅᓪᓗᖅ ᐃᓱᓕᑦᑕᕌᖓᑦ ᐊᑐᕆᐊᖃᕋᑦᑕ ᕙᐃᐳᒥ ᓄᓇᕗᒥᑦ, ᐊᒻᒪᓗ ᐊᑭᓕᕐᓱᕆᐊᖃᕐᓂᖓ ᓈᒻᒪᓈᕐᓯᒪᓇᓱᒡᓗᓂ ᐃᑲᔪᕈᑎᐅᔪᓐᓇᕐᓂᐊᕐᒪᑕ ᓄᓇᕗᒥᑦ,” ᐅᖃᕐᑐᖅ.

“ᑕᐃᒪᓕ ᐱᓕᕆᖃᑎᒌᒃᑐᖃᕈᓐᓇᕐᐸᑦ ᑕᐃᒪᓕ ᐊᒥᐊᒃᑯᐃᑦ ᐃᑲᔫᑎᒃᓴᑦ ᐊᓯᖏᓐᓄᑦ ᐊᑐᖅᑕᐅᔪᓐᓇᕋᔭᖅᖢᑎᒃ.”

ᑲᑎᕕᒃ ᓄᓇᓕᓕᒫᑦ ᒐᕙᒪᖓ ᓱᓕ ᑐᙵᓱᒃᑎᑦᑎᔪᑦ ᓯᑖᓕᖕᒃᒥᑦ

ᓱᓕ ᐋᖅᑭᒃᓱᐃᕙᓪᓕᐊᑎᓪᓗᒋᑦ ᑕᒫᓂ ᑕᕆᐅᑉ ᐃᓗᐊᒎᖅᑐᓂᒃ ᑲᐃᐳᓂ, ᑲᑎᕕᒃ ᓄᓇᓕᓕᒫᑦ ᒐᕙᒪᖓᓄᑦ ᐱᓕᕆᔨᒻᒪᕇᑦ ᐅᖃᓚᐅᕐᑐᑦ ᓱᓕ ᑐᙵᓱᒃᑎᑦᑎᓂᕋᖅᖢᑎᒃ ᖁᒻᒧᒃᑎᑕᐅᓯᒪᔪᒃᑯᑦ ᐊᑐᖅᑕᐅᔪᖅ ᐅᓇ SpaceX’s Starlink ᐃᑭᐊᖅᑭᕕᒃᒥᑦ ᐱᔨᑦᑎᕋᖅᑎᓂᒃ.

ᑎᐅᕈᓪ ᑰᒻᑕᓐ, ᑐᑭᒧᐊᖅᑎᑦᑎᔨ ᑲᑎᕕᒃ ᓄᓇᓕᓕᒫᑦ ᒐᕙᒪᖓᓂᒃ ᐊᐅᓚᑦᑎᔨᓂᒃ, ᐃᓱᒪᓚᐅᕐᑐᖅ ᒫᓂ 600-ᖏᓐᓃᓐᓂᖏᓐᓂᒃ ᓯᑖᓕᖕᒃᒥ ᐊᑐᖅᑐᑦ ᓄᓇᕕᒃᒥ ᐊᒻᒪᓗ 2,100 ᐅᖓᑖᓃᑦᑐᑦ ᐊᑐᖅᖢᑎᒃ ᑕᒫᓂ ᐱᔨᑦᑎᕋᐅᑎᖏᓐᓂᒃ.

“ᑐᙵᓱᒃᑎᑦᑎᔪᒍᑦ ᓯᑖᓕᖕᒃ ᐱᔪᓐᓇᕐᓂᖓᓂᒃ; ᐊᑐᖅᑕᐅᔪᓐᓇᓕᖕᒪᑦ ᐊᑦᑕᑕᕈᓐᓇᐅᑎᖃᕐᓂᖅ ᐊᑐᖅᑕᐅᔭᕆᐊᖃᒻᒪᕆᒃᑎᓪᓗᒍ,” ᐅᖃᕐᑐᖅ.

“ᑭᓱᓕᒫᓂᒃ ᑕᑯᑲᑕᒍᓐᓇᕐᓯᔪᑦ ᑕᐃᒪᓐᓇᓗ ᑐᙵᓱᒃᑎᑕᕗᑦ; ᑭᓯᐊᓂᓕ, ᐱᓇᓱᐊᕐᓂᐊᕋᑦᑕ ᐱᐊᓂᒐᓱᒡᓗᒋ ᕙᐃᐳ ᐋᒃᑎᒃᒧᑦ ᐊᑦᑕᑕᕈᓐᓇᐅᑎᓕᕆᓂᖅ.”