ᑲᑎᖃᑎᖃᕐᓂᖅ ᑭᖕᒥ ‘ᓇᓗᓇᐃᒃᑯᑎᒥ ᐱᒻᒪᕆᐅᓂᕐᓴᐅᔪᖅ’, ᓄᓇᖃᖅᑳᖅᑐᓄᑦ ᓯᕗᓕᐅᕐᑎᑦ

For the English version of this story, see Meeting with King ‘more than symbolic,’ say Indigenous leaders.

ᓄᓇᖃᖅᑳᖅᑐᓄᑦ ᓯᕗᓕᐅᖅᑏᑦ ᐅᖃᓪᓚᖃᑎᖃᓚᐅᕐᑐᑦ ᑭᖕ ᓵᔅᒥ ᐊᖓᔪᖅᑳᙳᖅᑎᑕᐅᓚᐅᖅᑎᓐᓇᒍ ᐅᖃᓚᐅᕐᑐᑦ ᑲᑎᖃᑎᒌᖕᓂᖓ “ᑐᑭᖃᑦᑎᐊᖅᖢᓂ” ᐱᒋᐊᕐᓂᖃᓚᐅᕐᑐᖅ ᐱᓕᕆᖃᑎᖃᕐᓂᐊᕐᓂᒃᑯᑦ.

ᒐᕙᓇ ᔭᓄᕈᓪ ᒥᐊᓕ ᓴᐃᒪᓐ; ᓇᐃᑕᓐ ᐅᐱᐊᑦ, ᐊᖓᔪᖅᑳᖅ ᐃᓄᐃᑦ ᑕᐱᕇᑦ ᑲᓇᑕᒥ; ᕉᔅᐋᓐ ᐋᑦᓯᐸᑦ, ᑲᓇᑕᒥ ᐊᖓᔪᖅᑳᖅ ᓄᓇᖃᖅᑳᖅᑐᓄᑦ ᐊᓪᓚᓄᑦ; ᐊᒻᒪᓗ ᑳᓯᑎ ᑭᐅᕋᓐ, ᐊᖓᔪᖅᑳᖅ ᐊᓪᓚᖓᔪᐃᑦ ᑲᑎᒪᔨᕐᔪᐊᖏᓐᓄᑦ ᑲᓇᑕᒥ ᑲᑎᖃᑎᖃᓚᐅᕐᑐᑦ ᓵᔅᒥ ᒪᐃ 4ᒥ ᐸᑭᖕᕼᐊᒻ ᐹᓕᔅᒥ.

ᐅᖃᓪᓚᒃᑎᓪᓗᒍ ᓴᐃᒪᓐ ᐅᖃᓚᐅᕐᑐᖅ ᑲᑎᒪᓂᖅ ᓯᕗᓪᓕᖅᐹᖑᓚᐅᕐᓯᒪᔪᖅ ᑕᐃᒪᐃᓕᐅᕈᑎᐅᔪᓂᒃ ᓄᓇᖃᖅᑳᖅᑐᓄᑦ ᐊᒻᒪᓗ ᐳᕆᑎᔅ ᐊᖓᔪᖅᑳᒻᒪᕆᐊᓂᒃ ᐊᒻᒪᓗ ᐅᓪᓗᖅ ᐃᖅᑲᐅᒪᓇᒻᒪᕆᒃᖢᓂ “ᓄᓇᖃᖅᑳᖅᑐᓄᑦ, ᑲᓇᑕᒥ ᐊᒻᒪᓗ ᐱᓕᕆᖃᑎᖃᕐᓂᐊᕐᓂᕐᒥᒃ ᑖᒃᑯᓂᖓ (ᑯᕋᐅᓐ).”

“ᓂᕆᐅᑦᑎᐊᖅᑐᖓ ᐱᐅᓯᕚᓕᕐᓂᐊᕆᐊᒃᓴᖓᓂᒃ ᑯᕋᐅᓐ-ᓄᓇᖃᖅᑳᖅᑐᓪᓗ ᐱᓕᕆᖃᑎᒌᖃᑦᑕᕐᓂᐊᕐᓂᖏᓐᓂᒃ ᐊᕐᕌᒍᓂᒃ ᐊᒡᒋᖅᑐᓂᒃ,” ᓴᐃᒪᓐ ᐅᖃᕐᑐᖅ.

“ᐅᓇ ᑭᖕ ᑐᑭᓯᓯᒪᖕᒪᑦ ᐱᒻᒪᕆᐊᓘᓂᖓᓂᒃ ᐋᖅᑭᒃᓱᐃᕙᓪᓕᐊᓂᕐᒧᑦ ᑲᓇᑕᒥ ᐊᒻᒪ ᓄᓇᖃᖅᑳᖅᑐᓂᒃ.”

ᐅᑯᐊ ᐱᖓᔪᑦ ᑲᓇᑕᒥ ᓄᓇᖃᖅᑳᖅᑐ ᓯᕗᓕᐅᖅᑎᖏ ᐅᖃᓪᓚᓚᐅᕐᒥᔪᑦ, ᐅᖃᖅᖢᑎᒃ ᑖᒃᑯᐊ ᐅᖃᐅᓯᖃᓚᐅᕐᓂᖏᓐᓂᒃ ᓯᓚᐅᑉ ᐊᓯᙳᖅᐸᓪᓕᐊᓂᖓᓂᒃ, ᐃᒡᓗᓕᕆᓂᕐᒥᒃ, ᓄᓇᖃᖅᑳᖅᑐᓂᒃ ᑮᓇᐅᔭᓕᐅᕋᓱᒃᑐᓂᒃ, ᐃᓕᖅᑯᓯᕐᓂᒃ ᐊᓯᐅᑎᑦᑎᑦᑕᐃᓕᓂᕐᒥᒃ ᐊᒻᒪᓗ ᓯᕗᒧᑦ ᐱᕙᓪᓕᐊᑎᑦᑎᔪᒪᓂᕐᒥᒃ ᐋᖅᑭᒃᓱᐃᒃᑲᓐᓂᕐᓂᕐᒧᑦ ᐊᒃᑐᐊᔪᓂᒃ.

ᐅᐱᐊᑦ ᐅᖃᓚᐅᕐᑐᖅ ᐅᑯᓄᖓ ᐃᓄᐃᑦ-ᑯᕋᐅᓐ ᐱᓕᕆᖃᑎᒌᖕᓂᖏᓐᓂᒃ ᓇᓗᓇᐃᒃᑯᑎᒋᓪᓗᓂᐅᒃ ᑯᕋᐅᓐ ᐱᓕᕆᐊᖃᖅᑎᑦᑎᓂᖏᓐᓂᒃ ᐋᖅᑭᒃᓱᐃᕙᓪᓕᐊᓂᕐᒥᒃ ᑲᓇᑕᒥ, ᐊᒻᒪᓗ ᐃᓄᐃᑦ ᓯᕗᓕᐅᖅᑎᖏᑦ ᐱᓕᕆᐊᖃᕈᒪᓂᖏᓐᓂᒃ ᐱᖁᑎᒋᔭᐅᓚᐅᕐᓯᒪᔪᑐᖃᐃᑦ ᐱᒻᒪᕆᐅᒋᔭᐅᔪᑦ ᐅᑎᖅᑎᑕᐅᔭᕆᐊᖃᖕᓂᖏᓐᓂᒃ ᐅᑯᓇᙵᑦ ᐳᕆᑎᔅ ᑕᑯᔭᒐᖃᕐᕕᖏᓐᓂᒃ.

“ᑕᒪᕐᒥ ᓯᕗᓕᐅᖅᑎᐅᔪᑦ ᐅᖃᖃᑎᖃᓂᖏᑦ ᐊᑐᓚᐅᕐᓂᖏᓐᓂᒃ ᐊᒻᒪᓗ ᓇᓗᓇᐃᒃᑯᑎᒥ ᐱᒻᒪᕆᐅᓂᕐᓴᐅᓪᓗᓂ ᐊᒻᒪᓗ ᑐᑭᖃᖅᖢᓂ ᑲᑎᖃᑎᖃᕐᓂᖅ ᐊᒻᒪ ᐱᓕᕆᖃᑎᒌᖕᓂᕐᒥᒃ ᐱᒋᐊᕈᑎᒻᒪᕆᐅᓪᓗᓂ ᑖᔅᓱᒥᖓ ᓄᑖᒥ ᐊᖓᔪᖅᑳᕐᔪᐊᖅᒥ,” ᐅᖃᐅᓯᐅᔪᑦ ᐅᖃᕐᓯᒪᓚᐅᕐᑐᑦ.

“ᐅᖃᐅᓯᖃᑲᑕᖕᓂᖅ ᑕᐃᒪᐃᑦᑐᓂᒃ ᐱᓪᓚᕆᐅᖕᒪᑦ. ᐱᒋᐊᓵᕐᓂᖏᓐᓂᒃ ᓱᒃᑲᐃᑉᐸᒃᑐᑦ, ᐊᒻᒪ ᐱᕈᖅᐸᓪᓕᐊᓕᖅᖢᑎᒃ, ᑐᙵᕕᐅᓕᖅᖢᓂ ᐱᓕᕆᖃᑎᒌᒃᑲᓐᓂᕐᓂᕐᒥᒃ ᐅᑯᓂᖓ ᓄᓇᖃᖅᑳᖅᑐᓂᒃ ᒪᐅᓇ ᐃᓱᒪᒋᔭᖃᑦᑎᐊᕐᓂᒃᑯᑦ ᐊᒻᒪ ᑐᑭᓯᓯᒪᓂᒃᑯᑦ,” ᓴᐃᒪᓐ ᐅᖃᓚᐅᕐᑐᖅ.

“ᖃᐅᔨᒪᒐᓗᐊᖅᖢᑕ ᐅᖃᐅᓰᑦ ᐱᒻᒪᕆᐊᓘᓂᖏᓐᓂᒃ, ᖃᓄᐃᓕᐅᕐᓂᑦᑎᓐᓄᑦ ᑭᓯᐊᓂ ᐊᓯᙳᖅᑎᑦᑎᓛᖑᕙᒃᑲᑦᑕ. ᑲᔪᓰᓐᓇᕐᓂᐊᖅᑐᓂᒃ ᑲᓇᑕᒥᐅᓕᒫᖅ ᐊᒻᒪᓗ ᑯᕋᐅᓐ ᖃᓄᐃᓕᐅᓕᖅᑎᓐᓇᓱᒡᓗᒋᑦ ᐋᖅᑭᒃᓱᐃᕙᓪᓕᐊᓂᕐᒥᒃ.”

ᑖᓐᓇ ᑲᑎᒪᖃᑎᖃᕐᓂᖅ ᖃᓄᐃᓕᐅᕈᑎᑐᐊᕆᓚᐅᕐᑕᖓᑦ ᑲᓇᑕᒥᐅᑕᓄᑦ ᐅᓇ ᓵᔅ ᑭᖕᖑᖅᑎᑕᐅᓚᐅᖅᑎᓐᓇᒍ.

ᐅᖃᐅᓯᖓᒍᓪᓕ ᐆᒪ ᓄᓇᕗᒧᑦ ᒪᓕᒐᓕᐅᖅᑎ ᓘᕆ ᐃᓪᓚᐅᑦ ᐅᖃᐅᓯᕆᓚᐅᕐᑕᖓ ᑭᖕᖑᖅᑎᑕᐅᓂᖅ ᐱᕕᐅᔪᓐᓇᓚᐅᕐᓂᖓᓂᒃ “ᐋᖅᑭᒋᐊᖅᑎᑦᑎᒃᑲᓐᓂᕐᓂᖅ ᐱᓕᕆᖃᑎᒌᖕᓂᕐᒥᒃ” ᐅᑯᓄᖓ ᑭᖕᒧᑦ ᐊᒻᒪ ᓄᓇᖃᖅᑳᖅᑐᓄᑦ ᐊᓪᓚᓄᑦ, ᐃᓄᖕᓄᑦ ᐊᒻᒪ ᐊᓪᓚᖓᔪᓄᑦ.

“ᐅᑯᐊ ᑭᖕ ᑕᒪᑐᒥᖓ ᓯᕗᒧᒃᐸᓪᓕᐊᑎᑦᑎᔪᓐᓇᕋᔭᕐᑐᖅ ᐋᖅᑭᒃᓱᐃᕙᓪᓕᐊᓂᕐᒥᒃ ᐃᓱᒪᒋᔭᖃᑦᑎᐊᕐᓂᖓᒍᑦ ᓄᓇᖃᖅᑳᖅᑐᑦ ᐱᓇᓱᒍᓐᓇᕐᓂᖏᓐᓂᒃ ᐊᒻᒪ ᐱᔪᓐᓇᐅᑎᖏᓐᓂᒃ, ᐊᒻᒪᓗ ᐱᓕᕆᖃᑎᒌᖕᓂᖅ ᑐᓴᐅᒪᑎᑦᑎᔾᔪᑎᐅᓗᓂ ᒐᕙᒪᑐᖃᒃᑯᑦ ᐱᓕᕆᐊᖏᓐᓂᒃ ᒪᐅᓇ ᐋᖅᑭᒃᓱᐃᕙᓪᓕᐊᕆᐊᖃᕐᓂᕐᒥᒃ ᑲᓇᑕᒥ,” ᐅᖃᕐᑐᖅ.

ᑭᖕ ᓵᔅ ᐊᖓᔪᖅᑳᕐᔪᐊᙳᖅᑎᑕᐅᓚᐅᕐᑐᖅ ᒪᐃ 6ᒥ ᐅᕙᓂ ᕗᐊᔅᒥᓐᔅᑐ ᐋᐱᒥ (Westminster Abbey) ᓚᓐᑕᓐ ᐃᖕᓚᓐᒥ.