ᑲᑎᙵᓂᐅᔪᑦ ᐃᑲᔪᖅᓱᐃᕗᑦ ᓴᓪᓕᕐᒥᐅᑕᒥ ᐃᓄᑐᖃᕐᒥ ᐊᖏᕐᕋᖅᑎᑕᐅᓂᖓᓂ ᐋᑐᕚᒥ
ᐃᑲᔪᖅᓱᐃᔨᐅᔪᑦ ᕋᐃᒪᓐ ᓂᖏᐅᑦᓯᐊᕐᒥ ᐅᖃᖅᐳᖅ ᓄᓇᕗᒻᒥ ᒐᕙᒪᒃᑯᑦ ᐱᓕᕆᒃᑲᓐᓂᓪᓗᐊᖅᐳᑦ ᐊᖏᕐᕋᖅᑎᑕᐅᓂᖓᓂ
ᓯᐊᕋ ᓂᐊᑦᓱᕐ ᓇᖏᖅᐳᖅ ᕿᑎᐊᓂ ᐃᓄᒋᐊᒃᑐᓂ ᑲᑎᓚᐅᖅᑐᓂ ᐃᑲᔪᖅᓱᐃᓂᕐᒧᑦ ᕋᐃᒪᓐ ᓂᖏᐅᑦᓯᐊᕐᒥ, ᐃᓄᑐᖃᖅ ᐊᑯᓪᐅᔪᒥ ᐸᖅᑭᔭᐅᕕᖕᒦᑦᑐᒥ ᐋᑐᕚᒥ ᐊᖏᕐᕋᕈᒪᔪᒥ ᓴᓪᓕᓄᑦ. (ᐊᔾᔨᓕᐅᖅᑕᐅᔪᖅ ᑕᐃᕕᑦ ᓛᒃᕼᐃᐊᑦᒧᑦ)
For an English version of this story, see Group rallies for Coral Harbour elder’s return from Ottawa
30−ᐸᓗᖕᓂ ᐃᖃᓗᖕᒥᐅᑕᓂ ᑲᑎᓚᐅᖅᐳᑦ ᒪᓕᒐᓕᐅᕐᕕᐅᑉ ᖃᓂᒋᔭᖓᓂ -30 C ᓂᒡᓚᓱᖕᓂᐅᔪᒥ ᕕᕗᐊᕆ 4−ᒥ ᐃᑲᔪᖅᓱᐃᓂᕐᒧᑦ ᓴᓪᓕᒥᐅᑕᒥᒃ ᐃᓄᑐᖃᕐᒥ ᐊᖏᕐᕋᖅᑎᑦᑎᓇᓱᐊᕐᓂᕐᒧᑦ ᐊᑯᓂᐅᔪᒥ ᐸᖅᑭᔭᐅᕝᕕᖕᒥ ᐊᖏᕐᕋᐅᔪᒥ ᖃᓪᓗᓈᑦ ᓄᓇᖓᓐᓂ.
ᕋᐃᒪᓐ ᓂᖏᐅᑦᓯᐊᖅ, 80, ᐊᕐᕌᒍᓕᒫᒥ ᐃᐊᒻᐸᓯ ᐱᓇᖕᓇᕐᒥ ᐃᓄᑐᖃᒃᑯᕕᖕᒥ ᐸᖅᑭᔭᐅᕝᕕᖕᒦᓯᒪᕗᖅ ᐋᑐᕚᒥ.
ᐋᓐ ᑯᕌᕗᑦ, ᓴᐳᓐᓂᐊᖅᑎ ᐃᑲᔪᖅᓱᐃᔪᖅ ᑭᒡᒐᖅᑐᐃᓪᓗᓂ ᐃᓚᖏᓐᓂ, ᐅᖃᓚᐅᖅᐳᖅ ᓄᓇᕗᒻᒥ ᒐᕙᒪᒃᑯᑦ ᐊᑭᓖᔾᔮᙱᓚᑦ ᑮᓇᐅᔭᓂ ᐱᔭᕆᐊᖃᕋᔭᖅᑐᓂ ᓂᖏᐅᑦᓯᐊᖅ ᐊᖏᕐᕋᖅᑎᑕᐅᓂᖓᓄᑦ ᓴᓪᓕᓄᑦ ᐃᓅᓕᓴᖅᑕᐅᓂᕐᒧᑦ ᐱᔭᕇᖅᑕᐅᓯᒪᙱᒻᒪᑦ ᐅᑎᕐᓂᕐᒧᑦ.
ᓄᓇᕗᒻᒥ ᒐᕙᒪᒃᑯᑦ ᐅᖃᐅᔾᔨᓯᒪᕗᑦ ᐃᑲᔪᕈᑎᒃᓴᖃᙱᓗᐊᕐᓂᖓᓂ ᓴᓪᓕᓂᑦ ᑐᓂᓯᓂᕐᒥ ᓈᒻᒪᒃᑐᒥ ᐊᖏᕐᕋᒥ ᐸᖅᑭᔭᐅᓂᖓᓂ ᓂᖏᐅᑦᓯᐊᕐᒧᑦ, ᑯᕌᕗᑦ ᐅᖃᓚᐅᖅᐳᖅ. ᑭᓯᐊᓂ ᐃᓚᒌᑦ ᑐᓂᓯᓯᒪᕗᑦ ᓄᓇᕗᒻᒥ ᒐᕙᒪᒃᑯᓐᓂ ᑎᑎᕋᖅᓯᒪᓂᐅᔪᒥ ᐃᓄᖕᓂ ᐃᓄᑐᖃᓕᕆᔪᓐᓇᖅᑐᓂ ᐊᒻᒪ ᐃᑲᔪᕈᑎᒃᓴᓂ ᑐᓂᓯᔪᓐᓇᖅᑐᒥ 24/7 ᐸᖅᑭᓂᐅᔪᒥ ᓂᖏᐅᑦᓯᐊᕐᒧᑦ, ᐅᖃᓚᐅᖅᐳᖅ.
ᕋᐃᒪᓐ ᓂᖏᐅᑦᓯᐊᖅ, 80, ᐅᑎᕈᒪᕗᖅ ᓴᓪᓕᓄᑦ ᐊᖏᕐᕋᖓᓄᑦ. ᐊᕐᕌᒍᓕᒫᒥ ᐃᐊᒻᐸᓯ ᐱᓇᖕᓇᒥ ᐃᓄᑐᖃᒃᑯᕕᖕᒥᐅᑕᐅᕗᖅ ᐋᑐᕚᒥ. (ᐊᔾᔨᓕᐅᖅᑕᐅᔪᖅ ᓂᖏᐅᑦᓯᐊᖅ ᐃᓚᒌᓄᑦ/GoFundMe)
ᑯᕌᕗᑦ ᐅᖃᓚᐅᖅᐳᖅ ᑲᑎᙵᓂᐅᔪᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐃᑲᔪᕐᓂᖏᓐᓂ ᐃᓚᒌᖑᔪᓂ ᓇᓂᓯᓂᖏᓐᓂ ᐋᖅᑭᒍᑎᒃᓴᒥ ᓂᖏᐅᑦᓯᐊᖅ ᐊᖏᕐᕋᖅᑎᑕᐅᔪᓐᓇᕐᓂᖓᓂ.
ᓂᖏᐅᑦᓯᐊᑉ ᐃᓚᖏᑦ ᖃᕋᓴᐅᔭᑎᒍᑦ ᑮᓇᐅᔭᓂᒃ ᐱᕈᖅᓴᐃᕗᑦ ᐊᑭᓖᓂᕐᒧᑦ ᐊᑭᖓᓂ ᐊᖏᕐᕋᖅᑎᑕᐅᔪᓐᓇᕐᓂᖓᓂ. ᑲᐃᑦᓕᓐ ᓂᐊᑦᓱᕐ, ᓂᖏᐅᑦᓯᐊᑉ ᖏᕐᙳᑕᖓ, ᐅᖃᓚᐅᖅᐳᖅ ᐊᑭᖓ ᑐᐊᕕᕐᓇᖅᑐᒥ ᖃᖓᑕᓲᒥ ᐊᒻᒪ ᐋᓐᓂᐊᕕᖕᒥ ᐃᒡᓗᖓᓂ $40,000−ᑐᐸᓗᒃᐳᑦ.
ᑐᕌᒐᒃᓴᕆᔭᖓ ᐱᕈᖅᑎᑦᑎᓂᕐᒥ $40,000−ᓂ ᐊᒻᒪ ᓂᐊᑦᓱᕐ ᐅᖃᓚᐅᖅᐳᖅ ᕕᕗᐊᕆ 4−ᒥ ᐱᕈᖅᑎᑦᑎᓯᒪᓂᖏᓐᓂ $3,000−ᓂ.
ᓂᖏᐅᑦᓯᐊᖅ ᖃᓪᓗᓈᑦ ᓄᓇᖓᓐᓄᐊᖅᑐᒃᓴᐅᓚᐅᖅᐳᖅ ᑎᒥᒧᑦ ᓴᙱᓕᖅᓴᐃᓂᕐᒧᑦ ᐱᓱᖕᓂᖓ ᐱᐅᓯᕚᓪᓕᕈᓐᓇᖅᑎᑦᑎᓂᕐᒧᑦ. ᑯᕌᕗᑦ ᐅᖃᓚᐅᖅᐳᖅ ᐳᓚᕋᕐᓂᖅ ᕿᓚᒻᒥᐅᔭᕆᐊᖃᓚᐅᖅᐳᖅ ᑭᓯᐊᓂ ᒫᓐᓇ ᓂᖏᐅᑦᓯᐊᖅ ᐊᔪᖅᓯᓯᒪᕗᖅ ᐋᑐᕚᒥ ᐊᒻᒪ ᐱᓚᕐᓇᓂ ᑎᒥᒧᑦ ᓴᙱᓕᖅᓴᐃᓂᕐᒥ.
ᐃᐊᒻᐸᓯ ᐱᓇᖕᓇᕐᒥ ᐃᓄᑐᖃᒃᑯᕕᖕᒥ ᐸᖅᑭᔭᐅᕝᕕᖕᒥ ᑐᑭᒧᐊᒃᑎᑦᑎᔨ ᓯᐅᓪᒪ ᐸᐃᓯᒃ ᐅᖃᓚᐅᖅᐳᖅ ᐃᐊᒻᐸᓯ ᐱᓇᖕᓇᕐᒥ ᐅᖃᐅᓯᖃᓲᖑᙱᓚᑦ ᐃᓄᑐᐃᓐᓇᕐᓂ ᖃᓄᐃᓐᓂᐅᔪᓂ ᑲᙳᓇᕐᓂᖓᓂ ᓴᐳᔾᔨᓯᒪᓂᕐᒧᑦ.
ᐃᓚᒌᑦ ᐅᖃᖅᐳᑦ ᓂᖏᐅᑦᓯᐊᑉ ᐋᓐᓂᐊᕐᓂᕆᔭᖓ ᐱᐅᓯᕚᓪᓕᕋᔭᖅᐳᖅ ᓂᕿᓪᓚᑦᑖᖅᑐᒃᑲᓐᓂᕈᓐᓇᖅᓯᒍᓂ ᐊᒻᒪᓗ ᐊᕙᓗᔭᐅᓯᒪᓗᓂ ᐃᓚᖏᓐᓂ.
12:15−ᐸᓗᖕᒥ ᐅᓐᓄᓴᒃᑯᑦ, ᐃᓄᒋᐊᑦ ᓇᖏᓚᐅᖅᐳᑦ ᓂᐱᖃᕐᓇᑎᒃ ᐊᖕᒪᓗᖅᑐᒥ ᓇᑉᐸᓪᓗᐊᖓᓂ 2 ᒥᓂᑦᓄᑦ ᓇᓗᓇᐃᖅᓯᓂᕐᒥ ᐊᒃᓱᕈᕐᓂᐅᔪᒥ ᓂᖏᐅᑦᓯᐊᕐᒥ ᐊᖏᕐᕋᖅᑎᑕᐅᓂᖓᓂ.
ᓯᕗᓂᐊᓂ, ᑯᕌᕗᑦ ᑐᓂᐅᖅᑲᐃᓚᐅᖅᐳᖅ ᐸᐃᑉᐹᓂ ᑲᖑᖕᓂ ᖃᖓᑕᔪᓂ, ᐅᖃᓚᐅᖅᐳᖅ ᑭᒡᒐᖅᑐᐃᔪᒥ ᖃᓄᖅ ᑎᖕᒥᐊᑦ ᖃᓪᓗᓈᑦ ᓄᓇᖓᓐᓄᐊᖅᐸᒃᑐᓂ ᑭᖑᓂᐊᒍᑦ ᐅᑎᓲᖑᕗᑦ ᐅᑭᐅᖅᑕᖅᑐᒧᑦ, ᑕᐃᒪᓐᓇᑦᑕᐅᖅ ᓂᕆᐅᒃᐳᑦ ᓂᖏᐅᑦᓯᐊᖅ ᐱᓂᐊᕐᓂᖓᓂ.
“ᓄᕙᒡᔪᐊᕐᓇᕐᒥ ᐊᒻᒪ ᖃᓄᐃᓕᖓᓂᐅᔪᑦ, ᓂᐱᖏᑦ ᑐᓴᖅᓴᐅᙱᓐᓂᖅᓴᐅᖃᑦᑕᕐᒪᑕ,” ᑯᕌᕗᑦ ᐅᖃᓚᐅᖅᐳᖅ ᐃᓄᑐᖃᑦ ᒥᒃᓵᓄᑦ ᖃᓪᓗᓈᑦ ᓄᓇᖓᓐᓂ.
ᐃᓚᒋᐊᖅᓯᓚᐅᕆᕗᖅ ᐃᓚᒌᓄᑦ ᐃᓚᒋᔭᐅᔪᒥ ᐃᑲᔪᖅᓱᐃᒍᓂ ᐃᓄᑐᖃᕐᒥ ᐊᖏᕐᕋᖅᑎᑕᐅᓂᖓᓂ, ᓲᕐᓗ ᓂᖏᐅᑦᓯᐊᑉ ᐃᓚᖏᓐᓂ ᐅᕙᓂ ᖃᓄᐃᓐᓂᐅᔪᒥ, ᓈᓚᒃᑕᐅᓪᓗᐊᖅᐳᑦ.
ᐋᑕᒥ ᐃᑦᑐᐊᑦᓯᐊᖅ ᐅᐸᒃᓯᒪᓚᐅᕆᕗᖅ ᐃᑲᔪᖅᓱᐃᓂᐅᔪᒥ. ᐅᖃᓚᐅᖅᐳᖅ ᐱᓕᕆᖃᑎᖃᖅᐸᓚᐅᕆᕗᖅ ᓂᖏᐅᑦᓯᐊᕐᒥ ᐃᓄᑐᖃᐅᑉ ᐱᓕᕆᐊᖏᓐᓂ ᐊᒻᒪ ᐃᓚᐅᖃᑕᐅᓂᖓᓂ ᐃᓄᖕᓄᑦ ᐱᔾᔪᑕᐅᔪᓄᑦ.
ᐊᑯᓂᐅᔪᒥ ᒪᕐᕈᖓᓂ ᐊᖓᔪᖅᑳᑉ−ᑐᖏᓕᒋᔭᐅᓪᓗᓂ ᓄᓇᕗᒻᒥ ᑐᙵᕕᒃᑯᓐᓄᑦ, ᓂᖏᐅᑦᓯᐊᖅ ᐃᓚᐅᕐᔪᐊᖃᑕᐅᓚᐅᖅᐳᖅ ᐱᕙᓪᓕᐊᑎᑦᑎᓂᐅᔪᒥ ᓄᓇᕗᒻᒥ. ᐃᑦᑐᐊᑦᓯᐊᖅ ᐅᖃᓚᐅᖅᐳᖅ ᓂᖏᐅᑦᓯᐊᖅ ᐱᓕᕆᑦᑎᐊᖏᓐᓇᖅᐸᓚᐅᖅᐳᖅ.
“ᑕᐃᓚᐅᖅᐸᕗᑦ ‘ᑐᙵᕕᖃᑦᑎᐊᖅᑐᒥ ᕋᐃᒥ,’” ᐃᑦᑐᐊᑦᓯᐊᖅ ᐅᖃᓚᐅᖅᐳᖅ.
ᐃᑦᑐᐊᑦᓯᐊᖅ ᐃᓚᒋᐊᖅᓯᓚᐅᖅᐳᖅ ᐅᐸᓚᐅᖅᐳᖅ ᐃᑲᔪᖅᓱᐃᓂᐅᔪᒥ ᐊᔪᕐᓇᙱᑦᑐᒥ ᐱᔪᒪᓂᐅᔪᒥ.
“ᕋᐃᒥᒻ ᐊᖏᕐᕋᖅᑎᑕᐅᓚᐅᕐᓕ ᓴᐃᓕᓂᕐᒧᑦ,” ᐅᖃᓚᐅᖅᐳᖅ.
ᐋᓐᓂᐊᖃᕐᓇᙱᑦᑐᓕᕆᓕᒃᑯᑦ ᒥᓂᔅᑕᖓ ᔮᓐ ᒪᐃᓐ ᐅᖃᓚᐅᖅᐳᖅ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᐱᐅᓯᒋᐊᖅᑎᑦᑎᓂᐊᕐᓂᖓᓂ ᐃᓄᑐᖃᕐᓂ ᐸᖅᑭᔭᐅᓂᖏᓐᓂ ᐊᒻᒪ ᖁᔭᓕᕗᖅ ᓇᒡᓕᒍᓱᖕᓂᐅᔪᒥ ᑕᐃᒃᑯᓂᖓ ᐃᑲᔪᖅᓱᐃᓂᕐᒦᓚᐅᖅᑐᓄᑦ.
“ᒥᓂᔅᑕᐅᓪᓗᖓ, ᑐᙵᓱᒃᑎᑦᑎᕗᖓ ᑕᒪᒃᑭᓂ ᐅᖃᐅᓯᐅᓂᐅᔪᓂ ᑲᑎᒪᔨᕐᔪᐊᖑᔪᓄᑦ ᑕᑯᔭᐅᓂᐅᔪᓂ ᐅᕘᓇ ᓴᐃᓕᔪᓂ ᖃᓄᐃᓕᐅᕐᓂᐅᔪᓂ ᐊᒻᒪ ᖃᓄᐃᓐᓂᐅᔪᓄᑦ,” ᒪᐃᓐ ᐅᖃᓚᐅᖅᐳᖅ.
(0) Comments