ᑲᓇᐃᑎᐊᓐ ᓄᐊᑦᑯᑦ ᐊᐅᓚᑦᑎᔨᒻᒪᕆᖓ ᐆᓇᖅᑐᒥ ᐃᒃᓯᕙᐅᑕᖃᖅᐳᖅ ᐃᖃᓗᖕᓂ ᒪᑐᐃᖓᔪᒥ ᐃᒡᓗᒥ

For English version, see Canadian North CEO takes hot seat at Iqaluit open house

ᑲᓇᐃᑎᐊᓐ ᓄᐊᑦᑯᑦ ᐊᐅᓚᑦᑎᔨᒻᒪᕆᖓ ᑐᓴᖅᑎᑕᐅᕐᔪᐊᓚᐅᖅᐳᖅ ᐃᓄᓕᒫᓂ ᑲᑎᒪᕝᕕᖕᒥ ᐃᖃᓗᖕᓂ ᐱᓇᓱᐊᕈᓯᐅᓚᐅᖅᑐᒥ.

ᒪᐃᑯᓪ ᕌᑎᓂᐅᒃ ᑲᒪᒋᔭᖃᓚᐅᖅᐳᖅ ᒪᐃ 24−ᒥ ᖃᓄᐃᓐᓂᐅᔪᒥ ᐅᓂᒃᑳᕆᓂᕐᒧᑦ ᑲᓇᐃᑎᐊᓐ ᓄᐊᑦᑯᑦ ᐸᕐᓇᒍᑎᖓᓂ ᖃᖓᑕᓲᖅᑎᑦ ᐋᖅᑭᒋᐊᖅᓯᔪᓐᓇᖅᓯᖕᒪᑕ ᐃᖏᕐᕋᓂᕆᕙᒃᑕᖓᓂ ᐊᒻᒪ ᐊᖏᒡᓕᒋᐊᖅᓯᓗᑎᒃ ᐊᑭᖏᓐᓂ.

ᐊᐃᑉᕆᓕᒥ, ᑲᓇᑕᒥ ᐅᓯᑲᑦᑕᖅᑎᒃᑯᑦ ᐅᖃᐅᓯᖃᓚᐅᖅᐳᑦ ᖃᓱᒋᐊᖅᑎᑦᑎᓂᖏᓐᓂ ᖃᓄᐃᓕᖓᓂᐅᔪᓂ ᐱᔾᔪᑎᖃᖅᑐᒥ ᑲᓇᐃᑎᐊᓐ ᓄᐊᑦᑯᑦ ᑲᑎᖃᑎᖃᕐᓂᐅᔪᒥ 2019−ᒥ ᕘᔅᑎᐊᒃᑯᓐᓂ.

30−ᒐᓚᖕᓂ ᐃᓄᖕᓂ ᓴᖅᑭᑦᑐᖃᓚᐅᖅᐳᑦ ᖃᓄᐃᓐᓂᐅᔪᒧᑦ.

ᐊᑕᐅᓯᐅᔪᖅ ᑕᐃᒃᑯᓂᖓ ᐅᐸᒃᓯᒪᔪᓂ ᔨᐊᕆ ᐅᐊᑦ−ᖑᓚᐅᖅᐳᖅ, ᑐᑭᒧᐊᒃᑎᑦᑎᔨ ᐃᖃᓗᓕᕆᓂᕐᒧᑦ ᕿᑭᖅᑖᓗᒃ ᑎᒥᖁᑕᐅᔪᓂ.

ᐅᖃᐅᔾᔨᓚᐅᖅᐳᖅ ᕌᑎᓂᐅᒃᒥ ᖃᓄᑎᒋ ᖁᑦᑎᖕᓂᖓᓂ ᐊᑭᐅᔪᓂ ᐃᖃᓪᓕᐊᖅᑎᐅᔪᓄᑦ ᖃᖓᑕᓂᕐᒥ ᓄᓇᕗᒻᒥ ᐊᒻᒪ ᓅᕙᓐᓛᓐᒧᑦ.

“ᖃᖓᒃᑲᓐᓂᖅ ᑐᓂᓯᓂᖃᕆᐊᖃᕐᓂᐊᖅᐳᖅ,” ᐅᐊᑦ ᐅᖃᓚᐅᖅᐳᖅ.

ᑭᐅᓂᕐᒧᑦ, ᕌᑎᓂᐅᒃ ᐅᖃᓚᐅᖅᐳᖅ ᐊᑭᖓ ᐊᐅᓚᑦᑎᓂᕐᒥ ᖃᖓᑕᓲᓄᑦ ᖁᕝᕙᖅᐸᓪᓕᐊᓂᖓᓂ. ᖃᖓᑕᓪᓗᓂ ᓇᓗᓇᐃᖅᓯᓂᖓᓂ ᐱᔨᑦᑎᕋᕐᓂᕐᒥ ᐊᖏᒡᓕᒋᐊᖅᓯᒪᕗᖅ 30 ᐳᓴᓐᑎᒥ ᐊᒻᒪ ᐊᑭᑦ ᐅᖅᓱᐊᓗᖕᒧᑦ ᐊᒻᒪ ᒥᑦᑕᕐᕕᖕᓂ ᐊᑭᓕᐅᑎᓂ ᖁᕝᕙᖅᐸᓪᓕᐊᕗᑦ.

ᐊᑕᐅᓯᕐᒥ ᐃᓄᖕᒥ ᐅᖃᐅᓯᖃᓚᐅᖅᐳᖅ ᐊᖃᖅᓴᙱᓐᓂᖓᓂ ᐅᖃᖃᑎᒋᔭᐅᓚᐅᙱᓐᓂᖓᓂ ᐊᕕᒃᑐᖅᓯᒪᓂᐅᔪᓂ ᐃᓄᖕᓄᑦ ᑲᑐᔾᔨᖃᑎᒌᖑᔪᓄᑦ ᐅᕝᕙᓘᓐᓃᑦ ᓄᓇᕗᒻᒥ ᑐᙵᕕᒃᑯᓐᓂ ᐊᓯᔾᔨᕐᓂᐅᔪᓂ ᑲᓇᐃᑎᐊᓐ ᓄᐊᑦᒥ, ᐅᖃᖃᑎᖃᕐᓂᖅ ᐱᔪᓐᓇᕐᓂᖅᑖᖅᑎᑕᐅᓯᒪᔪᓄᑦ ᐃᓚᒋᔭᐅᖕᒪᑦ ᓄᓇᑖᕐᓂᕐᒧᑦ ᐊᖏᕈᑎᒥᒃ.

ᕌᑎᓂᐅᒃ ᐅᖃᓚᐅᖅᐳᖅ ᐅᖃᓪᓚᒍᓐᓇᙱᓚᖅ ᑕᐃᒃᑯᓄᖓ ᐅᖃᖃᑎᖃᕐᓂᐅᔪᓂ ᑭᓯᐊᓂ ᑲᒻᐸᓂᖓ ᐅᖃᐅᔾᔭᐅᓚᐅᖅᐳᖅ ᒐᕙᓴᑐᖃᒃᑯᓐᓂ ᐱᔾᔪᑕᐅᔪᓂ ᐊᓯᔾᔨᕐᓂᐅᔪᓄᑦ ᑭᖑᕙᕆᐊᖅᑕᐅᓚᐅᖅᐳᑦ ᐅᖃᖃᑎᖃᕐᓂᐅᔪᓄᑦ ᑲᔪᓯᓂᖏᓐᓄᑦ. ᑕᒪᓐᓇ ᐃᓚᖃᖅᐳᖅ ᐅᖃᖃᑎᖃᕐᓂᐅᔪᒥ ᐊᕕᒃᑐᖅᓯᒪᓂᐅᔪᓂ ᐊᔪᙱᔾᔪᑎᑖᖏᑦᑕ ᐃᓄᖕᓄᑦ ᑲᑐᔾᔨᖃᑎᒌᖑᔪᓄᑦ.

ᐊᓯᖓᓂ ᐅᐸᒃᓯᒪᔪᒥ ᐊᐱᕆᓚᐅᖅᐳᖅ ᖃᓄᐃᒻᒪᑦ ᐅᓄᕐᓂᖅᓴᐅᔪᓂ ᐊᑯᓂᐅᔪᒥ, ᖃᖓᑕᒐᔪᖕᓂᐅᔪᓂ ᐅᖓᓯᒃᑐᓄᑦ ᓄᓇᓕᐅᔪᓄᑦ ᖃᖓᑕᓲᖅᑎᒃᑯᑦ ᐱᕚᓪᓕᕈᑎᖃᕆᐊᖃᖅᑎᓪᓗᒍ ᓄᓇᓕᖕᓂ.

ᕌᑎᓂᐅᒃ ᑭᐅᓚᐅᖅᐳᖅ ᖃᖓᑕᓂᕐᒧᑦ ᑕᐃᒪᐃᒐᔪᖕᓂᖓᓂ ᐊᑦᑎᒃᓯᒋᐊᑐᐃᓐᓇᕆᐊᖃᖅᐳᖅ ᑭᓯᐊᓂ ᓄᓇᓖᑦ ᑕᓴᒃᑭᖅᑐᒥ ᖃᖓᑕᓲᖃᕋᔭᖅᐳᑦ ᐃᒻᒥᖕᓄᑦ ᖃᖓᑕᓂᐅᔪᑦ ᑐᕌᖓᓂᖃᕐᓂᐊᕐᒪᑕ, ᖃᔅᓯᒐᓚᖕᓂ ᓄᓇᓕᒃᑎᒎᙱᓪᓗᑎᒃ.

ᐊᓯᐊᓂ ᐃᓄᖕᒥ ᐅᖃᕆᐊᓪᓚᓚᐅᖅᐳᖅ, ᐊᓕᐊᓇᐃᒋᔭᖃᕐᓂᖓᓂ ᖃᖓᑕᓂᐅᔪᒥ ᖃᔅᓯᒐᓚᖕᓂ ᓄᓇᓕᖕᓄᙵᐅᔪᓂ, ᑕᐃᔭᐅᔪᒥ ᐊᒥᓱᓄᑦ ᓄᓇᓕᖕᓄᙵᐅᔪᓂ, ᐊᑭᑭᓐᓂᖅᓴᐅᖕᒪᑕ ᐊᒻᒪ ᖃᖓᑕᒐᔪᖕᓂᖅᓴᐅᓪᓗᑎᒃ.

ᕌᑎᓂᐅᒃ ᐅᓂᒃᑳᓚᐅᖅᐳᖅ ᐊᒥᓱᓄᑦ ᓄᓇᓕᖕᓄᙵᐅᔪᓂ ᐱᑎᑦᑎᓂᖃᓚᐅᖅᐳᖅ ᖃᖓᑕᓲᒥᒃ ᑐᓂᓯᓂᖓᓐᓂ ᐱᐅᙱᓐᓂᖅᓴᐅᔪᒥ ᐱᔨᑦᑎᕋᕐᓂᐅᔪᒥ, ᖃᖓᑕᓂᐅᔪᒥ ᑎᒍᒥᐊᕆᐊᖃᕐᒪᑕ ᐃᒃᓯᕙᐅᑕᒥᒃ ᑭᓇᑐᐃᓐᓇᒧᑦ ᒪᕐᕉᖕᓂ ᓄᖅᑲᕐᓂᖃᖅᑐᒥ ᐅᖓᓯᖕᓂᐅᔪᒥ ᖃᖓᑕᓂᐅᔪᒥ ᑭᒡᓕᖃᖅᑎᑦᑎᓪᓗᓂ ᐅᓄᕐᓂᐅᔪᓂ ᐃᒃᓯᕙᐅᑕᓂ ᐊᑐᐃᓐᓇᐅᔪᓂ.

“ᑭᒡᓕᐅᔪᒥ ᐱᔨᑦᑎᕋᕐᓂᐅᔪᒥ ᓄᓇᓕᖕᓄᑦ ᐱᐅᙱᕐᔪᐊᓚᐅᖅᐳᖅ,” ᐅᖃᓚᐅᖅᐳᖅ.

ᑲᓇᑕᒥ ᒪᓕᒐᓕᐊᕆᔭᐅᔪᓂᒃ ᖃᐅᔨᓴᖅᑎ ᑕᓂᔅ ᐹᑐᓴᓐ, ᐃᓚᐅᖃᑕᐅᓚᐅᕐᒥᔪᖅ, ᐅᖃᐅᔾᔨᓚᐅᖅᐳᖅ ᕌᑎᓂᐅᒃᒥ ᓄᓇᕗᒻᒥᐅᑦ ᐃᒻᒥᓂᒃ ᐅᖃᐅᔾᔨᓯᒪᕗᑦ ᐃᓱᒫᓘᑎᖃᕐᓂᖏᓐᓂ ᑲᓇᐃᑎᐊᓐ ᓄᐊᑦ ᖁᕝᕙᕆᐊᖅᑎᑦᑎᔪᓐᓇᕐᓂᖏᓐᓂ ᖃᖓᑕᓂᕐᒧᑦ ᐊᑭᖏᓐᓂ 25 ᐳᓴᓐᑎᒧᑦ ᑎᑭᓪᓗᒍ.

ᐊᐱᕆᓚᐅᖅᐳᖅ ᕌᑎᓂᐅᒃᒥ ᐃᑭᒪᔪᓂ ᑕᑯᒃᓴᐅᑎᑕᐅᓂᖃᕈᓐᓇᕐᒪᖔᑕ ᓇᓗᓇᐃᖅᓯᓂᕐᒥ ᐊᑭᖓᓂ ᖁᕝᕙᕆᐊᖅᑕᐅᓂᖏᓐᓂ ᐱᔭᕆᐊᖃᕐᒪᖔᑕ.

ᕌᑎᓂᐅᒃ ᐅᖃᓚᐅᖅᐳᖅ ᑭᖑᓪᓕᖅᐹᖑᔪᓂ ᐊᓯᔾᔨᕐᓂᐅᔪᑦ ᖃᖓᑦᑕᐅᑎᓂ ᐃᓱᒪᓕᐊᖑᕙᒃᐳᑦ ᑲᓇᑕᒥ ᐅᓯᑲᑦᑕᖅᑎᐅᔪᓂ. ᓇᓗᓇᐃᖅᓯᓚᐅᖅᐳᖅ ᐃᓄᒋᐊᓂ ᑲᓇᐃᑎᐊᓐ ᓄᐊᑦ ᑮᓇᐅᔾᔭᒃᓴᔭᕆᖃᙱᓚᑦ ᐅᓄᕐᓂᖅᓴᐅᔪᒥ 10 ᐳᓴᓐᑎᒥ ᖃᑭᓂᐅᔪᒥ, ᐊᒻᒪ ᑕᒪᓐᓇ ᐊᒃᑐᐃᓂᖃᕐᓂᐊᖅᐳᖅ ᖃᓄᑎᒋ ᖃᖓᑦᑕᐅᑎᓄᑦ ᐊᑭᖏᓐᓂ ᖁᕝᕙᕐᓂᐊᕐᓂᖏᓐᓂ.

ᑲᓇᐃᑎᐊᓐ ᓄᐊᑦ ᑮᓇᐅᔭᖏᓐᓂ ᖃᐅᔨᓴᖅᑕᐅᕙᒃᐳᑦ ᑎᓴᒪᐃᖅᓱᖅᖢᑎᒃ ᐊᕐᕌᒍᒥ, ᐅᖃᓚᐅᖅᐳᖅ, ᑭᓯᐊᓂ ᐃᓱᒪᓕᐊᖑᔪᖅ ᓴᖅᑭᑎᑦᑎᓂᕐᒥ ᑮᓇᐅᔭᓂᒃ ᖃᐅᔨᓴᖅᑕᐅᓂᖏᓐᓂ ᐱᓕᕆᐊᖑᔭᕆᐊᖃᖅᐳᑦ ᓇᖕᒥᓂᖃᖃᑕᐅᔪᓂ.

ᕌᑎᓂᐅᒃ ᐅᖃᓚᐅᖅᐳᖅ ᐸᕐᓇᒃᐳᖅ ᐱᓕᕆᒃᑲᓐᓂᖃᑦᑕᕐᓂᐊᕐᓂᖓᓂ ᐅᓄᕐᓂᖅᓴᐅᔪᓂ ᐃᓄᓕᒫᓄᑦ ᒪᑐᐃᖓᔪᒥ ᐃᓘᒥᑦ ᓯᕗᓂᒃᓴᒥ.