ᑲᓇᑕᒥ ᐃᓅᓕᓴᐃᓂᕐᒧᑦ ᑲᑐᔾᔨᖃᑎᒌᖑᔪᑦ ᒪᒥᐊᑉᐳᑦ ᓱᔪᐃᓂᐅᔪᓄᑦ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ

ᑲᓇᑕᒥ ᐃᓅᓕᓴᐃᓂᕐᒧᑦ ᑲᑐᔾᔨᖃᑎᒌᖑᔪᑦ ᒪᒥᐊᓚᐅᖅᐳᑦ ᓯᑎᐱᕆ 18−ᒥ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᓱᔪᐃᓂᐅᔪᓄᑦ ᐊᑐᖅᓯᒪᔭᖏᓐᓂ ᑲᓇᑕᐅᑉ ᐃᓅᓕᓴᐃᓂᕐᒧᑦ ᐱᓕᕆᔾᔪᓯᐅᔪᒥ.

ᓘᒃᑖᖅ ᔮᔅ ᕋᐃᒧᕐ, ᐊᖓᔪᖅᑳᖑᔪᖅ ᑲᑐᔾᔨᖃᑎᒌᖑᒧᒥ ᑭᒡᒐᖅᑐᐃᔪᒥ ᑲᓇᑕᒥ ᓘᒃᑖᖑᔪᓂ, ᑐᓂᓯᓚᐅᖅᐳᖅ ᒪᒥᐊᓐᓂᐅᔪᒥ ᖃᓄᐃᓕᐅᕈᑕᐅᔪᒥ ᕕᒃᑐᐊᕆᐊ, B.C.−ᒥ, ᖃᕋᓴᐅᔭᑎᒍᑦ ᑕᑯᒃᓴᐅᑎᑕᐅᑲᐅᑎᒋᔪᒥ.

ᕋᐃᒧᕐ ᐅᖃᓚᐅᖅᐳᖅ ᑲᑐᔾᔨᖃᑎᒌᖓ “ᑕᑯᖅᖠᓯᒪᕕᒡᔪᐊᖅᐳᑦ” ᖃᓄᐃᑦᑑᓂᖏᑦ ᐱᔾᔪᑎᒋᓪᓗᒋᑦ ᐊᑭᕋᖅᑐᐃᓂᕐᒥ ᐊᒻᒪ ᐊᔾᔨᒌᙱᑎᑦᑎᓂᕐᒥ ᓄᓇᖃᖅᑳᖅᓯᒪᔪᓄᑦ ᐃᓄᐃᑦ ᐊᑐᖅᓯᒪᔭᖏᓐᓂ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐱᓕᕆᔾᔪᓯᐅᔪᒥ.

“ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᓄᓇᖃᖅᑐᓂ ᑲᓇᑕᒥ, ᒪᒥᐊᑉᐳᒍᑦ ᐃᓕᖕᓄᑦ. ᐅᒡᒍᐊᖅᐳᒍᑦ, ᐅᒡᒍᐊᖅᐳᒍᑦ ᐊᓯᐅᔨᓯᒪᓂᑦᑎᓐᓂ ᐅᕙᑦᑎᓐᓂ ᐅᒃᐱᕈᓱᖕᓂᔅᓯᓐᓂ ᐊᒻᒪᓗ ᓱᔪᐃᓂᐅᔪᓂ ᐃᓕᖕᓄᑦ, ᓯᕗᓕᔅᓯᓐᓄᑦ, ᐃᓚᔅᓯᓐᓄᑦ, ᐊᒻᒪ ᓄᓇᓕᔅᓯᓐᓄᑦ ᐊᑐᖅᓯᒪᔭᖏᓐᓂ,” ᐅᖃᓚᐅᖅᐳᖅ.

“ᓇᓗᓇᐃᖅᓯᕗᒍᑦ ᑲᔪᓰᓐᓇᖅᑐᒥ ᐊᒃᑐᐃᓂᐅᔪᓂ ᓯᕗᓂᒃᓴᒧᑦ ᐱᐅᓯᖃᑎᒌᖑᔪᓄᑦ.”

ᐃᓄᑐᖃᖅ ᒫᑕ ᐲᑦ, ᑕᓗᕐᔪᐊᕐᒥᐅᑕᖅ, ᐃᑲᔪᓚᐅᖅᐳᖅ ᒪᑐᐃᖅᓯᓂᕐᒥ ᖃᓄᐃᓐᓂᐅᔪᒥ ᐃᑯᒻᒪᒃᓴᐃᓪᓗᓂ ᖁᓪᓕᕐᒥ ᐊᒻᒪ ᐊᕐᕕᐊᕐᒥᐅᑕᖅ ᑕᐃᕕᑦ ᓯᖅᑯᐊᖅ ᕿᓚᐅᔾᔭᖅᖢᓂ ᖃᓄᐃᓕᐅᕐᓂᐅᔫᑉ ᒪᑐᕙᓪᓕᐊᓂᖓᓂ.

ᕋᐃᒧᕐ ᐅᖃᓚᐅᖅᐳᖅ ᑲᓇᑕᒥ ᐃᓅᓕᓴᐃᓂᕐᒧᑦ ᑲᑐᔾᔨᖃᑎᒌᖑᔪᑦ ᑲᒪᒋᔭᖃᖅᐳᖅ ᐊᑐᖅᐸᓚᐅᖅᑕᖏᓐᓂ ᐊᒻᒪ ᒫᓐᓇᐅᔪᒥ ᖃᓄᐃᓕᐅᕐᓂᐅᔪᓂ ᐊᒻᒪ ᐊᖏᖅᓯᒪᕗᑦ ᓴᓇᒃᑲᓐᓂᕐᓂᖏᓐᓂ ᐱᓕᕆᖃᑎᖃᕐᓂᖏᓐᓂ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᑐᙵᕕᐅᔪᒥ ᐅᒃᐱᕈᓱᓕᕐᓂᐅᔪᒥ, ᐸᓯᔭᒃᓴᐅᓂᖏᓐᓂ ᐊᒻᒪ ᑕᐅᖅᓰᖃᑦᑕᐅᑎᓂᐅᔪᒥ.

ᓘᒃᑖᖅ ᐹᓚ ᑳᓯᓐ, ᒥᒃᒫᒥ ᓘᒃᑖᖑᔪᖅ ᐊᒻᒪ ᐊᖓᔪᖅᑳᑉ ᑐᖏᓕᖓ ᐃᓅᓕᓴᐃᓂᕐᒥ ᑲᑐᔾᔨᖃᑎᒌᖑᔪᓄᑦ ᑲᑎᒪᔨᖏᓐᓂ, ᓇᓗᓇᐃᖅᓯᓚᐅᖅᐳᖅ ᓇᓗᓇᐃᖅᑕᐅᔪᓂ ᓱᔪᐃᓂᐅᔪᓂ ᐃᓅᓕᓴᐃᓂᕐᒧᑦ ᐱᓕᕆᔾᔪᓯᖓ ᐱᑎᑦᑎᓚᐅᕐᓂᖓᓂ, ᐃᓚᖃᖅᑐᒥ ᐃᓅᓕᓴᐃᓂᕐᒥ ᖃᐅᔨᓴᕈᑕᐅᓪᓗᑎᒃ, ᕿᑐᕐᙱᐅᕈᓐᓇᐃᓪᓕᓂᕐᒥ, ᐊᒻᒪ ᐊᔭᐅᕆᔭᐅᔪᒥ ᓅᑎᑕᐅᓂᐅᔪᓂ ᐃᓄᖕᓂ ᐳᕙᒡᓗᖕᓂᕐᒧᑦ ᐋᓐᓂᐊᕕᐅᔪᓄᑦ.

“ᐊᒥᓱᓂ ᐅᓂᒃᓯᒪᔪᓂ ᑐᖁᓚᐅᖅᐳᑦ ᐊᒻᒪ ᑎᒥᖏᑦ ᐊᖏᕐᕋᖏᓐᓄᑦ ᐅᑎᖅᑎᑕᐅᓚᐅᖅᓯᒪᙱᓚᑦ,” ᐅᖃᓚᐅᖅᐳᖅ ᑳᓯᓐ.

ᐸᕐᓇᖕᓂᕐᒧᑦ ᒪᒥᐊᓐᓂᐅᔪᒧᑦ, ᑲᓇᑕᒥ ᐃᓅᓕᓴᐃᓂᕐᒧᑦ ᑲᑐᔾᔨᖃᑎᒌᖑᔪᑦ ᕿᒥᕐᕈᓚᐅᖅᐳᑦ ᐅᓄᕐᓂᖅᓴᐅᔪᓂ ᐊᕐᕌᒍᓄᑦ 150−ᓗᐊᓂ ᑐᖅᑯᖅᑕᐅᓯᒪᔪᓂ ᐅᔾᔨᕆᓚᐅᖅᑐᓂ ᐊᑐᕐᓂᖓᓂ ᑲᑐᔾᔨᖃᑎᒌᖑᔪᓂ ᐊᒻᒪ ᐃᓅᓕᓴᐃᓂᕐᒧᑦ ᐃᓕᓯᒪᔪᓄᑦ ᐱᓕᕆᓚᐅᕐᓂᖓᓂ ᓱᔪᐃᓂᖏᓐᓂ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ.

“ᖃᐅᔨᒪᕗᒍᑦ ᖃᓄᐃᓕᐅᕈᓐᓇᙱᓐᓂᑦᑎᓐᓂ ᐅᑎᖅᑎᑦᑎᓂᕐᒧᑦ ᖃᓄᐃᓕᐅᕈᑕᐅᓯᒪᔪᓂ,” ᐅᖃᓚᐅᖅᐳᖅ ᕋᐃᒧᕐ.

“ᓯᕗᒻᒧᑦ ᐃᖏᕐᕋᔪᓐᓇᑐᐃᓐᓇᖅᐳᒍᑦ — ᐱᒋᐊᕐᓗᓂ ᐊᖏᖅᓯᒪᓂᑦᑎᓐᓂ ᐱᓕᕆᓂᕐᒥ ᐱᓕᕆᖃᑎᖃᕐᓂᕐᒥ ᐊᒻᒪ ᑕᐅᖅᓰᖃᑦᑕᐅᑎᓂᕐᒥ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᐅᖓᕙᕆᐊᖅᑎᑦᑎᓂᕐᒥ ᓴᐃᒻᒪᖃᑎᒌᖕᓂᐅᔪᒥ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐸᖅᑭᓂᐅᔪᒥ.”