ᑲᓇᑕ ᐊᐱᕆᔪᖅ ᕗᕌᓐᔅᒥ ᐅᑎᖅᑎᑕᐅᖁᔭᐅᓪᓗᓂ ᐃᒃᓯᕋᕐᔪᐊᖅ ᔪᐊᓇᔅ ᕆᕗᐊ

For English version, see NTI planning trip to France with goal of getting Rivoire on plane to Canada

ᐱᓕᕆᔨᒻᒪᕆᐅᔪᑦ ᑲᓇᑕᒥ ᒪᓕᒐᓕᕆᔨᒃᑯᓐᓄᑦ ᐊᐱᕆᓚᐅᕐᑐᑦ ᕗᕌᓐᔅᒥ ᐅᑎᖅᑎᑦᑎᖁᔭᐅᓪᓗᑎᒃ ᓄᓇᕗᒥᑦ ᐃᒃᓯᕋᕐᔪᐊᖑᓚᐅᕐᓕᒪᔪᒥᒃ ᔪᐊᓇᔅ ᕆᕗᐊᒥ.

ᑎᑎᕋᕐᓯᒪᔪᓂᒃ ᐅᖃᐅᓯᖏᓐᓂᒃ, ᒪᓕᒐᓕᕆᔨᒃᑯᑦ ᒥᓂᔅᑕᖓ ᑕᐃᕕᑦ ᓚᒪᑎ ᓇᓗᓇᐃᓚᐅᕐᑐᖅ ᐅᑎᖅᑎᑦᑎᖁᔨᓂᕐᒧᑦ ᑐᒃᓯᕋᐅᑎᓕᐅᓚᐅᕐᓂᖏᓐᓂᒃ ᐃᒃᓯᕋᕐᔪᐊᕐᒥ ᐸᓯᔭᒃᓴᙳᖅᑎᑕᐅᓯᒪᔪᓂᒃ ᐃᒻᒪᖃᓪᓚᒃ ᖁᓄᔪᕐᓂᐊᖅᓯᖃᑦᑕᓚᐅᕐᓯᒪᓂᖓᓂᒃ ᓄᓇᕗᒥᑦ.

“ᖃᐅᔨᒪᖁᕙᔅᓯ ᐅᓇ ᐱᒻᒪᕆᐊᓘᓂᖓᓂᒃ ᑲᓇᑕᒧ ᐊᒻᒪᓗ ᐱᓕᕆᖃᑎᒋᕙᒃᑕᖏᓐᓄᑦ ᒪᑯᐊ ᐱᕋᔭᒍᑎᕕᓂᐊᓗᐃᑦ ᖃᐅᔨᓴᖅᑕᐅᖃᑦᑕᕆᐊᖃᕐᓂᖏᓐᓂᒃ ᐊᒻᒪᓗ ᐱᓕᕆᐊᖑᕙᒡᓗᑎᒃ,” ᓚᒪᑎ ᑎᑎᕋᖅᓯᒪᔪᖅ.

ᐅᑎᖅᑎᑦᑎᓂᖅ ᐱᓕᕆᔾᔪᓯᐅᔪᖅ ᐅᑎᖅᑎᑦᑎᓇᓱᒃᖢᑎᒃ ᐃᖅᑲᖅᑐᖅᑕᐅᓂᐊᕐᒪ ᓄᓇᒥ ᓈᒻᒪᙱᑦᑐᐊᓗᖕᓂ ᐊᑐᕐᕕᒋᓚᐅᖅᑕᖏᓐᓄᑦ.

ᓚᒪᑎ ᐅᖃᓚᐅᕐᑐᖅ ᐅᑎᖅᑎᑦᑎᖁᔨᓂᕐᒧᑦ ᑐᒃᓯᕋᐅᑎ ᐃᒪᐃᓐᓂᕋᖅᑕᐅᖕᒪᑕ “ᑕᒪᐅᖓᒥᐊᕆᐊᖃᙱᑦᑐᑦ ᓄᓇᓖᑦ ᐅᖃᓪᓚᖃᑎᖏᓐᓂ” ᐊᒻᒪᓗ ᒥᓂᔅᑕᐅᓂᖓᒍᑦ ᑕᒪᑐᒧᖔᖓᔪᓂᒃ ᐅᖃᐅᓯᖃᕆᐊᖃᙱᒃᑲᓗᐊᖅᖢᓂ.

“ᑭᓯᐊᓂᓕ ᖃᐅᔨᒪᔪᖓ ᐅᑎᖅᑎᑦᑎᖁᔨᓂᕐᒧᑦ ᑐᒃᓯᕋᐅᑎ ᕗᕌᓐᔅᒧᐊᖅᑕᐅᔪᖅ ᑐᓴᐅᒪᔭᐅᑎᑕᐅᖕᒪᑦ ᑭᒃᑯᓕᒫᓄᑦ, ᑖᒃᑯᐊᓗ ᐱᓕᕆᔨᒋᔭᕗᑦ ᑕᒪᑐᒥᖓ ᑕᐃᒪᐃᓐᓂᕋᐃᓪᓗᑎᒃ,” ᑎᑎᕋᕐᓯᒪᔪᖅ.

ᐅᓇ ᐱᓕᕆᐊᖑᓕᓚᐅᕐᑐᖅ ᐃᒃᓯᕋᕐᔪᐊᕌᐱ ᕗᕌᓐᓯᔅ ᑲᓇᑕᒧᐊᖅᑎᓪᓗᒍ ᒪᒥᐊᑦᑕᖅᑐᖅᖢᓂ ᐋᓐᓂᖅᓱᖅᑕᐅᕙᓚᐅᖅᑐᓂᒃ ᑳᑐᓕᒃ ᑐᒃᓯᐊᕐᕕᓕᕆᔨᖏᓐᓄᑦ ᓄᓇᖃᖅᑳᖅᑐᓂᒃ ᑲᓇᑕᒥ ᐃᓕᓐᓂᐊᕆᐊᖅᕕᐅᖃᑦᑕᓚᐅᕐᑐᓂᒃ.

ᐃᓄᐃᑦ ᓯᕗᓕᐅᕐᑎᖏ ᐊᑯᓂᐊᓗᒃ ᕆᕗᐊᒥ ᐃᖅᑲᖅᑐᖅᑕᐅᖁᔨᓯᒪᓕᕐᑐᑦ. ᐃᒃᓯᕋᕐᔪᐊᖑᓚᐅᕐᓯᒪᔪᖅ ᓄᓇᕗᒥᑦ ᐊᕐᕌᒍᑦ 30 ᖃᓂᒋᔭᖓᓂᒃ ᐱᒋᐊᖅᓯᒪᓪᓗᓂ 1960-ᖏᓐᓂᒃ, ᐅᑯᓇᓂ ᓄᓇᓂᒃ ᓇᐅᔮᑦ ᐊᒻᒪ ᐊᕐᕕᐊᓂ.

1998-ᓂ ᐸᓖᓯᒃᑯᑦ ᐱᖓᓱᓂᒃ ᐸᓯᔭᒃᓴᐅᔾᔪᑎᖃᖅᑎᑦᑎᓚᐅᕐᓯᒪᔪᑦ ᕆᕗᐊᒥ ᖁᓄᔪᕐᓂᐊᖃᑦᑕᓯᒪᓂᕐᒥᒃ ᐃᓄᖕᓂ ᓄᓇᕋᕐᓂ ᓇᐅᔮᓂᒃ ᒫᓂ 1968-ᓗ 1970-ᓗ ᐊᑯᓐᓂᖓᓂᒃ. ᕆᕗᐊ ᑲᓇᑕᒥ ᐊᐅᓪᓚᓚᐅᕐᓯᒪᔪᖅ 1993-ᒥ ᐊᒻᒪᓗ ᐸᓯᔭᒃᓴᐅᔾᔪᑎᖏᓐᓄᑦ ᐱᓕᕆᐊᖑᓚᐅᕐᓯᒪᙱᖢᓂ ᐃᖅᑲᖅᑐᐃᕕᒃᑯᑦ.

ᕆᕗᐊ, ᒫᓐᓇ 91ᓂ ᐅᑭᐅᓕᖅ, ᓄᓇᖃᕐᑐᖅ ᕗᕌᓐᔅᒥ.

ᐸᓯᔭᒃᓴᐅᔾᔪᑎᒋᑎᑕᐅᔪᑦ ᑖᔅᓱᒧᖓ ᓄᖅᑲᖅᑎᑕᐅᓚᐅᕐᓯᒪᔪᑦ 2017ᒥ ᐅᑯᐊ ᑭᒃᑯᓕᒫᓂ ᐸᓯᔭᒃᓴᓂ ᐱᔨᑦᑎᕋᖅᑎᒃᑯᑦ ᑲᓇᑕᒥ ᐅᖃᖅᑎᓪᓗᒋᑦ ᑕᒪᓐᓇ ᖃᐅᔨᓴᖅᑕᐅᓂᖓ ᐱᔾᔪᑎᖃᕈᓐᓃᕐᓂᕋᖅᑕᐅᑎᓪᓗᒍ.

ᕕᕝᕗᐊᕆᒥ ᐸᓖᓯᒃᑯᑦ ᐸᓯᔭᒃᓴᙳᖅᑎᑦᑎᒃᑲᓐᓂᓚᐅᕐᓯᒪᔪᑦ, ᑭᓯᐊᓂᓕ ᒫᓐᓇ ᐊᑕᐅᓯᕐᒥ ᖁᓄᔪᕐᓂᐊᕐᓯᒪᓂᖓᓄᑦ ᐊᕐᓇᒥ ᐊᕐᕕᐊᓂ ᐊᒻᒪ ᑎᑭᕋᕐᔪᐊᕐᒥ 1974-ᓗ 1979-ᓗ ᐊᑯᓐᓂᖓᓂ.

ᐃᐊᓐ ᒪᑲᓚᐅᑦ, ᐅᖃᕐᑎᒋᔭᐅᔪᖅ ᒪᓕᒐᓕᕆᔨᒃᑯᓐᓄᑦ, ᐅᖃᓚᐅᕐᑐᖅ ᐃᑭᐊᖅᑭᕕᒃᑯᑦ ᑎᑎᕋᖅᑕᖓᒍᑦ ᐅᓇ ᐅᑎᖅᑎᑦᑎᖁᔨᓂᕐᒧᑦ ᑐᒃᓯᕋᐅᑎᓕᐅᓚᐅᕐᓂᖏᓐᓂᒃ ᐅᑯᓇᙶᖅᖢᓂ ᑭᒃᑯᓕᒫᓂᒃ ᐸᓯᔭᒃᓴᓂ ᐱᔨᑦᑎᕋᖅᑎᒃᑯᓐᓂᒃ ᑲᓇᑕᒥ ᐱᓕᕆᔨᖏᓐᓂᒃ.

“ᐱᔾᔪᑎᒋᓪᓗᒋ ᑕᒪᑐᒧᖓ ᖃᓄᐃᓕᐅᕈᑎᐅᓗᐊᖅᑐᐊᓗᐃᑦ ᒪᓕᒐᓕᕆᔨᒃᑯᑦ ᑲᓇᑕᒥ ᓇᓗᓇᐃᕈᓐᓇᕐᓯᔪᑦ ᐅᑎᖅᑎᑦᑎᖁᔨᓂᕐᒧᑦ ᑐᒃᓯᕋᐅᑎᓕᐅᓚᐅᕐᓂᖏᓐᓂᒃ ᕗᕌᓐᔅᒧ ᒥᔅᑕ ᕆᕗᐊᒥ,” ᒪᑲᓚᐅᑦ ᑎᑎᕋᕐᑐᖅ.

ᒪᑲᓚᐅᑦ ᐅᖃᓚᐅᕐᑐᖅ ᐱᓕᕆᕝᕕᒋᐳᕗᒻ ᑕᒪᑐᒧᖓ ᐅᖃᒃᑲᓐᓂᕈᓐᓇᓚᐅᙱᓐᓂᕋᖅᖢᑎᒃ.

ᐃᓱᒪᓇᕐᑐᕐᓕ ᑲᓇᑕᐅᑉ ᑐᒃᓯᕋᐅᑎᖓ ᐅᑎᖅᑎᑦᑎᖁᔨᓂᕐᒧᑦ ᐊᑐᖅᑕᐅᙱᑐᐃᓐᓇᕆᐊᖃᕐᓂᖓᓂᒃ ᓲᖃᐃᒻᒪ ᕗᕉᓐᔅ ᒪᓕᒐᖏᑦ ᓴᐳᔾᔨᓯᒪᔾᔪᑎᖃᕐᑐᑦ ᑕᐃᒪᐃᑦᑐᓄᑦ ᓄᓇᖃᖅᑐᓂᒃ.

ᐃᒃᓯᕋᕐᔪᐊᕌᐱᒃ ᕗᕌᓐᓯᔅ ᑲᓇᑕᒥ ᐳᓛᕐᓂᖓ ᐃᓱᓕᓚᐅᕐᑐᖅ ᐃᖃᓗᖕᓂ ᓄᖃᕐᓯᒪᓚᐅᑲᒃᖢᓂ ᔪᓚᐃ 29-ᒥ.