ᑲᓇᑕ ᑮᓇᐅᔭᓂ ᐃᑲᔫᑎᖃᖅᐳᑦ ᓄᓇᕗᑦ ᓯᒡᔭᖏᓐᓄᑦ

ᐃᖏᕐᕋᔾᔪᑎᓕᕆᓂᕐᒧᑦ ᒥᓂᔅᑕ ᒫᒃ ᒑᓅ ᑲᔅᓯᒐᓴᖕᓂᒃ ᐃᑲᔫᑎᒃᓴᓂᒃ ᑐᓴᖅᑎᑦᑎᓚᐅᕐᑐᖅ ᐃᖃᓗᖕᓂ ᐋᒐᓯ 14-ᖑᑎᓪᓗᒍ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐊᖓᔪᖅᑳᖓ ᐲ.ᔭᐃ. ᐊᕿᐊᕈᒃ, ᐃᖏᕐᕋᔾᔪᑎᓕᕆᓂᕐᒧᑦ ᒥᓂᔅᑕ ᒫᒃ ᒑᓅ ᐊᒻᒪ ᓄᓇᕗᑦ ᐃᖏᕐᕋᔾᔪᑎᓕᕆᓂᕐᒧᑦ ᒥᓂᔅᑕ ᑕᐃᕕᑦ ᐊᕿᐊᕈᒃ ᓇᖏᖃᑎᖃᖅᐳᑦ ᖃᖓᑕᓲᒥᑦ ᖃᖓᑕᓲᓕᕆᔨᓂᒃ ᐆᒥᖓ ᑲᓇᑕᒥ ᖃᖓᑕᓂᒃᑯᑦ ᖃᐅᔨᓴᖅᑐᓕᕆᔩᑦ ᖃᖓᑕᓲᖓᓂᒃ Dash-7 ᐱᖓᑦᓯᐅᑎᓪᓗᒍ ᐋᒐᓯ 14. ᒑᓅ ᑐᓴᖅᑎᑦᑎᓚᐅᕐᑐᖅ ᐃᑲᔫᑎᒃᓴᓂᒃ ᐊᔾᔨᒌᙱᑦᑐᓄᑦ ᐱᓕᕆᐊᒃᓴᓂᒃ ᑐᕌᖓᔪᓂᒃ ᓄᓇᕗᑦ ᐃᒪᖏᓐᓄᑦ ᐊᒻᒪ ᓯᒡᔭᒥ ᓄᓇᖃᖅᑐᓂᒃ. (ᐊᔾᔨᓕᐅᕆᔨ ᑳᓚᓐ ᒥᐅᕋᓐ)

By ᑳᓚᓐ ᒥᐅᕋᓐ

For an English version of this story, see Canada invests in Nunavut’s coasts

ᑲᓇᑕᒧᑦ ᒥᓂᔅᑕ ᐃᖏᕐᕋᔾᔪᑎᓕᕆᓂᕐᒧᑦ, ᒫᒃ ᒑᓅ, ᑐᓴᖅᑎᑦᑎᓚᐅᕐᑐᖅ ᓄᑖᓂᒃ ᐃᑲᔫᑎᒃᓴᓂᒃ ᐊᔾᔨᒌᙱᑦᑑᑎᓄᑦ ᐱᓕᕆᐊᒃᓴᓄᑦ ᑐᕌᒐᖃᕐᖢᑎᒃ ᓄᓇᕗᑦ ᐃᒪᖏᓐᓂᒃ ᐊᒻᒪ ᓯᒡᔭᒦᑦᑐᓂᒃ ᓄᓇᓕᖕᓂ ᐱᖓᑦᓯᐅᑎᓪᓗᒍ, ᐋᒐᓯ 14-ᒥ.

ᐅᓄᕐᓂᕐᓴᐃᑦ ᐃᑲᔫᑎᒃᓴᓄᑦ ᑐᓴᒐᒃᓴᐃᑦ, ᒫᙶᖅᖢᑎᒃ ᓄᓇᓕᖕᓂ ᐱᓕᕆᕝᕕᒃᓴᓕᐅᕐᓂᕐᒥᑦ ᒪᐅᖓ ᐊᕙᑎᓕᕆᓂᕐᒥᑦ ᖃᐅᔨᓴᕐᓂᕐᒧᑦ, ᐊᒃᑐᐊᔪᑦ ᒐᕙᒪᑐᖃᒃᑯᑦ ᑕᕆᐅᕐᒥᑦ ᓴᐳᔾᔨᓯᒪᓂᕐᒧᑦ ᐸᕐᓇᐅᑎᓄᑦ—ᒫᓂ $1.5-ᐱᓕᐊᓐ ᑖᓚᐃᑦ ᑐᕌᖓᔪᓂᒃ ᑲᓇᑕᐅᑉ ᓯᒡᔭᖏᓐᓂᒃ ᓴᐳᔾᔨᓯᒪᓂᕐᒧᑦ.

ᐅᓄᕐᑐᑦ ᐃᖃᓗᐃᑦ-ᒥᒃᓵᓂᑦ ᐱᓕᕆᐊᒃᓴᑦ ᑮᓇᐅᔭᖅᑖᓚᐅᕐᑐᑦ: ᓄᓇᓕᐸᐅᔭᑎᒍᑦ, $2.3 ᒥᓕᐊᓐ ᑖᓚᐃᑦ ᑐᕌᖓᓂᐊᖅᖢᑎᒃ ᖃᖓᑕᓲᒃᑯᕕᒃᓴᖅ ᖃᓄᐃᓕᖓᓂᐊᕐᓂᖓᓄᑦ ᐱᓕᕆᐊᒧᑦ ᐆᒧᖓ ᓄᑖᖑᓂᐊᖅᑐᒥᑦ ᑲᓇᑕᒥ ᖃᖓᑕᓂᒃᑯᑦ ᖃᐅᔨᓴᖅᑐᓕᕆᓂᕐᒧᑦ ᐃᒡᓗᒃᓴᒧᑦ, ᐊᒻᒪᓗ ᐅᕙᓂ ᕗᕉᐱᓱ ᑲᖏᖅᖢᒥ, $430,000 ᐅᖓᑖᓃᑦᑐᑦ ᐊᕕᒃᑕᐅᓂᐊᖅᖢᓂ ᒪᕐᕉᖕᓄᑦ ᐃᒪᕐᒥᐅᑕᑦ ᐊᕙᑎᖏᓐᓂᕐ ᖃᐅᔨᓴᕈᑎᐅᓂᐊᖅᑐᓄᑦ, ᐊᑕᐅᓯᖅ ᓄᓇᕗᑦ ᒐᕙᒪᒃᑯᓐᓄᑦ ᐊᒻᒪ ᐊᑕᐅᓯᖅ ᐅᑯᓄᖓ SmartICE.

ᑲᓇᑕᒥ ᖃᖓᑕᓂᒃᑯᑦ ᖃᐅᔨᓴᖅᑐᓕᕆᓂᕐᒧᑦ ᐱᓕᕆᐊᓄᑦ ᐃᒡᓗᒃᓴᖅ ᑎᑎᕋᖅᕕᒃᓴᖃᕐᓂᐊᕐᒥᔪᖅ, ᖃᓄᐃᓕᐅᕈᑎᓕᕆᕝᕕᒃᓴᖅ ᐊᒻᒪᓗ ᑲᑎᒪᑲᐃᓐᓇᕐᕕᒃᓴᓂᒃ. ᖃᖓᑕᓲᒃᑯᕕᑦ, ᑖᓐᓇ ᓴᓇᔭᐅᓂᐊᖅᖢᓂ ᐃᖃᓗᐃᑦ ᒥᕝᕕᖓᓂᒃ, ᖃᓄᐃᓕᖓᓂᐊᕐᓂᖓ ᐋᕿᒃᓱᖅᑕᐅᓂᐊᖅᑐᖅ ᐊᕐᕌᒍᒥ ᐅᑯᓇᙵᑦ EVOQ ᐃᒡᓗᒃᓴᓂᒃ ᑎᑎᕋᐅᔭᖅᑎᓄᑦ. ᖃᖓᑕᓲᒃᑯᕕᒃᓴᖅ ᐊᒻᒪ ᐱᓕᕆᕝᕕᒃᓴᐃᑦ ᐱᐊᓂᒃᑕᐅᓯᒪᓪᓗᐊᖅᑐᑦ 2023-ᒥᓐ.

ᑲᓇᑕᒥ ᖃᖓᑕᓂᒃᑯᑦ ᖃᐅᔨᓴᖅᑐᓕᕆᓂᕐᒧᑦ ᐱᓕᕆᐊᖑᔪᖅ ᖃᐅᔨᓴᕐᓂᐅᕗᖅ ᐅᒥᐊᕐᔪᐊᓂᒃ ᑲᓇᑕᐅᑉ ᐃᒪᖏᓐᓃᑉᐸᒃᑐᑦ ᓱᕈᖅᑎᕆᑎᑦᑕᐃᓕᓪᓗᒋᑦ, ᐊᑐᖅᐸᒃᖢᑎᒃ ᖃᖓᑕᓲᒃᑯᑦ ᖃᐅᔨᓴᓇᓱᒃᖢᑎᒃ ᐅᖅᓱᐊᓗᖕᓂᒃ ᑯᕕᔭᐅᔪᕕᓂᖅᑕᖃᕆᐊᒃᓴᖓᓂᒃ. ᐅᓇ ᐱᓕᕆᓂᖅ ᐊᒻᒪ ᖃᐅᔨᓴᕐᓂᐅᕗᖅ ᐅᒥᐊᕐᔪᐊᑦ ᖃᓄᐃᓕᐅᖅᐸᓪᓕᐊᓂᖏᓐᓂᒃ, ᓯᑯ ᖃᓄᐃᓐᓂᖓᓂᒃ ᐊᒻᒪᓗ ᑕᕆᐅᕐᒥᐅᑕᓂᒃ ᓴᐳᔾᔨᓯᒪᒐᓱᖕᓂᕐᒧᑦ.

ᑕᐃᒪᐃᓕᐅᕋᓗᐊᕐᑎᓪᓗᒋᑦ, ᐊᕙᑎᓕᕆᓂᕐᒧᑦ ᖃᐅᔨᓴᕈᑎᐅᕙᓪᓕᐊᔪᓂᒃ ᐱᓕᕆᐊᒃᓴᖅ ᕗᕉᐱᓲᑉ ᑲᖏᖅᖢᐊᓂ ᐃᓚᒋᔭᐅᕗᑦ ᓯᒡᔭᒥᐅᑕᖅ ᐊᕙᑎᖏᓐᓂᒃ ᐱᓕᕆᐊᒧᑦ—ᐱᓕᕆᐊᒃᓴᖅ ᐱᔾᔪᑎᖃᖅᑐᖅ ᖃᐅᔨᓴᕐᓂᕐᒥᒃ ᐅᒥᐊᕐᔪᐊᓄᑦ ᐊᖅᑯᑎᐅᓗᐊᖅᐸᒃᑐᓂᒃ, ᖃᐅᔨᓴᖅᑎᓂᒡᓗ ᓯᒡᔭᒥᐅᑕᓂᒃ ᐊᒻᒪ ᓄᓇᓕᖕᓂ ᐱᓕᕆᖃᑎᖃᖅᑎᑦᑎᓪᓗᑎᒃ. ᐅᓇ ᐱᓕᕆᐊᒃᓴᖅ ᐃᓚᒋᔭᐅᔪᖅ ᑕᕆᐅᕐᒥᐅᑕᓂᒃ ᓴᐳᔾᔨᓯᒪᓂᕐᒧᑦ ᐸᕐᓇᐅᑎᓂᒃ.

ᒑᓄ ᑐᓴᖅᑎᑦᑎᓚᐅᕐᑐᖅ ᐃᑲᔫᑎᒃᓴᓂᒃ ᑭᒡᒐᖅᑐᐃᓪᓗᓂ ᔮᓇᑕᓐ ᕗᐃᐊᑭᓐᓴᓐᒥ, ᐃᒪᕐᒥᐅᑕᓕᕆᓂᕐᒧᑦ ᒥᓂᔅᑕ ᐊᒻᒪᓗ ᑲᓇᑕᐅᑉ ᑕᕆᐅᖏᓐᓂᒃ ᓴᐳᓐᓂᐊᖅᑎᓄᑦ. “ᐃᒪᐃᓕᐅᕈᒪᒐᑦᑕ ᓄᐊᑦᑎᓗᑕ ᐱᒋᐊᕐᕕᐅᓂᐊᖅᑐᓂᒃ ᖃᓄᐃᑦᑑᓂᖏᑦᑎᒍᑦ ᑕᕆᐅᑉ ᓯᒡᔭᖏᑦᑕ ᐃᒪᖏᑦ ᐊᒻᒪᓗ ᐆᒪᔪᐃᑦ ᒫᓐᓇᐅᔪᖅ,” ᐅᖃᖅᑐᖅ ᒑᓅ.

ᓄᓇᕗᑦ ᒐᕙᒪᒃᑯᑦ ᐱᓕᕆᐊᖓ ᐃᒪᐃᓕᐅᕈᑎᐅᓂᐊᖅᑐᖅ ᖃᓄᖅ ᐱᑕᖃᖅᑎᒌᖕᒪᖔᑕ ᐊᒻᒪ ᐅᓄᕐᓕᖃᕐᒪᖔᑕ ᐊᑕᐅᓯᑦᑕᐃᓐᓇᕐᒦᑉᐸᒃᑐᑦ, ᐅᑯᑎᑐᓇᖅ ᐃᖃᓗᒃᑎᑐᑦ, ᐊᒻᒪᓗ ᕿᖅᑯᐊᑦ ᐱᐅᔪᓐᓃᕐᓯᒪᓂᖃᕆᐊᒃᓴᖏᓐᓂᒃ, ᐊᒻᒪᓗ ᐅᑯᐊ SmartICE-ᑯᑦ ᐱᓕᕆᓂᖓ, ᐱᓕᕆᖃᑎᖃᕐᓗᑎᒃ ᐊᒪᕈᖅ ᐊᖑᓇᓱᒃᑐᓕᕆᔨᓂᒃ, ᖃᐅᔨᓴᕐᓂᐊᕐᒪᑕ ᑕᕆᐅᑉ ᓯᑯᖓᓂᒃ ᓄᓇᓖᑦ ᖃᓂᒋᔭᖏᓐᓂᒃ ᐊᒻᒪᓗ ᑲᑎᕐᓱᐃᓗᑎᒃ ᐊᕙᑎᒋᔭᐅᔫᑉ ᖃᓄᐃᒍᓯᐊᓂᒃ.

ᐃᖃᓗᐃᓪᓕ ᓯᓚᑖᓂᑦ, ᐃᑲᔫᑎᒃᓴᑦ ᑐᕌᖓᓚᐅᕐᑐᑦ ᓄᓇᓖᑦ ᐱᓕᕆᖃᑕᐅᔾᔪᑎᒃᓴᖏᓐᓄᑦ ᐅᑯᓇᙵᑦ ᑕᕆᐅᕐᒥᑦ ᓴᐳᔾᔨᓯᒪᓂᕐᒧᑦ ᐸᕐᓇᐅᑎᓂᒃ, ᐅᑯᐊ ᑮᓇᐅᔭᖅᑖᖅᑎᑕᐅᓪᓗᑎᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪᓗ ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐊᑐᓂ $300,000-ᓂ ᑐᓂᔭᐅᓪᓗᑎᒃ.

ᐅᑯᐊ ᐃᑲᔫᑎᒃᓴᑦ ᐅᕙᙶᖅᑐᑦ ᓄᓇᖃᖅᑳᖅᑐᑦ ᐊᒻᒪ ᓄᓇᓖᑦ ᐱᓕᕆᖃᑕᐅᓂᖏᓐᓄᑦ ᐊᒻᒪ ᐱᓕᕆᖃᑎᒌᖕᓂᕐᒧᑦ ᐱᓕᕆᐊᒧᑦ, ᑖᓐᓇ ᐃᑲᔪᕈᑎᐅᖕᒪᑦ ᓄᓇᓖᑦ ᐃᑲᔪᕐᓂᕐᓴᐅᔪᓐᓇᖁᓪᓗᒋᑦ ᑕᕆᐅᕐᒥᑦ ᓴᐳᔾᔨᓯᒪᓂᕐᒧᑦ ᐸᕐᓇᐅᑎᓃᑦᑐᓂᒃ ᐊᒻᒪᓗ ᑕᕆᐅᕐᒥ ᐱᕐᕈᓗᐊᕿᑎᑦᑕᐃᓕᓂᕐᒧᑦ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᑐᕐᓂᐊᖅᑐᑦ ᑮᓇᐅᔭᓂᒃ ᐃᑲᔫᑎᒋᓂᐊᕐᓗᒋᑦ ᖃᓄᐃᓕᐅᕈᑎᐅᓂᐊᕐᑐᑦ ᑕᕆᐅᕐᒥᑦ ᓴᐳᔾᔨᓯᒪᓂᕐᒧᑦ ᐸᕐᓇᐅᑎᓂᒃ ᐱᓕᕆᐊᖑᓂᐊᕐᑐᓂᒃ, ᐊᒻᒪᓗ ᑕᕆᐅᕐᒥᐅᑕᓂᒃ ᐱᕐᕈᓗᐊᕿᑎᑦᑕᐃᓕᓂᕐᒧᑦ ᐱᓕᕆᐊᕆᓯᒪᔭᖏᓐᓂᒃ, ᐅᑯᐊᓕ ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐊᑐᕐᓂᐊᖅᖢᑎᒃ ᐃᑲᔫᑎᑖᖏ ᑕᕆᐅᕐᒥᐅᑕᓂᒃ ᐱᕐᕈᓗᐊᕿᑎᑦᑕᐃᓕᓂᕐᒧ ᐊᒻᒪᓗ ᐱᐅᓯᕚᓪᓕᖅᑎᑦᑎᓂᕐᒥᒃ ᓄᓇᕗᒥᑦ ᑕᕆᐅᒥᐅᑕᓄᑦ ᑲᑎᒪᔨᕐᔪᐊᓂᒃ.

ᒑᓅ ᑐᓴᖅᑎᑦᑎᓚᐅᕐᒥᔪᖅ ᐃᒪᓐᓇ, ᐅᕘᓇ ᑕᕆᐅᕐᒥᐅᑕᓂᒃ ᓴᐳᔾᔨᓯᒪᓂᕐᒧᑦ ᐸᕐᓇᐅᑎᓂᒃ, ᑭᓴᕐᕕᒃᓴᓂᒃ ᓴᓇᓂᐊᖅᑐᑦ ᐊᐅᔪᐃᑦᑐᒥᓐ ᐊᒻᒪ ᖃᐅᓱᐃᑦᑐᒥᓐ.

ᐱᓕᕆᖃᑎᖃᕐᓗᑎᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐊᒻᒪ ᓄᓇᕗᑦ ᒐᕙᒪᒃᑯᓐᓂᑦ ᐋᕿᒃᓱᐃᕙᓪᓕᐊᓂᕐᒥᒃ ᑭᓴᕐᕕᒃᓴᓂᒃ ᐊᒻᒪ ᓴᓇᓂᕐᒧᑦ ᐃᑲᔪᕐᓂᕐᒥᒃ, ᐃᖏᕐᕋᔾᔪᑎᓕᕆᔨᒃᑯᑦ ᑲᓇᑕᒥ ᐱᑕᖃᖅᑎᑦᑎᓂᐊᖅᑐᑦ $76.5 ᒥᓕᐊᓐ ᑖᓚᓂ ᐊᕐᕌᒍᓄᑦ 7-ᓄ ᑖᒃᑯᓄᖓ ᐱᓕᕆᐊᒃᓴᓄᑦ, ᐃᓚᒋᔭᐅᓗᓂ $190-ᒥᓕᐊᓐ ᑖᓚᓂ ᐃᑲᔫᑎᒃᓴᓂᒃ ᐱᓕᕆᕝᕕᒃᓴᓄᑦ ᓄᓇᓕᖕᓂ ᒫᓃᑦᑐᓂᒃ ᑕᓪᓗᕈᑎᐅᑉ ᐃᒪᖓᑕ ᒥᒃᓵᓂᑦ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐊᖓᔪᖅᑳᖓ ᐲ.ᔭᐃ. ᐊᕿᐊᕈᒃ ᐅᖃᓚᐅᕐᑐᖅ ᐃᒪᓐᓇ, ᐱᓕᕆᖃᑎᖃᕐᓂᒃᑯᑦ ᐃᒪᕐᒥᐅᑕᓕᕆᔨᒃᑯᓐᓂᑦ, ᖃᐅᔨᓴᑲᑕᒃᓯᒪᖕᒪᑕ ᖃᓄᐃᓕᐅᕈᑎᐅᓂᐊᖅᑐᓂᒃ ᐊᒻᒪᓗ ᓂᕆᐅᒃᖢᓂ ᐅᓂᒃᑳᓕᐊᖑᔪᑦ ᐱᐊᓂᒃᑕᐅᓂᐊᕆᐊᒃᓴᖏᓐᓂᒃ ᐊᕐᕌᒍᙳᓚᐅᕐᑎᓐᓇᒍ.

ᐅᓂᒃᑳᕆᔭᐅᔪᖅ ᑭᖑᓪᓕᕐᒥᑦ ᐱᓕᕆᐊᒃᓴᓂᒃ ᐱᒋᐊᕈᑎᐅᓕᕐᓂᐊᖅᑐᒃᓴᐅᕗᖅ, ᐅᖃᖅᑐᖅ ᐊᕿᐊᕈᒃ, ᐃᒪᓐᓇ “ᐃᓄᐃᑦ ᓄᓇᓕᖕᓃᑦᑐᑦ ᐊᑯᓂᐊᓗᒃ ᐅᑕᕿᖕᒪᑕ ᑕᒪᑐᒥᖓ ᑕᐅᑐᙳᐊᖅᑕᐅᓂᑯᒥᓐ.”

Share This Story

(0) Comments

Join the Conversation

Your email address will not be published. Required fields are marked *

*