ᑲᓇᑕ ᒪᒥᐊᑦᑕᕆᐊᓕᒃ ᑕᖅᑭᐅᓂᐊᕐᑐᒥᒃ ᐱᑦᑎᐊᖅᑕᐅᕙᓚᐅᙱᓐᓂᖏᓐᓄᑦ ᐃᓄᐃᑦ ᐳᕙᒡᓗᒃᑐᑦ

For an English version of this story, see Canada to say sorry next month for past abuse of Inuit TB patients.

ᒐᕙᒪᑐᖃᒃᑯᑦ ᒪᒥᐊᓐᓂᐊᖅᑐᒃᓴᐅᕗᑦ ᐃᓄᖕᓄᑦ ᑕᖅᑭᐅᓂᐊᕐᑐᒥᒃ ᐊᒥᓱᐊᓗᖕᓄᑦ ᐋᓐᓂᐊᕆᔭᐅᓯᒪᔪᓂᒃ ᐱᒋᐊᕐᓂᑯᓂᒃ ᐃᓄᐃᑦ ᐱᑦᑎᐊᖅᑕᐅᕙᙱᓐᓂᕕᓂᖏᓐᓂᒃ ᐳᕙᒡᓗᖕᓇᒻᑐᖃᓗᐊᕐᑎᓪᓗᒍ 1940-ᖏᓐᓂᒃ, 1950-ᖏᓐᓂᒃ ᐊᒻᒪᓗ 1960-ᖏᓐᓂᒃ, ᐅᖃᐅᓯᐅᓚᐅᕐᑐᖅ ᐱᓕᕆᓂᕐᒥᒃ ᖃᐅᔨᒪᔪᒥᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᑕᓪᓕᕐᒥᐅᑎᓪᓗᒍ, ᕕᕝᕗᐊᕆ 8.

ᑭᓯᐊᓂᓕ ᓱᓕ ᓇᓗᓇᕐᑐᖅ ᑲᓇᑕᒧᑦ ᐊᖓᔪᖅᑳᖅ ᔭᔅᑎᓐ ᑐᕉᑑ ᓄᓇᕗᒧᑦ ᖃᖓᑕᓂᐊᕆᐊᒃᓴᖓᓂ ᐅᕝᕙᓘᓐᓃᑦ ᐅᑭᐅᕐᑕᖅᑐᒧᑦ ᑕᒪᑐᒥᖓ ᐊᑯᓂᐊᓗ ᐅᑕᖅᑭᔭᐅᔪᒥᒃ ᒪᒥᐊᓐᓂᕐᒥᒃ ᐅᐸᒍᑎᒻᒪᕆᒡᓗᓂ, ᑐᓴᕐᕕᐅᔪᖅ ᐅᖃᖅᑐᖅ.

ᑭᐅᕈᓕᓐ ᐸᓇᑦ, ᒐᕙᒪᒃᑯᓐᓄᑦ-ᓄᓇᖃᖅᑳᖅᑐᓄᓪᓗ ᒥᓂᔅᑕ, ᐅᖃᓚᐅᕐᒪᑦ ᐃᓚᒋᔭᐅᔪᓄᑦ ᐅᑯᓄᖓ ᓴᓇᑦ ᑲᑎᒪᔨᕋᓛᖏᓐᓄᑦ ᐅᑭᐅᕐᑕᖅᑐᕐᒧᑦ ᐅᓇ ᑐᕉᑑ ᒪᒥᐊᒋᐊᖅᑐᕐᓂᐊᕐᓂᕋᖅᖢᓂᐅᒃ ᓄᓇᕗᒥᑦ, ᐱᓕᕆᕙᓪᓕᐊᓂᐅᑉ ᐃᓚᖓ ᑕᐃᔭᐅᔪᖅ “ᓇᓂᓚᕗᑦ.”

“ᐃᓱᒪᔪᖓ ᖃᐅᔨᒪᓂᔅᓯᓐᓂᒃ, ᑕᖅᑭᐅᓂᐊᕐᑐᒥᑦ ᑲᓇᑕᒧ ᐊᖓᔪᖅᑳᖅ ᓄᓇᕗᒧᙵᐅᓂᐊᕐᒪ ᐆᒧᖓ ᓇᓂᓚᕗᑦ ᒪᒥᐊᓐᓂᕐᒧᑦ,” ᐸᓇᑦ ᐅᖃᓚᐅᕐᑐᖅ ᕕᕝᕗᐊᕆ 4-ᒥ.

ᑭᓯᐊᓂᓕ ᑕᒪᓐᓇ ᓇᓗᓇᖅᑐᖅ — ᓲᖃᐃᒻᒪ ᑲᓇᑕᒧ ᐊᖓᔪᖅᑳᑉ ᑎᑎᕋᕐᕕᖓ ᓱᓕ ᐱᓕᕆᐊᖃᕐᒪᑕ ᐱᓕᕆᐊᒨᖓᔪᓂᒃ, ᑖᓐᓇ ᑐᓴᕐᕕᐅᔪᖅ ᐅᖃᓚᐅᕐᑐᖅ.

‘ᓇᓂᓚᕗᑦ’ ᐱᓇᓱᐊᒐᕆᔭᐅᔪᖅ ᑐᕉᑑ, ᒥᓂᔅᑕᐃᓪᓗ ᐊᒻᒪ ᓯᕗᓕᐅᕐᑎᐅᔪᑦ ᑎᓴᒪᓂᒃ ᐃᓄᐃᑦ ᓄᓇᖓᓂᑦ ᐊᕕᒃᑐᕐᓯᒪᓂᒃᑯᑦ  ᑲᑐᔾᔨᖃᑎᒌᖏᓪᓗ ᐊᖏᖃᑎᒌᒍᑎᕕᓂᖓᓂᒃ ᑲᑎᒪᑎᓪᓗᒋᑦ ᐃᖃᓗᖕᓂᑦ ᕕᕝᕗᐊᕆ 2017-ᒥᑦ, ᑲᑎᕐᖓᓪᓗᑎᒃ ᐋᕿᒃᓱᐃᑎᓪᓗᒋᑦ ᐃᓄᐃᑦ-ᒐᕙᒪᒃᑯᑦ ᐱᓕᕆᖃᑎᒌᖕᓂᕐᒧᑦ ᑲᑎᒪᔨᕋᓂᒃ.

ᐊᒻᒪᓗ ᐅᒃᑑᐱᕆᐅᓚᐅᕐᑐᒥ, ᐱᓕᕆᔨᒻᒪᕆᐅᔪᑦ ᐸᓇᑦ CIRNAC ᐱᓕᕆᕝᕕᖓᓐᓂ ᐅᖃᓚᐅᕐᑐᑦ ᑲᑎᒪᔭᖅᑐᕐᓯᒪᔪᓄᑦ ᐊᕐᕌᒍᑕᒫᑦ ᑲᑎᒪᕕᒡᔪᐊᖅᑎᓪᓗᒋᑦ ᓄᓇᕗᑦ ᑐᙵᕕᒃ ᑎᒥᖓ ᐅᓇ ‘ᓇᓂᓚᕗᑦ’ ᐱᓕᕆᐊᖑᔪᖅ ᒪᒥᐊᓐᓂᐅᑉ ᐅᖓᑖᓅᖓᓂᐊᕐᓂᕋᖅᖢᓂᐅᒃ.

ᑕᒪᓐᓇᓕ ᑐᑭᖃᖅᑐᖅ ᒪᑯᓂᖓ ᖃᓄᐃᓕᐅᕈᑎᒃᓴᓂᒃ, ᑕᒪᒃᑯᐊᓗ ᐱᒋᐊᖅᑕᐅᓯᒪᓕᖅᖢᑎᒃ, ᑐᕌᖓᔪᓂ ᐃᓄᖕᓂ ᐃᑲᔪᕈᑎᐅᓂᐊᖅᑐᓂᒃ ᕿᓂᕐᓂᕐᒥᒃ ᐃᓚᖏᑦᑕ ᐃᓗᕕᖏᓐᓂᒃ ᐊᐅᓪᓚᖅᑎᑕᐅᓚᐅᕐᓯᒪᔪᓂ ᑲᓇᑕᐅ ᓂᒋᐊᓄᑦ ᐳᕙᒡᓗᖕᓂᖏᓐᓄᑦ 1940-ᖏᓪᓗ 1960-ᖏᓪᓗ ᐊᑯᓐᓂᖏᓐᓂᒃ.

ᑕᐃᔅᓱᒪᓂᐅᑎᓪᓗᒍ, ᓲᕐᓗ ᐃᒪᓐᓇ ᒫᓂ ᐱᖓᓱᓂᒃ ᐃᓄᖕᓂ ᐊᑕᐅᓯᖅ ᑲᓇᑕᒥᐅᑕᖅ ᐳᕙᒡᓗᓕᓚᐅᕐᓯᒪᖕᒪᑦ, ᐅᑯᐊ ᑲᓇᑕᒥ ᐋᓐᓂᐊᖃᖅᑕᐃᓕᑎᑦᑎᔨᒃᑯᑦ ᑲᑐᔾᔨᖃᑎᒌᖏᑦ (Canadian Public Health Association) ᑕᐃᒪᓐᓇ ᐃᓱᒪᒋᔭᖃᕐᓯᒪᔪᑦ.

1950-ᓗ 1969-ᓗ ᐊᑯᓐᓂᖓᓂ, ᐅᓄᕐᑐᐊᓗᐃᑦ ᐃᓄᐃᑦ ᖃᓪᓗᓈᓄᑦ ᐊᐅᓪᓚᖅᑎᑕᐅᖃᑦᑕᓚᐅᕐᒪᑕ ᓯᑯᓯᐅᑎᒃᑯᑦ ᓰ.ᑏ. ᕼᐊᐅᒥ, ᐅᒥᐊᕐᔪᐊᖅ ᐋᓐᓂᐊᕕᖃᖅᖢᓂ ᐊᒻᒪ ᐃᓄᖕᓂ ᐅᓯᖃᖅᐸᒃᖢᓂ ᐊᒻᒪᓗ ᐊᕐᕌᒍᑕᒫᓐ ᐅᑭᐅᕐᑕᖅᑑᑉ ᑲᓇᖕᓇᖓᓄᙵᐅᕙᒃᖢᓂ.

ᐃᓄᐃᑦ ᐅᑕᕿᔪᑦ ᑐᑭᓕᕇᒃᖢᑎᒃ ᖃᐅᔨᓴᖅᑕᐅᓂᐊᕐᒪᑕ ᐅᒥᐊᕐᔪᐊᕐᒥᑦ ᐋᓐᓂᐊᕕᒃᒥᑦ ᓰ.ᑏ. ᕼᐊᐅ ᐅᕙᓂ ᐊᔾᔨᙳᐊᒥᑦ ᐊᔾᔨᓕᐅᕐᑕᐅᓂᑯ ᒫᓂ 1950-ᖏᓐᓂᒃ. (ᐋᓐᓂᐊᖃᖅᑕᐃᓕᓂᕐᒧᑦ ᖃᐅᔨᓴᖅᑐᓕᕆᔩᑦ, ᒪᒃᒫᔅᑐ ᔫᓂᕘᓯᑎᒥᑦ)

ᐃᓅᔪᓐᓃᕐᓯᒪᓕᕐᑐᖅ ᐅᕌᐳᑦ ᕗᐃᓕᐊᒻᓴᓐ, ᖃᐅᔨᒪᔭᐅᑦᑎᐊᖅᑐᖅ ᐃᑦᑕᕐᓂᓴᓕᕆᔨ ᐊᒻᒪᓗ ᒪᓕᒐᓕᕆᔨ, ᑎᑎᕋᓚᐅᕐᓯᒪᔪᖅ ᐅᑭᐅᕐᑕᖅᑐᕐᒧᙵᐊᖃᑕᐅᑎᓪᓗᒍ ᓰ.ᑏ ᕼᐊᐅᒥ 1953-ᖑᑎᓪᓗᒍ, ᐃᒪᓐᓇ “ᐅᒥᐊᕐᔪᐊᖅ ᓄᒫᓇᖅᑐᕐᓯᐅᒻᒪᕆᒃᐳᖅ.”

“ᐱᐅᙱᑦᑐᐊᓘᓚᐅᕐᑐᖅ ᓲᖃᐃᒻᒪ ᑖᓐᓇ ᐅᒥᐊᕐᔪᐊᖅ ᐊᐅᓪᓚᕈᔾᔨᖃᑦᑕᓚᐅᕐᒪᑦ ᐊᖏᕐᕋᖏᓐᓂᒃ ᓵᓇᑑᕆᐊᒻᒧᑦ ᖃᓪᓗᓈᓄᑦ. ᑲᑎᕐᖓᑎᑕᐅᕙᓚᐅᕐᑐᑦ ᐅᒥᐊᕐᔪᐊᑉ ᐃᒡᓕᖃᕐᕕᖓᓂᒃ, ᐊᑕᐅᑎᒃᑯᑦ ᓂᕆᑎᑕᐅᕙᒃᖢᑎᒃ, ᐊᒻᒪ ᑲᑎᕐᖓᓪᓗᑎᒃ ᓯᓂᒡᕕᖃᖅᑎᑕᐅᓪᓗᑎᒃ. ᒪᓪᓕᓕᕌᖓᑦ ᖃᓂᒻᒪᖃᑦᑕᓚᐅᑉᕐᑐᑦ, ᑲᑉᐱᐊᓱᒃᐸᒃᖢᑎᒃ, ᑭᓲᙱᑎᑕᐅᕙᒃᖢᑎᒃ,” ᕗᐃᓕᐊᒻᓴᓐ ᑕᐃᒪᓐᓇ ᑎᑎᕋᕐᓯᒪᓂᕋᖅᑕᐅᔪᖅ ᐅᕙᓂ ‘Long Way from Home’: The Tuberculosis Epidemic, 1954-ᒥ ᐅᖃᓕᒫᒐᓕᐊᖑᓂᑯ ᑕᐃᑕᐃᑎᓪᓗᒋ ᐆᒧᖓ ᐹᑦ ᓵᓐᑎᕗᐊᑦ ᒍᕆᒋᐅ.

1956-ᒥ, ᐃᓱᒪᔭᐅᔪᖅ ᐃᒪᓐᓇ 1/7 ᐃᓄᓕᒫᓂᒃ ᑲᓇᑕᒦᑦ ᖃᓪᓗᓈᓂᑦ ᓲᕐᓗ ᓴᐱᓕᕐᓯᒪᑐᐃᓐᓇᓚᐅᕐᑐᑦ ᓵᓂᑑᕆᐊᒻᓂᒃ ᐊᒻᒪ ᐋᓐᓂᐊᕕᖕᓂᑦ.

ᐊᐅᓪᓚᕐᓯᒪᑎᑕᐅᓐᓇᓚᐅᕐᑐᖅ ᐊᕐᕌᒎᖕᓂ ᒪᕐᕉᒃ ᓇᑉᐸᕐᒥᒡᓗ ᐳᕙᒡᓗᒃᑐᓄᑦ, ᑭᓯᐊᓂᓕ ᐃᓚᖏᑦ ᐊᑯᓂᐅᓂᕐᓴᖅ ᐊᐅᓪᓚᕐᓯᒪᕙᓚᐅᕐᑐᑦ ᐊᒻᒪᓗ ᐊᒥᓱᑦ ᐃᓄᐃᑦ ᐊᖏᕐᕋᙲᓐᓇᕐᓂᑰᓪᓗᑎᒃ.

ᐃᓚᒋᔭᐅᔪᑦ ᐃᓄᖕᓂᑦ ᐳᕙᒡᓗᖕᓂᕐᒧᑦ ᐃᓅᔪᓐᓃᖅᑐᕕᓂᕐᓂᒃ ᖃᓪᓗᓈᓂᑦ ᐃᓛᓐᓂᒃᑯᑦ ᑐᓴᖅᑎᑕᐅᕙᓚᐅᕐᓯᒪᙱᒻᒪᑕ ᐃᓅᔪᓐᓃᖅᑐᖃᕋᓗᐊᕐᑎᓪᓗᒍ, ᐊᒻᒪᓗ ᐊᒥᓱᑦ ᐃᓄᐃᑦ ᐃᓗᕕᖅᑕᐅᓯᒪᓪᓗᑎᒃ ᓇᓗᓇᐃᒃᑯᑎᖃᙱᑦᑐᓂᒃ ᐃᓗᕕᕐᓂ.

ᑕᐃᒪᓕ ᓇᓂᓚᕗᑦ ᐱᓕᕆᓂᖅ ᐃᓚᖃᕐᓂᐊᖅᑐᖅ ᐃᑲᔪᕐᓂᕐᒥᑦ ᐃᓄᖕᓂᑦ ᐃᓚᖏᓐᓂᒃ ᓯᕗᕚᖏᓐᓂᒡᓗ ᑎᑎᖃᖁᑎᐅᔪᓂᒃ ᐱᔪᓐᓇᕐᓯᑎᑕᐅᓗᑎᒃ, ᐊᒻᒪᓗ ᑲᑎᕐᓱᖅᑕᐅᕙᓪᓕᐊᒍᑎᑎᒍᑦ ᐊᓯᖏᑦᑎᒍᓪᓗ ᐃᑲᔪᕐᑕᐅᓂᐊᕐᓗᑎᒃ, ᒐᕙᒪᑐᖃᓕᕆᔨᒻᒪᕆᑦ ᐅᖃᓚᐅᕐᓯᒪᔪᑦ ᐅᒃᑑᐱᕆᐅᓚᐅᕐᓯᒪᔪᒥᑦ.

ᑲᑎᕐᓱᐃᕙᓪᓕᐊᒍᑎᐅᔪᖅ ᐱᓕᕆᐊᖑᓕᓚᐅᕐᑐᖅ ᐊᒻᒪᓗ ᐊᕕᒃᑐᕐᓯᒪᓂᒃᑯᑦ ᐃᓄᐃᑦ ᑲᑐᔾᔨᖃᑎᒌᖏᑦ ᐃᓄᐃᑦ ᓄᓇᖓᓂ ᐃᖅᑲᓇᐃᔭᖅᑎᑖᑲᑕᓕᖅᑐᑦ ᑕᒪᓐᓇ ᐱᓕᕆᓂᖅ ᐊᖏᒡᓕᒋᐊᖅᑎᖢᒍ.

ᑕᒪᐅᓇᑦᑕᐃᓐᓇᖅ, ᐊᔾᔨᒌᙱᑦᑑᑎᑦ ᑲᑐᔾᔨᖃᑎᒌᖑᔪᑦ ᐊᒻᒪᓗ ᐃᒻᒥᒃᑰᖓᔪᑦ ᐃᓚᒋᔭᐅᔪᑦ, ᐊᕐᕌᒍᒐᓴᐅᓕᕐᑐᓂᒃ ᐱᓕᕆᓯᒪᓕᕐᑐᑦ ᓇᓗᓇᐃᔭᐃᓂᕐᒥ ᑭᓇ ᐃᓅᔪᓐᓃᕐᓂᑰᒋᐊᒃᓴᖓᓂ ᑲᓇᑕᐅᑉ ᓂᒋᐊᓂᒃ ᐳᕙᒡᓗᒋᐊᕐᓯᒪᓪᓗᓂ.

ᓲᕐᓗ, 2010-ᒥᑦ, ᐃᓚᒋᔭᐅᔪᑦ ᔫᓇᐃᑕᑦ ᑐᒃᓯᐊᕐᕕᒃᒥᑦ ᐊᓪᓚᐃᑦ ᒨᕼᐋᒃ ᓄᓇᖓᓂᒃ ᑳᓇᕗᐊᑭᒥ, ᒪᓐᑐᕆᐊᑉ ᓂᒋᕐᐸᓯᐊᓂᑦ, ᓇᓗᓇᐃᕐᓯᓚᐅᕐᓯᒪᔪᑦ 15-ᓂ ᐃᓄᖕᓂᑦ ᐃᓗᕕᖅᑕᐅᓯᒪᔪᓂᒃ ᑳᓇᕗᐊᑭᐅᑉ ᐃᓗᕕᖃᕐᕕᐊᓂᑦ, ᐊᒻᒪᓗ ᓇᓗᓇᐃᒃᑯᑦᑎᖅᓯᓪᓗᑎᒃ ᑖᒃᑯᓄᖓ.