ᑲᖏᖅᖠᓂᕐᒥ ᐃᔭᒐᖅᑖᕐᕕᒃ ᓂᐅᕐᕈᑎᐅᓂᖓ ᑭᕙᓪᓕᕐᒥᐅᓂᒃ ᓈᒻᒪᒋᔭᐅᓯᒪᙱᓚᖅ ᓱᓕ
“ᐱᐅᒋᓚᐅᕋᒃᑯ ᐃᑲᔪᖅᑐᐃᓂᖅ ᐃᓄᖕᓄᑦ ᓇᖕᒥᓂᕆᔭᐅᔪᒥᒃ… ᖃᐅᔨᔪᒪᔪᖓ ᖃᓄᐃᒻᒪ ᓂᐅᕕᖅᑕᐅᓚᐅᕐᓂᖏᓐᓂᒃ ᓄᐊᑕᓐᑯᓐᓄᑦ”
ᑳᑎ ᑕᐅᑐᙱ, ᒪᓕᒐᓕᐅᕐᑎ ᑲᖏᖅᖠᓂᐅᑉ ᐅᐊᖕᓇᖓᓄᑦ, ᐅᖃᖅᑐᖅ ᑐᑭᓯᒃᑲᓐᓂᕈᒪᓪᓗᓂ ᑭᓱᒧᑦ ᓴᒃᑰᑉ ᐱᕈᐃᔭᖏᓐᓂᒃ ᐊᐅᓚᑦᑎᔩᑦ ᓂᐅᕕᖅᑕᐅᑎᑦᑎᓂᖏᓐᓂᒃ ᓴᒃᑯ ᐃᔭᒐᖅᑖᕐᕕᒃᒥᑦ ᐅᑯᓄᖓ ᓄᐊᑦ ᕗᐃᐊᔅᑦ ᑲᒻᐸᓂᑯᓐᓄᑦ. (ᐊᔾᔨᙳᐊᖁᑎᒋᔭᐅᔪᖅ)
For this story in English, see Sudden sale of Rankin Inlet pharmacy still rankles Kivalliq residents
ᑭᓯᐊᓂᓕ ᓴᒃᑰᑉ ᐱᕈᐃᔭᖏᓐᓂᒃ ᐊᐅᓚᑦᑎᔩᑦ, ᑮᓇᐅᔭᓕᐅᕋᓱᖕᓂᕐᒧᑦ ᐱᕙᓪᓕᐊᔪᓕᕆᔨᒋᔭᐅᔪᑦ ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᓄᑦ ᐊᒻᒪᓗ ᐱᖃᖅᑎᐅᓛᖑᓪᓗᑎᒃ ᑲᒻᐸᓂᒥᒃ, ᐅᖃᐅᓯᖃᕈᒪᙱᓚᑦ ᓱᓕ ᓂᐅᕐᕈᑎᖃᕐᓂᕐᒥᒃ.
“ᐃᓅᓂᕐᒧᑦ ᐃᓚᒋᔭᐅᖃᑕᐅᑎᓪᓗᑕ, ᑕᑯᓚᐅᙱᑦᑐᒍᑦ ᑮᓇᐅᔭᓕᕆᔾᔪᑎᓂᒃ ᐅᕝᕙᓘᓐᓃᑦ ᑭᓱᒧᑦ ᓂᐅᕐᕈᑎᖃᕆᐊᒃᓴᖏᓐᓂᒃ,” ᐅᖃᖅᑐᖅ ᑳᑎ ᑕᐅᑐᙱ, ᒪᓕᒐᓕᐅᕐᑎ ᑲᖏᖅᓕᓂᐅᑉ ᐅᐊᖕᓇᖓᓄᑦ-ᐃᒡᓗᓕᒑᕐᔪᒃᒧᓪᓗ.
“ᑕᒪᓐᓇ ᐱᓕᕆᐊᖑᓚᐅᕐᒪᑦ ᖃᐅᔨᒪᔭᐅᑎᑕᐅᙱᖢᓂᓐ. ᑭᓯᐊᓂ ᓴᒃᑯ ᐄᔭᒐᖅᑖᕐᕕᒃ ᒪᑐᓕᕐᒪ ᐊᒻᒪᓗ ᓄᒃᑎᖅᑕᐅᓪᓗᓂ ᓄᐊᑕᓐᒧᑦ ᖃᐅᔨᓕᑕᐃᓐᓇᓚᐅᕐᑐᒍᑦ.”
ᑕᐃᒪᐃᓕᐅᓚᐅᕐᑐᑦ ᔭᓄᐊᕆ ᓄᖑᑉᐸᓪᓕᐊᓕᖅᑎᓪᓗᒍ, ᓄᓇᖃᖅᑐᑦ ᐅᖃᖅᑐᑦ. ᕕᕝᕗᐊᕆᐅᓕᕐᑎᓪᓗᒍ, ᓄᑖᒥ ᐄᔭᒐᖅᑖᕐᕕᒃᒥᑦ ᑖᒃᑯᐊ ᐊᑭᑦᑎᐊᖓᓂᒃ ᒪᑐᐃᕐᑐᖃᓕᓚᐅᕐᑐᖅ ᑲᖏᖅᖠᓂᕐᒥᒃ ᓄᐊᑕᓐᓂ ᓂᐅᕕᕐᕕᐊᓂ.
“ᐱᐅᒋᓚᐅᕋᒃᑯ ᐃᑲᔪᖅᑐᐃᓂᖅ ᐃᓄᖕᓄᑦ ᓇᖕᒥᓂᕆᔭᐅᔪᒥᒃ. ᐱᐅᒋᓚᐅᕋᒃᑯ ᓴᒃᑯ ᐄᔭᒐᐃᑦ. ᖃᓄᐃᒻᒪᓐ ᓂᐅᕕᖅᑕᐅᓚᐅᕐᐸ? ᑕᐃᒪᐃᓪᓗᐊᕐᓂᙱᑦᑐᑦ. ᖃᐅᔨᔪᒪᔪᖓ ᖃᓄᐃᒻᒪᑦ ᓂᐅᕐᕈᑎᐅᖕᒪᖔᑦ ᓄᐊᑕᒻᒧᑦ,” ᐊᑕᐅᓯᖅ ᓄᓇᖃᖃᑕᐅᔪᖅ ᐅᖃᓚᐅᕐᑐᖅ.
“ᐃᓄᐃᑦ ᑕᒪᑐᒥᖓ ᐅᔾᔨᕈᓱᓕᕆᐊᖃᖅᑐᑦ ᐃᒪᓐᓇ, ᓴᒃᑯ ᓄᐊᑕᓐᒧᑦ ᓂᐅᕐᕈᑎᖃᓚᐅᕐᓂᖏᓐᓂᒃ ᑮᓇᐅᔭᓕᐅᑲᐅᕐᑐᕈᒪᒧᑦ,” ᐅᖃᕐᒥᔪᖅ ᐊᓯᖓ ᓄᓇᖃᕐᒥᔪᖅ.
ᓴᒃᑰᑉ ᐱᕈᐃᔭᖏᑦ ᑭᐅᓚᐅᙱᑦᑐᑦ ᖃᔅᓯᒐᓴᖕᓂ ᖃᕋᓴᐅᔭᒃᑯᑦ ᑎᑎᕋᐅᓯᐅᔪᓂᒃ ᐊᒻᒪ ᐅᖄᓚᐅᑎᒃᑯᑦ ᑐᓴᕆᐊᕐᕕᐅᓇᓱᒃᑎᓪᓗᒋᑦ ᐅᖃᐅᓯᒃᓴᖏᓐᓄᓪᓘᓐᓃᑦ.
ᖃᕋᓴᐅᔭᒃᑯᑦ ᓴᕿᔮᒐᖏᑦᑎᒍᓪᓕ, ᐃᓄᐃᒃ ᓇᖕᒥᓂᖓᑦ ᐱᓇᓱᐊᒐᖓ ᐃᒪᓐᓇᐃᓕᖓᔪᖅ “ᐱᕈᕐᓴᐃᓂᖅ ᐊᑐᕈᓐᓇᕋᔭᖅᑐᓂᒃ ᓇᖕᒥᓂᖅ ᐱᓕᕆᐊᖑᔪᓂᒃ ᓈᒻᒪᖕᓂᕐᓴᒧᑦ ᐃᓄᖕᓄᑦ ᑭᕙᓪᓕᕐᒦᑦᑐᓂᒃ.”
ᓴᒃᑯ ᐄᔭᒐᖅᑖᕐᕕᒃ, ᖃᐅᑕᒫᓐ ᐱᓕᕆᐊᖏᑦ ᐊᐅᓚᑕᐅᓪᓗᑎᒃ ᓲᐳ ᑐᕆᕝᑎ ᐄᔭᒐᖅᑖᕐᕕᒃᒥᑦ ᒫᓂᑑᐸᒥ, ᐃᓱᒪᒋᔭᐅᔪᖅ ᐊᒥᓱᓄᑦ ᑮᓇᐅᔭᓕᐅᑦᑎᐊᕐᓂᑰᓂᖏᓐᓂ ᐱᔨᑦᑎᕋᖅᑎᓪᓗᒋ ᑭᕙᓪᓕᕐᒥᐅᓕᒫᓂᒃ.
ᓄᓇᑦᓯᐊᕐᒥ ᐱᕙᓪᓕᐊᔪᑦ ᑐᓴᖅᑎᑕᐅᓚᐅᕐᑐᑦ ᐃᓱᒪᒋᔭᖃᖅᑐᒥᑦ ᐄᔭᒐᖅᑖᕐᕕᒃ $200,000-ᓂᒃ ᑮᓇᐅᔭᓕᐅᖃᑦᑕᕐᓂᖏᓐᓂᒃ ᓂᐅᕐᕈᑎᖃᖃᑦᑕᕐᓂᕐᒥᒃ ᑕᕿᑕᒫᑦ.
ᓴᒃᑯ ᐱᕈᐃᔭᖏᓐᓂᒃ ᐊᐅᒍᓚᑦᑎᔩᑦ ᖃᕋᓴᐅᔭᒃᑯ ᓴᕿᔮᒐᖏᑦ ᑐᑭᒧᐊᕈᑎᖏᑦ ᐅᖃᐅᓯᒪᔭᖏᑦ ᐃᓚᖃᕐᓂᖏᓐᓂᒃ ᓴᕿᔮᖃᑦᑕᕐᓂᕐᒥᒃ ᐊᒻᒪ ᐃᓱᒪᓕᐅᕆᖃᑦᑕᕐᓂᕐᒥᒃ ᐊᖏᖃᑎᒌᖕᓂᒃᑯᑦ. ᑲᑐᔾᔨᖃᑎᒌᖑᔪᑦ ᑮᓇᐅᔭᐃᑦ ᐃᖏᕐᕋᕙᓪᓕᐊᓂᖏᓐᓂᒃ ᓴᕿᑎᑦᑎᕙᙱᑦᑐᑦ ᑭᒃᑯᑐᐃᓐᓇᕐᓄᑦ.
ᖃᕋᓴᐅᔭᒃᑯᑦ ᓴᕿᔮᒐᖓ ᓇᓗᓇᐃᔭᐃᓯᒪᖕᒥᔪᖅ ᐃᓄᐃᑦ ᐱᔪᓐᓇᕐᓂᖏᓐᓂᒃ ᐊᒻᒪ ᐃᖅᑲᓇᐃᔭᖅᑎᑕᐅᔭᕆᐊᖃᕐᓂᖏᓐᓂᒃ ᑐᑭᒧᐊᕈᑎᖃᖅᖢᑎᒃ ᐊᔪᕈᓐᓃᕐᓴᖅᑎᑦᑎᓂᕐᒥᒃ, ᐃᑲᔪᖅᑐᐃᕙᓪᓕᐊᓂᕐᒥᒃ ᐊᒻᒪ ᐃᓕᓐᓂᐊᖅᑎᑦᑎᓂᕐᒥᒃ.
ᑖᓐᓇ ᐄᔭᒐᖅᑖᕐᕕᒃ ᐃᖅᑲᓇᐃᔭᖅᑎᑖᖃᑦᑕᐃᓐᓇᕐᓯᒪᔪᖅ, ᐊᑕᐅᓯᕐᓕ ᐃᓄᒃ ᐃᖅᑲᓇᐃᔭᖅᑎᐅᑯᑖᒃᓯᒪᔪᖅ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᓴᒃᑰᑉ ᐱᕈᐃᔭᖏᑦ ᑖᔅᓱᒥᖓ ᐃᓕᓐᓂᐊᒃᑲᓐᓂᕈᑎᒃᓴᒥᒃ ᒪᓂᒻᒪᐃᓯᒪᓚᐅᕐᓯᒪᙱᓐᓂᕋᖅᖢᓂᒋᑦ, ᐃᓕᓐᓂᐊᒃᑲᓐᓂᕐᓂᕐᒥᒡᓘᓐᓃᑦ ᐅᕝᕙᓘᓐᓃᑦ ᐱᕙᓪᓕᐊᒃᑲᓐᓂᕈᑎᒃᓴᓂᒃ.
ᓄᓇᑦᓯᐊᕐᒥ ᐱᕙᓪᓕᐊᔪᑦ ᐊᖏᓚᐅᕐᑐᑦ ᐃᖅᑲᓇᐃᔭᖅᑎᐅᓂᑰᑉ ᐊᑎᖓᓂᒃ ᓴᕿᑎᑕᐅᖁᔨᙱᑎᓪᓗᒍ.
ᐊᕐᕌᒍᓪᓗ ᐊᕙᑎᑦ (20) ᐅᖓᑖᓂᒃ ᐱᔨᑦᑎᕋᖅᑎᐅᓯᒪᓪᓗᓂ, ᐃᖅᑲᓇᐃᔭᖅᑎᐅᓂᑯ, ᓂᐅᕕᖅᑎᑦᑎᔨᐅᓪᓗᓂ ᐊᒻᒪᓗ ᑐᓵᔨᐅᓕᖅᐸᒃᖢᓂ ᐃᓐᓇᑐᖃᕐᓄᑦ, ᐅᖃᓚᐅᕐᑐᖅ ᐃᖅᑲᓇᐃᔭᕈᓐᓃᕐᓂᖓᓄᑦ ᑮᓇᐅᔭᖅᑖᖅᑎᑕᐅᒃᑲᓐᓂᓚᐅᙱᓐᓂᖓᓂᒃ ᓴᒃᑰᑉ ᐱᕈᐃᔭᖏᓐᓂᒃ ᐅᕝᕙᓘᓐᓃᑦ ᓲᐳ ᑐᕆᕝᑎᒃᑯᓐᓂᒃ.
“ᐅᖃᐅᓯᖃᕐᕕᒋᔾᔮᙱᓐᓇᑦᑎᒋ ᐊᒻᒪᓗ ᐅᓂᒃᑳᕐᓄᑦ ᐃᓚᒋᔭᐅᔪᒪᙱᖢᑕ,” ᐅᖃᖅᑎᒋᔭᐅᔪᖅ ᓲᐳ ᑐᕆᕝᑎᑯᑦ ᐊᖓᔪᖄᖃᕐᕕᐊᓂᒃ ᐅᖃᓚᐅᕐᑐᖅ.
ᑖᓐᓇ ᐃᓄᒃ ᐃᖅᑲᓇᐃᔭᖅᑎᒋᔭᐅᓂᑯ ᐅᖃᓚᐅᕐᑐᖅ ᓄᑖᒥᒃ ᐃᖅᑲᓇᐃᔮᒥᑦ ᓄᐊᑕᓐᑯᓐᓂ ᓂᐅᕕᖅᑎᑦᑎᔨᐅᓗᓂ ᒪᓂᒪᕝᕕᐅᓚᐅᕐᓂᕋᖅᖢᓂ, ᑭᓯᐊᓂᓕ ᓈᒻᒪᒋᓚᐅᙱᒻᒪᒍ ᐃᖅᑲᓇᐃᔮᕆᖁᔭᐅᔪᖅ.
“ᓴᒃᑯᒥᑦ ᐃᑲᔪᖃᑦᑕᓚᐅᕐᒥᒐᒪ ᐄᔭᒐᓕᕆᔨᒥᑦ ᐊᒻᒪ ᓴᓇᔨᓂᒃ ᐃᓐᓇᑐᖃᐃᑦ ᐃᑲᔪᖅᑕᐅᔭᕆᐊᖃᖅᑎᓪᓗᒋᑦ ᑐᓵᔨᖃᕆᐊᖃᖅᑎᓪᓗᒋᑦ… ᐱᓕᕆᒃᑲᓐᓂᕈᓐᓇᕋᒪ ᓂᐅᕕᖅᑎᑦᑎᔨᐅᑐᐃᓐᓇᙱᓪᓗᖓ,” ᐅᖃᖅᑐᖅ.
ᑕᐅᑐᙱ ᐊᖏᖃᑎᖃᖅᑐᖅ: “ᐃᖅᑲᓇᐃᔭᖅᑎᑖᕆᔭᐅᓪᓗᐊᓚᐅᕐᑐᖅ ᓄᐊᑕᓐᒥ ᓲᖃᐃᒻᒪ ᖃᐅᔨᒪᖕᒪᒋᑦ ᐱᔨᑦᑎᕋᖅᑕᐅᕙᒃᑐᑦ, ᐊᒻᒪᓗ ᐱᓕᕆᐊᖃᑦᑎᐊᖅᐸᒃᖢᓂ ᐊᒻᒪ ᐱᔨᑦᑎᕋᐅᑎᒋᓚᐅᕐᑕᖓ ᐊᑐᖅᑕᐅᔭᕆᐊᖃᕐᒪᑦ ᑕᒪᐃᓂ ᐃᓄᒃᑎᑐᑦ ᐊᒻᒪ ᖃᓪᓗᓈᑎᑐᑦ.”
ᓄᐊᑦ ᕗᐃᐊᔅᑦ ᑲᒻᐸᓂ ᐃᓱᒫᓘᑎᐅᓯᒪᔪᓂᒃ ᕙᐃᔅᐳᒃᑯᑦ ᑭᐅᓚᐅᕐᑐᑦ ᒪᑐᒧᖓ ᖃᓪᓗᓈᑐᑦ-ᐃᓄᒃᑐᑦ ᑐᑭᓕᐅᕆᓂᕐᒥᒃ.
ᐃᖅᑲᓇᐃᔭᖅᑎᐅᔪᑦ ᐊᑎᓕᐅᕐᓂᑯᑦ ᑕᒪᐅᖓᒥᐊᖅ ᑐᓴᐅᒪᑎᑦᑎᔭᕆᐊᖃᙱᓐᓂᕐᒥᒃ ᑐᓵᔨᐅᔪᓐᓇᖃᑦᑕᖅᑐᑦ ᐊᑐᖅᑕᐅᔭᕆᐊᖃᕈᑎᒃ, ᑎᒻ ᓯᒥᑦ, ᑐᑭᒧᐊᖅᑎᑦᑎᔨ ᐄᔭᒐᖅᑖᕐᕕᒃᒥᑦ ᐊᐅᓚᑕᐅᔪᓂᒃ ᑖᒃᑯᓄᖓ, ᐅᖃᓚᐅᕐᑐᖅ ᕙᐃᔅᐳᒃᑯᑦ.
“ᐄᔭᒐᖅᑖᕐᕕᒃᒥᑦ ᐃᖅᑲᓇᐃᔭᖅᑎᑖᒃᑲᓐᓂᕆᐊᖃᕐᓂᕈᑦᑕ ᓯᕗᓂᑦᑎᓐᓂᒃ, ᐃᓱᒪᒋᔭᖃᕋᔭᖅᑐᒍᑦ ᐃᓄᒃᑐᑦ ᐅᖃᕈᓐᓇᑦᑎᐊᕐᓂᖅ ᐱᐅᓪᓚᕆᒐᔭᕐᓂᖓᓂᒃ.”
ᑭᓯᐊᓂᓕ ᐃᓚᖏᑦ ᓄᓇᖃᖅᑎᐅᔪᑦ ᐃᓱᒪᓚᐅᕐᑐᑦ ᑖᓐᓇ ᑭᐅᔾᔪᑎᐅᔪᖅ ᓈᒻᒪᙱᓗᐊᕐᓂᖓᓂᒃ.
“ᑭᓇᑐᐃᓐᓇᒥᒃ ᐃᓄᖕᒥ ᑐᓵᔨᖃᖅᖢᓂ ᐱᓕᕆᐊᒧᑦ ᐃᓕᔅᓯᑎᑐᑦ ᐱᓕᕆᐊᖏᓐᓂᒃ ᐃᓱᒪᓇᕐᒪᑦ ᐅᔾᔨᕈᓱᙱᓐᓂᔅᓯᓐᓂᒃ ᐱᒻᒪᕆᐅᓂᒃᑰᖓᓂᖃᕆᐊᖃᕐᓂᖓᓂᒃ ᐱᔪᓐᓇᕐᓂᒃᑯᑦ,” ᐊᑕᐅᓯᖅ ᓄᓇᖃᖅᑐᖅ ᑭᐅᓚᐅᕐᒥᔪᖅ.
“ᒪᑯᓂᖓ ᓂᐅᕕᖅᑎᑦᑎᔨᑐᐃᓐᓇᕐᓂᒃ ᐱᖁᑎᓂᒡᓘᓐᓃᑦ ᐃᓕᐅᖃᐃᔨᓂᒃ ᐃᑲᔪᖅᑎᖃᕋᓱᙱᓪᓗᓯ,” ᑎᑎᕋᖅᓯᒪᔪᖃᓚᐅᕐᒥᔪᖅ ᓇᓗᓇᐃᕐᓯᒪᓪᓗᓂ ᐊᑯᓂᐊᓗᒃ ᑐᓵᔨᐅᓯᒪᓂᕐᒥᓂᒃ.
ᐊᐱᕆᔭᐅᑎᓪᓗᒋᑦ ᖃᓄᐃᒻᒪᓐ ᐃᖅᑲᓇᐃᔭᖅᑎᒋᔭᐅᓂᑯ ᓴᒃᑯᒃᑯᓐᓂ ᐊᕐᕌᒍᑦ ᐊᕙᑏᑦ ᐅᖓᑖᓂᒃ ᐃᖅᑲᓇᐃᔭᖅᑎᑕᐅᓚᐅᙱᑦᑕᕆᐊᒃᓴᖓᓂᒃ ᑐᓵᔨᐅᓗᓂ ᐃᓐᓇᑐᖃᕐᓄ, ᓄᐊᑦ ᕗᐃᐊᔅᑦ ᑲᒻᐸᓂᒃᑯᑦ ᐅᖃᕐᑎᖓ ᑎᐅᕆᒃ ᐅᕋᐃᒧ ᐅᖃᓚᐅᕐᑐᖅ ᓂᐅᕕᕐᕕᒃᒥᑦ ᐃᖅᑲᓇᐃᔭᖅᑎᐅᔪᑦ ᑐᓵᔨᐅᖃᑦᑕᕐᓂᖏᓂᒃᑕᐅᖅ ᓴᒃᑯᒃᑯᑦ ᐊᑐᓚᐅᕐᑕᖓᑎᑐᑦ.
“ᐊᔾᔨᒌᑐᐃᓐᓇᕆᒐᒃᑭ,” ᐅᕋᐃᒧ ᐅᖃᖅᑐᖅ.
ᐊᓯᖏᑦ ᐃᓱᒫᓘᑎᐅᖃᑕᐅᔪᑦ ᖃᖏᖅᖠᓂᕐᒥᐅᑕᕐᓂᒃ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐅᖃᐅᓯᐅᔪᓂᒃ ᐃᓚᖃᓚᐅᕐᑐᑦ ᓇᖕᒥᓂᕐᒨᖓᔪᓂᒃ: ᓄᑖᖅ ᐄᔭᒐᖅᑖᕐᕕᓕᕆᔨ ᒥᑭᑦᑐᕈᓗᖕᒦᒻᒪᑦ ᐊᒻᒪᓗ ᐊᑕᐅᓯᖅ ᐅᖃᓚᐅᖅᖢᓂ ᑐᓵᔪᓐᓇᑦᑎᐊᕐᓂᖓᓂᒃ ᐊᓯᖓ ᐄᔭᒐᖅᑖᖏᓐᓄᑦ ᐅᖃᓪᓚᒡᕕᐅᑎᓪᓗᒍ.
ᐊᓯᒃᑲᓐᓂᖓᑦᑕᐅᖅ ᓄᓇᖃᖅᑐᖅ ᐃᓱᒫᓗᓚᐅᕐᒥᔪᖅ ᑲᒪᒋᔭᐅᕙᒃᑐᑦ ᐊᖏᕐᓯᒪᔭᕆᐊᖃᕆᐊᒃᓴᖏᓐᓂᒃ ᓅᑎᑦᑎᔭᕆᐊᖃᕐᓂᕐᒧᑦ ᐋᓐᓂᐊᖃᖅᑐᓕᕆᓂᕐᒧᑦ ᑎᑎᕋᐅᓯᐅᕙᓪᓕᐊᕙᒃᑐᓂᒃ ᓴᒃᑯ ᐄᔭᒐᖅᑖᕐᕕᒃᒥᑦ ᐃᒻᒥᒃᑰᖓᔪᓄᑦ ᐱᓕᕆᐊᖃᖅᑐᓄᑦ.
“ᒪᑯᑎᒎᓇᕐᓕ ᑕᒪᐅᖓᒥᐅᖑᔭᕆᐊᖃᙱᓐᓂᕐᒧᑦ ᐱᖁᔭᑎᒍᑦ, ᐄᔭᒐᖅᑖᕐᕕᕗᑦ ᐊᒻᒪ ᐃᖅᑲᓇᐃᔭᖅᑎᐅᔪᑦ ᐱᖁᔭᑎᒍᑦ ᐱᓕᕆᑎᑕᐅᖕᒪᑕ ᐅᕘᓇ ᓇᖕᒥᓂᕐᒧᑦ ᐋᓐᓂᐊᖅᑐᓕᕆᓂᕐᒧᑦ ᑐᓴᐅᒪᔭᐅᔭᕆᐊᖃᕐᓂᕐᒧᑦ ᐱᖁᔭᕐᔪᐊᑎᒍᑦ ᑕᕝᕘᓇᓗ ᓴᐳᔾᔭᐅᓯᒪᓪᓗᑎᒃ ᑕᒪᐅᖓᒥᐊᖅ ᑐᓴᐅᒪᔭᐅᔭᕆᐊᖃᙱᓐᓂᖅ ᐊᒻᒪᓗ ᑲᒪᒋᔭᐅᕙᒃᑐᑦ ᖃᓄᐃᒍᓯᖏᓐᓂᒃ,” ᐅᕋᐃᒧ ᐅᖃᖅᑐᖅ.
ᓄᐊᑦ ᕗᐃᐊᔅᑦ ᑲᒻᐸᓂᒃᑯᑦ ᐱᑖᓚᐅᕐᓯᒪᖕᒥᒻᒪᑕ ᑭᑦᓄᓇ ᐄᔭᒐᖅᑖᕐᕕᒃᒥᑦ ᐃᖃᓗᒃᑑᑦᑎᐊᓂᒃ 2018 ᐃᓱᓕᑉᐸᓪᓕᐊᓕᖅᑎᓪᓗᒍ. ᑖᓐᓇ ᐄᔭᒐᖅᑖᕐᕕᒃ, ᐊᒻᒪᑦᑕᐅᖅ ᑮᓇᐅᔭᓕᐅᑦᑎᐊᕈᑎᐅᔪᖅ, ᐱᓕᕆᖃᑎᒌᖕᓂᒃᑰᖓᓚᐅᕐᓯᒪᔪᖅ ᐅᑯᓇᙵᑦ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦᑕ ᓇᖕᒥᓂᕆᔭᐅᔪᓂᒃ ᐱᕙᓪᓕᐊᔪᓕᕆᔨᓂᒃ ᐊᒻᒪ ᓲᐳ ᑐᕆᕝᑎᒃᑯᓐᓄᑦ.
“ᐅᓇ ᓇᖕᒥᓂᖃᕐᓂᕐᒧᑦ ᐃᓱᒪᓕᐊᖑᓚᐅᕐᓯᒪᔪᖅ ᑕᐅᑐᒃᖢᒍ ᖃᓄᐃᒍᑎᐅᓇᔭᕐᓂᖓ ᑕᒪᓐᓇ ᐱᓕᕆᐊᖃᕐᓂᐅᔪᖅ,” ᑎᑎᕋᕐᓯᒪᔪᖅ ᑎᒻ ᔨᐅ ᖃᕋᓴᐅᔭᑎᒍᑦ ᑎᑎᕋᖅᖢᓂ. ᔨᐅ ᐊᖓᔪᖅᑳᕆᔭᐅᔪᖅ ᑭᑦᓄᓇ ᐱᓕᕆᖃᑎᒌᑦ ᑲᒻᐸᓂᓄᑦ, ᐃᓚᒋᔭᐅᔪᖅ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᓄᑦ.
ᓄᓇᖃᖅᑐᑦ ᑕᒪᐃᓐᓂ ᑲᖏᖅᖠᓂᕐᒥ ᐊᒻᒪ ᐃᖃᓗᒃᑑᑦᑎᐊᕐᒥ ᕿᐱᓘᑎᖃᓚᐅᕐᑐᑦ ᑖᒃᑯᐊ ᓄᑖᑦ ᐄᔭᒐᖅᑖᕐᕕᐅᔪᑦ ᒪᓂᒻᒪᐃᓯᒪᓂᖏᓐᓂᒃ ᐅᓄᙱᓐᓂᕐᓴᓂᒃ ᐱᔭᐅᔭᕆᐊᖃᐃᓐᓇᖅᐸᒃᑐᓂᒃ ᒪᑯᑎᑐᓇᑎᖅ ᓄᑕᕋᓛᓄᑦ ᐃᒻᒧᖕᓂᒃ ᐊᒻᒪ ᐊᕐᓇᕐᓯᐅᑎᒐᓚᖕᓂᒃ ᐊᒻᒪᓗ ᐊᑭᑐᓂᕐᓴᐅᓕᖅᖢᑎᒃ.
“ᐱᓕᕆᖃᑎᖃᕋᑦᑕ ᐱᑖᕐᕕᐅᕙᒃᑐᓂᒃ ᐃᓚᐃᓐᓇᖏᓐᓂᒃ ᐊᒻᒪᓗ ᐊᔾᔨᒌᙱᑦᑑᑎᓂᒃ ᐱᑕᖃᖅᑎᑦᑎᓇᓱᒃᖢᑕ ᓂᐅᕕᖅᐸᒃᑐᓂᒃ ᑕᕝᕙᙵᑦ,” ᐅᕋᐃᒧ ᐅᖃᖅᑐᖅ. “ᐊᔾᔨᑦᑎᐊᖏᓐᓂᒃ ᐱᑖᖏᓐᓇᕈᓐᓇᙱᓐᓇᑦᑕ ᐱᑖᕆᖃᑦᑕᓚᐅᖅᑕᖏᓐᓂᒃ.”
ᐅᕋᐃᒧ ᐅᖃᓚᐅᕐᑐᖅ ᒪᕐᕉᒃ ᐱᑖᕆᔭᐅᔫᒃ ᐃᓚᒋᔭᐅᓂᖏᓐᓂᒃ ᑲᒻᐸᓂᐅᑉ ᐱᓇᓱᐊᒐᖓᓂᒃ ᐊᖏᒡᓕᒋᐊᖅᑎᑦᑎᓇᓱᖕᓂᕐᒥᒃ ᐋᓐᓂᐊᖃᖅᑐᓕᕆᓂᕐᒨᖓᔪᓂᒃ ᐱᔨᑦᑎᕋᐅᑎᖃᙱᓗᐊᖅᑐᓂᒃ ᓄᓇᓕᖕᓂ.
ᓄᐊᑦ ᕗᐃᐊᔅᑦ ᐱᓕᕆᓕᒪᑦᑎᐊᖅᑐᓂᒃ ᐊᒻᒪ ᐊᔪᙱᑦᑎᐊᖅᑐᓂᒃ ᐄᔭᒐᖅᑖᕐᕕᓕᕆᔨᓂᒃ ᐱᔨᑦᑎᕋᐅᑎᖃᕐᓯᒪᔪᑦ 80 ᐅᖓᑖᓂᒃ ᐃᓄᖕᓂᒃ, ᓄᓇᖃᖅᑳᖅᑐᓂᒃ ᐊᒻᒪ ᐊᓪᓚᒐᔪᐃᑦ ᓄᓇᖏᓐᓂᒃ ᑲᓇᑕᐅᑉ ᐅᐊᖕᓇᖅᐸᓯᐊᓂᒃ.”
ᑖᒪᔅ ᕉᓄ ᐃᒻᒥᒃᑰᖓᓪᓗᓂ ᑐᓴᒐᒃᓴᓕᐅᖃᑦᑕᖅᑐᖅ ᖃᐅᔨᓴᕋᓱᒃᖢᓂ ᓄᓇᖃᖅᖢᓂ ᐊᕐᕌᒎᓕᕐᑐᓂᒃ ᑕᓪᓕᒪᓂᒃ ᐃᖃᓗᖕᓂᑦ. ᐅᖃᖃᑎᒋᔪᓐᓇᖅᑕᑦ ᐅᕙᓂ thomas.rohner@gmail.com ᑐᕕᑐᑯᓪᓘᓐᓃᑦ ᐅᕙᓂ @thomas_rohner.
(0) Comments