ᒐᕙᒪᑐᖃᒃᑯᑦ ᐅᓪᓗᒃᑯᑦ ᐃᓕᓐᓂᐊᕐᕕᖏᓐᓄᑦ ᐃᓕᓐᓂᐊᕆᐊᖃᑦᑕᕐᓂᑯᑦ ᑮᓇᐅᔭᖅᑖᕋᓱᒍᓐᓇᕐᓯᔪᑦ

ᑲᓇᑕᒥ ᒐᕙᒪᒃᑯᑦ ᐅᓪᓗᒃᑯᑦ ᓄᓇᖃᖅᑳᖅᑐᓄᑦ ᐃᓕᓐᐊᕐᕕᖓᓄᑦ ᐃᓕᓐᓂᐊᕆᐊᖃᑦᑕᓚᐅᕐᓯᒪᒍᕕᑦ, ᐱᓇᓱᒍᓐᓇᖅᑐᑎᑦ ᑮᓇᐅᔭᖅᑖᕋᓱᖕᓂᕐᒥᑦ ᐅᕙᙵᑦ $1.3 ᐱᓕᐊᓐᑖᓚᓂᒃ ᒐᕙᒪᑐᖃᒃᑯᑦ ᐊᓪᓚᓄᑦ ᐃᓕᓐᓂᐊᕆᐊᖃᑦᑕᕐᓂᑯᓄᑦ ᐊᖏᖃᑎᒌᒍᑎᒥ, ᒐᕙᒪᑐᖃᒃᑯᑦ ᐅᖃᓚᐅᕐᑐᑦ ᔭᓄᐊᕆ 13-ᖑᑎᓪᓗᒍ.

ᑮᓇᐅᔭᖅᑖᕋᓱᖕᓂᖅ ᒪᑐᐃᓚᐅᕐᑐᖅ ᓇᒡᒐᔭᐅᒥ, ᔭᓄᐊᕆ 13 ᐊᒻᒪᓗ ᒪᑐᐃᖓᓂᐊᖅᖢᓂ ᐊᕐᕌᒎᖕᓂᒃ ᒪᕐᕉᖕᓂ ᐃᓚᖃᕐᓗᓂ ᑕᖅᑭᒃᑲᓐᓂᕐᓂᒃ 6-ᓂᒃ.

ᓄᓇᕗᒥᑦ, ᐃᓕᓐᐊᕆᐊᖃᑕᐅᓚᐅᕐᓯᒪᔪᑦ 27-ᓂ ᒐᕙᒪᑐᖃᒃᑯᑦ ᐅᓪᓗᒃᑯᑦ ᐃᓕᓐᓂᐊᕐᕕᖏᓐᓄᑦ ᐊᐅᓚᑕᐅᓂᑯᓂᒃ 1940-ᖏᓐᓂᒃ ᒪᐅᖓ 1970-ᖏᓐᓄᑦ ᑮᓇᐅᔭᖅᑖᕋᓱᒍᓐᓇᖅᑐᑦ.

ᐊᒻᒪᓗ ᓄᓇᕕᒃᒥ, ᐃᓕᓐᓂᐊᕆᐊᖃᑦᑕᓚᐅᕐᓯᒪᔪᑦ 11-ᓂ ᒐᕙᒪᑐᖃᒃᑯᑦ ᐅᓪᓗᒃᑯᑦ ᐃᓕᓐᓂᐊᕐᕕᖏᓐᓄᑦ ᑕᐃᔅᓱᒪᓂᓕ ᑕᐃᔭᐅᕙᓚᐅᕐᑐᒥᑦ ᑯᐸᐃᒃ ᑕᕐᕋᖓᓂ 1978 ᑐᖔᓂᑦ ᐊᔪᙱᒻᒥᔪᑦ.

ᐅᑭᐅᕐᑕᖅᑑᓪᓕ ᑲᓇᖕᓇᖅᐸᓯᐊᓂᒃ, ᐊᒥᓱᑦ ᐃᓄᐃᑦ ᐊᔪᖅᑎᑕᐅᓚᐅᕐᓯᒪᖕᒪᑕ 2007-ᒥᑦ ᐃᓕᓐᓂᐊᕆᐊᖅᑎᑕᐅᕙᓚᐅᕐᑐᓄᑦ ᓄᓇᖏᑦᑕ ᐊᓯᐊᓄᑦ ᐊᖏᕈᑎᑎᒍᑦ—ᓲᖃᐃᒻᒪ ᐃᓕᓐᓂᐊᕆᐊᖃᑦᑕᓚᐅᕐᓯᒪᖕᒪᑕ ᒐᕙᒪᑐᖃᒃᑯᑦ ᐅᓪᓗᒃᑯᑦ ᐃᓕᓐᓂᐊᕐᕕᖕᓄᑦ.

ᐅᕙᓂ ᐊᖏᕈᑎᒥ, ᑕᒪᐃᓐᓂ ᒐᕙᒪᑐᖃᒃᑯᑦ ᐅᓪᓗᒃᑯᑦ ᐃᓕᓐᓂᐊᕐᕕᖏᓐᓄᑦ ᐃᓕᓐᓂᐊᕆᐊᖅᐸᓚᐅᕐᑐᑦ ᒥᑭᓛᒥᑦ ᑮᓇᐅᔭᖅᑖᖅᑎᑕᐅᔪᓐᓇᖅᑐᑦ $10,000-ᓂᒃ.

“ᐅᓇ ᐊᖏᕈᑎ ᑐᙵᕕᖃᖅᑐᖅ ᑕᒪᒃᑯᐊ ᒐᕙᒪᑐᖃᒃᑯᑦ ᐃᓕᓐᓂᐊᕐᕕᖏᓐᓄᑦ ᐃᓕᓐᓂᐊᕆᐊᖃᑦᑕᕐᓂᑯᑦ ᐋᓐᓂᖅᑕᐅᓂᑰᒋᐊᒃᓴᖏᓐᓂᒃ,” ᐅᖃᕐᓯᒪᓚᐅᕐᑐᖅ ᒐᕙᒪᑐᖃᒃᑯᑦ ᑐᓴᒐᒃᓴᓕᐊᖏᑦ ᔭᓄᐊᕆ 13-ᒥᑦ.

ᐊᒻᒪᓗ ᐊᑭᓕᖅᑕᐅᔾᔪᑎ $10,000 ᐃᓚᖃᑐᐃᓐᓇᕆᐊᖃᕋᔭᖅᖢᓂ ᑕᒪᒃᑯᓄᖓ ᐋᓐᓂᕐᓱᖅᑕᐅᖃᑦᑕᕐᓂᑯᓄᑦ ᐅᕝᕙᓘᓐᓃᑦ ᖁᓄᔪᕐᓂᐊᖅᑕᐅᓂᒃᑯᓄᑦ ᒫᙵᑦ $50,000-ᓂᑦ ᒪᐅᖓ $200,000-ᓄᑦ, ᒪᓕᒡᓗᑎ ᖃᓄᑎᒋ ᐋᓐᓂᕐᓯᒪᓂᕆᔭᐅᔪᓂᒃ.

“ᐅᓇ ᐱᒻᒪᕆᐊᓘᔪᖅ ᖃᓄᐃᓕᐅᕐᓂᖅ ᒪᒥᓴᖅᐸᓪᓕᐊᓂᕐᒧᑦ ᐊᒻᒪ ᓈᒻᒪᖏᓕᐅᕈᑎᕕᓂᕐᓄᑦ ᐋᖅᑭᒋᐊᕐᕕᐅᓂᕐᒧᑦ ᐃᓕᓐᓂᐊᕆᐊᖃᑦᑕᓚᐅᕐᓯᒪᔪᓄᑦ ᐃᓚᖏᓐᓄᓪᓗ,” ᑭᐅᕈᓕᓐ ᐸᓇᑦ, ᒥᓂᔅᑕ ᒐᕙᒪᒃᑯᑦ-ᓄᓇᖃᖅᑳᖅᑐᕐᓗ ᐱᓕᕆᖃᑎᒌᖕᓂᖏᓐᓄᑦ, ᐅᖃᓚᐅᕐᑐᖅ ᑐᓴᒐᒃᓴᓕᐅᕐᑎᓪᓗᒋᑦ ᔭᓄᐊᕆ 13-ᒥᑦ.

ᐃᖃᖅᑐᐃᕕᒃᑰᖅᑎᑦᑎᓂᖅ ᑕᐃᔭᐅᓯᒪᖕᒥᔪᖅ ᐃᒪᓐᓇ ᒪᒃᓖᓐ ᑲᑐᔾᔨᓂᒃᑯᑦ ᐱᓕᕆᐊᖃᕐᓂᒃᑯᑦ (McLean Class Action) ᐃᖃᖅᑐᐃᕕᒃᑰᖅᑎᑦᑎᓂᖅ ᒐᕙᑐᖃᒃᑯᑦ ᐅᓪᓗᒃᑯᑦ ᐃᓕᓐᓂᐊᕐᕕᖏᓐᓄᑦ, ᐃᓱᒪᒋᔭᐅᓪᓗᓂ ᐃᓅᔪᓐᓃᕐᓂᑯ ᒋᐅᕆ ᓚᔅᓕ ᒪᒃᓖᓐ, ᒐᕙᒪᑐᖃᒃᑯᑦ ᐅᓪᓗᒃᑯᑦ ᐃᓕᓐᓂᐊᕐᕕᖓᓄᑦ ᐃᓕᓐᓂᐊᕆᐊᖃᑦᑕᕐᓚᐅᕐᓯᒪᔪᖅ ᑕᒪᑐᒥᖓᓗ ᐱᒋᐊᖅᑎᑦᑎᔨᐅᓂᑰᓪᓗᓂ ᑮᓇᐅᔭᖅᑖᕋᓱᖕᓂᕐᒥᓐ.

ᐅᑯᐊ ᓗᐊᐃᔭᐅᔪᑦ ᐅᑯᓄᖓ Gowling WLG-ᑯᓐᓂᑦ ᑭᒡᒐᖅᑐᐃᓪᓗᑎᒃ ᒐᕙᒪᑐᖃᒃᑯᓐᓂᒃ ᐊᒻᒪᓗ ᐅᓪᓗᒃᑯᑦ ᐃᓕᓐᓂᐊᕆᐊᖃᑦᑕᓚᐅᕐᓯᒪᔪᓂᒃ ᐱᐊᓂᒃᓯᓚᐅᕐᒪᑕ $1.3 ᐱᓕᐊᓐ ᑖᓚᓂ ᐊᖏᖃᑎᒌᒍᑎᒃᓴᓂᒃ ᒫᑦᓯ 2019-ᒥᑦ ᐊᒻᒪᓗ ᐃᖃᖅᑐᐃᔨᕐᔪᐊᒃᑲᑦ ᑲᓇᑕᐅᑉ ᒐᕙᒪᖓᓄᑦ ᐊᖏᓚᐅᖅᖢᑎᒃ ᑖᔅᓱᒥᖓ ᐋᒐᓯ 19-ᒥᑦ.

ᔭᓄᐊᕆ 13-ᒥᑦ, ᑎᓗᐊᐃᑦ, ᐃᖃᖅᑐᐃᕕᒃᑯᑦ ᑎᒃᑯᐊᖅᑕᐅᓯᒪᔪᑦ ᐱᓕᕆᔨᒋᔭᐅᓂᐊᖅᑐᓂ ᑮᓇᐅᔭᖅᑖᕐᕕᒃᓴᓂᒃ, ᐱᒋᐊᖅᑎᑦᑎᓚᐅᕐᑐᑦ ᐱᑖᕋᓱᒍᓐᓇᐅᑎᓕᕆᓂᕐᒥᒃ ᐃᓕᓐᓂᐊᕆᐊᖃᑦᑕᓚᐅᕐᓯᒪᔪᓄᑦ.

ᐅᓇ ᑐᑭᖃᖅᑐᖅ ᐅᓪᓗᒃᑯᑦ ᐃᓕᓐᓂᐊᕆᐊᖅᐸᓚᐅᕐᓯᒪᔪᑦ ᓱᓕ ᐃᓅᔪᑦ ᑕᑕᑎᕆᔪᓐᓇᓕᖅᖢᑎᒃ ᐱᑖᕋᓲᑎᓂᒃ ᐊᒻᒪᓗ ᐱᑖᕋᓲᑎᓕᕆᓂᕐᒥᒃ ᐊᐅᓚᑦᑎᔨᒧᑦ ᐊᐅᓪᓚᖅᑎᑕᐅᓗᑎᒃ.

ᖃᓄᖅ ᐱᓇᓱᒍᓐᓇᕐᒪᖔᓯ

ᐅᖄᓚᒍᔅᓯ ᐅᕗᖓ 1-888-221-2898 ᓇᒡᓯᐅᔾᔨᕕᐅᔪᓐᓇᕐᑐᓯ ᑕᑕᑎᕆᐊᓕᖕᓂ ᑮᓇᐅᔭᖅᑖᕋᓲᑎᓂᒃ.

ᑕᑕᑎᖅᑕᐅᕌᓂᒃᑯᑦ ᓇᓗᒡᓯᐅᔾᔭᐅᔪᓐᓇᖅᑐᑦ ᐱᑖᕋᓲᑎᓕᕆᓂᕐᒥᒃ ᐊᐅᓚᑦᑎᔨᒧᑦ ᖃᕋᓴᐅᔭᒃᑯᑦ, ᓱᑲᑦᑐᒃᑯᑦ ᐅᕝᕙᓘᓐᓃᑦ ᑎᑎᖃᒃᑯᕕᒃᑯᑦ.

ᐅᑯᓄᖓ ᑐᕌᕈᑎᓄᑦ ᓇᒡᓯᐅᔾᔭᐅᔪᓐᓇᖅᑐᑦ:

ᑎᑎᖃᒃᑯᕕᒃᑯᑦ: Indian Day Schools Class Action Claims Administrator, c/o Deloitte, PO Box 1775, Toronto ON, M5C 0A2

ᖃᕋᓴᐅᔭᒃᑯᑦ: indiandayschools@deloitte.ca.

ᓱᑲᑦᑐᒃᑯᑦ: 1-416-366-1102.

ᐅᓇ ᐊᖏᕈᑎ ᐃᓚᖃᖅᑎᑦᑎᖕᒥᔪᖅ ᐊᓯᖏᓐᓂᒃ ᐃᑲᔪᕈᑎᒃᓴᓂᒃ:

• $200 ᒥᓕᐊᓐ ᑖᓚᐃᑦ ᐆᒧᖓ ᒪᒃᓖᓐ ᐅᓪᓗᒃᑯᑦ ᐃᓕᓐᓂᐊᕆᐊᖃᑦᑕᕐᓂᕐᒧᑦ ᐊᖏᖃᑎᒌᒍᑎᓄᑦ ᑯᐊᐳᕇᓴᓐ ᒪᑯᓄᖓ ᐱᓕᕆᐊᒃᓴᓄᑦ ᐃᑲᔪᕈᑎᒃᓴᓂᒃ ᒪᒥᓴᕐᓂᕐᒧᑦ, ᖃᓄᐃᖏᑦᑎᐊᕐᓂᕐᒧᑦ, ᐃᓕᓐᓂᐊᕐᓂᕐᒧᑦ, ᐅᖃᐅᓯᓕᕆᓂᕐᒧᑦ, ᐃᓕᖁᓯᓕᕆᓂᕐᒧᑦ ᐊᒻᒪᓗ ᐊᒃᑐᖅᑕᐅᓂᑰᖕᒥᔪᑦ ᐃᓱᒪᒋᔭᐅᔾᔪᑎᒃᓴᖏᓐᓄᑦ.
• $55 ᒥᓕᐊᓐ ᑖᓚᐃᑦ ᒪᓕᒐᓕᕆᓂᕐᒧᑦ ᐊᑭᓕᐅᑎᒃᓴᓄᑦ.
• $7 ᒥᓕᐊᓐ ᑖᓚᐃᑦ ᓗᐊᐃᔭᓄᑦ ᐃᑲᔪᖅᑎᐅᒃᑲᓐᓂᓚᐅᕐᑐᓄᑦ ᒪᓕᒐᓕᕆᓂᕐᒥᑦ ᑭᒡᒐᖅᑐᐃᔪᓂᒃ ᐱᓕᕆᐊᖃᖅᑎᐅᔪᓂᒃ ᐊᑭᓕᕆᐊᖃᖅᑎᑕᐅᓇᑎᒃ ᑮᓇᐅᔭᖅᑖᕋᓱᖃᑕᐅᔪᑦ.
• ᑭᓇᐅᔭᓂᒃ ᓴᓂᕐᕙᐃᓯᒪᓪᓗᑎᒃ ᐊᐅᓚᑦᑎᓂᕐᒧᑦ ᐊᑭᓕᐅᑎᐅᓇᔭᖅᑐᓂᒃ ᐊᑐᖅᑕᐅᔭᕆᐊᓕᖕᓂ ᐃᖃᖅᑐᐃᕕᒃᑯᑦ ᑎᒃᑯᐊᕐᓯᒪᔭᖏᓐᓂᒃ, ᐱᓕᕆᑎᑕᐅᒃᑲᓐᓂᖅᑐᓂᒃ ᑮᓇᐅᔭᖅᑖᕋᓱᖕᓂᕐᒧᑦ ᐊᐅᓚᑦᑎᔨᓄᑦ, ᑎᓗᐊᐃᑦ (Deloitte), ᑕᒪᑐᒥᖓ ᐊᖏᕈᑎᒥᒃ ᐊᑐᓕᖅᑎᑦᑎᓂᐊᕐᓂᖏᓐᓄᑦ.

ᒐᕙᒪᑐᖃᒃᑯᑦ ᐅᖃᓚᐅᕐᑐᑦ ᐊᖏᖃᑎᒌᒍᑎ ᑮᓇᐅᔭᖅᑖᖅᑎᑎᒍᑎᐅᔪᓐᓇᕐᓂᖓᓂᒃ ᑭᒃᑯᓕᒫᓂᒃ ᐊᓪᓚᓄᑦ ᐅᓪᓗᒃᑯᑦ ᐃᓕᓐᓂᐊᕆᐊᖃᑦᑕᓚᐅᕐᓯᒪᔪᓂᒃ, ᑖᒃᑯᐊᓗ ᐋᖅᑭᒃᑕᐅᓂᑰᓪᓗᑎᒃ, ᐃᑲᔫᓯᐊᖃᖅᑎᑕᐅᓪᓗᑎᒃ, ᐊᐅᓚᑕᐅᓪᓗᑎᒃ ᐊᒻᒪ ᑲᒪᒋᔭᐅᓪᓗᑎᒃ ᑲᓇᑕᐅᑉ ᒐᕙᒪᒃᑯᖏᓐᓄᑦ ᔭᓄᐊᕆ 1, 1920-ᒥᑦ ᐱᒋᐊᖅᖢᑎᒃ ᒪᑐᔭᐅᓂᖏᓐᓄᑦ ᐅᕝᕙᓘᓐᓃᑦ ᑲᓇᑕᐅᑉ ᒐᕙᒪᒃᑯᖏᓐᓂᒃ ᐊᐅᓚᑕᐅᔪᓐᓃᕐᓂᖏᓐᓄᑦ, ᐊᒻᒪᓗ ᐋᓐᓂᖅᑕᐅᓯᒪᓂᑰᔪᓄᑦ ᐅᐸᖃᑦᑕᓚᐅᕐᓂᖏᓐᓄᑦ.

ᐊᔪᙱᑐᐃᓐᓇᕆᐊᖃᕐᒥᔪᑦ ᐃᓕᓐᓂᐊᕆᐊᖅᑎᑕᐅᖃᑦᑕᓚᐅᕐᓯᒪᔪᑦ. ᐃᓕᓐᓂᐊᕆᐊᖃᑦᑕᓚᐅᕐᓯᒪᒍᕕᑦ ᒐᕙᒪᑐᖃᒃᑯᑦ ᐊᓪᓚᓄᑦ ᐅᓪᓗᒃᑯᑦ ᐃᓕᓐᓂᐊᕐᕕᖓᓄᑦ ᖃᖓᑐᐃᓐᓇᖅ, ᑮᓇᐅᔭᖅᑖᕋᓱᒍᓐᓇᖅᑐᓂᒃ ᐊᖏᖃᑎᒌᒍᑎᑎᒍᑦ.

ᑕᒪᓐᓇ ᑕᕿᖅ ᑎᑭᖢᒍ, 699 ᒐᕙᒪᑐᖃᒃᑯᑦ ᐅᓪᓗᒃᑯᑦ ᐃᓕᓐᓂᐊᕐᕕᒋᓚᐅᕐᓯᒪᔭᖏᑦ ᓇᓗᓇᐃᖅᑕᐅᓯᒪᔪᑦ ᑕᕝᕘᓇ ᐊᖏᖃᑎᒎᒍᑎᒃᑯᑦ.

ᐊᑭᖃᙱᑦᑐᒥᑦ ᒪᓕᒐᓕᕆᓂᒃᑯᑦ ᖃᐅᔨᒋᐊᒃᑲᓐᓂᕈᒪᒍᕕᑦ ᐅᕝᕙᓘᓐᓃᑦ ᐃᑲᔪᖅᑕᐅᔭᕆᐊᖃᕈᕕᑦ ᑮᓇᐅᔭᖅᑖᕋᓲᑎᓂᒃ, ᐅᖃᓪᓚᖃᑎᖃᕈᓐᓇᖅᑐᑎᑦ ᑲᑐᔾᔨᓂᒃᑯᑦ ᓗᐊᐃᔭᐅᔪᓄᑦ ᐅᕙᓂ Gowling WLG ᐅᕙᓂ

1-844-539-3815, ᐅᕗᖓᓘᓐᓃᑦ ᑎᑎᕋᕐᓗᓯ: dayschools@gowlingwlg.com, ᐅᕝᕙᓘᓐᓃᑦ ᖃᕋᓴᐅᔭᒃᑯᑦ ᓴᖅᑭᔮᒐᖓ ᑕᑯᒋᐊᕐᓗᒍ ᐅᕙᓂ www.indiandayschools.com.

ᓈᒻᒪᙱᓕᐅᕈᑎᖃᒻᒪᕆᒃᑯᕕᑦ ᐊᒻᒪ ᐅᖃᓪᓚᒍᒪᓗᑎᒃ, ᐃᓅᓯᓕᕆᔨᓂᒃ ᐊᒻᒪ ᐱᔨᑦᑎᕋᐅᑎᓂᒃ ᐊᑐᐃᓐᓇᖅᑕᖃᖅᑐᑦ ᐅᕘᓇ Hope for Wellness Help Line ᐅᕙᓂ 1-855-242-3310, ᖃᕋᓴᐅᔭᒃᑯᓪᓘᓐᓃᑦ ᐅᕙᓂ www.hopeforwellness.ca.