ᒐᕙᒪᑐᖃᒃᑯᑦ ᐊᔪᕈᓐᓃᕐᓴᖅᑎᑦᑎᒍᑎᒋᔪᒪᔭᖏᑦ ᐊᔾᔨᐅᙱᑎᑦᑎᓂᐅᕗᖅ ᐃᓄᖕᓂᒃ ᖃᓪᓗᓈᓃᑦᑐᓂᒃ, ᑐᙵᓱᕝᕕᖓᑦ ᐃᓄᐃᑦ ᐅᖃᖅᑐᑦ

ᒐᕙᒪᑐᖃᒃᑯᑦ ᓄᓇᖃᖅᑳᖅᑐᓄᑦ ᐊᔪᕈᓐᓃᕐᓴᕈᑎᒃᓴᖓᑦ ᐆᒪ ᑭᐅᕈᓕᓐ ᐸᓇᑦ, ᒥᓂᔅᑕ ᒐᕙᒪᒃᑯᓐᓄᑦ-ᓄᓇᖃᖅᑳᖅᑐᓄᓪᓗ ᒐᕙᒪᓕᕆᓂᕐᒥ, ᓴᖅᑭᑕᐅᓚᐅᕐᑐᖅ ᐃᖃᓗᖕᓂᑦ ᑕᒪᓐᓇ ᑕᖅᑭ ᐱᒋᐊᓕᓵᕐᓯᒪᑎᓪᓗᒍ “ᐊᔾᔨᐅᙱᑎᑦᑎᒃᑲᓐᓂᖅᐳᖅ” ᐃᓄᖕᓂᑦ ᐋᓐᑎᐅᕆᐅᒦᑦᑐᓂᒃ, ᐊᖓᔪᖅᑳᕆᔭᐅᔪᖅ ᐅᑯᓄᖓ ᑐᙵᓱᕝᕕᖓᑦ ᐃᓄᐃᑦ ᐅᖃᓚᐅᕐᑐᖅ ᐱᖓᑦᓯᕐᒥᑦ, ᔪᓚᐃ 17.

ᐸᓇᑦ “ᑐᓴᖅᑎᑦᑎᕗᖅ” ᐊᔪᕈᓐᓃᕐᓴᕈᑎᒃᓴᓂᒃ ᔪᓚᐃ 8-ᖑᓚᐅᕐᑐᒥᒃ ᓂᕈᐊᒐᒃᓴᐅᓂᐊᕐᓂᕐᒧᑦ ᐊᔾᔨᓕᐅᕐᓇᒥᑦ ᐃᖃᓗᖕᓂᑦ.

ᐅᓇ ᐊᔪᕈᓐᓃᕐᓴᕈᑎᒃᓴᖅ ᑕᐃᔭᐅᔪᖅ ISET, ᓇᐃᓈᕐᓯᒪᔪᖅ ᐆᒧᖓ ᓄᓇᖃᖅᑳᖅᑐᓄᑦ ᐊᔪᕈᓐᓃᕐᓴᕐᓂᕐᒧᑦ ᐊᒻᒪ ᐃᖅᑲᓇᐃᔮᓄᑦ ᐊᔪᕈᓐᓃᕐᓴᕈᑎᒃᓴᓄᑦ, ᐊᒻᒪᓗ ᐃᓇᙱᕐᓯᒪᑐᐃᓐᓇᖅᖢᓂ ᓯᕗᓂᐊᒍᑦ ᖃᓄᐃᓕᐅᕈᑎᐅᓂᑯ ᑕᐃᔭᐅᔪᖅ “ASET.” ᐃᓄᖕᓄᑦ ᑐᕌᖓᔪᓂ ᐃᓚᒋᔭᐅᓪᓗᓂ ᐊᕿᖃᖅᖢᓂ $161.2ᒥᓕᐊᓐ ᐊᕐᕌᒍᓄ ᑕᓪᓕᒪᓄᑦ ᐊᒻᒪᓗ$32.6 ᒥᓕᐊᓐ ᐊᕐᕌᒍᒧᑦ ᑭᖑᓂᐊᒍᑦ.

ᐸᓇᑦ “ᑐᓴᒐᒃᓴᖓ” ᐃᖃᓗᖕᓂ ᑐᓴᐅᒪᔭᐅᓯᒪᓕᓚᐅᕐᑐᖅ ᑕᖅᑭᓂᒃ 18-ᖑᓕᖅᑐᓂᒃ ᐅᖃᐅᓯᐅᒃᑲᓐᓂᑐᐃᓐᓇᖅᖢᓂ ᐱᓂᐊᕐᓂᕋᖅᑕᐅᓚᐅᕐᓯᒪᔪᓂᒃ ᓕᐳᕈᓪ ᒐᕙᒪᒃᑯᑦ ᕕᕝᕗᐊᕆ 2018-ᒥᑦ ᐊᐅᓚᑦᑎᔾᔪᑎᒃᓴᕆᓚᐅᕐᓯᒪᔭᖏᓐᓂᒃ.

ᒐᕙᒪᑐᖃᒃᑯᑦ ᑕᐃᓯᓚᐅᕐᑐᑦ ᑐᙵᓱᕝᕕᖓᑦ ᐃᓄᐃᑦ ᑮᓇᐅᔭᓂ ᑲᒪᔨᐅᓗᑎᒃ ᐃᓄᐃᑦ ᐊᔪᕈᓐᓃᕐᓴᕈᑎᒃᓴᖏᓐᓂᒃ ᐋᓐᑎᐅᕆᐅᒥ, ᐃᓚᖃᖅᓗᑎᒃ 6-ᓂᒃ ᐊᓯᖏᓐᓂᒃ ᐊᔾᔨᒌᙱᑦᑑᑎᓂᒃ ᐊᕕᒃᑐᖅᓯᒪᓂᒃᑯᑦ ᐱᓕᕆᕝᕕᖕᓂᒃ ᐃᓄᐃᑦ ᓄᓇᖓᓃᑦᑐᓂᒃ, ᐅᑯᑎᑐᓇᖅ ᐃᖃᓗᖕᓃᑦᑐᑦ ᑲᑭᕙᒃ ᑲᑐᔾᔨᖃᑎᒌᖏᑦ.

ᑭᓯᐊᓂᓕ ᑐᙵᓱᕝᕕᖓᑦ ᐃᓄᐃᑦ ᐅᖃᕐᓯᒪᔪᑦ ᑕᒪᓐᓇ ᐊᑐᒻᒪᕆᖕᓂᐊᕐᓂᖓᓂᒃ, ᑭᓯᐊᓂᓕ ᓄᑖᓂᒃ ᑮᓇᐅᔭᖅᑖᕐᓯᒪᙱᑦᑐ ᐊᓯᖏᓐᓂᒃ ᒫᓐᓇ ᑮᓇᐅᔭᖅᑖᕆᖃᑦᑕᖅᑕᖏᓐᓂᒃ.

ᐊᒻᒪᓗ ᒐᕙᒪᑐᖃᒃᑯᑦ ᐃᓱᒪᒋᔭᖃᕐᓯᒪᙱᒻᒪᑕ ᐅᓄᕐᓯᕚᓪᓕᒻᒪᕆᒃᑐᓂᒃ ᐃᓄᖕᓂᑦ ᖃᓪᓗᓈᑦ ᓄᓇᖓᓃᑦᑐᓂᒃ, ᐊᒻᒪᓗ ᐊᔪᕈᓐᓃᕐᓴᕈᑎᒃᓴᒃᑲᓐᓂᕐᓂᒃ ᓴᕿᑎᑦᑎᒃᑲᓐᓂᕈᑎᐅᓪᓗᓂ, ᑐᙵᓱᕝᕕᖓᑦ ᐃᓄᐃᑦ ᐅᖃᖅᑐᑦ.

“ᑐᙵᓱᕝᕕᖓᑦ ᐃᓄᐃᑦ ᑮᓇᐅᔭᖅᑖᔾᔮᙱᑦᑐᑦ ᑕᕝᕙᙵᑦ ᓄᑖᒥᑦ ᑮᓇᐅᔭᓂ ᐃᑲᔫᑎᒃᓴᒃᑲᓐᓂᐅᑎᑕᐅᔪᓂᒃ. ᐃᓄᐃᑦ ᐃᓄᐃᑦ ᓄᓇᖓᓂᒃ ᕿᒪᐃᕙᓪᓕᐊᑎᓪᓗᒋᑦ ᐊᒻᒪ ᓄᓇᑖᖅᐸᒃᖢᑎᒃ ᐋᑐᕚᒥ ᐊᒻᒪ ᐋᓐᑎᐅᕆᐅᒥ, ᓇᓗᓇᙱᒻᒪᕆᒃᐳᖅ ᒫᓐᓇ ᑐᙵᕕᒋᔭᕗᑦ ᐃᑲᔫᓯᐊᑦ ᓈᒻᒪᙱᓗᐊᕐᓂᖓᓂᒃ ᒫᓐᓇ ᐃᓄᖕᓂᑦ ᐋᓐᑎᐅᕆᐅᒦᑦᑐᓂᒃ,” ᔭᐃᓴᓐ ᓚᐸᓛᖕᒃ, ᐊᐅᓚᑦᑎᔨ ᑐᙵᓱᕝᕕᖓᑦ ᐃᓄᐃᑦᑯᓐᓂᑦ ᐅᖃᓚᐅᕐᑐᖅ ᑐᓴᒐᒃᓴᓕᐊᑎᒍᑦ.

ᑕᒪᓐᓇ ᐃᑲᔪᕐᓗᒍ, ᑐᙵᓱᕝᕕᖓᑦ ᐃᓄᐃᑦ ᐅᖃᐅᓯᖃᓚᐅᕐᑐᑦ ᑭᖑᓕᖅᐹᓂᒃ ᐃᓄᐃᑦ ᖃᔅᓯᐅᓂᖏᓐᓂᒃ ᓇᐃᓴᐃᔨᒃᑯᓐᓂᑦ ᑲᓇᑕᒥᑦ.

ᓇᐃᔭᐃᔨᒃᑯᑦ ᑲᓇᑕᒥ ᑭᖑᓕᖅᐹᖓᓂᒃ ᓇᓗᓇᐃᔭᕐᓯᒪᔭᖏᓐᓂᒃ 79,103 ᐃᓄᐃᑦ ᑲᓇᑕᒦᑦᑐᑦ ᐃᓄᖕᓂ ᓯᕗᕚᖃᖅᓯᒪᓂᖏᓐᓂᒃ.

ᑖᒃᑯᓇᙵᑦ, 31,860—ᒫᓂᐸᓗᒃ 40 ᐳᓴᓐᑎ ᑲᑎᓯᒪᔪᓂᒃ—ᓄᓇᖃᖅᑐᑦ ᐃᓄᐃᑦ ᓄᓇᖓᑦ ᓯᓚᑖᓂᒃ, ᓇᐃᓴᐃᔨᑦ ᑲᓇᑕᒥ ᑕᒪᑐᒥᖓ ᖃᓂᙵᐃᓯᒪᔪᑦ.

“ᐅᓇ ᓇᓗᓇᙱᓐᓂᖓᓄᑦ ᑮᓇᐅᔭᒃᑲᓂᕐᓂᒃ ᑐᓂᔭᐅᔾᔮᙱᓐᓂᖏᑦ ᑐᙵᓱᕝᕕᖓᑦ ᐃᓄᐃᑦ ᑕᐃᒪᓕ ᐱᔨᑦᑎᕋᕈᓐᓇᔾᔮᙱᑦᑐᒍᑦ ᓄᓇᖃᖅᑐᓂᒃ ᐋᑐᕚᒥᓐ ᐊᒻᒪ ᐋᓐᑎᐅᕆᐅᒥ ᐃᑲᔫᓯᐊᖅᑖᕆᐊᖃᒻᒪᕆᒃᑎᓪᓗᒋᑦ,” ᓚᐸᓛᖕᒃ ᐅᖃᖅᑐᖅ.

ᐱᓕᕆᐊᒃᓴᐅᑉ ᓯᕗᓪᓕᖅᐹᖏ ᐊᕐᕌᒍ ᑕᓪᓕᒪᑦ ᐱᐊᓂᒃᐸᑕ, ᐋᑐᕚ ᑐᓂᓯᓇᔭᖅᑐᖅ $32.6 ᒥᓕᐊᓐᑖᓚᓂᒃ ᐊᕐᕌᒍᒥ ᐃᓄᖕᓄᑦ ᑐᕌᖓᔪᓂᒃ ᐊᔪᕈᓐᓃᕐᓴᕈᑎᒃᓴᓄᑦ.

ᑭᓯᐊᓂᓕ ᑐᙵᓱᕝᕕᖓᑦ ᐃᓄᐃᑦ ᐅᖃᓚᐅᕐᑐᑦ ᑕᒪᓐᓇ ᐃᑲᔪᕈᑎᖃᙱᓐᓂᕋᖅᖢᒍ ᑖᒃᑯᓄᖓ, ᓲᖃᐃᒻᒪ ᑮᓇᐃᔭᐃᑦ “ᑐᕌᖓᓂᖏᓐᓄᑦ ᐊᑕᐅᓯᕐᒧᑦ” ᐊᕐᕌᒍᓄᑦ ᖁᓕᓄᑦ ᐊᒻᒪᓗ ᐃᓄᐃᑦ ᐅᓄᕐᓂᖏᑦ ᐃᓄᐃᑦ ᓄᓇᖓᑕ ᓯᓚᑖᓃᑦᑐᑦ ᐅᓄᕐᓯᕙᓪᓕᐊᑎᓪᓗᒋᑦ, ᑕᐃᒪᓕ ᓄᑖᓂᒃ ᑮᓇᐅᔭᓂ ᐱᑕᖃᔾᔮᙱᒻᒪ ᐃᖅᑲᓇᐃᔮᓄᑦ ᐊᔪᕈᓐᓃᕐᓴᕈᑎᒃᓴᓂᒃ.

“ᐃᓄᐃᑦ ᓄᓇᓕᖕᓃᙱᑦᑐᑦ ᐃᑲᔪᕆᐊᖃᖃᑦᑕᕐᒪᑕ ᐊᒻᒪᓗ ᑐᙵᓱᕝᕕᖓᑦ ᐃᓄᐃᑦ ᐊᒥᓱᓂᒃ ᐱᔨᑦᑎᕋᐅᑎᖃᖅᖢᑎᒃ ᐊᒻᒪ ᖃᓄᐃᓕᐅᕈᑎᒃᓴᖃᖅᖢᑎᒃ ᐊᑐᖃᑦᑕᖅᑕᖏᓐᓂᒃ ᐋᓐᑎᐅᕆᐅᒥ. ᐃᑲᔫᑎᒃᓴᖃᙱᓗᐊᕐᓂ ᐊᔾᔨᐅᙱᑎᑦᑎᑲᓐᓂᕋᔭᖅᑐᖅ ᐃᓄᖕᓂᒃ ᐋᓐᑎᐅᕆᐅᒥ,” ᑐᙵᓱᕝᕕᖓᑦ ᐃᓄᐃᑦ ᑐᓴᒐᒃᓴᖏᑦ ᐅᖃᕐᓯᒪᓚᐅᕐᑐᑦ ᑐᓴᒐᒃᓴᓕᐊᒃᑯᑦ.

ᑕᒪᐅᓇᑦᑕᐃᓐᓇᖅ, ᓚᐸᓛᖕᒃ ᐅᖃᓚᐅᕐᑐᖅ ᑲᑐᔾᔨᖃᑎᒌᖏᑦ ᖁᔭᓕᓯᒪᓂᕋᖅᖢᓂᒋᑦ ᐱᓕᕆᖃᑎᒋᖃᑦᑕᖅᑕᖏᓐᓂᒃ ᐊᒻᒪᓗ ᐅᑭᐅᕐᑕᖅᑐᕐᒥᑦ ᑲᑐᔾᔨᖃᑎᒌᖑᔪᓂᒃ ᐅᑯᑎᑐᓇᖅ ᑲᑭᕙᒃ ᑲᑐᔾᔨᖃᑎᒌᓂᒃ ᐊᒻᒪ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ.

“ᐱᓕᕆᖃᑎᒋᓯᒪᔭᕗᑦ ᐅᑭᐅᕐᑕᖅᑐᕐᒥ ᑕᑯᕙᙱᒻᒪᑕ ᐊᑑᑎᖃᕐᓂᖓᓂᒃ ᐊᒻᒪᓗ ᐱᑕᖃᕆᐊᖃᕐᓂᖓᓂᒃ ᐃᑲᔪᕈᑎᒃᓴᓂ ᐃᓄᖕᓄᑦ ᐊᖏᕐᕋᖏᓐᓃᙱᑦᑐᓂᒃ,” ᓚᐸᓛᖕᒃ ᐅᖃᖅᑐᖅ.