ᐃᖃᓗᖕᓂ ᓄᓇᖃᖅᑐᖅ ᓂᖀᑦ ᐊᑭᑐᓗᐊᕐᓂᖏᓐᓄᑦ ᓈᒻᒪᒃᓴᒍᑎᖃᙱᓚᖅ ᐅᑭᐅᕐᑕᖅᑐᕐᒥ 2012-ᖑᑎᓪᓗᒍ. ᒐᕙᒪᑐᖃᒃᑯᑦ ᐱᔪᒪᑲᑕᒃᑐᑦ ᐱᓕᕆᐊᓄᑦ ᑐᒃᓯᕋᐅᑎᓂᒃ ᐱᐅᓯᕚᓪᓕᖅᑎᑦᑎᓂᕐᒧᑦ ᓂᕿᖃᑦᑎᐊᕐᑎᑦᑎᓂᕐᒥᒃ ᓄᓇᕗᒥᑦ ᐊᒻᒪ ᐊᓯᖏᓐᓂᒃ ᑎᐅᕆᑑᕆᓂᒃ. (ᐊᔾᔨᙳᐊᖁᑎᒋᔭᐅᔪᖅ ᐊᔾᔨᓕᐅᕐᑕᐅᓯᒪᔪᖅ ᑕᐃᕕᑦ ᒨᕕᒧᑦ)
ᒐᕙᒪᑐᖃᒃᑯᑦ ᐱᔪᒪᓕᕐᐳᑦ ᖃᓄᐃᓕᐅᕈᑎᒃᓴᐅ-
ᔪᓐᓇᖅᑐᓂᒃ ᐱᐅᓯᕚᓪᓕᖅᑎᑦᑎᓂᕐᒥᒃ ᓂᕿᓂᒃ ᐅᑭᐅᕐᑕᖅᑐᕐᒥ
ᐱᖓᓱᑦ ᐱᓕᕆᐊᒃᓴᐅᔪᓐᓇᕐᑐᑦ ᐱᑖᖅᑎᑕᐅᑐᐃᓐᓇᕆᐊᖃᕐᑐᑦ $1 ᒥᓕᐊᓐ ᑖᓚᓂ ᐊᑐᓂ ᐱᒋᐊᕈᑎᒋᓕᕐᓂᐊᕐᑕᖏᓐᓂᒃ
For an English version of this story, see Feds call for pitches to improve access to food in the North
ᐃᓱᒪᒋᔭᖃᕐᓂᕈᕕᑦ ᖃᓄᖅ ᑳᖃᑦᑕᕐᓂᐊᓗᒃ ᐊᒻᒪ ᓂᕿᖃᖃᑦᑕᙱᓗᐊᕐᓂᖅ ᐅᑭᐅᕐᑕᖅᑐᒥᑦ ᐱᓕᕆᐊᖑᔪᓐᓇᕐᓂᖓᓂᒃ, ᒐᕙᒪᑐᖃᒃᑯᑦ ᐅᖃᕐᓯᒪᔪᑦ ᑐᓴᕈᒪᓂᕋᖅᖢᑎᒃ ᐃᓱᒪᒋᔭᔅᓯᓐᓂᒃ.
ᑲᓇᑕᐅᑉ ᐅᑭᐅᕐᑕᖅᑐᖓᓂᒃ ᐱᕙᓪᓕᐊᔪᓕᕆᔨᒃᑯᑦ ᐱᓕᕆᕝᕕᖓᑦ ᖃᖓᑦᑎᐊᓵᖅ ᑐᓴᖅᑎᑦᑎᓚᐅᕐᒪᑕ ᐱᒋᐊᖅᑎᑦᑎᓂᖏᓐᓂᒃ ᐆᒥᖓ ᐅᑭᐅᕐᑕᖅᑐᕐᒥ ᓂᕿᓄᑦ ᖃᓄᐃᓕᐅᕈᑎᒃᓴᓄᑦ ᖃᓄᐃᕈᑎᓴᓕᕆᓂᕐᒧᑦ ᐃᓱᒪᓕᐅᕈᑎᒋᔭᐅᔪᓂᒃ, ᑖᓐᓇᓕ ᐱᒋᐊᖅᑕᐅᓯᒪᔪᖅ ᐱᐅᓯᕚᓪᓕᖅᑎᑦᑎᓇᓱᒃᖢᑎᒃ ᓂᕿᖃᖅᑎᑦᑎᑦᑎᐊᕐᓂᕐᒥᒃ ᐅᑯᓇᓂ ᓄᓇᕗᑦ, ᓄᓇᑦᓯᐊᖅ ᐊᒻᒪ ᔫᑳᓐᒥᑦ.
ᓂᕈᐊᖅᑕᐅᓯᒪᓛᖑᔪᑦ ᖃᓄᐃᓕᐅᒐᒃᓴᓕᕆᓂᕐᒧᑦ ᑐᓂᔭᐅᑐᐃᓐᓇᕆᐊᖃᕐᑐᑦ $1 ᒥᓕᐊᓐ ᑖᓚᓂᒃ ᐱᓕᕆᐊᒃᓴᐅᖁᔭᖏᓐᓂᒃ ᐱᒋᐊᕈᑎᒃᓴᓂᒃ, ᑳᓐᓄᐊᑯᑦ (CanNor) ᐅᖃᓚᐅᕐᑐᑦ ᖃᖓᑦᑎᐊᓵᖅ ᑐᓴᒐᒃᓴᓕᐅᕈᑎᖏᑦᑎᒍᑦ.
ᐊᕐᕌᓂ, ᓇᐃᓴᐃᔨᒃᑯᑦ ᑲᓇᑕᒥ ᐅᓂᒃᑲᐅᓯᖃᓚᐅᕐᒪᑕ 57 ᐳᓴᓐᑎᖏᑦ ᓄᓇᕗᒥᐅᑕᑦ ᓂᕿᖃᑦᑎᐊᕈᓐᓇᙱᓗᐊᕐᓂᖏᓐᓂᒃ, ᐅᓇ ᑕᐅᑐᒃᖢᒍ 2017/18 ᖃᐅᔨᓴᕐᓂᕐᒧᑦ ᑲᑎᑕᐅᓯᒪᔪᕕᓃᑦ. ᐅᓇ ᑎᓴᒪᐃᖅᖢᓂ ᐅᓄᕐᓂᕆᔭᐅᔪᒥᒃ ᐅᓄᕐᓂᕐᓴᒻᒪᕆᐅᔪᖅ ᑲᓇᑕᓕᒫᖅ ᑕᐅᑐᒃᖢᒍ ᐃᒪᓐᓇ 12.7 ᐳᓴᓐᑎᒥᓐ.
ᓂᕿᖃᑦᑎᐊᕈᓐᓇᙱᓐᓂᖅ ᑐᑭᖃᖅᑐᖅ ᓈᒻᒪᒃᑐᓂ ᓂᕿᓂᒃ ᐱᔪᓐᓇᙱᓐᓂᕐᒥᒃ, ᐅᓗᕆᐊᓇᙱᑦᑐᓂᒃ, ᐊᒻᒪ ᓂᕿᑦᑎᐊᕙᖕᓂ ᑎᒥᒧᑦ ᐃᑲᔫᑎᓕᖕᓂ ᐊᐅᓚᑲᑕᒍᓐᓇᑦᑎᐊᕐᓂᕐᒧᑦ ᐊᒻᒪ ᐋᓐᓂᐊᕐᓴᕋᐃᓐᓇᙱᑐᓂᒃ, ᐅᕙᓂ ᓇᓗᓇᐃᕐᑕᐅᓯᒪᓂᖏᑦᑎᒍᑦ ᓄᓇᕗᒻᒥ ᓂᕿᖃᐃᓐᓇᖅᑎᑦᑎᓂᕐᒧᑦ ᑲᑐᔾᔨᖃᑎᒌᓄᑦ (Nunavut Food Security Coalition).
ᑲᑐᔾᔨᖃᑎᒌᑦ ᖃᕋᓴᐅᔭᒃᑯᑦ ᓴᖅᑭᔮᒐᖓ ᓇᓗᓇᐃᔭᐃᓯᒪᔪᖅ ᐃᓚᖏᓐᓂᒃ ᓂᕿᖃᑦᑎᐊᙱᔾᔪᑎᐅᔭᑦᑐᓂᒃ ᐅᑭᐅᕐᑕᖅᑐᕐᒥ:
- ᐃᓚᒌᑦ ᐅᓄᕐᓂᖏᓐᓄᑦ
- ᐊᑭᓕᕐᓱᕆᐊᓖᑦ ᖁᕝᕙᓯᒃᖢᑎᒃ ᐊᒻᒪ ᑮᓇᐅᔭᓕᐊᕆᔭᐅᔪᑦ ᐊᑦᑎᓗᐊᖅᖢᑎᒃ
- ᐃᖏᕐᕋᔾᔪᑎᓕᕆᓂᒃᑯᑦ ᑭᖑᕙᕆᐊᖅᑕᐅᔭᓐᓂᖏᑦ
- ᐊᓯᙳᖅᑎᑕᐅᓂᖏᑦ ᐊᖑᓇᓱᒍᓐᓇᕐᕕᐅᔪᑦ ᐊᒻᒪᓗ ᐆᒪᔪᐃᑦ ᐊᓯᙳᖅᑎᑕᐅᓂᖏᑦ
- ᐊᕙᑎᒋᔭᐅᔪᖅ ᐱᐅᔪᓐᓃᖅᑎᑕᐅᓯᒪᓂᖓᓄᑦ ᐊᒻᒪ ᐆᒪᔪᐃᑦ ᓈᒻᒪᒍᓐᓃᕐᓯᒪᓂᖏᑦ ᑎᒥᖏᑦᑎᒍᑦ
- ᑎᒥᒧᑦ ᐱᐅᓗᐊᙱᑦᑐᑦ ᓂᐅᕕᕐᕕᒃᒥᑦ ᓂᐅᕕᖅᑕᐅᔭᕆᐊᖃᕐᑐᑦ
ᐊᕐᓇᐃᑦ, ᓱᕈᓰ ᐊᒻᒪ ᓄᓇᖃᖅᑳᖅᑐᑦ ᐃᓄᐃᑦ ᒪᓂᑐᐃᓐᓇᕐᓯᒪᓗᐊᕐᒪᑕ ᓂᕿᖃᑦᑎᐊᖃᑦᑕᙱᓗᐊᕐᓂᕐᒧᑦ, ᐅᑯᐊ ᑳᓐᓄᐊᑯᑦ (CanNor) ᑐᓴᒐᒃᓴᓕᐊᖏᑦ ᐅᖃᕐᓯᒪᓚᐅᕐᑐᑦ.
ᓇᐃᓴᐃᔨᒃᑯᑦ ᑲᓇᑕᒥ (StatCan) ᖃᐅᔨᓴᕐᓂᖓ ᓴᖅᑭᑎᑦᑎᓯᒪᔪᖅ 52.3 ᐳᓴᓐᑎᖏᑦ ᐊᐃᑉᐸᖃᙱᑦᑐᓄᑦ ᐊᓈᓇᒋᔭᐅᔪᑦ ᐃᒡᓗᖏᑦ ᕿᑐᕐᖓᖃᖅᖢᑎᒃ 18 ᑐᖔᓂᒃ ᐅᑭᐅᓕᖕᓂ ᓄᓇᕗᒥᑦ ᐊᒃᓱᐊᓗᒃ ᓂᕿᒥᒃ ᐊᔪᕐᓴᕈᑎᖃᒻᒪᕆᖕᒪᑕ. ᐱᓕᕆᕝᕕᐅᔪᖅ ᓇᐃᓇᐃᑎᓂ ᓴᖅᑭᑎᑦᑎᓚᐅᕐᑐᑦ ᐅᔾᔨᕈᓱᒐᓱᒃᖢᑎᒃ ᖃᐅᔨᓴᖅᑕᐅᔪᑦ ᐃᓚᐃᓐᓇᑯᓗᒋᓚᐅᕐᓂᖏᓐᓂᒃ ᓄᓇᕗᒥᑦ.
ᑮᓇᐅᔭᓕᐅᕋᓱᒐᑎᒃ ᑲᑐᔾᔨᖃᑎᒌᖑᔪᑦ, ᓄᓇᖃᖅᑳᖅᑐᓄᑦ ᐊᒻᒪ ᓄᓇᓕᖕᓄᑦ ᒐᕙᒪᐅᔪᑦ, ᒥᑭᑦᑐᒥᒃ ᐱᓕᕆᐊᒥᒃ ᓇᖕᒥᓂᖃᖅᑐᑦ ᐊᒻᒪ ᐊᓯᖏᑦ ᑲᑐᔾᔨᖃᑎᒌᖑᔪᑦ ᐱᓕᕆᐊᒃᓴᐅᔪᓐᓇᖅᑐᒥᒃ ᑐᓂᓯᔪᓐᓇᖅᑐᑦ ᒫᔅᓯ 31 ᑎᑭᒐᓱᖕᓂᖓᓂᒃ.
ᔫᓂᐅᑎᓪᓗᒍ, ᒫᓂ 8 ᐱᓇᓱᒃᓯᒪᔪᑦ ᐃᑲᔫᑎᒃᓴᖅᑖᕐᓂᐊᖅᑐᑦ ᑎᑭᓯᒪᔪᓐᓇᕐᑐᓂᒃ $250,000-ᓄᑦ ᐱᒋᐊᕈᑎᒃᓴᐅᔪᓐᓇᖅᑐᓂᒃ ᖃᓄᐃᓕᖓᓂᐊᕐᓂᖓᓂᒃ ᐱᓕᕆᐊᕆᔪᒪᔭᖏᓐᓄᑦ.
ᑭᖑᓂᐊᒍᓪᓕ ᐱᖓᓱᓂᒃ ᓂᕈᐊᕐᖠᕐᓂᐊᕐᑐᑦ ᓂᕈᐊᖅᑕᐅᓂᐊᕐᑐᓂᒃ, ᐆᒥᖓ ᐱᑖᖅᑎᑕᐅᔪᓐᓇᕐᓂᕐᒥᒃ ᑎᑭᓪᓗᒍ $1 ᒥᓕᐊᓐ ᑖᓚᓂ ᐱᓕᕆᐊᒃᓴᖏᓐᓂᒃ ᐱᒋᐊᖅᑎᑦᑎᒻᒪᕆᒍᑎᒋᓂᐊᕐᑕᖏᓐᓂᒃ ᐊᒃᓱᓪᓗᓐᓃᑦ ᐊᑕᐅᓯᕐᒥ ᑎᐅᕆᑑᕆᒦᓐᓇᔭᕐᑐᒥᒃ.
ᑲᑎᖃᑎᒌᖕᓂᒃᑯᑦ ᐊᔪᕈᓐᓃᕐᓴᕐᓂᖅᑕᖃᕐᓂᐊᕐᑐᖅ ᐊᐅᔭᖅ ᐅᑭᐊᒃᓵᕐᓘᓐᓃᑦ ᐃᓱᒪᒋᔭᐅᓯᒪᔪᓂᒃ ᐅᖃᖃᑎᒌᑲᑕᒡᓗᑎᒃ ᑖᒃᑯᐊ ᐱᓇᓱᒃᓯᒪᔪᑦ, ᐊᔪᕈᓐᓃᕐᓯᒪᓪᓚᕆᒃᑐᓪᓗ ᑕᒪᐅᖓ ᐊᒻᒪ ᐊᓯᖏᑦ ᑕᒪᑐᒥᖓ ᐱᓕᕆᐊᒥ ᐃᓱᒪᒋᔭᖃᕐᒥᔪᑦ, ᖄᓐᓄᐊᑯᑦ ᐅᖃᓚᐅᕐᑐᑦ.
(0) Comments