ᒐᕙᒪᑐᖃᒃᑯᑦ ᑐᒃᓯᕋᐅᓯᐊᕐᓂᒃ ᐱᑲᑕᖕᓂᐊᖅᑐᑦ ᐊᕐᓇᓄᑦ ᕿᒫᕝᕕᒃᓴᒃᑲᓐᓂᕐᓄᑦ ᐅᑭᐊᒃᓵᖅ

ᓄᑖᑦ ᐱᓕᕆᐊᒃᓴᐃᑦ ᐃᓚᒋᔭᐅᓂᐊᖅᑐᑦ ᑕᓪᓕᒪᓄᑦ ᕿᒫᕝᕕᒃᓴᐅᓂᐊᖅᑐᓄᑦ ᐃᓄᐃᑦ ᓄᓇᖓᓂᒃ

ᒫᒃ ᒥᓗᕐ, ᓄᓇᖃᖅᑳᖅᑐᓕᕆᓂᖅᒧᑦ ᒥᓂᔅᑕ, ᑐᓴᒐᒃᓴᖃᓚᐅᖅᑐᖅ ᕗᕉᐱᓱ ᑐᔪᕐᒥᕕᒃᒥᑦ ᔪᓚᐃᑦ 23-ᒥᑦ. (ᐊᔾᔨᓕᐅᕆᔨ ᒥᓚᓂ ᐅᕆᑦᓵᑦ)

By ᒥᓚᓂ ᐅᕆᑦᓵᑦ

For an English version of this story, see Feds to take proposals for more women’s shelters in the fall

ᐅᑭᐊᒃᓵᖑᓕᖅᐸᑦ ᒐᕙᒪᑐᖃᒃᑯ ᑐᒃᓯᕋᐅᑎᓂᒃ ᐱᔪᒪᑲᑕᓕᓛᕐᒪᑕ ᑐᒃᓯᕋᐅᑎᓂᒃ ᐱᓕᕆᐊᖃᕈᒪᓂᕐᒧᑦ ᓄᑖᓂᒃ ᐃᓄᖕᓄᑦ ᐊᐅᓚᑕᐅᔪᓂᒃ ᕿᒫᕝᕕᒃᓴᓂᒃ ᐊᒻᒪ ᐊᖏᕐᕋᕆᔭᐅᓚᐅᑲᒍᓐᓇᖅᑐᓂᒃ, ᓴᓂᐊᒍᑦ ᐅᑯᐊ ᑕᓪᓕᒪᑦ ᐊᖏᖅᑕᐅᕌᓂᖕᓂᑯᑦ ᕿᒫᕝᕕᒃᓴᑦ ᐃᓄᐃᑦ ᓄᓇᖓᓂ.

ᑕᒪᒃᑯᐊᓕ ᐊᖏᖅᑕᐅᓯᒪᔪᓄᑦ ᑐᒃᓯᕋᐅᓯᐊᓄᑦ, ᐃᑲᔪᕈᑎᒃᓴᑦ ᒪᑯᓄᖓ ᑐᕌᖓᓇᔭᖅᖢᑎᒃ ᓄᑖᓄᑦ ᐃᒡᓗᓕᐊᕆᔭᐅᓇᔭᖅᑐᓄᑦ ᐅᕝᕙᓘᓐᓃᑦ ᓴᓇᓯᒫᓂᒃᑐᓂᒃ ᓄᑖᙳᕆᐊᖅᑎᑦᑎᔾᔪᑎᐅᓗᑎᒃ, ᐊᒻᒪᓗ ᐊᐅᓚᑕᐅᓂᖏᓐᓄᑦ ᐊᑭᓕᐅᑎᒃᓴᐅᓇᔭᖅᑐᓂᒃ.

ᓄᓇᖃᖅᑳᖅᑐᓕᕆᓂᖅᒧᑦ ᒥᓂᔅᑕ ᒫᒃ ᒪᓗᕐ ᑕᒪᑐᒥᖓ ᑐᓴᒐᒃᓴᓕᐅᓚᐅᕐᓯᒪᔪᖅ ᔪᓚᐃ 23-ᖑᑎᓪᓗᒍ ᕗᕉᐱᓱ ᑐᔪᕐᒥᕕᒃᒥ, ᐅᖃᐅᓯᖃᖅᖢᓂ ᐃᑲᔫᑎᒃᓴᖅᑕᖃᕐᓂᖓᓂᒃ ᑐᓴᑕᐅᔾᔪᑎᐅᓚᐅᕐᓯᒪᔪᓂᒃ ᐄᐳᕉᑎᓪᓗᒍ ᒐᕙᒪᑐᖃᒃᑯᑦ ᐊᐅᓚᔾᔪᑎᒃᓴᓕᕆᑎᓪᓗᒋᑦ.

ᐊᓗᑭ ᑰᑦᑎᖅ, ᓄᓇᕗᑦ ᑐᙵᕕᒃᑯᓐᓄᑦ ᐊᖓᔪᖅᑳᕆᔭᐅᔪᖅ, ᐅᐸᒍᑎᓯᒪᓚᐅᕐᒥᔪᖅ, ᐅᑯᐊᓕ ᐋᒪᑦ ᕼᐅᓴᓐ, ᐃᓚᒌᓄᑦ, ᓱᕈᓯᓕᕆᓂᕐᒧᓪᓗ ᐊᒻᒪ ᐱᕙᓪᓕᐊᔪᓕᕆᓂᕐᒧᑦ ᒥᓂᔅᑕ ᐊᒻᒪ ᕇᐱᑲ ᑲᓪᓗ, ᐊᖓᔪᖅᑳᖅ ᐸᐅᒃᑑᑎᒃᑯᓐᓄ ᓵᖅᑭᔮᑲᐅᑎᒋᓐᓇᖅᑐᒃᑯᑦ ᐅᐸᒍᑎᓯᒪᓚᐅᖅᖢᑎᒃ.

ᐅᑯᐊ ᓄᑖᑦ ᕿᒫᕝᕕᒃᓴᑦ ᐃᑲᔫᑎᒃᓴᓂᙶᕐᓂᐊᖅᑐᑦ ᒫᓃᓪᓗᑎᒃ $724.1 ᒥᓕᐊᓐ ᑖᓚᖏᓐᓂᒃ ᓴᓂᕐᕙᒃᑕᐅᓯᒪᔪᓂᒃ ᓄᓇᖃᖅᑳᖅᑐᓄᑦ ᐃᑲᔪᕈᑎᒃᓴᓂᒃ ᐃᓚᒌᓂᒃ ᐋᓐᓂᖅᓱᖅᑕᐅᓗᐊᖅᐸᖕᓂᕐᒧᑦ ᐊᑐᖃᑦᑕᖅᑐᓄᑦ ᐊᒻᒪᓗ ᕿᒫᕝᕕᒃᓴᓂᒃ ᐅᓄᖅᓯᕚᓪᓕᖅᑎᑦᑎᓇᓱᒃᖢᑎᒃ ᐊᒻᒪ ᐃᒡᓗᒋᔭᐅᓚᐅᑲᒍᓐᓇᕋᔭᖅᑐᓂᒃ ᑲᓇᑕᒥᐅᑕᓕᒫᓄᑦ.

ᒪᓗᕐ ᐅᖃᓚᐅᖅᑐᖅ ᓇᓗᓇᐃᕐᓯᓯᒪᓪᓚᕆᙱᓐᓂᕋᖅᖢᓂᒋᑦ ᐅᑯᓕᖓ ᐃᓗᖕᓗᑦ. ᐊᓪᓚᓄᑦ ᐅᕝᕙᓘᓐᓃᑦ ᐊᓪᓚᖓᔪᓄᑦ ᑐᓂᔭᐅᔾᔪᑎᐅᓂᐊᖅᑐᓂᒃ ᑕᐃᒪᓕ ᐃᓄᖕᓄᑦ ᑐᓂᔭᐅᓇᔭᖅᑐᑦ ᖃᐅᔨᒪᔭᐅᓪᓚᕆᙱᑦᑐᖅ.

“ᐊᒃᓱᐊᓗᒃ ᐱᔪᒪᓂᖅᑕᖃᕐᒪᑦ ᑕᒪᑐᒧᖓ,” ᒪᓗ ᐅᖃᖅᑐᖅ.

“ᐅᓄᕈᓘᔭᖅᑐᑦ ᓄᓇᓖᑦ ᐊᒻᒪ ᐃᓄᑭᑦᑑᑎᐅᓪᓗᑎᒃ ᐃᓄᐃᑦ ᓄᓇᖓᓂᒃ, ᑕᒪᑐᒥᖓ ᐱᔪᒪᓂᖅᑕᖃᕐᒪᓐ,” ᐅᖃᖅᑐᖅ, ᐅᖃᒃᑲᓐᓂᖅᖢᓂ ᓄᓇᕗᒧᑦ ᐊᕕᒃᑐᖅᓯᒪᓂᒃᑰᖓᓂᖅᑕᐅᖅ ᐃᓱᒪᒋᔭᐅᔭᕆᐊᖃᕐᓂᐊᕐᒥᖕᒪᑦ. ᐅᖃᕆᓪᓗᓂ ᐅᑯᐊ ᐃᒡᓗᓕᕆᔨᕐᔪᐊᒃᑯᑦ (CMHC) ᐱᓕᕆᔾᔪᓯᖃᕐᓂᕋᖅᖢᓂᒋᑦ ᑕᒪᒃᑯᐊ ᐱᓕᕆᐊᒃᓴᐃᑦ ᐊᖏᖅᑕᐅᕙᒃᑐᑦ ᐱᔭᐅᔭᕆᐊᖃᕐᓂᒃᑰᖓᑎᑕᐅᓪᓗᓂ.

ᐃᒡᓗᓕᕆᔨᕐᔪᐊᒃᑯᑦ ᑲᒪᒋᔭᖃᕐᒪᑕ $420 ᒥᓕᐊᓐᑖᓚᓂ ᐃᑲᔫᑎᒃᓴᓂᙶᖅᑐᓂᒃ ᒪᑯᓄᖓ ᐃᒡᓗᓕᐅᕐᓂᕐᒥᒃ 38-ᓂᒃ ᓄᓇᖃᖅᑳᖅᑐᓄᑦ ᐊᐅᓚᑕᐅᓂᐊᖅᑐᓂᒃ ᕿᒫᕝᕕᒃᓴᓂᒃ ᐊᒻᒪᓗ ᒫᓂ 50-ᖏᓐᓂᒃ ᐃᒡᓗᒋᔭᐅᓚᐅᑲᒍᓐᓇᕐᓂᐊᖅᑐᓂᒃ ᑲᓇᑕᒥ.

“ᐱᓕᕆᖃᑎᖃᕐᓂᖅᑕᖃᖅᑎᓪᓗᒍ ᐅᓪᓗᒥ, ᐃᓱᒪᒻᒪᕆᒃᑐᖓ ᑕᒪᒃᑯᐊ ᐃᒡᓗᒃᓴᐃᑦ ᐃᓚᖏᑦ ᐃᓄᐃᑦ ᓄᓇᓕᖏᓐᓄᐊᖅᑕᐅᓂᐊᕆᐊᒃᓴᖏᓐᓂᒃ,” ᒪᓗ ᐅᖃᖅᑐᖅ.

ᐅᖃᓚᐅᕐᑐᖅ ᐱᓕᕆᐊᕆᓂᐊᖅᑕᖓᓕ ᐱᓕᕆᕝᕕᖓᑕ ᐊᒃᓱᕈᕐᓇᕈᑎᒋᔭᖓ ᐊᕐᓇᓄᑦ ᕿᒫᕝᕕᒃᓴᓂᒃ ᓴᓇᓗᓂ ᓄᓇᕗᒥᑦ ᐅᓇ ᖃᐅᔨᒪᔭᐅᑎᑦᑎᑦᑕᐃᓕᓂᖅ, ᐱᓗᐊᖅᑐᒥ ᐅᑭᐅᕐᑕᖅᑐᕐᒥ ᓄᓴᓕᖕᓂ.

ᔭᓄᐊᕆᐅᓚᐅᕐᓯᒪᔪᒥᑦ ᒐᕙᒪᒃᑯᑦ ᑐᓴᖅᑎᑦᑎᓚᐅᖅᓯᒪᖕᒪᑕ ᑕᓪᓕᒪᓂᒃ ᓄᑖᓂᒃ ᕿᒫᕝᕕᒃᓴᓕᐅᕐᓂᐊᕐᓂᕋᖅᖢᑎᒃ ᐊᕐᓇᓄᑦ ᐊᒻᒪ ᕿᑐᕐᖓᖏᓐᓄᑦ ᐋᓐᓂᖅᓱᖅᑕᐅᕙᖕᓂᕐᒥ ᕿᒫᑎᑕᐅᔪᓄᑦ —ᐊᑕᐅᓯᕐᒥ ᓴᓇᓂᐊᖅᖢᑎᒃ ᐃᓄᐃᑦ ᓄᓇᖓᑕ ᐊᕕᒃᑐᖅᓯᒪᓂᖓᒍᑦ ᐊᒻᒪ ᐊᑕᐅᓯᖅ ᐋᑐᕚᒥ.

ᑕᓪᓕᕐᒥᐅᑎᓪᓗᒍ, ᒪᓗᕐ ᐅᖃᓚᐅᕐᑐᖅ ᐅᑭᐅᕐᑕᖅᑐᖅ ᕿᓚᒥᕈᓗᒃ ᐃᒡᓗᓕᐅᕐᓇᖅᑎᓪᓗᒍ ᐊᒻᒪᓗ ᐊᓯᖏᓐᓂᒃ ᐱᓕᕆᕈᓘᔭᕐᓇᖅᑎᓪᓗᒍ, ᐅᓇ ᐋᑐᕚᒥ ᓴᓇᔭᐅᓂᐊᕐᑐᖅ ᐱᐊᓂᒃᑕᐅᖅᑳᕋᔭᕐᑐᖅ ᐊᒻᒪ ᐊᐅᓚᑕᐅᓵᓕᓂᕐᓴᐅᓗᓂ.

“ᐃᓄᐃᑦ ᐊᑯᓂᒍᓱᒻᒪᕆᖕᒪᑕ ᐃᒡᓗᓕᐅᕐᓂᖅ ᐱᒋᐊᕐᓂᐊᕐᓂᖓᓂᒃ,” ᒪᓗᕐ ᐅᖃᖅᑐᖅ.

“ᑕᑯᔪᒪᑦᑎᐊᕐᒪᑕ ᕿᒫᕝᕕᒃᓴᓂᒃ ᖃᖔᓗᖕᓂ, ᑭᓯᐊᓂᓕ ᔭᓄᐊᕆᒥ ᑐᓴᖅᑎᑦᑎᔾᔪᑎᐅᓚᐅᕐᑐᖅ ᓇᓗᓇᕈᓐᓃᕈᑎᐅᓚᐅᕐᑐᖅ ᑕᒪᓐᓇ ᐱᓕᕆᐊᖑᓪᓚᕆᖕᓂᐊᓕᕐᓂᖓᓂᒃ.”

ᐊᐱᕆᔭᐅᖕᒪᑦ ᖃᓄᐃᓕᐅᖅᓯᒪᓕᕆᐊᒃᓴᖏᓐᓂᒃ ᑕᐃᒪᙵᑦ ᑕᒪᓐᓇ ᑐᓴᖅᑎᑦᑎᔾᔪᑎᐅᓚᐅᕐᓯᒪᑎᓪᓗᒍ ᑕᖅᑭᐅᓚᐅᖅᓯᒪᔪᖅ 7-ᐅᓕᖅᑐᓂᒃ, ᐸᐅᒃᑑᑎᒃᑯᑦ ᐊᖓᔪᖅᑳᖓ ᕇᐱᑲ ᑲᓪᓗ ᐅᖃᓚᐅᕐᑐᖅ ᑕᓪᓕᒪᓂᒃ ᐊᖏᖅᑕᐅᕌᓂᒃᓯᒪᔪᓂᒃ ᓴᓇᔭᐅᓂᐊᖅᑐᓂᒃ, ᐅᓇ ᐋᑐᕚᒥ ᓴᓇᔭᐅᓂᐊᖅᑐᖅ ᓯᕗᓪᓕᖅᐹᖑᓂᐊᕋᓱᒋᔭᖓ ᐃᓱᒪᒋᓪᓗᒋᑦ ᓄᕙᒡᔪᐊᕐᓇᖅ-19-ᒧᑦ ᖃᓄᐃᓕᐅᖁᔭᐅᙱᔾᔪᑎᐅᔪᑦ.

ᒪᑯᓄᖓᓕ ᓄᑖᓄᑦ ᕿᒫᕝᕕᒃᓴᐅᓂᐊᖅᑐᓄᑦ ᐅᑭᐊᒃᓵᖅ ᑐᒃᓯᕋᐅᑎᓂᒃ ᐱᔪᒪᔾᔪᑎᐅᓂᐊᖅᑐᓄᑦ, ᑖᒃᑯᐊᓕ ᐱᓕᕆᐊᖑᓂᐊᖅᑐᑦ ᐃᓱᒪᒋᔭᐅᓗᓂ ᓇᓂ ᑖᒃᑯᐊ ᐊᑐᖅᑕᐅᔭᕆᐊᖃᓛᖑᓂᖏᑦᑎᒍᑦ, ᐊᒻᒪᓗ ᖃᐅᔨᐊᓪᓚᓚᐅᕐᓗᑎᒃ “ᓴᓇᓯᒋᐊᕐᓂᐊᖅᖢᑎᒃ ᕿᓚᒻᒥᐅᓛᒃᑯᑦ ᐊᔪᖏᓐᓂᖏᑦᑎᒍᑦ,” ᐅᖃᖅᑐᖅ.

Share This Story

(0) Comments